العودة   موقع البركل > منتديات البركل > الآداب والفنون > منتدى الشعر
التعليمـــات المجموعات الإجتماعية التقويم البحث مشاركات اليوم اجعل كافة الأقسام مقروءة

إضافة رد
 
أدوات الموضوع انواع عرض الموضوع
  #1  
قديم 10-07-2008, 01:50 PM
الصورة الرمزية شهرزاد
شهرزاد شهرزاد غير متواجد حالياً
Senior Member
 
تاريخ التسجيل: Dec 2007
المشاركات: 2,437
افتراضي الشاعر/خالد عبد الله بخيت

سكة رحيل

نحن البينا بينا وبينا بينا المستحيل
عبر المسافات البتصرع كل ميل
عبرالمدائن والمتاهات والزمن والأماني الغالية والحلم الجميل
***
لا ودرك مني البعاد والدنيا في سكة رحيل
لا جيتي خاطري عشان أجيك بي لهفة الريد النبيل
***
وأنا في سجون ريدك دوام أبد الأوابد ليك نزيل
لا قادر إنتظرك شجون لا إخترت من غيرك بديل
***
كيفن تفوتي نهار عشم وإتوسدك مأساتي ليل
ما طال ما طالك أمل والباقي من دربك طويل
***
خليهو فيكي الإنكسار وإتقبلي الشكر الجزيل
وآ ضيعة القلب الهواك وآ حسرة الريدة القبيل
***
آمالي لو ماتت تواه تأويني في قلبك عليل
خليني أمشي على السراب الرجعة امست مستحيل
***
أحزاني زادتني إكتئاب وجسيمي يتلاوح نحيل
يامانعة أنسامك تمر كيف غصون ريدك تميل
***
ياسارية في دمعة بكاي أقربلي من قلبك سهيل
ياناطقة بي عشقك سكات ويراعي بي صمتك كفيل
***
يارايعه زي وعد الرزاز الشال ويوم لاقى النخيل
بين التقانت والضفاف والنيل مقاسمو السلسبيل
***
هادنت أطيافك دموع شديت يقيني سرجتو خيل
خيمت .. وجدان الأسف شداني للأحزان صهيل
***
من خيل معاناتي المعاك والباكيه اتلاقت صليل
إتعمقّت وجداني هم معذورة جافاها الخليل
***
ياغُرة العين السواد ياربة الخد الأسيل
يا منبع التيه والدلال يا ناعسة الطرف الكحيل
***
فوق ضلك الرامي إنتظار يا وجعه خليتو المقيل
خليتو حبك لو هواك خلاني بي وعدك ذليل !!
__________________
رد مع اقتباس
  #2  
قديم 10-07-2008, 01:57 PM
الصورة الرمزية شهرزاد
شهرزاد شهرزاد غير متواجد حالياً
Senior Member
 
تاريخ التسجيل: Dec 2007
المشاركات: 2,437
افتراضي

يادنيـــا

يادنيا بي حظي الزريع بتحمل القدر المريع
خايف من الاحزان اضيع ما القي بي قربي الوجيع
صوت القوافي البيك تنوح والسالفه في لحظة وضـوع
فارقتي والايدين تلوح رسبتي في عيني الدمـوع
وريني وين بعـدك اروح بينا اقطع عشم الرجوع
في قلبي ما بتبري الجروح من فتي فارقتي الهجـيع
***
ليه دنيتــــك كانت سـراب ممــدودا بي مد العذاب
احزني لازمني اكتئاب وانا بي وراكي ـبابي شاب
سدي المداخل وكل باب طـليني من دنــيا الغياب
بلقاكي في نفـس الرباب واشعاري ليك عالم وسيع
ساهرتا طول الليل معاك كم مره عـديت النجـــوم
ما طافت الاحلام رؤاك لو اضمن احلمـــبك بــنوم
ياقلبي يا ضايع كفاك شـن جبــتا غير حسرا وهموم
ابكيها لو ينفع بكاك الدمعه ما بتجــــــدي الصــريع
***
فارقـتي في عـــــز الغرام من قبل ما تثبت خطاي
افردتا ليك درر الكلام خلـــدتا وصفـــك في غناي
ماانتي ما بيـــــن المسام في كل احســاسي ومعاي
طفل الغرام البينــــا نام اتلافتو الاقـــــدار رضيع
***
سبتيني لحــزني العميق للحسره لخـــاطري الجريح
ياريتني لو اقدر افيق لو متــــــــا يمـــكن اســتريح
يا دنيا طال بي الطريق وانا بين مسافــاتك كـــسيح
كيفن وصولي بلا رفيق والخطـوه كيف بعدك تطـيع
***
زود شجــوني علي العـلي طيف المهاجر مني فات
يادنيا ما بايـــــدي شئ غير الله يلهـــمني الثبــات
والباقي في جواي حي ياحليــلو ودع سيــــدو مات
ببكيهو عمــري الباقي لي فوق الدموع لو بستطيــع
__________________
رد مع اقتباس
  #3  
قديم 10-07-2008, 05:24 PM
ود إدريس ود إدريس غير متواجد حالياً
Senior Member
 
تاريخ التسجيل: Feb 2008
الدولة: السعوديه الرياض
المشاركات: 488
افتراضي

أختنـــــــــا الرائعه شهرزاد ....لك التحيه وعيدك مبارك ..
وبعودتك تعود الرونقه والتوهج لقسم الشعر والشعراء ...
حقيقة بتواصلك فى هذا المجال عرفنــا الكثير عن هذا الشعر
الراقى لأهلنـــــــــا من شعراء ديار شايق ...
نتمنى التواصل بالكتابه وتعريفنـــا بكل ماهو جديد عن هذا الشعر
مشكوره كتير ونســــأل الله أن يمتعك بالعافيه ...لك ودى
__________________
يا كريم لطفـــك علـــىّ ..يا دارى بالحـــال
رد مع اقتباس
  #4  
قديم 10-08-2008, 11:36 AM
الصورة الرمزية شهرزاد
شهرزاد شهرزاد غير متواجد حالياً
Senior Member
 
تاريخ التسجيل: Dec 2007
المشاركات: 2,437
افتراضي

اقتباس:
المشاركة الأصلية كتبت بواسطة ود إدريس مشاهدة المشاركة
أختنـــــــــا الرائعه شهرزاد ....لك التحيه وعيدك مبارك ..
وبعودتك تعود الرونقه والتوهج لقسم الشعر والشعراء ...
حقيقة بتواصلك فى هذا المجال عرفنــا الكثير عن هذا الشعر
الراقى لأهلنـــــــــا من شعراء ديار شايق ...
نتمنى التواصل بالكتابه وتعريفنـــا بكل ماهو جديد عن هذا الشعر
مشكوره كتير ونســــأل الله أن يمتعك بالعافيه ...لك ودى
أهلا ومرحب بيك دايماً أخي ود إدريس
وكل سنة وأنت بألف خير ..
__________________
رد مع اقتباس
  #5  
قديم 10-08-2008, 11:40 AM
الصورة الرمزية شهرزاد
شهرزاد شهرزاد غير متواجد حالياً
Senior Member
 
تاريخ التسجيل: Dec 2007
المشاركات: 2,437
افتراضي

جسيمي الناحل


يا ضارب جسيمي الناحل هديت بي قساوتك حيلو
شلتا جنازتي وانت القاتل ظلمك ما في زيو مثيلو
الصرح المشيد عالى هديتو وبقيت تبكيلو
ودرتا الحنين الغالي كانوا اشجارو راميه ضليو
اظلم لا يهمك حالي لو كان عمري عندك شيلو
شديت في المسافه رحالى الخليتو الله كفيلو
الشر يا قليبي الباكي ابعد من بعيد غنيلو
قبلي يا مشاعري وراكى درب الريد حاربي دليلو
دفقي يا عيوني تراكي فجرك جاكي سايق ليلو
وارحلي يا سنيني براكي والحقي في عميري رحيلو
الصبر الطويل مديتو واتقطع معاك حبيلو
النغم الحزين غنيتو وانتى معاي صفقتيلو
الهم من وراك لاويتو والأسى ياما جاكى زميلو
لو ينفع بكايا بكيتو بينك ما رجاني عديلو
قلبك لي دائما قاسي رغم العزه كنتا زليلو
فقدني الهناء واحساسي ما قررتا تاني اجيلو
فتر في دواخلي حماسي لو سمع الزمن بشكيلو
درتا كتما حر انفاسي وين بالله قلبي تطيلو
شوقك لليالي بسيبو بتحمل اذاهو وويلو
طال ما قليبي خانو حبيبو فتش من وراهو بديلو
والريد الحرقني لهيبو لو سيف عاد كفاني صليبو
الحق كان يقيني دريبو لا يرجعلى لا بمشلو
في الأخر بدور اوصيك فرعك لا يغرك ميلو
ما تتغشي في عينيك محياك كل يوم عن نيلو
انسجي من ورود خديكى للزمن العبوس اكليلو
والباقي المفضل فيك لو شداك انتى ارخيلو.
__________________
رد مع اقتباس
  #6  
قديم 10-08-2008, 11:44 AM
الصورة الرمزية شهرزاد
شهرزاد شهرزاد غير متواجد حالياً
Senior Member
 
تاريخ التسجيل: Dec 2007
المشاركات: 2,437
افتراضي

يا غـــــــادرة


ورمـتي بالـدمــعه الـورس بالعـبرة سديـــتي النفــــس
كـــملتى مأسـي الدنـيا تـب ما باقـي غـير المـوت وبس
لا بـاح قلـيبك حـبي يـــــوم لانادي بـي شـوق ولا همس
احسـاسو بي فـوق للنـجوم غير فكره ضاعن ما اتلمس
فتشـت عـنك في الهمـــــوم وكتـين رياح غلـبك كــرس
يا ســــابرة بالصي والجدب وين فـــجري لوليك دمس
ياغــادرة كان عشقك تساب بي موجـــود اتهــد الترس
ناديـــتا صوتك في الغياب بي ذكـــرتك رن ا لجـــرس
طليــــتي لوعه واكـتاب وعــدك علي الاحزان جـــلس
فــــوق راحتوانجم التعب والنحــس من نحــس اتنحس
شــان انــتى ما بتسـتاهـلي قلــبا عشـق حسـنك هــوس
كـــان بي غرامك مبــتلي عقــلواصطفاهوهواكي مـس
وريــني شقــيش ترحلى ؟ وخطــاي اضـناها الـوكــس
وعلــم يقيـني مـع المـهب خفـــاق وماتقـــول اتنـــكس
قــررت يا غــادرة الرحـيل بي همــي سرجـت الــفرس
يكفيـكي من سفري الطويل كــشرزمـاني عــلي عـبس
لاقــيت صباح امالي لـيل في لحظــة اتهــجم كـــــبس
عــزرا عترت انا في المطب وفــؤادي من قـدرك درس
البينا واضح في العــيون داريـــتو ما اجـــداني دس
بين شوقي والخوف والجنون احساسي باللوعة اتحبس
كنتـــيلي في دنــيايا كون رسلــتي احــزانك عــسس
بالحـيل رحيل الشوق وجب واديـــكي مابــلاهو رس
يا كايسة ريدك في القروش يا ضايــعة ابشري بالفــلس
الــروعة في ظــنك نقوش تالاكـي صــيف الهم قـــلس
الاصــلي مابيـــعرف رتوش والضـئ بدايتو من القبس
والشـــوق وقد نارك لــهب يا شايلــه من نطــقك
__________________
رد مع اقتباس
  #7  
قديم 10-08-2008, 11:46 AM
الصورة الرمزية شهرزاد
شهرزاد شهرزاد غير متواجد حالياً
Senior Member
 
تاريخ التسجيل: Dec 2007
المشاركات: 2,437
افتراضي

أمــي


قبال ما يحصل الميلاد وقبال يستبين رسمي
وكت ساكن غيوم الغيب وطيفا في الخيال وهمي
اكيد جواك كنتا وجود قريب بالرغم من عدمي
ودعاك يا الله جيبو ولد يتم والفرحه لى حلمى
منو الغيرك بيمسح لى دميعاتي منو الغيرك بشيل همي
منو الزيك منو المتلك محال ما بلقي زي أمي
شغلتك تسعه فوق تسعه مقدره بي حسب علمي
نزلتا أنا من حشاك صارخ وبرضو صراخي كان حتمي
وفي لحظة وصولى ألم صبر الدنيا ما بيحمي
أنا لو كان لى فيهو خيار كان قطعتو من جسمي
منو الفند كلامي قبل أقولو واحكيهو من فمي
منو الترجم اشاراتي وترجم في السكات نضمي
منو اليا يمه سهر الليل عشان اتهنا في نومي
وما بيتحمل يتألم يشيل آلامو من ألمي
بعد تميتا عمري سبوع حسابك من ظهر نجمي
عليك اتلملمو الحبان عشان يختارو لى اسمي
يلازم عمري في الأيام ويبقي مع السنين وسمي
وكنتا وكت معاك ابسم تزيدي سرور وتبتسمي
خلاص تميتا سبعه شهور ولسه ما حضر فهمي
صغير دابي في الحبيان شويفع وما قوى عضمي
اتبتب لسه في التاتاي اشيل جسمي وسريع ارمي
وما بقدر خطاوي أسير لدن يا يمه كان عضمي
كبرتا مع الليالي عمر وبرضو معاي كبر حجمي
مشيت للمدرسه تلميذ وحاضن شنطتي وقلمي
اتعلمتا كيف اكتب واصور لحظة إلهامي
عشقتا الكلمة والأشعار سكبتا على الوتر نغمي
بريدك روحي يا يمه بتسري مع الوريد دمي
تضمدي فيني جرح الهم بلاك يا يمه كان يدمي
بشيلك زادي في الترحال وبرضو يقيني في حرمي
بتهملي يمه في نفسك ودايما بيه تهتمي
كان يا يمه ما بريت وآ اسفاي وآ ندمي
عشانك يا ملاك الكون بشد قوس الشعر سهمي
بريدك يمه غيمة خير وبي حنك علي تهمي
بعيشك دنيا في دنياي وحلمك يمه فاق حلمي.
__________________
رد مع اقتباس
إضافة رد

« الموضوع السابق | الموضوع التالي »
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 08:47 AM.

زوار البركل من تاريخ 2011/7/11
free counters
التصميم والدعم الفني


Design By: Miner Skinz.com
Powered by vBulletin® Version 3.8.1, Copyright ©2000 - 2014, Jelsoft Enterprises Ltd. TranZ By Almuhajir