قوانين موقع البركل!!! مجلس الادارة

مهرجان جبل البركل - الحلم اصبح حقيقه !!! أزهرى يس


العودة   موقع البركل > منتديات البركل > الآداب والفنون > منتدى القصة
التعليمـــات المجموعات الإجتماعية التقويم البحث مشاركات اليوم اجعل كافة الأقسام مقروءة

إضافة رد
 
أدوات الموضوع انواع عرض الموضوع
  #1  
قديم 09-04-2010, 09:56 PM
الباسابي الباسابي غير متواجد حالياً
Junior Member
 
تاريخ التسجيل: Aug 2010
المشاركات: 14
Post قصة مغترب سوداني مع الزواج

بسم الله الرحمن الرحيم
السلام عليكم يا ناس البركل وعلي اهلنا الفي الشمال كلهم وكل سنة وانتو طيبين يشرفني ان انتمي الي منتداكم العامر وهذه اول مشاركة لي معكم وانشاء الله تعجبكم

لقد تلقيت هذه القصة عن طريق الايميل ولقد اعجبتني واحب ان انقلها لكم.....

وهي للكاتب محمد السماني ***

القصة لي شاب سوداني مغترب مع الزواج


قبل كم سنة كدا كان نويت اخطب وزي اي مغترب محتار اخطب منو واعرس منو .... فكرت كويس قلت ما دام الواحد ما راجع قريب لي السودان يشوف واحدة من بنات المغتربين الموجودين هنا .. وبدأت البحث......
انتظاري لم يطول فقد وصلت سريعا حيث وقعت عيني علي زول بناتو كبار بزورونا طواااالي حيث كنا نسكن عزابة بمستويات مختلفة فينا كبار وفينا صغار وفينا الموظفين والشغالين اعمال حرة وهلم جرا ,, خلاص قلت اشوف واحدة من بنات عمك دا والسلام وهو صديق احد اعمامنا الموجودين في البيت وهو من منطقتنا وشوفتا تعاملو وكرمو معانا كيف وترحيبو الحار بينا ودعوتو لينا باستمرار في كل المناسابات وكل خميس عمك بجينا البيت يتونس معانا ويشرب الشاي ويضرب معانا اكل العزابة عادي طبائع الزول دا عجبتني شديد وبعدين هو وسيم برغم انو كبير قلتا لي نفسي يا اخوي ما بتلقي زول احسن من دا ,, المهم استفسرتا جاي جاي لقيت عندو بت يادوب اتخرجت من الجامعة وهي شهادة عربية وحتكون فاهمة البلد -- سماحتها دي هي الباقية لي هل هي سمحة ولا شينة ؟؟؟ والله دا الباقي لي اعرفو ,,, بس كيف ؟؟ المهم انا قعدتا شهر اسال شوية شوية واجرجر عمنا الساكن معانا في الكلام برغم انو حسا بيا لكن هو زاتو ذي ما شافهم - قدر ما حاولتا اشوفها بقي لي صعب بس ربنا فرجها بزوجة خالي بعد ما جابها معاهو وطبعا هي قريبتي وبت حلتي يعني ما غريبة علي وخالي زاتو كان ساكن معانا بس هي جديدة في الغربة والحكاية محتاجة ليها صبر مني لحدي ما تتعرف عليهم وتتعود علي البلد ,, ما مشكلة نحن ورانا حاجة ؟؟
مرت الايام لحدي ما شوفتا عمك باسرته داخلين علي بيت خالي وطبعا كلهن اسود في اسود وعينك ما تشوف شئ كلوكلو -- اها الفرصة جات لحدي عندي وما بضيعها ,, تاني يوم طوالي مشيت ليك لي مرة خالي وقلت ليها : ناس فلان جوكم امس شايف ..
- اي والله ناس ظريفين .
- وجكسيهم كيف ؟؟
- ها بوهية مغتربين ساي
- هههه كيف يعني ؟؟؟
- هوووووووي شوف ليك واحدة من السودان وخلاص .
طبعا ما وصلتا معاها لي اي حاجة رغم انها شكرتهم بدون ما تقصد وادتني فكرة ما بطالة عنهم بس لسه محتار .. وقالو صاحب الحاجة ارعن عشان كدا اتحمست زيادة وانا بدردق في عمنا المعانا في البيت وابو البت في الونسة والعرس والجماعة حسوا بحاجة كدا عرفوا انو انا عندي نية زواج هنا في السعودية - والله ابو البنية طوالي قلب الموجة علي واهتمامو زاد بي شوية وكل ما يجي يسال الجماعة عني وهاك يا اتصالات وشاي مغرب وعمك اي برنامج عندو يتصل علي عشان اكون معاهم ,, غايتو خفتا قلت يمكن الزول دا الظاهر بناتو ديل بايرات ولا شينات شديد وعاوز يفكهم فيني ولا ما عارف شنو والله اول مرة اخاف زي كدا وانا زول مغامر ما بخاف من شئ مقتنع بيهو ... بس عمك دا حيرني من حركاتو معاي يا ربي انا فيني شنو عجبو ؟؟ وكمان ام البنية اتعرفت علي وقعدت كذا مرة ونستني هي وعمك وبصراحة الام قمة في الجمال دا الحيرني فيهم زيادة الاب وسيم والام جميلة زي دا معقولة يلدو ليهم شيتا لالالالالا -- الموضوع كان كدا فيهو شئ تاني غير السماحة وحسيت ليك اني زولا مهم خالص وما عارف نفسي وما مديها حقها لكن ما بطغي في الفاضي ---
الام والابو لمن شافوني ما عملت اي خطوة لقدام برغم كل العملو معاي دا ,,, قالوا احسن نشوف لينا طريقة نلاقي الجماعة ديل بدون ما يحسوا .........
اها يوم ابوها اتصل علي وبعد التحية قال لي : انا عاوز منك خدمة بسيطة ؟؟
فقلت : خير ياعمي مافي مشكلة قول .
قال : انا اليوم تعبان شوية والاولاد وامهم دايرين يمشوا يتسوقوا ممكن تجي توديهم ؟؟
فقلت : جدا ولا يهمك حاضرين ... وكبكبة شديدة
.... طوالي بعد صلاة العشاء جيت لي الجماعة وديتهم السوق وانا سايق غلبتني ما قادر اركز عشان ما تنكشف الرجفة سائق بي خمسين بس وعلي طرف الشارع وحتي امهم قالت لي : انت سواقتك رايقة خلاص ,, وهي ما عارف حاجة ساي يعني انا لوم ماسمعتا صفارة السرعة ما بتكيف كلو كلو وكمان بعد مرات تخييط في الطريق ......... المهم نزلنا وهاك يا نظرات ورشاقة جبتها من وين ما عارف اليوم داك - والبت فاهمة الحكاية واتاري هي زاتها عاوزة تشوفني وتعرفني وهي كمان ملوها كلام وجاهزة هي شايفة كل شئ وانا ماشايف غير برقع مغطي وشها بس الحمد الله كا لابسه ليها نظارة قعر كباية - غايتو صوتها نااااااااااااااعم وكلامها براااااااااااحة ومشيتها غزالة بس وهي متوسطة في الطول والحجم ومخصرة ومفصلة والله حبة كرش مافي ولا العباية ماعارف - ولونها خمري جميل -بس قلتا دي زولتي والمواصفات دي كفاية والباقي ما مهم لان الباقي حيكون تمام التمام ومن امها عرفت اسمها وامها ماقصرت معانا في الونسة بعد ما اشترو حاجاتهم جلسنا قدام حديقة مركز التسويق نرتاح شوية من كترت اللف - بس بي صراحة طلعوا ظريفين ما خلوني ادفع ريال واحد من جيبي قدر ما اقول ادفع امها تحلف ذي الراجل - دحين ناس زي ديل الواحد بيفرط فيهم - المهم الام عملت فيها عندها مكالمة وزحت مننا شوية كدا - طوالي انا ما كضبتا وبدات اتونس معاها شوية شوية واتبادلنا ارقام الجوالات وبدات الحكاية تستوي والبسمات ظهرت و..و... وزحت برقها وكتها انكشف قمر تقول لي القمر شنو وانا اقعد اعاين بس - دي كيف طلعت من السودان من غير ما تتزوج - ولا الناس القرو معاها عماية ولا انخلعوا بسماحتها دي وخافو منها - مرة اشبهها بمني زكي لا اقول هيفاء وهبي -- المهم زولة تسحر عديل كدي من جمالها والعجيب بمستها ووجاناتها -- قلتا يا زول انت كان كدي انت وقعت في كنز وما توري زول يخطفها منك زي ما بقولو قرض علي كدا ... شوية كدا وامها نادتنا عشان نمشي وانا محل السيارة واقفة نسيتو وامها تضحك فيني وتقول لي : انت ولد نساي شديد ... وهي ما عار فة حالتي من جوة كيف وكرعيني اشوفين خفيفات ارفع كراع وما عارف اوديها وين وراسي لافي لفة شينة خلاص دا كلو من الاغتراب الواحد لو شاف ليهو واحدة سمحة ساي بيتبهدل ويقطع في الكلام وعيونو ما يقدر يرفعها في وشها .. .
وصلتهم البيت وانا دخلتا البيت كاضم لا نضمي ولا حتي سلام عليكم سارح في خلاء الله البعيد ودخلت وطوالي علي السرير ونوم مافي والحمد الله اليوم التاني جمعة يعني الله لطف من دوام البلد دي اللي يكرهك الريالات ,,, ااااااااااااه انا من الغربة ذكرتوني السودان ........

مر اسبوع بالتمام والكمال وانا الشوق كاتلني عشان اشوفة تاني وعمك من اليوم داك تاني ما شفتو - ومرتو بتكون اديتو الشمار طازج...... طبعا لا في درب مدرسة ولا عمود ولا ضل حيطة اقعد انتظرها فيهو وما بقدر امشي بيتم من دون شغلة - يا زول قلت اتوكل علي الله وادق ليها تلفون واكلمها واسمع صوتها الحماني النوم اسبوع كامل - وافتش التلفون طبعا كاتبو بي اسم واحد هندي عشان لو نائم وواحد هبش التلفون ما يعرفو -- ودقيت عليها وتلفونها يرن ...... ومافي رد خلاص انا انتهيت ,, قلت الزولة دي نستني والظاهر عليها ما ركبتا ليها في راسها وقعدتا احلل في حركاتي وكلامي معاها يا ربي هضربتا ليها بكلام كدا ولا كدا يا ربي البت دي ما عجبتها والكلام يدور في راسي ويودي ويجيب وانا قاعد جوة الاوضة والوقت عصرية واحد من الشباب حس بي ما طبيعي لي اسبوع كدا جاني داخل وقال : يا احمد مالك الايام دي نعل ما عيان ؟؟ وكان عمنا صاحب ابو البنية قاعد معانا قال ليهو : اسكت ساي زولنا دا ممحون محنة جد ويضحك ويعاين لي ... طبعا عمك كبير بس زول نكتة -- يرد ليهو : كيفن الكلام دا مالو عربيتو انسرقت ولا يمكن فصلو من الشغل ؟؟ وبصراحة ما قدرت اسكت وارد عليهو طوالي : المحنة الا تكون مصية !!! امكن عاوز اعرس . ويضحك : والله العرس محنة جد ,, الله يتم ليك ومالك شايل هم كدي ؟؟ موش الشنطة دي بنلمها ليك تاني في حاجة -- وارد عليهو : ياخ انا بقول امكن عاوز اعرس -- وانسحب طوالي واغمز لعمنا ما توريه حاجة واطلع برة -- قلبي ياكلني تاني واقوم اتصل بس برضو ما رد وقربتا ابكي من الشرة وعدم التعبير ... خلاص الزولة دي مسحتني باستيكة ,, هسع عليك الله في داعي للتعب دا كلو شهور وانا داير اشوفها ولمن اشوفها تطنش الطنيشة دي ,, يا زول لازم تاني اتصل عليها واوريها هي منو ولا اقول ليك رسل ليها رسالة العن اليم الشفتها فيهو ... لالالالالا الرسالة دي دليل بيتحسب عليك عليك ياخي هي حرة ما عاوزاك هو بالغصب ... بقيت لافي زي المجنون ما عارف امشي وين ولا اسوي شنو ونفس مافي لي اي شئ حتي النوم زاتو ابي لي اسوي شنو والعرق نازل مني وجسمي سخن ونبضي زاد من الزعل واحباط شديد والوقت داك كان واحد ناضمني ساي بطرشق فيهو ....

مرت ساعتين وانا في الحال دا في شد وجذب بس فجاة تلفوني ضرب واقوم اشوف دا منو المتصل كان القاها ليك زولتي وهزيت راسي زي الهندي وما صدقت - وقلبي برد شوية وشلتا نفس وخليتها لمن كملت النغمة وقمت اتصلتا عليها ....
- الو ,, سلام عليكم ,, كيفك ؟؟
- تمام ,, وانت ؟؟
- كويس الحمد الله
- معليش كنت نائمة وختيت الجوال في صامت
شلتا نفس طوييييييل وقلت ليها : انشاء الله نوم العوافي وانشاء الله ما اكون ازعجتك بس
- ابدا والله مافي ازعاج
والونسة جرت ووصلت لحدي : هوايتك شنو ,, اكلتك وما بعرفوا شنو وماشين في الغريق والكلام كلو مجاملات وكلمات كان قالو لي عيدها مرة تانية ما بقدر اعيدها جبتها من وين ما عارف ,, في اللحظات الزي دي الواحد بيكون خيالو خصب والخشم تب ما بيقيف من التكشم والبسيم -- ودعتها بعد ما شلتا منها الايميل عشان نشوف بعض ونتقابل بي راحتنا بس وين مع الشواطين العندنا الفي البيت ,, المهم مافي حل غير الكافية الجنبنا . وكلام ريدة بالماسنجر عمري ما حسيتو الا معاها وبقيت لمن اشوف صورتها ساي برتاح وهي كمان بتقول لي نفس الشئ ,, طبعا الاب والام شكلهم مراقبين الوضع وجايبين خبر وعاملين فيها ما شايفين ولا سامعين لانو عاوزيننا نتعرف اكتر .
استمر الوضع دا فترة ويم رسلت لي رسالة قالت لي : انا ماشة السودان اجازة شهر وجاية مع امي واخواتي ,,, طبعا ما عندها اخوان الا ولد صغير كدا عمره تمنية سنين ,, كيفن الكلام دا نحن غرقنا خلاص دايرة تمشي وتسيبيني كدا؟؟ قلتا شهر ما كتير وودعتها وطلبتا منها لمن تمشي السودان ترسل لي رسالة من موبايلها هناك عشان اعرف رقمها واقدر ادق ليها وماقصرت طوالي ادتني رقمها وبقيت اتصل عليها بليل ونوم مافي والمصري بتاع البقالة الجنبنا بقي صاحبي من كترت كروت الشحن البشتريها منو .
يوم دقيت عليها قلتا ليها انا ما قادر اصبر وجاي السودان عديل عشان اخطبك نا بكلم ابوك هنا وبشوف رايو شنو وبكلم ناس بيتنا يبقوا جاهزين .. البت ادربكت بس في النهاية اقتنعت وقالت لي خلاص بس نشوف بعض قبل ما تجيب اهلك - طبعا انا لاعندي اجازة ولا اي شئ طوالي مشيت لي ناس الشغل وقدمتا طلب اجازة طارئة خمستاشر يوم وبعد تلتلة وتحانيس ادوني ليها وعلي حسابي وطوالي للسودان واااااااااااااااااااااااااااااه انا من السودان ..............

.............ونواصـــــــــــل ..........

التعديل الأخير تم بواسطة الباسابي ; 10-20-2010 الساعة 07:08 PM
رد مع اقتباس
  #2  
قديم 09-05-2010, 08:49 PM
ود الحجير ود الحجير غير متواجد حالياً
Senior Member
 
تاريخ التسجيل: Apr 2009
المشاركات: 164
افتراضي

ود الباسا حبست أنفاسنا معاك يا رجل .. ممتاز جداً ؛ بداية قوية ..
تسجيل حضور و استمتاع و صمت في حرم الجمال ...
أها و بعدين ؟؟ يا ربي تستر على الباسابي ..
رد مع اقتباس
  #3  
قديم 09-05-2010, 10:39 PM
الباسابي الباسابي غير متواجد حالياً
Junior Member
 
تاريخ التسجيل: Aug 2010
المشاركات: 14
افتراضي قصة لمغترب سوداني مع الزواج ج2

طبعا مشيت ركبتا طيران العربية -- الله يقطعوا لطعة وشرة في مطار الشارقة خمسة ساعات وصلتنا زي النيسانات الساعة تلاتة صباحا بجوعة كافرة دا كلو عشان الرخصة , اخوكم شفقان ولفقان طوالي من صحيت من النوم ادق علي ندي ......
- صباح العسل يا عسل .
- احمد , حمد الله علي السلامة , بي لهفة كدا
- والله الشوق كاتلني عدييييييييل كدا يوم كامل ما اسمع صوتك
- بطل الحركات المابتاكل عيش دي وخلي جاكاتك دي ههههههه
- هسي انا كان بتاع جاكات بدق عليك قبل ما اتسوك - دا ما مرض
- تتبسم وتضاير ( انا حسيت كدا ) وبراحة تقول : انا زاتي مشتاقة شديد
- ما قلتي لي عاوز اشوفك
- مافي مشكلة تعال لينا في البيت
- شنووووووو البيت ؟؟ انتو دايرين تدقوني هناك ولا شنو ؟؟
- هههههه ما تخاف امي وابوي عارفين وكل ناس بيتنا فاهمين الحاصل
- برضو ما بتجي يقولو علينا شنو ..
- ما بقولو اي حاجة وانا ما بسوي حاجة من وراهم وامي زاتها قالت لي خليهو يقابلك في البيت وقدامنا وكمان خالتي واخواتي الهنا ومرة عمي عاوزين يتعرفوا عليك ويشوفوك ويسلموا عليك .
- طوالي فهمتا الحاصل شنو وقلتا ليها : طيب اجيكم متين ؟؟
- بكرة انشاء الله , مرة عمي بتجي من الثورة تقيل معانا واختي ( ناهد ) ما عندها جامعة و ( نها ) بتجي بدري .
- بس ما تقولي لي قيل معانا ؟؟
- تقيل شنو هههههه يا طماع تجي الضهر تتغدا وتمشي طوالي .
وقفلتا التلفون ...
اليوم التاني ظبطة اموري تمام ومن الصباح اتحكحك واتمسح تقول حايجيبوني في قناة هارموني ,,, طبعا نزلتا مع اخوي وكان ابوي جا من البلد ليهو يومين معاه ,, اشوفو برة في الراكوبة بيفطر ويعاين فيني ساااااااي وكت شاف حركتي كترت والطلعة والمرقة فيهو زي بوليس الحركة وقال لي :
- يا ولدي انت طالع ولا شنو ؟؟
- اي يا ابوي ماشي لي جماعة اصحابي مواعدم
- خلاص ما تتاخر بنتظرك بالغدا
- يا ابوي انا ماشي بعيد واحتمال اتاخر .
- خلاص يا ولدي الله معاك
حفظتا الوصف حفظ جد وانا كنت في المدرسة الا اندق مرتين تلاتة عشان احفظ , طينة بس في الحفظ لكن دا ما الحنان كلو بتنسي - وطلعتا اوقف لي شئ يوصلني بيتم واشوف بتاع البقالة يعاين لي باللمعة ديك والتي شيرت وبنطلون الجينز والجزمة البمسح فيها كل تلاتة خطوات من الغبار والريحة الماخمج موش ابو خمسة ريال وعشرة دي اول مرة اشتري لي ريحة غالية كدا الله يقطع سنين الحب والغرام هسع الواحد داير يعرس ولا يعرض نفسو في صالة ..
وصلتا البيت وادق الجرس ويدي تقيلة خلاص والعرق مع الكريم الفي الراس وعرق الخوف غسل لي وشي ولحظات وانا جوة البيت قعدوني في كرسي وبعد شوية بدا طابور السلام والام تشيل وتعرفني بي الاهل دي خالة ندي ساكنة جنبنا بهنا ودي عمتها وديل اخواتها ناهد ونها والله نها تشوفا تقول نسرين سوركتي والعجب فساتين البيت تحت التياب وخصلات الشعر الزي الحرير تتطاير قدام وشها وترفع فيها كل دقيقة وانا مبلم تقول صبة فيني مطرة وجات الدرة ( ندي ) تقدل وقلبي يقدل معاها - والله العباية كانت داسة جنس شئ وصوتي يقطع وابلع في ريقي وانطط في عيوني وهي تبتسم لي من بعيد وجاية علي ماشة زي السحابة تسبح في الموكيت وتمد يدها : متين جيت واسئلة عادية عشان تقطع الصنة دي وشوية نفسي يهدا والكلام يجيني واغمز لندي يعني اتكلم في الموضوع وهي تغمز لي مافي مشكلة وتقوم تستاذن عشان تجيب العصير وطوالي اعاين لي امها واقول :
- يا خالتي والله انا معجب باسرتكم ويشرفني نكون اهل .
- مافي مشكلة يا ولدي - ندي كلمتني بكل حاجة ونحن ما بنلقي زول احسن منك وربنا يتم ليكم علي خير وابو ندي بشكر فيك وبقول عنك زول كويس ومجتهد وود ناس ونحن ما عاوزين اكتر من كدا .
الونسة جرت معاهم كلهم وشوية شوية ينسحبوا ويخلونا انا وندي برانا - كل واحد يعاين لي التاني ويبتسم والباقي كلام دقاااااااااااااااق وما حسينا بالوكت الا الغداء قدامنا -- المهم ضربتا الغداء ووعدتهم اني بجيب اهلي واتفقنا يوم الجمعة الجاية وودعتهم وقالوا لي خلاص خليهم يجو المساء ونعملها خطوبة عديل وندي دايرة تعزم صاحباتها وعمها بقابلكم انشاء الله .
من دربي داك ابيت ارجع البيت وقلت فرحة زي دي ما بدفسة في اربعة حيطان والله كان امشي اشوف لي ضل شجرة بارد ولا اقعد لي في نجيلة كدا واسرح مع الطيور الهناك لحدي ما الواطة تمغرب علي الاقل الواحد يعيش مع نفسو شوية - المهم اختا قعدتي ديك والجكس جنبي في العامل فيها بذاكر وفي القاعدين اتينين اتنين وفي الطاشين ساي تلاقيهم جنبك وفي الزي كدا قاعدين سرحانين - وتب نفس ليهم مافي ما شبعااااااان حنان لحدي عيني ...
ومن دربي داك رجعتا البيت بعد ما كملتا قعدتي وصلتا بعد المغرب والجماعة متلمين ليك في البرندة اخوي وشفعوا ومرتوا وابوي بشوفوا ليهم في مسلسل . خلاص قلتا دي فرصتي افتح ليهم الموضوع بس شوية شوية عشان اسلاكم ما تضرب ...
ابوي سالني : اها نقوم البلد متين ؟؟
- والله يا ابوي انا عندي موضوع هنا عاوز اتموا وبعدين نمشي البلد براحتنا .
- أمك دي جننتنا كل مرة اها الزول جاي يسلم علي متين
- انشاء الله اسبوع كدا موضوعي بيخلص
- انت قلتا اجازتك كلها اسبوعين
- اعمل شنو موضوعي دا مهم شديد ولازم اشوف نهايتو
- اها الموضوع الماسكك في الخرتوم دا شنو
- موضوع عرس كدا
- بسم الله الرحمن الرحيم - هو قليك العرس تلوب كدا - لا اخطبو لي لا شوفو لي مرا لا دا
- انا المرا لقيتها وجاهزة .
- ودي من وين ؟؟؟
- والله يا ابوي البت دي من الخرتوم هنا واهلها من البلد بس ليهم تلاتين سنة ما فاتو البلد عدوها كلها غربة بس بيعرفوا ناس البلد .
- وديل ناس منو ديل ؟؟
وهاك يا شرح وطرح وكلام واخوي شغال يلاكز جاي وجاي ويصعب لي في الشغلة اتاريهو هو ومرتو ناوين ليهم علي نية علي ,, مرت اخوي دايرة لي واحدة من بنات اختها واخوي بهناك قال اخير نلم الزول دا علينا جاي علي اهل مرتي وزي ما قال جحا لمن سالوا : اهلك منو ؟؟ قال ليهم اهلي اهل مرتي ,, عشان كدا يشيل ويردم فيني ويقول لي :
- هوووووووووووي انت طولتا من البلد دي وما عارف الحاصل فيها شنو البلد دي منتهية والبنات حايمات ساااااااي .
- كيف الكلام دا يا اخوي ؟؟
- اسالنا نحن القاعدين فيها
- ياخوي السمح والشين والكعب والكويس في كل بلد في
- والله انت مخير شيل شيلتك ونحن نصحناك
يدخل ابوي ويغير الموضوع
- الناس ديل عرفتهم كيف ؟؟
وريتو بالحكاية كلها بدون التفاصيل التانية - طوالي حسم الموضوع وقال :
- والله ناس زي ديل انا بعرف اهلم وياهم معانا ومافيهم كلام - انا ما عندي مانع تب وانت عارفني ما قاعد اجبركم علي شئ ومديكم حريتكم كاملة - وضحك شوية كدا وقال : بس الا تخلي لعتمك البلد وانت عارفة صعبة وشديدة كيف ,, طبعا فهمتا كلامو قاصد بيهو شنو , عمتي عاوزاني لبنتها الباقية ليها بعد ما عرسو بناتها السمحات جت الا هي الباقية ليها ودايرة تعرسا لي بي اي طريقة عشان انا اكتر زول بقعد في بيتهم من اخواني ويومي كلو كنت بقضيهو معاهم .
المهم وريتهم البرنامج بتاعي والموضوع جاب زعل شوية في شان ما وريتهم الا بعد ما نجضت موضوعي براي بس رضوا بالامر وبقينا في الترتيبات وابوي يهز في راسو كل مرة ويقول في زول بجهز ليهو خطوبة في خمسة ايام - غايتو كان اخوك مسك ليك شغلتك دي بتقضي تب وهو مفتح وبجيهك كويس ويعاين لي ويقول : غايتو انا يا ولدي غير عمتي الفها في راسي دا وامشي معاك ما عندي ليك اي شئ - اقنع اخوك دا يرتب ليك الشبكة وكان علي امك انا من بكرة بكلم اخوك هناك يجي معاها .
- خلاص وكان علي موضوع الشبكة انا جايبة معاي .
اعين لي اخوي واقول ليهو : انت المشكلة شنو لو جبتا لينا فنان واشتريت معاي قولت خير والذي منو يعني خلاص حبكت معاك ياخي شوف بتكلف كم معاك وانا ما عندي مانع .. اخوي طوالي رخا وقال لي مافي مشكلة انا برتب كل حاجة بس فك ريالاتك العندك وخليها جاهزة ,, طبعا الحكاية بتكون فيها سمسرة شوية وما بتهبش جيبو -- والله انا عارف ما بطلع منها ساي يعني خطوبة وخراب جيب بس كلو هين عشانة بالجد عذبتني شديد .

ونواصـــــــــــــل
رد مع اقتباس
  #4  
قديم 09-06-2010, 09:28 PM
الباسابي الباسابي غير متواجد حالياً
Junior Member
 
تاريخ التسجيل: Aug 2010
المشاركات: 14
Post قصة لمغترب سوداني مع الزواج ج3

في الجزء الفات وقفنا لحدي ما بقو في تجهيز الخطوبة وحددو اليوم ........ويلا نكمل ...

من اليوم دا بقيت اغني ليك : يا يوم بكرة ما تسرع - عشان الشوق غلبني ,, وعشان اعلن مملكتنا الجديدة بتبدا من يوم الجمعة الجاية وعمتي شغالة لي شغل تقيل وهي جات مع امي وتصور وتحمض وكمان ما تقول السفر ملح وكمان فيها علاج ملح من وجع البطن والكرعين ومن ما شافتني مسكتني من جضومي وتشلق فيني :
- هسي يالمفعوص كان قلتا لي داير اعرس ما كان عرستا ليك وسقتا مرتك معاك طوالي .
- يا عمتي الموضوع دا جا براهو وبعدين اسوقا معاي وين انت قايلاني السفير السعودي احسن شئ يا عمتي تباركيها بس .
- يبركوا فيك خنق جاري للبدرة دي .
غايتو كلمة البدرة حرقتني بس اسوي شنو فهمها كدا غير اكب الزوغة منها واخليها مع امي يناضموا ساااااي وامي تقول ليها ( دايرا تبرر ليها وتنسيها ) : بري انا امو ما شاورني ,, من هناك متفقين . شباب الزمن دا عاد بنقدر عليهو !!!
- اها اتحزمي سااي وارجي الجايك والله موش نسوان الخرتوم ديل بورينك ليهو شديدات ولضيضات , هسع بتي الرضية مالا ما كان زيتنا في بيتنا ولا نحن لينا الله بس .
- الولد بقي راجل وانت لي يوم الليلة تشلقي فيهو .
- هوووي هو ود بتين وكان انتي امو الولديتهو انا امو الربتو
وتقول ليها : هسي دا كلو هين كدي نشوفوا جاب لي شنو .
وانا يا زول لابد تحت حيطة كدا والموبايل في اضاني واليد التانية التقول داير ااذن وامي تعاين فيني ساي وتقول لي الجماعة :
- الولد دا مالو جنا كدي طويبتو ( من طوبة ) دي ما بتفارق اضانو
- ياهو شباب الزمن دا
- والله يقعد يباريها كدي ويتفصل ليها الا تسوقوا من اضانو زي النعجة .
يوم الجمعة الهايس اتملت ومعاها بوكس والدلوكة تقول يا قدرتي غايتو الخطوبة براها بقت سيرة والبرنامج لازم امشي الكوفير اجيب البنية والجماعة التانين بمشوا عللي البيت دغري وبعدين علي النادي والنادي دا من عمها فنجرة سااااااي ونظام بوبار وكمان عربية ايجار والطيب ود عمتي سايق لي وعايش الجو صاح مع ترباس وانا راكب معاهو بقدام عشان ما شين للكوفير ودي فرحان بيها فرحة
- الليلة بحتو ليك حت جد اخلي ليك علالاتا فوق
- بس اوعك تقابض مقابضتك ديك وابقي رايق
- قال رايق والله كان الجكس بتاعون دا دوم بوصلك وبرجع اشوف لي نومة تنفعني
- دوم انت ,,هههه بس اوعك تفتح لي في خشمك وتسهي فيهن بعدين
ونمشي شوية والستك يضرب بينا تااااااااااح واسبير مافي ,, هسع نسوي شنو ؟؟؟ بي حيرة كدا
- اها يا الطيب اتصرف .
- اتصرف كيف ؟؟ انفخوا ليك بي خشمي !!!!
- خلاص عفرت العربية سريع وفكو ونشوف بنشر قريب من هنا
- هع هع يا زول انت ما نصيح دايرني بالشكة دي افك ليك اللستك ؟؟هع هع
- اها البفكو منو طيب ؟؟
- يا زول هووووووي انت ضمنتا خلينا نحن نشوف سوقنا وين
- انا عارفك ما زول حارة
- يا زول هووووووووووووي ما تكتر لي كلامك والله هسع افوت اخليك
طبعا الطيب دا زول غشيم بس طيب وحبوب ولمن تقفل معاهو لا بشوف قدام ولا بشوف ورا بشوت طوالي انشاء الله تطلع اوت عشان كدا لازم اهدي ليو شوية ...
- خلاص وقف لينا رقشة ولا تاكسي ولا اي مصيبة وكان علي اللستك انا بفكو .
- مافي مشكلة يا حبة .
ويوقف عمك بتاع التاكسي ماري بالشارع وشكلو من الصباح ما لاقي ليهو فردة يبرد بيها حشاه .
الطيب قال ليهو : سلام عليكم يا حاج
- اهلا وسهلا
- ياحاج والله اللستك دا ضرب لينا هنا ودايرين نودهو اي بنشر قريب
عمك يعاين في العربية ببالوناتها وشرائطها الحمرا والخضاء والوردية
- دي عربية عريس ولا شنو ؟؟
- اي يا حاج
- مافي مشكلة بلحق ليك عريسك دا الحفلة بس صلحوها معانا
- يا زول مافي مشكلة ما بنقصر معاك تب
- يلا ارفع اللستك وارح معاي وبشيل منكم سبعين الف
- معليش ياحاج ممكن تفك لينا اللستك اصلو عفريتة ما عندنا
- انتو بس بتاعين سواقة غير الطارة دي ما بتعرفوا الحبة لاقين عربات التقسيط دي وراكبنها
نسوي شنو سكتنا ساااي يقوم يزرقن معانا يخرب لينا الشغلانة مرة واحدة ووكت مافي للنقة ,,, الطيب وعمك بتاع التاكسي مافي نص ساعة الا اللستك ركبوا في العربية والجماعة بي هناك فلقو راسي كل مرة يتصلوا وين انتو حتي ندي ذاته لمن شافت نحن اتاخرنا قلقت واشيل واصبر فيهم : نعل ما حادث - واحد تاني : انا عارف الطيب بكجك وتالت : نرسل ليكم زول ....... هو المعاي انستر عشان ييني زول تاني .
الحمد الله ربنا وصلنا سالمين لي عند النادي والجماعة رابنها ربه ومن شافوا العربية انبهلو فينا ناسنا وناسم وفي ناس شمارات ساي من العروس عاوزين يشوفو العريس ياربي سمح ولا خلاقة وتلاقة وشين واهلي عاوزين يشوفو العروس عشان كدا كان الهجوم كاسح واعمامك من بعيد : هو يا جنيات ادوهو الدرب خليوم ينزلوا - ناس بهناك شغالين مخرجين لبتاع الكميرا وانا في اللحظة ديك بقيت زي رئيس الجمهورية راسي كبر - عالم واستقبالات وتصوير وفنان من اول ما دخلنا وقف غنيتو وادانا واحدة كدا بتاعت سيرة وننزل يجننا النسوان الكبار بالبخور والطيب بهناك يا زول اتنفخ نفخة جد ودي الدايرة وعمل طوالي وزير العريس - الشغلانة فيها لمات تولع وتطفي وكور لافة وموكيت مفروش والغنية معانا لحدي ما وصلنا للكوشة والطيب دا من وقف العربية برة ويديها ليك رقيص وكشف صاح وكان علي الفنان غايتو فنانا بفك الحيرة وكان علي الغنيتين الغاناهم قبل ما ينزل الفاصل الاول ما فهمتا منها شئ واحدة بتقول ( حاجة ) شنو كدا ما عارف بالهوسا والتانية : قال سنتر الخرطوم المهم الفنان نزل فاصل يرتاح فيهو شوية وفي اللحظة دي الجماعة شغلوا لينا شريط عربي لنجوي كرم والشباب اتلموا جنبنا ووقفوا فينا والبنات اترصن قدامنا وقالوا يلا اشبكا ,, اعاين في زولتي وفي عيونا اسرح في دنيا بعيدة خلاااااااااص والبسها الدبلة والحاجات التانية وتلبسني الدبلة واتمنيت في الوكت داك اصلو ما تزح يدها من يدي ونكون كدا ماسكين فوق بعض وما تفرقنا حاجة واشوف الوشوش قدامنا فرحانة لينا وكل الدنيا وتجي نها وناهد وامها وامي وبنات عمها وصاحباتها واهلي واشوف عمتي جاية علي من هناك كاريها ولدا الطيب وتبشر فيني وتقول لي في اضاني : عاد مع القمرة دي بتعرس بتي كيف ؟؟
اضحك ليها واقول : ما مشكلة يا عمتي بدبل بيها
هوي يا جنا الصيدا دي بدبلوا فيها شوف ليك شغلة اقضاها وتبارك لي وتمشي لندي وتعصر عليها وتقول ليها : يا بتي انا عمة احمد دا وولدي عديل ختيو في عيوناتك - ندي تعاين لي وتقول ليها : انشاء الله يا خالتي .
زولي الطيب من بارك لي اشوف هناك قاعد مع نسابتي يقرقر شكلو كا بقولهم في نكات وكمان جاب امي وامو وقعدم جنبهم ومن بدا الفاصل خماهم في نص الساحة وجراني انا وندي وهاك يا رقيص وبعد شوية جون صحبات ندي والطيب بجنبي : شوف البرتق دا جامعات ساااااااي والله الليلة التقانة ما فضل فيها زول ,, ياشر لي واحدة بجنبنا : البنفسجي دا كيف يا حبة .
اتلفت اشوفها نهي اخت ندي : يا زول دي اخت ندي
- ها زول انا ما بقيت عديلك تب
- عديلي !! انا اتفك من اختك تقع لي انت ؟؟
- يا زول مالي ناقص كراع ولا ناقص يد
- لا لا ما ناقص بس البت ما بيدوك ليها هسع عاين ليها كيس خلقة زي دي بجدعوها ليك سااااااي ؟؟!!!
شوية يجي ود عمها والنصيحة زولا مليان بالحيل رزانة وادب وذوق يسلم ويرقص شوية ويسحب نها ويقعدو ليهم في كراسي والطيب فاتح خشمو : والله القدح عندك .
- اها تاني شن قولك ,, البت ودايرا ود عمها
- يا زول انا الليلة اصلي ما بطلع ساي
- ياخ انا ما قلتا ليك خلي مقابضك دي
شوية نسمع ليك الفنان يغني ليو في اغنية : ( اللبن ابو لي بي ) والنقز اشتغل كل واحدة تنقز وزولي الطيب يكورك في نص الحفلة : ووووووب ووووب ,, شاف الغزلان دي كيف بتنطط وشالتو الهاشمية وقام كدي شالني ويبشر في الناس وحلف ماينزلني الا يلف بي الحفلة كلها ,, عدينها رقيص وفرح وبهجة وطرب والناس مبسوطة وخطوبة خمسة نجوم وتمت الحمد الله بخير .
في اليوم التاني ابوي قال لي : يا ولدي دايرن نعزم الجماعة نسابتك ديل قبل ما تسافر ويرجعوا
- مافي مشكلة يا ابوي انا بكلمهم .
خلاص الامور بقت سالكة بينم وبينا زي الاهل وبقينا نمشي ليهم ويجونا واسبوعين تمام ,, طبعا اخرتا سفري اسبوع بحالو عشان ارجع معاهم سوا وفي احلي من الحب في الطيارة والزولة بقت ملكي خلاص وكمان ماشين لي سجن ما عارفين نتقابل كيف ؟؟
وامي جات قطعت لي تفكري وقالت لي : اها يا ولدي ختوبة وشوفناها بتعرس بتين ؟؟؟ دايرين نفرح بوليداتك والدنيا ما معروفة .
- انشاء الله قريب يا امي ... نقول يا رب ...

ونواصـــــــــــل.........
رد مع اقتباس
  #5  
قديم 09-07-2010, 11:41 AM
الباسابي الباسابي غير متواجد حالياً
Junior Member
 
تاريخ التسجيل: Aug 2010
المشاركات: 14
Post قصة لمغترب سوداني مع الزواج ج4

رجعت لشغلي زي اول ورجعت ريما لحالتها القديمة وكل شئ كويس .......
في يوم ندي مسكلت لي وقمت دقيت عليها :
- الو ندي كيفك
- اهلا وسهلا احمد وطوالي تقول لي :
- عاين يا احمد انا جاتني فرصة شغل
- خير انشاء الله شغلت شنو الفي السعودية كمان !!!!!!!!!!!
- لا الشغل مافي السعودية
- وين ؟؟!!
- في دبي
- دبي ؟؟؟؟؟؟؟؟
- اي اصلا انا من كذا شهر كدا مقدمة لشركة طيران عشان اشتغل فيها والحمد الله اتصلوا علي وقالوا لي نحن اعتمادنك معانا وحايشغلوني في مكتب دبي
- وهسع راي اهلك شنو ؟؟
- انا بهمني رايك انت قبل اهلي .
- انا ما عارف اقول ليك شنو , اها هسع لو مشيتي دبي بتسكني كيف وانت بت ؟؟
- انت لسه مع الحاجات دي عادي الشركة عندها سكن وكل شئ مرتب .
- انا خايف عليك من الغربة والبشتنة .
- الشغل ما فيو مشكلة وكان علي الغربة نحن من قمنا متغربين .
- لكن يا ندي انت المرة دي براك وما معاك اهلك .
- ما انت حاتكون معاي
- اكون معاك كيف ؟؟
- عقد العمل فيهو السكن عائلي وكل شئ علي الشركة
- اها وبعدين اقعد ليك في البيت ساي ولا كيف !!!!!!!
- لا طبعا , ما حاتشوف ليك شغل وبعدين انا وانت ما واحد
- نحن واحد ما قلت شئ بس الحكاية دي دايرا ليها تفكير
- دي فرصة عمرنا وما بتتكرر
- انتي هسع محتاجة للشغل ولا ساي ؟؟
- كيف ما محتاجة للشغل وانت عارف ابوي خلاص كبر والحمل بقي كتير عليهو
- كدي يا زولة خليني افكر وبرد عليك
- خلاص ما تتاخر علي انا في انتظارك
- يلا سلام
- سلام
تلفون ندي دا لخبط لي راسي وغير كل حساباتي وخلاني محتار حيرة شديدة خلاص وما قدرت اصل فيو لشئ وقت راسي صدع من التفكير قلت يا زول خليها علي الله والبسوي الله بتبقي واعمل طناش من الموضوع .
تاني يوم ندي تمسكل وتتصل لمن فترت وانا ما قدرت ارد عليها لانو ما عارف ارد اقول شنو وبعدين ما كنت رايق عشان نتناقش في الموضوع والنفسيات في الواطة وشوية اسمع ليك رنة الرسائل في الجوال كان القا رسالة من ست قلبي بتقول : ( محال انساك واسيب الريد وانسي هواك لانك في قلبي وقلبي انت شلتو معاك ... شنو الجفا دا ) - الرسالة دي عملت فيني عمائل وولعت في قلبي النار ودقيقة مافي اتصل عليها :
- الو ندي كيف عاملة
- كويسة ..شنو عامل فيها تقيل كدا
- والله يا حبيبتي كنت مشغول شديد وراسي ماقادر احكو
- كان ترد تقول لي مشغول
- معليش حقك علي , رسالتك تجنن انا كان عارف بتعملي كدا كان طنشت منك من زمان
- هوووي يا مستهبل , تاني تطنش كان اضبحك
تسكت شوية :
- شنو يعني ما راجية ردك
- والله حيرتيني معاك وما عاوز اكون عقبة في طريقك
- يعني موافق خلاص
- بصراحة كان قلت ليك خلي الشغل دا بتخليهو ؟؟
- والله عشانك ممكن
- خليك مني انا , اها عشان نفسك كيف ؟
- غايتو الشغل دا عاجبني وبعدين انا قريت عشان شنو موش عشان اشتغل
- هىىىى وانت قايلة الشركة دي شغلتك عشان شهادتك ؟؟
- نانا عشان شنو
- هسع وينا خبرتك الا كان خلقتك دي ودا المخوفني شديد وقاطع قلبي
- هاهاهاها هع ههههههههه
- هسع البضحكك في كلامي دا شنو
- بتغير علي للدرجة دي
- كيف ما اغير عليك والله بخاف عليك من الهوا الطاير
- اطمن انا ما بكون لزول غيرك وانت كل حياتي
- خلاص عديلة وربنا يحفظك , يلا مع السلامة
- مع السلامة
اقفل الخط بهنا كان تجيني منها رسالة : ( ورود الدنيا اخطفها وبشوق قلبي اغلفها ومع النسيم لاحلي حبيب ارسلها , الله يخليك لي )
في المسا جانا ابو ندي وسلم علي الجماعة وطبعا الجماعة يوسوسو ساي ويراقبوا فيني ويشاغلوا دي ما فرصتم كان قالوا لي اعمل اي حاجة بعملا سترة حال وانا وشي عاوز يقع من الخجل النسيب ما عين شمس وبعد السلام براحة سحبني من يدي وقال لي : يا ولدي البت ورتك بالشغل وورتني بموفقتك وانت كان ما راضي وبتجامل فيها ساي انا هسع بعقد ليك عليها وانت هي مخيرين بس اهملها كدي براها ما بسويها - انا قدرت الموقف وفهمت سبب كلامو يعني يا احمد الزولة دي لو ما عقدت عليها طريقة سفر ليها مافي وهو ما معترض علي الشغل بس دايرا تكون تحت راجل يحميها .
ودعت ابو النسب بعد ما اتعشا معانا بالقوة وبالضغط وحلاف طلاق من الجماعة في البيت ودا حالهم يهاظروا ويشاغلوا بس وكت الجد تلقاهم رجال .
بعد ما مشي وانا قاعد برة في الصالة بالشقة ناداني صاحب نسيبي وقال لي :
- اقعد انا دايرك
- خير انشاء الله نعل مافي شئ
- خير .. طبعا انت زي ولدي وبتكلم معاك كابن
- مافي مشكلة الموضوع شنو
- بخصوص البنية خطيبتك
ويسكت شوية ويكمل : ابو البنية كلمني قبيل في الشغل وحكي لي الموضوع كلو وحتة الشغل دي ما راكبا ليهو في راسو هو ومرتو الا اذا بقت معاك اها يا اخوي كان مستعد تعرسا هسع وتمشي معاها لدبي الموضوع بقي محلول ولا يمنعوها الشغل وقال لي : ياهو المرا في النهاية للراجل وهما شفقانين عليها من شحتفة الغربة وانت شايف براك نحن الرجال قولنا الروب عديييييييل كدي , اها شن قولك ؟
نفس تحليلي بالضبط والحسبتو لقيتو زي ماهو مفطس مفطس والكتلة جاتني لحدي عندي .
- بس انت شايف الحال براك نحن ما تمنيا شهر من الخطوبة وتكاليفا
- يا زول ابوها ما داير منك شئ بس تعقد عليها واقرب اجازة ليك تسوي عرسكم براحتكم
- ماهي نفس المشكلة برضو حا تتغرب وتتبشتن يعني بس دايرني اغير اسمها من ابوا لاسمي
- لا ما نفس الشئ هي لمن تمشي عزابية ما زي لمن تمشي مربوطة ليها في راجل وممكن بعد فترة تلحقا
- والله يا عمي كلامك سمح بس جوط لي راسي جوطة شينة
- يا زول انت راسك براهو جايط هسة في زول لاقي ليهو فرصة زي دي
- كدي خليني افكر في الموضوع براحة
- يا ولدي البت ما عندها وكت لازم بعد اسبوعين تسافر لشغلا
- خليني ادورا في راسي واحسبا
- ما تنسي ابوا حيسافر معاها دا لو وافقت ويقعد معاها الفترة الاولي دي كلها لحدي ما تكمل هي اجراءاتها وكمان اجراءاتك حسب العقد ولازم طبعا تكون قسيمة الزواج معاها
- وابوها حايخلي شغلو ولا كيف ؟
- لا حيشيل اجازة اصلو خمسة سنين ما شال اجازة ولا نزل السودان
يعاين فيني وشاف حيرتي
- خلاص فكر براوقة وابشر حرم الناقصة نتمها ليك بس ما تنفذر لينا وكمان البنية حاتشتغل , بختك مرا سمحة ومعاها قروش
- هسع وينا القروش
- والله راتبا السمعتو قدر راتبي مرتين
من دربي داك قمت اتصلت علي الاهل في السودان ووريتهم الحاصل بعد نقاش معاهم في الاخد والرد وصلنا لنتيجة ياهو العرس كان في السودان كان في اي مكان اهم شئ الزول يتلم علي بت الحلال رغم جرسة امي ودي شئ طبيعي ومتوقعوا هي دايرا تفرح بولدا وتحننو وتهز فيهو وتبشر عليو بس حال الدنيا وحكما .
تاني يوم طوالي اتصلت علي ندي وهاك يا كلام واشواق وريدة التقول اول مرة الاقيها واقول ليها :
- ابشرك
- خلاص
- اي
- هىىىى ما بصدق
- انا عندي اغلي منك
تضحك وتسكت ما خلاص الموضوع بقا ليها جد واواصل :
- انا الليلة بمر عليكم وبلاقي ناس بيتكم ونشوف الموضوع دا
نسكت شوية واقول ليها :
- اها تامري بشئ ( حركة المغتربين الشالوها من السعوديين )
- الليلة مستعجل كدي مالك
ابتسم واقول ليها
- ما دايراني اودعك ولا شنو
- دايرا اتونس معاك حبة
- مشتاقة لي قدر دا
تسكت شوية وبراحة تقول : كيف انا شوقي ما بكمل !!
- خلاص انا بخليك بشوقك دا لحدي ما اجي بعدين المساء , سلام
- سلام
في الشقة لميت الجماعة وقلت ليهم : انا داير اسوي عرسي هنا ودايركم تقيفوا معاي
ردودم الحلوة وتجاوبهم معاي عجبني شديد وعمنا طوالي نط وقال : يا زول ابقي بعيد نحن بنرتب كل شئ بس جيب العندك ونحن بنتم الباقي ..... الجماعة ما كضبوا فكروا في المندي وكلهم ما قصروا تب شدوا من ازري ورفعوا معنوياتي فوق في السماء وكمان حتة العقد في السفارة دي هم بتولوا امرها.
في المساء قشرت قشرة صاح واتوكلت عليك يا خالق روحي ومشبت طوالي لبيتم وهناك تقابلني البنية وامها ابوهم طلع قريب وبجي وبعد ما قطعت كباية العصير المخصوص وما شفت اطعم منو كلوكلو عشان عاملة ست الناس وقعدت قصادي تضاير ساي وتتبسم وتعاين فيني من اعاين ليها تغير عيونا مني اتونسنا شوية وجا ابوها :
- كيفك يا عمي
- تمام وانت كيف
- الحمد الله
صنة ما طويلة واتنحنح :
- طبعا يا عمي انا جايكم الليلة في موضوع العرس
- مرحب يا ولدي انشاء الله ربنا يتم علي خير
- يا رب .... وقررت نعملوا هنا وخلاص
- يا ولدي زي ما قلتا لعمك ما عاوزين منك حاجة ونحن مقدرين الظروف
- والله ما بتقصروا وانا انشاء الله ما بقصر
- مافي مشكلة بس تعال بالعندك وما تكلف نفسك وتعصر عليها
- الله يبارك فيك . اها استاذن انا يا عمي وانشاء الله بكرة بتصل عليك نشوف التفاصيل كيف
يمسك فيني في العشا بس بقي لي صعب بعد الكلام الحلو , وانا داير امشي اقعد مع الشباب في البيت عشان نحدد اليوم والطريقة تكون كيف . وصلتا البيت متاخر ولقيت الشباب ما قصروا وحددو معاي اليوم طبعا اقرب خميس جاي بعد اسبوع من الليلة ووزعوا الادوار ناس مسئولين من الصالة وناس عن المطبخ والمندي وناس للفنان والحفلة وكدا ........

ونواصـــــــــــــــــــل ........

رد مع اقتباس
  #6  
قديم 09-08-2010, 12:20 PM
الباسابي الباسابي غير متواجد حالياً
Junior Member
 
تاريخ التسجيل: Aug 2010
المشاركات: 14
Post قصة لمغترب سوداني مع الزواج ج5

التحضيرات ماشة تمام والشباب همة ونشاط والجيب شغال والباقي بينتم ديون ياها نباصر بي جاي جاي وانشاء الله تنستنر معانا بعد داك . واحد من الشباب اصر الا يعمل لي حنة اصلو هو الفردة قبل ما يعرس ويسبنا نناجي نجوم الليل برانا وقال لي : يا زول انا رتبتا ليك حنة كاااااااربة
- انت ما نصيح حنة شنو كمان في البلد دي انتو دايرين يقولو علينا شنو ؟؟
- يا زول دي ساهلة تب
- كيفن الكلام دا
- مش الحنة الخايف منها دي فد يوم بنطلعة من يدك بعد العرس العلم اتطور يا خوي
- يا زول كدي نشوف الحاصل شنو وبعدين برد عليك
- بعدين شنو ؟؟ انا حجزتا الاستراحة خلاص مافي ليك طريقة يا خوي
- استراحة ؟؟؟؟؟؟
- نان نحتو معاك كيفن كما ضربنا الخلا دا
- يا زول الشغلة دي بتودينا التوج هسع كان ناس الهئية مروا علينا ساي والله مع الحنة دي يطلعونا شئ تاني
- يا زول العالم دي كلها شغالة كدا , هي الاستراحة البرة دي سوها لشنو ما لجنس دا وبعدين اخوك علاقاتو كويسة ما تشيل هم وكان حصل شئ بتتحلا بس خلينا نهجج شوية في البلد المامعروف ليا راس دي
- خلاص مافي مشكلة
- كمان اقول ليك حاجة نسوي فيها عزومة ونقطة مرة واحدة
- نقطة شنو ؟؟ دي انا ما بسويها ابقي زي الشحاد
- هههههه يا زول ما علي كيفك ابقي بعيد بس
سكتا وطوالي قال :
- خلاص يا زول اتفقنا الخميس الجاي وخلي الشباب يعزموا جماعتم وانا بعزم جماعتي وبالبركة
الزول من فات والجماعة بدو نقاش :
- يا زول سوي العرس كلو هنا وانسا السودان خلاص
- اي والله وامشي دبي مع البنية شهر عسل اقعد معاها اسبوعين تلاتة
- اي دي فكرة كويسة وتشوف شغلا كيف امكن تلقي ليك شغلا هناك وتقعد معاها
- اها شن قولك ؟؟
اعاين فيهم كدي واسرح شوية اصلو الفيزوات بدت تضرب عندي واقول في نفسي : هوي ديل بتكلموا ساي ودي ورطة بنت كلب صرف شديد وكان قعدت تلاتة سنة ما تكفي سداد ديون .
- يا زول انت خايف تنقطع
- الدنيا ما معروفة يا جماعة والبلد ديك ما بعرفها كويس
- يا زول انت كان خاريف من السكن في فندق انزل معاها في سكنا انشاء الله غرفة واحدة
- كدي امورك ظابطة يا معلم كان قعدتا شهر ما فارقة سوي حجزك من هسي وخلي التردد بتاعك دا
- والله يا جماعة عرسي دا شغلكم شغلة
يضحكوا
- يا زول انت هين لكن
- خلاص الواحد علي الاقل يتفسح في الدنيا دي شوية
- كان كدا يا جماعة نعدل البرنامج
- كيف
- الخميس الجاي الحنة العاملها عصام والخميس البعدو نسوي العرس ويوم الجمعة السفر
- اها شفتا الزول كان قال بسم الله كل شئ بينتم
يوم الخميس جانا زي الهوا سريع اصلو ايامنا صور بالكربون الواحد يقوم معسم ومربوط وجري للدوام بعد المكابسة في الحمام مع الشباب وهم فوق هم يتردم فينا والاحر منو تكون فاضي ما شغال تشوف اليوم سنة وليلك يبقي نهار ونهارك ليل وما جايب للدنيا خبر اليوم كلو ماسك ريموت التلفزيون من فيلم لفلم ومن برنامج لبرنامج لمن تحفظ القنوات جت وتبقي كلها مكررة لحظتها تعرف الله واحد ويبدا قرف الغربة يسمم مزاجك ويعكر دمك والاكل يمسخ ليك والدنيا تبقي ليك جحيم الله لا وراكم عطالة الاغتراب .
الخميس نص دوام والخميس دا ما زي اي خميس فيهو بهجة وكبسة وحنة ولمة حبايب واصحاب وناس عزاز ولذاذ لمتنا الغربة ولمانا الوطن قبل اي شئ وفرصة لناس كتار يتقابلوا وفرصة للعوائل تغير جو من سجن البيوت وبعدين يشوفوا ليلة من ليالي السودان بحنتا وهجيجا وغنانا السمح . رجعتا من الدوام لي البيت والقي ليك ناسي في البيت جادين اكتر من العريس التقول كلو واحد فيهم هو العريس حسيت من جو قلبي بحنيتهم وخوتهم الماكضب وحماسهم وما حسيت اني فاقد اهلي في اليوم داك لمتنا الغربة ومعرفة البلد وحتي القرابة اللمتني مع بعضهم هي قرابة من بعيد ما لزم يعني تقول تلاقي نسب وحبوبات وفعلا تاج فوق راسي , من دخلت البيت
- السلام عليكم يا جماعة
- وعليكم السلام
- الليلة يومك
اتبسم واقعد لي في كرسي قريب
- يا زول قاعد لشنو
- اسوي شنو يعني ؟؟
- هسة خلقتك دي خلقت زول عندو حنة ؟؟
- مالها ما تمام
- ارح معاي بس اوديك لفلبيني قريب من هنا يوضبك ويكشبك صاح
- الحكاية كمان فيها تمسح وتنعم
- دا كلامك
وطوالي ودوني لصالون حلاقة كدي والنصيحة شغلو نضيف وماخلي شئ حلاقة وتنعيم بالبخار ومساج , ساعتين وانا جوة الصالون لمن طلعت منو حسيت بلمعتي وبقي وشي املااااااس زي المراية والمشاغلات كتيرة وانا اقول ليهم : الله اكبر عليكم قولوا ماشاء الله بس .
المسا بعد صلاة العشا اتوجهنا كلنا لاستراحة كدي ما تنعرف الا بخريطة والحارس الفيها سوداني خاتي سفتو قدر الليلة وباكر وقاعد ليهو في كرسي وانا في سري اقول ليهو : بختك الليلة جاتك ربه وحفلة في محلك. وشوية شوية تشوف العربات واقفة زي الغنم اشكال والوان في الهكر ( قرمبع ) وفي العالية وفي الغالية والنازلين منهم فيهم الكبار بالعمم والجلاليب زي انا في اليوم داك اخر قشرة بجلابية وعمة وشال والشباب اخر موضات وشكات وحتي الشفع الصغار حلوين ينططوا ما مصدقين طلوعهم من حصون الباستيل دي والنسوان والبنات بالعبايات وحاقات الصرة البرة ديك تك مافي وفي اللابسات تياب بس شوية خالص وشكلهم لبسوا بعد ما دخلو الاستراحة ,, العشا اترص ياها صواني المندي ومشغلين استريو علي شريط لوردي ( الناس القيافة ) والجماعة شغالين طفح في اللحم والرز ما هبشوا اصلنا نحن ما ناس رز بس الغربة جبرتنا عليهو واشوف واحد من الشباب خاتي ليهو دفتر قريب منو الظاهر دي النقطة والحريم بينا وبينهم فاصل بستارة قماش اصلو المكان كان صالة كبيرة قسموها لاتنين نص لي الحريم ونص تاني حقنا زي الساعة عشرة كدي الجماعة شغلوا الساوند سيستم وجابو ليهم وليد كدي مطرش بكريم وزيت وشعروا مسوي كيف كيف وقالوا دا الفنان وبغني لي طه سليمان وحوتة وفي واحد تاني دا قالو متخصص حقيبة المهم الحفلة بدات وحلفت ستين يمين ما اتحنن في رجولي عشان ما اتربط وعاوز اهيص مع الجماعة وتبدا الربة شوية شوية اشوف ليك الستارة انشالت وقالوا احسن نخلي الحالة واحدة وكل زول باسرتو شغال رقيص وفي ناس حايمة ساي وفي ناس من كراسيها ما قامت واما ناس الرقيص ما قصروا وانتقموا بالحيل التقول عليوم اول مرة يحضروا حفلة واخوي عصام ما قصر وزيري اليوم داك والله يخليو للتعارف وتعال سلم علي فلان دا وفلان دا صاحبنا شغال في الشركة الفلانية ودا عمتي والفرحة الحلوة لي النسابة حاضرين الا كان ندي وكان جات اليوم داك بفتح طوالي لي جماعتي ......
يوم الخميس كان صفقة ورقيص ويوم ما بتنسي نسانا سنين الغربة وراجين اليوم الكبير واسبوع تاني عشان تعود الفرحة لينا وتضوي لينا ليالينا ....
يوم الجمعة مر زي السلام عليكم وجا اطول يوم في النيا يوم السبت ونفس لي الشغل مافي تب وجرجرة بعد ليل شلناهو سهر وانا في وسط الضجيج والازعاج داخل المصنع اسمع رنة جوالي وفي وقت زحمة شغل والواحد غرقان داير متيييييين يتفك من البلاوي القدامو عشان يريح واريت راحة عدوك تقعد في المكتب دقيقتين تلاتة كبة تانية تجئ ومرات يحبسك الشغل لمن الواطة تليل وكمان مرات تلاتين ساعة ما تشوف راحة وعينك ما تشوف نوم ما نحن زي الماكينات البندور فيا يستهلكونا زي الصابونة ولمن نبقي بروة يقولوا ليك مع السلامة وين تقبل ما تعرف .. اها التلفون تاني ضرب لقيتو دا عمنا قريبي وعملت طناش خليتو صامت وهو تاني يشيل يدق - الزول دا مالو مصر كدي يا ربي عندو شنو - خلاص ارد عليو واقول ليو انا مشغول حبة وبرجع بكلمك .. افتح الخط
- الو
- احمد كيف حالك
- كويس الحمد الله
- ياخي والله انا ما عارف اقول ليك شنو
- خير انشاء الله
- انت زول مؤمن .....
قلبي وقع في ركبي وجاتني خلعة شديدة
- المات منو ؟؟؟؟
- يا زول قول بسم الله مافي زول مات
- طيب الحاصل شنو
- والله نسيبك تعبان شوية وجاتو جلطة ونقلوا للمستشفي
- لاحول ولا قوة الا بالله .. والكلام دا متين
- قبل شوية وقع في الشغل ونقلوا بالاسعاف
- وانت منو الكلمك
- اتصلوا علي اولادو , واولادو اتصلو علي عشان اوديهم ونحن هسع ماشين ليهو
خبر يااااالله - الزول دا ياهو ركيزة الاسرة وياهو سندا وربنا يجيب العواقب سليمة
وقت مافي والزوغة من الشغل واجبة والبحصل يحصل وطز في الشغل وصاحبي الهندي يهزهز لي في رويسو يقول : مشكلة مافي صديق انا في ترتيب انا كلو معلوم بس انت روح شوف بابا
والله حالتو صعبة الزول في الانعاش وشكلو كدي جاوا شلل وربنا يلطف وندي رغم المصيبة والدموع الفي عيونا هي وامها صابرة ومحتسبة والواحد ما عارف يقول شنو غير يواسيهم ويا ريت الواحد يقدر يعمل شئ يمسح بيو دموعهم بس ارادة ربنا يوم فرح ويوم كره وغير الصبر مافي شئ ... المهم لمن شوفنا القعدة طولت بالساعات وديل ولايا براهم اصرينا لازم يمشوا البيت ونحن بنقوم بي الواجب وبعد ضغط شديد وبعد ما الدكتور طمنا علي صحتو وانو حالتو بقت مستقرة رجعوا البيت بس الشلل دا علاجو طويل وبحتاج لعلاج طبيعي ....
تعب وسهر وقلق والراجل حالتو حالة عدوك لانضمي ولا رفع كراع واليد مكنوشة لفوق يرفعوا فيو زي الجاهل الصغير , سبحان الله شوف حال الدنيا قبل يومين كان زي الحصان والليلة ما قادر حتي علي الكلام واولادو غرقانين في الدموع وحتي نحن شفقانين عليهم من غدر الدنيا والزمن وهم ولايا وهو سندالتهم وركيوتهم , اقول لي نفسي هسة نبقي لجنس دا نباري الغربة دي كدي لحدي الواحد ما يتكسر هنا ولا كيف!!! يا زول البسويها الله هي البتبقي وخلي امرك عليا الخالقك . ندي حالتا تحنن هي اصلا اكتر زولة من اخواتها قريبة من ابوها وكان ابوها داير موية ساي يحلف الا تجيبها ليهو ندي وهي كمان من قومت الجهل م فارقتو الا لمن سافرت لي الجامعة عشان كدي مرضو بقي ليها قاسي - قلتا يا زول اسيبا مع نفسها شوية وما اكتر عليها الاتصالات لحدي ما البت تهدا خواطرا شوية وشهر بحالو مافي كلام ناعم ولا ابتسامة حلوة بيها اصبر شوية ولا يحزنون - طبعا بعد اصرار شديد وحلف يمين انو مافي زول يودي ابوها للعلاج الطبيعي في المستشفي غيري ودي ابسط حاجة اقيف بيها مع تؤام روحي ونور عيني وشوية شوية عمنا اتحسن وبقت الاصابع تتحرك والخشم بقي ينضم بس تقيل وكمان ندي هدت ورضت بامر الله وفي الساعة ديك بعد ما العرس اتاجل لاجل غير مسمي وكمان البت موضوع الشغل اهملتو ولا جابت خبرو وكنت لازم اشوف طريقة افتح ليها الموضوع ومافي غير تلفون في وقت هادي واتصلتا عليها ......
- الو ندي كيف عمي الليلة
- الحمد الله كويس
- داير اقول ليك شنو
- ايوا
- طبعا انت زولة قوية وعارفة ربنا والحصل لابوك دا كلنا مؤلمنا بس انا ما دايرك تكوني قداموا ضعيفة
- والله يا احمد ما قادرة
- لالالا لازم تحاولي وتعصري علي نفسك عشان ما تشيلوهو هم زيادة علي مرضو
- انا ما قادرة اشوف ابوي بالحالة دي وما ابكي
- لا يا بت الناس .. دموعك ما بتصد القدر وخليك متامسكة عشان يتعافي ويشفي والمسالة مسالة وقت ويرجع احسن من الاول .
- يا رب ... غايتو بحاول
ناخد صندة كدا واغير الموضوع
- اها الشغل سويتي فيهو شنو
- والله انا هسه ابوي دا ما بقدر اسيبو كدا
- يعني ناوية علي شنو
- الشغل ملحوق وكان فاتت فرصة بتجي غيرها وانا شايفة الشغل في الظروف دي صعب
- خير انشاء الله وماتشيلي هم انا معاك وجنبك
- عارفاك ما بتقصر كفاية وقفتك معانا دي
- اهاااااااا جينا للكلام البجيب الزعل
- غايتو يا احمد بقيت لينا زي اخونا الكبير
- دا الواجب
ودعتها ولسه في القلب شوق ليها رغم الاما وشجونا بقت لي زي الملاذ كل ما احتاج لانسان اتكلم معاهو اتصل عليها وبلقي راحتي لمن اسمع صوتها وهي كمان كل ما تكون زهجانة تتصل علي .
في يوم كدا نادتني ام ندي علي جنب كدا وقالت لي :
- طبعا عشان بقيت لي زي ولدي دارية اشاورك في موضوع كدا
- خير انشاء الله
- زي ما شايف عمك عيان واقف من الشغل والبلد دي ما بترحم زول
- اي والله
-والله البركة في بيتنا الفي السودان وحبات القريشات الجاتنا من حقوق ابونا من الشركة الشغال فيها وقلنا اخير نلزم بلدنا وكفاية خلاص غربة
- والله يا خالتي مافي حل غير كدا والحمد الله انتو لسه بخيركم
- عشان كدا دايراك تعمل لينا اجراءات سفرنا نهائي
- مافي مشكلة ومن بكرة لو عاوزة
- فيك الخير يا ولدي
وبعد شوية زي الفكرت في شئ كدي وجاتني صادا
- اها يا ولدي وكان علي ندي لو دايرة تقعد معاك هنا بنعقد ليك عليها الليلة قبل باكر
- والله يا خالتي عوجة مافي وانا شايف الوقت ما مناسب هسة خليها ترجع معاكم وبعد العرس جيتا ساهلة هنا
- خلاص يا ولدي البسويهو ربنا كلو كويس
علي كدا اتخذوا قرارهم انو يرجعوا السودان وفي ظرف ايام اتحولوا من مغتربين لمواطنين

ونواصـــــــــل.........
رد مع اقتباس
  #7  
قديم 09-11-2010, 10:37 AM
الصورة الرمزية ابومنذر
ابومنذر ابومنذر غير متواجد حالياً
Senior Member
 
تاريخ التسجيل: Mar 2009
الدولة: المملكه العربيّة السعوديّة
المشاركات: 4,001
افتراضي

الاخ الباسابى / كل سنه وانت طيب , نضمك سمح وشيق جدا , يا زول عوارضك ده كثيره كده مالها , اتمنى يكون العرس تم على خير !! حكى لذيذ ومتشوقين لسماع باقى القصه ..
رد مع اقتباس
  #8  
قديم 09-13-2010, 11:54 AM
الباسابي الباسابي غير متواجد حالياً
Junior Member
 
تاريخ التسجيل: Aug 2010
المشاركات: 14
Post قصة لمغترب سوداني مع الزواج ج6

كل سنة وانتو طيبين وربنا يتقبل منكم الصيام والقيام ... وعيد سعيد علي الجميع يااااارب

ونواصل باقي القصة .......

الجماعة رجعوا السودان وندي تشيل وتشكي لي من التعب والبهدلة الما متعودين عليها ويا حليل النومة للضهر ودي كيف بتبقي مع الحر والبعوض والملاريات ودا كلو كوم والغلا دا كوم تاني غايتو الزول كان عندو مال قارون وما عندو شغل قروشو بتكمل وكان علي علاج ابوها يعلم بيهو الله الجلسة بالشئ الفلاني وغير الصبر يا زولة مافي شئ واسالا:
- هسة ناوين تسووا شنو ؟؟
- بالضبط كدا ما عارفين والله
- كيف الكلام دا
- شايفة امي قالت تشتري حافلة وتديها لسواق
- كان دا رايها اخير تاكل قريشاتها ساي من ياكلها واحد مقطوع يعدما اللستك
- مالا الحافلة ما قالو كويسة
- غايتو كان قنعانين من قريشاتكم اشترو حافلة بعدين بيبقي ليكم بمبي وبجيكم السواق مادي بوذو وجيبو فاضي يقول ليكم اليوم كلو عديتو في الورشة وهو بهناك كب في جيبو فردة ولا فردتين وبلع حق الاسبيرات يعني بدل تاكلكم تاكلوها انتو
- يعني نسوي شنو ادينا حل
- هووووي يا بت انا كان عندي حل ليوم الليلة قاعد بيهنا
حالة صعبة شديدة وندي بالواضح كدي شكيتا الكتيرة دي نايمة ليها فوق راي وما عرفت الا لمن مسكلت لي يوم كدا وادق عليها :
- انتي الجلدنا دي ما بتخليا يوم ساي مابدقي لي
- والله دي حسب النفسيات هه ههه هه
- وهسة نفسياتك مالها ما كويسة
- قافلة معاي
- كيف الكلام دا
- شوف يا احمد انت عارف حال البلد وعارف المصاريف هنا دايرا ليها بنك عديل كدا
- ما فهمتا عليك ( طبعا دي بالخليجي )
- يعني علاج ابوي ومصاريف البيت ومصاريف الجامعات والكهرباء والموبايلات ومصاريف النفايات والمعيشة واوووووووووك
- اها فهمتا وانتي في يدك شنو
- انا نزلت شغل وما قدرتا انتظر اكتر من كدا
- بس اوع يكون شغل معولق ساي وتعدي كل يومك ركوب مواصلات ونص الشهر عدمانا التعريفة
- لا شغل كويس في شركة استثمار
- اها شغلوك شنو انشاء الله ؟؟؟
- مديرة مكتب المدير العام
- يعني سكرتيرة
- اكبرشوية يا ود
- بس انشاء الله مرتبم يغطي معاك
- تمام وكمان الدوام مريح ستة ساعات بس
- خلاص انت حرة بس خلي بالك من نفسك
- ماتخاف علي انا مفتحة وناقشة كل شئ
- والله ما بقعوا فيها الا العاملين مفتحين
- اها نسيت اقول ليك
- في حاجة تاني
- اهلك امس كانو مقييلين معانا وابوك وامك جو من البلد مخصوص عشان يكفروا لي ابوي
- بس انشاء الله الطيب ما كبس عليكم
- ههههه دا بيقصر من يوم وصلنا المطار لاقانا في المطار ومكاواة مع امي ونهي شديدة وتليب شين
- هع ههههه الطيب دا غايتو ما بيفوتكم كما اديتو مرا
- طوالي بس عينو الطائرة دي
اضحك معاها شوية واختم : خلاص يا زولة في امان الله
- يلا ما تنقطع وبنتظر تلفونك كل يوم
- هىىىىىىى زمان الدقيقة محلية لمن كنتي هنا بس هسع الجيب بنقطع
- خلاص انشاء الله بس تدق علي وتسلم وتقفل الخط اسمع صوتك كفاية
- سمح يا ست البنات

غايتو ناس تكوس رزقا وناس الرزق يكوسا هسة ندي في كم واحدة قاعدة عاطلة ليها سنين ما لاقيا شغل هي تقوم من نوما وتلقي كوما -الله قادر ودي حكمتو عشان ابوا المرضان واخواتا الفي الجامعات والمدارس ولا يمكن نيتا بيضا ساي وبصراحة انا فرحت من قلبي لانو لو ما اشتغلت حالتم بتبقي صعبة وبدخلوا في حيص بيص , المهم شغالين تلفونات تقيلة خاصة باليل قبل النوم وبقت لي زي حبة المنوم لوا ما اتصلت عليها النوم كلو كلو ما بيجيني وبحس زي الناقصاني شئ وهي زاتا لو اتاخرت ما اتصلت عليها مسكولاتا ما بتقيف ودا حالنا ثلاثة شهور غير التلفونات والماسنجر ما عندنا طريقة نتلاقي والشوق خلي ساي لمن مدفق ومغرق حياتنا ... في يوم كدي بنهاظر وبنشاغل بعض قالت لي :
- احمد دايرا اقول ليك حاجة
- اي يا روحي
- انا عندي ليك مفاجاة حلوة
- خييييييييير
- انا طلعت لي عربية بالتقسيط
- والله , عربية مرة واحدة كدا هو بتين بديتي عشان تركبي عربات
- يا خوي المرتب معدل والبنوك بتدي في العربات الناس الراكبنها احسن مني في شنو
- اها عرفنا المرتب كويس بتشغليها بموية ؟؟
- الشركة بتسوي في شنو
- كيف؟؟؟
- والله يا احمد المدير بتاع الشركة زول عسل في التعامل معانا وهو الاقترح علي اطلع العربية وقال بيساعدني بالبنزين
- قلتي لي زي العسل والمدير بتاعك دا بيخدمك لله ساي كدا ؟؟
- هىىىىىىى ما تمشي بعيد هو عارفني مخطوبة وبعدين هو معرس يادوبو ما تم سنتين
- ما قلنا حاجة , قلتي لي اسمو منو
- علاء
- يعني البنزين بصدقوا ليك من الشركة
- اي زي ما تقول كدا بدل ترحيل
-تسكت شوية وتقول :غايتو عليك جنس غيرة
- يا حبيبتي ما اسالك ولا شنو ؟ انا غلطان السالتك
- خلاص ما تسوي لي فيها زعل وانت كما سويت كدا اعرف كيف بتحبني
- اها ما قلتي لي كرامة العربية متين
- بكرة انشاء الله بستلمها ما داير يفسحوك بيها
- وانت الحاتسوقي ولا كمان علاء بيجيب ليك سواق
- انا البسوق وعندي رخصة كمان شنو رايك وبعدين انت علاء دا علق في راسك خلاص
- يا زولة مبروكة عليك وانشاء الله تكمليها بعرق المشاوير وكان علي كلامي التاني دا كلام هظار ساي
- هظار ولا غيرة كاتلاك
- هاهاهاها قال اغير قال ..ندي تصبحي علي خير نحن الاتنين ورانا شغل بكرة والساعة هسع اتنين بليل يلا مع السلامة
- وانت من اهل الخير
ندي ضاربة جو السودان وقابضة الجو وانا بهنا الغربة مطلعة روحي وعايشة في امانة الله وكمان ماسكة مصاريف البيت جت وبقت هي الكل في الكل حتي نها بتقول لي :الزولة بقت ابونا وولية امرنا وما بنخليك شيلا مننا بعد ما ضقنا قروشا وحتي امها الصوت الحزين دا راح وكيفن ما يروح بعد العربية الفي خشم البيت والبيت زاتو ملك والحال مستور .
الشهور بتمر وبتعدي وانا منتظر والوك في الصبر واقول بكرة غربتنا تبقي جنا بيها وباقي لي الاجازة شهرين قلت خلاص اصلو ما بفوت الفرصة دي واخش فيها القفص الذهبي وطوالي جهزتا الشنطة واشتريت لي حبة دهيبات وختيت النية في بالي وقلت اكلم الناس ديل بالعرس واول زول اوريهو ندي واتصل عليها :
- الو .. ندي مساء الخير
- اهلا اهلا
- كيف حالك
- تماااام الحمد الله , دي دخلتي البيت من الشغل
- شغل شنو لي الساعة تمنية دا
- تقول شنو كان عندنا وفد جاي لشغل معانا ولازم استقبلوا في المطار
- دي شلهتا ساي وبعدين في بيتك بتسوي لي كدا
- كدي لمن يجي وقتو هين
- وكتو جا خلاص وانا هسة داقي ليك عشان الموضوع دا
- العرس ؟؟؟؟
- عندنا غيرو
- والله ما عارفة اقول ليك شنو
- تقولي لي شنو !!!!!! يا بت انت الليلة مالك
- مالي كويسة الحمد الله
- ونان الحيرة في شنو
- اسمعني احمد انا شايفة موضوع العرس دا ناجلو شوية
- ناجلو ؟؟؟؟!!!!!!!! لييييييييييييييييييييييييه ؟؟ الحمد الله ابوك بقي كويس بمشي وبتكلم وكل شئ وكان علي ناس بيتكم والله عايشين في نعمة والحمد الله والعيشة احسن من عيشتكم في السعودية اها تاني في شنو ؟؟؟
- الحمد الله بس انا قصدي............
- انتي قصدك شنو ؟؟
- الشغل ..........
- مالو الشغل
- انت عارف انا يادوب ما كملتا في الشغل سنة وعاوزة اثبت نفسي كويس ثم تاني ما بدوني اجازة وانا ما كملتا سنة
- يا بت الشغل يطير ( بنرفزة وزهج )
- كيف يطير يعني ... انت عارف الشغل دا هو المعيشنا
- العايش الله وبعدين انا ما حاميك الشغل
-انا هسة قلت ليك انت حاميني الشغل
- ولييه التعذر
- انا عاوزة افضي ليك براوقة وما يكون بالي مشغول بحاجة تانية وما دايرا افقد شغلي كمان
- شوفي يا ندي انا اذا قلتا ليك باجل العرس كضبت عليك وشاوري نفسك كمان وشاوري اهلك وردي علي ومعاك سلام
صدمني كلام ندي صدمة قوية وبقيت اكلم روحي : يا ربي البت دي القروش عمتا ولا شنو وبتخاف علي الشغل اكتر مني ومن بيتنا المعلق في السماء وين كلاما لمن تقول لي : بتمني الايام تجري سريع عشان يضمنا عش واحد ونكون لي بعض للابد وهسة لمن الكلام بقي جد تنط منو ... في الحقيقة انا لاحظت في الفترة الاخيرة تلفوناتها قلت وكل ما اقول ليها انت عواطفك فترت تتعذر لي بالتعب والشغل وحماسا بفتر شوية وانا بقول لنفسي يمكن البعد هو السبب والبت الضغط عليها كتر البيت واخواتا وابوا يا ربي ممكن يكون قدر دا ......

ونواصـــــــــل ..............[/[/size][/font][/right]right]
رد مع اقتباس
  #9  
قديم 09-13-2010, 12:04 PM
الباسابي الباسابي غير متواجد حالياً
Junior Member
 
تاريخ التسجيل: Aug 2010
المشاركات: 14
افتراضي

اقتباس:
المشاركة الأصلية كتبت بواسطة ابومنذر مشاهدة المشاركة
الاخ الباسابى / كل سنه وانت طيب , نضمك سمح وشيق جدا , يا زول عوارضك ده كثيره كده مالها , اتمنى يكون العرس تم على خير !! حكى لذيذ ومتشوقين لسماع باقى القصه ..
وانت طيب يا ابو منذر ويديك الصحة والعافية
تسلم علي المتابعة والمرور والباقي جاييك في الدرب
رد مع اقتباس
  #10  
قديم 09-15-2010, 02:55 PM
الباسابي الباسابي غير متواجد حالياً
Junior Member
 
تاريخ التسجيل: Aug 2010
المشاركات: 14
Post قصة لمغترب سوداني مع الزواج ج7

غايتو بقيت في حالة ما يعلم بيها الا الله - مسكني صداع حلف مايفكني الا يصبحا معاي -يقطع سنين الحب والعرس هسي الواحد ما احسن ليهو يقعد عزابي من الشحتفة دي وانا يادوب في المناظر ولسه ما بقينا علي سيد اللبن وسيد العدة وكمان بعدين الاستاذ الخصوصي بعد عمر طويل - البت دي دايرا تخرب لي الاجازة مرة واحدة - هسة انا كان سمعتا كلام امها قبيل وعقدت عليها وخليتا معاي لا كان شافت شغل ولا كان ركبت ليها عربية كورلا ولا ياهو مرضنا الكاتلنا الايام دي بعد ما الكريسيدا السمح سيدا بقت تاكسي هكر - يا زول اخير تحنسة براحة اصلو النسوان ما بيجوا بالقوة وكان عاندت معاها بتزيد زيادة وما تقول هي مسكت في الشغل مسكة اعمي مسكو العاز وتاني بفكو .
اليوم التاني ما مشيت الشغل مشيت للمستوصف وبلغتهم بمرضي وباقي اليوم شيلتو نوم جبر من السهر والجماعة في البيت بعد ما صحيت مستغربين يا زول خبارك ما مشيت الشغل
- عيان شوية وماخد اجازة
- بس ما يكون شئ تقيل
- ارهاق وتعب شوية
عمنا يلاكز
- يا خوي دا تعب الشيلة ساي ما العرس قرب
- الله يتمو
- يا زول بينتم تب , عندك شنو تاني كل شئ جاهز اتوكل علي الفتاح وقول يالطيف بس
في المساء اتصالات تقيلة واول زول الطيب ود عمتي :
- الطيب كيف حالك
- كويس الحمد الاف
- يا زول اجازتي قربت وناوي اعرس فيها
- عديلة ياود الخال ما بنقصر معاك تب , رسل لينا الشنطة عشان نودي ليك الشيلة من هسة
- الصبر شوية
- يا زول انت اطلع منها وكل شئ بيقضا وكان علي ناس ندي ديل علي يدي وكمان ياخوي لو جبتيين شنطتين تكون ما قصرتا عشان اخش ليك توووش في الصغيرونة ( ناهد )
- ههههه الطيب انت جنك دا ما بتخليهو وشغل السوق المحلي دا ما بينفع مع الناس ديل انت قايل الشغل بضاعة بسمسرو فيها .
- هسع خلينا في موضوعك كلمت خالي ولا اكلموا ليك
- لسه بس روق شوية لحدي ما اتفق مع الناس
- يا زول اتفاق شنو انا بقوم ليك بكل شئ وزي ما قلتا ليك الشنطة والقروش والله الاسبوع الجاي الشيلة تكون عندهم .
- ما بتقصر البنية دايرا تدبر نفسها وانت عارف شغالة وعندها التزامات وكدا
- يا زول ما ترخي ليها ودوس ابنص وكان راجي تديك راي واطتك اصبحت
- كيفن الكلام دا
- يا زول ياها حال النسوان بتاعين مسميس وجرجرة كتيرة وهو العرس فايت ليهو يومين
- مافي مشكلة يا الطيب بس خليني اشوف الوضع .
- كويس يا زول وادينا خبر كان بقيت عليهو
- ابشر
اقفل الخط من هنا وادق علي ندي
- الو ندي كيف قيلتي اليوم
- كويسة الحمد الله
- اها شاورتي نفسك واتكلمتي مع اهلك
- اي
- وصلتو لشنو
- الراي عند امي اديك ليها تكلما
انتظر شوية ويجيني صوتا
- اهلا يا خالة
سؤالات كتيرة وكيف حالك والغربة وكيف عامل وكيف بعد ما خلصت تب
- طبعا يا خالة ندي كلمتك بالموضوع
- اي كلمتني ومافي عوجة يا ولدي بس دايراك تسمعني كويس
- خير انشاء الله
- يا ولدي انت صبرت الكتير والحمد الله وندي ياها ليك بس دايراك تجبر بخاطري وتاجل العرس شوية زي ما قالت ليك .
- والله يا خالة خاطرك فوق راسي بس ممكن اعرف لشنو ؟؟
- مافي شئ مانع كل مافي الامر دايرين نرتب حالنا شوية وانت عارف العرس داير ليهو مضايرة من بدري .
- الحمد الله لسه في وقت للعرس بقي ما زي زمان تلتلة وجوطة كتيرة
- عارفة والله يا ولدي , النقول ليك هسة نحن متوقعين عرس نها اختها يكون قريب والليلة نهال قالت لي ود عمها فتح ليها الموضوع وانت عارف عرسين وكت واحد صعبة علينا شوية
- غايتو يا خالة ما عارف اقول ليك شنو
- ما تقول اي حاجة والايام بتجري سريع وخليهو في عيد الضحية الجاي انشاء الله
- عيد الضحية !!!! عيد الضحية باقي ليهو ستة شهور
- ما بعيدة وانت زاتك تكون رتبت نفسك كويس
- والله يا خالة حيرتوني عديل كدا .
- غايتو يا ولدي حيرة تب مافي وكما جيت بنعرسا ليك وبنرسلا ليك تاني في كلام
- سمح النشوف .
ندي اخدت السماعة والفرحة ما شايلها وتقول
- انشاء الله اقتنعت بكلام امي دا
- هسع عرفتا راي امك , ابوك رايو شنو ؟؟؟
- ابوي ما كلمناهو بالموضوع ولو بتعزني ما تفتح ليهو الموضوع
- ليه ؟؟؟
- لاني عارفة رايو في الموضوع دا ومستعجل لي عرسي شديد
- كان كدي بكلم ابوك طوالي وانتو مخيرين معاهو
- عليييييييييييك الله ما دخلوا في الموضوع والله بزعل شديد
- خلاص يا زولة خليني ادرس الوضع , هسة كدي خلينا من العرس ابوك صحتو بقت كيف ؟؟
- تمام التمام الحمد الله , سوا ليهو مغلق كدي وقعد فيهو وقلنا احسن ليهو من قعدت البيت والحمد الله امورو كويسة .
- الحمد الله طمنتيني ,, يلا سلام وتحياتي ليهو
- يصل انشاء الله ,, يلا سلام
الشغلة ما ركبت لي في راسي وبراي ما بتتحل لي وداير زول يفكر معاي قلت النشوف عمنا دا يكون خبرتوا احسن مني في الامور دي ولمن شاورتو قال لي : يا ولدي العرس ما بالجبر البنية اديها فرصة وستة شهور بتجري سريع وما تكلفت الناس كدي وانزل اجازتك عادي وودي شيلتك ليهم والشيلة ما بتضر كان قعدت سنة ما بيجيها شئ وكان الهديمات موضتن انتهت ببدلوهم في السوق .
- علي قولتك يا عمي النشوف نهايتها شنو بعد الستة شهور دي انشاء الله ما تلقي ليها عزر تاني.........



ونواصل .............
رد مع اقتباس
  #11  
قديم 09-15-2010, 08:10 PM
الصورة الرمزية العاشابي
العاشابي العاشابي غير متواجد حالياً
Junior Member
 
تاريخ التسجيل: Jul 2009
المشاركات: 18
إرسال رسالة عبر Skype إلى العاشابي
افتراضي

اخونا الباسابي مساك الله بالخير ---

من امبارح انا راجي الحلقه رقم 7 - لاني قايلا الاخيره اتاريهو موضوعك طوييييييييييييييل لسه -- الله يكون في عونك علقته روحنا ورينا الحلقه الاخيره متين ----------
رد مع اقتباس
  #12  
قديم 09-16-2010, 06:36 AM
الباسابي الباسابي غير متواجد حالياً
Junior Member
 
تاريخ التسجيل: Aug 2010
المشاركات: 14
Post قصة لمغترب سوداني مع الزواج ج8

قلتا ما دام العرس وكتو طرشق اخير انزل اجازتي عادي وبعدين اجازة العرس بتتحلا واحسن اسافر طوالي واطقي نار شوقي ونحلم بي يوم باكر والفرحة تعمنا ويا ربي هون القواسي . وريت ندي بميعاد وصولي وبالخطوط الجاي بيها ووصيتا تقابلني في المطار لاني عاوزها تكون اول وش اشوفوا في السودان - نزلت الطائرة في مطار الخرطوم بسلام وامان والقلب من لحظة ما المضيفة نبهت بربط الاحزمة وان الطائرة ستهبط بعد قليل دقات قلبي زادت بسرعة دق ...دق ...دق وجسمي عرق والدقائق بقت لي ساعات وبسرعة كملتا اجراءاتي وطلعتا لي الصالة برة واتلفت يمين شمال افتش في ندي واتلفت زي الغنماية الرايحة ..ياربي الزولة دي وين وفي اللحظة دي اشوف يد علي كتفي واتلفت القاهو اخوي منتظرني : حمد الله علي سلامة الوصول والبلد نورت , سلمتا عليهو وبالي ما معاهو اتلفت بعيوني قلت يمكن مشت تشتري ليها حاجة ولا يمكن اخرتها الزحمة اصلو البلد شوارعا اتملت بالعربات اخوي فهم انا بفتش لشنو وطوالي قال لي : زولتك ما جاية .
- كيف الكلام دا
- كلمتني قبل نص ساعة وهي بتعتذر ليك وقالت عندها اجتماع ضروري وبتجي تقابلك المسا في البيت عندنا.
- يا زول خير عوجة مافي يلا نمشي انا تعبان شديد
في المساء جات البيت معاها امها عشان تلاقيني ورغم اني زعلان من عدم جيتها في المطار وهي كان اصلا دايرة تجي كان لقت ليها الف سبب تقابلني بيهو . بعد ما سلمت علينا وقعدت معاي حسيت في عيونا حزن مكتوم وشفت انسان تاني غير ندي البعرفا برغم انها بتتظاهر بالفرح جاني شعور انو البت دي عايشة مع نفشا عزلة وما متصالحة معاها واسال نفسي وين ندي البت الرقيقة الوديعة - البت لمن تعاين ليها تلقاها مبتسمة في خجل وبريق عيونا لمن تضحك يمسح كل احزانك وكمان كلامها بقي كبار كبار وكلو قروش وعمارات والناس الهنا في السودان عايشة كيف وكيف نخن غاشين نفسنا ساي بنتظر الراتب كل اخر شهر وهنا في ناس قدر رواتبنا بتصرفا في يوم واحد في دعوة غداء ولا حفلة شاي في صالة من الصالات . ما حبيت استعجل واديها ملاحظات ولا وضحت ليها التوهان الدخلتني فيهو واحسن استمع ليها وانا مستغرب في كل تصرفاتها بس اتاكد لي رغن كلو كلامها انو هي ما سعيدة عشان انا بعرف نبرات صوتها كويس وبعرف كويس صوت الفرح والسعادة بكون كيف وكمان لمن اعاين في وشها تهرب بعيونها مني وانا متاكد مافي زول يقدر يحس الحسيتو دا الا انا لان حياتنا مع بعض كلها احاسيس ومشاعر بتتفهم لكن ما بتقال حنيت عليها واثرتني حالتها دي .
اللحظات انقضت سريع وودعتني وحاولت اخد معاها موعد نتقابل فيهو بس كان ردها : بينا تلفون عشان ما عارفة ظروف الشغل كيف , وقبل ما يستاذنوا ورتنا ام ندي بعرس ( نها ) بعد عشرة ايام وطبعا تشريف الاسرة الكريمة شئ ضروري زي ما قالت .
اليوم التاني قلت اصلو ما ادق عليها عشان ما تعمل لي تقيلة وتمارس معاي دلع البنات داك واحسن تجي منها هي وانتظرت للعشا لا تلفون ولا حتي رسالة ساي تجيني منها وكل ما اسمع الموبايل يرن اقوم زي المخلوع جاري عليهو والحكاية لمن طولت للساعة عشرة ادق عليها :
- الو ندي
- اهلا احمد
- شنو عاملة فيها تقيلة كدا منتظر تلفون منك من الصباح
- والله كنت مشغولة شديد وطلع من بالي ادق عليك والله
- خلاص بقيتي تنسيني !!
- ليه بتقول كدا وانت عارف معزتك عندي قدر شنو
- هسة خلينا في المهم اشوف متين
- والله يا احمد الايام دي مشغولة شغلة ولخمة ما يعلم بيها الا الله من العرس الجاينا والشغل والله جري شديد
- يعني مافي طريقة اقابلك بيها قبل العرس
- دايرا اقعد معاك بس طريقة مافي لي
- خلاص كان كدا انا بمشي البلد وبجي لي عرس نها , اها عاوزة شئ
- سلامتك بس
- يلا مع السلامة
الايام مرت سريع وجا يوم العرس والبرنامج بتاع العرس شئ يحير فيهو مديح ورقيص وصالة وفنان من الفنانين الشباب وزفة عروس دا غير مكائن الشاورمة والعصائر الحايقدموا وحاجات كدي ما بتشبه عرسنا في البلد واقول لنفسي ارجا الراجيك ساي ويا حليل الصيوان البدقز قدام البيت والمنظراتية يا ود احفر بهنا لا بهنا وقلبو دي علي الشارع - لا يا جماعة دا كدا بكشف محل النسوان وين محل الطباخ و...و...و نظريات شديدة
الحفلة بدت والعرسان قاعدين في الكوشة صلاة النبي عليهم واشوف ندي جنب العروس هي وامها واختها التانية زي البطمنو فيها وبهناك المعاوزيم مالين الطرابيز واليوم داك ما خلو نور لمن الواطة بقت لينا زي النهار مشيت علي نها وزوجها باركت ليهم واشرت لندي تلحقني علي تربيزة قريبة كدي وطوالي تبعتني وقعدت قصادي
- مبروك لنها وعجبنا ليها
- شكرا ليك
وبدت الونسة لكن ما الدقاقة ديك عشان الوكت لسه بدري ويادوب فاصل واحد انتهي وبعد شوية جانا واحد شاكي ومسبسب شعروا ولابسلو ساعة ذهبية في يدو اليمين ويدو الشمال فيها مفتاح العربية والموبايل وهو كلو علي بعضو اخر وجاهة ويلفت النظر من بعيد وباين عليهو مغرور وعاجباهو روحو شديد سلم علينا وجرا ليهو كرسي قعد جنبنا وعاين لي ندي وقال بابتسامة عريضة :
- الف الف مبروك لنهوية
- الله يبارك فيك - تمتمت شوية ووشها حمر وهي بتقول :نسيت اعرفكم علي بعض :علاء , احمد بدون ما تزيد اكتر من كدا وهي بتعاين لي دايرا تشوف رد فعلي بكون كيف وانا بعاين في علاء وبقول لنفسي : ياهو دا جون دارلينغ المتوصي علي زولتي , علاء دخل بدون مقدمات في ندي وكاني ما موجود معاهم واخلاقي جات في نخرتي واعاين ليهو عين قوووووية واقول ليهو : شنو يا ابو الشباب عملتا الحالة واحدة , يعاين فيني كدا ويطنش ودي حرقتني حرقة شديدة وقومت نفسي وطلعتني برة طوري واهيج فيهو وادق الطربيزة بيدي طراااخ : قوم من هنا ولا اكسر الجك دا في راسك وكان عامل فيها صعلوك وقليل ادب والله نحن مقطعنها , ندي اضايرت بعيد ولمن شافتني ام ندي هايج جات جارية علي وجرتني جر من وسط الناس وقعدت معاي في محل بعيد ام ندي تجر فيني لبرة في واحد عمك قاعد بعيد كدا علق قال : انتو الواحد وكت ما بقدر علي السم الهاري دا بتتحنطروا بيهو مالكم , الكلام فات اضانمي لغادي قايل نحن سكرانين والجماعة الجنبو قنبو بيضحكوا . ام ندي ودتني مكان بعيد في اخر كورنا في الصالة وجرت ليها كرسيين وقالت لي : اقعد في الواطة دي يا ولدي وقول بسم الله - ومشت ملت ليها كباية موية وناولتني ليها وهي بتقول لي : هاك بل ريقك النشف دا , وانا لسه دمي بيغلي وصرت الوش ما راحت وهي تشيل وتهدئ فيني بالكلام الطيب والحنين وتستعطف فيني لحدي ما هديت شوية وانا قاعد معاها جا في بالي الطيب ود عمتي يقوم يتهور وانا عارفو احمق من ابو الدقيق بعض مرات بشاكل نفسو لو حرقتو وطوالي قلت ليها : الطيب وينو , اشرت لي ياهو داك مع عم بناتي بحنس فيهو وتبتسم وتعاين لي وتقول : انتو حرارة الدم عندكم وراثة ولا شنو
- ابدا يا خالتي هسع انا القدامك دا شايفاني زول مشاكل ؟؟ الحقارة ما بندورا
- حقارة شنو يا ولدي ما تبقي زول معقد كدي وخلي العوارة والمشاكل ما ليها داعي
- عليك الله يا خالة من عرفتيني انا زول مشاكل ؟؟
- ما دا المحيرني يا ولدي البشوفك كلو كلو ما بصدق هيجتك السويتا دي
- عشان تعرفي الزول دا استفزاني وبكوس للمشاكل وبهابش
- كدي انت اهدا وما حصل شئ قدر دا وتعاين لي برجاء كدا : عليك الله عاين لي نها دي ما زي اختك داير تخرب ليها عرسها ؟؟
- العرس انشاء الله ما بيخرب بس الزول دا يختا ندي ويلعب بعيد
- لا اله الا الله محمد رسول الله عليك الله يا ولدي انسي الزول دا وخليو في حالو
- سمح يا خالة
الحفلة ما وقفت والفاصل الاخير شغال جاتني ندي سلمت علينا وغمزت لي امها نظام سيبيني معاهو شوية .. الحاجة براحة قامت انسحبت واندمجت في الحفلة وخلتني مع ندي واهاجمك طوالي :
- ما بدري .. علاء بتاعك دا ما منتظرك
- تضحك شوية .. احمد ما تخلي عقلك صغير وتاخد الموضوع بالحساسية دي
- هىى يا ندي والله نحن بنصبر علي كل شئ بس جنس البسوي الجنا دا ما عندنا ليهو روح طويلة فت بنية افرتقو ليك حتة حتة .
- بالله اصلو ما قايلاك شراني كدا
- شراني هيه هيه اخير انا والله افك ليهو الطيب كان يعدمو ليك السن
- تضحك لي نظام هظار وكدا: غايتو الله يسترني معاكم ما تكسروا سنوني
- ما اشتغلت بالهظار : ندي انا داير اسالك بصراحة وخليك صادقة معاي انت علاقتك بالزول دا شنو ؟؟
- قبل ما اجاوب ليك سؤالك دا دايراك تفهم حاجة واحدة
- شنو دي
- انو في الدنيا دي كلها ما حبيت زول غيرك وبقول ليك عديل انا بحبك ومستحيل انساك والله حياتي من دونك ما ليها معني وخليك متذكر الكلام دا كويس
- قلبي برد مرة واحدة ووشي حمر وراسي كبر واقول ليها : انتي وقت دي حالتك البتسوي فيهو دا شنو
- انا سويت شنو , بس وريني انا غلطتا في شنو
- هو لو ما انتي اديتو وش حلو كان قدر سوا السوا دا
- يا احمد الزول دا كلامو كدا ودي طريقتو معاي في الكلام من اشتغلت معاهو
- طريقتو دي ما بتركب معانا ندي انا قلتا ليك خليك صادقة معاي
- وتنفعل : ياخي ما تخليك كدا كرهتني العيشة ذاتا
- انا كرهتك العيشة دا كلام شنو ؟؟!!
- معليش والله ما قصدي ودا كلام من برة ساي
وتسكت شوية وتدنقر في الواطة واشوف دموعها جرن وتمسك يدي بيدها وتعصرن بقوة وصوتا من البكا يقطع :
- احمد انا محتاجة ليك شديد ودايراك تكون جنبي واعودني انك ما تتخلي عني اصلو
حيرتني البت قبل شوية كانت كويسة يا ربي القلب كيانة فجاة كدا شنو معقولة في الصنة البسيطة دي اتذكرت شئ مؤلم ولا الحاصل شنو - والله احساسي القبيل الشفتو فيها لمن جات سلمت علي ما خاب كلو كلو والحزن الشفتو في عيونا صحي ما كضب البت دي متوجعة من جوا وبكاها بكي حار شديد وبكي زول ممغوص .
- ندي مالك بتبكي في شنو المتعبك احكي لي موش نحن حاجة واحدة
- لالا مافي شئ
- ندي خليك صادقة معاي وما تهربي مني في شنو بوظتي اعصابي
- مافي شئ
- يا ندي انا شايف الالم في عيونك من يوم شفتك تقولي لي مافي شئ نحن قبيل مش اتفقنا نكون صادقين وصريحين مع بعض .
- خلاص وقت تاني بحكي ليك كل شئ بس انا خايفة تفهمني غلط وتغير رايك فيني
- لا ما بفهمك غلط
- خلاص بكرة نقعد مع بعض وانا زاتي فاض بي وما قادرة اتحمل اكتر من كدا
- خلاص بكرة انشاء الله , يلا خلاص قشي دموعك وامشي علي اهلك الحفلة انتهت عشان انا بعد دا ماشي اسوق ناس البيت , تصبحي علي خير.
- تصبح علي خير .

ونواصـــــل ................
رد مع اقتباس
  #13  
قديم 09-16-2010, 08:12 PM
الباسابي الباسابي غير متواجد حالياً
Junior Member
 
تاريخ التسجيل: Aug 2010
المشاركات: 14
Post قصة لمغترب سوداني مع الزواج ج9 و ج10 والاخييييييييييير

البت دي طبعا محنتي جنس محنة وخلت شعري يقوم صوفا صوفا وضيقت علي الدنيا واقول لنفسي البت دي مسوية شنو تحزن قدر دا وحالتا صعبة ما فاضل ليها الا تحضني من شدة ما هي دايرا ليها صدر حنين تتحاما فيهو -شلت ليلي داك كلو سهر افكر فيها وفي ملاقاتا بكرة ويا ربي الحاصل شنو .
في المساء تاني يوم دقت علي وقالت لي : احمد بمر عليك في البيت عشان نطلع وخليك جاهز
عليك الله شوف محن الدنيا دي هي البتمر علي مش انا -هسة لو نزلتا بعربيتي ما كان اخير من تمر هي علي وكمان تقول لي اجهز قادر الله في حكموا . المهم مرت علي في البيت وطلعنا سودا لمنتزه في امدرمان هادي ورايق والهواء البجيك من قصاد النيل يرد الروح ورغم نظرات عيونا الجزينة تشوف في عيونا لغز لا يفسر وهي لما تحزن بتزيد حلاوة ولحظتها حسيت اني جالس قدام ( مريه ) الوصفا صلاح احمد ابراهيم في قصيدتو المعتقة ( ليت لي يامريه ازميل فدياس.... ) وانا بشوف فمها يرجف بالضيق الكابس في صدرها فخطر ببالي جزء من القصيدة وفم كالاسد جوعان زمجر .. ينادي شفة عطشي واخر تتحسر .
قعدنا وانا بعاين ليها وعيوني مليانة حيرة ومنتظر تنضم وتفتح خشوما وتقول الشئ المتعبه وكت شفتا غالبها النضمي وابت تبدا قلت احسن ابدا انا :
- احمم.... طبعا انا جاي هنا عشان اسمعك
- وانا ما حادس منك اي حاجة
- يلا وريني مشكلتك شنو ؟؟
- شوف يا احمد انحنا جينا السودان مرينا بظروف صعبة ما يعلم بيها الا الله والحياة بقت لينا فظيعة وانا لو ما اشتغلت كان حنمشي لهاوية , المهم عن طريق واحد من معارفنا قدم لي في الشركة الشغالة فيها انا هسة ومشيت قابلت علاء وطبعا هو المدير العام وسيد الشركة بتعمل في الاستيراد والتصدير يعني بالعربي كدا شركة تجارة عامة بتصدر وبتستورد اي حاجة فيها قروش , المهم قابلت علاء من اول يوم شافني حسيت باهتمامو بي ومعاملتو معاي واتظاهر لي بانو مبسوط من شهاداتي واوراقي وكمان قال لي انا عاوز زولة زيك تترجم لي الاوراق والخطابات البتجي من برة وكمان عندي كمية من المراسلات والمواعيد محتاج زول يديرا لي وانا شايف انتي مناسبة للشغل دا وطوالي قام عيني في الشركة واشتغلت معاهو وهو زول نافذ ليهو علاقات كتيرة بناس مؤثرين ودخلت عالم تاني وعرفت حاجات لو حكيتها ليك تقول لي دا خيال ما حقيقة , المهم علاء بدا يغريني شوية شوية وزي ما شايف نزلت عربية وبعد فترة فتحت لي ابوي المغلق الشايفوا دا وبقيت معاهو اغلب الوقت وبدا يلمح لي ويعمل لي في حركات مريبة وهو عارف انا مخطوبة وكل مرة بذكروا بالكلام دا وهو مواصل في حركاتو دي وحاول يمشي اكتر من كدا .
اقاطعها
- كيف اكتر من كدا ... اكتر من يعاكسك ويحاول يتنادل معاك ؟؟؟؟؟؟؟!!!!!!!!!
دموعا كبت وانا ساكت وخايف من شئ في بالي والله يستر وانا اهدئ في خواطرا عشان تروق وتقدر تتكلم
- يا ندي كل شئ ممكن يتحل بس كدي قشي دموعك دي واحكي لي الباقي
ترفع راسها وتواصل ...
- علاء طلع حقير وندل وانسان سئ للغاية و..............
- يا بت الناس وقعتي قلبي قولي لي الحاصل شنو ؟؟؟؟!!
- بس عليك الله يا احمد تسمعني للنهاية
- حاضر بسمعك لبكرة الصباح
- وتوعدني انك ما تتسرع
- يا بت الناس حرام عليك الحاصل شنو
- خلاص انا بقول ليك ......... وتسكت مسافة وترجع تبكي وتقول : احي انا , ما قادرة اقول .........خلاص خليني في حالي .
- كيف اخليك وانت بالحالة دي
- احمد دايرة اقول ليك شئ
- اها
- يا اخ ما قادرة اتكلم ..... والله الكلام ما داير يطلع
- ندي قبل ما اكون خطيبك انا صديق واخ ليك
- خلاص انا بقول ليك والبحصل يحصل .....انا وعلاء متززززززززوجين في السر
اعصابي باظت مرة واحدة والواطة لفت بي بدون ما اشعر اتف في وشا واقول ليها :
- يا خايتة يا غشاشة .. واقوم من الكرسي وامشي اخليها تجري وراي برة المنتزه وتمسكني من يدي :
- احمد اسمعني عليك النبي وعليك الله كان تسمعني .... عليك الله ارحمني
- دايرني اسمع شنو تاني بعد السمعتو دا
- انت موش وعدتني ما بتتخلي عني وقدر انا فتحت ليك قلبي بالكاتماهو من زمان وانت وعدتني تسمعني للاخر .
- شوفي يا ندي انتي سقطتي من نظري خلاص ومهما كان ما مكن تصل بيك الامور لي كدا
- خلاص يا احمد بس اسمعني ومافي زول في الدنيا دي حايسمعني غيرك
- خلاص نحن نرجع هسع وبكرة نشوف قصتك شنو مع علاء دا يلا مع السلامة
- وين ماشي ؟؟ ما اوصلك !!
- لالا من هسي سكتنا اختلفت ودربنا بقي ما واحد .
ومشيت منها وما مصدق الحصل دا وبقيت زهجان من بنات حواء كلهن اصلو ما تضمن ليك بت نهائي ..
رجعت البيت زهجان وقرفان والواحد نفسو مسدودة من اي شئ دخلت والجماعة بهناك الوالد والوالدة واخوي ومرتو واولادو الصغار قاعدين في الحوش بقادي وسموا دخلتي ومتوقعين اجي اقعد معاهم وابوي لمن شاف قعدتب جوة الاوضة طولت جاني وسلم علي وشاف وشي متغير وكان كلكلوني ما بضحك وكعاتو معاي لمن يلاقيني صاني كدي بهاظرني وطوالي قال لي : غايتو طغي المغتربين دا ما بتخلوا .. فكها الله يفك ضيقتك يا ولدي .. سكت ورديت ليهو ببرود كدي غصبا عني وهو طوالي استدرك
- يا ولدي مالك راجع وشك مخطوف كدا وشايل الدنيا فوق راسك
- مافي شئ بس الجو مغير معاي شوية وكمان عدم الموضوع
- كان علي الموضوع ساهل وجاياك الشيلة ودي براها موضوع
موضوع الشيلة مرق من بالي وانا مكلوم انو بعد عرس بتهم نهي نودي الشيلة وبعدين يرجعوا البلد وهم من طلعت من البيت ماسكين موضوع الشيلة وتجهيزاتها .رديت عليهو بدون ما اشعر
- بعدين بعيدن انشاء الله
- بعدين بتين انت مالك الليلة مهبوش كدي
- انشاء الله كل شئ ببقي
- يا ولدي بس انت ادينا القروش والباقي علينا انشاء الله اليومين الجايات دي بنوديها ليهم
- مافي مشكلة
هسع يا ربي انا اوريهم بالحاصل وانو العرس طرشق والشيلة دي اخير نلمها لبت الحلال البتجي والله صعب الواحد يخلعهم فجاة كدا وكان سكتا بتبقي عوجة كبيرة وتدخلني في حتة ضيقة وصعبة وقلت يا زول خلي الموضوع دا معلق كدا وبكرة ربنا بيحلها .
النوم غلبني والسرير تقول مولعين فيهو نار اتقلب فيهو جاي وجاي والعيون ما دايرة تغمض وتهجس افكر ساي في البت دي كيف باعتني بالرخيص كدا ونست كل البينا وفقدتني التقة في كل البنات وبقيت اشوفين كضابات وبتاعت لف وزوغات والواحدة قدر ما تحسن فيها ياها دي اخرتا تبيعك في اقرب ملف ولا يهما تموت ولا تفطس ما مهم عندها بس تعيش حياتها هي منتهي الانانية وعاملة فيها برئية واجرجرت مع علاء لحدي ما قدر عليها وهي عاملة لي مفتحة , الليل كلو ندي تشيل وتضرب لي وانا عامل ضان الحامل طرشة ولا هببتو ليها ولا عندي نفس زاتو عشان ارفع التلفون وارد عليها عشان شنو وكت تعبت وفترت من الدققان وقفت وبعد شوية بعد ما يئست الموبايل زاتو ارتاح من رناتا الكتيرة وبعد شوية تاني الموبايل يرن بس المرة دي من امها وقلت دي علي انا تشيلي موبايل امك عشان افتح الخط برضو ما برد - بعد شوية جات رسالة القاها من امها بتقول لي : احمد رد علي عاوزاك ضروري ..خالتك .. الرسالة دي من امها يعني ما من ندي يا ربي خير وادق عليها
- الو خالتي
- كيفك
- تمام
- انا كلمتني ناهد بتي وقالت لي ندي كانت معاك
- ايوا كانت معانا ورجعت البيت قبيل ..خير في شنو
- يا احمد انت عملت في البت دي شنو جات حالتا مقلوبة وكاضمة وقافلة علي نفسها الاوضة بتبكي بكا شديد وموجوعة بالحيل .
- اساليها مالا
- اوع تكون عملتا فيها حاجة والله العظيم ..................
اقاطعها
- شوفي يا خالة الكلام الشين مافي ليهو داعي وكان الواحد داير يسوي العيب ما بغلبو وانا جيتكم بالباب وفي مليون طريق بجيبني بالشباك وخلينا نكون محترمين احسن .
طوالي ترخي وتقول : لا انا ما بقصد كدي واعذرني يا ولدي والله حالة البت حالة عدوك كدي علي الله كلمها وشوفا مالا
- خلاص بشوفا
ادق علي ندي وهي ما صدقت من اول رنة رفعت الموبايل
- ندي .... انا ما داقي ليك عشان مشتاق ليك بس عشان اقول ليك البتسوي فيهو دا غلط وخليك قدر تصرفاتك
- انت بقيت قاسي وقلبك حجر
-دا ما وقتو هسه .. امك ضربت لي وقلقانة عليك والبكا والجرسة البتسوي فيها دي ما بتنفعك واحسن تقعدي مع امك وتوريها الحاصل .
- انت جنيت داير يضبحوني
- انتي وقتك بتخافي قدر دا بتغلطي لييييييه
- احمد بس الله يصبح الواطة واقابلك عشان تعرف انا لييه عرست كدا وتشوف العذاب الانا فيهو
- خلاص صباحتو بيوض .. هسة قومي اقعدي مع ناس امك وشوفي ليك موضوع يخارجك منهم
- كويس انا زاتي بعد ما سمعتا صوتك قلبي هجس شوية
واقفل الخط عشان ما اسمع منها كلام لا بودي ولا بجيب وخليتا منتظرة بكرة وانا زاتي منتظروا عشان عندي حاجات كتيرة داير افهما وارضي نفسي واسليها وبقي الموضوع عندي فضول ونفسي اعرف لييييه سوت كدا وانا قصرتا معاها في حاجة ويا ربي علاء دا سوا ليها شنو عشان تقع غبيانة كدا وتشوت كل شئ وتورطنا معاها كدا ؟؟؟ وهسع ابوها العيان دا بيتحمل الحاجات دي اذا عرف الحاصل ؟؟؟
ندي دقت علي في اليوم التاني الضهر :
- الو احمد
- اهلا ( باختصار شديد )
- شوف يا احمد انا هسة فاضية وما مشيت الشغل ممكن امر عليك نطلع نتغدي سوا ونتكلم مع بعض
- مافي مشكلة
مرت علي بعديها بي ساعتين كدا ومشينا مكان هادئ الاضاءة فيهو خافتة وكل شئ فيهو رومانسي وجميل والزهور في كل مكان حتي في الترابيز والموسيقي هادئة وصوت الموية المتدفقة من النافورة القدامنا شئ يرد الروح والناس القاعدين زاتم ما بيشبهو الناس الشايفاهم عيوني في المواصلات والمكاتب والشوارع ولا هم زاتم يا ربي بس عاملين صنفرة وبوهيات تقيلة شئ حسسني انو انا ما قاعد في السودان في بلد تاني غير بلد الغبش والغلابة والتعابة واعاين لي ندي وانا مذهول موش لاني مخلوع بالمكان الحاجات دي دي ما جديدة علي - بس الجديد علي هو البت دي بقت تعرف الحاجات دي في السودان وهي يادوب بجعت البلد وانا لو ما جيت معاها عمري كلو ما بجي جنبها ولا بعرفا ولا في شئ بدخلني ليها واسالا :
- اطورتي يا ندي بقيتي تخشي محلات رهيبة
- تتكلم بحسرة : ما تغرك الحاجات دي ويا رتني ما عرفتها من اساسو
- ليييييه
- عشان دي الودتني التوج وضيعة مني اغلي زول
ردها دا نظام جرجير رجلين وبدخلني في حتة انا ما دايرا ولازم احسما
- افتكر يا ندي نحن ما جايين هنا عشان نتغزل في بعض ونقول قصائد حب , انا رضيت اجي معاك عشان اسمعك زي ما طلبتي مني صاح .
تسكت شوية وطوالي تمشي لاقرب تربيزة وتاشر لي اتفضل , بعد قعدنا شوية كدا اقول ليها :
- يلا قولي خلينا نخلص من القصة دي
- اوكي .... داير تتخارج مني , اطمن بعد ما تعرف الحاصل ما حاتشوفني تاني
وتاخد نفس وتمسك منديل في يدها عشان الدموع بتكون قريبة وبدات تحكي :
- والله انا وقعت وما سموا علي وقعت وقعة مع زول ما عندو اي رحمة ولا شفقة ولا اخلاق ولا ضمير
- تقصدي علاء ؟؟؟
- ايوا .... انت عارف الزول دا مجرم كبير وزير نسوان ياما خرب بيوت وضيع بنات وما خلا شئ سرق بس سرقة الناس المحترمين مستورة دائما وما خلي شئ نصب نهب وكمان رشاوي وتزوير وفوق دا تاجر في كل شئ حتي الاعضاء البشرية والسلاح بس اسكت ساي يعني دا من الناس الخربو البلد دي .
- كويس انتي وقت عرفتي حقيقتو لييه ما سيبتي الشغل وبعدتي عنو ؟؟؟
- المشكلة انا فهمت الحاجات دي بعد فوات الاوان وبعد ما الفاس وقعت في الراس
- كيف الكلام دا؟؟؟؟!!!!!!
- ايوا دا الحصل ..... الزول دا خبيث شديد وانا زولة برئية والله وكنت ساذجة معاهو وما قايلة الدنيا فيها ناس زي علاء كلو كلو ولا حتي بتخيل الشئ دا زاتو وكمان انا ما عندي خبرة تخليني اميز الناس واعرف الكويس من البطال ومشيت في السكة دي لحدي ما ورطني علاء معاهو ولقيت نفسي جوة بير غريقة وما قادرة اطلع منها .
في راسي جات اسئلة كتييرة : كيف علاء يغشها ويرسم ليها لحدي ما يوقعها بالصورة دي ؟؟ ولييه ما ورتني من البداية عشان اديها راسها ؟؟ وما دام علاء دا مممكن يصل ليها بسهولة لييه عرسها وما حاول يلعب بيها ويفكها عكس الهوا وطوالي اقول لي ندي :
- ندي بس ممكن اسالك ؟؟
- انا عارفة في اسئلة كتيرة في راسك كلها بجاوب ليك عليها بس خلينا نتغدي والله انا من امس من ما كنت معاك مادقت الاكل وهسع نفسي انفتحت عشان انت معاي .
- تبرم من جملتها الاخيرة :اممممم اوكي
بعد ما كملنا الغداء قلت ليها :
- يلا يا ندي كملي كلامك
- ايوا كنا بنقول في شنو
- كنت بتقولي لي علاء ورطك
- ايوا ايوا .. علاء ورطني معاهو انت عارف كيف ؟؟
- كيف ؟؟
- كان بيديني سلفيات ومنح وشجعني اطلع العربية واشيل مرابحات معاهو وادخلا معاهو في شغلو ويديني نسبة كويسة , افكارو اجبتني والطمع ملا قلبي وبقيت مجنونة قروش وخصوصا لمن شفت حالتنا انفرجت وبقي حالنا زين ودخلت معاهو شوية شوية وبقيت نسبتي تزيد وهي ما تعادل واحد او اتنين في المية بس كتيرة بالنسبة لي وبقيت اشوف ليك علاء دا احسن بني ادم في الكون وكمان الخلاني اتكيف منو اكتر انو ما بيقطع من راتبي الشهري وبيديني ليهو كامل ويقول لي ديونك ومرابحاتك دي كلها نسبتك بتسددا وخلي مرتبك لي اهلك بنفعهم والحكاية مشت معاي واقنعني انو دا تمويه للمنافسين عشان ما يركزوا عليهو ويضربوا في السوق ويتخرب بيتو وبيتي انا كمان وصدقتا كلامو وبقي يستورد ويبيع وانا اقبض حقي ما عندي شغلة بالبجيبو شنو ما دام حقي باخدو والسلام واستمر الوضع دا علي كدا لحدي ما وقعت المصيبة علي راسي .
تسكت شوية وتاخد ليها منديل ورق وتمسح بيهو دموعها وتاخد نفس خار وتواصل :
- في مرة من المرات علاء استورد فراخ مضروب واوراقو وهمية وقدر يطلعها من الميناء بطرقوا المشبوهة طبعا لاسف استوردو باسمي الفراخ اتقبض وبقيت انا المتهمة ومصيري طبعا عارفاهو حيكون السجن واتبشتن والخسائر كلها علي وما قدرها ..
صوتا يقطع والكلام ينعدم من خشمها وما اسمع غير نواح وانا اتلفت حولي عشان اطمن ما يكون في زول لاحظ لينا واقوم اناولا كباية موية وبعد هدت شوية رفعت راسها وقالت :
- اها علاء لمن سمع الخبر دا اتملص مني وعمل فيها كان الموضوع ما بيعنيهو والقضية شايلاها انا شايلاها والندل استغل الموقف لصالحو وعرض علي انو يتزوجني عرفي عشان يكتل الموضوع ويقفل القضية وكان علي الخسارة ممكن تتعوض في صفقة تانية .. وبكاها يزيدوالصمت من جديد وشوية وتكمل : اها ما كان عندي خيار تاني غير اوافق وارضي بالامر الواقع بس طلبت منو انو يكون زواج شرعي حتي لو بالقاضي وما كان عندي غير عمي احكي ليهو ويقيف معاي وانت عارف انا فترة الجامعة كلها قضيتها معاهو في بيتو يعني زي والدي وكان الولي بتاعي في المحكمة وخفت علي ابوي يروخ فيها وانت شايفو ما بستحمل الكلام دا وبعدين علاء رفض يكون العرس معلن واشترط علي عمي السرية ولا مصيري السجن والبهدلة وبدل فضيحة العرس تبقي فضيحة ممكن تمس اخواتي واهلي عمرهم كلو .
- لييييه ما وريتني من الاول ؟؟
- انا ما قايلة الامور بتصل لي كدا وبعدين لو كلمتك بالمصيبة دي كان بتسوي شنو ؟؟
- احمد انا ممكن اطلق واكون ليك و.....
- ومين القال ليك انا بقبل بيك تاني
- كيف يعني , معقول حبنا كلو يضيع كدا والبينا ينتهي !!!
- انتي نهيتيهو من يوم الطمع عماك ولحدي ما علاء جرجرك معاهو ونصيحتي ليك اتعايشي مع واقعك وخلاص .
- حرام عليك .. دايرين اعيش مع انسان زي دا ؟؟ انت عارف علاء بيعاملني زي جارية بتاعتو بس لا احاسيس لا مشاعر لا حنان والله انا بموت في اليوم مية مرة وبحس بنفسي احقر بني ادمة وما لي قيمة وكمان مستحيل اجيب منو اولاد يطلعوا ملاعين زيو كدا بس انت اقيف معاي وانا بكون ليك خدامة باقي عمري .
وفجاة تفتح خشمها زي الزول المصقوع وهي بتعاين للباب واتلفت اشوف ليك علاء داخل علينا ويسلم وداير اقوم امشي فثبتني من كتفي ويقول لي اقعد انا جاي مخصوص عشان اقعد معاكم ويعاين لي ندي :
- انا دقيت علي البيت لمن شفتك ما جيتي الشغل قالو لي طلعتي وظني ما خاب الاقيك هنا وكمان مع حبيب القلب.
طبعا استغربتا من جية علاء وكمان داير يتكلم معاي ومع ندي والعلاقة البينا متوترة جدا مافي شئ يخليهو يطلب مني طلب زي دا والمفاجاة شلت تفكيري وما قدرت ارد عليهو بشئ غير اسكت واعاين فيهو وفي ندي وهي ماقادرة تفتح خشمها بشئ وعلاء يبتسم بخبث ويقول :
- انا عارف خربتا عليكم القعدة دي بس لازم نقعد مع بعض ويتنحنح شوية ويواصل : انا شايف المكان هنا ما مناسب عشان نتكلم مع بعض ممكن لو سمحت وقتكم نمشي نتكلم في محل تاني ؟
كنت عاوز ارفض بس نظراتو ونظرات ندي المذعورة والخائفة والفضول شجعني ان اقول ليهو :
- مافي مانع
وطوالي طلعنا معاهو الي شقة وعرفت فيما بعد ان دي مكتبو ومقر شركتو وما لقينا فيها زول داخلها الظاهر ان الموظفين مشوا فتح غرفة مكتب فخم وانيق وقعدنا علي الكنب الموجود في المكتب وبعد الضيافة عاين فيني :
- طبعا نحن ما بنعرف بعض بس سمعتا بيك من ندي واعتقد انت كمان بتعرفني وانا عارف علاقتك بيها شنو طبعا دا نظام مدخل وكدا وانا بنفس الطريقة ارد عليهو ويبدا الكلام
- انا جبتكم هنا عشان اتكلم معاكم
وطوالي اتلفت علي وقال :
- شوف عشان ما الف وادور عليك ندي دي تطلع زوجتي علي سنة الله ورسوله .. تقاطعوا ندي
- انا وريتو وهو عارف كل حاجة
يتغير وشو والغضب في عيونو ظهر
- انتي وقت وريتيو انك مرة راجل تاني في داعي لتصرفاتك دي وتطلعي معاهو بدون اذني ولا معرفتي ؟؟
- ترد عليهو بزهج وقرف : انت عارف زواجنا كان كيف
- مالو زواجنا عيبو شنو
- انت ضيعت مستقبلي ودمرت حياتي
- انا البقيتك بني ادمة يا شحادة وبعدين انا ما غصبتك تتزوجيني
الكلام دا لفت نظري وخلاني اركز كل حواسي في علاء وهو فهم حيرتي وقبل علي وقال :
- انت ما سالت نفسك ليه ندي طلبت منك تاجل العرس
- واجاوب بسرعة : لا
- ندي بالعربي كدا دايرا تزحلقك لمن شافتني معجب بيها وبقيت استلطفا وانا كان كضاب خليها تنكر الكلام دا .
اعاين لي ندي اشوفها دنقرت راسها في الواطة وتهيج
- ايوا انت غشيتني وعدتني بالزواج وانت القلت لي سيبي احمد دا ومالك ومال الغربة والتلتة وعيشتني في احلام لحدي ما وقعتني .
- والله انا ما غصبتك علي كدا وانت براااااااااكي قلت لي كفاية ابوي عمرو كلو قضاهو في الغربة وغير المرض ما طلعنا منها بحاجة واحمد بقدر اخارجو ونكون لبعض ..دا كلامك ولا لا ؟؟؟
- تعاين فيني ونظام تبرير : انا ما اكذب عليك في البداية انبهرت بيك وجذبتني و....يقاطعها
- لييه لمن عرضتا عليك تتزوجيني بالسر ونعمل زواجنا في العلن بعد ما تنهي علاقتك مع احمد وافقتي
يعاين لي موجه الكلام لي : انت عارف ما صدقت الفكرة دي طوالي مسكت فيها وقالت كدا بقدر افسخ خطوبتي منو وكمان بتقول لي ياما ناس تتخطب وتتفركش الخطوبة وانا ما اول واحد تفركش خطوبتها وعادي وهسع بقت تلعب علي بعد ما لعبت عليك .
- ندي تبكي .. بس انا ما قايلاك مجرم وندل وانسان ما عندك ضمير
- ندي ما تغلطي
وهنا انط واتلفت لي علاء
- يعني انت ما استغليتها وخليتها توافق تتزوجك غصبا عنها وان داير تتزوجها عرفي وما ورطتها في قضية الفراخ ؟؟؟
- شوف انا زول ود سوق ممكن اسوي اي حاجة بس اغصبها علي حاجة زي دي لا واغصبها لييه ما دام هي ما عندها مانع ووافقت حتي علي شرطي انو يكون في السر وقدرت تقنع عمها انو تتزوج كدا عشان تضمني وعمها زول سوق وحسبها حسابات تاجر وقال اخير ليها انا -وقصة الفراخ دي ما ورقة ضغط عليها ولا حاجة وانا ما بنكر انو بعض الصفقات بسويها باسمها وعملت ليها سجل مورد وعملت ليها اعتمادات واوراق تجارية بعد دا كلو بديها نصيبها ولمن الفراخ اتقبض سويت المسالة وقدرت اكتل القضية قبل ما تصل للمحاكم والبوليس ويتقبض عليها واتحملت الخسارة انا .
اتلفت لندي واهز راسي في حسرة واشوف ندي غير ندي العرفتها قبل كدا وانا ما مزعلني ان هي كذبت علي وانو علاء فعلا كلامو صاح ما غلط لكن البزعل انو بعد كل العشرة البينا خانتني وغشتني ولعبت علي من وراي وباعتني بالرخيص ولو ما اكتشفت علاء انو زول مجرم وحقير ما كان حاولت حتي تعاين لي مرة تانية , طوالي اقووم عشان امشي يمسكني علاء من يدي ويقول : انا برضو ندي ما بتلزمني ويتلفت لي ندي :
- ندي انتي طالق بالتلاتة ومن بكرة ما داير اشوف خلقتك دي قدامي وبرجعك زي ما دخلتي اول مرة الشركة دي ومن بكرة شوفي ليك طريقة للديون العليك .
هنا تقع ندي من طولا غمرانة ومافي طريقة ير نطلب ليها اسعاف والبت في حالة انهيار تام واتصل علي اهلا انو ندي تعبانة وفي المستشفي .
المهم اهل ندي واهلي عرفو الحاصل كلو وانقطعت علاقتي بيها واصبحت ذكري من الماضي وواصلت حياتي... واجلت موضوع العرس شوية ومشيت علي غربتي .

ندي اصبحت امراة عزبة ولم تتزوج ورفضت فكرة الزواج , ابو ندي برغم قسوة الفاجعة الا انه صمد وتحمل وتحسنت اموره المالية واصبح من التجار الكبار .

اما السيد علاء وما اكثر امثاله في هذا الزمن دخل في خسائر كبيرة بسبب عمايلو الوسخة وحجزت املاكه بواسطة البنك وزوجتة الاصلية تطلقت منه عشان عيونو الزايغة وعمايلو مع النسوان .




وفي الختام اتمني ان تكون اعجبتكم القصة
ولكم كل التحايا والوود
الباسابي
رد مع اقتباس
  #14  
قديم 09-17-2010, 11:56 AM
أبوزهير أبوزهير غير متواجد حالياً
Senior Member
 
تاريخ التسجيل: Sep 2007
المشاركات: 3,131
افتراضي

الباسابي
تجربه مريره للغاية ، نهاية ماساويه جدا، كشفت لنا امراض فئة من المجتمع السوداني ، كما كشفت لنا بساطة وطيبة المغتربين العائدين سواء اناث او ذكور..كثير منهم ومنهن وقعوا ضحايا لفئة لا ترحم.. تغيرت طبائع المجتمع السوداني لا ادري لماذا ظللت اطرح هذا السؤال كثيرا ولم اجد له اجابه، فساد اخلاقي لا حد له، جشع، غياب ضمير، عدم مخافة الله..
لعن الله الفقر لوكان رجلا لقتلته.. يا ترى هل ندى مخطئه؟ ايهما اشد عليها وقتها الفقر ام الحب لك؟
المعادله صعبه للغايه .. شابه مغتربه تعودت على حياة طاهرة نقية ، مجتمعها اما المدرسة او شقة اهلها في الغربه ، حياة رغده كل شئ متوفر، عالم صادق لا مراء فيه وهو مجتمع اهلها، لا تعرف شيئا حتى عن الجيران.. فجاة تعود للسودان وتحاول ان تتاقلم ويعصرها الفقر ويتلقفها ضعاف النفوس.. بالطبع لو ادركت العواقب ولديها فكرة عن المجتمع لما ضاعت وضيعت اسرتها.. وهذه ضريبة دفعها كثير من المغتربين والمغتربات.
بكل تاكيد اخطات خطا لا يغتفر ودفعت ثمن غلطتها..
لا تثريب عليك كنت من خلال السرد فارس ود فارس صادق مع نفسك ومع الاخرين.. لقد ضيعت رجلا يشترى بالمال..انت لا تستاهلها وسيعوضك الله..
يا جماعه خروج المراة واختلاطها بالاخرين يجب ان يكون في حدود وبحذر خاصة في مجتمع اصبح كالوحوش ياكل بعضه بعضا..
لك شكري وتقديري وعوضك الله خيرا وياريت ابناء وبنات المغتربين يتعظوا من قصتك هذه.
رد مع اقتباس
  #15  
قديم 09-17-2010, 05:20 PM
الصورة الرمزية ابومنذر
ابومنذر ابومنذر غير متواجد حالياً
Senior Member
 
تاريخ التسجيل: Mar 2009
الدولة: المملكه العربيّة السعوديّة
المشاركات: 4,001
افتراضي

اخونا الباسابى / لك التحيه .. قصتك مؤلمه جدا و وتدمى القلب , ياترى كم ندى سرقها الزمن وتاهت مع التيار !! قصتك تنفع فيلم عديييييييييييل !! تحتاج سيناريست لترجمتها الى ماده فنيه الله يعوضك خيرا اخى الباسابى , بينى وبينك الشاكوش حاااار !! يا زول رغم مراره التجربه لكن بدون شك اتعلمت منها انت ونحنا ايضا , الله يعوضك خيرا وبافضل منها ...
دحين انت لسه عزابى ولا عرست !!!!!!
رد مع اقتباس
إضافة رد

« الموضوع السابق | الموضوع التالي »
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 08:12 PM.

زوار البركل من تاريخ 2011/7/11
free counters
التصميم والدعم الفني


Design By: Miner Skinz.com
Powered by vBulletin® Version 3.8.1, Copyright ©2000 - 2014, Jelsoft Enterprises Ltd. TranZ By Almuhajir