الموضوع: الخبر ده عجبني
عرض مشاركة واحدة
  #167  
قديم 07-18-2012, 04:53 AM
ابو طارق ابو طارق غير متواجد حالياً
Senior Member
 
تاريخ التسجيل: Jan 2012
المشاركات: 2,642
افتراضي

اقتباس:
المشاركة الأصلية كتبت بواسطة الخزين ود نصر مشاهدة المشاركة
أبو طارق أريتك طيب
أكيد كلامك عن الزراعة دا فيهو فايدي كبيري خلاس .. و انا زول عندي هواية في الزراعة بس ما لاقي عدلي مع الاغتراب دا .. هسه عندي إستفسار عن التطعيم و الترقيد .. عاوزك تنعش و تركز لنا الفكرة الدرسناها أيام الثانوي عن الموضوع دا ..
باقي في ريف أمدرمان الشمالي زارعين لنا منقايتين بقن كبار عمرن فات العشرة سنوات .. فيهن واحدي قاع تشيل منقة عسل بس تشبه الكتشنير .. و شجرة المنقة التاني ما قاع تشيل مع إنو حجمها أكبر من أختها ... عشان كدي قلت أخير أسوي لي شتلات مطعومات من المنقة القاع تشيل دي و أكيد حيكونن متل أمهن باذن الله . فارجو أن تشرح لنا كيفية التطعيم و الترقيد بالتفصيل ..

مع الشكر و التقدير .
حباب الجلابى سيد الزرايب الموخمج...سعدنا بطلتك والله فى هذا الصباح الباكر
وليك السلام مطبوق
قبل التطعيم والترقيد نشوف الشجره الاكبر من اختها وما شالت مالا؟
السبب يالخزين انو الشجره اخذت فوق حقها من التغذيه لذلك كان النمو الخضرى المستمر على حساب الازهار والاثمار فى الحاله دى العلاج شنو؟
التجويع والتعطيش...يعنى تبدا اولا بالتجويع وهو عدم اضافة اى سماد لا حيوانى ولا كيماوى وقبل 3شهور من مواعيد الشيل او الازهار تبدا فى التعطيش التدريجى لامن لونا يشحب وقبل 1.5من الازهار ارويها وان شاء الله تبدا تخضر وتزهر.
زمان فى مصلحة البساتين كان الشجره اين كانت ليمونه ،برتقاله...الخ وكت ماتشيل
يقولوا متغذى زيادى ويقوموا بالفاس او المنجل يشيلو جزء من لحاء الساق مع قليل من طبقة الخشب قريب من سطح التربه والقصد من ذلك تقليل اخذ الغذاء من التربه وهى عمليه ناجحه جدا بس دايرى البصيرويمكن ان تجرى لهذه الشجره نفس المعامله اضافة الى ذلك فقط تدهن مكان القطع بعجينة مبيد فطرى لمنع انتقال الامراض.
هناك هرمونات تعرف بهرمونات التزهير فى تجهيزات تجاريه ترش على الاشجار و تساعد على الازهار ولكن فى حالة المانجو الاستجابه ضعيفة نسبة لطبيعة الاوراق الشبه شمعيه والتى تمنع الامتصاص بشكل افضل.
النبات زى البشراحيانا من موانع الحمل لدى النساء السمنه وبمجرد تنظم غذاها وتضعف تبشر بالحمل والله اعلم
الترقيد والتطعيم
اولا :الترقيد...زى تصفيح الشتل بالضبط طبعا شتلة التمر تركبلها الصفيحه وتملاها تربه زراعيه وتبدى ترويها حتى تكون شبكه جذور جيده(ويقولو الشتله رمت) ثم تفصل وتزرع اما المانجو
الخطوات كا الاتى
1)هنك نوعين من الترقيد هوائى(معلق)وارضى
فى حالة الترقيد الهوائى تختار فرع جيد اخضر جيد الاوراق والنمو وفى الوسط تنضفو من الاوراق بطول شبر وهناك اكياس بلاستيكيه خاصه لهذه العمليه تملى بالتراب ثم يربط حول الغصن وبعد ذلك تبدا بالرى المنتظم حتى الحصول على مجموع جذرى قوى ثم يقطع الغصن ويزرع اما فى قصيص لينمو الى طول مناسب ثم ينقل الى الارض الدائمه ولابد من تظليله حتى يتاقلم وينمو ثم تزيل الظل
الترقيد الارضى تختار غصن قريب من سطح التربه وتسحبه الى اسفل وتنظف الجزء الذى سوف يدفن وتضع عليه القدر المناسب من التراب ثم تروى فى فترات منتظمه وتتفحص نمو الجذور
يجب مراعاة الاتى
ا -ازاله مقدار 10سم من اللحاء ثم تربط الكيس فى حالة الهوائى او تدفن فى حالة الارضى
ب-استخدام هرمونات التجذير(Roota) على المكان المزال منه اللحاء لانها تساعد على سرعة نمو الجذور وتغنى عن استخدام مبيد فطرى لمنع الاصابه عن طريق الجرح
اذا لم تستخدم بودره الهرمون استخدم اى مبيد فطرى لمنع الاصابه
تحضير الحفر للزراعه:
تحفر الجور بالابعاد 1×1×1م حسب حجم الشتله مع مراعاة وضع تربه مفككه فى قاع الحفره
توضع الشتله فى الوسط ثم تدفن بتراب الحفر وتدكك جيد ويردم حول الساق لمنع ملامسة ماءالرى للساق ثم تروى جيدا ،يفضل ملى الحفره بالماء وتوضع فيها الشتله ثم تدفن وذلك منعا للجيوب الهوائيه التى توذى الجذور وتؤدى الى موت الشتله
ما عندى صور جاهزة كنت نزلتها لكن بمشى على قوقل ان لقيت شى بلحقك بيهو
نتلاقى كمان مع التطعيم عشان الموضوع ما يطول ويبقى ممل
تحياتى
رد مع اقتباس