من أشعار شيخي شيخ المداح علي ود حليب

[عثمان الحليبي]

من رواية شيختي عليها الرحمة زبيدة بت الحاج


شوقي طال بلحيل للشفوق
وحالي تالي وناوي المروق
يا كــريم يا خــــالق الخــلوق
يا مـقســم لـينــا الــرزوق
قلبي نضـفـو من الفسـوق
والمديـح يبــقالي متــوق
صدري يرزم ما يبقى سوق
وكاسـي دايــر فوقــن يحـوق
حـولي يجلـس روق بعــد روق
ديك في فمي وديك جات تسوق
وبثني بالصـادق في النطــوق
الرســول اب قلــبا شـفـــوق
يوم لسان النار جات تسوق
غيرو مين كان للضيق لحوق
مرضي مو غدار مو حموق
وحاشا ماب تلقاهو محروق
جودو فاق لي وابل البروق
وكفو يلفى النار حين تتوق
وكان جمال لي يوسف يفوق
يخجل البــدرين في المـروق
مـيـن أتـاه آدم فـي الخــلوق
وغيرو مـين بيخالبـنبو نوق
يا لســاني أرزم ليــه قـــوق
بالنهــار والليــل لا تـــروق
كونو مدحــو لذيذ للبـضوق
بيهـو نلقى الخير والعتـوق
من عبيدو الحاج جاب نطوق
قلبو خايف وعامل الفسوق
جاك وقيع يا اب قلبا شفوق
أمـنو ورد ليــهو العـتـوق
قول لبيــبي جـزاهو مطبــوق
وفي الحضيرة جوارك يضوق
هب نسيم من تالة الشروق
خلى جوفي وعقلي محروق
وديمة أشاشي وماني مطلوق
ولي أب..... ال.. فوقو .....لوق
الــصـلاة وتســـليما يـفـوق
بـي عــدد ارزاق الخــلـوق
وفي ام قزاز كل يوم عاملة سوق
تذكــر اسمــي وبالبــاب تسوق