مجموعة اشعار شاعر الدتي / علي عبد الماجد

[على عبدالماجد]

شرك مقـــاشي




ماني راضي ونفسي كاشي= خفتلك مشوار مقاشي
خالد الجود كان تعاكس = وكان تقول انا ماني ماشي
كان تقفلو -تختو صامت = او تقول الشبكه طاشي
البيضحك في وشيكا= البيبسم هاشي باشي
والهناك في الكرسي خالف = ومنجعص زي النجاشي
الشرك ناصبنو جنبك = لا يغشوك بي الكباشي
الاصلوواضح ونيتو صافي = بي بليلتو كان يعاشي
مافي داعي يدردروكا = وتقسموا الليل في مقاشي
اليكوس اليوم لماكا = بكره يصبح فيكا واشي
من بعد عكروا سماكا = برضو جيتن تاني غاشي
انا قصدهم فايت اضاني = ناس مصالح وليها عايشي
ومن زمن جربت قبلك = وسبتهم دقيت طناشي
البسمو الرشوه تسهيل = فوق دريبن ماني ماشي
وتاني تب ما عندي ليهم = غير كلاشي والاباتشي
وبركلاً يجمعني بيهم = تاني فيهو انا ماني خاشي

[التهامى كروم]

سلام مطبوق

:p

هنا ومن خلال هذا البوست ستجدون روائع الشعر
وخاصة الابداع في شعر الاخوانيات من المبدع عضو
المنتدي ابن الدتي البار
علي عبد الماجد
فالنستريح علي ضفاف هذا الابداع



ثاني هذه القصائد هي ( دهب ابو حمد ) وهي وصف لظاهرة البحث
عن الدهب وفيها يمازح صديقة العوض ود فاطني


دهب أبوحمد
إندخل وابليسـك غـلب = يالعوض اكل العيش صعب
مـن بعـد شبت وإنتنيت = تـاني شــن دايـر بالـدهـب
يا الهملت عقابك وطفش = لافي حـايم وســط العـرب
قولي بس العاصرك شنو = من مطب واقع في مطب
من وحل لي خور لي جبل = هـسه كان البوكسي اتقلب
كوم حريم وبناتك حريم = تمشي تبرا الفايق العزب
_______________________________
تعالو ياخلق الله اسمعو = وربكـم ادوهـو العـجـب
اب حمد ماعون الصقط = والمحل والجوع والجدب
اب حمد راكوبة القفاف = الطباقة.. البيض والقصب
قالو خلت بيع الحبال = وكـشكـشت للناس الدهب
_______________________________
اها النقول لميتلك اردب = دار يخلوكا كلاب دهب
وين ضرايبو ووين زكاتو = وين نفايتو ومسح الشنب
قـبلك الـفـتانه اجـمعـوا = التمر مو فاك الطلب
والجزيري خلاص روحت = كل يوم هدامه رب رب
جـابو فـلاتي رباة بلـد = اصلي من الجن محجب
العبوباب نومن خزاز = أزعج الحلي كرب كرب
جهجه الراصين القزاز = زحزح الطاولات والكنب
كشكش الخروم في الحراز = زوزو الزرزور في القصب
زهلل الرازات في المراح = وعـشـم المـاشين بالشعـب
لملموا آخر الدور الكرور = القحوف.. الطوب والعلب
حاج محمد موقفو سليم = لاسرق من زول.. لانهب
لي مشاعر الناس ماحسب = صبن المعلوم وانسحب
ضربة إسرائيل للعرب = فعـلة النجار في الخشب
______________________________
السمعناهو تحت تحت = قالوا دار يشتكو في صنب
يا أب حجل كفارة ذنوب = خلوهـا عـند الله تحـتسب
دربك أحمر جيت من الحج = لاتعـابي الـناس بالكعـب
اليشيل قربي تخر علي = وياما خرت فوقكم قرب
انتو يا ما عفيتو ديات = والحصل مقدور واتكتب
لاتقطعوا كل الصلات = يبقى يوم يجمعكم.. نسب
الفلاتي تسايسو باللين = عندو سفلي قليل الادب
إن مشيتوا علي المحامين = دابو بيت جدكم إتخرب
______________________________
يالعوض اخد العبرة أخير = ولا تســوي ســواة الحــلب
من بلد طافش لي بلد = الـرزق مـاشـرطـو الـتعـب
شايفوا ود اليمني عثمان = ماهو راضي أداك عين غضب
وفيكا محتار ود سليمان = ماعــرف لي سـفـرك ســبب
أصلو لو السبب الظروف = كـان تســوق ود حُـمـد طـلب
بدل يخسي جداد الفريق = بـس إن لقــالو حلــق.. ماكعب
______________________________
بي عـمــايلك بكيت طــلال = قـال أخـير مــنك أبولهـب
في الحرام تفتي وفي الحلال = ألتقــول أمــك بت وهــب
يا الـمـحـل مـاولعـت نار = قمت تجري تكوس في الحطب
لو اتعصرت زباينك كتار = تنكــرك .. بيجـيـبلـك دهــب ..

[محمد عبدالعزيز الفكي]

يا سلاام يا عم علي
يا سلام لو جيت سجلت ابدر في منتديات البركل علشان اشوف ابداعتكم
ياسلام لو جيت ابذر وهل تفيد با لله لو
دي الكواكب ايه لزومة وانتو تملو الدنيا ضو

حفيد الفكي ود الكرو