عائش وهم ؛قصيدة !!

[حسين يوسف مكى]

عائش وهم !!


سفرا جفل تاوق سرح
ناغم مدن..
داعب ضفاير الاهة
نقرش صدود صحّى المحن
مرقت نجوم متوسدة
العتمة وشكت, مخنوق
ضياها من الحزن..
القمرا لاواها السما
دست سناها وقسّما
ارواها من مُر الزمن
طرف الارض غلبان حرد
مسكين رقد من
السفر وجعان إئن..
وللا البحر لاطف ضفاف
خابر بلوداتاً جفاف
صبرت على مويتو الكفاف
مسكينة جافاها وحرنْ..
يافرحة الناس السُمُر
وشتلة حنين مسقية من
جرف العُمُر, يا اّهة
الولد البغالب فى الشجنْ
ماكَ خابرْ, وراك أكابر؟
ولسة ناس فى الحر تعافر؟
وانت فى منفاك صارف
ابقى عارف واحكى عنْ..
احكى عنّك وعن وفاك
قولينا عن كل المعاك
ماك الوحيد الشوق
كتير ناغم صداك
وكتين إرِنْ..
شحتف رويحة إلفتكْ
لملم براحاتك شرد
منك عليك وين هِمّتك؟
وين ضحكتك.
يا حليل معاك زمنا جميل
ساقينو ريد
والليلة من طول الغياب
قاسن السمحات بكنْ..
راجيات رجوعك فى الصباح
ساعة الدغش شهقة طبيق
هجر البطاح,
شايلك رفيق طول الطريق
وعيون تطوف تسال عليك
لو شفت الدموع تنهش
خدودن وتجرحن..
ماشفت حال الوالدة كيف
تنده تقيف لو عد طيف..
يا لوعة القلب الرهيف
بعت النفس فوق الرصيف..
ياريتو لو قابض تمن..
مخدوع تداعب فى السراب
بين المدن بعت الشباب
ضاعت معالمك فى الغياب..
هوى النفوس ماعندو باب
الروح كمان بتزيدها جِنْ؟..
وابوك عاد فقد الدليل
مشتاق
حنين ولدو القبيل
قبل الرحيل ..
قايلك صحيح زولا عديل
قايلك اصيل
داخرك سند تبنى الوطن..
فاكرك عشم سماك حلم
هاداك نغم..اتاريك براك
عايش وهم غيرك
إذاكر وإمتحن..
غيرك إذاكر وإمتحن..


حسين يوسف مكى
جدة /13/1/2010م

[العطا علي العطا]

قصيدة رائعة تحمل شهادة روعته منها وفيها
هل من مزيد ياحبيب - وليك تحياتى