قصائد الشاعر محمد سعيد دفع الله

[dayami]

انتنت عرجون تميره
وقايمى قوم عز فى قريره
شايله ناجحه وماها صيره
وليل نهار غنايا طيره
رمت الجدلات حريره
ومال جسيم ناعم فطيره
عينه سيافه الشهيره
ساوى قلبى عديل جفيره
خدها الزهره النضيره
ومازج الصندل عبيره
زين التفاح صديره
ويا (حسن )وصف ضميره
دى الخلوق جات من عِصيره
وهايجى زى مويه الدميره
نازله للشبال فى سيره
وكل زول شايلاه غيره
قالوا ما شايفين نظيره
والجميع عشمان نِظيره
وهى الخطيوه وكت تديره
يمين رؤو س الناس تديره
ليك قلوب الناس اسيره
وغير غناك ما ليها سيره

[dayami]

مر العيد وفات لا شوق لا تهانى
وما قادر اقول انو قسا ونسانى
كم ناجيت حروفو الخمسه فيها نظمت اغانى
ساهر ديمه ... افكر فيهو ... فر النوم جفانى
اعيد لحظات قضيته معاهو انسج فى الامانى
كان ياهو الامل يا حياتى ... مالى غيرو تانى
ما عارف اذايا البىّ كيف الشوق برانى
والعارف لحالى يا روحى قبل الموت بكانى
عاد هسع الومك انت .. ولا الوم زمانى
واقول ياهو المقدر كان .... والمكتوب لى جانى
اسمك ديمه الهج بيهو ما فارق لسانى
طيفك ده الملازم لى ما فات يوم ختانى
ما بقدر اطيق الفرقة ... ما بحمل ثوانى
كيفن هان عليك تنساهو .. كان ريدى وحنانى
شوف حتى الطيور حزنانه تبكى توح عشانى
وينو حنان قليبك لىّ.... ليه صد وابانى
ما غلط على حا شاهو ... ديمه عطوف وحانى
مالو الليله بى ايديهو .... كاس الويل سقانى

[dayami]

القلب الجريح الديمه ينزف فى دماهو
اشرح لى بس ورينى ايه ذنبو الجناهو
حافظ لى زمان العشره ذاكر ما نساهو
وكيف تنساهو انت يا روحو ليه بتزيد شقاهو
كلما ا شرق صباح يا روحى قلبى يزيد عناهو
وانت القاسى ما راعيت كفاهو عذاب كفاهو
مره اطراهو انت طبيبو فيك يكمن شفاهو
ومن غيرك محال ينصح يطيب ويجد دواهو
ده الزول القبيل حباك فى جهلو وصباهو
ليه خليتو عاش وحدانى كيف اختر سواهو
بانى عليك حياتو قبيل و فاكرك كت معاهو
حرام تنساهو والله حرام تهد ماضى البناهو
اساهر الليل ويشهد لى نجمو الفى سماهو
وانوح حدى الصباح عينى النوم ماب تراهو
باكى الماضى ديمه بنوح حكيت فاقد جناهو
وين زولى الوسيم دلونى عيشتى جحيم بلاهو
حليلو ويا حليل الماضى فى ودو وصفاهو
وطريت برقو البشيل عبادى من تبسم سناهو
وفرعو البان رشيق يتنى مال هتف نداهو
وضميرو الزى جدى الغزلان بعيد ضارب خلاهو
ضلام الليل سبيبو سوادو مسدول فوق قفاهو
مهما طال عذابى انا برضى دايما فى رجاهو

[dayami]

مليت من الغربه آعلى .. يا ولدى يا ايدى اليمين
داير الرجوع بس كيف يكون ... وتفكيرى فيهو انا من متين
كل ما اقول اصبر شوى باكر تكون الحاله زين
القى الظروف ياها الظروف .. بس زايده سؤ بحلف يمين
وآخد لى لفته على الزمان ... القاها مرت كم سنين
لمتيـــــــــن بتتفك القيــــــــود ... القاسى قلبها ما بيلـــــين
**********
جيت فاكر انى اكون سعيد ... بى مال بيجرى على اليدين
لكنــو مقسوم يــا لعــــزاز .... رزقا يكون دائمــا ضـــنين
والشئ العجيب مما وصل ولليلى فوق اكتافى دين
حســرة وهموم متواليات .... والدمعه يوت هالابه عـيــن
نيران مولعى فى القلب مسكين فقد لضرا الامين
كان عيشو هاديه قبل يجى ... و فى بيتو كان قوتو اليقين
والليله فى الاهوال دوام يصرخ ومو لاقى البعين
وينــك بعــدتى على ّ ليه ... وانا ليكــى كاتلنــى الحــنيــن
يا السمحه سموكى القرير والناس تجيك من وين ووين
وانا قـمــت منك شــن اقول .... غير ده المسطر فى الجبين
يا درة الوطن العزيز يا النادره يا لماليك وزين
عشمى ومناى ارجع واجيك ....... انا غير هواك متل السجين
داير اكون بين الاهل محضون وحاضن اعز طين
داير حياتى مع الصحاب ..... واللقمه ما بين العوين
***********
يا لوبه شمر للضراع والليلى جيت اوصيك دحين
كونك تقصر ما اظن وانا عارفو طبعك يا الخزين
يات من معلم درسك شاكرك علم وخلقا يزين
ما عليك خوف ما دام معاك زولا مسمى الزين وزين
انت البتعرف للاصول كاسب رضاء الوالدين
من قمت درفونا صغير ما كت يوم نيا عجين
دائما مواظب و مجتهد فى الجانبين دنيا ودين
ورافع السماوات غير عمد داعيهو ينصر وليك يعين

ونواصل

[dayami]

البوجع قليبي أنا ديمه فيهو النار يقيد

ده القول البقولو الناس يقولو علي سعيد

ماعارفين قليبي وحالو كيف عايش وحيد

والبعطف عليه نساهو منو رحل بعيد

كم قاسي العذاب متوالي كل صباح جديد

غرقان فوق هموم آهاتو كل مايوم تزيد

وشبيه البي تحت فى امو مال فدع الجريد

لاحام الدباس بي فوقو لا أتمدتلو إيد

حارساً ليه قاسي قليبو مصنوع من حديد

بالليل والنهار قاضيهو لا نوم لا غميد

ماراعي القرابه والالفه والريد الشديد

ولا حنن لقلبو قليبي أنا المكتول شهيد

يمر العيد طروبه الناس تغنى تميل تميد

الا قليبي حزنان باكي ما مرابو عيد

عايش فى الارض غير هادي زي طفلاً شديد

البكا والنواح هداهو ليهو اكيد يبيد

[dayami]

مننا يا مزارع ليك إلف تحية مادام كل حياتنا أسبابه في طوريه
يا رمز الوجود تخضر فروع مروية يا أمل البلاد عاقدين عليك النية
تخدم فى الهجير لا ضل ولا شمسية كل املك تشوف بلدك علاهو ثرية
دايرنك دوام تعمل بكل همية أنت تنظر للتراب في وحدتو الوطنية
كل همك يكون تصبح مكانتو عليه تسندو بى قواعد فى الزراعه قوية
خيراتك دوام معروفة ماها شوية زيد لينا النتاج تصبح بلادنا غنيه
لاتضيع ثقتنا الفيك زمان محريه يا دخرينا بيك عيشتنا تبقى رخيه
دايرين الفقر يمشى ويروح غير جيه فى الخير والنعيم ترفل صباح وعشيه
لا تقول نحن ديل ناسين فضايلك ديه ابدا حاشا كيفن ؟ وهئ ماها شوية

[dayami]

قصة طويلة يا خلا عايشة وفى الفؤاد حية

قصة ريدة بين إنسان مسلم وبين مسيحية

أحلف ليها بالإسلام وتحلف بالمسحية

ليها عقيدة ما بتتفات ودينى كمان عزيز ليا

سان أسمر من السودان أنا

وقبيلتى شايقية فى أقصى الشمال

إتربيت هناك فى قرية عادية

إتربيت بالدقيق وجغمة موية طينية

أو قراصة بى سيروق والله بليلة لوبية

[dayami]

لا شوفة تبل الشوق ولا ردا يطمّن
أريتك تبقى طيب إنت ، أنا البي كلو هين
قليبا لي رهيّف عارفو ماب يحمل حنيّن
إنت ماب يغباك حالو الفيهو كل البيهو بيّن
بقيت مالي غير أشعاري أكتبه فيك وأدوّن
أقول يمكن تزيل ما بي ولاّ قليل تهوّن
ومالكن يا قماري بتشدن إيش لازمة تغنّن
نغيماتكن تهيج أشواقي للعينين يبكّن
بدّيكن وصية أمانة لي سيد روحي طيرن
ترا الحال العي شفتنو قولن ليهو أحكن
قوليلو السحب في روضو ما عادن يكبّن
وأضحى محل خراب ما فيهو غير زهرا مضبلن
قولن ليهو ليلو طويل .. طويل.. طولا يجنّن
لا قمرا ظهر في سماهو ، لا نجمات يضوّن
وكل ماليهو يتصبّر يقول أيام يعدن
يمنّي لنفسو بي لقياك ولاّ ترد لو يمكن

[dayami]

جيتك وقيع يانوري أطويني في جوفك هنا
ودسيني ضمة من الزمان تب ما يعرفوا بكاني أنا
ما دام شقاني بلد عزيز خلدتو بي أعذب غنا
وجرّح قليبي بلا سبب صبّح حويلتي مبشتنا
كان وجهو ضاحك لي زمان ريّان يفيض رقة وسنا
وآهٍ بشوف وجهو الجميل الليلة كمّل للشنا
يا حليل زمان وكت السنين تتجارى زي لحظة هنا
والليلة آه لحظة عذاب تنجر زي مليون سنة
جابتني طيبتك من هناك أهلك ينسوني الضنا
ويسقوني من رقة شعور كاسات نبيذ مسكّنة
جاييك شان أنسى الهموم أحفر غريق فيك وأدفنا
وأرجع أغرد من جديد في كل جرح زهرة هنا
ما دام هناك نهاري صار زي ليلي أسود داكنا
وقمرك يلهلج منشرح نوّر ربوعك زيّنا
جار بي الزمان أنا في القرير لي قلبي هذّم ما بنا
وجاييك فيك ارتاح أنوم تنصح جروحي المزمنا
ما ديك قماري على النخيل ضمت جناحه علي الجنا
وجدول يصفق لي فريع في نشوة ميّل وانتنى
في كل خطوة أمشيها فيك تمسح تزيل شي من عنا
وأشعر براحة تجم عضام قلبي الحزين شقيش رنا
وحوراً حسان مال عوده بان صافي وأصيل كان معدنا
ما ديل شباب يملوا العيون بي رقة خالية من الخنا
الله على قلبي السعيد يا دوبو تمالو المنا
وشايفو انتشى وللهم نسى وفرحان يقول موجود أنا
عاد وآحلال قلبي الشفوف ما دام على الحبان دنا
غني وبسم وسط الصحاب ينسى الليالي المحزنا

[dayami]

هسـع خـلاص بـاكـر تــروح
وتسيبني وحدي أنا في الودار
سايلـة الدمـوع أبكـي وأنــوح
مــا بـفـرز اللـيـل مــن نـهـار
وأنا صبري كيف قولي دحين
بعـدك خــلاص جـفـت ديــار
كان ليها زيف ورشة خريـف
وأزهـار منـورة فـي الـخـدار
ضلاً وريـف وأغصـان تميـل
فوقـه الكـنـار داعــب هــزار
آه يا لطيـف ويـا حليـل حليـل
داك الزمـان جـا الليلـة جــار
كت ناوي أجيك فجرا صبـاح
وأوصل معـاك حتـى المطـار
وأنظر وشيك وأنسى الجراح
لكـنـو آه فــي جـوفـي غـــار
آه يــــا زمــــن آه آه أحـــــيّ
في النـار دوام وتزيدنـي نـار
بكـيـت عيـنـي مـالــك عـلــي
مـتــل الـتـقـول بينـاتـنـا تـــار
جــف الـشـدر كنـكـش يـبـس
قمريهـو خـل عشيـشـو طــار
لجنـاحـو فــر يـدقـس دقـــس
في تيه غبار وهبـوب عصـار
ضهبان ودر تب ماب يشـوف
غطـت عيونـو دمـوع حسـار
مسكين غمر بي شوق ولـوف
ولليـلـة فــي نــص الـمـسـار
غلبو الصبـر فـوق نـار جمـر
مـوقــودة زادت فـــي الأوار
عاد ليهو حق كان مات شهـق
صــح دة الصـبـر والله حــار
عاش بي أمـل يمشـي ويصـل
لحـبـو يصـبـح فــي الـجـوار
لــكـــنـــو آه روّح أفـــــــــل
نجمو وبعيد في سماهـو غـار
وأصبح كسير مجهول مصير
مـا أظنـو رفّ جنـاحـو طــار
مسكين ينيـن بـي شـوق دفيـن
ودّر عـمـيـرو مــتــل كــتــار

[dayami]

ابديهو الهديل .. كدى غنى لى ّ
حتى ان كان قليل .. يبرد علىّ
يقيف دمعى البسيل وتجف عينى
***
لا تبكى و تنوحى ... كفاك انينى
تفتقى لى جروحى ... مع حنينى
انا الفارقت روحى ... قضيت سنينى
اريت ان كان مرادى انا بى ايدى
***
اه قمريه ... ماك شايفاهو حالى
حالى البى ّ ... يغنيك عن سؤالى
زولا لى ... ّ طول شايفو سالى
زاد البي ْ بدّلْ يرحم شويه
ماراعى النحول ... الفى عضايا
اظن صدقلو .. قول كذب هوايا
خلاص لمالو زول ... تانى وسوايا
وانا البكا والذهول صار لى ْسجيه
***
انا الختيتو ... فى داخل فؤادى
انا الضاريتو ... من كل الاعادى
انا الغذيتو ... يشرب من ودادى
اه ياريتو خفف لى الاذيه
***
اه اواه واه ... قمريه غنى
معاكى قليبى تاه ... بس لا تضنّى
انا القاسيت اذاه .... اهديكى فنى
لا تزيديلى جرحى على العلى ّ

[أب شخيت]

يا سلااااااااااااااااااام.!!!!!
ياخي والله نقلتنا نقلة كبيرة خلاص غسلت قلوبنا من الهموم...وطرنا من الطرب فوق الغيوم..بس ما اقع..!!!
مشكور والله القصايد تستاهل تعبك دا وبالزيادة كمان...
من حلاوته لقيته كملت سريع..
ياخي النضم السمح الزي دا فيهو أجر كتييييير..
كل ما تلقى فرقة أدينا زيادة و زيادة..
ومقدرين مجهودك الرايع..

[Adil Assoom]

الأخ الفاضل dayami
خضر الله أيامك ولياليك ...وأنار لك سبيلك فأنت دوما رجل هذه المهام ;)
محمدسعيد يستحق هذا الجهد فهو شاعر المفردة الحييّة والوصف البرئ والمعاني المشبعة صدقا ...
لك المودة

[النافعابى]

الزول الوسيم فى طبعو دايما هادى
ديامى يديك العافى فى عضيماتك رجعتنا لى ايام
ولااروع ايام زمان وين يتلقن

[عمر مجذوب خطيب]

ديامي - لفتة بارعة عبرها نقف على ابداعات هذا الشاعر العملاق - واصل

[طيبان]

ديامي - لفتة بارعة عبرها نقف على ابداعات هذا الشاعر العملاق - واصل

___________
ياسلام علي بساطة الكلمة وقوتها.....
دا الكلام ...
اتحفنا بي باقي القصايد
وياريت لو تفتح الملف كامل....ملف استادنا محمد سعيد
ونقرا كلنا تاريخو الأبيض وعلاقتو بالفنانين وتطور مفردة الشعر الغنائي....
سيرة وانفتحت

[dayami]

لم النوم أبا وجافاني وأصبح داجّي ساهر
حتى الطيف رحل خلاني ما طيّب لي خاطر
كدي يا طيف أقيف وأرجاني وين فايتني عابر
شن حارس وراك أنا تاني ياني معاك مسافر

لا لا تقول لي كدي استناني أمشي وأجيك باكر
يبقى أنا ما ألم فيك تاني مين عارف المصاير
هاك اسمع رنين ألحاني وأبقى معاي سامر
خفف لي قليل أحزاني ياما أنا عشت صابر

شوف كيفن يسوي زماني ديمة علي جاير
آه مر العذاب وراني سهمو في قلبي غاير
شوف الليلة كيف بستاني دا الكان باشّي ناضر
من حر السموم بيعاني طيرو يفر يهاجر

جفّ يبس صبح صناني لافح حرو كافر
عدمان الضليل سواني مجنون قالوا شاعر
كل ما تمر تعدي ثواني منو اسراب تغادر
رحلوا الفيهو صر وحداني نازل ومرة سادر

أحوم أرجع أصد لبكاني مقطوع راسي حاير
وين أحبابي وين خلاني آه يا الله قادر
ما عارف العلي تراني فوق كرعي ساير
وأسكت أسوي في أوزاني أشعار مالا آخر

وإت ياطيف عليك أحزاني ليّ شوية كابر
عشان خاطر قليبي عشاني لحظات بس تخاطر