المساعد الشخصي الرقمي

مشاهدة النسخة كاملة : :: الدرس الثاني :: الملفات المفتوحة :: ماهي و كيفية التعامل معها::

النوّار
09-29-2009, 09:38 PM
.. بسم الله الرحمن الرحيم ..

زي ما شفنا في الدرس السابق انو بعد ما تنتهي من شغلك و تستخرجو بصيغة فلاش swf

ممكن لمن تضغط save as و تحفظو بيتحفظ معاك بصيغة swi عشان تقدر تفتحو تاني و تعدل عليه

هذا الملف المحفوظ بصيغة swi هو ملف مفتوح ..

توجد على شبكة الانترنت ملفات مفتوحة قام بتصميمها اشخاص اخرون يمكن ان تقوم بتحميلها و اضافتها على فلاشك لتضيف لمسة جمالية للعمل

مثال .. عندي صورة وردة .. و داير اجيب فراشة بترفرف جمبها ..

طبعا صعب جدا انك ترسم فراشة بالسويش ماكس و تحركها ..الحركة دي دايرة ليها زول محترف ..

تقوم بكل بساطة تجيب الملف المفتوح للفراشة و تضيفو على الصورة

شوف المثال ..

صورة الوردة ..

http://www.albrkal.com/upload/uploads/704871jfg4e7royw.jpg

بعد اضافة الفراشات

WIDTH=320 HEIGHT=307

نقوم نضيف ليها شوية نجوم و حاجات بتتحرك

WIDTH=320 HEIGHT=307

طبعا النجوم و الحركات دي ما انا العملتها
انا جبتها جاااهزة ملفات مفتوحة و ركبتها

يلا نبدا الدرس

بداية أقدم لكم بعض الملفات المفتوحة

الملف مضغوط بصيغة rar تجد داخله 15 ملف بصيغة swi

حمل من هنا (http://www.albrkal.com/upload/uploads/malfat.rar)

كلها ملفات صممها اخرون و نحنا دايرين نضيفها على تصميمنا عشان يبقى جميل

يلا نبدا بسم الله

زي ما عملنا في الدرس الفات ..

ندخل الصورة و نحدد المقاسات بتاعت المساحة البيضاء مع الصورة

بالشكل ده

عاين للمنطقتين المحددات كويس .. ما تعمل شي بس عاين ليهن و اتذكر الشكل ده

http://www.albrkal.com/upload/uploads/3rrrr.jpg

يلا نمشي للملفات المفتوحة الحملناها و نفتحها .. نختار منها اي واحد و نفتحو ..

مثلا انا حاختار ملف اسمو frasha ( موجود في الملف المرفق )

لمن افتحو بيظهر لي المنظر ده و تجربو بي نفس الطريقة المعهودة بالضغط علي تشغيل من فوق عشان تشوف جواهو شنو

لاحظ المنطقتين الكنت مأشر عليهم في الصورة السابقة ..

http://www.albrkal.com/upload/uploads/3rrr3.JPG

تحت بيفتح ليك الملف الجديد في زاوية منفصلة
و بيوريك محتوياته في القائمة علي يمينك

يلا نواصل ..

الشكل المكتوب جنبو فراشة2 ده هو شكل الفراشة المتحرك .. لو ضغط اشارة (+) الجنبو دي بيفتح ليك محتويات الملف و دي نحنا ما عندنا اي شغلة معاها خليه مقفول كدا ..

تقوم تضغط عليهو بزر الماوس اليمين و تعمل copy object

زي الصورة

http://www.albrkal.com/upload/uploads/3rrxrr3.JPG

لاحظ انو نحنا بننسخ من الملف بتاع frasha

تقوم تضغط جنبو علي movie1 اللي هو ملفك الانت شغال فيهو

بيفتح ليك شغلك تقوم تضغط علي scene_1 وتختار paste object

زي الصورة ..

http://www.albrkal.com/upload/uploads/urrrru.JPG

بيظهر ليك الشكل دا

لاحظ وجود ملف فراشة2 في القائمة .. في شغلك انت ... لازم يكون فوق الصورة ..
لانو لو جا تحتها ما حيظهر معاك ..
ولو جا تحتها و داير توديه فوقها بس اضغط عليهو بالماوس و خليك ضاغط و اسحبو لي فوق الصورة ..

شوف

http://www.albrkal.com/upload/uploads/urrxrru.JPG

ظهرت الفراشة في نص الصورة .. و ظهرت في القائمة اليمين فوقها ..
نقوم عشان نتحكم في حجم الفراشة نتاكد انو الرمز في يسار الشاشة مضغوط كما في الصورة التالية
http://www.albrkal.com/upload/uploads/drrrd.JPG

تقوم بعد ده تصغرها او تكبرها توديها في الموقع المريح في الصورة
داير تضيف فراشة تاني أو بالاصح ملف مفتوح تاني .. ممكن ترجع تنسخو من مكانو اي بتكرار الخطوات السابقة .. و ممكن تنسخو من مكانو الجديد و تلصقو في مكانو الجديد

طيب مثلا انا عايز اعكس اتجاه الفراشة .. يعني هي مقبلة شرق داير اخليها تقبل غرب ..

أضغط عليها في الصورة باليمين و اختار

transform

ثم

flip horizantal

زي الصورة

http://www.albrkal.com/upload/uploads/trrrt.JPG

كدا الفراشتين بقو مواجهات بعض

لو ضغطت flip vertical حيعكسها ليك بشكل عمودي .. يعني راسها محل ضنبها و العكس ..


المهم نواصل ..

و انت ضاغط الشعار الفي اليسار
لو مشيت علي الزاوية او ركن الفراشة .. خارجه شكل الماوس بيتغير إلى سهمين
ما قادر اجيب ليكم شكلهم لكن تقريباً كدا

http://www.albrkal.com/upload/uploads/drrxxxrd.jpg

تقوم تضغط و تحرك الماوس بشكل دائري عشان تجيب الفراشة بالزاوية الانت دايرها
يعني تعملليها دوران حول نقطة يعني rotation

نجي لي اضافة النجوم دي ملف مفتوح آخر


امشي للملفات المفتوحة محل نزلتها و اختار ملف اسمو soft ( موجود في الملف المرفق)
واضغط عليهو بيفتحو في السويش بالشكل ده ولا حظ لي الزاوية الشمال تحت

http://www.albrkal.com/upload/uploads/yuuuy.JPG

لاحظ انو نحنا هسي في ملف soft

حتلاحظ انو المشهد فاضي .. لكن في القائمة علي اليمين يوجد ملفين ..
لو ضغطت علي اي واحد فيهم في القائمة حتلقى مكانو في المشهد .. واحد يمين و التاني يسار

المهم تقوم تضغط علي الاول مثلا باليمين و تعمل copy object

http://www.albrkal.com/upload/uploads/yuuruuy.JPG

لاحظ مكانو في المشهد .. انو هو يسار المشهد ..

نمشي لي شغلنا اللي هو اسمو movie1

و نضغط في القائمة علي scene_1 باليمين و نعمل paste

شوف

http://www.albrkal.com/upload/uploads/jdjd.JPG

بيظهر معاي في نص المشهد كدا و لمن اجربو بالضغط علي تشغيل من فوق بيجي في النص..

أقوم اضغط على الرمز في القائمة اليسار كدا

و اجيب الماوس جنب الركن بتاعو لحدي ما يبقى زي السهمين زي كدا .. اقوم ألفو اجيبو افقي ..أعمل ليهو rotation

http://www.albrkal.com/upload/uploads/lllll.JPG



و كل مرة بجرب الشغل بالضغط علي تشغيل من فوق

او ممكن بالضغط عليه باليمين و نختار transform

ثم

Rotat 90

زي الصورة

http://www.albrkal.com/upload/uploads/ffhhff.JPG

نقطة هامة :

زي ما مكتوب في الصورة انو شكل الماوس لازم يكون كدا .. لانو لو كان اي شكل غير كدا و انت ضغط باليمين او باليسار سينقلك الى شي اخر في القائمة و غالبا الى صورة الخلفية عشان كدا لازم تحرك الماوس في اكتر من نقطة على منطقة الشكل المراد تحريكه .. حتى و هو ما ظاهر بس لمن شكل الماوس يقبل معاك لي اربعة اسهم زي ما موضح تقوم طوالي تضغط يمين ..

و الحقيقة الحتة دا يماً بنواجه فيها صعوبة .. لانو بيكون الملف المفتوح ما ظاهر منو شي بس انت باحساسك شغال ..

المهم يلا بعد اضفنا فراشتين تاني و كررنا النجوم جبناها بالاتجاه العكسي من تحت لي فوق ..

و أضفنا النص بيكون عندنا الشكل الختامي

هكذا ..

WIDTH=320 HEIGHT=307

الدرس ده بالزات و يعتبر من اهم دروس الفلاش و البيفهم الملفات المفتوحة يبقى فهم الفلاش كلو ..
انا بنصح باعادة قراءة الدرس .. و تكرار التجربة اكثر من مرة عشان تتزبط ..

ملاحظة تاني :

للحصول على ملفات مفتوحة اكثر يمكنك البحث في قوقل عن ملفات مفتوحة للسويش ماكس 2
..

قد تجد ملفات مفتوحة لاصدارات اخرى من السويش او ملفات بصيغة اخرى لبرامج فلاش اخرى ..

عشان كدا خليك في سويش ماكس 2 .. او لو لقيت ملفات مفتوحة لبرنامج ( السويش ماكس) ممكن تشتغل عندك ..

انا عارف الدرس دا ممكن يكون صعب علي بعض منكم .. لكن بنصح بالمحاولة و التكراربعد شوية يدك بتزبط الشغل ..

تاني داير اقول شنوووووووو

ايوة .. بعض الملفات المفتوحة الانا مرفقها .. أو التي ستجدها على النت ..

لمن تفتح الملف المفتوح على السويش ماكس 2 ما حتكون فاهم اي شي .. اسلم طريقة دايما انك تجرب اي شي
.. يعني اي شي تلقاه بيتحرك في الملف المفتوح الجديد تنسخو توديه شغلك تشوفو كيف لو ما عجبك احذفو .. بانك تضغط عليهو باليمين و تعمل delet
و ارجع جرب تاني ..

حتلاقيكم ملفات مفتوحة اشكال و الوان و البيواجه اي صعوبة في ملف مفتوح انا قاااعد بس يسالني .. و لحدي الليلة انا بتلاقيني ملفات مفتوحة ما بعرف اتعامل معاها


ملحوظة مهمة :

في اثناء الشغل لو حسيت انك عملت حاجة غلط و عايز ترجع خطوة الى الوراء
تضغط علي كلمة edit من القائمة فوق و تختار undo

http://www.albrkal.com/upload/uploads/undo.JPG

أو بالضغط في لوحة المفاتيح على ctrl + z

الدرس دا و الله ساهل شديد بس داير حبة تركيز

.. و انا عارف الدرس ده ممكن يكون فيهو اسئلة كتيرة .. عشان كدا خدو راحتكم

ما بنمشي الدرس البعدو الا و انتو فاهمييييييييييييييين


و زي ما قلنا و كل يوم حنقول الصبر .. الصبر .. الصبر ..
طارق علي صالح
09-30-2009, 07:07 AM
انت يا النار داير تعلمنا السرقة ولا شنو؟
غايتو سرقت سرقة جد وعرفت الدرب (بس كتر من الفلاشات المفتوحة)
الله يديك العافية
كدي شوف الشغل دا في رمال ابدوم من (منظور تقني فقط )
وخلي الجماليات لي قدام
width=500 height=300

حصتين تلاثة الونسة معاي بتكون صعبة
أبو الحُسين
09-30-2009, 08:27 AM
ماشين مية المية في الدرس...

الملف الجاهز رفض يرفع معانا... ممكن ترفعولنا وااااااااحدي بس... ما عاوزنو كلو... أو تدلنا يا طارق من محل السرقات دي!!!

لكن يا طارق أخوي ماشاء الله مستوعب نمرة واحد...

وجعلت من رمال أبدوم غاية في الروعة...

لك ولأُستاذنا النار وبقية التلاميذ والمتاوقين الكرام قواسيب مودتي...


أبو الحُسين...
محجوب ابو القاسم محجوب
09-30-2009, 09:42 AM
width=550 height=400
خالد الحاج
09-30-2009, 09:51 AM
width=347 height=368

طبعا "فرفور" ده اسم الدلع بتاع فراشة :o
احمد قوقاى
09-30-2009, 10:12 AM
يا استاذ الصور قاعد تكون كلبر شديد اعمل شنو ؟؟
طارق علي صالح
09-30-2009, 10:35 AM
اي واحد ما عمل الواجب ممكن يسرق دي يوريها الاستاذ
width=500 height=300

الاستاذ بتاعنا متمكن
النوّار
09-30-2009, 01:44 PM
السلام عليكم .. يا اولاد ..

ماشاءالله ماشاءلله .. حقيقي تفتحو النفس ..

ربنا يعلم انا فرحان بيكم قدر شنو ..

طارق علي صالح

يا ود يا مبدع انت خليت رمال ابدوم تتكلم .. و طبعا شغلك التاني كيفني شديد لانك مشيت جبت ملفات مفتوحة تانية من برة ..و اشتغلتها باتقان ..
تسلم شغلك مية مية مع انك اتهمتني اني بعلمكم السرقة لكن ببلعها ليك ..


عمنا ابو الحسين ..
اضغط باليمين على الرابط و اختار ( حفظ الهدف باسم ) أو save target as

اضغط هنا باليمين (http://www.albrkal.com/upload/uploads/malfat.rar)

و راجي اشوف شغلك


محجوب ابو القاسم ..
شغلك جميل جميل جميل

الز شي احساس انو الكتابة طالعة من الورود

مية مية


عمنا استاذ خالد الحاج شغل متقن مليون في المية ..

انا كت قايل فرفور ده زول تاني ..:confused::confused:


أخونا أحمد قوقاي .. راجع الدرس الأول و انشالله حتتعلم تحدد مقاس الصورة مع الفلاش ..

و لك كل ودي
ود حمزه
09-30-2009, 03:19 PM
بسم الله الرحمن الرحيم


width=380 height=300

شوفوا الفلاش الما folish
ود حمزه
09-30-2009, 03:23 PM
اي واحد ما عمل الواجب ممكن يسرق دي يوريها الاستاذ
width=500 height=300

الاستاذ بتاعنا متمكن

آخرابه ما يكون الاستاذ مريخابي يقوم يسقطك!!!
النوّار
09-30-2009, 03:36 PM
.. أخونا.. ود حمزة .. الغريبة شغلك جميل شديد و هادي شديد ..

لكن انت ما هادي كلو كلو ..

و يا زول لا تشفق لاني هلالابي لاني مريخابي .. عبرو عن ما تجود به قريحتكم ..

لكن تقلبو لي شكلة الكورة و العوارة ده جوة الفصل بشوتكم برة طوالي

هههههههههههههه
ود حمزه
09-30-2009, 05:11 PM
.. أخونا.. ود حمزة .. الغريبة شغلك جميل شديد و هادي شديد ..

لكن انت ما هادي كلو كلو ..

و يا زول لا تشفق لاني هلالابي لاني مريخابي .. عبرو عن ما تجود به قريحتكم ..

لكن تقلبو لي شكلة الكورة و العوارة ده جوة الفصل بشوتكم برة طوالي

هههههههههههههه

شكرا يا محترم ومبروك الاسم الجديد - يتناسب مع نوّار الفلاشات .
أدروب
09-30-2009, 09:41 PM
استاذنا العزيز النوار اول حاجة مبروك اسمك الجديد وراجين السماية

تانى حاجة انا طبعا جيت من الشرق متاخر عشان الحق اتسجل فى الفصل داوانشاء الله
ما يكون فاتنى من المقرر كتير
تالت حاجة احى الزملاء فى هذا الفصل
وانت يا استاذ ارفع صوتك شوية عشان انا قاعد فى الكنبة الاخيره
فى الختام تحياتى للجميع

وهذا عملى بس كت مستعجل شوية عشان الحقكم
width=400 height=400
طارق علي صالح
09-30-2009, 11:28 PM
التطبيق الثالث علي الدرس الثاني
اهداء الي
الاستاذ النار المنور النوار

width=400 height=300
ود حمزه
10-01-2009, 12:43 AM
التطبيق الثالث علي الدرس الثاني
اهداء الي
الاستاذ النار المنور النوار

width=400 height=300


- قمة الروعه يرقي الي مساعد تدريس-
مصعب علي
10-01-2009, 07:14 AM
الحمد الله قدر حصلت معاكم

وده تطبيقي علي الدرس الثاني

width=460 height=120

بس دايرين خطوط ياريت ترفق هنا
طارق علي صالح
10-01-2009, 08:29 AM
التطبيق الرابع علي الدرس الثاني
اهداء
الي طلاب الفصل

width=500 height=300
النوّار
10-01-2009, 01:47 PM
استاذنا العزيز النوار اول حاجة مبروك اسمك الجديد وراجين السماية

تانى حاجة انا طبعا جيت من الشرق متاخر عشان الحق اتسجل فى الفصل داوانشاء الله
ما يكون فاتنى من المقرر كتير
تالت حاجة احى الزملاء فى هذا الفصل
وانت يا استاذ ارفع صوتك شوية عشان انا قاعد فى الكنبة الاخيره
فى الختام تحياتى للجميع

وهذا عملى بس كت مستعجل شوية عشان الحقكم
width=400 height=400


مرحبا ادروب يا مبدع ..

شغلك رقيق و مرهف زيك يا انسان يا راقي ..

سعيد بي وجودك معانا .. و عليك الله الملف المفتوح الفيهو الدواير المتناثرة في الهواء دي رسلو لي ...

و بديك طبعا 10 علي 10 ..

و خليك قريب
النوّار
10-01-2009, 01:58 PM
.. طارق علي صالح يا فنان ...


يا اخوانا ادوهو صفقة

http://fhab09.jeeran.com/%D8%AA%D8%B5%D9%81%D9%8A%D9%82.gif

انت يا زول البرنامج ده لمن تحترفو انشالله ..ما حتقوم منو تاني كلو كلو ..

و انا بحي فيك هذا النشاط و الا هتمام ..

و بعد شوية انت حتفوت الجماعة ديل ...

مصعب علي ..

يا زول يا رايع شغلك مافوقو كلام .. و خليك متابع ..


الدروس الجاية بتهمك


بالنسبة للخطوط بنصحك بالموقع

http://www.arfonts.net/

تجد هناك كل الخطوط .. تستطيع تحميل الخط بعدمشاهدته
أشرف محمد خليفة
10-01-2009, 04:26 PM
width=400 height=335


يا جماعة عليكم الله ورونا مواعيد الحصص عشان ما نجي متاخرين
احمد قوقاى
10-01-2009, 07:53 PM
width=350 height=550
غايتو انشاء الله يشتغل ودة اول تصميم
اسامة حمزة
10-01-2009, 09:24 PM
انا طبعا يادوب جيت وجاري جري ..

ببدأ من هنا ..

يانوّار .. اها لقيتني كيف







width=350 height=400
النوّار
10-02-2009, 12:13 AM
أبو الشوش
.. متألق كالعادة .. وشغلك عجيب... مية مية ..
بالنسبة لمواعيد الدروس ما محددة ... أول ما احس انو الأعضاء استوعبو الدرس القديم بنزل الدرس الجديد ..
بس انت خليك قريب ..



أحمد قوقاي

..تحياتي ... يا اخوي ما فهمنا انت عملت شنو ... كدي حاول تاني ..
المربع بتظهر فيهو صفحة المنتدى .. اتأكد من الرابط الانت مدخلو ..

و لك ودي



أسامة حمزة

.. الحركات دي شنو يا أستاذ ..

طبعا حركة الصورة دي .. أنا زاتي ما جربتها ...

دايرينك تشرح لينا عملتها كيف؟؟؟ ..

( دي دقسة الطالب البيجي يعمل فيها ناقش:p:p:p )

لكن جدعة .. لو كنت اديت الخلفية لون بلا اللون الابيض او صورة كان تكون اجمل ..

احييك على هذا الشغل الجميل..

تسلم ايدك
علياء
10-02-2009, 11:05 AM
يسعد ايامك يا أستاذ النوار
(الاسم الجديد حلو)وقربت ما أعرفك

سلام لي كل الفلاشاب الحاضرين الرائعين

بي سبب الفلاش دا فطوري قرب يحرق لكن الحمد لله ربنا ستر


width=500 height=400

بدور اسعل لي سعال؟؟؟
الفراشه دي ما ممكن نعمل ليها مؤثرات تخليها تظهر وتطير بعد الكلام ما ينتهي؟
علياء
10-02-2009, 11:17 AM
- قمة الروعه يرقي الي مساعد تدريس-

شنو يا ود حمزة ما تكبر لطارق راسو
اي بالجد شغلو سمح وما فيهو كلام لكن بعد شوية يعمل لينا حركات ..يقول داير يبقى الاستاذ
ود حمزه
10-02-2009, 11:31 AM
لا لا. ماشاء الله عليك نحن وطارق تلاميذ بالنسبه ليك يالكانت دايره تحرق فطوره
طارق علي صالح
10-02-2009, 01:41 PM
بصراحة كده سرقت توقيع الاستاذ والزول اخير يبدا السرقة من الكبار
وماشي اسرق توقيع ابو الشوش
ماتسألوني كيف؟width=300 height=200
علياء
10-02-2009, 01:54 PM
بصراحة كده سرقت توقيع الاستاذ والزول اخير يبدا السرقة من الكبار
وماشي اسرق توقيع ابو الشوش
ماتسألوني كيف؟width=300 height=200

مش قلت ليكم ...
الزول دا داخل على طمع!!

اسع الحكاية بدت بسرقة توقيع الاستاذ ...
يا مفترى الاستاذ مرة واحدى
مش كان تبدا بي ابو الشوش في الاول ..

عشان الحركات دي ما حأعمل توقيع اقوم يوم ما القاهو في محلو..

طارق النبي سويتا كيف؟؟؟
علياء
10-02-2009, 03:24 PM
width=300 height=300




عشان سيد البلد
وطارق علي صالح وكل الهلالاب الفي المنتدى
طارق علي صالح
10-02-2009, 04:38 PM
مسروق مسروق مسروق
المقاس 409 *300
مافي زول يسألني كيف؟
لانو داخل حصة خاصة مع الاستاذ النوًار
توقيع ابو الشوش
width=409 height=300
طارق علي صالح
10-02-2009, 04:44 PM
width=300 height=300




عشان سيد البلد
وطارق علي صالح وكل الهلالاب الفي المنتدى
مشكورة علياءعلي الشغل الجميل وكتر خيرك

ممكن استلف منك الفلاش الجميل دا ؟
طارق علي صالح
10-02-2009, 05:01 PM
لمن الحصص تكون فاضية ومافي استاذ بتحصل سرقة

width=750 height=152
النوّار
10-02-2009, 06:19 PM
يسعد ايامك يا أستاذ النوار
(الاسم الجديد حلو)وقربت ما أعرفك

سلام لي كل الفلاشاب الحاضرين الرائعين

بي سبب الفلاش دا فطوري قرب يحرق لكن الحمد لله ربنا ستر


width=500 height=400

بدور اسعل لي سعال؟؟؟
الفراشه دي ما ممكن نعمل ليها مؤثرات تخليها تظهر وتطير بعد الكلام ما ينتهي؟

الاخت علياء

دايما اقف مندهشا امام روعة اختيارك للصور و تناسق الكلمات ..

اشكرك .. بالجد قاعدة تبردي لي بطني ..

:D:D:D

بالنسبة لي سعالك .. كفارة و انشالله سلامة :p:p:p

طبعا بتقدي تعملي تاثير علي الملف المفتوح ..

بالزبط زي ما بتعملي تاثير علي النص .. بانك من شريط الزمن فوق تضغطي قصادو باليمين ..
و تختاري التأثير المناسب من القائمة ..

كدي انتي جربي و تعالي ..

مع انو الحتة دي كنا نشرحها لي قدام شوية ..

وذلك ان دل انما يدل على خيالك الواسع .. و حسك الفني العالي ..

لكي كل احترامي
النوّار
10-02-2009, 06:27 PM
width=300 height=300




عشان سيد البلد
وطارق علي صالح وكل الهلالاب الفي المنتدى






علياء ... أشكرك .. تسلم يدك
النوّار
10-02-2009, 06:30 PM
طارق الحرامي ...

ده شنو الشغب ده .. كمان متهمني اني داخل معاك حصص خصوصية عشان اعلمك السرقة ..

ههههههههههههه

ده idm ولا شي تاني ..

تحياتي ليك وين ما تكون .. شكلك زهجت وراجي الدرس الجديد ..
طارق علي صالح
10-02-2009, 09:13 PM
=النوّار;122313][b]
طارق الحرامي ...

اصلو ما حصل سرقت حاجة واسأل مني ناس المنتدي

ده شنو الشغب ده .. كمان متهمني اني داخل معاك حصص خصوصية عشان اعلمك السرقة ..
نحن حا ننكر ولا شنو يا شاب؟
ههههههههههههه

ليك حق تضحك بعد ما قبضت حق الحصة
ده idm ولا شي تاني ..

ليس انترنت داون لود منجر (شيتن تاني)
تحياتي ليك وين ما تكون ..ولك مني الف تحية استاذي العزيز و كل الاحترام والتقدير علي مجهودك الجبار
شكلك زهجت وراجي الدرس الجديد COLOR].[/
[
زهج شديد التمرين عملتو اربعة مرات وسرقت 3 مرات
ود حمزه
10-03-2009, 08:25 PM
width=525 height=400



سوداننا فوق ... فوق ... فوق.
بركلنا فوق ... فوق ... فوق.
هلالنا فوق ... فوق ... فوق
أها ياحضرة الألفه -طارق عدلناها وهي في محلها.
هذي ما بدها صلعه يا زلمي .بس العتود البنطط ده
بنشوف ليهو صرفه نكتفه شويه --تحياتي
طارق علي صالح
10-03-2009, 08:42 PM
ود حمزة شغلك جميل وانيق
ملاحظات زميل
1- لم تحفظ مقاسات الفلاش ويمكنك تعديلها الان
2- الكلمة في الطرف الايسر من الفلاش سريعة وغير واضحة
3- الاستاذ جاي بالبصطونة اعمل حسابك
4- لك الود والشوق وكل الكلام السمح
5- الشغل حق الالبومات السمح العملت فيهو صور ناس البركل عملتو كيف ؟ عليك الله علمني ليهو
الشي دا ادونا ليهو ولا لسع ؟
احمد قوقاى
10-03-2009, 10:17 PM
width=600 height=500

اها يا النوار كدة كيف ؟
احمد قوقاى
10-03-2009, 10:20 PM
يا طارق كدي شوف دة كيـــــــــــــــــــــــــــــــــــــف ؟ ولا انتظر الاستاذ؟
هههههههههههههههههههههههههههههههههههههههههههههههههه ههه
طارق علي صالح
10-04-2009, 02:46 AM
يا طارق كدي شوف دة كيـــــــــــــــــــــــــــــــــــــف ؟ ولا انتظر الاستاذ؟
هههههههههههههههههههههههههههههههههههههههههههههههههه ههه


احمد قوفاي بلد مافيها استاذ يقدل فيها الالفة
شغلك سمح لكن التاثيرات علي الكلام سريعة شديد
انا جبت ليك كراسي ادرس منو كيف تخلي الزمن يمشي براحة عشان الكلام يتقري( قدر ما تجر محل العلامة الحمراء لي قدام الزمن ينقص معاك اسكت جر يازول)

اول ما تتتهي رجع الكراس عشان بكرة عندنا تصحيح

هاك الكراس



بيظهر ليك التاثير في شكل شريط رمادي على شريط الزمن .. قصاد النص
التأثير بيكون موجود جنبو رقم ..الرقم ده يعني عدد المربعات الصغيرة ( وهي تمثل الزمن الذي يستغرقه التاثير )

http://www.albrkal.com/upload/uploads/567.JPG

و كل ما زاد عدد المربعات يعني السرعة بتبطء و كل ما قل السعرة بتزيد .. علاقة عكسية ..

تضع الماوس في طرف الشريط الرمادي ده
لمن شكلها يتغير الى سهمين تقوم تضغط و تسحب الى اليمين عشان تطول الزمن ..أو ممكن بالضغط على الدائرة السوداء الصغيرة التي تظهر في طرف الشريط .. برضو بيتغير شكل الماوس الى ماوس فيه نقطة سوداء..
في الحالتين .. تقوم بالضغط و السحب الى اليمين .. لكي تطول الزمن .. او السحب الى اليسار .. لتقصير الزمن و اعطاء سرعة اكثر ..

شوف
http://www.albrkal.com/upload/uploads/444.JPG
كدا عندنا تاثير ظهور النص .. انا حارجع زمنو 20 عشان ما داير اغير سرعة التاثير ..


نقوم نعمل تاثير لاختفاء النص ..

بعد انتهاء الشريط الرمادي لتاثير دخول النص على العمل ..
تقوم تبعد مسافة عدد عشوائي من المربعات و و تضغط باليمين ..تاني نقول بالزر اليمين و تراعي انك قصاد النص و ليس قصاد الصورة ..
و حنظهر ليك نفس القائمة .. تقوم تمشي لي disapear from psition
وتختار تاثير اختفاء
مثلا انا حاختار
fade- wipe out

http://www.albrkal.com/upload/uploads/555555.JPG

حيظهر عندك في شريط الزمن شريطين للتاثير ..
بالشكل ده

http://www.albrkal.com/upload/uploads/00000.JPG
طارق علي صالح
10-04-2009, 09:55 AM
width=850 height=410
أشرف محمد خليفة
10-04-2009, 11:17 AM
انت قايل نفسك براك الحرامي
اها دي كيف ؟


width=500 height=300


الحجم : 500×400
الاسم : seed.swf

ملحوظة: السرقة من غير مساعدة الاستاذ
ود حمزه
10-04-2009, 11:19 AM
طارق علي صالح;122503]ود حمزة شغلك جميل وانيق
ملاحظات زميل
1- لم تحفظ مقاسات الفلاش ويمكنك تعديلها الان
2- الكلمة في الطرف الايسر من الفلاش سريعة وغير واضحة
3- الاستاذ جاي بالبصطونة اعمل حسابك
4- لك الود والشوق وكل الكلام السمح
5- الشغل حق الالبومات السمح العملت فيهو صور ناس البركل عملتو كيف ؟ عليك الله علمني ليهو
الشي دا ادونا ليهو ولا لسع ؟ [/quote]

الزول الفنان طارق تحياتي
شكرا للاطراء الذي اري اني لا استحقه وين نحن من الفطاحله
هذا العمل الاخير من نوع دفن الليل المستعجل
اما الكلمه التي علي الشمال ولم تستطع قرائتها فذلك
لخوفها منك فهي تجري سريعا لتتضاري( عتود)
وعلي العموم سوف احاول تصليحها ان شاء الله

5- الشغل حق الالبومات السمح العملت فيهو صور ناس البركل عملتو كيف ؟ عليك الله علمني ليهو
اما شغل الالبومات ده فسره في بير بعدين تعرفوه لي قدام.ولازم نلقي لينا حاجه نتجدعبها
يا قول الجماعه .
تحياتي ودمتم .
ود حمزه
10-04-2009, 11:25 AM
انت قايل نفسك براك الحرامي
اها دي كيف ؟


width=500 height=300


الحجم : 500×400
الاسم : Seed.swf

ملحوظة: السرقة من غير مساعدة الاستاذ


انت قايل نفسك براك الحرامي
اها دي كيف ؟
قالوا سرقت السارق يجود بها الخالق
احمد قوقاى
10-04-2009, 11:25 AM
يا طارق دقيقة بس وهسة بوريك السرقة كيف
طارق علي صالح
10-04-2009, 12:03 PM
انت قايل نفسك براك الحرامي
اها دي كيف ؟

ملحوظة: السرقة من غير مساعدة الاستاذ


يا اشرف يا اخوي السرقة الصعبة حقتي ما بتتقدر بالساهل انت كل العملتمو اقتباس وشلت الرابط
اما انا سرقت التوقيع حقك وحق الاستاذ وترويسة البركل الجديدة الموضوع كبير اسأل الاستاذ
النوّار
10-04-2009, 11:50 PM
width=600 height=500

اها يا النوار كدة كيف ؟


تحياتي أحمد قوقاي .. كدا شغلك 100% ..

بس زي ما قالليك اخونا الزهجان ده .. الحركة سريعة شوية لكن ما مشكلة لي قدام يدك بتتزبط
النوّار
10-04-2009, 11:54 PM
width=525 height=400



سوداننا فوق ... فوق ... فوق.
بركلنا فوق ... فوق ... فوق.
هلالنا فوق ... فوق ... فوق
أها ياحضرة الألفه -طارق عدلناها وهي في محلها.
هذي ما بدها صلعه يا زلمي .بس العتود البنطط ده
بنشوف ليهو صرفه نكتفه شويه --تحياتي



شغل جميل بعد التعديل .. بس كلمة فلاشاب دي مالها مطرفة كدا لمن تظهر بتكون خالج المربع الابيض ..العتود ده اخير تربطو لا يوسخ لنا الفصل ساي ..

وأراك في الدرس الجديد
النوّار
10-04-2009, 11:57 PM
يا اشرف يا اخوي السرقة الصعبة حقتي ما بتتقدر بالساهل انت كل العملتمو اقتباس وشلت الرابط
اما انا سرقت التوقيع حقك وحق الاستاذ وترويسة البركل الجديدة الموضوع كبير اسأل الاستاذ

و الله هاذا الزلمي عم يحكي صح ...

سرقة التوقيع و الترويسة ما بسهولة .. بيكون جاب برنامج يطلع ليهو الروابط زي internet download manager و برامج تحميل أخرى ..

لكن انا ما ح اعلمكم عشان السرقي حرااااااااااااام

:p:p:p:p:p:p
احمد قوقاى
10-05-2009, 03:12 PM
استاذنا النوار شوف دة ابي يدخل معانا
راجعو شوف الحاصل فيهو شنو
http://www.albrkal.com/upload/uploads/Picture%20004.swf
ود حمزه
10-05-2009, 03:13 PM
مسروق مسروق مسروق
المقاس 409 *300
مافي زول يسألني كيف؟
لانو داخل حصة خاصة مع الاستاذ النوًار
توقيع ابو الشوش
width=409 height=300
width=350 height=600

أذا تخاصم اللصان ظهر المسروق ..
معي اطيب الاماني
ود حمزه
10-05-2009, 04:01 PM
ود حمزة شغلك جميل وانيق
ملاحظات زميل
1- لم تحفظ مقاسات الفلاش ويمكنك تعديلها الان
2- الكلمة في الطرف الايسر من الفلاش سريعة وغير واضحة
3- الاستاذ جاي بالبصطونة اعمل حسابك
4- لك الود والشوق وكل الكلام السمح
5- الشغل حق الالبومات السمح العملت فيهو صور ناس البركل عملتو كيف ؟ عليك الله علمني ليهو
الشي دا ادونا ليهو ولا لسع ؟


طارق بطل اللّف والدوران شغلك حلو وتشكر الراكوبه في الخريف
_ اذا كنت انت حرامي انا الحرامي البيسرق الحراميه -اذا كنت عايز
تعوف طريقة شغل الالبومات رسل لي السناره القعد تسرق بها
امضاءآت الجماعه ديل وداك يصلك هواء علي الخاص والعام ان درت
فكيف أوقع نشال بنشال..مع غالي المنا .
اقبل تحيات المليجي والدقن وارسين لوبين ..
ود حمزه
10-05-2009, 04:11 PM
يا أخواننا الفلاشاب ديل كرسوا كدي مالن!!؟؟؟ - غتسوا وين ؟؟؟ وين استاذ النّوار وين ود علي صالح وين الرايع أبو الحسين وين أشرف وقوقاي والبنيات الناس الكانوا نشاط ..خلوني حايم براي زي الورر ان ما جيتوا بقوم أرضع الغنم -زي صاحبنا واحد
أشرف محمد خليفة
10-05-2009, 04:58 PM
وين استاذ النّوار وين ود علي صالح وين الرايع أبو الحسين وين أشرف وقوقاي والبنيات الناس الكانوا نشاط

قاعديييين راجين الدرس الجديد
بس دايرين تنبية قبل الموعد بي شوية
عشان انا مرسّل عند الجيران وخايف الحصة تفونتي
احمد قوقاى
10-05-2009, 06:06 PM
يا أخواننا الفلاشاب ديل كرسوا كدي مالن!!؟؟؟ - غتسوا وين ؟؟؟ وين استاذ النّوار وين ود علي صالح وين الرايع أبو الحسين وين أشرف وقوقاي والبنيات الناس الكانوا نشاط ..خلوني حايم براي زي الورر ان ما جيتوا بقوم أرضع الغنم -زي صاحبنا واحد

قاعدين يا ود حمزة انت اظهر بس واي حاجة نحن هنا
النوّار
10-05-2009, 08:37 PM
استاذنا النوار شوف دة ابي يدخل معانا
راجعو شوف الحاصل فيهو شنو
http://www.albrkal.com/upload/uploads/picture%20004.swf

الفلاش مرفوع باسم يحتوي على مسافة .. بتظهر على شكل %

يرجى مراعاة كتابة الاسم باللغة الانجليزية و عدم ترك مسافات ..

ارفعو تاني باسم بدون مسافات و ادرجو في المشاركة ..

لك ودي
طارق علي صالح
10-05-2009, 11:05 PM
طارق بطل اللّف والدوران شغلك حلو وتشكر الراكوبه في الخريف
_ اذا كنت انت حرامي انا الحرامي البيسرق الحراميه -اذا كنت عايز
تعوف طريقة شغل الالبومات رسل لي السناره القعد تسرق بها
امضاءآت الجماعه ديل وداك يصلك هواء علي الخاص والعام ان درت
فكيف أوقع نشال بنشال..مع غالي المنا .
اقبل تحيات المليجي والدقن وارسين لوبين ..

ود حمزة تحياتي
تشرح لي ولا اكتبك غياب
يا زول انا جيتك بالدرب العديل بسرقو وبفتحو وعينك تشوف
الليلة مالك ما سلمت واجاب الدرس الثالث؟
سكينة
10-23-2009, 11:55 PM
width=500 height=300
الغنيمة التانية يااستاذ
يلا صحح وقول رايك
قربت ادخل الفصل النظامى
بس يارب امر فى المعاينات
خالد خليفة
10-24-2009, 03:40 AM
width=551 height=410
الدرس الثاني.
النوّار
10-24-2009, 01:59 PM
سكينة .. شغلك هنا ممتاز مية مية واصلي علي كدا ..

خالد خليفة .. مية مية شغلك ارح لي قدام ..

و برحب بيكم تاني معانا في الدروس

و سعيد بانضمامكم للفلاشاب ..
التهامى كروم
11-05-2009, 08:41 AM
يا حليلك يا ود كروم البقيت ملاحق
بعد ما كنته شاطر ومتابع
يعني يا استاذ ونسبة لظروف مرض الوليدات
انا يا دوب هنا
وارجو ان يكون شغلي كويس



width=565 height=415
النوّار
11-07-2009, 02:07 AM
.. تحياتنا ود كروم ..

و حمدالله ألف علي السلامة .. و اهم شي ياخي سلامة الوليدات ..

الفلاش طاير ...

على العموم

شغلك مية مية .. و ابقى مواصل معانا..

تحياتي و كل الود ..
بت شنان
03-23-2010, 08:37 AM
width=350 height=350


بحصللللللللللللللللللكم
النوّار
03-26-2010, 11:52 PM
الاخت المجتهدة ... بت شنان .. انت من ناس شنان تنقاسي؟؟

شغلك راااااااااااااااائع و نحنا زاتنا احترنا في الشافع

و بتحصلييييييييييييييينا ..

من هنا ماشي اصحح لك باقي الدروس

تحياتي
بت شنان
03-29-2010, 08:28 AM
الاخت المجتهدة ... بت شنان .. انت من ناس شنان تنقاسي؟؟

شغلك راااااااااااااااائع و نحنا زاتنا احترنا في الشافع

و بتحصلييييييييييييييينا ..

من هنا ماشي اصحح لك باقي الدروس

تحياتي

استاذنا الفاضل النوار
والله شكرا كتير علي مجهوداتك المقدره
وربنا يجزيك عننا الف خير
ولو تصدق انا بفتش في قوقل لي دروس فلاش لقيت رابط البركل جابني هني
وماصدقت
شرحك بسيط وافي جد ومميز والمعلومه بتوصلها ميه الميه
ماشاء الله تبارك الله مانسحرك
ربنا يجزيك عننا الف خير
انا ماعارفه والله ناش تنقاسي ديل في قرابه ولا لا لكن نحنا من شبا