المساعد الشخصي الرقمي

مشاهدة النسخة كاملة : الشاعر ياسر اب ريده ...( ياسر احمد نعمان )


بكرى مجذوب خطيب
08-26-2009, 03:22 PM
يا بركلنا انت ايادي
تكرم للقريب والغادي
يا اهل الكرم والعزة
غيركم وين الاقي مرادي
يانيل غمر لجروفنا
ما بين النخيل والوادي
يا نخل يميل يتنى
يا مداعب النسيم الهادي

تلك ابيات ارتجلها الشاعر واراد ان نفتح بها بوست الشاعر ابريده شاعر البركل في منتدي البركل
ولد ياسر ابريده بالبركل في حلة العرب بالبركل فوق في بداية سبعينيات القرن الماضي
فهو بحق شاعر جمال وشاعر رقيق وله اسهامات كثيرة وانشاء الله تطلع للعلن من خلال هذا البوست واتمنى من يعرف كلمات او قصائد للاخ والشاعر ابريده ان ياتي هنا
.. وكون احيانا ثنائيات مع الفنان خالد عثمان النجيب
عابره ( ليلة الزفاف )

طوالي في الخاطر ياعابره في الخاطر
انا وانت والاحلام راجين صباح باكر
زينة ضفاف النيل الخضرة ليكِ اكليل
زمن نعيشو رحيل ما بنلقى ليهو اخر
يا شمس واشراقه الدنيا فراق
وانا روحي مشتاقه لطرفك الساحر
قمر السماء اللجلاج دافر شعاعك فاج
ابنوس وسن العاج دربك نظير زاهر
مكتوب لنا الاسفار نرحل مع الاطيار
لكن قلوبنا جوار مهما الزمن جائر
ياعابره وادعيني يا انت نور عيني
عاهديني واعديبي نستقبل الحاضر

عصام سرالختم
08-26-2009, 03:37 PM
الاخ بكرى
متابعين
واول مرة اسمع بالشاعر ياسر
بعرف والده احمد نعمان تماما
فهم جيرانكم تماما فى البلد ..
واصل التوثيق

sudany
08-26-2009, 04:08 PM
احونا بكري عبرك نحي اول المشاركين عصام ونحي اهل العرب والوراريق واهل البركل جميعهم وكل التحايا لمن وردت كلمة بركل الله المعظم في قصائده والتحيه الي الشاعر الانسان ياسر ابوريده و الفنان المبدع خالد نجيب .
مع خالص تحياتي /سوداني متخلج(متغرب ) وعطشان ومشتاق للنيل ولشوفت الجروف والمانجو والناس في السعده تكدكد .

بكرى مجذوب خطيب
08-26-2009, 11:53 PM
الاخ عصام سر الختم
ياسر اب ريده شاعر ظلمه الاعلام كثيراً وظلم نفسه ايضاً ( بالمسكنه الذائدة ).......
وهذة النصوص اخذتها منه بالتلفون ورحب بالفكرة سوف اخذ منه بعض القصائد لاحقاً..........
غني له الكثير من الفنانين مثل خالد عثمان النجيب وعز الدين شكري وهيثم قنتي وعلي حسين وكلهم فنانين كبار .........
وله اغنية مسجلة في قناة هارموني للفنان علي حسين وهي الدر الهجر
الدرالهجر
الدر الهجر فارق واديك
تاني ارجع لديار مشتاقه ليك
خليني للهيب انا فيه اصالى
فته رحلت ما هاميك حالي
ياريت لو معاك شديت رحالي
اّبرى خطاك وامشي حسب مشيك
شوف بركلنا من بعدك مأسى
حتي قمرنا ما ضوه الاماسي
خوفي هناك تصبح ليا ناسى
وكيف تنساهو قلبي المصطفيك
في لحظة فراقك كم بكينا
زرفنا دموعنا والدمعة الحزينة
يا محبوبي قول لي بتين تجينا
وبتين ايدي تسالم لا يديك
يا الاول حروفك لي نهاية
يا امل الفواد حبي ومناي
يا محبوبي لمتين القراية
واشوف توب الزفاف خايل عليك
وايضا تغنى بها هيثم قنتي في شريط (ماستر) واظن اسم الشريط الدر الهجر
وياريت لو الاستاذ اسامة حمزة لو يتداخل ويعطينا بعض ماعنده من قصائد الشاعر الرقيق اب ريده
وكذلك الاخت شهرذاد وكل من يعرف الشاعر ونواصل

بكرى مجذوب خطيب
08-26-2009, 11:57 PM
احونا بكري عبرك نحي اول المشاركين عصام ونحي اهل العرب والوراريق واهل البركل جميعهم وكل التحايا لمن وردت كلمة بركل الله المعظم في قصائده والتحيه الي الشاعر الانسان ياسر ابوريده و الفنان المبدع خالد نجيب .
مع خالص تحياتي /سوداني متخلج(متغرب ) وعطشان ومشتاق للنيل ولشوفت الجروف والمانجو والناس في السعده تكدكد .
انت ياسوداني من تكـــــــــون ؟؟؟
واحي فيك حبك ومعرفتك لحلة العرب والوراريق ( يلحقونا وينجدونا ) وانت المتخلج ومتغرب تعالي في الرسائل الخاصة ويلا همتك معاي لنحدث ونعرف عن الشاعر الرقيق ياسر احمد نعمان ( اب ريده )
وشكراً على مرورك ياسوداني يانسمة ...
ونواصل

بكرى مجذوب خطيب
08-27-2009, 12:18 AM
سراب
سراب ما يروي عطشان
وهم كذاب اتاريك
سقيتنا حناضل الحرمان
وانا المستني اصافيك
تصرف عمري ما بتخيل
يموت حتى الضمير فيك
تجرتق قلبي للاحزان
يختو الحنه في يديك
سراب باريت كت عشمان
سنين باريت خطاويك
تغيب ارجاك فوق نيران
تعود بالشوق الاقيك
وراك ضقته العذاب
الوان تعذبني وراضيك
مصيبتي كنت بيك
هيمان قلبني ساليك
لقيت ومرت الازمان
ضيعت عمري راجيك
بلاك ما عندي حبان
متيم قلبي كان بيك
قسيت سال الدمع هتان
تصدق ماني باكيك
وعليك صدقني ماندمان
باكي ضياع معانيك
قبل يبقى الفراق عنوان
اقيف اسمعني اوصيك
حال الدنيا والاكوان
عليك اليوم تكون ليك
بين اسع وقبيل شتان
اكيد زمنك حيوريك
عقوق عاشق وحيد شقيان
وقف لله شا كيك
سراب
تغنى بها عزالدين شكري في البوم المقادير
ونواصل

بكرى مجذوب خطيب
08-27-2009, 12:21 AM
عمر مجذوب خطيب
ياسر اعطاك صلاحية مطلقة
في الاضافة عن الشاعر الرقيق اب ريده و ما اتراه وما تضيفه ولك ماتشاء
حسب والوصية
ياسر احمد نعمان
ونواصل ....

عمر مجذوب خطيب
09-07-2009, 05:20 PM
ياسر ابريدة او ياسر ود سعيدة او ياسر ود نعمان - هو كل هؤلاء جار وابن جار واخ جار وجارة وهكذا دواليك نشانا سويا - سبقناه في العمر لكنه سبقنا في الابداع - كنت شاهدا على بواكر شعره - لكن السفر والبعاد حالا دون ان اتباعه انتاجه المتأخر - كلي قناعة ان ياسر شاعر مجيد وحساس وصاحب خيال دفاق وقدرة على التصوير وتبيان المفارقات باسلوب جمالي رصين - اتمنى ان يكون هذا البوست مناسبة للتوثيق له وتعريف الناس على شاعر رقيق لم يسع يوما وراء الاعلام والشهرة - بكري انتبه للاخطاء في كتابة القصائد خاصة وانها تكتب بالدارجة - وكذلك التقطيع ومواطن الوقف وحبذا لم يرسلها ياسر بعد ان يكتبها بنفسه - فمشكلة الدارجة في الكتابة انها لا تخضع لاي قاعدة

الهادي قنديل
09-08-2009, 02:42 AM
الحبيب بكري خطيب

ما اجملك وانت تكتب عن شاعر مبدع جدا وبعيد عن الاضواء في نفس الوقت

تعامل الشاعر ياسر مع عدد من الفنانين وشكّل ثنائية مع الفنان خالد عثمان النجيب وكان نتاج هذه الثنائية تلك الاغنية الشهيره (ليلة الزفاف) التي يقول مطلعها

صدقني في ليلة الزفاف

انا باكيه بالدمع التقيل

ماناسيه للعهد القبيل

وريني كيف يسعد قليب

زفوهو بالنوح والعويل

بين التباريح والحزن

عايش سواد ليلو الطويل

وايضا كانت اغنية (عابره) وكذلك (خاف الله)والعديد من الاعمال

*ملحوظه
اغنية عابره ليست ليلة الزفاف يابكري كما عنونتها في بداية البوست

وبجيك راجع بالتأكيد لاكمل معك مابدأته

محمد الامين
09-19-2009, 07:30 AM
بكرى والأحباب
سلامات

لك التحيه العزيز بكرى وأنت تفتح لنا باب الإبداع كى نلج الى عوالم اب ريده الجميله ..
عـــرفته من خلال الثنائيه التى ربطته بخالد عثمان النجيب فأنا من المعجبين بخالد النجيب وأستمع اليه بإستمرار وكنت أتساءل عن سر هذه الثنائيه فما الذى يجعل خالد النجيب يأتى من مساوى ليكوِّن ثنائيه مع شاعـــر من البركل بينما مساوى نفسها مليئة بالشعـــراء ناهيك عن جارتها القـــرير أرض الشعـــر و الشعـــراء .. ولكن ما بهذا الياســر من شاعريه وابداع يستحق أن تُشد له الـــرحال ليس من مساوى فحسب وإنما من جميع بلاد الله .. إنه مبدع بحق وأجمل ما فى إبداعه تواضعه حتى لتشك فى أنه من يجـــود علينا بهذا الشعر الجميل فقد إلتقيته عدة مرات وأنا أزور صديق الأســـره عبد الرحمن الشايقــى - الله يطراهو بالخير والتحيه له أينما كان - وجلست اليه وعرفت حينها سبب أن يظل هذا الشاعـــر بعيدا عن الأضواء فهـــو لا يسعـــى اليها ...
أتمنى أن نجتهد فى توثيق أعمال هذا الشاعـــر الجميل فهــو شاعر يستحق أن نفـــرد له مكاناً فى هذا المنتدى ...

عثمان محجوب جعفر
09-19-2009, 01:11 PM
سلام يا ولاد
تتكلموا عن ناس ود نعمان ونحن قاعدين...
ديل أهلي.. وأكثر من جيران .. ربينا في بيتهم مع حبوبة عيشة بت مرسي.. قريبة ضمرة..وأخت رابح.. كانت لصيقة بالوالدة.. وربينا مع حبوبتهم بت سعيدي ولا أظن منكم من شافها كانت إمرأة حلوة لا تغادر منزلهم .. لعلة فيها على ما أظن .. وكانت تهدهدني وتقول لي "خليفتنا اللوالك سيدي زاتو .. وفي السفينة ام حضرة حس حيرانو تاتو" تيمناً بأن أكون من خلفاء سيدي يوماً ما كالعزيز أبي الحسين.. رحمهم الله جميعاً .

كانوا خير جوار وأحلاه.. أما أم ياسر أختنا العزيزة سعيدة بت الأمين ود عبد الجابر فهي الشاعرة حقاً .. وميراث ياسر كله لعله منها .. لكنها شاعرة تبخل بإنتاجها كثيراً .. رغم محاولتنا معها للتسجيل .. وهي كذلك ملحنة ، إذ أنها تروي أشعارها دائماً بصوت رقيق في ألحان رائعة..

وأحمد نعمان وما أدراك ما أحمد نعمان شهدنا عنفوان شبابه وكهولته.. كان رجلاً رائعاً حافظاً للجوار كأحسن ما يكون ، تجده في الملمات وأبناؤه كذلك ،، هم من نتكل عليه يسارعون في الأفراح والأتراح .. سقاهم الله الغيث الماطر..

والله ما كنت أظن أن هذا الإبداع كله يتدفق من ياسر.. فهو عندي أكثر إخوته هدوءاً ورقة وهو قليل الكلام .. مقارنة بإخوته الحليبي وباطنية وحتى عبيدة ونعمان..
ما يكتب كلام رقيق وشفاف .. أرجو أن لا تضره المسكنة الزائدة كما ذكر الإخوة المتداخلون وأرجو من الإخوان خاصة أسامة حمزة وأحمد عبد الوهاب أن يأخذوا بيده..

شكراً بكري على فتح هذه النافذة الجميلة من حلتنا ..
ووافونا بالمزيد من روائع ياسر
له مني التحية من على البعد...ويا هو ولدنا..
كل عام وأنتم بخير..

وداعه حسين
09-21-2009, 02:04 AM
التحيه للشاعر ياسر النعمان والتحيه لكل اهلنا البركاله (وتحيه خاصه ليك يا ابوبكر وانت توثق وتعرف بشاعرالبركل (اب ريده) وتخرج لنا الكنوز المدفونه فى حلة العرب ) التحيه لجميع الاخوه بالمنتدي وكل عام وانتم بخير

محمد الامين
09-22-2009, 10:33 AM
عابره فى الخاطـــر بصوت الفنان خالد النجيب


http://www.albrkal.com/upload/uploads/fe alkhater.mp3

بكرى مجذوب خطيب
09-24-2009, 10:32 AM
ياسر ابريدة او ياسر ود سعيدة او ياسر ود نعمان - هو كل هؤلاء جار وابن جار واخ جار وجارة وهكذا دواليك نشانا سويا - سبقناه في العمر لكنه سبقنا في الابداع - كنت شاهدا على بواكر شعره - لكن السفر والبعاد حالا دون ان اتباعه انتاجه المتأخر - كلي قناعة ان ياسر شاعر مجيد وحساس وصاحب خيال دفاق وقدرة على التصوير وتبيان المفارقات باسلوب جمالي رصين - اتمنى ان يكون هذا البوست مناسبة للتوثيق له وتعريف الناس على شاعر رقيق لم يسع يوما وراء الاعلام والشهرة - بكري انتبه للاخطاء في كتابة القصائد خاصة وانها تكتب بالدارجة - وكذلك التقطيع ومواطن الوقف وحبذا لم يرسلها ياسر بعد ان يكتبها بنفسه - فمشكلة الدارجة في الكتابة انها لا تخضع لاي قاعدة
عمر ده غير المتوقع منك .......!!!!!!!!
ياسر تعلمه جيداً راجل هادي طلبت منه ان يرسل بعض القصائد على الاميل وافق ولم
يفعل .. حاولت ان نلقي بعض الضوء على اشعاره بمجهود فردي مني والمساعدة تاتي منك ماتراه خطاء صححه انت وارسله لي في الخاص لاني غير ضليع بالعامية
لكنه مجرد اجتهاد اسال الله ان اوصل الامانة كما يحب صاحبها ...ويلا همتك معي
ونواصل ....

بكرى مجذوب خطيب
09-24-2009, 10:38 AM
الحبيب بكري خطيب

ما اجملك وانت تكتب عن شاعر مبدع جدا وبعيد عن الاضواء في نفس الوقت

تعامل الشاعر ياسر مع عدد من الفنانين وشكّل ثنائية مع الفنان خالد عثمان النجيب وكان نتاج هذه الثنائية تلك الاغنية الشهيره (ليلة الزفاف) التي يقول مطلعها

صدقني في ليلة الزفاف

انا باكيه بالدمع التقيل

ماناسيه للعهد القبيل

وريني كيف يسعد قليب

زفوهو بالنوح والعويل

بين التباريح والحزن

عايش سواد ليلو الطويل

وايضا كانت اغنية (عابره) وكذلك (خاف الله)والعديد من الاعمال

*ملحوظه
اغنية عابره ليست ليلة الزفاف يابكري كما عنونتها في بداية البوست

وبجيك راجع بالتأكيد لاكمل معك مابدأته

اسع ده القدرت عليهو !!!!
عموماً انتظر منك الكثير في هذا الموضوع
ولا تنسى الوعد الذي كان بيننا
وسوف اتاكد من الشاعر من عنوان عابرة اوليلة الزفاف
و اتيك منه بناءيقين

ونواصل

بكرى مجذوب خطيب
09-24-2009, 11:06 AM
بكرى والأحباب
سلامات

لك التحيه العزيز بكرى وأنت تفتح لنا باب الإبداع كى نلج الى عوالم اب ريده الجميله ..
عـــرفته من خلال الثنائيه التى ربطته بخالد عثمان النجيب فأنا من المعجبين بخالد النجيب وأستمع اليه بإستمرار وكنت أتساءل عن سر هذه الثنائيه فما الذى يجعل خالد النجيب يأتى من مساوى ليكوِّن ثنائيه مع شاعـــر من البركل بينما مساوى نفسها مليئة بالشعـــراء ناهيك عن جارتها القـــرير أرض الشعـــر و الشعـــراء .. ولكن ما بهذا الياســر من شاعريه وابداع يستحق أن تُشد له الـــرحال ليس من مساوى فحسب وإنما من جميع بلاد الله .. إنه مبدع بحق وأجمل ما فى إبداعه تواضعه حتى لتشك فى أنه من يجـــود علينا بهذا الشعر الجميل فقد إلتقيته عدة مرات وأنا أزور صديق الأســـره عبد الرحمن الشايقــى - الله يطراهو بالخير والتحيه له أينما كان - وجلست اليه وعرفت حينها سبب أن يظل هذا الشاعـــر بعيدا عن الأضواء فهـــو لا يسعـــى اليها ...
أتمنى أن نجتهد فى توثيق أعمال هذا الشاعـــر الجميل فهــو شاعر يستحق أن نفـــرد له مكاناً فى هذا المنتدى ...
تسلم اخي محمد الامين وانت من نجده دوماً في مواطن الجمال
نعم اب ريده هو الجمال والرقة والاحساس والابداع ولكنه لا يسعى للاضواء وربما هذا سر عبقريته ..
وايدك في ايدي نوثق ونجمع له وانا لست بالمختص ولكن محاولة لرد اعتبارات اخوية بيني و بين جيراني (اهلي ) .......وهل تصدق ياسر لا يتعامل مع الكومبيوتر
وتخريمة
عبد الرحمن سيداحمد محمد الشايقي ده من ظرفاء الحلة عندنا وبه من الشهامة وحب الناس ما لم تجده عند غيره وهويعرف الناس بغض النظر عن اعتبارات المكان والمسافات له التحية
تلفون اب ريده 00249121182297
وتسلمك على المرور
ونواصل

بكرى مجذوب خطيب
09-24-2009, 11:16 AM
الخال عثمان محجوب
تسلم على ذكريات الجيران الاحباب وعلى تسليط الضوء على عمنا احمد نعمان رحمه الله وعلى سعيدة الشاعرة الفذة ( والدة الشاعر ياسر اب ريده ) حاول معها لها من الاشعار مايستحق النشر....
وتسلم على المرور والقاء الضوء على اسرة الشاعر ولاتعجب فياسر له اشعار عند كبار الفنانيين
ونواصل

بشرى سليمان الحسن
02-21-2010, 04:05 PM
تندلق كل الأحاسيس الطيبة وتتدفق حول ( البركل) الذى أرضعنى قرض القوافى والتحية موصولة لاسرة المرحوم , محجوب جعفر و على رأسهم الآخ العزيز/ بكرى الخطيب
(أخوك الاصغر ياسر أبوريدة)

بشرى سليمان الحسن
02-21-2010, 04:55 PM
ياهو ذاتو الكان أبانى........... دون سبب قطع صلاتو
جدا أيه الجابو تانى............. يانى أنا الكان فاتو ذاتو
ياما ناديت يا ودادى............ كل مشاعرى أنا كان يهاتو
طنش الحس البنادى............ وقلبى فى أحزانو فاتو
النجوم ملت سهادى............. هانى فى نومو وثباتو
الفراق عاشو أعتيادى..........ما مهم موت أمنياتو
كت مخلص وافى راتى....... كت بغير لو نسمة جاتو
حبى تشهدبو أغنياتى........ شوقى تسعدبو أمسياتو
لما ألاقى أشوف سعادتى.... لما يبعد أحس غلاتو
فى غيابو بشوفو آتى......... وأبتهج فى يوم لماتو
كونو فات وأختار بدالى....... كل زول حر فى حياتو
ألا فى الخاطر سؤالى....... كيف خطاوى حداى يتاتو؟
قلبى لو نادى آ وصالى.....من كلامو أخير سكاتو
لو هو واعظ هام فى حالى .... قلبى فى غنى عن عظاتو
يانى ذاتو السابنى أقاسى...... والغرور كان من صفاتو
لجت ما لاقى المراسى...... والغرام حاضر وفاتو
كان ياريت يا الكاتلو حاسى... كان قريت أحرف وصاتو
البيكتل ويبقى ناسى ....... ما بتعذبو ذكرياتو
ياهو دا الكره مشاعرى..... دون سلاله آدم بناتو
ياهو دا الجرح خواطرى..... وأمسى بالظلم أنتعاتو
يانى أنا العطشت أزاهرى.....وغيرى ينهل من فراتو
عينى ما بتحمل فى حاضرى.... تانى قلبى تشوف شتاتو
مابتكون(سامرين) أحاجى.... ولا بعيد يوم أحجياتو
ومهما كان أنا ليلى داجى...... الصباح يسرق سماتو
أصلى منو أنا مانى راجى.... يكفى فيا زمان سواتو
سيرتو أسباب انزعاجى...... حتى كرهان أغنياتو

بشرى سليمان الحسن
02-22-2010, 08:30 AM
أنشاء الله ما يصيبك ندم شقيش مشيت ساقت خطاك
روح خلاص خاطرك معاك
دنياك ما عرفت فجر ما بين غرورك غاب ضياك
كمل معاك حد الصبر وماتت معانى الريد فداك
صدقنى ما داير عزر أرضانى فتنى بى رضاك
وفى الدنيا عندى أنا كم عمر لامن أضيعو فى هواك
دايرنى أشيل الشوق وأجيك وأقولك أرجع يا ملاك
وأعشق متل ما كان عنيك ومن تانى أتحمل قساك
أبدا متل ما هان عليك الريد وقلبك ما نهاك
مات للأسف أحساسى بيك ومانى القبيل عاشق بهاك
خاطر الامانى الأنجرح طوع عناد قلب أصطفاك
قسيتو قلبى قدر ما ألح من غبت لا اشتاق لا اشتهاك
ما دام ضميرك ليك سمح تنسانى فى لجة جفاك
نسيان هواك يبقى الأصح وأتقبل الهجران جزاك
ما عدت أستنى الرعد برق الأمانى مطر سماك
سرانى أنك أبتعد من فت قلبى ولا طراك
بتمنى ليك بعدى السعد لكن دنايا أنا ما دناك
باكر وراك يشرق لى غد ويطرد صباحى أيام دجاك

بشرى سليمان الحسن
02-22-2010, 04:30 PM
أنا ما بخت الشين وأصبح سراب قدامك
برحل مع الراحلين مجبور أفارقو غرامك
ورينى وين الصيد لامن تلاقى سهامك
وأنا قلبى كان صنديد لكن هزمنى مقامك
ديل فرقو القلبين ما راعو حبى هيامك
تشكى العذاب لى مين كل الخوق ظلامك
عشت أنتظار (سامرين )ما بين شقاى وآلامك
بعد العديل والزين ينتم مرادى مرامك
خابت ظنون مسكين وضاعت معاى أحلامك
وأتيتمت (سامرين) قبال تشيلو وسامك
ما أنت نور العين وأنا قلبى يوم ما لامك
مكتوب على فى الحين يمسك سواى أعلامك
لكن هواك دفين يالفى الثريا مقامك
والدمعة ما بتعين لاتبرى فيض أوهامك
أنت العفاف والدين معروف عليهوصيامك
والناس يفرقو أتنين ما ديل ليك أرحامك
والراجى لى سنين ودعتو عشان هندامك
لا يندثر فى الطين والناس تجرو ملامك
ريدنا اللشبه جنين طلاه أريج نسامك
ما بنلقى ليهو وزين ألا القسم وأقسامك
لا تمدى لى أيدين عينك توحى كلامك
قوليلى الله يعين للدنيا أدى زمامك

بشرى سليمان الحسن
02-23-2010, 09:01 AM
صدقنى فى ليلة الزفاف أنا باكية بالدمع التقيل
ماناسية للعهد القبيل
ورينى كيف يسعد قليب زفوه بالنوح والعويل
بين التباريح والحزن عايش سهاد ليلى الطويل
أعزرنى ياعشق الخلود مابيدى أخترت البديل
أختارو لى أهلى الكبار منعول أبو المال البحيل
أنا كت دايراك فى اليمين والدارة طربانه وتميل
فى الحنة والزين والضرير قايدنى للشبال تشيل
ألا الأهل حرمو القلوب من فرحة العشق النبيل
الفى كتاب جابو النصيب لاقيهو بالصبر الجميل
ماناسية أيامنا المضن من كاسا نشرب سلسبيل
لقيانا نجوانا الزمان بين الأزاهر والنخيل
كيف أنسى زولا صان هواى ضالينى بى ضلو الضليل
ذكراك دايما فى القليب أنساك ثامن المستحيل
عازراه قلبك لو يلوم قبلانة لى همك أشيل
أنت المنى وطعم الهنا جانى السراب كت لى نيل
أيامى بعدك بقت أفراحة أبعد من سهيل
يا حليلى من واحات هواك عينى تانى تقول حليل
أسفاى على بيت الحلال لا فيهو فرحة ولا عديل
أسفاى على السعد الرحل فارق بروج صوت الهديل
أسفاى على النغم الحزين الباكية دمعاتو وتسيل
أسفاى على الولد البكون من رحمى ليهو سواك كفيل
سأل الله يديك النعيم من زحمة الأفراح تكيل
ينزل عليك غيث السحاب ويخدر اليادوب شتيل
أنا سيبنى لى ألمى وبكاى أحزانى ما ناوية الرحيل
ما بين لهيب ذكراك أنوح أندب حظوظ قلبى العليل

بشرى سليمان الحسن
02-23-2010, 02:19 PM
يامن زرعت الشوك فرشتى للأقدام
الدايرة لى قلبى تلقيهو لى قدام
أنا كم هويت عينيك وريتم أحلى كلام
خبيتو من الناس خايف من النسام
ضاريتو من العين فى الصيف بقيتلو غمام
وكان فى النهايه جزاى أنو الزواج أقسام
أنا كم زرعت الريد فى واديك هب وقام
وسقيتو من دمى وراجيهو عام فوق عام
حصدوه كان الغير بعد الفراش الحام
كان ردك أنت على فرقتنا الأيام
أيه ذنبى عشان أزرع وأحصد دوام آلام
كل ذنبى أنى هويت علق عليك أحلام
سارح مع الدوبيت عيشتى فى الأوهام
كان فى الختام حبى حاكمتى بالأعدام
خلينى من حبك من قلبك الظلام
أنا شفت فى عينيك الكون دا كلو ظلام
مغرورة بى نفسك قايله الجمال أجسام
لالا الجمال زايل وين شفتى خلد ودام
أنا كنت مفتون بيك بى ثغرك البسام
ناسى أنو خافى وراه كاسا محرم وسام
صابر شربتو كتير مغموم قليبى وهام
راجيك لو تعرف ترجعلى يوم تتلام
ما حواء والدة كتير بنوت جمال ومقام
ياما بلاقى قلوب تسقينى ريد وهيام
لكين بدور أوصيك ماتشيلى تانى حسام
ترميبو زول بهواك ياما عليهو سهام
مركب نجاتى خلاص فكاها قيدك وعام
وأتحده للأمواج بيصارع الهدام
قلبى الضعيف بدرى الليلة صار ضرغام
لميتو من أشتات ما أنتى سبتى حطام



ملحوظة
لكل من يريد أن يتواصل مع الشاعر أليكم رقمه 0121182297

بشرى سليمان الحسن
02-26-2010, 12:56 PM
قلبك بالتعب يتبكى فوق كتف الشعر ينجمه
حدما قلتى جرحك يبره تفتقو من جديد النمه
تشكى من العليك والبيكى قلتيلى السبب من يمه
وقفت بينى بين محبوبى ماخلت مرادى أنتمه
كفنت المشاعر الحيه والقلب والوقع ماسمه
ينزف والجراح مفتوقه مقيود بى ذمام الأعمى
يا متضاريه فى ماضيك حكمه النور يعقب الظلمه
أمرقى من بطون الماضى فى الحاضر تلاقى البسمه
مهما طال زمان الظلمه لابد من تروح العتمه
ترحل دنيتك بأحزانه ويتألم القبيل أنسمه
أمك يالرقيقه بسيطه بين أيدها سبل الرحمه
ماعارفه المشاعر الساميه من كل الموانع أسمى
تنسج وراجيه يوم تكسيك لكن باليه كان الهدمه
أتلفحتى كايسه رضاها والنار فى جواك بتحمى
وين حلم الزفاف وطقوسو والحنه الفى أيديك مرتسمه
ضاع من بين أيديك فى غفله وأنت مع هواك منسجمه
جرحوك والدموع هطاله بيك خلق الله مامهتمه
خلوك فى اللهيب بتضاضى بين سهر الضياع والحمه
فوق نارك ممدده صابره أمك ليها حق الكلمه
كلمته أنت تحى وحيده والشمل أصلو ما أتلمه
صوتك فى جواك ينادى يامحبوبى أنت النجمه
بعدك تانى درب الريده بينى وبينو الحرمه
حرمان بالتلاته على غيرك لو سكونو القمه
أرضى أنا راضى بالمقسومه الرضا بالمقادير حكمه
والوالد حقوقو علينا مهما سوى مابتذمه

القروني
02-26-2010, 06:23 PM
السلام عليكم

مشكور الأخ بشري سليمان علي مجهودك ونثرك لدررشاعرنا المرهف ياسروإن شاء الله تواصل وتمدنا بالنفيس والغالي ونحن مستمتعين بهذه الروائع العطره ..


ولك وشاعرنا كل الود

بشرى سليمان الحسن
02-28-2010, 03:04 PM
أسمحلى بكلمة واحدة بيها أعبر عن شعورى
وخلى كل الباقى ليٌا بكره بفرشليك زهورى
أسمحلى أقول أحبك فى غيابى وفى حضورى
وأدلق الأحلام فى قلبك وأوفى فى حبك نزورى
خطوة خطوة إتعمقينى قوصى فى أعماقى غورى
طاوعى حسك وكلمينى خاطرى الجواك ثورى
أسمحيلى أشوف عيونك وألقى فيها أسباب سرورى
داير أخبى أشواقى فيها كونو تفصح ما ضرورى
الضرورى أكسب رضاها وجورى يادنيا إنتى جورى
ما رضا الناعسات أملنا يا أمل عمرى ودهورى
كلمة من إحساسى صادقة تبقى ليٌا جواز مرورى
لى مدن كت بيها بحلم وفيها تطاول قصورى
يبقى قصر أحلامنا جنٌه بين رياحينى وعطورى
فى رحابو الحب يغنى يللا رفرفى ياطيورى
الغياب ياجارة طول لامتين ياالروح تزورى
لهفة الشوق فى إنتظارك بين ظنون فرحى وحبورى
عين بنات أفكارى سقدى وليل جفاك ودرلى نورى
راجى للأيام تعدى سلحفاء الهم شهورى
عينى للشاطى وألوح زى عطيش الموج فى طورى
لو عينيك ما راضية تسمح فى عوالمك كيف ظهورى
خايفة قول الناسي يجرح وخافية ضيٌك يابدورى

بشرى سليمان الحسن
03-03-2010, 02:05 PM
لانى راجع ليك تانى ولانى سأل تانى عنك
صدقينى قنعت منك
ياما كان عشتك أمانى والعيون فى الشوق لقنك
إلا كان خيبتى ظنى عمرى ماخيبت ظنك
إنت كت سحابه عابره والعيون أزمان رجنك
مارونى أنا غير دموعى قولى هل فى يوم رونك
ياأمل ضايع رجيتو طول سنينى الإحتونك
ياحلم عابر مودع جن عيونى يودعنك
يامشاوير قصدى تسعد حافى والخطوات مشنك
إلا خاب أملى البنيتو وفيه كان صنفت فنك
ياخسارة ريدى ليك وعشرة أيامو الحكنك
والسنين الضاعو قربك كت عشمان فيهو حنك
إلا ماعشمتى قلبى وكم عيونى أنا عشمنك
كم هدنٌك ريده طاهره ودون بنى الإنسان هونك
للظنون سلمتى ريدنا والظنون كيف يخدعنك
ياالفقدتى دروب سعاتك الدروب كم يفقدنك
تانى عزت نفسى تمنع الرجوع للذكرنك
وأنسى زى ماقلبى ناسى ما عيونى خلاص نسنك

هشام
03-04-2010, 05:51 PM
أولا أحيي ناس العرب كلهم
التحيه لك الأخ بشرى وأنت تتحفنا بهده الروائع للشاعر المرهف ابريده
تحيه خاصه لي صديقي ودفعتي ابريده


هشام سرالختم

بشرى سليمان الحسن
03-06-2010, 02:11 PM
ضاقت حناضل المر معاك بعد العذاب إنطلقت
يادوبه راقت وروقت
زى زهرة كانت فى الرياض فايح أريجة وأورقت
شربت من أنهار الحنان تيجانه دوبه إتفتقت
جيت أنت فى غفلة زمن عصفت رياحك وأحرقت
فرّن طيوره من الغصن لاغرّدت لاشقشقت
سرقوها من نور العيون دفنت قليبى وفارقت
جبروها تصبح زوجة ليك مجبورة يوما الوافقت
ضارت عذابه من الخلوق دست دموعه إنتاوقت
مسحت دموعه من الخدود بأحزانه صابره إتجرتقت
لفيته بى ثوب الظلام غابت شموس ما أشرقت
سهرت تنادى على الصباح كم للنهار إتشوقت
لولّت عويناته النجوم فاضت ديمعاته وسقت
من شدة الحزن الدفين أناته مابتطلع بقت
مُنيته ياقاسى الطلاق يكفيها كم عانت شقت
حد ماتضمّد للجراح تلقاها تانى إتفتقت
عيّشتها العيشى النكد فى آفاق فراقك حدّقت
ورينى غير حسرة ودموع ياقاسى إيه منك لقت
أزمان تفتش فى الفراق بارت دروبوا وساسقت
بعد العذاب الطال سنين تمّه الطلاق ماصدقت
يادوبا حست بالفرح بارت سعادته رافقت
بعد إرتحاله على الجفاف صبت غيومه وأبرقت

بكرى مجذوب خطيب
03-07-2010, 05:30 AM
تندلق كل الأحاسيس الطيبة وتتدفق حول ( البركل) الذى أرضعنى قرض القوافى والتحية موصولة لاسرة المرحوم , محجوب جعفر و على رأسهم الآخ العزيز/ بكرى الخطيب
(أخوك الاصغر ياسر أبوريدة)
اخي العزيز بشرى سليمان
يا اخي لك العتبى ولك من الشكر ما ان يعجز اللسان عن نطقه .
تحية ثانياً ومعذرة الف على التاخير ... تصدق لم ارى هذا البوست الا اليوم من شهور عدة
يا اخي شكراً
شكراً شكراً
شكراً شكراً شكراً
شكراً شكراً
شكراً
وياسر ابريده كما اسلفت ظلمه الاعلام كثيراً وظلم نفسه
والتحية للشباب البركل والقرونى المتذوقين للفن والادب

بكرى مجذوب خطيب
03-07-2010, 05:32 AM
أولا أحيي ناس العرب كلهم
التحيه لك الأخ بشرى وأنت تتحفنا بهده الروائع للشاعر المرهف ابريده
تحيه خاصه لي صديقي ودفعتي ابريده


هشام سرالختم
الاخ العجب
وديتها يمين وشمال ما عرفتك ياخي نحن كوامر ساكت وذاكرتنا شاخت بل صدأ عديل
تسلم على المرور
ونواصل ....

بكرى مجذوب خطيب
03-07-2010, 05:36 AM
السلام عليكم

مشكور الأخ بشري سليمان علي مجهودك ونثرك لدررشاعرنا المرهف ياسروإن شاء الله تواصل وتمدنا بالنفيس والغالي ونحن مستمتعين بهذه الروائع العطره ..


ولك وشاعرنا كل الود
وانا ياضاُ ياقروني مستمتع مع بشرى ومنون له كثيراُ وتسلم انت من تتذوق الشعر وياسر ابريده به ملكه شعريه لا يعلمها الا من يتذوق الشعر الرصين والمعبر عن احاسيس شاعر مرهف لا يقل عن انداده ودمت بعافية يا قروني
ونواصل

عبد الله السر ابو النور
03-07-2010, 08:01 AM
والله يا ابوبكر الاخ ياسر من اعز اصدقائى ....وهو شاعر وانسان نعجز بالكلمات ان نوفيه حقه

بشرى سليمان الحسن
03-08-2010, 03:09 AM
بعد مازمنك قسابك عرفتنا نحن أحبابك
تعال وريه إيه جابك
كيف بعد الضقتو منك أعود تانى أقول حبابك
إنت براك النسيتنى ولا وريتنى أسبابك
زمن وأزمان كت تأمل أحضر لى يوم خضابك
قتلت العشم الجوايه وبريتُ غرورك وإيهابك
مشيت فى سكة ظنونك تعال قول لى وين مشابك
تراه سقاك الحناضل بعد ما معسل شرابك
تصدق من فته دربى رجيتو كتير يوم إيابك
رجيتك وطال بى زمانى زمانك يادوبو جابك
بعد ما إجتدبت رياضك سماك مطران كاب سحابك
محال الشوك يبقى ورده ولا ح يخدر يبابك
دموعك ما أظن ح تجدى ولا راح ينفع تسابك
قبيل إخترت غير دربى وحداى كان سديتو بابك
مشيت فى سكة غير دربى وعقدّت وكاتبين كتابك
قايل المال ليك سعادة تراك شرب من سرابك
رجع من تانى ليه لىّ بعد ماطال إغترابك
مشيت يوم شايل أفراحك رجع صديت يوم عذابك
بشيل همك فوق عذابى عشان مابحمل عتابك
مناى تلاقى السعادة تودع زمن أكتئابك

عمر الصول
03-14-2010, 07:19 PM
بكري سلام... أشعار ياسر البحث عنها مغناة اسهل لان الاخ ياسر كسول وأجمل لأن اشعاره يقولها ملحنة ولك صافي ودي

بشرى سليمان الحسن
03-16-2010, 06:55 PM
لدغة فحيح رعشة إيديك يا دامعه راجفه مصافحه
بتقولى لى مبروك عليك غلطانه طالبه مسامحه
كان حبى ليك غلطة عمر أسعدنى إنى أصححه
لو ما الله ألهمنى الصبر جرحك عواطفى يقمحه
ما أنا لانى قدرك لاك قدر أحداث أحاسيس جامحه
عزراً لقينالك عُزر أختى وقلوبنا مسامحه
أختى ومرارة الذكرى غمّ شمسك غروب متراوحه
كيفن صباحك من عدم عشم أمنياتك أضرحه
مابيجدى ياظالمه الندم ولا دمعه منك فاضحه
يا الكان هواك ذلة قدم صفقة فراقك مربحه
يا غصة الماضى الأليم هردت قليبى مشارحه
يا قصه شيبت الفطيم قبال أحاول أشرحه
يا صفحة الليل البهيم أنزف جراح وأتصفحه
يا نار بتحرق فى الهشيم والريح تضرضر لافحه
بتباركى إيديك إرتعاش زافى التهانى مصالحه
نفس العيون والإندهاش بتهنى كانت جارحه
بعد المحل جانى الدعاش زهرة هواى مفوحه
والواقع المفرح معاش دا حصاد صبر يا جامحه
متمنى زى يجيك سعد والفرحه تلقى ملامحه
عارفانى مابعرف حسد كل زول بيجنى الناقحه
على أيه حياة الناس نكد وأفراحه فارده الأجنحه
ويا اللى مباركه وماده يد غسلت مدامعك بارحه

بشرى سليمان الحسن
03-25-2010, 03:20 PM
منحتك فرحتي وضعت لقيتك في الخدود دمعات
حلفت عليك ماأندم ندمت علي زماني الفات
أنا القايلك قبيل شمعه تخلى الليل وجيهو صبوح
لقيتك للأسف دمعه تمهد لى عذاب الروح
رحل منك بلا رجعه وجواى صرخة قلب مجروح
فقدتك وروحى مقتنعه ومشيعه عينى حبى المات
تصدقى ما لحق صدق مجرتقه إنت سايره عروس
ونشف عرق الهوى البتق فى أطيب أرض مغروس
غريبه نقول زمن فرّق ونحنا الللفراق بنكوس
تسيل دمعاتنا تندفق وكيف بتغيرنا يوم دمعات
معاك زمن الفرح تواه فقد درب الزمان الزين
وأريت الماضى لو تنساه يكون قدامنا صبح الحين
عذاب قلبى اللحق بكاه قساوتك وإنتظار (سامرين)
حلم كان للأسف عشناه حصادى المنو دمعه شتات
عيونك كيف علىّ تقسى وأنا العلمتها الأشواق
قليبك كيف يجور ينسى ويسيبنى أنا فوق جمر حراق
وحيد خلانى دون مرسى أقاوم فى زمن فراق
وعايش فرقتك هسى وكيف أحوالى فى الجايات

بكرى مجذوب خطيب
03-28-2010, 09:23 AM
[quote=عبد الله السر ابو النور;151540]والله يا ابوبكر الاخ ياسر من اعز اصدقائى ....وهو شاعر وانسان نعجز بالكلمات ان نوفيه حقه[/quot
يا جنًى... انت هؤل .....تاج السر حسن ابوالنور ان كنت كذلك... فسلام كبير للابوك واعمامك كلهم جميعاً واخوالك
نعم اب ريده كذلك وبما انه صديق ليك لحلحوا شويه
وتسلم
ونواصل ....

بكرى مجذوب خطيب
03-28-2010, 09:26 AM
بكري سلام... أشعار ياسر البحث عنها مغناة اسهل لان الاخ ياسر كسول وأجمل لأن اشعاره يقولها ملحنة ولك صافي ودي
عمر سلام وياخي متاسف جداً ما رديت لك سريع
وهذة صفة اخري لياسر وهو فنان كامل
ومن الصعوبة ان تكتب وتلحن ... و ياسر اب ريده كامل له التحية والتقدير
ونواصل

بكرى مجذوب خطيب
03-28-2010, 09:27 AM
اخونا بشرى
واصل متابع ...مع تقدير واعجابي

بشرى سليمان الحسن
04-12-2010, 07:06 PM
إنت فوق جمر الإغتراب ونحن راجنك بالسنين
لامتين ترجع يالخزين
ياما ناس من دون إغتراب فى بلدنا حنان وأمنين
والوطن ما أظنو بنقاس لابيقارن بالملايين
كم ولادك لى بإلحاح يمه أبونا بيرجع متين
إنت عارف الشوق أذاهم والعجب من شوقا (سامرين)
نحن لا ديرين الحرير لا الدهب نملابو إيدين
ليك محتاجين يا ضراى دار نشوفك وتسعد العين
شوف علينا الليل ياما طال للصباح بالنوح ملاقين
الولاد راجنك تعود وقلبى ليك مليان بالحنين
كل ما نطرأ إيامنا المعاك الدموع تملأ المغلتين
وكم يجينا العيد بالحزن والخلوق غيرنا معيدين
أرجع آ شيال التقيل أبقى لينا الضل للعوين
شوفتك إنت بتشفى الجراح وتسعد الخاطر الحزين

بشرى سليمان الحسن
04-14-2010, 02:38 PM
حزرتك زمان ياقلبى من ريدة الغريبة طقوسه
تتهادى وتشيلة قلوبنا فى يوم ما بتبقى عروسه
الضقتو إنت بدرى شويا لو الناس تفيدة دروسه
زازيت فى دروب الرايقه حافى الجمره راضى تدوسه
حارس زهرته الراجيها فى أطيب أرض مغروسه
إتمطق سواك ثمارة من قمحك جنيت الروسه
مالك يا قلب شاغلنى كل ما تشوفلك إنت إنوثه
تسرع فوق دريبه تشابى شقيش ما مشيتبى تكوسه
تعتر ما بتفيدك عتره لا حتى الخطى الملهوسه
ناسى إنو الشباب ولّلا والأيام بتنقر سوسه
الشى الجد محير روحى ليه خلق الله هاينه نفوسه
بإسم الجمال والقدله تيبان الغرام ملبوسه
زولتك فى الثريا تشوفه قمره وبالنجوم محروسه
توزنه بالدهب ياحسرة تطلع للأسف فاروسه
إياك من تقولى الريده واللا مشاعرك المحسوسه
والله الشوق عليك ويلاتو نارك ديدبان مجوسه
زمن الريده ماهو زمنّا يا الناس البقت مهوسه
ما قاسى الغرام ودروبو ما دام بالعروض مقيوسه
تقل يا قليبى عليك وذد من حالتك الميؤسه
عشان إنت البراك إخترت ما تقولى الحظوظ منحوسه
أشبع فى النحيب والحسره ما دام بإيديك معيوسه
وأغرق فى بحور الوجعه ياريت فى إيديك عصا موسى

بشرى سليمان الحسن
04-24-2010, 02:46 PM
مالك يا خالف الوعود فى الخداع شايل الأوسما
كيف قتلت الحب النبيل قلبى بى حبك كم سما
كنت قايلاك حصناً منيع لما بيك قلبى أحتما
كنت فاكراك نبع الحنان لما أجيك تروى من الظمأ
إلآ جيت لقيتك سراب فيك جد كت متوهما
ماتت الريده الخدرت حتى ما جيت تترحما
وين قصور أحلامنا العراض الزمان كنا بنرسما
مالا ضاعت وصبحت خراب بين أياديكا محطما
أبنى فيك الآمال بالسنين وإنت فى لحظة تهدما
يوم بكيت صدمة هواك ما قدر روحى ألملما
ظنى أغراك أنو العيون بى هواك هايمه ومغرما
إنى شلتك أنبل شعور ريده عينّى تترجما
قمت جرّت طعنّت القليب بى سيوف حاده مسمّما
قصدك إنى أنوح النهار والليالى أحسب أنجما

بشرى سليمان الحسن
07-23-2010, 06:57 AM
غلطتى إتخيل مشاعرى لى رحيلى حداك جوازى
وإمتطيت صهوة عواطفى وجيت قاصدك يا ملاذى
ديل تلاتة سنين معاك فوق دريب الريده أزازى
كل حدود القبلى عشقو يا شقاى كان إجتيازى
ما محق صبرك حنانى وكت فى الصبر الحرازى
إرتضيت قلبى البريدك إنت بالنسيان تجازى
يعنى إشان أخلصت ليك تبقى يا قاسى إنتهازى
تقطع الصله بين قلوبنا ويبقى طير أحلامنا فازى
أتارى حبك كان ضياعى وكان قليبك بيه هازى
مره أسأل يوم عيونك يا عيون كيف ترضى تأذى
غلطه يوم جيت عيونك ويوم هواك لى قلبى غازى
شلتو حبك فى قليبى وبى هواك فرحى إعتزازى
بين إيدى ميثاق عهودنا وريده كل الكون توازى
كان ضياع الحب مصيرى وجيت منك بالتعازى
وكيف نشف مده المحنه السقيتو غيوم رزازى
كيف يضيع عشم الخوالى ويا العليك كان إرتكازى
كيف يثق فى الريده قلبى فى حقيقتى وفى مجازى
ما الغرام يبقالى تانى بينى بينو خطوط توازى

بشرى سليمان الحسن
07-24-2010, 03:34 PM
يا أجمل عيون عايش فى حماهن
ترتاح النفوس فى حضرة لقاهن
الجفال نفور حين صادف لماهن
إحتار فى الرموش سارح فى مداهن
إرتاد الخيال لو يملك صفاهن
لو العُمر طال يقضى وقوف حداهن
وافرات الوصال قلبى قتيل هواهن
راميات بالنبال صياد ما رماهن
كاحلات دون دلال مرعوجات أراهن
حافاهن ظلال ذايدات من بهاهن
من فوقن هلال إذدان بى سماهن
حافيهن قمر غامر كون ضياهن
بى سحر الصبا الوهاب حباهن
أداهن بريق ما والف سواهن
مقيود بالأمل قاصد جيت رباهن
أحقق للمُراد وكل أحلام صباهن
معلول ما أظن أحمل يوم جفاهن
قلبى الفى المنام ما غبه ونساهن

بشرى سليمان الحسن
07-30-2010, 08:34 AM
أمال رويناها وسقيناها وسحاب يوُشل وشل
أعوج عليك كيف بين إيدينك تنقتل
يألأغلى من عينى على ّ يا روحى ما إنت الأصل
بيناتنا ميثاق الهوى بالله كيفن تنفصل
لا حسره لا دمعة فراق كفنّت حبنا مُرتحل
لو عندى كلمة أقوله ليك شقيش تقبل تنعدل
أحلامى يا المحبوب معاك كيفن بدونك تكتمل
أشواقى تترغب لقاك أفراحى تحضر يوم تهل
عارفنى ما بقدر بلاك وأنا خوفى من بعدك إختبل
مشكلتى فى كل يوم هواك يا الغالى يكتر وما بيقل
غرّقت عويناتك جراح ما أظن بلاك تندمل
ما لىّ غير قربك نصاح كل ما تطيب بُعدك يعل
يا حليلى يا أملى اللراح من حى والشوق مشتعل
وأنا يا شعاعات الصباح فى كل يوم راجيك تطل
عود من غياباتك تعال لملم شتات قلبى الهمل
راجيك فوق جمر إشتعال لا عمرى ملّيتا لا بكل
ليل السهاد يا غالى طال ما عُدت للفرقه إحتمل
عود من جفاك شدّ الرحال أبرا المشاعر ليك تدل
وين راح حنينك والوداد الكنّا منو بننتهل
ضيعتو وإخترت البعاد جاهرت بالفرقه وقبل
نادين عليك أرجع لى صاد من تانى يتلمّه الشمل
يكفيك صدودك والعناد باب الوصال كيف يتقفل

بشرى سليمان الحسن
09-07-2010, 06:54 PM
أنا ريدى يا نور العيون ما أظن خيال يتخيلو
علشان هواك قلبى الرهيف فارق شمالو(وبركلو)
ما كان منى خاطرى الجريح أسلك دريب البرحلو
قاسى الزمن يوم ساق خطاى قاصد قليبى يبهدلو
شوف قلبى جنبك ومشتهيك وإنسك الأيام حلو
وفى بعدك الصبح المبين وليلاً طويل ما أليلو
قمرى العلى الأرياف طلع للناس شعاعو بيرسلو
حزم المهدل فى الكتوف آسر البجوك يتشبلو
البسمه برق القبلى شال لهجك رطب ما أعسلو
أما العيون ترمى وتصيب كل البشوفن تتقتلو
صدقنى فى أرض الشمال الناس عليك بيسألو
حتى البقوقن فى النخيل مابين جريدو بيقدلو
عاشقنك آ سيد الجمال بى نار غرامك إنصلو
راجين رجوعك للديار دربك ورود ليك يشتلو
حبى الغزال العاش نفور حسنك وقف إتأملو
متمنى لو يملك عينيك كان دوب يحقق مأملو
الورد غار من وجنتيك جافا الفراش ما غازلو
تاريهو جايل فى بهاك لا عرفو آخر لا أولو
العمر جنبك يا حبيب أصبح ربيع ما أجملو
فوّح عبير وعبق شذى رائع جميل فى مشتلو
يا حسنك الأسر القليب بى قيد غرامك كبلو
متمنى أشوفك فى الزفاف آخر المطاف يوم توصلو

بشرى سليمان الحسن
09-13-2010, 05:35 AM
قبل ما نحنا نتفارق قبل حتى الفراق يحصل
تعال يا نور عيونى وطل تعال ودعنى قبل أرحل
حبيب نور لياليا إشان بعدك نهارى أليل
فراقك بكا عينيا وطمح فيض الدمع غسل
براك عايشت ما بيا وراك قاعد لى فوق مرجل
معاك وفكرت فى الجيّه وبقيت للرجعه أستعجل
حبيبى الدنيا من دونك تكون لا مُنيه لا مأمل
وأكون يا روحى مجنونك وأريت بى قيدك إتكبل
مجاذيب طبى فى عيونك وقت فوقا الرمش أسدل
وجنونى أجارى فى كونك وأريت طول الزمن أخبل
تعال يا الفى الجمال وافر يمين كفا الخلق فضل
تعال يا دهشة الخاطر عشان بى نظره إتكحل
رؤاك زاد البقى مسافر وفى النظره القليب عول
تعال ودعنى إشان باكر عليا الخطوه تتعدل
بدور أكسب حبيبى رضاك عشان خاطرنا ما تزعل
قدر مكتوب أفوته رباك وألاقى الدنيا صى ومحل
حبيب روحى عهدى معاك أعودلك حتى قبل أوصل
بسابق الجاب عرش بلقيس وقت ليهو الخليل رسل

بكرى مجذوب خطيب
09-14-2010, 10:29 PM
إنت فوق جمر الإغتراب ونحن راجنك بالسنين
لامتين ترجع يالخزين
ياما ناس من دون إغتراب فى بلدنا حنان وأمنين
والوطن ما أظنو بنقاس لابيقارن بالملايين
كم ولادك لى بإلحاح يمه أبونا بيرجع متين
إنت عارف الشوق أذاهم والعجب من شوقا (سامرين)
نحن لا ديرين الحرير لا الدهب نملابو إيدين
ليك محتاجين يا ضراى دار نشوفك وتسعد العين
شوف علينا الليل ياما طال للصباح بالنوح ملاقين
الولاد راجنك تعود وقلبى ليك مليان بالحنين
كل ما نطرأ إيامنا المعاك الدموع تملأ المغلتين
وكم يجينا العيد بالحزن والخلوق غيرنا معيدين
أرجع آ شيال التقيل أبقى لينا الضل للعوين
شوفتك إنت بتشفى الجراح وتسعد الخاطر الحزين
والله يا بشرى ياسر هبشني في اللحم الحى ذاتو
تسلم وواصل ومقدر لك المجهود الجبار
ونواصل .....

بشرى سليمان الحسن
10-18-2010, 01:53 PM
ودعونى وقامو فى درب السلامه
ودعونى وشالو من العين منامه
مابطيق لو لحظه بُعد الودعونى
ديل ليّا أملى وحياتى وكل كونى
يازمان الفرقه ليه خيب ظنونى
وليه يحرم روحى من ريدا وهيامه
يارفيق أحلامى كيف سافرت دونى
كيف تسيبنى وراك فى خوفى وظنونى
شوف ليالى الفرقه بعدك عذبونى
وشالو من عينىّ حتى الأبتسامه
كم نجوم القبله بعدك سامرونى
وين صباحك ليّا نامو وسهرونى
العذاب والفرقه بعدك ضيعونى
ومن منابع الفرحه طال ياالروح صيامه
قلبى ما ناسيك يامصدر فنونى
ما إنت شوقى وريدى وأخلاصى الغشونى
يا مواسم الفرقه شوفتك ليّا عونى
ما إنت عارف روحى فى إيدك ذمامه

بشرى سليمان الحسن
11-21-2010, 09:22 AM
رايقة يا أشعارى وحنينى جيت أوادعك ودعينى
والدموع الماليه عينك برضو زيك ماليه عينى
الفراق مكتوب مسطر لا بيدينك لا بدينى
طالما الأغدار أرادت فى عيونك أحضنينى
يا منابع الفرحه وينك وذاتى ليك أنا تانى وينى
الظروف ساقت خطايا وباعدت بينك وبينى
رايقه عارف ليلى طايل يوم علىّ جارت سنينى
يوم يفارق الزول حبيبو يا دموع كيفن تعينى
يا سنين الفرقه حنك راجى منك تنصفينى
لامتين ألقى السعادة ورايقه ترجع تلتقينى
حاضره جواى ماك غايبه وين مشيت للعين تبينى
ما إنت أحساس الأمانى بالمشاعر محتوينى
بكره راجع ليك تانى يا فرح عينى الحزينى
بسعدك ويسعد قليبى وبى لقاك بتسعدينى

بشرى سليمان الحسن
11-26-2010, 06:17 AM
يا نخلة لو جيت ليك سأل ... يانخلة.....
خليتى ليه أرض الشمال صنقرتى وحدك فى هدل
يا نخلة ..... ...يانخلة
ما كنتى بدرى أم الجمال ليك فى الجمال معدوم مثل
راويك نيلك بالخرير ساقيك تشربى من عسل
الليلة تشربى فى الملح فى غربة من دون الأهل
وضالاك عمارات التجار ضو الشمس فيك مانزل
يا نخلة ..... يانخلة
ما جاك فلاح البكور شمر سواعدو على العمل
وُشل جبينو من العرق سنّد تقانتك زين عدل
منسية ما بين القلاع والطير بعيد منك جفل
حضنك بعد سرب الدباس فوقو الغراب يقدل قدل
جايك من أرض الشمال عندك رساله من النخل
معطونه بى غيم السلام من كل وادى عليك هطل
قالولك أرجعى للجروف للمنقة والدابو إنشتل
قبال تموتى بلا وجيع لا باكى لا دمعاً هطل
يا نخلة .... يانخلة
يانخلة حالك مابيسر يلاك نرجع يوم نصل
نلقى الزمان فاقدنو كان الطيبة والرطب العسل
نلقى الحبايب والصحاب بركلنا والنيل والجبل
آثار بعانخى وقت تبين بدر السعد يبقى إكتمل
يا نخلة ...... يانخلة
بت الأمىن اللولبى هاب بسيمه يداعبه فى غزل
يلثم طرف ثوبه ويقول أهلاً وسهلاً دار جعل
وشم الجعل فى وجنتيك يا يمة أسباب الحصل
ما أنا حالى زى نخلة هدل لو ماهو أكتر ما أقل

بشرى سليمان الحسن
10-01-2011, 06:21 AM
تضارى الشوق قدر ما تضارى ليك رمش العيون يفضح
صدقى عمرى ما لاقيتا زى رشرش عينيك أفصح
لهج عينيك يتوهنى أتوه أبرى الخيال أسرح
يوهجنى الهوى الجهجاه وهج ضى وجهك إتسلح
يهدهدنى وأنوم مرتاح مقابل صبحك الأصبح
فضح مكنون هواك قلبك مرق فى وجهك إتوضح
فتق نرجس صفاك حبك مروج يا خدرة الملمح
ملامحك نخلة البركل وقت دندح سبيطة بلح
سؤال يا سابلة الأهداب لو راحب العيون يسمح
جواب بيرح الأعصاب صعيب طب الهوى اليجمح
هل لهج العيون كضاب لو كان اللسان صرح
تعالى نعلم العشاق دروس من غير كتاب تشرح
نقول أنو الوجل ترياق وبيهو بناتنا تتسلح
خراب لو الزمن فراق يكون منظوم(حراب) أصلح
صلاحك يا شفاء سامرين وقت ليها الخلوق تجرح
مجرحه باكية خمسة سنين سنين من عمرى تتقمح
قبل إشراق صباحى يبين ورمشك يأسر المترح
سلام يا ناعس الأجفان أمان ليك القليب سرح
يصافح خدرة السودان يقالد بالسماح يصفح
وداع يا درة الأوطان وأريت لو شعرى يتصفح

بشرى سليمان الحسن
10-09-2011, 06:03 PM
يا ملاذات الهواتف ،، لما يهتف صوت يعزّك جاى من مدن السوالف
صحى أحزان المداين عز منامه
،،،،،،،،،،،،،،،،،،،،،،،،،،،،،،
جيت ليك والشوق مكمسد فى وهيد الا نتظار
جيت أسأل ،، كان لقيتك وما لقيتك
يا حليلك ،، يا مشاعر حان رحيلك قبل ما نوصل مرافى الآنتظار
،،،،،،،،،،،،،،،،،،،،،،،،،،،،،،،،،
المكاتب ما مكاتب ،، والبريدك جد يعزك ليك كاتب
النجوم عاشق عداده ،، ولى ليالى الفرقة حاسب
منو سال دمع القوافى ،، وعلم العشق الكتابة
وعلّم القمر الغرور ،، لما أوجز كان فى وصفك بأنبهار ضمه السحابه
وأختفت قبال أشوفه ،، ما فضل غير طيفك إنتى منى كان قبل الدعابه
و إبتسم فى لون مريح ،، كان زمان يحمل ملاذات الكتابه
،،،،،،،،،،،،،،،،،،،،،،،،،،،،،،،،،،،،،
ما حأسال عن رجوعك .. ليه ؟ لانك إنتى فيّه
إلا بسأل كيف هناك الحاله حاصله
والهتافات الجواك الليّه واصله بأحتيار تبقى القضيه
المعافى دّعاى يعافى ،،
وتانى ترجعى إنتى ليّه
تلبسى الثوب المرصع بالجواهر،، وتبقى إنتى الكان معانا وصاله وافى
وتانى تخضر القوافى
ويضحك المكتب ،، يغازل إنبهار الإنتصار،، لما تندمج المسافة والزمن يمشيها حافى
ويسلب الزمن الإراده

بشرى سليمان الحسن
10-15-2011, 07:00 AM
ظلمونى إشان فنان ،، ليه يظلمونى
نان مالو ما حسان ،، كان يمدح المختار الجانا بالقرآن
،، ،، ،،
ظلمونى عشان عبر ،، بالبيّا من أشجان
تهمونى إنى كفر ،، وصفونى بالشيطان
موهبتى جاتنى قدر ،، وأنا حامد الرحمن
للنعمة ما إتنكر ،، خلونى يا جيران
،، ،، ،،
من جيت سكنت الحى ،، أنا والحبيب تيمان
كان نور سواد عينىّ ،، حاقنى فى الشريان
لا لا تعوسو النىّ ،، وتولعو النيران
نار الفراق للكى ،، بُعد الحبيب حرمان
،، ،، ،،
كيف بالغصب يا ناس ،، يتفرقو الحبان
يتخدر الإحساس ،، ويبقى الحبيب زعلان
يا لعنة الوسواس ،، الخانس الشمتان
يوصفنى بالإفلاس ،، وأنا بالشعور غنيان
،، ،، ،،
أنا بى مشاعرى غنى ،، والعز ورثتو كمان
ما عيشت ثانية دنى ،، يشهد لى إى مكان
غنيت لى وطنى ،، عز الشعوب أوطان
بى دمى بى بدنى ،، أفديك يا سودان

بشرى سليمان الحسن
12-18-2011, 09:03 AM
مدخل قصيدة
فشكراً لى طلب رقمك
وعزراً ليك ولا إنطاول قصرت وصل مدار فهمك
أنا الفوق النجوم منداح أغنى عشان أشيل ألمك
وأنا الشاقى الليالى صباح وكت ليل السهاد قسمك
أذا رقمك يجينى كفاح أكيد بالغتى فى وهمك
ولو كان ذاتو عزرك صاح ما جافا المداد قلمك


ملحوظة
جديد ياسر أب ريده
وللقصيدة بقية ستأتى بأذن الله

بشرى سليمان الحسن
12-20-2011, 04:47 PM
أنا ما غدر إنت الزرعت الشك ضياع
إخترت فرقتنا ورضيت تكسر مسارات الشعاع
........................................
ستين شهر مرت على ريدنا المطاع
الشوق مطر وبروقو ما ناوية إنقطاع
إنت الأمر أمرك صبح عندك مطاع
جرت إختصر سكتنا بى كلمة وداع
......................................
أملى إحتضر ونفيتنى فى أخر بقاع
السوس نقر ما بين هتافات الرعاع
جرت أنا صبر صبرى المتلته ألفى باع
إتعس خبر فى يوم صدّ قلبك سابنى باع
.....................................
ضقت الأمر يوم ظنك الماظنى شاع
خاطرى إنكسر وغسلت دميعاتى الرقاع
قلبك حجر ياما الحجر بردو إندفاع
لكن أصرّ سوت ظنونك إجتماع
......................................
أنا ما غجر أنا بت ملوك أكلو السباع
ما حرف جر شان أبقى مجروره إتباع
يا من هجر هجرك رجعلك ياتو صاع
عيش الضجر ما أنا مانى شمتانى آ خداع
......................................
كاسى إختمر وشربتو مصدوم للنخاع
لو كان عمر كان عندى تبقى إنت الشجاع
دمعى إنهمر شفقت أطفال الرضاع
وحالى البسر شافوهو أيام قيل قاع
.................................
سامرين قمر ضاعت مع العشم الشراع
عزراً عُزر القسمة فوق حرف اليراع
الماضى أغر والحاضر المؤسف سماع
قلب إنفطر داعى ومجاب مظلوم وداع

Dr Salah Mohamed Elamin
12-21-2011, 11:44 PM
التحية لأخونا ياسر والشكر كله لاخونا بكرى

الشكر أجزله يا بكرى على هذا التوثيق الهام لشاعرنا ياسر ولد عمنا أحمد نعمان وخالتنا سعيدة وجدتنا وحبوبتنا عيشة حبوبة الكل
ياسر من اسرة كريمة وبيت سودانى عريق
كان عمنا أحمد نعمان رجلا طيبا بشوشا يقدر العشرة والجيرة يقابلك بكل اريحية ومودة وكانت خالتنا سعيدة لا تقل عنه وتزيد وهى شاعرة ووثقت بشعرها للاحداث والمناسبات والجيرة والعشرة الطيبة وكذلك لا ننسى أخوه محمد نعمان والذى عاش بامدرمان وأخواته امنة ونفيسة الطيبين الأخيار
وقد سبق أن وثقت لجدة ياسر أم أبيه حبوبة عيشة بت مرسى وتداخل الخال عثمان معى وقد أحببت أن أنقل التوثيق للجدة عيشة مرة أخرى هنا لكى نعلم الأصل الطيب الذى جاء منه الأخ ياسر


*حبوبة عيشة بت مرسى

كنا نقول لها حبوبة عيشة
واحدة من اعز نساء البركل ونساء بلادى
قصيرة بيضاء كبيرة السن
تمشط شعرها كاملا بدون مساير
طيبة بسيطة وقورة هاشة باشة
بسيط لبسها وبسيط بيتها غرفة وصالة ومطبخ وحوش صغير يسع اربعة عناقريب
ولكنها ثرية بحلو حديثها وجمال عشرتها لجيرانها
ثرية بمودتها وحبها لوطنها واهلها وجيرتها
ثرية بمعرفتها للناس وحسن التواصل معهم ومجاملتهم
كانت تعرف الشهور العربية وتذكير الناس بمواسم الطاعات والخير
كانت تعرف الشهور القبطية واهميتها لفصول السنة والزراعة
ويسألها الناس عن شهور الخير فيعرفون قرب رجب ورمضان والحج
ويسألها الناس عن الشهور القبطية فيعرفون مواسم الزرع والخير
وقد كان الكثير من الناس لايعرفون هذه الشهور فى ذلك الزمن فيعرفون منها
أمرأة مونسة لا تمل عشرتها
امرأة طيبة بسيطة ولكن ادت دورها فى مجتمعها
وهكذا كل فرد فى المجتمع له دور لايمكن تجاوزه

هى والدة محمد وأحمد نعمان وزوجته سعيدة تلك الشاعرة المفوهة

رحم الله عيشة بت مرسى واولادها وأولادها أحمد ومحمد وبناتها نفيسة وآمنة اللهم آمين

مداخلة الخال عثمان محجوب

عزيزي أبو صلاح
تحية لك وأنت توثق لأهل البركل الطيبين

حبوبة عيشة كانت حالة خاصة بالنسبة لنا فهي بالطبع جارتنا بحلة العرب لكنها كانت من أخص صديقات الوالدة بت الناطق رحم الله الجميع..
حبوبة عيشة أهلها البغاديد أهل ضمرة بغدادي وهي أخت رابح ود مرسي صاحب العربية المشهورة والذي كان يقطن شبا..
وتزوجها ود نعمان الذي هو من السواكرة وجاء بها للبركل حيث كان الناس يعيشون في بلد بي تحت قبل فيضان 1946 ثم طلعوا فوق..فأصبحت بيوت آل نعمان وآل شايقي والكراكرة وآل أبو النور وسط بيوت العرب في حلتهم والتي كانت فوق في الخلا في أول الأمر قبل مرور الشارع الرئيس أمامها...فكانوا جميعاً متحابين ومتواددين كأنهم أهل...

حبوبة عيشة كما وصفتها أنت تماماً..كنت تراها تمشي في حلة العرب بمنظرها المميز وكانت من أطيب الناس قلباً ومحبة لكل جيرانها وتختزن كماً هائلاً من القصص الشعبي وحكايات الزمان القديم..وفعلاً كانت تعرف الشهور القبطية والعربية فتسمعها تتحدث عن أمشير وطوبة والتريا التي دخلت البحر وخرجت....
وكنا نؤثر مجالستها ونطعم من طعامها البسيط منذ طفولتنا الباكرة...وفي أول الأمر كنت أحسب أنها قريبتنا لعمق الصلة بينها ووالدتنا...وبناتها آمنة زوجة سليمان ود البرير ونفيسة زوجة أحمد ود بغداد كن لنا بمثابة أخوات كبار..رحمهم الله
أما إبنها أحمد نعمان فكان من نجوم الحلة وكان نعم الجار وكان له حس كبير من الدعابة والونسة...وأخوه محمد نعمان كان مساعداً بيطرياُ في مستشفى أمدرمان البيطري لفترة طويلة حيث عمل في تفتيش اللحوم بالسلخانة وكان متزوجاً من حي العرب ثم سكن بأمبدة لسنين طويلة..
عيشة بت مرسي هي حبوبة الشاعر ياسر نعمان...

رحم الله حبوبة عيشة فكانت نعم الجارة والحبوبة