من قصائد الشاعر / سيف الدين محمد الامين

[ود القرير]

شفتِك انتي - لحنها وتغنى بها المطرب / ميرغني النجار بداية الثمانينيات)

شفتشك انتي ، إنتي بى ذاتك وصفاتك
وفيك شفتَ النيل بيجري وموجو كاسح
وصوتو يهمس ، وليْ يوشوش ، ويعزف الألحان يصافح
ومن صفا ناسنا البَساطا ن عدّ شال كل الملامح
وعدّ كاسح
وبى عيوني انا فيه سابح
وعقلي فات جواهو سارح
وما قدرتَ يمين أبارح
فجأة بى جمبي اتلفتَّ ،، وشفتك انتي
وفيكي شفتَ القيفة رابضي وفوقا متكابي الخدار
لوبي تابر خاتي تب قولة صفار
مال يهبهب كلّ ما جاهو النسيم بى فوقو مار
والجزيري ،، وحِس طويري ، وناس كُتار
جوّة غاتسين في الخدار
ناس يحشّوا ، وداكا يقرع ،، وديكي تزرع ،، وموية في انضر مسار
وحِسّ اهلْنا ن جوة في نص الجزيري
زي نغم أوتار يدندن ، مازج النيل والنضار

الجروف ، وطينا داك ، والعرق وكتين يصبصب
من جبين زولاً مكافح قلبو حار طوالي يلهِب
وبرضو في اعلاهو بسمة غاسلة لى كل البيتعِب
وحوض ملان بالمويي كاس ، جاري يحلب
ويجري يسرع ،، سدّ مويتو قعد يهبهِب

وانتي ذاتك واقفة شامخة
وفيك شايف كل صورة ، وروق نخيل مرصوص كتير
وداكا في النخلات يقفِّز وجاري بى تحتو الحفير
وقش مشتّت من حُمارة غادي فوق درب الحمير
والسبايق ،، والسواقي ،، ومنقة بذرة وكشتنير
والجداول ،، وبرتكان مدَّلِّي نازل
والقِرِفتِن شثدرو شايل ، وفرعو مايل
متكي فوق درب السويقي ،، وفي المشاتل
نقْلو راقد كم جحافل
وماشي سادر ،، شفتَ قدّامي المحافل
البراسيم والأناقي وقُمري راحل

والحَرازي ،، وطير يوجوج فوقا شادي
وقايمي من تالاها دومي شويي غادي
وشُفّعاً جارين يوركوا وأُم تنادي
لى وِليدا الجاري غادي
كان مع الجنُّون بيلعب وطبعو هادي
بس هي شفقَت لا يقوم يدقسلو وادي
وباقي بى جاي ليهو بير ، خايفي لا يهبر عليها

واتلفتّ على قفايا ،، وبى ورايا ،، شفتَ آية
وشفتَ بير حاج طه جمبها كم صفايح رايحة جايا
وناس مع الجيزان يتاتوا ، وللكفاح مرفوعة راية
والبداية ،، لحظة بس صِبحت نهاية
وقمتَ مليان بى اسايا
كنت بحلم في منامي وكُت برايا
كنتَ بحلم ،، وكل يوم يا ريتني أحلم
بس اشوف أهلي الحبايب
وفي بُعادُن وفي غيابُن ، عمري يا ريت كلو نوم

[ود القرير]

الحنين والذكرى

في لحظة بس عبر الخيال ، عادبي الحنين شهرين وار
لملم عقاب الذكرى ديك ، ماخلّى فد زول ما طِرا
انّاتي زادا بلا عدد ، جسمي اسقام فوقو الشَّرا
حتى البقيِّي الفي العقُل ، خايف خلاص هو يودِّرا
شوفوهو عاد سوّا البدَع ، أجهد رويحتو وصوّرا
زي لوحة من فنان قدير ، قاعد سنينو يسطِّرا
بس لى شنو الهم يا الحنين ، مالَك رويحتي مدردِرا
ماك عارف انّو دموعي بس ، تِحت الجفون ساوِّي الضَّرا؟
ا
يامي ديك الفي البلد ، أصبًحْ دوام انا ذاكِرا
حين امشي مندلِّي الجرِف ، ألقى القِدِيم شالني وجرى
درب السويقي ألَّتنا ديك ، يا ما القديمات غبّرا
حيضان براسيمنا الهناك ، النايري ديمة مخدِّرة
الله على النسَّام يهُب ، ينعِش نفوسنا ويسكِرا
الموية بى تِحتَ الحفير ، من بطنو جات متحدّرة
و"الحاج" مشمِّر بى هنوك ، جمب المدينيِّ انبرى
يقْرَع يعَدْل الموية فوق حيضانو عاد شِربَت ترا
والحاجِّي "بت احمد فِسيل" ، الخاتِّي قُفّتا في التّرَى
وسط الخدار بالطَّرقي ديك ، باري التَّقانِت بالضَّرا
تقلع عقاب بصلاً قديم ، مرّابو حول مدفون بَرا
لا غادي حوض سَبَروق مَلان ، كان لاقي عاد بس خاتِرا
تب فيهو تغَتِس ما تقوم ، لو حتى أفناها الشّرا

يا حليل حنانكم يا الأهَل ، الشوق كتير جوّاي سرى
فاكِر دوام حِلّتنا ديك ، الديمة ريدنا معطِّرا
مرْقاتي من عِن " بت ستوت"، بدري الصباح من غير دِرا
سايق خُطاي عابر الفريق ، بالنشوة نفسي مضَرْضِرا
باللهِ حال "القلعة" كيف ، رُدُّولي جرحي انا ما بِرا
عشمان اشم ريحة التُّراب ، وارجع ديارنا أزاوِرا
واسمع كليمات الحُنان ، رنّات وتَر متبعثِرة
وأشوف عيونكم يا اَهَل ، حاضني "القُرير" ما أبهرا
وفي الدنيا اضوق طعم الحياة ، وألمس جِنانا المُزهِرة

(شعر/سيف الدين محمد الامين احمد)

[أب شخيت]

الله....
الله ياخي...
دي صورة شعبية كاملة...
..حالة دي غربة شهرين...
ريحة نوارة البرسيم...
ريحة الترا..
والطريق للجرف من كترة مشي الناس والحمير لامن بقى "فرناغة" غباره يعكل وراك وتلقى الغبار إتشعبط فيك لي نص الساق..
حوض السبروق الكلنا دايرين نغتس فيهو..
فعلا الزول دا دموعو قريييييبة..
لابدة بس ورا جفونو...
لو رمش ساكت.....شت شت شت شت حبات الدموع تنزل..
الله ينعك آالغربة البتطلق "شرا" الذكريات كاروشة..
ود القرير : ربنا يديك قرة العين والقرقراب وملاحا أخدر قرقريبة كسرتو الرهيفة جديدة..
الشاعر دا ياهو زولي...
كتر لينا منو أب قليبا حنيّن..
من دربى دا ماشي للقصيدة التانية...
القلبو حجر ما يمشي معاي...

[أب شخيت]

لأول مرة يغلبني الكلام....
جيت خاشي هني بعد القصيدة الاولى كنت خايف الحلاوة الفي لساني تودر عليّ الطعم...
لقيت نفسي واقف في القيفة العااااااالية ديك...
قدامي اللوبا الاخضر الداكن الفي الجرف المتماسك غزييييييريتمايل...
هناك شايف الجزيرة واصلاني الأصوات من بعيد...
البيزرعو ..البيقرعو..القاعدين يقشو العرق بي كم العراقي المربوط في النص...المتفرجخ في الواطة راجي الحوض يتملي..البيحلب...
.....عوووووك......!!!!!
الناس تخدم وعرقه جاري..
اصد اطلع بي درب الحمير لافوق...
القش الموقع في الدرب...بعر حمار جديييد...
صفوف النخل والمنقة..
أصل الحلة..
الحرازة ام ضلا سمح المعشعشه فوقة السمبرية والسروية...
...تحت الحرازة..
الوليات البيتجارو.. بي عراريقن الصابغن الدفيق..وسخانين..غببببببُّش..
الدومة واقفة براها لا طيرة فوقه ولا وليدات تحته..علا كان مربط حمار ظاهر من البعر القديم والواطه الواطية حول الدومة بفعل الحوافر....
.....عيييييك الحكاية طويلة..!!!
المشوار دا كلو بدايتو نهايتو مع بعض..
حلمة عاااابرة...لحظات...حدما أجبّد الغطا واعصّر العيون ماداير يرجع..
هل كان إسمها آية..؟؟؟؟
ربما إسمها ربما وصفها من يدري

[ود القرير]

الله يخدِّر ضراعك يا ( اب شخيت) ، ويطول عمرك ، وشكراً على المرور والتعليق الظريف ده ، تعليق الترابلة الغُبُش الشايلين ريحة التراب فوق هدومن ليل نهار .. يا سلام .
ودالقرير الثلاثاء 30/10/2007 - 19 شوال 1428هـ

[ود القرير]

[مضت الشهور]

مضت الشهور وانا في الجحيم ، كاتم أذاي انا يا الحنين.
يوماتي ذكراكم معاي ، متوسدة القلب الحزين
تتشابا روحي انا للقيام ، لكني مكتوف اليدين
ما إنتوا خلِّيتوا الديار ، مهجورة بالصمت الدكين
باض الحمام ، والعنكبوت نسج العذابات والأنين
وانا بين ضياع الإنتظار ، وجداول الدمع السخين
تايه مودَّر بالي تب ، والليل هجومو عليَّا شين
يسكب على روحي اللهيب ، حَرَق الفؤاد والمقلتين
والنار مولقدة في الضلوع ، وانا والسهاد مُتَلازمين
سهران دوام في بُعدكم ، صبّاحي ما بتغمِدلي عين
آه يا خطيوات الزمن ، صعبان عَلََيْ فُرق العَوَين
باللهِ عجِّلي بالوصول ، انا حالي حالاً ماهو زين
ما عُدتَّ مُتحمِّل أذاي ، كِمِل الصبُر ، عِين يا مُعين
ألطُفبي في الغربة ام جحيم ، امطِر على قلبي اليقين
رجِّعلي إيماني القبيل كان باقي ليْ منهاج ودين

[أب شخيت]

اخوي ود القرير
الشوق واللوعة والحنين + ألم الفراق + مرارة الغربة +وحشة الليل لازم يتكتبوا بالطريقة الصادقة دي..
اللتاريكم يا المغتربين مظلومين هانقدر وساكتين...
ربنا يصبركم و يقدركم..
مشكور ياخوي واظبط لينا على الموجة دي نستريح فيها من قومة النفس..

[ود القرير]

يا شمعة

أهدي السلام والشوق وأحلى الأمنيات
ليك يُمّة من بلد الهموم الحايمي في كل الجهات
كيف حالِك انتي وصحتِك وان شا الله كل البيكي فات
يا شمعة في درب الزمن كان تحترِق حتى الممات
شان تضْوي عمراً لى قلوب لو لاها كان صِبحت فَتات
كم يُمّة راجعتَ الزمن ساقتني ليهو الذكريات
وياما انطوت في صفحتو ألوان من الهم والشتات
والليلي برْسل ليك سلام حافل بلحن الأمسيات
بى نفحة العيد السعيد وندى الوجوه المشرقات
بالبهجة والزين والفرح والنور يطل بين المئات
اهديك تهاني من البعيد يا مِشعل الريد والصِلات
ان شا الله تلقاك في أمان رايقي وقليبك في ثبات
والدنيا حولِك مشرقة ومزدانة بى أجمل صفات
شايلي الخدار والإخضرار ن زهرات صباحا مفتِّحات
قبل الختام بهدي السلام للناس جميع والطيبات
وان شا الله بالهنا والسرور في العيد تقضُّوا الأمسيات[/size][/font]

ود القرير - الأربعاء 21/10/1428هـ - 31/10/2007

[ود القرير]

اشكرك مرة تانية وتالتة ورابعة ن وان شا الله أحاول مواصلة الإمداد بشعر سيف الدين . ودعناك الله ز


ود القرير الاربعاء 21/10/1428هـ 31/10/2007

[ود القرير]

مزاميري(شعر سيف الدين محمد الامين - لحن وأداء المطرب/ميرغني النجار)

حايم بى مزاميري ن ودافر في بلاد الله
أنمنم أنّة المجروح ، وافصِّل للفرح حُلّة

مزاميري ،،،
طواف الدنيا بى ذاتا
مبحِّرة في قلوب الناس ن بتعزف في نغيماتا
أنين الناس ، حنين الناس ، مباهج الناس وأنّاتا

بتسكب للفرح ألوان ، تموسِق فيهو إشراقو
تهيم ألحانا في ذاتو ، روايع زاينة آفاقو
تسافر في حناياهو ، مشبِّعة فيهو أعماقو

مزاميري ،،
تغني مع حزاين الناس
بتتالّم تذوب في الرقة والإحساس
بتحكي مع الدموع ألحان ، منابع فايضة بالإخلاص

هموم خلق الله تنبت في مزاميري
وانا الأيتام بشيلهم جوّة تقديري
وتبقى خطايا للباكين مشاويري

مزاميري ،،
ليالي أنيسة ما صبحت
صباحات نايرة ما أضحت
عوالم دايمة دابا صِحت

أماسي على شواطي النيل
غصون هبهابة لما تميل
روايع في عيون الليل

مزاميري ،،
مشاعل للخطى الحايرة
مسالك في دروب نايرة
عليها الناس جميع سايرة

وانا الشايل اماني الناس وافراحا
وانا الشايل هموم الناس واتراحا
بكون يا ناس هناك طوالي في الساحة


ود القرير

الإثنين 9/11/1428هـ - 19/11/2007م[/size][/color]

[ود القرير]

يا زمن ( قصيدة كتبت في اوائل السبعينيات)

يا زمن نحنا انتهينا ، وتاني شِن داير تسوّي
ما خلاص إحساسنا بحّر
والعقيل الفينا ودّر
والمراكب زاتا اهت في محيطات الخطايا
ما خلاص الفينا وِدرت وما فضَل غير البقايا
والتراب من ذاتنا شِربت من دموم روح الضحايا
يا حُزُن شن تاني داير ترمي فوق هم الشقايا
ما كفاية خلاص تعبنا ن شيل عذاباتك كفاية
ومستحيل الزهرة تنبت في أرِض من غير سقاية
ما خلاص خلّيت نفوسنا سابحة في فيض من أذايا
واصلو ما خليت محلاً بيهو نوْصَل بيهو غاية
وياما فيك شفنا العجايب ولسّة في سكذتنا جايا
العقول الطايشة طاشّة وفاقدة أسلوب الرعاية
المظاهر ، والمفاخر ، والتحابيش والدعاية
سطوة المادّية أضحت في حياتنا شعار وآية
في المكاتب ، وفي المدارس وفي أساطيل الحماية
والقشور الزايفة تنحت جوّة في جوّة الحنايا
وا ضياع عمر الحقيقة ويا حليل صدق النوايا

الضلوع صبحت وسادتك
والنفوس طاعة إرادتك
والقليب غربال بينزف من عذاب حضرة سيادتك

والجسيم الروحو ماتت ما بيحس طعن الخناجر
والعذاب العاش وعشعش ما بيفوت تاني ويغادر

حتى يا اخوانا المشاعر صرنا لازم نشتريها
وسلعةالحب في بلادنا نحنا محكومين عليها كل يوم اسعارا زايدة ويا زمن كيف بس نجيها
يا حليلا الدنيا خَربت ويا حليلنا انحنا فيها

ود القري - الخميس 22/11/2007 - 12/11/1428هـ

[ود القرير]

([size=6]وين حروفك)
يا جميل الروح رسايلك ، مالا غابت عن ديارنا
وانت عارف نارنا موقدة ، وقرّبَتْ تعلن ودارنا
كل يوم الصورة جايلة ، وبُعدكم زايد حسارنا
وبدري لو لا الصبْرِ فينا ، العقُل كان ساب ديارنا
وين حروفك تسقي روحنا ، وتطفي من ساحتنا نارانا
في جحيم الغربة غيركم ، كيف بيتصحح مسارنا
النحيب الهدّ ذاتنا ، ياهو عاد اصبح عَمَارنا
ونحنا قاعدين في المهازل ، مالنا يا ناس شِن خَبارنا
الخلوق ما بيرحمونا ، شالوا إحساسنا ونضارنا
هدّوا حيلنا وشالوا حالنا ، وتاني ما فرهد خدلرنا size
كان مُنانا تكون معانا ، وتبقى في الحارّات جِوارنا
إلا منَعَتْنا الإرادة ، ووقّفت عجلة قطارنا
وفوق ده كلّو بدون رسايل ، ياهو يا دوب انتحارنا
لى رسايلك ابقى واصِل ، واوعه ما يطول انتظارنا
نحنا في شوق لى حنانك ، عطفك العطّر مزارنا
نحنا محتاجين كلامك ، يحجب الموج من بِحارنا
ويبعِد اهوال العواصف ، ونقوى بيهو نفِك حصارنا
وبيهو في وجه الأعادي ، نحنا نعلن إنتصارنا
إنتَ أمضى سلاح يعينّا ، وانتَ دينك إفتخارنا
قلبك الوافي ومعفّف ، صافي ينهل من شِعارنا
عزة الإسلام تصونك ، وفي الكُفُر نطلق عيارنا
الله ما يحرمنا قُربَك ، وتاني نستأنف حِوارنا

(سيف الامين)






]

[ود القرير]

بينّا عُشرة وبينّا إلفة وبينَا كل البينّا عامرة
وكيف تقكّر إني أجهل عن جمايلك أي بادرة
وكيف تقول انا نفسي جافية وجافلة من تالاكا نافرة
وماخدة من أهلك مظنّة وديمة ليهم ما مباشرة
مستحيل وانا حتى نفسي لى فراقكم ماها قادرة
ما حصل بى فكري جالت في حقوقكم أي خاطرة
إنتوا ما ياكُن أهَلْنا ونحنا وانتوا لوابي تابرة
خدرة بى عِرق المحنّة ومن زمن سيقانو حافرة
جوّة في الذات والمعاني وديمة إفرازاتو حاضرة
يا أمل نوّر دريبنا ويا أماني جميلة آسرة
إنتَ عندي عزيز مقدّر وحُبي ماهو علاقة عابرة
بالمشاعر الصادقة جيتك وراح تظل هي سحابة ماطرة
تسقي لى آخر عمُرنا وفي القبير تبقالنا ساترة
سُنّة الإسلام مشاعر فايضة بالإيمان وطاهرة
ونحنا بيها نعف نفوسنا وتبقى بى عِزّتنا ذاخرة
العمُر محدود وفاني ومهما طال راجانا آخرة
يلاّ ها النزرع جمايلاً تبقى لى آثامنا داحرة


ود القرير
النشر بالنت (الثلاثاء - 4 مارس 2008)(26 صفر 1428هـ)

[ود إدريس]

الـرائع ود القـــرير مشكــور وانت تتحفنـــا بقصـــائد الأستاذ النيق
سيف الدين محمد الأمين الموجود حالياص بالرياض يالسفاره السودانيه
وله ديوان متوفـتر هنا ببلاد المهجر .. رائع فى اسلوبه ومرتبط بالريف
واهـــله ..لك التحيه ود القرير والتحيه عبرك لصديقنــا سيف الدين
تقبـــــــــــل مرورى ولك كل الود