الشاعر / محمد سعيد دفع الله

[عبد الرحمن يوسف]

اخى محمد سعيد بعد اذنك سوف افتح هذه الصفحة باسمك وحتى يتثنى لكل المحبين لشعرك الاطلاع عليه فانت بحرا واسعا لاتجف كلماته وحتى يوثق لك فى موقع البركل لاجيال قادمه لتعرف من هو محمد سعيد : هو الرجل المتواضع صاحب الكلمات التى لاتستطيع ان تصرف النظر عنها فهى تستوقفك للتامل فيها اخى تعجز الكلمات عن وصفك لانك اكبرمنها ويجف المداد ولانجد صفحة للكتابة عليها . اخى متعك الله بالصحة والعافية .
قول الناس
البوجع قليبى انا ديمه فيهو النارتقيد
ده القول البقولوا الناس يقولوا على سعيد
ما عارفين قليبى وحالو كيف عايش وحيد
والبعطف عليهو نساهو منو رحل بعيد
كم قاسى العذاب متو الى كل صباح جديد
غرقان فى هموم اهاتو كل ما يوم تزيد
وشبيه البى تحت فى امو مال فدع الجريد
لاحام الدباس بى فوقو لا اتمدتلو ايد
حارسنا ليهو قاسى قليبو مصنوع من حديد
بالليل والنهار قاصيهو لانوم لاغميد
ماراعى القرابة والفة والريد الشديد
ولا حنن لقلبو قليبى انا المكتول شهيد
يمر العيد طروبه الناس تغنى تميل تعيد
الا قليبى حزنان باكى ما مرابو عيد
عايش فى الارض غير هادى زى طفلا شريد
البكاء و النواح هداهو ليهو اكيد يبيد
اول من تغنى بها الفنان عثمان سليمان ثم الفنان محمود النعام ثم صديق احمد ثم المسيعيد

[عبد الرحمن يوسف]

لاشوفتا تبل الشوق
لاشوفتا تبل الشوق ولا ردا يطمن
اريتك تبقي طيب انت انا البي كلو هين
قليبا لي رهيف عارفو ماب يحمل حنين
انت ماغابيك حالا فيهو كل البيهو بين
بقيت مالي غير اشعاري اكتبها فيك وادون
اقول يمكن تزيل مابي والله قليل تهون
مالكن يا قماري بتشدن ايه لازمت تغنن
بديكن وصية امانة لي سيد روحي طيرن
ترا الحال العلي شفتنو قولن ليهو واحكن
قولل السحب في روضو ما عادن يكبن
اضحي محل خراب ما فيهو غير زهرا مضبلن
قولن ليهو ليلو طويل طولا يجنن
لا قمرا ظهر في سماهو لا نجمات يضون
كلما ليهو يتصبر يقول ايام يعدن
يمني لنفسو بي رؤياك والله تردلو يمكن
تغنى بها النعام ادم - وآخرين

[ود القرير]

[color=#4B0082][size=6]لك الشكر أخ / عبد الرحمن يوسف إنابة عن الشاعر الكبير محمد سعيد دفع الله ، فهو شاعر يستحق ان تُنشر كل قصائده التي امتد صداها إلى كل الآفاق ، وحقاً ما قلت عن تواضعه ، فهو فوق ذلك رجل وفيّ ؛ الم تسمع ( جيتِك وقيع يا نوري آه ، ضُميني في جوفك هِنا -- دسِّيني ضُمة من الزمان ، تب ما يعرْفوا بُكاني انا)؟ ، ليتك تُنزلها على الموقع .

(ود القرير - الأحد 28 أكتوبر 207 - 17 شوال 1428هـ)

[عبدالله محمد الجزولي]

تحياتى لك ياود القرير والله الشاعر محمد سعيد رجل عظيم وشاعر مطبوع واتمنى أن يجد ما يستحق من إهتمام ويجب أن يوثق له كماذكرت وكل ماتجد فرصه سجل هذه الروائح الخاص به وهذه الخطوه أن دلت على شىْ انما تدل على اهتمامك بهذا الرجل الضخم لك شكرى

[عبدالله محمد الجزولي]

تحياتى لك يا اخ عبدالرحمن يوسف والله الشاعر محمد سعيد رجل عظيم وشاعر مطبوع واتمنى أن يجد ما يستحق من إهتمام ويجب أن يوثق له كماذكرت وكل ماتجد فرصه سجل هذه الروائح الخاص به وهذه الخطوه أن دلت على شىْ انما تدل على اهتمامك بهذا الرجل الضخم لك شكرى

[عوض جلاس]

تحياتي الأخ عبد الرحمن يوسف وأنت تنشر روائع أستاذنا محمد سعيد دفع الله
وهو شاعر يستحق ان نفرد له المساحات الخضراء ليحط رحاله بيننا فيها
ألف شكر على هذه الروائع وتقبل مودتي

[عبد الرحمن يوسف]

شكرا الاخوة المتداخلين ود القرير - عبد الله - عوض -ونواصل

مليت الغربه محمدسعيد دفع الله
مليت من الغربه آعلى ياولدىياايدى اليمين
داير الرجوع بس كيف يكون يكون وتفكيرى فيهو أنا من متين
كل ما أقول اصبر شوي باكر تكون الحالة زين
القي الظروف ياها الظروف بل زايده سوء بحلف يمين
وآخد لى لفته على الزمان القاها مرت كم سنين
لمتين بتتفك القيود القاسي قلبها ما بيلين

جيت فاكر أنى أكون سعيد بى مال بيجرى على اليدين
لكنو مقسوم ياالعزاز رزقا يكون دايما ضنين
والشى العجيب مما وصل ولليلى فوق اكتافى دين
حسره وهموم متواليات والدمعه يوت هالابه عين
نيران مولعى فى القلب مسكين فقد لضرا الأمين
كان عيشتو هاديه قبل يجى وفى بيتو كان قوتو اليقين
والليله في الأهوال دوام يصرخ ومو لاقى البعين
وينك بعدتى على ليه وأنا ليكى كاتلنى الحنين
يالسمحه سموكى القرير والناس تجيك من وين ووين
وأنا قمت منك شن أقول غير ده المسطر في الجبين
يادرة الوطن العزيز ياالنادره ياالماليك وزين
عشمى ومناي ارجع واجيك أنا غيرهواك متل السجين
داير اكون بين الاهل محضون وحاضن اعز طين
داير حياتى مع الصحاب واللقمه مابين العوين
يالوبه شمر للضراع والليلى جيت أوصيك دحين
كونك تقصرمااظن وأنا عارفو طبعك ياالخزين
يات من معلم درسك شاكرك علم وخلقا يزين
ما عليك خوف مادام معاك زولا مسمى الزين وزين
آنت البتعرف للأصول كاسب رضاء الوالدين
من قمت درفونا صغير ماكت يوم نيا عجين
دايما مواظب ومجتهد في الجانبين دنيا ودين
ورافع السماوات غير عمد داعيهو ينصر وليك يعين

[عبد الرحمن يوسف]

]تعال غنينا يامامان -الشاعر محمد سعيد دفع الله- غناء ميرغنى النجار[/color]


تعال غنينا يامامان

يامامان تعال غنينا قول فوق حرفو
جيب نغما على الشاد ن غلبنى انا وصفو
عام بصديرو زى وزينه موجه تد فو
فج الداره كل زول ماعرف وين وصفو
مال وانتنى حاكى البان سبيبو ينسفو
سابل ريش نعام مندلى هادل كتفو
ضاوى جبينو يلمع نور خدودو يلصفو
فج الليل بروق من بسمو فرو يرفو
رويان جسمو زى الدوبو قام فى جرفو
محروس ماب يفوت تب سيدو الله يصرفو
مضمور هافو زى الصيد كاحل طرفو
يرنع فى الرقيص يترج صدرو ورد فو
ود عينيهو ماهر سهمو رميو يعرفو
والقبلان يعاينلو ويقابل حتفو
وكتن ماع حتل فى رقيصو سخن كقو
جرجر توبو كل لحظات يقيف ويلفو
الواقفين جميع فى الداره عرقو وجفو
دايرنك تعيد الرقصة لو يتكفو
اجبر خاتر الحبوك لا ينكسفو
لو ماجيت يخلوا الصفقة ضمه يحلفو
صادنا هواك رحماك جيش غرامك كفو
من البينا ينجينا الكريم بى لطفو

[ود إدريس]

طريتــــــونــى لــى اهــــلى وبـلدنــا الداير امـــوت بــى شوقـــــــه
وإتذكـــرت لــى أيــــامنــــا وكتــن كـــان نســــــوق البــــــــوقـــــه
عبـــره شــديده ســدت حلقــى والعينيـــــــن تكـــــب سبلـــــوقـــــه
وإتـــأوه وأقــول يــا حليلنــــا .. يــا حليـــل البلـــــد والروقـــــــــه

هذا هــــو حمد سعيـــد وهذا مثال لإرتباطه بالريف والقــــرير ..
يالسمحه سمــوكى القرير والناس تجيك من وين و وين ...؟
هذا الشخص النادر قد عاشرناه فى الغربه ولو حاولت ان أكتب عن الجوانب
البعيده من الشعــر قد لا تكفـــى الدفاتر .. إنســـان يسيط فى كل شـــىء .. فى الغربه
عرفه المحســى والدنقلاوى والجعلى والعربى والحلفــاوى والبقيه قبل قبيلته ولاد شايق
له التحيه .. ولك التحيه أخـــى عبد الرحمن وانت تفتح لنا هذه الزاويه لنقول ما فى
خواطرنــا عن هذا الشاعر العفيف المرهف ؟؟ ذو الشعر الســـامى
لك الشكر ولك الود أخى عبد الرحمن وسلمت

[شهرزاد]

الهديل ابديهو الهديل .. كدى غنى لى ّ
حتى ان كان قليل .. يبرد علىّ
يقيف دمعى البسيل وتجف عينى
***
لا تبكى و تنوحى ... كفاك انينى
تفتقى لى جروحى ... مع حنينى
انا الفارقت روحى ... قضيت سنينى
اريت ان كان مرادى انا بى ايدى
***
اه قمريه ... ماك شايفاهو حالى
حالى البى ّ ... يغنيك عن سؤالى
زولا لى ... ّ طول شايفو سالى
زاد البي ْ بدّلْ يرحم شويه
ماراعى النحول ... الفى عضايا
اظن صدقلو .. قول كذب هوايا
خلاص لمالو زول ... تانى وسوايا
وانا البكا والذهول صار لى ْسجيه
***
انا الختيتو ... فى داخل فؤادى
انا الضاريتو ... من كل الاعادى
انا الغذيتو ... يشرب من ودادى
اه ياريتو خفف لى الاذيه
***
اه اواه واه ... قمريه غنى
معاكى قليبى تاه ... بس لا تضنّى
انا القاسيت اذاه .... اهديكى فنى
لا تزيديلى جرحى على العلى ّ

[عبد الرحمن يوسف]

ود ادريس لك عاطر التحايا وانت صاحب الباع الكبير وانت تعاشر محمد سعيد فى الغربة وتعرف كثير من كثير فى حوارتك مع محمد سعيد وانت المتشبع بحب البلد وبحب تراثها ونحن جاينك بى قفاف فاضى ياودأدريس
ترمينا فيها المتمرة والممرة والعصيدى
وتمرات من القندول او بركاوى او تموده
وحبات لوبى مفسخ اسوى بليلى
او من ويكة الجروق ملقطه للمفروكه
وشيل من محمد سعيد اغانى السيرة والدلوكه
دايره تكون لى الجميع زاد والايام بقت ممحوقه
ودأدريس الحقنا ليكتمل البناء ويكون شامخ زى حمد سعيد شموخ البركل زيادى .
ولك عاطر التحايا

[ود إدريس]

محمد سعيد نظــــم هذه القصيده فى زوجته
التى قامت بالواجب كاملا فى فترة إغترابه وأشرفت
بكل إقتدار على تربية الأبناء ........

مشكــوره يابت الأصــول يازهره ماب تعرف ذبـــــول
تنفح أريجــا قريب بعيــــــد ريانــه فى كل الفصــــــول
مهما كتبت حروفى فيـــــك وإخترت أفضل ما أقـــــــول
ألقاهــا ما أوفت ثنــــــاك ومقـــامه ما وصل الحجـــــول
يالمنظرك يبهج يســـــــــــر كل البشاهدك فى الحقـــــول
مهما تطول نظراتو ليـــــك فيها إرتياح وما كــان ملـــول
سامحيهــو كان قطفك محب من شوقو ماراعى الأصــول
وطبع البشر من يوم وُجد يا زهره معروف كان عجــول
يا إنت ياشمس الفـــرح فى دارنــا حاربـــت الأفـــــــول
فضلك علينا بلا فـــرز طبعــك عطا الغيــث الهطـــــول
غذيتـــى للمغروس نبت وإفتـــرَ باســـم فى الشتــــــول
لما إستوى وأينــــــع بديع وأثمــر عناقيد العقـــــــــــول
حاشاكِِ ما كليتِِ تـــــب فى غيبتى كم شلــتى الحمـــول
حامله الرساله بلا مــــلل عارفانـــى ما درت الرَحـــول
معليــش رحلت على أمل كان ظنى أحققو بس فى حول
وحالت ظروف فرضت على تتمــدد السنوات تطــــــول
عانيت كتير فى غربتى ومن شوقى خاويت الذهـــــــول
عايش همـــــوم من كل لون والبى ما يبـــــلابــــو زول
يا رب تسهل لى النزول ولى بلدى أنعـــم بالوصــــــول
وأرجــع وأكون بين العدول عيشــا هَنــىِ وعمـرا يطول

[عبد الرحمن يوسف]

ياسلام عليك يا شهرذاذ
ابديهو الهديل .. كدى غنى لى ّ
حتى ان كان قليل .. يبرد علىّ
يقيف دمعى البسيل وتجف عينى
هديل القمرى والدباس صح حتى كان قليل يبرد على الزول لك عاطر التحايا وفى انتظار المزيد .

[شهرزاد]

شجون العيد
مر العيد وفات لا شوق لا تهانى
وما قادر اقول انو قسا ونسانى
كم ناجيت حروفو الخمسه فيها نظمت اغانى
ساهر ديمه ... افكر فيهو ... فر النوم جفانى
اعيد لحظات قضيته معاهو انسج فى الامانى
كان ياهو الامل يا حياتى ... مالى غيرو تانى
ما عارف اذايا البىّ كيف الشوق برانى
والعارف لحالى يا روحى قبل الموت بكانى
عاد هسع الومك انت .. ولا الوم زمانى
واقول ياهو المقدر كان .... والمكتوب لى جانى
اسمك ديمه الهج بيهو ما فارق لسانى
طيفك ده الملازم لى ما فات يوم ختانى
ما بقدر اطيق الفرقة ... ما بحمل ثوانى
كيفن هان عليك تنساهو .. كان ريدى وحنانى
شوف حتى الطيور حزنانه تبكى توح عشانى
وينو حنان قليبك لىّ.... ليه صد وابانى
ما غلط على حا شاهو ... ديمه عطوف وحانى
مالو الليله بى ايديهو .... كاس الويل سقانى

[شهرزاد]

الـــــودار
هسـع خـلاص بـاكـر تــروح
وتسيبني وحدي أنا في الودار
سايلـة الدمـوع أبكـي وأنــوح
مــا بـفـرز اللـيـل مــن نـهـار
وأنا صبري كيف قولي دحين
بعـدك خــلاص جـفـت ديــار
كان ليها زيف ورشة خريـف
وأزهـار منـورة فـي الـخـدار
ضلاً وريـف وأغصـان تميـل
فوقـه الكـنـار داعــب هــزار
آه يا لطيـف ويـا حليـل حليـل
داك الزمـان جـا الليلـة جــار
كت ناوي أجيك فجرا صبـاح
وأوصل معـاك حتـى المطـار
وأنظر وشيك وأنسى الجراح
لكـنـو آه فــي جـوفـي غـــار
آه يــــا زمــــن آه آه أحـــــيّ
في النـار دوام وتزيدنـي نـار
بكـيـت عيـنـي مـالــك عـلــي
مـتــل الـتـقـول بينـاتـنـا تـــار
جــف الـشـدر كنـكـش يـبـس
قمريهـو خـل عشيـشـو طــار
لجنـاحـو فــر يـدقـس دقـــس
في تيه غبار وهبـوب عصـار
ضهبان ودر تب ماب يشـوف
غطـت عيونـو دمـوع حسـار
مسكين غمر بي شوق ولـوف
ولليـلـة فــي نــص الـمـسـار
غلبو الصبـر فـوق نـار جمـر
مـوقــودة زادت فـــي الأوار
عاد ليهو حق كان مات شهـق
صــح دة الصـبـر والله حــار
عاش بي أمـل يمشـي ويصـل
لحـبـو يصـبـح فــي الـجـوار
لــكـــنـــو آه روّح أفـــــــــل
نجمو وبعيد في سماهـو غـار
وأصبح كسير مجهول مصير
مـا أظنـو رفّ جنـاحـو طــار
مسكين ينيـن بـي شـوق دفيـن
ودّر عـمـيـرو مــتــل كــتــار

[شهرزاد]

جيتك وقيع يانوري
جيتك وقيع يانوري أطويني في جوفك هنا
ودسيني ضمة من الزمان تب ما يعرفوا بكاني أنا
ما دام شقاني بلد عزيز خلدتو بي أعذب غنا
وجرّح قليبي بلا سبب صبّح حويلتي مبشتنا
كان وجهو ضاحك لي زمان ريّان يفيض رقة وسنا
وآهٍ بشوف وجهو الجميل الليلة كمّل للشنا
يا حليل زمان وكت السنين تتجارى زي لحظة هنا
والليلة آه لحظة عذاب تنجر زي مليون سنة
جابتني طيبتك من هناك أهلك ينسوني الضنا
ويسقوني من رقة شعور كاسات نبيذ مسكّنة
جاييك شان أنسى الهموم أحفر غريق فيك وأدفنا
وأرجع أغرد من جديد في كل جرح زهرة هنا
ما دام هناك نهاري صار زي ليلي أسود داكنا
وقمرك يلهلج منشرح نوّر ربوعك زيّنا
جار بي الزمان أنا في القرير لي قلبي هذّم ما بنا
وجاييك فيك ارتاح أنوم تنصح جروحي المزمنا
ما ديك قماري على النخيل ضمت جناحه علي الجنا
وجدول يصفق لي فريع في نشوة ميّل وانتنى
في كل خطوة أمشيها فيك تمسح تزيل شي من عنا
وأشعر براحة تجم عضام قلبي الحزين شقيش رنا
وحوراً حسان مال عوده بان صافي وأصيل كان معدنا
ما ديل شباب يملوا العيون بي رقة خالية من الخنا
الله على قلبي السعيد يا دوبو تمالو المنا
وشايفو انتشى وللهم نسى وفرحان يقول موجود أنا
عاد وآحلال قلبي الشفوف ما دام على الحبان دنا
غني وبسم وسط الصحاب ينسى الليالي المحزنا

[شهرزاد]

القلب الجريح
القلب الجريح الديمه ينزف فى دماهو
اشرح لى بس ورينى ايه ذنبو الجناهو
حافظ لى زمان العشره ذاكر ما نساهو
وكيف تنساهو انت يا روحو ليه بتزيد شقاهو
كلما ا شرق صباح يا روحى قلبى يزيد عناهو
وانت القاسى ما راعيت كفاهو عذاب كفاهو
مره اطراهو انت طبيبو فيك يكمن شفاهو
ومن غيرك محال ينصح يطيب ويجد دواهو
ده الزول القبيل حباك فى جهلو وصباهو
ليه خليتو عاش وحدانى كيف اختر سواهو
بانى عليك حياتو قبيل و فاكرك كت معاهو
حرام تنساهو والله حرام تهد ماضى البناهو
اساهر الليل ويشهد لى نجمو الفى سماهو
وانوح حدى الصباح عينى النوم ماب تراهو
باكى الماضى ديمه بنوح حكيت فاقد جناهو
وين زولى الوسيم دلونى عيشتى جحيم بلاهو
حليلو ويا حليل الماضى فى ودو وصفاهو
وطريت برقو البشيل عبادى من تبسم سناهو
وفرعو البان رشيق يتنى مال هتف نداهو
وضميرو الزى جدى الغزلان بعيد ضارب خلاهو
ضلام الليل سبيبو سوادو مسدول فوق قفاهو
مهما طال عذابى انا برضى دايما فى رجاهو

[شهرزاد]

عرجون تميره
إنتنت عرجون تميره
وقايمى قوم عز فى قريره
شايله ناجحه وماها صيره
وليل نهار غنايا طيره
رمت الجدلات حريره
ومال جسيم ناعم فطيره
عينه سيافه الشهيره
ساوى قلبى عديل جفيره
خدها الزهره النضيره
ومازج الصندل عبيره
زين التفاح صديره
ويا (حسن )وصف ضميره
دى الخلوق جات من عِصيره
وهايجى زى مويه الدميره
نازله للشبال فى سيره
وكل زول شايلاه غيره
قالوا ما شايفين نظيره
والجميع عشمان نِظيره
وهى الخطيوه وكت تديره
يمين رؤو س الناس تديره
ليك قلوب الناس اسيره
وغير غناك ما ليها سيره

[ود إدريس]

مشكوره شهرذاد وانتى تبحــــرى بنـــا فى خضم امواج محمد سعيد
ذلك الشاعر المهذب الذى يمثل بلد باكملهــــا ... له ولك التحيه

[ود إدريس]

للشاعر الرائع محمد سعيد دفع الله

يا طير روح أمش وتعال لى اشرح قول لى إيــه أخبــــارو
فســراع إنت عارفو قليبــى ولهان لا تزيد لى نــــــــــارو
حلــق فــى سمــاك فــــوق عالى لا يهمك رياح وأمطـارو
وإتجه الشمال لقريرنا تلقــى مندى زاهــى خــــــــــــدارو
من عِند الحفيــر لا فوق تروح بيتـــو وتقيف فى أسوارو
وأحكيلـــو العلـــى ِ بأمانــه .. جيب لــى أنــا منو كل أخبارو
ذكـــرو كان نســـأهو الماضــى كيف ينســى القليب الــــدارو
لا تكتر تزيد فى لـــومو .. معــزور أنا قبلــــت أعـــــــزارو
روضـنـا الكان قِبيل فى خضـارو كل ما يوم يزيد فى نضارو
قــوللو أصبح خــراب مِن فُــت .. فد يــوم الربيع ما زارو
يبــس الكان مُخدر فيهــو ماتـــت ضبلنـــت ازهـــــــــــارو
حــــلابو المَــحَـل بعُصـارو .. قّــلـع رَمّـــى كل اشجـــارو
حتــى الدوبــو فرهد غصنـــــــو ما إتفتح فتـــق نــــوارو
جافـــاهو الربيــــع يا خِـــلى وين زمنو البهب فى أسحارو
من بعد النضــاره الفيهو وكـــتن كان يغنــى كنـــــــــــارو
إنعدم البغرد شـــادى طربـــــــان عازفـــــــا أوتــــــــــارو
إتحت الصَــفق من شِــدرو كان للقُمــرى فيـهو أوكـــــارو
خــلَ جــناهُو فارق عِــشو حزنـــان يبكــى ينعِــى صغــارو
جــار بيهــو الزمن يا خِــلى وإتفزعــت عليهـــو أقـــدارو
روضــو معينو قلــت مويتــو وإنعـــدم إنقطــع سرســـارو
عاشقــو الكان بيسكـــن فيهــــو رَوح عقلـــو راح مزمارو
ساب أنغــامو خَــلَ غٌنــاهــو ودّر بالــــو كل أشعــــارو

[اشتياق القرير]

ياحليـــل زولاً مســـــافر وزادو فــى ترحــالو دمعه
وشـوقو يـــادوب لسّــه زايـد للبلـد دايرلــو رجعـــه
وليـل نهـار راحِـل خيـــالو وما وقف لا لاقى هجعه
بالعليهو كتير يَغيِّب ومـره مـره يفيــــق ويوعــــى

الحَنين يـــاكُل قليبــو وطــارى لــى أهلـــو الحنــان
كان مرادو يعيـش معاهم إلا جــــار بيهــو الزمــان
ســـاقو مــن بيـنن رحلبـــو وراحبــو فـى أبعد مكان
مافـى حتى أنيـس معــاهو غيـر ربابه وصوت كمان

فـى خيـالو رسملو صــوره وفيهـــا كُل ألوان بــــلادو
خايف الأيــام وجــوره وخـــوفو مــن يكتــر بُعـــــادو
وينسـى للدنيــا وســروره ويبقى عــايش فـى سهـادو
مُسطِــر الأشـواق رســـالة والدمــوع كــانت مِــدادو

كــمّ صبــر كاتـم جــراحــو ومَنّــى لــى نفسـو العليله
بكــره يسعد فـى صباحو وبلـــدو يقبــل بـــــى بديــــله
والصبــاح نَّسَّـامو فــاحـوو والقمـــارى سجــــع هديله
وقلبــو مسكين زاد جـراحو وقال بلادى أنا يــا حِليلـه

[اشتياق القرير]

الحديث للشاعر محمد سعيد دفع الله :القصيدة لها قصة هي: أنني كنت أعمل بالإذاعة السودانية وقدّر الله أن نبتت شتيلة تمر في حوش الإذاعة، وكان موقعها في طريق المارين لداخل المباني الرئيسية من عدة مكاتب وأمكنة.. ثم إنها كانت مهملة ووحيدة في نوعها أي (نخلة).
وفي مرة شالت (جبّدت) و(فقشت) وجاء الأخ الشاعر عبدالله القطبي بـ(القفوزة) ووضعها.. وبعد ذلك (سوّت الدفِّيق).. ولكن.... حصل ما جاء في القصيدة مما أغضبني وأخي القطبي فكتبتها وتولى القطبي تعليقها عليها.. وسبحان الله أن هذه الأبيات كانت سبباً في أن تبقى تلك الشتلة حتى الآن واقفة عملاقة أمام باب المبنى الرئيسي الداخلي للإذاعة، قال لي ذلك الأستاذ معتصم فضل مدير الإذاعة الحالي إذ إن كل معالم الإذاعة تغيرت وقطعوا كل أشجارها القديمة وما بقي منها غير هذه النخلة، (التمرة) التي كانت شتلة يوم كتابة القصيدة.

دابه صغيره أول شيله ليها وكُلْ من شافه دخلت نيتو فيها
قَبُل تنجض تشابي الإيد عليها وما اتقطعت كراع تمشي وتجيها
***
قطعوا جناها قُـبّال لونو يقلب تبكي من الألم دمّاعه تسكب
تخم في الواطه فوق شعراته تقلب وتسأل الله ليها العافيه يكتب
***
وتلعن حظّها السوّاها واحده انبتا في بُكان سكّانو جاحده
تقضي حياته سارحه بعيد وشارده ولابسي على الدوام دمّور وحادّه
***
قالت ديله زي طير الصعيد ما عرفو البِضُر منّ البفيد
شيلي الخمّ تكّالي الجريد أصبح هسّ يتْعَدْ بس في إيد
***
يقطّعوا فيهو من غير ما درايا ما عارفنّو مارق من حشايا؟!
قبيل حارمنّي حتى من السقايا وهسّع جاروا شالوا عليْ جنايا
***
تراهو أنا شيلي ضبلن ضُمّه كنكش (بالغوا) ديله سوّواْ تخين وافرش
كلْ واحد قَطَعْ وللتاني حرّش عمايا غبايا زول في زفّه أطرش
***
شعري الكان غزير غاطابو راسي واصبح ليّ ضل متل الشماسي
لاكين ديله دايرينليْ المآسي معّطوا شعري واتجرّعت كـاسي
***
مالن كان رجوني أنا لمّن أنجض ما كُتْ بِتْوَهِمْ وجنايا يمرض
عاد لو كان ضميرن صافي أبيض كان أكلوا النجيض شربوني (أبيض)

[اشتياق القرير]

هذه الابيات مهداه من الشاعر المخضرم محمد سعيد دفع الله للاخ التاج علي حامد

ياالتاج سلام مطبوق طبوق
وفي العيد عساك بليت شوق
شوقا مخزن من زمون
فيض من مشاعر وفي العروق
فوق عز بتقدل لاتحت
ومرات كمان طالع لفوق
وسط الاهل وبين العزاز
جايين جماعات فوج وروق
يابختكم ومين زيكم...
في العاصمه غالبنا المروق
بلغ سلامي وقولهم
يدعولنا نرجع شان نروق

[اشتياق القرير]

تسرع الأيام تمر .. مع انهن نقيص عمر
داير لقاكم يا العزاز غيركم محال الحال يسر
في بعدكم تقل الزمن برّاحة للخطوات يجر
و الحال تبدل يا سلام كل شئ بشوفو كُتُر كُتُر
كان شفتو كيف حالي العلي ، فرشي و غطاي نيران جمر
لا لاقي زول يرأف عليْ لا انسان يقول لي بريّة كر
ما لاقي ايد تمسح شقاي فوق وجهي كالنسمات تمر
و تبعد أسى الأيام بعيد و الفرحة في أعضاي تَشُر
ليه يا زمن كايس أزاي تسقيني حنضل و لي تغر
هدّيت للبيت السعيد ما فيك خير تعرف تَضُر
وريتني أهوالاً جسام شُفتَ النجوم عزّ الضهر
الله من الغربة الجحيم الفيها ما بيجدي الصبر
ما كان بعدت أنا يا العُزاز فارقتكم لو ما الجَبُر
ضحّيت عشان خاطر الصغار خايف لهم عيشة الفَقُر
مستنّي يا أهلي البريد و الله بي فارغ الصبر
علّو البريد يعطف يجود و يجيب رسالة بعد عُقُر
داير جواب يشفي الجراح ياخدني في مَرْقَه العَصُر
بين البراسيم و المُقُد و البرتكان ، منقه و تَمُر
يومي الأشوف و أقرا الحروف يا أهلي حتي ولو سَطُر
داك ، ياهو عاد ، عزَّ المراد ، و زارتني اكيد ليلة القَدُر

[اشتياق القرير]

ماني دايرلو القيام ، و أنا ماني راضيلو القعاد
في قيامو قليبي يشقى ، و في قعادو يزيد سهاد
خايفو يرحل و مني يبعد ، و افقد الحِن و الوداد
و ابقى عايش و ماني عايش ، كوني كله سواد سواد
إن قعد يا خلَّه دوبو ، أنا آه شقايا البي زاد
شان رقيق احساس و قاعد ، بيهو حالا ما بيراد
صرت محتار يا رفاقه ، و كل شقايا الماضي عاد
من بعد ما عشت فرحه ، و كُتَّ معدود في السُعاد
لو رحل نيران بتصْلي ، و في الفؤاد تقدح زناد
و إن قَعَدْ ما برضى ليهو ، العيشة في حالاً رماد
ده القدر يا خِلَّه يحكم ، و حكمو تب ما ليهو راد
و نحن شن نعمل ترانا ، الصبر يوت ساوِنّو زاد
ما رَحَم داس المشاعر ، و طبعو دايماً يا العناد
و مرّه ما اتفضل علينا ، و بي جميل أيامو جاد
ربي ليه . . بس ليه برانا ، و نحن من دون العباد
نبقى عايشين لي شقانا ، و بس متين ينتَمْ مراد؟
ليل نهار نبكي و ننوح ، و الجسيم جافى الرقاد
و أن رقد عاد شن رقادو ، الدمعو جاري على الوساد؟
يا كريم يا الإنت داري ، و عالم الخافي الفؤاد
عاد يروِّح ، و حالنا يصلح ، و تاني حِبي يجينا صاد

[اشتياق القرير]

كان تعرف شنو البِحصـل لِى وكْتَ الليـل يفلِل
أردد آه وأعقِـــب أه والدمعـــات تبــلِل
سهران وحدِى والناس نامــــوا للأنوار تكتِـلْ
أنـــــوِح آه وأمنِــح أه زيـــن عينــىَ توشِـــل
الله مـــــالو تانـــى زمانى قاصــد لـىِ يَبهــدل
سنينى أنـا آه حلاوته آه لىِ حالِــف يحنضِل
ياريت لو لقيتَ مُــرادى أطير فى لحظه وأنزل
هناك أنا آه معــاك أنا آه أمسِى اصبِحْ وأقيل
وألقك إنت عافى إن شاء الله فى خيرك تخوجل
بشيشى أنا آه أعاتــب آه مالك ما ب ترسِـل
وأشرح لك سُهادى ونوحــى وأرجـوك لا تطوِل
إن نسيتنى أنا آه وراك أنا آه شقيش عاد أقبِل
كٌت دايـــرك دوام ياروحى قـــــدام عينى تَقـدِل
بِتسعد آه حياتى أنا آه فرحى يــــزيد يَفضِل
وتبقى سحابة تكسِى سمايا لـى فى الصيف تضلِل
إن عِطشت أنا آه هِى تبكى الآه ولىِ دمعاته تبهِل
الجفـــــا والخِصـام ورينى كيفـــن تانــــى يحصِل
يا ماضيـا آه وحاضــرِى أنا آه وكُل الجاىِ مُقبِل

[اشتياق القرير]

قصيدة الشاعر محمد سعيد دفع الله والرد من الشاعر الطيب أحمدون ( لتى )
كانت المناسبه هى زواج الاستاذ عبيد على ادريس :

عزيزى الأخ الشاعر إبن الشاعر الطيب أحمدون
ياخى قالوا فى المثل المرفعين يعرف جعرى رفيقه .. ولهذا أرسل لك
هذه الأبيات وهى خجلى لأنهـــا تعلم ضعفهـــا وعدم قدرتهـــا على
التعبير المطلوب ، فكان بودى أن اشارك العزيز ( عندنا ) الأخ العريس
عبيد بما يليق ومقامه خصوصـــا وكما ترى فى القصيده لم أكن من بين
المشاركين حسيــاً بوجودى شخصيــاً ولكن للأسف جاءت الأبيات فاتره
لظروف .. ولهذا أستغيث بك لعلك ترفع عن كاهلى ولو بعض ما اشغر
به من قصور فى هذه المشاركه ... فهلا فعلت أخى



قـــــول آلطــيب أسمعنــــى القصيد
جيب بديع أبيــــات كما العِقد النضيد
قولا فوق صاحبنا ده المِن قام فريد
ويكفى إنو يقولوا جـانا عريس عبيد
هاك كليمــات شـــارده مِن حُمد سعيد
و لايغشك إسمو أبــداً مـــو سعيــــــد
كان سعيد كان جاهــا لتى مـع عبيد
وكان حِضـر أفـراحو شارك خدمة إيد
إلا دى المقسومه يسمـع مـــِن بعيـــــد
إنـو تـّم صُفاحــو ده أب راياً ســــديد
ياخســــاره مشـــاعرى جاتكم بالبريد
حسره ياخوى حسره وآلـــومى الشديد
كُتْ بـدور الجيه بينكم أقضــى عيــــد
والفــرح يمــلانى أعـــود إنسان جديد
وينطــرب سامرنا للفــات داك نعيد
ولينـــا أحمد يشــدو بالألحـان يجيـــد
رغبة مــا تمت لى ما شــــارك عبيد
وكان منـاى فى الداره أدٌق الكف شديد
ولا أشيل طنبورى أرقص أحـلى غِيد
ولا أقول أشعـارى احاكى الفـى الجريد
اللــه قــدَر خِـــلا يفعل مــا يريــــد
مارفع لى قدمى كـان محكوم بقــيد
داير ابـــارك ياخى مــن قلبى الجديد
والجديد إن شاء الله بكريتو الوِليد
ياكـــريم يا الله طالبــك يــــــا مجيد
عاد تجيب لى دعاى تحقق لى غِريد
يبقــى بيتن جنه سائــــلك يا مـُريد
زاهى يومى افراحو عيد عاقبـلو عيد

رد الطيب أحمدون للشاعر محمد سعيددفع الله

الأخ الشاعر محمد سعيد دفع الله ..
لك التحية والود
اشكرك أخى على القصيده التى ارسلتهـــا وكانت لفته بارعه ؟
وحقيقة هذا الإسم محمد سعيد دفع الله ونحن منذ نعومة أظافرنــا بنسمع بك
وكنا نتمنى رؤيتك ولكن كلماتك كانت بمثابة رؤيا لشخصك الكريم
عندما وصل الشريط وإستمع أليه الأهل بلتى أشادو بالقصيده إشاده كبيره
خاصة لما ذكرت ( هاك كليمات شارده من حمد سعيد... ولا يغشك إسمو
أيدا مو سعيد ... كان سعيد كان جاهــا لتى مع عبيد )
وكونو تربط سعادتك بزيارة لتى فهذا شرف لكل أهل المنطقه ؟؟؟




التحيــــــــات ليك يـــا حُمد سعيد
توصلك وتلقاك زى إسمك سعيد
ناسنــا سمعو كلامك الجابو البريد
وقالو لو ما جيت وما شارك عبيد
الكـــــلام القلتـــو يكفينــا ويزيـــد
دى ماكليمات شـــارده ياحُمد سعيد
بل جميله ووارده جاتنى أنـا من بعيد
إنتبه وإستوعبا العقـــل الشـــــريد
وعمّت الشريان وخشت فى الوريد
وحركت فى نفسى إحساســـا شديد
الكـــلام القلتو أقوى مــن الحديد
حتى لو كــــان داك ذو باسٍ شديد
عُمرو مهمـا طال بينصاب بالصديد
وتبقى أصالة الكلمة لايوم الوعِيـــد
وبيهـــا تنمو أفكارنـــا والكل يستفيد
رغم إنو أبوى مُشير شعرًا عنيد
ورغم أنى بغنى مــن زمنــاً بعيد
إلا لسه ما وَصـــل درجة عقيد
وإنت واعى وفوق كلامك مابزيد
وإنت ماك ناقص يتموك بالقصيد
وإنت مما قمت ناظمو وليهو سيد
مستوى المتنــبى والنابــغه ولبيد
واعى ديمه سماك عـامر بالجديد
وعًــمَّ غيثك عامره ومـــا خلا بيد
كان مناى ألقاك وأسالمك إيد فى إيد
وإن تشرَّف بى لقاك أكون سعيد
منك أسمع لـــى قديمك والجديد
والفرح يغمرنى دنياى تبقى عيد
فى الختام يا واسطة العقد الفريد
ليك منـــاى العزه والعمر المديد
وليك مناى من الله يديك ماتريد
السلام لى أهل القرير وليهم نريد
لى شبابــا وشيبـــا للطفل الــــوليد
الكرم يى حقهم والعِـــــز رصيد
دى المماثله الـدُر تجّمــل كل جيد
والسلام للشعراء فىالريف والصعيد
ولى ولاد شايــق قريبم والبعيد
عهدى ود الدابى يــا حُمد سعيد
ولى ولد عثمان صديقك والنديد
ولأى فنانـــا عزف غنى النشيد
والجميع ليهم سلامى بدون عديد
ديل حقيقه رجال جدارهم من حديد
وبيهم إتفاخر وأقول أنــا ما وحيد

[اشتياق القرير]

لو كان فـى إيدىَّ المراد أنـــــــا كنت أرضيت كلّ زول
لكن لقيتو أكيد محــال مع إنـو فـى خاطــرى بيجول
كم قلت أواصـل للجميـــع لكنـــو كيـف درب الوصول
مادام كـلامى غلبنـى أسَـوى أصبح مجــرد قول فى قول
مـرات أنظـَّـم وقتــى أقــول عـن زول غيابى أنـا ما يطول
ألقـاهو أدراج الريــاح راح الكـــلام ومُنــــــــاى يزول
تلقـانى محتــــار فى الأسوِِّى خفضت نظرى بقيت خجول
ويبقــالى أخيــر أقطــع كُراعى وعندهم تب مـا أجــول
خوف المـلامـه ..أنـا ما بطيقه وَكِت يلومـو أنا شن أقول
أنا لــو لقيــت زاجـل الحمــام مَثلنى أصبــح لى رســول
يوصـــل مَحــل ما دُرت أزور لــى قلبى يقضيهـا الميول
فـــى كــلْ فــرح يقعـــد يشـــارك فيهو يضرب للطبــــول
وكْتَ الحُــزن يقعـــد يخفف للحــــــــزين بعض الذهول

[اشتياق القرير]

مسكين يا رهين الغربة.. مسكين طال إسارك
لامـــتين القـــيود تتحــل.. ترجــع لـي ديـارك
جيتا وعش مآسي.. تقـاسي.. متوطـيها نارك
وحــتى العــيد سمـعتبو مــره.. مـاطلاك زارك
لا صـحاك صـبيح الرؤيـه.. لاهـو قعـد جوارك
قـال ليك: عـيد مـبارك يلاّ.. ألبس داك غـيارك
لا اتعمعمت لا اتجـلببت.. فرحـان زاد نضـارك
يا مســكين تـراك تحـنن العـدو.. بـي غُــبارك
لا عــيد عــلى الأخــوان.. ولا هــنيت جـــارك
لا رح (ود عجل) صليتا.. لا زول قـال مـبارك
لا شافــت عــيونك فرحــة.. لا لاعب صغـارك
لا غــنيت أغـــاني البهجــة.. مـــتبكم كـنـارك
ممــا جيتا بس وريني.. قول لي: شن عمارك
غير حرقة ونحيب متوالي.. قاعد شن خـبارك
بوصيك كان سمعت وصيتي.. لي حالك تدارك
وصية زول عيونو عليكا.. من كل قـلبو دارك
ايه خـلاك تفـارق الحـله.. لي مين سبت دارك
مين شالك رماك في قفرة.. من نيلك هو دارك
وين داك الزمان الصافي.. نازل قاص خـدارك
والجدول متسبي مويتو.. قـراع طـول نهـارك
كت سعـيد بحـالك راضـي.. ليه فـكيت جبارك
ليه درب الأهــل فـارقتو.. ليـه غـير مســارك
مــا كان اليقـين ماليكا.. ده المقسوم شعـارك
مالك ومال لهـيب الغــربة.. يتطـاير شــرارك
في خـــيرين هــناكع كـت.. تـاكل في ثمــارك
وخوفي عليكا مـن الفــيهو لا يـاكل حســارك
تبكي وتشكي لي طنبورك.. آمسكين ضرارك
أجارك الله.. اجارك الله.. فـي فقــدك أجــارك

[اشتياق القرير]

بين مِطرقـة وسَــندان، أصبحــــت يا إخـوان
لا لاقي مـا جابني، لا العــودة للأوطان
جابني الزمان، جابني، كت ظـانِي ألقى جـنان
إلا الأمـاني بقــــت: مــتوهّط النيــران
الآهة ساكنه الجوف، أمسي وأبيت ندمــــان
يا ريتني تب ما جيت، ولعنتَ للشيطان
لو كان صبرت قَعَدْ هل كان بموت جيعــــان؟
هادا السؤال المُر، خلاني خالي جَـــنان
وَكَرَهْ ودَخَلْ فيها، من جيت صِبِح محــــــنان
سهّل لي دربي أعود، يا ربي يا حنّان
يامــا نظمــت حــروف، مـــأساتي في أوزان
لو كان تفيدني قليل زادت شقاي هَيَجان
وين يا صباح يا رباح، نسماتك الريحــان
من جيت لفحني هجير، دايماً عليْ حزّان
خـلّيت رياضي هناك، بستان ورا بســــتان
والليلة شوف شدري، من غير صَفَق عيدان
ضــاق صــدري من سَكَني، وقفّيلة البيبان
داير البراح يا ناس، وين ديلك الحيشان
وين لمّة المغرب، وشاينا أب لبن يا زمان
يا ليلنا ليّ تعــال، أسعِــد قَــلِب حــزنان
دايرلو قعـــده هــناك فـــوق ديلك القيزان
وطنبور حنين يمسح دمعي البسيل ريقان
أوتار شجــية تَرن وترنيمــة مــن فـــنان
شايلاها نسمة ليل، في أبدع الألحان
يا ليلي يا ممــتد، قطــران عُــقُب قــطران
مالك بخلْ برؤى ما شـرط اشوفه عيان
أحــلم بأني هــناك، بين أهــلي والحِـــبّان
ينسرّ كان خاطري، حتى أن بقيت حلمان

[اشتياق القرير]

تراها العين بصيرة .. إلا الأيد قصيرة
محكوم بي إرادة المولى .. ما لي فيها خيرة
ديل حولين تمام يا السمحة.. عشمان في سفيرة
أوصل بيها لكن آه .. قيودي بقيت أسيره
جافة حياتي غيرك إنتي .. مابتصب مطيرة
ما إنتي السحاب لي روحي ..يسقي لي خديره
وين ست الحسان في قريرنا .. ما حبيت غيره
عاد يا ناس حقيقة الطولة .. صح صعبة ومريره
لا متين يا كريم توصلني .. لى زهرة قريره
دي المن مروي لا قوز هندي .. يتفاوح عبيره
متين أسمع زغاريد قاجي .. في ساعة الضريرة
وأشوف أختي ومعاها الوالدة .. يربطوا في الحريره
أخواني وجميع خلاني .. الحبان وجيره
فرحانين تشوفها وجوهنا ..منسرة ونضيره
حتّن للنخيل والمنقة ..قطعن لي سيره
تردد في العديل والزين .. يشيله معاها طيره
بيت مال وعيال قالن لي .. تنهلوا منو خيره
تبنوا الجنة أما الريدة ..ليها تكون حصيره
تتبدل حياتكم ديكه .. من صيفه وهجيره
وتبقالكم نعيم شان انتو .. صافين السريره

[اشتياق القرير]

حبايبنا كيف الحال بعد غيبتنا من داركم
دحين فكرتو فى زولا مضا شهرين ما زاركم ؟
فضل يتعقب الجايين يكوس يتنسم اخباركم
يقول يبرد لهيب قلبا محرق ديمه بى ناركم
***
هيا ..... حلوين ... حليل ايامن بى غادى
ويا حلوين ... حليل ... مجلسكم الهادى
وحليل ..... انسا .... متل ترنيمة الشادى
حليلوالعده خلاكم وبلاكم باقى مو عادى
***
حبايبنا ... بقت كيف اماسيكم ؟
بعد ودعتو محبوبا يصاحكم ويماسيكم
مشرق بى قواربو الريح مفارق لى مراسيكم
يحاول .... مره ينساكم .... وينسى انو ناسيكم
***
هيا يا حلوين ... لهيب اشواقنا ... شاوينا
ويا حلوين ... بسيمات مين ... تداوينا
ويا حلوين ... نقول ... لى مين ... غناوينا
وقصائدنا .... تفتش ... عن عناوينا
وما اجمل .... عناوينا ...
***
حبايبنا ... سلامتنا تحايانا
واذا راجين هدايانا ....
دى يا حلوين مغطرسه بين حنايانا
لا بتنشاف ولا بتنشال !
دى ... من اطهر مزايانا
واذا ما قدر الله نعود ...
ونكشف ..... عن خبايانا
اصبرو وغنوا يا حلوين
غنو...وقولو جايانا

[اشتياق القرير]

مالي مال البعد المرير ومالو كان لازمت القرير
ياحسن وجرقندي المروّه الحقوني حتل جوّه كير
جيت مهاجر قلت القى خير بيهو نسعد ويربى الصغير
الا جيت وازداد العلي من هجير اصبح في سعير
لا تقولو معاك السرير اشتكيلو البيك كان يدير
نحن مشتركين في العذاب وبرضو زيي يكوس في النصير
بينا حال العدو حالو أخير وخوفنا يبقى الموت يا المصير
من عذاب يزداد كل يوم في طريق مكتوب أن نسير
ياحليل وياحليل القرير وياحليل الزمن النضير
بين جناين تسبي العقول والجروف وألوان الخدير
اشتهيت لي قعيده العصير بين صحابي وفوق الحفير
ولّا ونسه على الرمله ديك صافيه في ضيْ قمراً منير
وينو مامان ود المدير وين غُنا وطنبورو الشهير
كل زول فينا ضربلو فج ياكريم اجمعنا آقدير
جيت وقيعكم هل من مجير يمسح الدماع الغزير
بي حروف من يانع القصيد تبقى زادي لباقي العمير
كلكـــم فنــاناً قديـــر ينظم الياقوت في الحرير
كان كتمت البيْ ماشكيت الا صِر في حالاً خطير
لو لقيت مناي كان بطيرالا كيف بجناحي الكسير
داير اعود بي عَدلي آ صحاب مو اجازه تكون فد شهير

[اشتياق القرير]

اقيف يا طيف اقيف وارجانى ... وين فايتى عابر
شن حارس وراك انا تانى .. يانى معاك مسافر
لالا لاتقول لى اى كدى استنانى... بمشى واجيك باكر
يبقى انا ما الم فيك تانى ... مين عارف المصاير
الليلة هاك اسمع رنين الحانى .. وابقى معاى سامر
وخفف لى قليل احزانى ... يا ما انا عشت صابر
شوف كيفن يسوى زمانى ... ديمة على جاير
آه مر العذاب ورانى ... سهمو فى قلبى غاير
شوف الليلة كيف بستانى ... دا الكان ماشى ناضر
من حر السموم بيعانى ... طيرو يفر يهاجر
أحوم وارجع واصد لبكانى ... مقطوع راسى حاير
وين احبابى وين خلانى ... آه يا الله قادر
ما عارف العلى ترانى ... فوق كرعى ساير
اسكت اسوى فى اوزانى .. اشعار مالا آخر
الليلة يا طيف عليك أحزانى ...لى شوية كابر
عشان خاطر قليبى عشانى لحظات بس تخاطر