رساله من بركل الشموخ إلي الهكر الممسوخ

[زكريا بابكر عمر]

أحبابي الكرام لاشك أن المحنه كانت كبيره وتملكنا الغضب جميعا وكل منا عبر عن ذلك الغضب بما جادت به أريحته وأعتلج به صدره وقد إعتصرنا الألم ونحن نري بأم أعيننا البركل وهو يحجب عننا وبأيدي آثمه لا تراعي إلآ ولا ذمه . هنا وجهت رساله للهكر(وإن جاءت علي عجل) إلا إنها تنفيس عن غضب أبي إلا أن يخرج وبأي شكل كان بغض النظر عن التنميق وإختيار الكلمات التي تليق بمكانة وقامة البركل.. فعذرا يابركل إن جاءت كلماتي بلسانك أقل وأصغر من حجمك الذي يعرفه القاصي والداني فتقبلوها مني أحبتي ومعها إعتذاري ...

أنا البركل بيعزه وهمت رجال
تاني جيت راجع ياالهكر
إنته لو قايل ليكا بركع
تبقي زي البحرت في البحر
إنته خرب وناسي يبنو
ومافي زولا فيهن فتر
أقرأ في التاريخ يابليد
وشوف شنو المكتوب في الحجر؟
من زمن ترهاقا وبعانخي
مافي ولدا عندي إنكسر
ديل بنو الإهرامات ياغبي
يغلبن يبنو خراب هكر؟
زوره نوري وشوف العجب
وفي الكرو التاريخ مسطر
أصلي محروس من زمان
بالأسود الفي صدر الجبل
إن جريت بيورايا تتعب
وين في بيضه تناطح الحجر؟
فيك طبايع إبليس اللعين
وكان متين إبليس إنتصر؟
حتي في ضربك زول خسيس
تجري تلبت في الحفر
أبقي راجل واجه عديل
عشان تبقي عبره أبد الدهر
خالد الحاج مافاضي فيك
تهوي الكلاب وماشي الجمل
جايي من أصلاب صفوة رجال
من سلاله عريقه إنحدر
مابيهزو المتلك ياجبان
ومافي جبلا تموصو المطر
وأصلو لو عفصك مابتقوم
لو في دربو رماك القدر
في شغلتك زي الحمار
بيقفاهو يرمي البعر
ماهو فاهم سجم الرماد
ويحمل الأسفار في الضهر
ماتغرك براعتك ياغشيم
عاملنا في الحاسوب بروفيسر
ياما في الحاسوب من رجال
وحواء والده كتير في البشر
أسأل الله السويتو تلقا
ويبقالك عمي في البصر
وإن شاء الله بركة الجمعه دي
ماتكمل باقي الشهر
وليجهنم وبئس المصير
تبقي مع أبولهب الكفر

# # #

[ضمره بغدادى]

زكريا ......روعة وابداع عديييييييييييل
الله يديك العافيه

[أب شخيت]

الأخ المبدع زكريا

كالعهد بك دوما صاحب شاعرية مرهفة لا تجارى..وتعابير بليغة جميلة..لو لقيت لي زمن -إنت عارف ظروف اخوك المزنوق- عندي فكرة الكتابة عن الجماليات في القصايد الزي دي...

[حسان سرالختم]

ابداع والله يا زكريا
ونحن وراك نقول اميييييييييييييييييييييييييين

[محمد علي عشرات]

أماني ما فشيتنا يا زكريا ............تسلم يمينك ويسلم قلمك النصيح ولسانك الفصيح.

[خالد الحاج]

الله يديك العافية يا زكريا
ما خليت للغبيان جنبة يرقد عليها
ونقول اللهم آمين

تسلم يا ملك

[محمد الطيب]

الاخ زكريا يسلم لسانك وربنا يديك العافيه على هذا الابداع
والله ماخليت للجبان صفحه يتكل عليها
ونحن وراك اللهم امين اللهم امين
تسلم بامبدع

[النافعابى]

زكريا يارايع روعة البركل انت قلت كلام خطير للهكر
مااظنو بيرجا الشهر ينقاد عميان للكجر
ومناى عند الله يعصرو الجبل
وياربى يدقشو القطر

[الخزين ود نصر]

أمانى يا زكريا ما إتفشيت فى الهكر وفشيتنا معاك

يديك العافى

[عصام سرالختم]

ما أظن بعد الكلام ده الهكر يجى جيهت البركل
طبعا ده لو عندو شوية احاسيس او مشاعر
ياربى بيشعر ويحس !!!!!!! ؟؟؟؟
ان شاء الله قشه ما تعتر لك يا اخوى زكريا

[الهادي قنديل]

تسلم تسلم يا ابوالزيك والله لكن نضمك فشه المغسه العلينا من عمايل الهكر فينا
الله ينصر دينك يازكريا ود بابكر

[عوض جلاس]

يسلم لسانك يا زكريا والهكر دا كان عندو شوية دم بعد النبيشة الاتنبشها من الورى والقدام والكلام الاتكتب فيهو دا كان يجينا هنا ويعتذر ويقدم فروض الطاعة للأخ خالد ويبقى خدام تحت كرعينو وخالد كان ما حيقصر ويقولوا أذهبوا فأنتم الطلقاء

[رمزى محمد الحسن]

حبيبنا زكريا ، ، ، ، ،صح لسانك زي ما بيقولو
بس بيدو انو للهكر (اللعين) بعض الفوائد
و رب ضارة نافعة، ، ، الله يديك العافيه

[على محجوب جعفر مصطفى]

الله يديك العافى ياابن عمى
وجنس ده مابيفهمو الغبيان ده

[على بابكر ابراهيم بابكر]

إبن خالى لك التحيـة وقد أبدعت وهذا عهدنا بك دائمأ وفشيت غبينتنا زى ما قالوا الجماعة ونسأل الله أن يستجيب الدعاء .

[محمد تاج الدين بغدادي]

الرائع جدا زكريا دوما متحفنا بمثل هذا الكلام الجميل..
لو ما اخاف الكذب اقول انت احسن من معتوق الاماراتي

[زكريا بابكر عمر]

أعزائي وأحبابي المتداخلين لكم مني الشكر أجزله ونسأل الله الكريم ورب العرش العظيم أن يقصم ظهر هذا المعتوه ويكفينا شروره فهو نعم المولي ونعم المجيب... مره أخري أحييكم وأحيي فيكم هذه الروح الأبيه والجباه العاليه التي تأبي الخضوع والإنكسار إلا لله رب العالمين والتي تأبي الضيم والذل والهوان لهذا الوضيع الجبان العرديد ...فاليهنأ البركل بكم حماتا له من كل معتدي أثيم ....أشد علي أيديكم واليحفظكم ألله .

[عمر مجذوب خطيب]

روعة ما فشتيني يا زكريا - لكن اعمل حسابك الزويل يفتش عقابك في النت ويسلط فيك-
تسلم ود اهلي العزيز

[ضمره بغدادى]

حبيبنا زكريا ، ، ، ، ،صح لسانك زي ما بيقولو
بس بيدو انو للهكر (اللعين) بعض الفوائد
و رب ضارة نافعة، ، ، الله يديك العافيه


بركالى
كيف حالك
عليك الله شوف سماحة التمرة دى كيفنها .. بالله دى جنسها شنو ولقيته وين؟؟

[رمزى محمد الحسن]

اخونا ابو عمر
انشالله طيبين انت و وليداتك
دي اظنها من ايام زماااااااااان
قااااااااااااااسي تعود تاني
بس قول الله يعيدها و يعيد الايام
الجميلة و الزمن السمح