ابداعات الرائع عادل عثمان الطيب بمنتدى البركل ...

[محمد الامين]

أحبتى بمنتدى البركل كل سنه وانتو طيبين وربنا يجعل أيامكم كلها أعياداً ...
الأستاذ عادل عثمان الطيب أحد المبدعين فى بلادى يشرفنا بحضوره الأنيق هنا فى منتدى البركل ويقوم بعمل رائع جدّاً فى التوثيق لبعض الأعمال النادره لمجموعه من الشعراء وحتى لا تضيع هذه الأعمال فى زحمة المنتدى العام رأيت أن نخصص بوست هنا فى منتدى الشعر حتى نجمع أعماله التى يقوم بكتابتها فى المنتدى العام - بعد اذنه طبعاً - وذلك من اجل توثيق هذه الاعمال الجديره بالتوثيق ومن أجل تحقيق واحده من أهداف هذا المنتدى ....


تحياتـى ...

[محمد الامين]

هذه من روائع اخونا حميد ومن جميل الصدف انو ملحنها هو
بي نفسو وطبعا للذين لا يعرفون حميد فهو ملحن كتير من
الاعمال الجميلة ولكني اسغرب لماذا لم تري النور
يا عضم ضهر المعزة
ويا تقل زولا براهو
يا مرقتو مع الجماعة
يا ستر حالو وضراهو
في الزمانات الجفيلة

يا شدير الخير في صنك
ياك سراباتي البظنك
والشموش طعمني حنك
ياتو ريح تنتفني منك
يا مواثيقي العليهن
تاكل احلامي العديلة
زي شرف تكايو انتي
يا شرف كمين قبيلة
خشي سعن البينا اكنك
يا هجيرية وظليلة

تشبهي العيد في بلدنا
بالمسافرين البجوهو
والبطينين التمدر
في غرق فرحا رجوهو

الشارات التضرس
في صدور الامهات
التهز سعف الحناجر
التجبد اغنيات
عند دغيش الليل
تفقش في الدياجر زغردات
تبهل الزين والعديلة
من شرف دخلة صباحك
يا هجيرية وظليلة

ما حصل جيتك لقيتك
الا عازمالك سحابة
في خلا البلد السقاهو
يبدا من عطش الغلابي
وينتهي بك يا ترابه
يا سماواته ونخيلة
وفي النخل شن ماب يفرح
هيلا
يا ابنوسة هيلا
ويا تبلدية واراكة
كل حوبة وليها خيله

ذات وطن والناس حياري
والحمايم صان هديله
قلت يا ليل جو السكاري
والغناوي السايمة خيله

قلت يا نيل جو الصحاري
والقساوي الشادي حيله
وسنت الربذة الحجارة
وشكعت فوق فجري ليله
وجاني ظلم الدنيا جاري
لم قم قافر الغفاري
يا غفارية وجميلة

يا طعم عرق الشغيلة
والايادي التندهيله
وتندهك شبهك شبهنا
خيلنا من غلبك صهيله
وياتو ريح تنتفنا منك
وفي الاصابع الف حيله
هزي جزع البينا اكنك
غنوة يتساقط واشيله

[محمد الامين]

التحية لكم احبتي هذه القصيدة من الاعمال النادرة اشترك
في كتابتها الاخوان حميد حسن سالم والسر عثمان الطيب
ولحناها في منزل الصديق اخوانا صلاح عبد النبي هي والحمام


يا طالع الشجرة
جيب لي معاك وطن الجالو ياويني من كل خوف وحزن

حلم المحبة انباع
وكان الهوادة الشوق
انباع كاي متاع
بيعة الملح في السوق
وانباع معاه زمن
غالي وعرق مسروق
مع انو ماليه تمن
وطن العزاز الفوق

يا طالع الشجرة
زكتين تشب لافوق
في اول الاغسان
تلق الحلم مشنوق
الليل بقالو كفن
يكسي الصباح خازوق

القمري فر وطار
فوق راسنا خلف قوق
للفاتحة في الاشجار
واقفة النسائم روق

بي عشو عصفت ريح
ريح المحن والعوق
فنت جناهو جريح بالعبرتين مخنوق

يا عبرة الانسان
ويا زفرة المخنوق
في القطة والفيضان
ما يلقي غيرا علوق

يا طالع الشجرة
جيب لي معاك خيمة
تستر من المطرة
كان كبت الغيمة

جيب لي معاك قمحات
قمحاتنا في الشيمة
وغنم الحلب رايحات
ضلمنا ضليمة

خيمة الشحودي
دفو ماب تدفيكا
لبن اليهودي
بلدك ينسيكا
وقمحا من امريكا
خازوق ضرب فيكا
غير خير بواديكا
مافي اليكفيكا

يا طالع الشجرة
من خيمتك التوبة
جيبلك فروع خدرا
او جافة يا دوبا
في الحرة في المطرة
في عز برد طوبة
نمرق من الوكرة
وتبقالنا راكوبة

يا طالع الشجرة
قبل علي الحلة
قوليها يوم بكرة
كربتنا تنحله
ننزل نضويكي
ضرعاتنا مادله
قادرين نسوسكس
عقبان علي الله

[محمد الامين]

احبتي سوف نعرج بكم شوية الي غنا السبعينات والطفرة في
في الاغنية الشايقة وسوف اقوم بكتابة احدي الاغنيات الرائعة
والتي لم تنال حظها مثل باقي الاغاني من النشر مع انها سمعت
من اخونا الاستاذ الفنان صديق احمد ولكنها لم تغني كثيرا هذه
من الاغاني الرمزية التي كتبها الاخ السر في السبعينات مع
اني لم اكون في هذه الفترة قاعد اغني لكن الاغنية من ضمن
الاغاني التي حفظتها ولم انساها بعد ارجو ان تنال اعجابكم


تمري الما نجض دفيقو جوهو اتقسموهو وراحو
ما عارفين شقيت بي دربو بالحق لي نفوسون اباحو

تعبان يوم رميت شتلاتو ديل نامو منعمين وارتاحو
صنقر في الهجيري احرسو فد يوم جنبي تب مالاحو

حدر لي جداولو سقيتو بي وش القباحة اشاحو
جاو قالولي من وين جبتو مضبلن ماب يعدي صباحو

يوم سل الجراب وانشق شميت لي عطورو الفاحو
شفت جماعتي قامو اتلمو كل واحد يزيد في صياحو

واحد قال نقسمو علينا وواحد قال كتيري ارباحو
عقدوا الراي علي وديري قلبي جريح وزادو جراحو

فت خليت حقوقي ورحت لي ناس بالعدالة اطاحو
اشكيلن عذابي البي قاضيهم تصيبني رماحو

اتوكل علي الله صبرت هو المن خلقو اقوي سلاحو
ينصر للضعيف في الدنيا كان الهم كتر واجتاحو

حزنان الدباس في فريقنا ماطول نهار افراحو
يبكي معاي حتي الدابو ما اتعلم يفر لي جناحو

قالي لاتان يا خلي اكتم ناس كتير ماباحو
شوف حمد سعيد من صبرو متقلد عذابو وشاحو

يبق نهر حياتكم يصفي وتشربو سلسبيل رجراحو
كيرو الكان قبيل بي شيمتو منو يفوت بعيد تمساحو

تتهنو وتعرفو الفرحة ينتشي في الغصين صداحو
يعزف ديمة مزمار حبو وتسكرو كلكم بي راحو

[محمد الامين]

السلام عليكم ورحمة الله وبركاته اخوتي في المنتدي العامر البركل
يا اخوانا ماتعبتو من هذه الغربة تعالوا معي نرجع حتي ولو بالذاكرة
شويه للبلد والبيوت والناس الطيبين هناك هذه القصيدة من اجمل
قصايد اخونا حميد عملتلها لحن وعاجباني جدا اتمني ان تعجبكم



انا ماشي راجع لي بيوت
تفتح لي ادق او ما ادق
من غير تقول الزول منو
ولا حتي عل الداعي خير
لا مالك الجابك شنو

لي بيوت بجيهن في اي يوم
ان جيتا ليل ان جيت دغش
طوالي ادفر الباب واخش
مرات اضيق قاصر الطريق
من بيت لي بيت وفي بيتنا
زي خيط الدغش في ابر النهار
او زي نسيمة معدي شيمة
لا اش لاكش

خابراني كلوب الفريق
زولا صديق الليل
رفيق حجر الدغش
لاقطعت نوم النايمين
لا الباري للحيشان تقش
عند شوفتي تجري علي هدم
في محلها الشوق يترسم
تنجهني حتان بالاسم
تندهني عقبان تبتسم

هادي المخاليق مؤمنا
بسماحة الدنيا الهنا
كم تامنك يوم تامنا
ولا فرق بين الضيف وانا
غير كم كليمي ملونة
بالالفة هليج اعتنا
زولا يجيها في كل فجر
ولا ان يتم كمين سنة
تتلقي زي ام الجنا
وترشح سحابات المني
بالصحة بالعز بالهنا
ينجيك من اولاد الحرام
يحفظ يغتيك ربنا

هادي البيوت مطمنا
ودايما قريبي من البعيد
زي مو غريبي علي الدنا
ماها المريبي وماب تكيد
مفتوحة طيبي محاننه
مفتوحة لي كل البشر
كل الخلوق من طينها بس
كل البسيماتن تبق
لو وش زماناتن عبس
مفتوحة قلبا كلو خير
شايل حمالتو بلا جرس
مفتوحة كالفضا للطيور
وبيوضة للصيد والتبس
لاطبلة لا كيلون سوتش
ولا ترابيس لا جرس

وناس ست نور كتلو الكلب
كتلوهو مجبورين غصب
ما من نياحتو ولا سعر
ظنو الكلب بين الفريق
حامي البطينين اللعب
اخر الليالي من البيوت
قافل الطريق ساد الدرب

لا اخواتا قالت ست نور
مادام في امان والناي بخبر
سعي الكلاب في الحلي سر
هوهيوا بعزاق للاجر

احسن تعيش بي راحتا
تمشي الجناين يالبحر
ان كان تطفش للصبار
واب عفنة تشغل للورر

الحلي يكفيها الولاد
يكفي البهيمات الجداد
يكفي الطيور الفي الشدر
الحلي يكفيها البشر كان جاها شر
الحلي يكفيها الحصانة الفيها
ما دارت كجر
حرس الزرائب شن فضل فطن
الزرايب غير بعر

صنت شويتين ست نور
شالت حجر وجدعت حجر
جدعت حجر وشالت حجر
وقالت -- قرايبا زات ليل
يمكن يجوها من السفر
او زول غريب حاربو الدليل
عابر سبيل زانقو المطر
يقصد رواكيبهم جور

اول شيء ينلقي الكلب
الابيرحب لاب يبش
وليشن يتورنا الكلب
وليش الكلب يبقالن وش

وكان الكلب لازم يموت
الطفشوهو حرن يطش
وكان الكلب لازم يموت
شان المحنه الفي القلب
تحيا وخيوط زمن الوصال
لاتنسلب لاتنقلب
ومات الكلب

وين يا بيوت عز البرود
ضمتنا كونية دفي
من لدغة الصيف الغريب
قامت حواية همبريب
وتحت القمر حيشانا قيزان السمر
تدينا لامن نكتفي

يا بيوت من الخاطر قراب
ورهاب رهابات تختفي
الاعتذارات ماب تفي
وجيت مالقيتكم ماها في

ابوابنا مو صاجات حديد
يغسل درابزينا الرزاز
حيطانا مو اسمنت وحجر
شباكانا لاسيخ لو قزاز

يا ضو جماعاتا عزاز
زي ماك بشر ما منو شر
قص الدقل
يا شيل حطيبة من الارض
لاخوف ولفيت لاحذر
لي كلبة الكبد ابقي هاز
مفتاحنا مو اكتر من كشر
ما ابوابنا من شدر الحراز

والحيطة اقص من وصا
قالوها عند ساعة السفر
وكان القطر قام صوتو راز

البيت دا بيتك يا حبيب
ادخل مخير وماك غريب
انمده في اقرب عنقريب
مبهول في حوضو الهمبريب
النيمة يا العنابة ضل

اغشي التكل خرمان في شاي
جيعان اكل
وداك التمر والزير قريب
بايت من البارح ملان
راقد في صدر الهمبريب

[محمد الامين]

الاخوة الاعزاء في منتديات البركل تحياتي لكم وكل عام وانتم بخير
حقيقة انا بفتش علي موقع البركل مما دخل الهكر اخر مره وخرب
الشغلة وطبعا ما لقيت طريقة دخول الا قام الاخ خالد الحاج يديهو
العافي واللقمة الدافي ويسكنو الصافي بتفعيل دخولي يعني كلام
اخونا عوض جلاس اظنو حقيقي بانو الهكر يهودي واقف ضد قصيدة
تشيل علي العموم تاني حا نبعد من السياسة تب
قصيدة افتشلك للاخ السر عثمان الطيب هذه القصيدة قمت بتلحينها في السيارة دون طنبور وكانت اول اغنية تتلحن عندي
بلا طنبور



افتشلك وكت اضهب
وسط ليل الضنا الودر علي اثرك
حرس كل الدروب قنب 000 والاقيكي
نجيمة تضوي قدامي
اماسي سنيني وايامي
قوفل الشوق تقوم ترحل
عديل قاصداكي مابتتعب 00 والاقيكي
جروف امالي قاصداني
وايديك ممدودة خاتفاني
وعلي كفيكي شايلاني
تجاه بر الامان مركب 00 والاقيكي
افتشلك سراب صيف مادنا وقرب
قطع نفس الامل حسرة
مباري وما انقطع عشمو
وفقد راس خيتو واتوهدب 00 والاقيكي
سموم الدنيا كتاحة
هجاير فرقتك مره
ومتل اقداري لفاحة
كما الازمان دواليبا
تدور وتدور وتتقلب 00 0 والاقيكي

بكا صخرك عليك يا الخنسا ما كفا
تقيد نيرانو جيبت اسمك
يلوحلو علي الطلل رسمك
يفرتق جرتقو ويرحل
يفوت لا سيرة لا زفة
ورحيل لا قبلي لا مزهب 00 والاقيكي

وشي امي اليصابحني
وكلام اختي اليفرحني
ووفاء بتي التداعبني
وتكيل فوقي التراب تلعب 00 والاقيكي

وتر محزون بكا اتعذب
وكت رمت الهدم ثاكله
جرت ندبت بكت لطمت خدود فجر الغنا الغرب والاقيكي

قماري تقوقي احمد الرب
حمدت الرب تسابيحي
غناها يزيل تباريحي
اقيف وسط الخلوق عشقان
اغبي واتجرف واطرب 000 والاقيكي

ولقاك بالدنيا والفيها
ربيع ما اروع اللقيا
ورحيق ما ابدع السقيا
مقيلي معاك وسط واحة
اعيد للفرحة افراحة
سحاب طوالي دار دمعو
ويجود لا غشا لا كضب 000 والاقيييييييكي

[محمد الامين]

التحية لكل من رحب بعودتنا ولكن برضو كان عندي مشكلة الحمد
لله حلت طبعا عيوشة الناس سمعوها ضمن الشريط الذي نزل
باسمها ولكن في اضافات حذفت عند التسجيل وهي مهمممة
طبعا لحنتها ولم يسمعها حميد الا بعد ماطبعت في الشريط


عيوشة عيوشة عيوشة منبوشة
نبشوها قبالك بت حاله زي حالك
عودا انبهت حرقان زي شتلة معطوشة

عينيها رماشة ام لمبة فتاشة
من طاقة جات الريح كتر البكا التجريح
خلاها دعموشة عيوشة عيوشة

تاوشة والله ضفاف
خيم عليها جفاف
زي صرخة الغرقان
فوق موجة بين فيضان
شعراتها منفوشة

شفع مبارياها عيوشة عيوشة
الليل هديماتا وشمش الله برطوشة
تشرب من الشارع وتاكل من الكوشة
شفع مبارياها عيوشة عيوشة
ترقصلهم رقبة صقري جابودي
الامبا كاروشا عيوشة جامايكا
اسلولي عيوشة عيوشة ماب ترقص
عيوشة ماب ترقص لكنها الدوشة

تفلت من الشفع في الفلتة تنترتع
تدخل علي بيتا ستاتو منمدي
ناسا بعرفوها لكن يعافوها
دايرين غسيل عدي شاكرين يا دقلوشة
يدوها عيشاتا بي دمعة مرشوشة
وتنملك الشارع خطواتا مربوشة
في السوق مع الاطفال عيوشة عيوشة
الليل هديماتا وشمش الله برطوشة
تشرب من الشارع وتاكل من الكوشة
علي قدر ما كاست عينيها مالاقات
غير مطبقة وبصل المطبقة انهردت
والبصل مقروششششششة

يا جرحنا الحايم يلبد اذا ماشاف
صحبانو مكشوشة يضحك اذا الكومر
قبل علي كوبر والله المديري
يمكق الفرحة بس فرحة مغشوشة
ان تنجا من كشة تلتيل ودريرة
كيف تنجا من جوعا من بردها وليلا
عزت برنداتا واوكارا مطروشة
بيت الله قافلنو المستشفي غافرنو
ساحت مرشوشة
كمكم يوم يعز النوم رغما عن المشموم
والدوخة والدوشة
دي مدينة ما هيلك ماقي البيشبهلك
ومافي البخاويلك غي ناس احاويلن
قطعت احاويلك اصحابك الساعتك لابد
يعاينولك صمتا يجيبولك باكر تلاقيهم
فوق وجبة فوق كوشة جنب مجري يحكولك
ودونا لي ضابط كالعادة وانكفرن
قال وين اوديهم والعندي ماقادر بالموية اكفيهم
والعسكر ادونا سيطان وفكونا
كالعادة يا اخونا حيكومة مربوشة
دايرين شغل مافيش غير نغسل العربات
غير نضرب الاورنيش حمالة جرسونات
شغلا ما ياكل عيش وبالحالة دي الكشة
بلديه والبوليس ومرات يجيبو الديش
مايقبضو الباعوش مايقبضو الضبان
الماب يدور فتيش الارزقي السمسار
اش معني نحن وليش
نحن الحرامي والله البدسو العيش
الزول يخاف يكفر يرجع يقول معليش
معليش يا عيوشة
من تكبر اه واه وادم يريد حواه
الطيرة بي عشوشة والفارة بي جحاره
الكل بي ماءواه وهنا في ابن ادم تاه
ملجاه ارض الله لا اوضة لا حوشة
عيوشة عيوشة لااوضة لا حوشة مسكيني عيوشة

[محمد الامين]

التحية لكم احبتي وهذه ايضا من القصايد المعشعشة في
الذاكرة التي تغنا بها استاذنا ود كرم الله وصدح بها هي وكثير
من اغاني السبعينات الخالدة خلود البركل طبعا من اوائل
قصايد الاخ السر ايضا



يالمشتهنك وفي غيابك بالنا بيك ضم انشغل
والنوم وراك يبقالن شر فارق عيونا خلاص رحل

ضايقين متين ترجع تعود نسال متين قطرك يصل
حارسين شويفعنا البجيب لينا البشارة يجيب امل
يجري ويناهد من بعيد شايلو شنطة وبي عجل
يفرح يقول خليتو جاي وراي يسالم في الاهل

والساعة ديك عاد البلد تنجارا قاصداك يا السمح
والناس توسوس لي بعض ي داك وصل والله صح
حتي الكان محزون وباكي اليلي عاد هش وفرح
بي يوم رجوعك يا حبيب روحنا تب يبرا الجرح

والساقي بعد العنكبوت الفوق حطيبا خلاص بنا
بعد الكاءبة ومسحة الحزن العليها مهيمنا
مرقت تلاقيك زي عروس متعطرة ومتزينة

جدولنا من بعد اليباس الكان موجع تقنتو
بعد السنين العاشا في بعدك بيكتم انتو
بلقاك فرح جاك زي عريس يادوب جديدج بي حنتو

والقمري من بعد الالم والحسرة والنوح والجراح
جفنو من بعد الدموع العاشا يادوب استراح
رسل غنيواتا حنان في نشوة صفق بالجناح
فوق السبيط زوزا ورقص طربان يزغرد للصباح

واوتار طنابيرنا البت يا حبي في غيبتك ترن
وحلفت محال ما تجيب نغم يسعد قلوبنا ويفرحن
عادت هي متل ايام زمان تفرح نفوسنا وتبهجن

[محمد الامين]

وهذه ايضا من الاغاني الجميلة الخالدة والعامرة بكل جميل
السر عثمان الطيب


قلبي ولهان قلبي يا ناس قبلو عاد وحيدو
راح ضهب تاه كتر الاه دار يموت بي ريدو


العذاب طال هادي والحال لم كشكش قيدو
لا مرق حام ولا رقد نام جفنو طال تسهيدو

قلبي بالليل باقي بالحيل النواح بيجيدو
صارع الهم ومابي ينجم بيهو عالم سيدو

وصلوا القول قولوا مكتول جيبوا زكرو وعيدو
كان هو بيحن ورو كيفن المصير بي ايدو

كان مشي الدار لي الحبيب زار يبقي داك يوم عيدو
تاني ينعم وبرضو يسلم من زمانو وكيدو

عارفو فنان يرسل الحان يا حلات تغريدو
بالحنين زاب وغنا كم جاب كان غناهو يفيدو

للصعيد داك خلي قوماك يالله ننظر صيدو
تلقه كيف كيف حتي في الصيف خلفو جاري وليدو

في التمر فوق تسمع القوق للدباس بي نشيدو
في البلد طاف ما جفل خاف ما الخلوق بتريدو

قوس قزح بان للسحاب زان زي عقيد في جيدو
الفرح زاد والغصن عاد حلوه نايره ورودو

البرق فر ومرة كركر غيمنا رابطه رعودو
الرزاز رش وخدر القش تاني زاد فرهيدو

[عصام سرالختم]

وهذه واحدة من اروع القصائد المغناة قديما

قول الناس

محمد سعيد دفع الله


........................................
البوجع قليبي أنا ديمه فيهو النار يقيد

ده القول البقولو الناس يقولو علي سعيد

ماعارفين قليبي وحالو كيف عايش وحيد

والبعطف عليه نساهو منو رحل بعيد

كم قاسي العذاب متوالي كل صباح جديد

غرقان فوق هموم آهاتو كل مايوم تزيد

وشبيه البي تحت فى امو مال فدع الجريد

لاحام الدباس بي فوقو لا أتمدتلو إيد

حارساً ليه قاسي قليبو مصنوع من حديد

بالليل والنهار قاضيهو لا نوم لا غميد

ماراعي القرابه والالفه والريد الشديد

ولا حنن لقلبو قليبي أنا المكتول شهيد

يمر العيد طروبه الناس تغنى تميل تميد

الا قليبي حزنان باكي ما مرابو عيد

عايش فى الارض غير هادي زي طفلاً شديد

البكا والنواح هداهو ليهو اكيد يبيد