المساعد الشخصي الرقمي

مشاهدة النسخة كاملة : الشاعر/محمد أحمد علي الحبيب


شهرزاد
10-22-2008, 11:12 AM
هدام الزمان

هدام الزمان وراها كيفن تستغل النيل
بعدما إستوت وإتفدعت للشيل
***
غاصت فى مياهو الصافى
ما زى البجيبه السيل
يا نخلتنا رحلة عافى
ودعى من ديارنا نخيل
***
جوز من قمرى أمنا زاتو
طوَّل بين جريدا نزيل
طاحت بى عشيش أولادو
وأطعمت السمك فى النيل
مالت وإنتكت قنعانى
من بلداً وطاها الفيل
فى رحلة علاج مجانى
لى أرض الكنانه عديل
***
بجبوج من بداية الرحله
تتبكى ودموعا تسيل
جزيرة أم سيوف زى نحله
خاشى على ديارا دخيل
***
سارت فى طريقا براها
لا تأشيره لا بهديل
لا حر السفاره صلاها
لا صوت العسس والخيل
***
الشاطراب مغارب جاتا
مرَّت فى طريقا طويل
مديسيسه وجميع جاراتا
هداها الحزن بالحيل
ظلت طمبنارتى تنادى
ما عارفاها بى كم ميل
فاتت تنقسى وبى غادى
مارى مرور كرام بالليل
***
زارت ناوا بعد الهجعه
سهرانه ومناما قليل
لكن ضاع طريق الرجعه
وين تلقالو تانى سبيل
***
كان لى صاى وكان لى عبرى
عارفات المقالب ديل
قالت ليها مهما تجرى
ما حتلقى ليهو بديل
***
يبكى على فراقا نخيلنا
من الكُرشه للقنديل
ود لقاى وحتى مدينَّا
والبركاوى صبرو جميل
***
ما سمعت نصيحة أُماتا
إتمادت عنادا هبيل
سارعت و أسرعت خطواتا
خشت فى البحيره عديل

شهرزاد
10-22-2008, 11:14 AM
يا صباح العيد

يا صباح العيد حبابك رغم إنك ماك سعيد
وماني شايف فيكا بهجة المهم بس غايتو عيد
كل عام الناس تقابلك في تياب فرحاً جديد
إلا أنا الراقد مكوم في ظلام ليلي المديد
إنت كم هدمت عالم من أماني بنيتا ريد
في طفولة أحلامي كانت ياها مقصودي الوحيد
إنت سريوتاً مسلط كم ختف قدامي صيد
ربى في قلبي المخاوف من ضحى زمناً بعيد
يا معيد الماضي شيشك ما ختا السماك عيد
فيك حبال الذكرى تختف تحجز الدم في الوريد
يا معين دمعات يتامى باكي في صبحك شهيد
كان حبل قارب رجاها وإنقطع في موج شديد
يلا خف بي سرعة روِّح سو مشي شيطان مريد
لامن الأيام تجيبك يبقى تلقى الحال سعيد

شهرزاد
10-22-2008, 11:19 AM
لحظة في حضرة عيونك

لحظة في حضرة عيونـك وحاجبة المرسوم هـلال
ياها آخر أمنياتـــــي في حياتي ولا تـــزال
ذكرياتك يا أمانـــــي باقي رغم الماضـي زال
باقي نبراس الأغانـــي لما ليل الفرقة طـــال
لسة بتذكر وصالــــك آهة ما أحلي الوصــال
الزمان ياعابرة شالـــك من دنايا بلا قتــــال
سابني ماقادر أقــــارن بين حقايقك والخيـــال
قلبي في قلب المدايـــن وإيدي في إيد الشمــال
عابرة يا عطش القوافــي لما شديت الرحــــال
لي ديارك وإنتي جافــي شاردة زي بحر الغـزال
عابرة ياظبية فيافــــي سارحة بينات الجبــال
فرصة لي لقياها مافــي مافي حتي ولا احتمــال
يسألوني عن القصائـــد وإنتي في دنياي ســؤال
في الضحي المنشور قصائدوالغد المأمول محـــال
عابرة ديناصور غرامــي عابرة تظهر من خـلال
إعترافاتي وكلامــــي ماضي كان موجود وزال
عابرة من دون الرسائــل ليه رسالاتك قــــلال
حالتي من يوم جيت قايـل تبقي بيناتنا اتصــــال
كم زرعنا الريد دوالــي أزهرت أغصانو شــال
عتقت خمر الليالــــي بينا عند اللقيا مــــال
واللي كان ياعابرة وينــو ما الزمن ماعندو حـال
مرة يسقـيك بي إيدينــو ومرة يديك بالنعـــال
عابرة مشتاق لي عيونـك وحاجبة المرسوم هـلال
عابرة كل الدنيا دونــك تافهة والأيام تقــــال

شهرزاد
10-22-2008, 11:25 AM
الجنة الضائعة
يا جدي العظيم يا أعظم الأجداد
حليل زمن الطفولة العشتو بين إيديكا هاني
إنت كم سافرت .. كم سامرت
كم افنيت عمرك كلو شان في لحظة فيها سعيد تراني
***
في بحر العلم كافحت ما ضنيت عليا
وعلى بحر الحنان دفقتوا ما خليت بقية
حرام في لحظة تتلاشى وحرام في الدنيا ما نتلاقي تاني
محال أنساك ...
يمين ذكراك ترن جواي رنين السيف مع الدرع اليماني
***
يا بيوتاً في النخيل تتشابى زي شيتاً خرافي
بيكي عصفت كم عواصف وبيكي كم هبت هبايب
يدعوا صمتك للمخاوف وإنتي ثابتي ولا بتخافي
***
فيكي إتربيت صغيِّر ولسة بتخيل وجودي
وفيكي كان عهد الطفولة ونومي في أحضان جدودي
وفيكي عايشت الليالي في زمان من عمري صافي
***
وين حجا فاطني أم حجل حجوني بيها
فاطني في جوايا عاشت إلا آه ما عشت فيها
والفضل في شعري ليها وفيها نظمت القوافي
***
يا نخيلاً بالنسيم ينتاكا من طول الرقاب
يا بيوتاً كالسفينة العايمي في بحراً عباب
إنتي بعد الكعبة ليا .. كعبة إحرامي وطوافي
***
يا زهوراً في الحياض نشوانة تضحك من بكايا على فراقي
ويا خداراً في المرن تيلان يهبهب في الشراقي
نعيم الدنيا خير الدنيا فيكي وفي رفاقي
***
يا حنين جواي يرفرف في الحنايا
ويا عيوناً طيبة ما قصدت شقايا
على مر السنين بهديكي قبلاتي وعناقي
***
يا خطراً عظيم طوقني من كل النواحي
يا مثالاً في الجمال والعفة في طبعي وصراحي
بعد ذكراكي ما هبت نسايم
وأحبك ما حييتا وما فضل في عمري باقي
***
يا حليل زمن المراكب والمقاطيف والمداري
والقواسيب والمناجل والرواكيب والطواري
ويا حليل اهل المروة الراح زمانا مع السواقي
***
إلعن ابو الصنع البوابير التدودو .
في دروب العيشي كترت الشكاوي
ومحروق سما الجاب المدارس في البلد .
بيها انطفت نار الخلاوي
يا جدوداً في طريق الكلمة وسعت الخطاوي
ويا رجالاً كم روت في الحكمة من بيت الكلاوي
***
يا عيون من عيني غابت
كم خواطر بيها طابت
قلبي مشتاق لي حديثن ولي مديح الكلة فوق ود ابكراوي
***
يا حجاياً بيهو كسرت الدقايق
من قصص في الماضي كان حصلت حقايق
إلا بي طولت الزمن صارت مقولة وشالتا الأجيال حكاوي
***
يا جنة نعيم مفقودة ....
ضيعناها ما راعينا فيهو جدودنا كم سهرت ليالي
مهما أطير مهما أحلق في سما اشعاري
ما بقدر اوصف ليك مدى شوقي الخيالي
ينعل أبو الزمن الربط عيشتنا
بي ناساً تدوس إحساسنا أبداً ما بتبالي
الله يلعن ابوها حالة ويلعن النفس الصغيرة وينعل الشيخ الضلالي
***
أصلي من قمت وعرفت الدنيا
يا أهل العقول النايرة أنصار الفضيلة
ما لاقاني أقرف من الزول
تلقى شايب ويمارس قلة الحيا والرزيلة
وما لاقاني اخيب من الشاب تلقاهو عدمان النفيلة
وما لاقاني اقبح من لباس الموضة في البت الطويلة

شهرزاد
10-22-2008, 11:29 AM
فــاطـني
يا فاطني هاك تمن التي سكبت يداك وشربتها
أنجم موقعي من سماء ليل الضياع جمَّـعتها
هي آخر الكلمات شعر لا قبلها ولا بعدها
***
لو منك إنقطع العشم صعب المرام ما فيش رجا
نجيني من طوفان هواك ما قبلي كان إبليس نجا
أنا كم شرحتلك العذاب حجيتك الآلام حجا
بلت هديماتي الدموع شريتا فوق حبل الصبر نشفتها
***
صبراً جميل حتى الصبر شافوا إتوهم
ناديتو قــرِّب مني جاي ظناني أيوب إبتسم
حدثتو بي قصصك معاي قطَّعت كبدو من الألم
يا مُرة الزمن العجيب وين الأماني الفي الطفولة حلمتها
***
سافرتلن عبر الخيال ووصلتهن عند العشي
مريت بالدرب الزمان عاينتلك ما شفت شي
قنبت فوق درب الترك كلت خطايا من المشي
مرت عليَّ وجوه كتار زمناً طويل ما شفتها
***
لاقيت هناك حظي التعيس شايلوا شوكي ألَّت كتر
صادفني سايح في البلاد ظنيتوا نبي الله الخضر
لميتو علمني السهاد فارقتوا علمني الشعر
كلمات عشقتها في الصغر والليلة جانا غلا المهور عرستها
***
لاقتني بت سجم الرماد خايب الرجا
لاقتني مارقي مع العصير لي بيت عرس متبرجا
صوت المسجل والهجيج لنب النيون والبهرجا
ضحكت معاي قربت أجن خزنت في طرف الظلط ركبتها
***
طشينا من بيت العرس خشيت معاها السينما
شاهدنا أفلام الكفر جوانا طفل الشر نما
واتحقق الحلم القبيل ظنيتو أبعد من نجيمات السما
نامت عيوني على الذنوب وأنا في الحقيقة اسهرتها
***
وفضلت لافي على إيجار دورت ما لاقيلا بيت
لا في الكلاكلة ولا المسح لا في الصحافة ولا أركويت
كوركت أرجعي بيت ابوك قالت لي باكر وين ابيت
ساعة خلاص حار الفكر سويتا في بيت من شعر وسكنتها
***
باكر مرقت بلا فطور واصل مرقت بلا غدي
كوركت في آخر النهار ملعون أبو الزمن الردي
يحرق حضارتك يا مدن لو كان بقت بالحالة دي
شن فايدة الكرم الرخيص لما الفضيلة كتلتها
***
إيه الدهاكم يا بشر بقت المآذن واهية
إيه الدهاكم يا بشر ما بين تكونوا سواسية
بشراك يا زمن الدجل لا فيك رسل لا أنبيا
افنيت مواثيق الجدود مريت على كل العهود نكستها
***
أسفاي على يوسف كلاماً قالوا أيوب في الكبر
والليلة بتأسف عليك مع إنو ما ذهب البصر
ماشين على جباً عميق دقت نواقيس الخطر
شبعت تماسيحنا الأمس والليلة جات واحدات صغار رشحتها
***
وأيديا فوق قلبي وأخاف من بكرة تكبر وتفتري
تحرم غنيماتي الورود تقطع قلوبن بالجري
تجمع تسابق في الزمن تركب حصان إبليس عري
تمسك دروب أمماً خلت خسرت نفوسا وربها
***
وأمرق أاذن زي امس يا ظالمة جبتيلنا الجلا
ما تستحي وما تختشي وما ترجعي ورجعك بلا
فزينا خلينا البحر لاحقانا في صوف الخلا
تعلن علي عدة تهم أنا لا رأيتا ولا حياتي عملتها
***
ترميني في جوف السجن تهجم علي الذكريات
وأسأل عن السر العظيم سر المباني الشامخات
وأكتب على حيط السجن مأتم شرف جوانا مات
وأرجع وألوم نفسي وأقول أنا ما قبيل ايدتها
***
ما كان قبيل شفنا التجسس والعدالة الناجزة
كانت قوية على الضعيف لكن عن القوي عاجزة
رفضت دخول الباب عديل فرضت دخول النافذة
إش معنى يا شعبي الكريم بعد التسلط والمحن سامحتها
***
ليكي كم غنيت كـم مقـال الجروف والتمـر الطـوال
كان فراقـك شبـه المحـال عمري ما ختيتلوا احتمـال
فيكي مـا جـرَّ قلـم خيـال إلا مـا يوحيهـو الجمـال
***
كم في بعدك لاقيت صعـاب وكم شرب كاسات من عذاب
الدمع كالسيل يجري صـاب والشعر ينسـاب إنسيـاب
لازم أمشي القوز للصحـاب رغم سيد الناس منو غاب
***
دار اشاقـق فيهـو بالنيـل في مريكب عنـد الأصيـل
البنـات واردات سلسبـيـل وجاري حادر سر كرنقيـل
دار اشوف شتلة مع العليـل زي عروس ترقص في التقيل
***
السواقـي وعهدهـا الـراح كم بكيت كم عانيت جـراح
في نسايـم شـق الصبـاح زي بلابل الدوح صوتا ناح
داير أطيـر بالشـوق إلا آح كيف يطير مكسور الجنـاح
***
كـل منايـا أقابـل الرفـاق داير اسالم ناس بالعنـاق
قلبي إسمـك ليهـو خفـاق وفي مداين شعرو عمـلاق
والكريم لـو حـلَّ الوثـاق ناوي أجيك والله مشتـاق

شهرزاد
10-22-2008, 11:33 AM
تعالي علي الأقل نرتاح
بعد فرقة سنين طالت بلا إصلاح
تعالـي علـى الأقـل نـرتـاح
***
تعالي عشان منـاي مجـروح
يئـن بيـن الجسـد والـروح
عشان يا عابـرة لمـا نـروح
نخـلـد ذكـرنـا الـفــواح
***
تراكي بـراك عرفتـي الشـوق
وكت ساقة القواسـي تسـوق
يناطح موجـا فـي الباشـوق
متـل زمـنـاً ردي ونـاطـاح
***
وراكـي عرفـت درب اللـيـل
بـلا ناسـاً يـشـدو الحـيـل
ركـب زمنـاً عنيـد بلحـيـل
يميـن زي المـهـر جـمـاح
***
كتيـر باصرتـو لـي قــدام
مراقـبـو وعيـنـي لـلأيـام
عنيد يـا عابـرة مافـي كـلام
بـدون أغفـل رمـانـي وراح
***
مـن الحـزن اللبسنـا وشـاح
تعالـي النخـلـق الأفــراح
نعـوض يـا أمانـي الــراح
ونصطـاد الأمـل كــان لاح
***
حييتـك فـي الربيـع أبيـات
شعـر مانـام شتاهـو بيـات
وداخـرك للسمـوم واحــات
تلـطِّـف حـرهـا الـلـفـاح
***
ذكاك يـا عابـرة مـا ضنيـن
ولا بيختلفـو فيهـو اتنـيـن
عرفتـك مـن سنيـن وسنيـن
منـو الـزي عقلـك اللـمـاح
***
حفظتك فـي دفاتـري اشعـار
وفـي درب الصبـر إصــرار
وشايلـك فـي الخيـال تذكـار
يمـر قدامـي ليـل وصـبـاح
***
وحيد يا عابـرة جافـي النـوم
متل بايـت القـوى المحمـوم
أهضرب من سريـري وأقـوم
حـداي تتـبـارز الأشـبـاح
***
يلـف دولاب همومـي يـدور
هـمـوم يتعاقـبـن بـالـدور
متين يشـرق صباحـك نـور
يشـق قلـب الظـلام يجتـاح
***
أنا اليـا عابـرة ليـك منقـاد
مُصِـر أمـلأ الفجـاج إنشـاد
وإذا اجتمعـت بـلاد وبــلاد
بواظب كان غلط كـان صـاح

شهرزاد
10-22-2008, 11:37 AM
أغفري لي غنايا

أغفري لي غنايا تبجيلي وعتابي
اللفارقك وامشي طاهر لي ترابي
***
في دربك شقيت في الدنيا واتبهدل شبابي
لا كمان في الآخرة بيكي يزيد عذابي
***
كم مشيت في رحلة في ارض الدوابي
وبي قلوب آراما كم فازت حرابي
***
إلا من غابت كلابي وراكي في خلف الروابي
لا عادت عيونك تاني لا عادن كلابي
***
كنت قايلك واحة ليك شديت ركاب
وجيت لقيتك جافة وازدادت صعابي
***
حر شموسك بيها اتبخر شرابي
إنتي بس وريني ليه عاجبك خرابي
***
يا آخر مناي في الدنيا يا سر اكتئابي
مهما ضاق رحابك بيا ليك واسع رحابي
***
أنا البحر الكبير مترامي أبحري في عبابي
سيري على مياهي المرة وأشربي من سحابي
***
غوصي في أعماقي فتشي في الخوابي
شيلي زي ما شئتي درة على حسابي
***
إلا بس أرجوكي يوم يُكتب غيابي
صبي من عينيكي دمعة على شبابي
***
قولي كان يا حليلوا يحلم بي خطابي
ومن زمان ناسياهو رايح من صوابي

شهرزاد
10-22-2008, 11:40 AM
بتذكـرك
بتذكرك عند الأصيل والطير يغرد في الغصون
يحتج على شفق المغيب والنيل بينساب في سكون
والنسمة تعبث بالنخيل بتذكرك في كل شيء بتذكرك
بتذكرك والكون بيعكس في المياه
لون الغروب إبداع عجيب أجمل صور خلقا الإله
صور المراكب راسية في الشاطي القريب
لوحات جمال منتشرة في كل اتجاه
بتذكرك والليل بيطمس كل لون عند الغروب
والناس بتحسس خطاها على الدروب
غرقانة في النور الضئيل بتذكرك في كل شيء بتذكرك
بتذكرك في ليل مثير فيهو القمر بلغ الكمال
بتذكرك في هجعة التلت الأخير والنور يضاحك في التلال
والساري أضناهو المسير والنوم يداعب في جفونو مع العليل
بتذكرك في كل شيء بتذكرك ساعة السحر
والنور بيولد من جديد والنسمة تلثم في الزهر
والنور بيشرق بالأمل ممتد على الأفق البعيد
والكون بينهض في كسل من رقدة الليل الطويل
بتذكرك في كل شيء بتذكرك
بتذكرك في يوم خريف لمعان بروق ورزاز خفيف
والجو بينذر بالمطر بتذكرك في زوبعة رعدو المخيف
والريح تزمجر في الشجر والقرية تسبح في الغيوم
في يوم نهارو كأنو ليل
بتذكرك وألقاكي في جيش من سحايب انفتح
مشطورة بي سيف الشعاع مرسوم عليهن قوس قزح
بتذكرك والطيب غمر كل البقاع والطير يغرد بي فرح
لوحات طبيعة بدون يراع أوصافا فوق المستحيل
بتذكرك في حر شديد زي شوقي ليك ضلل عيونو من الصواب
كم شفت في الأفق البعيد غابات شجر غرقانة في بحر الرهاب
والجو بيبعث بالضجر والروح بتحلم بالشراب
شادد رحالي ورا السراب أصبحت زي ابن السبيل
بتذكرك في ذكرة الماضي السحيق
بتذكرك وأنا جد حزين
بتذكرك في هوة النوم العميق
والروح تعانق في الخيال في لحظة ترجع كم سنين
بتذكرك والموت يحول دون العشيق
كيفن أموت أنا مرتين
بتذكرك ساعة وداع والناس تجهز للرحيل
بتذكرك واتذكرك في كل شيء بتذكرك

شهرزاد
10-22-2008, 12:01 PM
أنت سراب
ياعابرة انتي سراب لكن حقيقية
جوايا بين البين لا ميتة لاك حية
يادار أماني سلام بالشوق عرفناكي
مشتاق لرؤياها من قبل رؤياكي
وريها قيس في الباب مستني يلاكي
راجيكي رغم الكان لوعندك النية
رغم الظروف الآن ياعابرة ماناسي
انك معاي في يوم قدرتي إحساسي
ما أجمل الإلفة لولا الفراق قاسي
ياريتنا لا كنا ولا بينا حنية
ترغب فتاة اليوم في فارس أحلاما
أموالو قبل الريد في عرف أحكاما
وماشرط جات من وين ماطال قداما
باكر تطالع الناس في خدعة زوجية
ماهي ملك الزول العقلو شيطاني
عايش بفكر الغير لكنو سوداني
سلب حقوق الناس في طابع انساني
الفكرة حب الذات والنظرة مادية
والكاتب المسكين منحورة أحلامو
دايماً حياتو خيال ماواضحة قدامو
يسمع ضجيج أطفال في غمرة أوهامو
بينن يعيش في بيت أحلامو وردي
يابوي صباح الخير ياماما كيف حالك
ماالليلة عيد ميلاد مانحنا أطفالك
مبروك هدية العيد شيتاً يسر بالك
قبلاتنا والإخلاص عديها عيدية
ولمن يفيق بيصيح من صدمة الواقع
في قبضة التجار بين الديون راكع
من وطأة الأمطار أولادو في الشارع
ومستني آخر الدور راجيلو ماهية
وأمنا المخازن وين أزفت من الكاتب
هم في الحقيقة أخوان في القيمة والراتب
أضحت قضاياهم حبلاً علي قارب
واتجسد الإهمال هيئات نقابية
لاقاني جبر الدار بالصدفة لاقيتو
راجل عجوز ثرثار شايل هموم بيتو
شرح لي في الأحوال الطلعت زيتو
أصغيتلو بي إخلاص سويتو راديَّا
مابينو بين علان الحيطة مكسورة
جات كلبة الجيران سعراني مسعورة
لاقت عماد في الحوش يلعبلو في كورة
نامتلو في الإبهام والدنيا عصرية
عجلان علي الدكتور أسرعت وديتو
راجنو لا بالليل ماجانا من بيتو
لمان وصل شفقان أسرعت لاقيتو
قبل الكشف في الحال طقاني بي مية
وأداني روشتة خطاها وقافي
فتشت في الأسواق مصل السعر مافي
ياإبني شيلا معاك ساعدني من مافي
ما إنت زول شغال في وحدة طبية
ياإبني سارح وين وأنا في هموم رابطة
لايبقي قولي معاك أذنت في مالطة
حاول بقدر الكان شغل الزمن واسطة
ما إنت والمسئول الكل حرامية
أبداً كلامو صحيح هزتني أقوالو
لكني زيو تمام زولاً قدر حالو
آلامو آلامي وأحوالي أحوالو
لكن عن المسئول ماجابا فوق نية
ياعمي جبر الدار ماك البراك حاير
أنا وانت من مليون بيها الزمن داير
جمجمة الآمال فيها الجرح غاير
القاضي والدكتور اليمشو في داهية
يحيا الدكاترة جميع أنا عنهم راضي
هم مننا ولينا الآسي القاضي
من غيرن الإضراب زي الكلام فاضي
أنا قاصد الماسكين خانات وزارية
أورنيك من الإسكان تلقاهو في الصحة
وبالعكس في الإسكان تطلب دوا قحة
ياعمي جبر الدار ديل للوطن قرحة
أنواع من التسهيل أغراضا حزبية
مليون صحيفة تبين مرسولة للقاري
فيها الخبر منشور واضح عديل عاري
تظهر صحيفة دفاع تنفي النبا الجاري
والشارع المسكين في محو أمية
يامعشر البوليس ما إنتو إخواني
ساعدوني في التخليص من قبضة الجاني
بس قللوا البمبان من فترة للتاني
بكرة الحقيقة تبين لي ناس عواطلية
مايلا يا أولاد خارجونا خارجونا
الكاكي عز ام زين اليدو مضمونة
حرية التجار حرية مطعونة
الموت ولا الأحزاب في رايي حرية

شهرزاد
10-22-2008, 12:04 PM
حـبوبـة
حبوبة يا مرت العدل .... حاشاكي ما لمتك انا
أنا جايي بي سراً قديم .... دافننو في بجبوج هنا
هاكي الجواب أقريهو بي تاريخ متين
شوفيني عديت كم زمن .... حايم أفتش في كنين
كل البنات الكانو في حلة سعد
لاقني راجعات العصير .... جابن جريد ما عندو حد
جارات مسابقات العجاج .... خايفات من الهوا والرعد
لكن كنين ما شفتها .... لا يبقى راحت للأبد
والحق كنين لا ريشة بتشيلا الهبوب
لا شالا سحار ود حمد
أنا متهم ناساً كُبار .... وبالذات كمان شيخ البلد
أنا متهم كل المشايخ من طرف
ضايف على ورق اتهاماتي العُمد
أنا ضد تقاليداً بقت .... في جيدنا حبلاً من مسد
وكل الظروف الفرتقت عش حبنا
هجرت أمانينا الزمان لامِن عليها الطين بنا
يا صمد ساقتنا ما لاقيت كنين
ارأف على حالتنا ما بيناتنا طين
همك مع طلب التمر وأنا في كنين
ظنيتا في درس العصر .... باريت دريب المدرسة
صاقر ولاد جابر براي .... لامن علي الليل مسا
درَّجت ماشي على البيوت .... أكلت فؤادي الوسوسا
سويتا قيرا مع البطان .... غنينا ود الزمزمي
يا شيخ عليك الله تجي .... يا زول تعال بي عندنا
إن درت بقسم لك عشاي .... وإن درت نضبح عنزنا
حسابنا كورك يا ولاد .... ما تمشوا سيبوا الشيطنة
قلنالو مبروك يا فلان .... ضابح أماني مع الخروف
جبنا الأباريق من نهار .... غسَّلنا إيدين الضيوف
قال ليَّ إنت ولد منو .... يا إبني لوحك في شنو ؟؟
جاوبتو والإبريق فضى .... أنا شافع الزمن المضى
أنا ضد تقاليداً عجاف .... رهنت حياة الناس هنا
حمَّر لي بي عيناً لهب .... طنطنت ما عارف خطاي
لزاني قالي قليل أدب .... ترتع وقعت على قفاي
وأديتوا في المليان شعر .... كلماتي فوقوا مدرنة
صيَّحت بي آخر حنين .... يا شافعة إنتي مشيتي وين
شالك حمار النوم متين .... أنا في رجاك كمين سنة
فتشت بعد في الودع ....كايس وجيهك ما اتلقى
طوطحت معلاق الفكر .... في خاطري صورة معلقة
قدام عيوني اندلدلت .... تشبه حبال المشتقة
خلتني عايش في شرود .... دايماً محدق في الفنا
مرحاتنا من زمن المحد.... ما شفت فوقن قينقرد
طولنا راجين الرهد .... يا قوزنا ليه بحرك شرد
رقدت مراكب في اليباس .... قلَّعت خايد باللباس
عيشك على مر الزمن مرمول ضنا
زارعِك أماني على الجروف .... نامت بامنيتي الظروف
من حجوة جمَّعت الحروف .... عديتا طلعت بالألوف
دونت إسمك بالعريض .... فاطني أم حجل يا بتنا
هبت نسايم الليل تسر .... دبت على ذكراك دبيب
مريت بي قبل العصر .... والقمرا مالت للمغيب
سامع بنات يتحدثن .... بارن خطايا يوسوسن
يومِن علي ويضحكن .... حصنت نفسي وفتهن
عصرن علي يتكلمن .... رديت عليهن طنطنا
رغم الفراق البينا طال .... صورة عيونك في الخيال
أرفع على دارك خطاي .... القاها غاصت في الرمال
عايش تحت إيدك سنين .... مطرق سنط شوقك مَتين
ضارب على مزمار حزين .... يوماتي متواتيك غنا
يا قمرة ارمي السنسني .... واجم علي زمناً دني
شوفيلي كيف أحوالا كيف .... قوليلا بالشوق منحني
عاينيلا لا غاية الليدين .... حاداني ولا محننا
قطَّع عصب صبري الحنين .... يا دنيا سعد الغابة وين
شلتيهو فد زول ما بكا .... محت المشاغل ذكرتوا
نبشت قوافي تربتو .... مدفونة وين يا سرتو
لو ما في زولاً في عقابك .... يا سعد ابكيك أنا
ابكيك بكايا علي شليل .... يوم شالوا تمساح الهموم
عاكف علي ليلاً طويل .... من طولوا ساهر بي النجوم
متمني ارجع زي قبيل .... طفلاً على الأحضان ينوم
يا دنيا سُب فوقك عديل .... ما طال خير ما بيدوم
أصحاب يمينك في اليسار .... واصحابك يسارك ميمنة
حبوبة كتري من حجاي .... حجيني زين لا تنعسي
شايل أحاجيك في غناي .... شيت الصُغُر ما بيتنسي
يا ريت كنين كانت معاي .... كانت تقولك ونسي
دايماً محلق في سماي .... تشكيل قواما الهندسي
راسم على ألواح شقاي لوحات جميلة ملونة
زي زيني قومي على عشاك .... أكليهو يلاكي المديح
الليلي عند الحاج فلان .... من بدري نبَّاهُن يصيح
باكر يسير الحاج فجُر .... أدمع على الخدين تسيل
يمشوبوا خلوة ود بدر .... يرتاح هناك يبدأ الرحيل
والليلي جيتك يا بلد .... لا خلوة فيك لا ميضنة
عارش بنا الأحلام ورود .... شربك جبابيدي العِرق
كسَّر سنانيري الصدأ .... والناس إمورا مقددا
وأنا زول عيونو مسهدا .... يا كاينا من يوم ما بدأ
طوالي ماشي بلا هدى .... ويتمنى يوم لقياك منى

شهرزاد
10-22-2008, 12:45 PM
عبر الدم
أنا بي لقاك مهتم بس كيف تلاقيني
يا عابرة عبر الدم شايلاك شرايني
لو عمري يتقدم وأضمن تلاقيني
أنا بعدو ما بندم لو مُتَّ في حيني
***
دنيا العذاب والهم ماشيها وحداني
لي غيري تتبسم وفي قلبي احزاني
رغم الصبر علقم في صبري متفاني
مع اني بتألم من جوة وجداني
***
الطيف يزيدني اشواق في النوم يناجيني
ويرحل بدون إشفاق ساعة يصحيني
يا طيفها كان مشتاق لي مين مخليني
طفل الغرام العاق ربيتو مابيني
***
يا عابرة دنيا الجن بي كل أعاصيرا
لو سعدي ما ممكن احسن لي من غيرا
أنا بي لقاك مؤمن لكني في حيره
يصعب لقاك كيفن والدنيا بي خيرا
***
نهر الاماني سراب يا عابرة ارويني
غيم السماء الصباب طول مجافيني
والليل يزيدني عذاب في جوفو يطويني
كل ما الدمع ينساب من جفني يسقيني
***
يا عابرة حتى الآن عينيكي آسراني
سحراً ملكني زمان سكنتو اشعاري
راجيك زمن عطشان ما صبت امطاري
ليه في سحاب دخان يا القمرة تنضاري
***
يا اماني لي بكرة والليلي والبارح
شايلك معاي ذكرى كان واعي كان سارح
بس يوم تبين سفرة يا عابرة بي الواضح
في نيتي من فترة داير اجيك نازح
***
آه لو قدرت اجيك رؤياك مراد عيني
أكسير حياتي وشيك من حزني يشفيني
من اشتياقي إليك يا عابرة دسيني
ما بين رموش عينيك شيليني ختيني
***
كل البسيطة حسان يوم ما ملن عيني
غير عابرة مافي إنسان يهدمني يبنيني
آآه يا جمال فتان قلب موازيني
لولا صفاء الايمان يفتني في ديني
***
أنا كنت شئ مجهول يا عابرة لولاكي
مع أني أول زول من بين ضحاياكي
فرشّتِي عمري الشاق اشعار من إملاكي
كانت على الاطلاق أجمل هداياكي
***
مصباحك المسحور جاهرني عاميني
سايق خطاي مبهور يسوقني يوديني
ما عارف المقدور بالفرقة راجيني
خارج نطاق النور حايم حواليني
***
عابرة الزمن ظلام في ظلمو متوالي
بقت الحقيقة احلام واحزاني شيء عادي
واصبح علي الزام كل ما صدح شادي
اهديك مدى الايام ألحاني وانشادي

شهرزاد
10-22-2008, 12:50 PM
جرحي الأليم
عابـرة ياجرحـي الأليـم أيـام لـقـاك مابيرجـعـن
لكن محال يرجـع قديـم بيهـو الظـروف مابيسمحـن
***
أطياف تجيني خيال خيال همس السواقي يجي ويـروح
غرقان أشابي علي المحال من قلبـي مادايـر النـزوح
زي شتلة في حلق الرمال دار يبلعـا الزحـف الطمـوح
ماني البراي علي كل حال كل المخاليـق ... تندفـن
***
مرات بشوفك فـي المنـام رغـم المسافـات والنـوي
لو حتي ناقص ماهـو تـام متعشـي أوبايـت القـوي
بي رفعة إيدك فـي السـلام يرجـع زمانــا الإنطـوي
ياعابرة لوكان في المنـام رؤيـاك عيونـي بتسعـدن
***
خبـرك أناجيبـو الصبـاح ماكانـت البـارح مـعـاي
وإتمط فوق كميـن جنـاح وإتمـد فوقـا علـي قفـاي
وأسرق من الماضي اللي راح أمسح مزاميري وغنـاي
ياعابـرة بـي رغـم الجـراح البـي لسـع ينـزفـن
***
رغم الرياح والموج شديد وأنا لاني يوسف ولاني نـوح
لكن بحاول من جديد أبني السفايـن لـوح فـي لـوح
ويوم أرسي في الشاطي السعيد وألقاكي ياام وجهاً صبوح
ياعابرة بي عزمـي الحديـد كـل المسافـات يقصـرن
***
الفرحة كستهـا فـي الشمـوع لكـن لقيتـا بتنطفـي
في حفلة في غنـوة ربـوع إنشـاالله تظهـر وتختفـي
فتشـت لاغايـة الدمـوع لكـن براهـا الماهـا فــي
ياعابرة لـو كـان للرجـوع أيـام زمـان مابيرجعـن
***
ياعابرة في الزمن العجيب خايف عليك هـوس المـدن
بي نيتك الصافي الحليب وانصع بياضـا مـن القطـن
ذكراك تجيني قريب قريب زي نسمة في الجـو السخـن
ياعابرة ذكـراك ماهـا عيـب بيهـا وبلاهـا ينقنقـن
***
ياعابرة في ضي القمـر فـي ليلـة كتاحـة ودعـاش
متمدي لي مد البصر خلت عيونـي طشـاش طشـاش
وفي قلبي ريدك مافتر ينمو ويزيـد لـي اليلـه عـايش
ياعابرة ديمـة علـي سفـر روح الهيـام مابتنسجـن

شهرزاد
10-22-2008, 12:52 PM
أحـرف ضـياع
أحرف ضياع بهديها ليك مكتوبة بي دمع الشجن
مدفوعة بي موجات حنين كان تلقى في قلبك وطن
كم كنت بي حبك سعيد وعادت عليَّ سنين دجن
زجتني في ظلمة جفاك ولبست هجرانك كفن
عهد النعيم الكان معاك قضيتوا زي أحلام وسن
كان نعمة من فضل الزمان والليلة دفعني التمن
نوب الدهور زادن علي خلتني أدمنت الحزن
وأصبحت زي شجرة عذاب مغروسة في أرض المحن
وما أحزنك جور السنين خليتو يطويني الزمن
لكن منايا تكون سعيد لو حتى أيامك مضن
يا ريتني أخترق العهود وأعبر معاك خلف الزمن
لا تمضي من عمرك سنين لا بكرة يغشاك الوهن

شهرزاد
10-22-2008, 12:55 PM
آخـر لـقاء
صرخة طفل عند الوضوع تعني الحزن في فطرتو
إلا الظروف تمحى الألم أو قد تزيد من حدتوا
طائر يحلق فوق محيط فارق جماعتو وشلتو
نوبات ألم جرحاً قديم بالسفرة زادتو وطأتو
ورغم العنا وضعف الجناح مجبور يواصل رحلتو
وفقد الصبر وين الملاذ يا ربي استر غربتو
آه من ظروف آه من زمن آه من نوايبو وقسوتو
آه من جحيم آخر لقاء آه من نوايبو ولوعتو
قبال سنة وفي يوم خميس والصيف محكم قبضتو
رحل الربيع ترك الديار والكون عبس لي فرقتو
في روضة من أغنى الرياض عاشت بداية فرحتو
ونفس المكان الكان قبيل أول مسارح قصتو
كتب الإله لازم يكون آخر مكان لي لقيتو
طل القمر فوق التلال وزع شعاعو وفضتو
والليل مهيمن في الوجود أسبل سكونو وهيبتو
والنوم ملك كل القرى والناس جميع في حوزتو
نفحات عليل وحفيف وريقات في الغصون استسلمت لي هزتو
في الساعة ديك كان القدر اثبت جدارتو وقدرتو
اتنين هناك شايلين طفل شبح الفراق في سحنتو
زاغت عيونو من الألم في يوم أخير من دنيتو
واحد يجمع في الصبر مسكين يغالب دمعتو
واحد يخطط في التراب سارح بعيد في نظرتو
لحظات وجوم ساعة لعين فيها الحزن في قمتو
مين اليقول كلمة وداع مين البيكتم عبرتو
ولمان طلع نور الصباح والطير طلع من عشتو
الشوق بعد ما كان جمر ولع لهيب من شدتو
وحبل الصبر بالشوق يذوب مهما بلغ من قوتو
ونفس المكان الكان زمان فتح الصغير من زهرتو
فوق ربوة في تلك السهول رقد الغرام في تربتو
ومات السرور دفنت هناك آخر خيوط من ذكرتو
ولمان رحل حيث الظلام رحل الحبيب من قريتو
وفقد الفؤاد أول هنا وحتى الأمل في رجعتو
وعزم السفر من غير وعد كايس يخفف وجعتو
ترك البلد وأهل البلد فارق صحابو وشلتو
لكن هواكم يا سهام ما زال مشتت فكرتو
كلمات حنين عز الهجيع يصحو الفؤاد من غفوتو
متذكرك ابد الدهور طيفك مقيم في حضرتو
ليه يا عجيب تنسى البلد والنيل هناك في عزتو
واصل الكرم مزروع هناك كاسي الجروف بي خضرتو
أرجع هناك حيث الطرب حيث الجمال حيث الشعر في روعتو
جنات نعيم فوق الوصف وآدم قبيل في سنتو
سن الطمع لحظة لعين طردت ابوك من جنتو

شهرزاد
10-22-2008, 12:57 PM
بت المـداين
عابرة يا بنت المداين والمدن ما فيها عشرة
يا حليل أيامها راحت خلفت جواي حسرة
كل ما اقول آخر دي عابرة تاني ألقا اشعاري تترى
تندفع قدامي دافرة زي مياه النيل بتجري
وفي بوادي أحزاني فاضت وما إكتست وجداني خضرة
للأسف يا عابرة عارف إنو في دربك ضياعي
إلا برضو مصر أجازف حأظل طول عمري ساعي
ولي عيونك لازم أوصل وحتى لو ما اليلي بكرة
حبي ليك يا عابرة صادق حبي ما بيعرف فنادق
حبي من وحي الخنادق من زفير نفس البنادق
ولا بيقيف قدامو عايق ولا الرياح تمنعلو هجرة
كيف سواسيوك أسوقها في الضحى الحلق حِدي
فوق جزارات غالي سوقها بيها كل المافي زيو
ولا قدرت أخش أتاجر لاني قادر أرجع أقرأ
أقرأ إيه من غير عيونك وإنتي لي عيني سراجا
كيف زمانن قلّ نورو وشع فيهو الروح وإبتهاجا
وكل ما أصيح يا عابرة وينك وفي الصياح تخنقني عبرة
دا الحرام يا عابرة ظاهر شرحو ما بيصعب علينا
والحلال طيراً مهاجر ما بيرك يوم في المدينة
وتقرع أجراسو المداين والطيور إيمانها فطرة
ما الطيور إحساسها صادق تعرف الفجر الحيطلع
صادقي والإنسان مخادع حتى لو كان دابو يرضع
الجبال أبت الأمانة وشالها هسع واطي جمرة
ماضي في دنيا عنادو اليفوت كان فيها ينفع
مهما كان إدراكو واسع عابرة ما علم الله أوسع
وشوفي كيف روعة جلاله لما قال للأمي أقرأ

شهرزاد
10-22-2008, 01:00 PM
شـوق
السنين بتدور وتمضي وكل لحظة بلاكي مرة
واي غنوة اقولا بعدك خالية من كلمة مسرة
وكل ثانية تمر عليَّ بقول أحبك ألف مرة
ولو جمعت الدنيا بعدك حتى ما فوق المجرة
مابتعوضني الفقدتو وما بتعادل منو ذرة
***
كيف أطيق الدنيا واسعد وقطعة مني تكون بعيدة
عايشة في تحنان وإلفة وتاركة في جروح عديدة
ما حقيقة صعب عليَّ من بعد أيام سعيدة
فجأة أشعر إني تائه في ظلام نفسي الوحيدة
وفي عيوني الكون بيظلم كل لحظة تمر جديدة
***
السنين بتدور وتمضي وبرضو يمضي معاها عمري
وغصب عني فضلت صابر إلا آه ما بيجدي صبري
قصدي بس داير اشوفك لو رجعت سريع وبدري
مين بيعرف بكرة يحصل مافي زول بالدنيا يدري
يمكن الأيام تعجل وتنطوي الأسرار في صدري

شهرزاد
10-22-2008, 01:03 PM
ذكريات الطفولة
كنتي زينة عمري كلو وكنتي من دنياي صباها
كنتي شمعات في طريقي سرت أيام في هداها
لو فقدت حبيبة غيرك كان من الممكن لقاها
إلا إنتي بقيتي ذكرى شلتي في عيني اساها
مين يعيد عهد الطفولة ومين يبشر بي رؤاها
وإن بقت ولت سنينا مين يخفف من شجاها
يا قوافي أشعاري جودي وأحكي عن دنيا المسرة
ناجي أرواح اللي فاتو حتى لو فوق المجرة
يا مراكب شعري سيري بي رياح ماضينا حرة
فكي طيات من قلاعك وأدي حبل الذكرى جرة
دار اسافر بيكي وأرحل للسواقي زمن غناها
وألقى نفسي طفل صغيِّر فوق تكم راكب معاها
وأمشي اشيلوا وأقالدوا وأبكي كان تعرف الروح صباها
ونفسي تتمناهو تاني والسنين ترفض مناها
تقولي نفسك إنتي ظالمة وروحا صافية مع إلاها
أمشي سافر لي شبابك أمشي فتشي عن سواها
يا قوافي أشعاري جودي وأحكي عن دنيا المسرة
ناجي أرواح اللي فاتو حتى لو فوق المجرة
يا مراكب شعري سيري بي رياح ماضينا حرة
فكي طيات من قلاعك وأدي حبل الذكرى جرة
عشان تشوفي صفوف لعوبنا والشباب من بدري جاها
والرباب والصفقة عامري والتمر ردد صداها
وعشة زي الوزة عايمي والشعر هادل قفاها
وداك بخيت التركي بارِك وحس دليبوا مع خطاها
شوفي كيف ود الرسالة شايل الطنبور براها
ولما لفت دايري تمرق داك جر الصف وراها
يا قوافي أشعاري جودي وأحكي عن دنيا المسرة
ناجي أرواح اللي فاتو حتى لو فوق المجرة
يا مراكب شعري سيري بي رياح ماضينا حرة
فكي طيات من قلاعك وأدي حبل الذكرى جرة
شقي بي ماضي الليالي يبقى تلقى الروح عزاها
مري بي حبوبة فاتت وقولي حجوات من حجاها
وأحكي عن جدي وحياتو في خدار كسلا ورباها
وعن سواقي هناك كانت وقصة عن حلوف رواها
وعِن جبال التاكا أقيفي وأسألي القاش لو طراها
وسيري بينا سريع نواصل والسنين واسع مداها
يا قوافي أشعاري جودي وأحكي عن دنيا المسرة
ناجي أرواح اللي فاتو حتى لو فوق المجرة
يا مراكب شعري سيري بي رياح ماضينا حرة
فكي طيات من قلاعك وأدي حبل الذكرى جرة
شفتي بي غادي البهايم والصبي الساير وراها
شفتي كيف دربك مشيها والعُصار القام غشاها
وصلت النيل دايري تشرب والولد واقف رجاها
شوفي في رمضان ويشرب والشمش في عز ضحاها
شوفي يداك دار يشرك شالوا كم حبات رماها
داك أنا وزمن الطفولة يا حليل أيام مضاها
يا قوافي أشعاري جودي وأحكي عن دنيا المسرة
ناجي أرواح اللي فاتو حتى لو فوق المجرة
يا مراكب شعري سيري بي رياح ماضينا حرة
فكي طيات من قلاعك وأدي حبل الذكرى جرة
مري بي قيساب تقاتنا تلقي ريش الطير ملاها
كنا طول الليل ندور في الهجير والضل سماها
واي طيرة تقع في إيدنا ما أظن شافت فضاها
ليها أحمد مكي قاعد فوق غصون الشوك شواها
وكم كتير مرة انشكلنا وياما ناس حردت عشاها
بكرة زي حالتنا نرجع وكل ارضاً تمسي ماها
يا قوافي أشعاري جودي وأحكي عن دنيا المسرة
ناجي أرواح اللي فاتو حتى لو فوق المجرة
يا مراكب شعري سيري بي رياح ماضينا حرة
فكي طيات من قلاعك وأدي حبل الذكرى جرة
يا سلام لامن يجي الزول المسافر لي بلد طول نساها
ود فضل جاب الشنط قبل الفطور والزول وراها
وتجري يقولولك منو الترك البلد والليلي جاها
يقول كلكة جاتكم التقول في الدنيا ما عارف بلاها
وبت وقيع كانت تجينا في زمن بيعا وشراها
وبت نقد ست الشباطي وين مشت عاد يا تراها
يا قوافي أشعاري جودي وأحكي عن دنيا المسرة
ناجي أرواح اللي فاتو حتى لو فوق المجرة
يا مراكب شعري سيري بي رياح ماضينا حرة
فكي طيات من قلاعك وأدي حبل الذكرى جرة
ولمان الواحد يعاكس بس تقول ولد النجاشي
أي حاجة يدورا جاهزة حتى لو كان في مقاشي
وفي الأكل طوالي يصرخ التقول حاضر التعايشي
اللبن ما فيهو سكر مالو بس ساكت غباشي
وفي الرسل تلقاهو يرطن ياخي بمشي واجيهو غاشي
ولما يتضايق بيرفض ياخي قت لك ماني ماشي
يا قوافي أشعاري جودي وأحكي عن دنيا المسرة
ناجي أرواح اللي فاتو حتى لو فوق المجرة
يا مراكب شعري سيري بي رياح ماضينا حرة
فكي طيات من قلاعك وأدي حبل الذكرى جرة
ديكي ايام الطفولة جار زمانا الشوم طواها
يا شميعاتنا المنيرة عشنا ايام في ضياها
وكان منانا تدوم سنينا إلا ريح الهم طواها
وباقي ذكراها الحميدة زهرة يتفاوح شذاها

شهرزاد
10-22-2008, 01:06 PM
الحنجرة الذهبية
قلوبنا التايهة ما زالت تحن لي ذكرى ماضيها
ابت بي قولنا تتراجع مصرة وماشية في الفيها
صرخنا صراخ عشان تسمع وكتير حاولنا نهديها
تزيد في عنادا تتجاهل كأنو صراخنا ما ليها
بخاف بي شوقا للماضي دموع الذكرى تعميها
ويذوب من يدها الحاضر كما ذابت اماسيها
تعال يا نجمها الساطع إذا ما شئت غنيها
بلاك ساحتنا ما راحت أناشيدا وأغانيها
نفوسنا الباكية يا لامع منو الغيرك يواسيها
وحدائق فننا اليافع بلاك ما غنى شاديها
بدت أشجارا مخضرة بلا يزهر ورد فيها
كأنها ناقصة او تشبه قصيدة بدون قوافيها
نتابع صوتك الدافئ ونسيب الدنيا والفيها
بلاك دنيانا ما طابت ولا طابت لياليها
نقول للحاول إخراصك محال النجمة تطفيها
بعيد في سماها تتلامع منو اليقدر يصل ليها

شهرزاد
10-22-2008, 01:08 PM
عاشق عيونك
عاشق عيونك من زمان لكن خطاي مترددة
خايف يكون دربك عذاب وطرق جحيم متعددة
إخلاص صراحة اقولا ليك حبك حقيقة مؤكدة
لكني شايف بالغيوم اقطار سماكي ملبدة
حبك مفاتيح الهنا وأبواب هنايا موصدة
قوة شعور فوق الوصف شعلة حماس متوقدة
***
والله دايماً في الخيال إسمك حروفو مرددة
لكني بي طبعي الخجول صبحت حياتي معقدة
أكتب أحاسيسي وصبور والناس تقول متبلدة
لكني مهما أكون صبور قدراتي برضو محددة
حبك مفاتيح الهنا وأبواب هنايا موصدة
قوة شعور فوق الوصف شعلة حماس متوقدة
***
يا أنهر غرام شرب الفؤاد من منهلك
يا نور عيون تاهت كتير قبل اوصلك
هاك من منابع ريد غيور ما بيرضى للتوب يلمسك
وحتى الزمان رباكي شالك من صغِّير وقبلك
حبك مفاتيح الهنا وأبواب هنايا موصدة
قوة شعور فوق الوصف شعلة حماس متوقدة
***
والله يا إخلاص أحبك وقصدي يوم ما تعرفي
خايف أواجهك بالغرام من عيني باكر تخسفي
يكفيني إنك تكتبي من غير قصد في أحرفي
لكني لا بسعد بلاك لا من عيونك بكتفي
حبك مفاتيح الهنا وأبواب هنايا موصدة
قوة شعور فوق الوصف شعلة حماس متوقدة
***
يا ابنة الماضي السحيق كم للفؤاد فيك عربدة
كم عشت ايامك ربيع واليوم حياتي منكدة
مهما تجور الدنيا بي مهما تكون متشددة
يا منبع الحب العميق ذكرة هواكي متجددة
حبك مفاتيح الهنا وأبواب هنايا موصدة
قوة شعور فوق الوصف شعلة حماس متوقدة

شهرزاد
10-22-2008, 01:21 PM
مرثية المعسكر
يـا خبر عـم المعـسكر** يومك اسود وليلـنا عاكر
يـا ظلام لِـف فوقـنا دوِّر** وما أظن صبحك يبهر
تاني وين فجرك يـنور** والـفجـر سكن المقابـر
كنا زاحفين لما فرقع** في طريق الزحف مدفع
والـفجر قدامنا ترتع** في عيونا الدنيا غمت لما شالوهو العساكر
ويـن حلولك يا مـشاكل** والـمدافـع والـقـنـابـل
يومي تـأكل في السـنابل** لا متين يا السلم تظهر في الجنوب منك بوادر
يا فجر لو كـان بـتـطرا** فـي زمنا الكـنا نقـرا
يـوم تكون الجـمـعـة بكرة** لما كان عباس زمانو في مدارس كورتي ناظر
كـنا دايمـاً زي تـوائـم** كـان معانا صلاح وحاتـم
كـنا نملأ الـدنـيـا ضجة** ويرجـع الـصدى في العـنابر
يا الـفجـر دنيانـا ظـلمة** والزمـن ما عـندو ذمـة
ليه يـفرق بـينـا ضمـة** عينا لي أحلامنا حرقت ومن قبيل كانت نواضر
مـا أظـن بـعـدك بنفرح** وفي ضلوعـنا خيول بـتمرح
ومـن جريها شرار بيقدح** من لـقاء الحـصى بالحوافر
يا الفجر ما شـفت أمـك** بي حنانا هي دار تضـمك
زورا لو كان في مـناما** لما يبقى الـيل أواخر
تبكي حزناني المـدارس** والجوامع والكنائس
والبويـتات العوانس** والنخيل الفي بلدنا والمصحات والمتاجر
يـا عريـس من دون حريرة** يا حـفـيـد أولاد مهـيرة
يا الرجالـتك مافي غـيرا** يوم يجيبو ثناء القبائل بيك يا عابدين نفاخر
بكرة ذكـرك يـسـمو يكـبر** زي حجر لمان نـقـذفـو
لما وجـه الـموية يـصفو** تـبـدأ دائرة صغـيرة تـطفـو
وفـــي ثـوانــي نـواتــا تـكـبـر** وتـبـقى مـن عـدة دوائـر
يا شهـيـد يا عالي قدرك** كل زول يسمـعـبوا ذكرك
ليك يـكون عرفان بفـضلـك** حيا دمع الساري قبرك والسحيبات

ود إدريس
10-23-2008, 07:10 AM
الرائعه شهرزاد ....لك التحيه والتقدير ...
سوى غبنــــا أو حضرنـــــا يظل إبداعك سيل لا ينقطع
( لا تقولى ود إدريس سحرنى ..؟) بس قلنـــا مــا شاء الله
ومـــا أن نرى توقيعك بمشاركه جديده وإلا نعلم علم اليقين أن هناك
إبداع وعمل مرتب ....شكرا لك وأنتى تعرفينـــا وتمتعينـــا بهذا
الشعر الجميل ....دمتى بألف عافيه ..زلك ودى

شهرزاد
11-05-2008, 07:35 PM
الرائعه شهرزاد ....لك التحيه والتقدير ...
سوى غبنــــا أو حضرنـــــا يظل إبداعك سيل لا ينقطع
( لا تقولى ود إدريس سحرنى ..؟) بس قلنـــا مــا شاء الله
ومـــا أن نرى توقيعك بمشاركه جديده وإلا نعلم علم اليقين أن هناك
إبداع وعمل مرتب ....شكرا لك وأنتى تعرفينـــا وتمتعينـــا بهذا
الشعر الجميل ....دمتى بألف عافيه ..زلك ودى

الأخ ود إدريس
وأنا أيضاً أغيب وأعود لأجدك حضوراً باهياً
وسط كلمات القصائد التي تسعد بمرورك ..
ـــــــــــــــ
تحياتي ,,

شهرزاد
11-09-2008, 10:28 AM
عشــــــــــه
أنتى ماك عارفى الصبر شيم النفوس المسلمه
ولا لا يانور العيون وقعة سهامك مؤلمه
اه انا من عيونك ومن سيوفا صارمه
يا عشه من غير السيوف ليك القلوب مستسلمه
ساعة أرق فوق الورق تكتب حروفك وترسمه
والله يا منبع هناى بى سر جمالك ملهمه
خائف انا وشفقان من جور السنين القادمه
يا عشه برتاح لما أعيد لحظات طفولتى الحالمه
فيها كان عاش الفؤاد زهرة عميرو الباسمه
يقرا ويعيد درر القصيد لى فــــــــاطمه
اه انا من زمانى ومن سنينى المظلمه
ومين يقدر يثور ثورة حنينى العارمه
قولة حبيب عاشقو القليب فى دارنا عيب ومحرمه
يا عشه عادات الجدود ذات القيود المحكمه
اه انا من عذابى ومن مصايبى الدائمه
يا عشه من دون الشباب زى السحاب متراكمه
رحلة عمل جمعتنى بيك والله ما كنت أحلمه
واه لمان تحين لحظة فراقنا القاتمه
أطوى الجروح داخل الضلوع اصبر عليها واكتمه
حتى الدموع لمان تسيل الغيرى تب ما بيعلمه
يا عشه من بلدا بعيد لاقيت قبائل قادمه
شافوها فى لبس الحجيج بين القوافل محرمه
يا عشه صالينى الهجير ما شفت غيمه مغيمه
يا عشه من حظى التعيس حتى الرياح متأزمه
عشه يا مفتاح هناى يا نور حياتى المظلمه
عشه يا سلوى الحزين زينة بنات العاصمه
عشه فى درب الغرام لاقيت مواقف مؤلمه
يا حلوه جرعنى الزمان كاسات حناضل علقمه
ساعة وداع لحظة نحيب فوقنا الشقاوه مخيمه
يا عشة يوم دق الدليب من دارنا قامت فـــــاطمه
يا حلوه ما خليت بلاد سايقانى روحى الهائمه
رحلة عذاب طالت خلاص يا عشه وين الخاتمه
يا عشة وين الخاتمة

شهرزاد
11-09-2008, 10:31 AM
عصفور الصباح
عصفور الصباح بيغني لما الليـل يولي ستارو
سبحان الوضع ياعابرة في صدر الكنار مزمارو
كم يشجيني لما يغني يجلي الماضي بي اسرارو
شايفك بي وضوح ياأماني والكل في السنين إنضارو
في موكب هوانا أبحرنا في زمـن القدر اختارو
راقدين في أمان وغفلنا من ريح الفراق وإعصارو
يوم نزل العزول ساحتنا ما اتنبهنا لي اخطارو
ماقايلين ودادنا الصافي ما ح نجني غيـر تذكارو
مامليت يوم ذكراكي في درباً طويل مشوارو
كالنيل في البوادي بيجري يوم ماانعكس تيارو
بطراك وانتي وين ماكنتي لي عشق الفؤاد تكرارو
لو طيفك يطوف يغنيني من ليل النجـوم سمارو
حر أشواقي ليك ياعابرة أحر من الصيام ونهارو
مترقب زمن لقياكي زي ساعة الآذان وافطارو
مانساني طول المدة مـازال قلبي في إصرارو
مكتول العيون ياعابرة من وين دار يفتش تارو
ياكوكب سماي الضاوي ماغارت شهب في مدارو
كاسيهو الوقار بي حلة أجمل من زحل وأقمارو

شهرزاد
11-10-2008, 11:00 AM
بركان الحنين
بركان حنين جوة الضلوع هايج بيقذف في الحمم
كلمات مولعة كالشرار مدفوعة تخرج كالسهم
مأساتي فيك يا سمحتاً أكبر من البحر الخضم
مأساتي في البسمة اللي ماتت في الشفاه مطعونة بي سيف الألم
يا عاشق الشعر الحزين هل يرجع الضاع من عدم
هل شفت زول حاول يعبر عن هموم أصبح عدادن ذاتو هم
مارد حنين بين الضلوع لمان يصيح في إيدي يرتجف القلم
تعداد سنين مرت علي بعدك مسيخة بلا طعم
يا عشق الشعر الحزين هل شفت زول في الدنيا يتندم ندم
يرجع يعاتب نفسو من داخل الضمير ليه ابتسم
يا عاشق الشعر الحزين هل شفت زول من شِدَّ ما عقلو ازدحم
يحسب حساب قبال يتم يرجع يقول يا ربي كم
وهل شفت زول يذرف دموع مخلوطة بي اشواق ودم
وهل شفت زول صابر صبر حتى الصبر شافو اتهجم
وهل شفت زول مرت عليهو عدد سنين ما عارفو كم
يا عاشق الشعر الحزين دنيايا زي دنياك ألم
بستان أمل حاويهو بي سوراً عظيم فجأة اتهدم
أصبح دفين وغبار سنين فوقو اتردم
كيمان عذاب زي التراب يوم ظني خاب خمينا خم
أشعار نثرتها في الدروب أفضيتا كان تشفي السقم
بركان حنين بين الضلوع هايج بيقذف في الحمم
كلمات مولعة كالشرار مدفوعة تخرج كالسهم

شهرزاد
11-10-2008, 11:04 AM
ليالـي الهـم
أحبك حب عميق .. عميق ما بتحصرو الكلمات
وأذوب بالحسرة لي ماضيكي أيامي وزماني الفات
أشيل الليل مع ذكراك .. ذكراك إنتي بس بالذات
لا حاضر السنين يرحمني لا الجايات ولا الرايحات
ذاكر الماضي ما مليت عاينتك بكا وآهات
والجمر التهبوا الذكرى ما أظن تخمدو الدمعات
واتعذبت واتبهدلت واتجرعت من جمر العذاب كاسات
مدفون من زمان في الدنيا إلا فؤادي حي ما مات
لو ضقتي السهر فد مرة قبلك ضقتو كم مرات
فاتح لي الزمن طوالي من حر أم لهيب طاقات
يا القصرتي ما وصلتي وحيات المشت ما جات
وحات البينن اتربيتا من شفع ولاد وبنات
وحات الفي رمالوا قعدنا بي طنبورنا للحفلات
وحات الوزعت بي جيدا في دق الدليب رقصات
وحاتكم يا ولاد القوز وحات الفوق سبع سموات
وحات سامع دبيب النملة في الظلمات
لما أعيد شريط الذكرى وأرجع تاني كم سنوات
وألقى بناتنا بي درب الورود نازلات
وأشوف الما يجيبا حروف تتمايل مع الواردات
دريب الموية فوق خدينا سايل زي ندى الزهرات
ولما تقيف تصلح توبا كل ما هبت النسمات
وتمسح بي أنامل إيدا من فوق الجبين خصلات
ألقى الدنيا في عيني دارت بي كم دورات
ما ريدك تمام وراني في عز النهار نجمات
عشان عينيك بحب الكون وأترجم حبي في غنوات
وأعيش الباقي من ايامي في دربك اسى وحسرات
ورغم الفي الضلوع مكتوم أقول للدنيا في بسمات
حبابك يا ليالي الهم وداعاً يا صباح نسمات

محمد الامين
11-10-2008, 11:25 AM
عشــــــــــه
أنتى ماك عارفى الصبر شيم النفوس المسلمه
ولا لا يانور العيون وقعة سهامك مؤلمه
اه انا من عيونك ومن سيوفا صارمه
يا عشه من غير السيوف ليك القلوب مستسلمه
ساعة أرق فوق الورق تكتب حروفك وترسمه
والله يا منبع هناى بى سر جمالك ملهمه
خائف انا وشفقان من جور السنين القادمه
يا عشه برتاح لما أعيد لحظات طفولتى الحالمه
فيها كان عاش الفؤاد زهرة عميرو الباسمه
يقرا ويعيد درر القصيد لى فــــــــاطمه
اه انا من زمانى ومن سنينى المظلمه
ومين يقدر يثور ثورة حنينى العارمه
قولة حبيب عاشقو القليب فى دارنا عيب ومحرمه
يا عشه عادات الجدود ذات القيود المحكمه
اه انا من عذابى ومن مصايبى الدائمه
يا عشه من دون الشباب زى السحاب متراكمه
رحلة عمل جمعتنى بيك والله ما كنت أحلمه
واه لمان تحين لحظة فراقنا القاتمه
أطوى الجروح داخل الضلوع اصبر عليها واكتمه
حتى الدموع لمان تسيل الغيرى تب ما بيعلمه
يا عشه من بلدا بعيد لاقيت قبائل قادمه
شافوها فى لبس الحجيج بين القوافل محرمه
يا عشه صالينى الهجير ما شفت غيمه مغيمه
يا عشه من حظى التعيس حتى الرياح متأزمه
عشه يا مفتاح هناى يا نور حياتى المظلمه
عشه يا سلوى الحزين زينة بنات العاصمه
عشه فى درب الغرام لاقيت مواقف مؤلمه
يا حلوه جرعنى الزمان كاسات حناضل علقمه
ساعة وداع لحظة نحيب فوقنا الشقاوه مخيمه
يا عشة يوم دق الدليب من دارنا قامت فـــــاطمه
يا حلوه ما خليت بلاد سايقانى روحى الهائمه
رحلة عذاب طالت خلاص يا عشه وين الخاتمه
يا عشة وين الخاتمة

عشه
كتبها الحبيب بكل صدق وغناها الراحل سيف الأراك فكانت رائعة بروعتهما ...
الله أرحم الراحل سيف الأراك بقدر ما أعطــى ...

شكرا لك أيها الرائعه شهرذاد وأنتى توثقين لهذا الشاعر الجميل

تحياتى ..

شهرزاد
11-10-2008, 01:04 PM
عشه
كتبها الحبيب بكل صدق وغناها الراحل سيف الأراك فكانت رائعة بروعتهما ...
الله أرحم الراحل سيف الأراك بقدر ما أعطــى ...
شكرا لك أيها الرائعه شهرذاد وأنتى توثقين لهذا الشاعر الجميل
تحياتى ..

الأخ العزيز محمد الأمين
منتظرة جيتك من زمن ...
أعرف ما تكنه لهذا الشاعر من حب وإعجاب كبيرين وللفنان
سيف الأراك طيب الله ثراه ..
أرجوا متابعة ما تكتبه عن شاعرنا (الحبيب)
في ذلك البوست في المنتدي العام ..
لكن كيف مع غيباااتك الطويلة دي ..:confused:
ــــ
لك مني ألف تحية ,,

شهرزاد
11-11-2008, 08:18 AM
ليالـي الظـلمة

دايمـاً أبكـي أرسـل فـي دمـوعـي غــزار
لكن كيف أعود وألقاكي دايماً في لقـاك محتـار
لو كان الزمـن فرقنـا معـروف الزمـن غـدار
لكن كونـو مـا ودعتـي لغـزاً حيـر الأفكـار
صبرت القليب قت ليهو يمكن خايفي كان تنهـار
دايماً إنتي ليَّ تجافـي ليكـي بفتـش الأعـذار
عشانك لي بلادي بغني وأهديهم سلامـي الحـار
لي أهلي وصغِّير بيتنا لي نـاس ستنـا وعمـار
بهديهو السلام الغالي للنـاس الصغـار وكبـار
للزول البيسأل عنـي والـزول البعيـد والجـار
للعيش الطوال بي غادي في الجزيري والأزهـار
للطير البينزل فوقو ختـف رزقـوا منـو وطـار
لي كل المزارعين جملة والتاجـر مـع النجـار
والميزان وحتـى المويـة والطوريـة المنشـار
للنيل والنخيل الذاكـرو والناسيهـو والأشجـار
للعش اليميل بي فراخو ساعة النسمة في الأسحار
لي أرض القلوب الطيبة أرض الطيبة والأخيـار
للجاهل صغيِّـر قوزنـا مـن نافعابنـا للمختـار
ما أجمل ليالي البهجة في داركـم مـع الأوتـار
مشتاق لي مدايح السيرة في برداً شديد والطـار
أما عن العلي والبي بي لطفـوا الكريـم ستـار
تائه في صحاري وجافة تب ما بتعرف الأمطـار
ساير فيها من غير هادي برضي مواصل المشوار
راجي سحابا طول أيامي يوم ما طارت أم بشـار
والليل فيها قاتم الظلمة خليك مـن نهـاراً حـار
تائه في ظلاموا أنادي ويـن يـا دنيـة الأقمـار
مالك يـا ليالـي علـيَّ همـك يلفـت الأنظـار
مالك يـا ليالـي الظلمـة أحداثـك علـيَّ كتـار
متلفح عـذاب الدنيـا فصـل منـو تـوب وإزار
آه يا نور حياتي الولـى آه يـا ملهـم الأشعـار
يا نعمات لهيب أشواقي زايدي الفرقة جمروا أوار
وين بسمات تكشف الظلمة من قلبي وتشع أنوار
طيفك ليلي كلـوا معايـا يتـراوح مـع البهـار
آه من دنيتـي واقـدارا آه يـا لعبـة الأسـرار
قلبك من طهارة ورقة حاكـى صحيفـة الأبـرار
لو طال العمر بلقاكـي سبحـان مالـك الأعمـار

شهرزاد
11-11-2008, 08:55 AM
سحاب آمالي
من غير زاد وبلا ميعاد
كان منايا أجيكم فجأة رغم الفرقة والابتعاد
كم من حاجة اتمنيتا إلا المولى لي ما راد
وأصلوا الدنيا من ما قمت ما تمالي فيها مراد
لكن برضي صابر وراضي سامع حكمة الأجداد
ودايماً في كلامهن حكمة يا ريت تعرفا الأحفاد
قالوا الدنيا لمان تابا تقطع سلسل الحداد
ولمان تبقى ماشي عليك بي خيط عنكبوت تنقاد
يا حليل الزمان والباسا أيام كنا فيها جُداد
شايلين القصب يا دوبنا دايرين نعرف الأعداد
أيام في زمان الحلة نلعب سكسك الحداد
والطاب حتى حمديرة والحكام والجلاد
يا ريت لسه عايش لحظة تحت الحكمة والإرشاد
يا ريت أصلي تب ما كنت يا ريت القديم لي عاد
ديمة على سحاب آمالي لايح في البوادي بعاد
أسرع في خطاي أمشيلو يتلاشى وأقبل صاد
أول ما أعود لمكاني برجع في القرب يزداد
أعيد الكرة تاني أمشيلوا لكن السراب شراد
فقر في الدنيا كل آمالي غير قلباً رحيم وحاد
مهما بالغت آلاموا تب ما بيعرف الأحقاد
شان كسر الرماح في حزمة يصعب وتنكسر آحاد
مشتاق للبلد والغربة شوقا يفتت الأكباد
مكبوت الشعور أنا عشت دايماً في كدر وسهاد
أما الليلة يجرح قلبي من صمتاً عليهو اعتاد
في حباً دفين واراهو طبعي الديمة كلو عناد
حب الساقي حب اللوبي حب زولاً معيشتوا جهاد
كلو كلاموا عن بابورو يرشح زيتو يمكن بايظ اللباد
حب الجاية شايلا فطورو والكباية والبراد
حب العايمي فيهو الكسرة لو كان خدرة أو كداد
حب الفي جروفنا تغني في شوالا كايس كُداد
حب الفوَّت السبابة قال ما جوهو في المشهاد
حب اشياء قديمة الكسكسيكة العُمرة والمرواد
والحبوبة من التاية وكل الراحو من أجداد
ود فضل الله تشهد بي رجالتوا بلاد
الغرابة والشراقة كانوا يشردوا منو شراد
ما بيعرف حكومة ودوشة حارس أرضوا بالمرصاد
تشوفوا محل بقر مربوطة طفَّر وقلع الأوتاد
كان فقداً عظيم والله يومو الفارق الأحفاد
كانوا الناس جميعن يبكوا كل الحلة لابسي حداد
ديل أجدادنا كانو حنان وكانوا بسسيرحموا الشحاد
ولو بي كلمة حلوة وطيبة ترقد والعمر يتباد
قول للجاري فوق اعمالوا الله يغفَّل الحساد
وكل ما قالوا فوقك كلمة تبقالك وقاية وزاد
أهديكم سلام واتمنى وأطلب جملة العباد
تجاني وختمي حد ما جرُّوا في كل الطرق أوراد
يحقق لي الزمان آمالي وأكسر شوكة النقاد
وأحقق ما يجول بي خاطري زي ما حقق العقاد
وأحرق كل سفن للرجعة زي ما سوى إبن زياد
وأهدم كل جبال في دربي تصبح كل صخورا رماد
ومن بعد الهموم تتلاشى ألقاكم نصاح وشُداد
وأرجع لي دياركم تاني نتقابل ليالي جُداد
وأسيب بلداً طيور الجنة عرفت عيشا كلو فساد
والطير غير محل الخضرة دايماً مابيطيبلوا قعاد
حامد ربي ما سواني في قوم ناس ثمود أو عاد
مبسوط إني جيت في أمة .. أمة سيد الأسياد
والحال العلي طوالي إنشاء الله انتو تبقوا سُعاد
ومبروك الحياة الزوجية بي طولة العمر ووداد
ومن قلباً صدوق اتمنى أضعاف معزي ود حماد
يخلوا الدار منوِّر ديمة بس بي شرط يبقوا أولاد
عشان العصبة فيها الرهبة حتى إن كان بعوض وجراد

شهرزاد
11-16-2008, 11:12 AM
دنيا الصبا
حد ما قت زمانك ولى حد ما قت إتناساه
فجأة تزيد علي آلامي وأرجع تاني إتمناه
يا ساقي القليب آلامو يا واهب قوافي غناه
ما كنت السراج في دربو بعدك أظلمت دنياه
قاعد فوق جمر راجيكي ذكرك ديمة مافي سواه
محجم في كتاب الذكرى لامن دمعت عيناه
يذرف في دموع الحسرة للكان في زمانو بناه
يندب حظوا في دنياهو كل ما مر يوم مأساه
بس وريني عاد شن سوا إيه الفي زمانو جناه
إيه الجدَّ بس قولي لي إيه الزلَّ فيهو خطاه
الحب والغرام بسمعبو غيرك ما عرف معناه
وينك يا حياتو الغالي كل الدنيا بعدك آه
أيام الطفولة الماضي والزمن القبيل عشناه
لو كان طرنا يا أحمد مكي ما ظنيت يوم نلقاه
كنا زمان نقدس نيلنا بي ليلنا ونهارنا معاه
كم في ريح تقيل عدينا في أمواجو ما بنخشاه
من قارب صغير ابحرنا في ليلاً عجبنا صفاه
شرفنا الضفاف التاني لا غاية الحجير شفناه
مشتاق لي ليالي الماضي لي حبي الزمان برعاه
وألثم في خيوط الذكرى كل ما مر يوم ذكراه
والحب لو قليلة حروفو كم من زول جهل معناه
يكفيك ألف ليلة وليلة والحب برضوا ما حاواه
كانت جنة يا أحمد مكي فردوساً زمنا طواه
عارفك إنت دايماً تبكي عارفك إنت ما بتنساه
أهديهو السلام لي قوزنا النيل والنخيل ورباه
لي تمر الحبيب غير وحدي الخاينة البترمي جناه
ولو تسألني عن أخلاقوا البلد الكرهت سماه
الشاب فيهو كيف ينتنى يتمايل كانو فتاه
يترنع يموع في الدارة في عزف الكمان وغناه
لكن الضمان دا أكيدة ساعة الحارة ما بتلقاه
ما عارفين هناك شايقية حوض النيل يموتو حداه
والواحد تهمو كرامتو والموت عندو برضو حياه
قول للبعدا ما حبيت قول ليها الحبيِّب تاه
قوليها الزمان جار مني منك يا نجاة الله
صابر لي إرادة المولى واليرضاهو لي برضاه
شغال في وزارة الصحة والبي ما عرفت دواه
كاتب ليكي عن أحوالي عن آلام قليب وبكاه
صادق فيهو من أعماقي ظاهر في القوافي تراه

شهرزاد
11-16-2008, 11:14 AM
عابرة أرويني
أرويني أرويني نهر الأماني سراب
ياعابرة دليني ولميني في الأصحاب
الخوف من المجهول وباب الرجا المقفول
في أوجه العزاب والوازع الديني
كل التلاتة معاي اتلموا زادوا شقاي
شايل خطاي مرتاب والهم مزازيني
دمع الأسي المسكوب فوق مقبرة محبوب
والعيد علي الأبواب والباكي يعنيني
خلاني بين العود وبين اللحا المشدود
عايش دمار الغاب والسوس حواليني
يامعتصم زايلة الدنيا مامايلة
فيها الفرح كضاب ماشفتو يعميني
أوصف حياتك كيف كانت سحابة صيف
مرت علي السالماب لاضل ولا عِيني
ياعابرة حبيتك واسرعت لاقيتك
بالفرحة والترحاب واللهفة في عيني
حباً بلا جدوي متعثر الخطوة
دقيتلو مليون باب من غير يلبيني
مهزوم من الماضي مظلوم وانا القاضي
وكل القضية عتاب لي حظ معاديني
رغم الحصل مازال سيف الولف كتال
سيرني في ديداب في آخرو راجيني
يوم الوداع الحار يوم ينتهي المشوار
يوم يرحلوا الأحباب يادمعة عينيني
ياعابرة حاتلاقي لوفي العمر باقي
عالم دروبو صعاب في تيهو تطريني
أنا والهوي المكتوم بين السهر والنوم
والركوه والمحراب والليل يواسيني

شهرزاد
11-16-2008, 11:16 AM
في إنتظار عينيك
حبيبي الفرقة طالت والعمر محدود
وأنا في انتظار عينيك مستني بكرة تعود
ياما صبرت عليك تخلف وعود ووعود
يا ما كتمت أنين يا ما بذلت جهود
لكني مهما أكون أنا صبري ليهو حدود
يا ما صبرت سنين ما شفت فيها هجود
كل ما حضرت زفاف تلقاني ما موجود
أسحب شريط ذكراك والذكرى فيها شرود
بالله ليه واديك الكان بروق ورعود
مرت عليهو سنين ما عاد سماهو يجود
ما دمت حي بهواك مهما فضلت جحود
يكفيني كنت معاي في ماضي ما حيعود
لحظات طفولة معاك جوايا خالدة خلود
لولاها كنت زمان في جوف ظلام ولحود

شهرزاد
11-16-2008, 11:19 AM
دموع الذكرى
اذوب بالحسرة لي ماضيك وأندب حظي واتعذب
وأجمع دمعي في كاسات وأشيل من مُرَّتِك وأشرب
أحادي عليك قوافل الذكرى فوقا فؤادي يتعذب
تهاجر روحي لي دنياك شوية شوية تتسرب
أواجه في طريقي صعاب وأغادر منو لي اصعب
أحس بالسلوى في ماضيك وحات عينيكي ما بتتعب
كتلتك يا أمل جواي بدت أعصابي تتصلب
بقيت ما طايق الألحان ولا عاد الفؤاد يطرب
أحسك لوعة في الأعماق وأشوفك في طفل يلعب
وأروَِض نفسي بي آهات تغوص جوايا تتسرب
أصبر نفسي رغم الشوق وأذوب من جوة واتمزق
أبشر ارضي بالأمطار وألاقي سحابا يتفرق
حنانك كان عليهو دوام تفيض انهارو تتدفق
بعد كانت ورود فيهو بقت عطشانة تتحرق
أشعر بي لهيب أشواقي في الأعماق وأحس بضلوعي تتشقق
مصلصل جسمي زي النار بلا أسباب أجف وأعرق
خمسة سنين فضلت وراك أبت آمالي تتحقق
وخمسة سنين وراك مستني مظلم كوني ما أشرق
يجيني الليل اساهرو وحيد مع نجماتوا إتأرق
أبلل شوقي بالدمعات عشان يا غالية ما أحرق
يا سنوات طفولتي ظلام بالغ ليلك الأسود
يا كلمات حنين جواي تزيد كل مالا تتمدد
يا لحظات وجوم عانيتا يوم رحل الحبيب وأبعد
يا كاسات ألم مسمومة بيها حياتي تتبدد
يا حظاً لعين طوقنا حالف تاني ما نسعد
نقول سبناك للأيام تعود أحزانا تتجدد
أطمن قلبي بي لقياك وأصبر نفسي واتجلد
وأدون حبي في كلمات عشان ذكراك تتخلد
تكون زي قبلة للتايهين تكون مأوى وتكون معبد
وياما في الغرام رهبان تشيل الليل على محرابوا تتعبد
زمان عينيكي كانت نور حدائق فيها تتفسح
يهاجر ليها طير الدنيا من بلداً بعيد ينزح
يغرد فيها في الأسحار يبشر بي صباح أصبح
يرقرق فوقا طول اليوم يقيِّل في الغصون يصدح
كانت واحة لي أحلامي كانت ملتقى ومسرح
واتبدل نسيما جحيم سمايم في الوجوه تلفح
حليل آمال زرعتها فيك بدت زهراتا تتفتح
طواها زماني بي إجحاف عشان مكتوب لي ما أفرح
ياما كنتي في ماضيك روائع للنفوس تشرح
لكن اسه يا سلواي مجرد ذكريات تجرح

شهرزاد
11-17-2008, 09:49 AM
وقفة في شارع الجميعاب
مرت سنين قضيتا ما انجمع الشمل
ورغم العذاب رغم الحنين لا قل صبري ولا كمل
يا يمة لو يجدي النواح أو يجدي دمعاً ينهمل
أنا كنت أول من بكيت وعملت كل البتعمل
أو حتى كان يجدي السؤال أنا كم سألت وبنسأل
من ناس نصيبهم في العذاب ماخدنو كامل ومكتمل
يا يمة جابتني الظروف في دنيا جارك منعزل
فيها اليموتو من الأكل وفيها اليموتو بلا أكل
أو حتى كان شفتي الزحام خلق الله تكتر من تقل
ما شفت عابد للإله شايلوا سبحة ويبتهل
كان شفتي والباصات تقيف والناس عليها بتتبهل
أوجه كتيري من البشر مختلفة اللون والشكل
واحدات بيجلبن السرور وواحدات عديل ما بتنقبل
وأنا يومي ضايع في زحامن ومنشغل
طاري المراكب والبيوت طاري الجناين والشتل
وبالرغم من تعبي الكتير عايش كاني أنا متخبل
لكن إذا طلع الهلال لابد من يوم يكتمل

شهرزاد
11-17-2008, 10:56 AM
الطائر الشاعر
هذا الكنار شاعر عظيم أول من ابتدع الغنا
صور جمال كل الوجود إنشودة عذبة ملحنا
***
غنينا أبدع يا بديع ألحان جميلة مؤثرة
ما نحن زيك يا كنار نهوى الليالي المقمرة
وحتى الرياض مهما تكون نديانة زاهية ومزهرة
من غير وجودك يا كنار بنشوفا زي المقبرة
***
غنينا فجِّر في العروق قصة غرامنا المحزنة
بحكيها ليك بس يا كنار خايف تشيلا الألسنة
***
جزيرة في بحر الحنان فيها الأزاهر كالنجوم
نشوانة زي وجه وجه الربيع بسامة ما بتعرف وجوم
محجوبة من شر الشموس غرقانة دايماً في الغيوم
رويانة بي دمع السحاب بتلطف الريح السموم
***
قصتنا كانت يا كنار قصة فراشة وسوسنا
كانت مدارس حب عفيف من غير معلم بيننا
***
قصة محب لي روح حبيب ما للمقاطع والجسد
تبلى المظاهر والجمال والروح طول الأمد
بالله وضح ياكنار قول ليهم الماضي ابتعد
لكن هواكم في الضلوع جوانا عايش ماخمد
***
قول ليهو ليه ما زي زمان ما عدت سائل عننا
ما كفاية كاسات العذاب اسقيني كاسات المنا
***
قول ليهو لا بد الرجوع الغربة مهما طولت
ما الدنيا ذاتها بعد زمن لازم تعود زي ما ابتدت
ما حبوا ثابت في الفؤاد ذكراهو فينا اتخلدت
نهواهو لي روحو الفريد لو حتى روحو اتغيرت

شهرزاد
11-17-2008, 10:58 AM
غصن الريدة
مما غصن الريده هضلم وجفت أزهاروا الندية
ما سمعت أشعار روايع لا ولا أنغام شجية
كلها الأيام عوابس مستمرة شقا واذية
وحشة زي ساحة مقابر فيها برزخ روح شقية
وبي شباك ريدك مكبل ديلا ست سنين سوية
قلبي زي عصفور يناضل في اصابع إيد قوية
أسأليني عن المتاعب لا عن العيشة الهنية
ياما في ظلماتا تائه لسه ما ضويت ضوية
ولما كنت مع رياضك بين زهورا ضحى وعشية
كلما هبت نسائم فاحت الأرياح زكية
كنتي تهدي مع ابتسامتك كل زول في الكون هدية
وكنت بلقى الريد حقايق واضحة في عينيك جلية
ماني قايل يوم حاشقى والظروف بالنسبة ليا
في زمانك داكا كانت من ضروب الغيب خفية
أصلي من ميلادي شاعر والغرام جواي سجية
ما ورثت من السوالف غير سمو نفسي الأبية
ومن فقدت زمان حنانك رغم عطف الغير عليا
وحدي في أشواقي ضايع زي غريب مجهول هوية

شهرزاد
11-17-2008, 11:00 AM
لحظة شعور
لما اسرح في عيونك كلي بتفتح مشاعر
وأبدأ أكتب ليكي غنوة قبلي ما غناها شاعر
في عيونك شفت حسنك يبتسم للدنيا ساخر
روعة تتحدى الروائع وليها حق ما نوعا نادر
زي شجاعة ناس بلدنا البيها دون الناس نفاخر
نحن ماضي ونحن حاضر ونحن كل الجايي باكر
لا تظني هواكي عايش في القلوب من غير أواصر
في سبيل عينيكي إنتي نحن بالأرواح نخاطر
قولة أحبك لو بتكفي حبي ليك ما ليهو آخر
والعجيب من قبلك إنتي قلبي كان بالريدة كافر
يا سلام لمان أشوفك وفجأة يخطر لي خاطر
وألقى كل الكون بيضحك وأي منظر فيهو ساحر
في عيونك واضحة نفسك إنتي جوهر ما مظاهر
إنتي خيط من نور بيسطع في ظلام أعماقي باهر
إنتي سر جوايا غامض عقلي عن تفسيرو قاصر
وإنتي حب في قلبي خالد لي مدى الأزمان يعاصر
كل لون زي لون سبيبك يعترض قدامي عاكر
ألقى وجهك نور بيكسح لي جيوش الظلمة داحر
إنتي ما ملكة زمانك إنتي ما عقد الجواهر
بستعيد لحظات لقانا وأرعى نجم الليل مساهر
عقلي يستعرض مناظرك زي شريط من ذكرى عاطر
إنتي أعظم من خيالي إنتي شي جوايا ثائر
إنتي أعمق من غنايا وإنتي أول وإنتي آخر

شهرزاد
11-17-2008, 11:02 AM
أوســــلي
البقول يا أوسلي ينساكي ويطيق الفرقة وأشواقـا
أكيد ما شاف مآسيها وليالي الغربـة مـا ضاقـا
يكون من خاطروا راضيها ويميل للفرقـة وآفاقـا
يقوم يمشـي ويخليكـي ويقـول الدنيـا فراقـا
وهناك يصبح يهاتيبـك دمـوع تنجـارا مهراقـا
دوام ذكراك موالاهـو صحيـح الريـدة عملاقـا
كفاك ما شلتي ربيتي وضعتي الزاد علـى الطاقـا
رجال اصلتي ماضيهـا وبنـات قومتـي أخلاقـا
وليدك فرَّ خلاكـي يطـوف فـي بلـده واسواقـا
قدر ما طـاف بواديهـا جمالـك زيـو مـا لاقـا
قلوب مشتاقة لي نيلـك تلاقـي الذكـرى خفاقـا
وعيون في ظلمة تطراكي وعليها الدمعة رقراقـا
جروفك ديمـة نديانـة وعليهـا المويـة دفاقـا
نسيمك داعب أغصانك يغـازل خضـرة اوراقـا
هناك النيل بيحكيلنـا ويجيـب السيـرة ترهاقـا
زمان دانـت بـلاد لينـا ملـوك ذلينـا أعناقـا
زمان الدارة محكومة جنـوب وشمـال وشراقـا
سيوف وعجاج عجاج رابط يلوحلك فيهـا براقـا
حرام يا ناس دي عاداتنا يتم بالديسكـو إحراقـا
رقيص جامايكا ما لينا دي لي ناس سلوى وإشراقا
زمان كان الرقيص هولن جنات في الدارة صفاقـا
والبدور ياخـد شبابيلـن جـداول دمـو تتلاقـا
حليل العرضة والسيرة ورجال في النوبة ساساقـا
العيون تاقـت لماضيهـا القلـوب والله مشتاقـا
متين يا قوزنا ألقاكـا وأعيـد الماضـي والفاقـا
وأسِف الموية من نيلك وأغوص في ظلمة أعماقا

شهرزاد
11-17-2008, 11:04 AM
نـورك
نورك كان مشع غنواتي ليـه الليلـة غـاب
دايماً فيك محسِّن ظنـي ليـه الليلـة خـاب
ودرت السنين راجيكـي هايـم فـي العـذاب
عايش في سراب خليتني اجري وراء السراب
ساير في مسيري وراكي حاسب ليك حسـاب
لكن جات مصايب الدنيا ختـت فـي الركـاب
ذكرني الخيـال الماضـي لامـن جـرَّ جـاب
خيوط من ذكرى كانت حلوة لي أيـام عـذاب
مساهر الليل دمع ينجارى مـن عينـي كـاب
وأصبح والنعاس في جفني شوفي رهاب رهاب
بهدي ليك مزيج من شعري وألحـان الربـاب
يديك فكرة عن أحوالـي و أيامـي الصعـاب
عايش في لهيب خليتني راجيك فـي عتـاب
بين ناسـاً قلوبـا معانـا كالصـم الصـلاب
مـن سافـرت لا رسلـت لا رديـت جـواب
وبرضي معاك بواصل سيري في أيام عجـاب
سافـرت وديارنـا ابيتـا فضلـت الـذهـاب
لي داراً تزورا أجدادنا والمـن ذنبـوا تـاب
زولك يبكي كاتم اشواقـوا بالهـم قلبـوا ذاب
ولهان يبكي من غيرك محال ما أظنـو طـاب

شهرزاد
11-17-2008, 11:10 AM
فـي جـنانك
في جنانك عشت عصفور انشد الاشعار واغني
مبتهج طوالي مسرور وانتي ماخيبتي ظني
بالقليل عاجباني دنياك راضي عنك وراضي عني
الحصل ماكان بي ايديك لاهو منك ولاهو مني
وهكذا الايام دواليك مره تهدم ومره تبني
يابلد ارض الله ساحات واسعه لكن مابتشيلني
غير نخيلك مافي واحات من هجير الصيف تجيرني
الالم خلاني مزمار روح غناي بي حجم حزني
مالصبر في الدنيا كان نار في حياة الاخره جني
ياغزالاً كنت راجيك وين عيةنك راحو مني
ياحليلك وين اراضيك لامتين عينيك يجني
الزمن دايرني محزون مابيطيق فرحان يشوفني
باقيه لي ذكراك أفيون ديمه شارد فيها ذهني
الزمان ماسعيو مشكور حب يسعد ناس ظلمني
وانت ذنبك ديمه مغفور بين مني العزال ومني
يا أريت ذي عرش بلقيس قبل ماترتد عيني
يوم لقيت الجان جواسيس بيك في لحظات تصلني
في هواك لوكنت مهجور ماهواك علمني فني
بي حروف ياغالي من نور في وشي التاريخ كتبني

شهرزاد
11-18-2008, 08:49 AM
لسه معاي إنتي لسه معاي آه إنتي لسه معاي
رحلت بعيد عشان أنساك وأمسح من فؤادي هواك
وأفوض أمري للأيام لقيتك برضو إنتي معاي
وراكي أنا يا ملاك زمني أحس بالفرحة في وطني
ورغم إيماني بالأقسام معايش حسرتك جواي
بكيت على شباب الضاع ومع ذكراك لي متاع
دروبك حافلة بالآلام وأحب أنا في هناكي شقاي
ودا الكان في الأزل مكتوب أعيش أيام معاك محبوب
وأفارق عهدك البسام وتتوه من بعدوا تاني خطاي
وحياة عزنا العملاق كتمت هوايا في الأعماق
عشان الريد هناك حرام ورحت ضحية ليهو براي
وأقول أنساكي وإنتي معاي !! وأقول أنساكي وإنتي معاي !!

شهرزاد
11-18-2008, 08:52 AM
حروف محفورة
حروف الماضي يا عبد الله لسع قلبي طاويها
منحوتات جروح محفورة ما لاقي اليداويها
كل ما أجر خيوط الذكرى تتفتح مجاريها
يدفعني النعيم العشتو في جنات أماسيها
يا ريت لو حضرت معايا أيامي البلاقيها
في نشوة حلاوة اللقيا كم قبل اياديها
ممنوع كونو أرفع صوتي خلف الدار واناديها
خاضع لي كلام الآية ما جاهل معانيها
أوعك ما تقولي كفرت دي الحالة البعانيها
دا الجرح المغوِّر فيَّ دي الدنيا ومآسيها
كانت في حياتي عقيدة أفكارا ومباديها
كانت ليَّ زي عاداتي ما بقدر أخليها
ما كانت سعادة نفسي وألحاني البغنيها
ما كانت مدينة أحلامي واتهدت مبانيها
هداها القدر فد مرة قبال ابني باقيها
وا اسفي الشديد لي نفسي وا ضيعة أمانيها
أظهر للصديق الجنبي دايماً إني ناسيها
لكن الفراغ والوحدة عبر الصورة أناجيها
أبسم ليها ما تبسم لي ما عارف الحصل ليها
ومرات فجأة يتخيل لي ترمش ليَّ عينيها
أرجع تاني أعود لصوابي بي عبراتي ابكيها
وا أسفي الزمان ضيعتوا قاعد برضي راجيها
ليها سنين سفينة عمري ما ألقت مراسيها
تمخر في عباب آلامي مرفوعات صواريها
يا داري النفوس بالله يا كاشف خوافيها
يا سامع دبيب النملة في حالك لياليها
البلد البتسكن فيها والطافت أراضيها
حياها الغمام يا الله واخضرت بواديها
والألم المعذب نفسي فد يوم ما يلاقيها
خفف لي الهموم يا الله إنت الحالة داريها

شهرزاد
11-18-2008, 08:57 AM
لقطات من حياتي
سامعك يا محمد تشكي كيف دايماً عليك زعلان
بكتب ليك جواب لو جاك أذكر طيبة الخلان
ناسجو من الخيال يا روحي واضح مصدر الأحزان
ذاكر ليك من مأساتي آلام ما بيطيقا إنسان
ذاكر من زمان الماضي ساعة الحجوة والجرزان
لحظات من أعيد ذكراها تتفجر عروقي حنان
نختم كان دوام سهرتنا بي طرفاً غرير نعسان
في أيام زمان عشناها تخرق عالم النسيان
أيام الجهل عشناها نعم العشرة والأخوان
نجري مع الولاد للحارة في العصرية والجيران
أيام من نعيم عشناها نبني من العلب دكان
ننصب للطيور أشراكنا تب ما بنعرف العدوان
وإن هدرت رعود في بلدنا وأصبح بالخريف مطران
نصابح يومنا داك من بدري نرفع في التراب قيزان
ديك أيام سعادة الدنيا كم عشناها بي تحنان
محال أنا مستحيل أنساها مهما طالت الأزمان
تمشي وتستمر الدنيا يمشوا ويكبروا الصبيان
دي الأقدار بتأمر وتنهي زي ما بيأمر الرحمن
فجأة اتغيرت أحوالي وأصبح في الجسد بردان
والعجب العجيب أنفاسي تمرق في الزفير دخان
لما غدر زماني وعادى أعلن عن زواج عجلان
تصبح بيهو كل الدنيا الشيب والشباب طربان
إلا أنا الوحيد يا روحي في بحر الدموع غرقان
أبكي على زماني الماضي بي طنبور سلوكو حنان
ما شفت الحبيب الغالي جوة الكوشة زاد لمعان
لقطات من فلاش تتوالى فوق وجهو الندي الريان
وما شفت الدخيل جم زهرة ساعة الشبكة كيف نشوان
منظر فوقو عايشة الحيرة كيف يقبل ملاك شيطان
لو شفت الرفيق يا خويا منظروا يرهق اعهينان
حقوا من العذاب انتمَّ بالكامل بلا نقصان
يكفيك العلي يا روحي عندي من الدهر إثنان
السهر العلي أنا ديمة والقدر السيوفو سُنان
وعندي من الجليد يا روحي قلباً تلهبوا النيران
ومعروف الجليد يا أخواني دائماً قابل الذوبان
لو حصل العلي لي غيري حتى إن كان من الرهبان
كان جدع الهدم من فوقا وأصبح في الطريق عريان
شدة ما كرهت الدنيا صِر في أغلب الأحيان
اتخيل نصيب الآخرة لا مالك ولا رضوان
البي كلوا كاتبو الليلي في دقة ونظام وإمعان
وأفضيت ليك كل أوزاني ناظما في الشعر أوزان
فكرت انتحر والله لولا قوة الإيمان
وبرضي كمان بخاف الآخرة يوماً شيب الولدان
كيف حالة حياتك إنتي كيف يا أعظم الأركان
ولو تسألني عن أحوالي يكفيك الجواب عنوان

شهرزاد
11-18-2008, 08:59 AM
إلى إبراهيم ابنعوف
كل ما أزرع آمال حلوة أخسر فيها أنا الآلاف
من حني وهنايا وذاتي تصبح في سرابا عجاف
في حق القدر وأحكامو صارت منتهى الإجحاف
كيفن عاد أحاول دفعوا ما دام ذاتوا ما بتنشاف
يا ود ابنعوف أرجاني شعرك سامعوا كلو جفاف
أرجوك لو بتسمح رفقي في رحلة شبابي الجاف
ما إنت المجرب قبلي وإنت القبلي لا إنصاف
زي ما قلت خوفي شقايا بيهوا اسير على الأكتاف
لو مت شهرتك تبكيك بعدين بي دمع مذراف
لكن قولي كيف ينعيني شعري الما وصل عزاف
بحكي ليك وأسمع مني من فاتت ديارنا عفاف
ما طافت سعادة حياتي ساير فيها غير أهداف
كل ما أزيد حماس اقدامي تصبح في خطاها خفاف
ألقاهو القدر يضربني لامن تبرد الأطراف
ما دي الدنيا صبحت مادة فيها اندكت الأشراف
ما دا الكان سبب بكاني وأسرف في الدمع إسراف
تجري دموعي غصباً عني كل ما مرَّ بيَّ زفاف
والشقى والعذاب الفيهو ما بيتحملوا الرجاف
من كأس الغرام أنا تبت وأصبح منو تب عواف
والضايق لدِغة الدابي من جر الحبل بيخاف

شهرزاد
11-19-2008, 12:46 PM
يا كنـار
غنيني أبدع يا كنار أجمل غناك لا تبخلو
ذكرني بي ناساً بعاد طول غيابن وطولو
ذكرني بي جنة نعيم في الماضي قبال يرحلو
أيام نعيم عاشا الفؤاد يوم كانو آخروا وأولو
ذكرني بي حفلات زمان في الدارة لمان ينزلو
تلقى الجميع من غير شعور بالفرحة هاجو وهللو
أرجوك تسافر يا كنار والفي جهودك أبذلوا
والله لو شفت العلي من لوعة مابتتخيلو
قول ليهم القلب الحزين عن حالوا ليه ما بتسألو
بس ما يكون بي صوت عتاب أرجوكا خايف يزعلو
بلغ حبيب الروح حديث يا ريتو منك يقبلو
ويقبل كلام ناساً حنان عن حبو ما يتحللو
تلقاهو قاعد يا كنار في ليل سبيبو مسدلو
زي القمر بين السحاب يجمع شعاعو ويرسلو
قول ليهو وريني الحصل بوِّح عذابنا وحللو
خلاك تتناسى الفؤاد الكان قبيل ما بتجهلو
قول ليهو في ذكراك دوام الشوق براهو وبهدلو
الماضي ضاع واليوم عذاب وريني كيف مستقبلو
بطراك ما غنت حمايم في غصون هبت نسايم ميلو
تشجيني بي صوتا الفريد وألقى المدارس شيلو

شهرزاد
11-19-2008, 12:48 PM
الزمان بي طبعو ظالم

العيون في حسرة تدمع والفؤاد مشتاق ومغرم
والزمان بي طبعوا ظالم خلى كل ايامنا مأتم
ما خلاص سبتينا إنتي وتاني كيف من شروا نسلم
وكان وجودك لينا واحة وراحة للمحتاج ومعدم
لو ربيع ماضيكي ولى برضي بي رؤياكي بحلم
في رجاك لامن أروِّح أو أعيش وأشيخ وأهرم
فيكي كم غنيت قصايد وفيكي ضقت المرة علقم
وإنتي كنتي سبب غنايا وصرت بيكي شهير ومَعْلَم
يا ما أبكي وراك وانوِّح بي فؤاد بالشوق مفعَّم
لا بيشوف لا حتى يسمع زي كفيف وأصم وأبكم
ولما ضاق الحال عليا ومن وراكي نهاري أظلم
سبت أرض القوز رحلت وفيها كنت عزيز مكرم
جيت مسافر للمداين قلت نار الغربة أرحم
وكنت عارف بكرة بحزن ولي فراق أصحابي بندم
وفيها لفيت لي شبيهك بس عشان ألقاهو أنعم
وما لقيتو ولا حألقى وما أظن والله أعلم

شهرزاد
11-19-2008, 12:53 PM
نجمة بلدنا
الزمان لو ما قدرنا والعواقب جات سليمة
تاني برجع لي عيونك وأبقى في مرآكي ديمة
إنتي نورنا وخير بلدنا وسر جمالا وكل نعيمة
في بعادك مهما عشنا ما بنشوف للدنيا قيمة
في عيونك لما تسرح وفي ابتسامتك يا وسيمة
بلقى كل أعماقي تفرح وأبقى أقوى الناس عزيمة
ما بحب في الدنيا غيرك يا البشع نور من جسيمة
لا تغيبي يجيني ليلك ما اشوف في الكون نجيمة
صدقيني وحات عيونك والجمال الفي النغيمة
أي كلمة اقولا ليكي نابعة من روحي وصميمة
الشقا وجور الليالي ما بتعدو الناس هزيمة
خافي إنتي على قليبي وأبقي دون الناس رحيمة
وحدي ساير في هجاير وإنتي غيرك مافي غيمة
دهري جاير وعقلي حاير وإنتي هبي علي نسيمة

شهرزاد
11-19-2008, 12:54 PM
لو بتعلم
أصلوا شوقك لو بتعلم من زمان مـا زاد ملكنـا
أما ريدك ماشي زايـد والبعـاد باقيلنـا محنـة
فوق سعير نتملى دايماً نبكي كل ما جاتنا نسمـة
نذكر أيامك معانـا كنتـي فـي عينينـا نعمـة
خلو زولك يبقى تائه تبقى كـل دنياهـو ظلمـة
والعذاب آخر مصيروا لو يطير مكتوبلوا قسمـة
يا حليل أيام زمانـاً فـي ربيـع أيامـوا عشنـا
كنا في قمراتنا نسهر لا بنكـل لا يـوم نعسنـا
كانـت أيامـك معانـا خيـرة أيامنـا وفرحنـا
الحنين ما ليهو زايـد والدمـع والنـوم غلبنـا
كم نقول ذكراك نسيبا ونترك الماضـي الهجرنـا
في القمر والليل يجينا نلقـى للأشـواق رجعنـا
لي دياركم كم نساسق حتـى بالساسـاق فترنـا
لو نمد جملة مشينا كنـا فـي الظهـران مرقنـا
في طريقك كم نعاني قالوا بعض الناس مرضنـا
ونحن في الأشواق نعالج لا علاج لا نوح نفعنـا
بالعذاب واشواقنا نحن نبكي فوق طاقاتنـا زدنـا
وإنت كل الفات نسيتوا واتكتم في جوفنـا نحـن
بي لقاك ما زلنا نحلم ما انقطع في الشوق عشمنا
قلنا بس دايرين نشوفك بالغلط مـا جـاد زمنـا
في غيابك نحن نكتب بالدمـوع أبيـات شعرنـا
علو يحكي البينا حاصل بالألم والشـوق فقدنـا

شهرزاد
11-23-2008, 09:47 AM
غريبة الدنيا والأقدار
غريبة عجيبة يا دنيا وعجيبة غريبة يا أقدار
أنا المتعود الأسفار
***
أسافر في عيون واحدين بلا أعرف اساميهم
يتم الحول ونتآلف وأكون معتاد ألاقيهم
أشوف الحب وكل الحب مجسد في أحاسيسهم
ورغم الكان أفوت مجبور وأبحر في مراسيهم
أتوه من تاني في الأخطار
غريبة عجيبة يا دنيا وعجيبة غريبة يا أقدار
***
حكايتي معاك حكاية خوف من المجهول
حكاية زول يحب الناس يذوب بالحسرة للمعزول
أحاسيس زول بيحيى وحيد وفي نفسوا الأمل مكتول
خمسة سنين ينادي عليك يدق في بابك المقفول
أنا المحــتا ر
غريبة عجيبة يا دنيا وعجيبة غريبة يا أقدار
***
لحظات عابرة نتقابل ونتفرق مع الأزمان
تبقى الذكرى في القلبين ترن في عالم النسيان
أهي الأيام بتتداول صيف وخريف فرح واحزان
وبرضو الناس بتستحمل عجيب ما أغرب الإنسان
زمان متقلب الأطوار
غريبة عجيبة يا دنيا وعجيبة غريبة يا أقدار
***
عجز الديك برغم الريش عن الطيران
ومن دونن ترا الوطواط محلق في فضا الجدران
وناس محتارة بين امرين وأحلاهم هو الحرمان
وناس بتنادي من طابقين منازل شامخة في البنيان
بيوت تسخر من الأشجار
غريبة عجيبة يا دنيا وعجيبة غريبة يا أقدار
***
وحاتكم يا أعز الناس وحات الفي القلوب مشتول
حنانكم زاد عن الأوصاف وفات الواضح المعقول
وحات عينيكم الحلوين مهما المدة بينا تطول
حروفكم ناحتة في جواي دروب السوسة في القندول
حنين يقدح ضلوعي شرار
غريبة عجيبة يا دنيا وعجيبة غريبة يا أقدار
***
وحاتك يا خفيف الروح وحات الفي الضمير مدسوس
وحاتك لما أشوف عينيك بنسى الواقع المحسوس
واشوف دنيايا مابتنشاف قصور مبنية في فردوس
أعاين ليها بالإحساس وعن ذاتا النظر محبوس
خيال السارح الأفكار
غريبة عجيبة يا دنيا وعجيبة غريبة يا أقدار

شهرزاد
11-23-2008, 09:49 AM
مـأسـاة
زولاً ضـاق المـرة يجمـع فـي قروشـوا سنـيـن
يجمع فيها طـاف الدنيـا بـي عرقـاً رماهـو جبيـن
غايب دابو جاكـي الليلـة بالهنـا والعديـل والزيـن
روح ليكي جاب إيرادوا تب مـا شفنـا ليهـو وزيـن
في يومو الوصل لاقيتي ترفلـي فـي الحريـرة تبيـن
من شاف الحريم واللمة قلبـوا انشـقَّ لـي نصفيـن
حالف بالسنين الغابـا يـوم سـد مالـوا بـي ألفيـن
أما الليلة جاب الشيلـة فيهـا الـزادوا مـن عشريـن
للناس العليهوا إنجاروا مـا شافوهـو ليهـوا سنيـن
تب ما قال سلام يا أهلنا خش البيـت قليبـوا حزيـن
ميَّل فوق سريـراً بـرة جـادع جسمـوا دون تهويـن
جات أموا الحزينة الباكية فاضـت لـي وليـدا حزيـن
قالت ربي أدوا العافية عـاد يـا ولـدي نـور العيـن
نحسب في السنين عدينا ضايقين لـي جديـدو متيـن
يا سيدي الحسن راجاكا إن طاب يـوم نجيـك زايريـن
وأضبح ليك نذري القلتو مـا كبشـاً عديـل وسميـن
بي حالتوا العصيبة القاسي عـدَّ اليـوم وزاد يوميـن
أما المولى كاتب حكمـوا ظاهـر فـي كتابـوا مبيـن
من يومو الأرادلوا الراحة اصبح مـن صباحـوا يئـن
جنبوا اتلموا ناس الحلة يبكوا وفـي التـراب قاعديـن
وكتين الشمس إنضارت منظـر مـن تشوفـوا حزيـن
فوقوا اتلموا ناس لي موتوا ماسكين في الخشم والعين
باقيلوا الثبـات الجاهـو مـن المولـى ليهـو معيـن
وكل مالوا القديم والجابوا كان راس مالوا منـو كفيـن
من بعد الغسيـل شالوهـوا جاريـن للقبـر طالعيـن
في لحظة اندفن وإنضـارا قبلـوا منـو تـب راجعيـن
لي آخر المطاف ودوهـوا لـي بيتـاً عليهـوا أميـن
وكل أملوا البناهو الليلة محصور جنبوا بيـن حجريـن
كيف اهلوا الوراهوا اتباكو فوق قوز الرمـاد قاعديـن
ما عارفين سبب إتلافوا مـا فـي الـم عليهـو يبيـن
واحدين قالوا عـاد مـا يومـو تـم وروح المسكيـن
وحدين قالوا حال الدنيا تعمـل فـي السمـح والشيـن
تبكي وراهوا أمو الثكلـى تـذرف ليهـو دمـع العيـن
ما فقدت حبيبـاً غالـي أصبـح فـي قبيـروا دفيـن
ما مكتول غرامك إنتي سيفـك فـي ضلوعـوا سنيـن
ما حاولتي يـوم تأويهـوا قلبـك ليهـوا مـا بيبيـن
عاش والله كل أيامـوا كـان بالطاعـة ليكـي يديـن
أمشي وفي القبير زوريهوا هل فد يوم مشيتي دحين ؟؟؟

شهرزاد
11-23-2008, 09:51 AM
عـام ألفيــن
ياعابرة عام ألفين راجيهو عام فوق عام
لا إتجـددت لقيـا ولا إتحققـت أحـلام
قلبي البلاكي يتيم ذارف دموعـو حزيـن
صبرتو بالأحلام قُت ليهـو عـام ألفيـن
حا نمشي لأمدرمان نسأل عيونـك ويـن
خدرتو بالأمال ،،، لوليتو لامن نام
في نومو يتعبَّـر يشهـق بـلا أسبـاب
متبشتن المسكين الكـان قبيـل أربـاب
لما الزمن كان زين ياعابرة كنـا قُـراب
لا حالت الفرقة ،،ن بيناتنا لا الأيام
عايش معاكي سنين زي الفراش والضـو
مليان نشاط وحماس مابيرجي قولة سو
لما الفراق فرَّخ حلق غراب فـي الجـو
يوماً سوادو عجيب ،،، بدل ضياهو ضلام
أه يا أماني هواك جـارف كمـا الشـلال
وقلبي الدوام مشتـاق متكبِّـد الأهـوال
في يوم بداية ليل والقمـرة دابـا هـلال
صـوت الهدِم في القيف قلع هدومو وعام
بالله إتوكـل والتانـي حسـن الـظـن
من عهدو مااتنصل أطريهو لـو أمكـن
رغم إنو كان عارف كل المشـن ماجـن
مشحون مني اشواق طاريك اماني دوام
ياعابرة زي النيل بلقاكي كـل إشـراق
وألقاكي نص الليل زي نجمة في الآفـاق
في بلة المنديـل بـي دمعـة المشتـاق
لامن تفيض وتسيل من قمة الالام
قالوا الطمع مكروه إلا الطمع في الديـن
خايف برايا أتوه طمعـان أقابلـك ويـن
رغم الزمن مشبـوه لابـد متلاقين
ايامنا لو طالن ما شالن الهدّام
يا عابرة عام ألفين راجيهو عام فوق عام
وكل السنين أمواج مندافعـي لـي قـدام
وزولاً مـع التيـار مابتسعفـو الأقـدام
لامن يلم يرتاح يا عابرة الف سـلام
إنتي الملكتي زمان بي رقـة الإسلـوب
أدمن هواك إدمان والليلة غالبـو يتـوب
ياعابرة مهما كـان باكـر بنلقـي دروب
نملا البوادي قصيد وقلب المدينة غرام

شهرزاد
11-23-2008, 09:53 AM
عـبر
بالله يا بلدي العزيز أهديك قصائد كالدرر
أحكيها لي باقي الشباب إنشاء الله تبقالن عبر
هاك من نصائح زول حزين طول عمروا والاهو القدر
بالعبرة والشوق الدفين في الدنيا من دون البشر
لا تحسب الأيام نعيم طوالي لا أبد الدهر
مهما تكون قيمة صفاك لا بد من موسم عكر
زي نيلنا في وكت التساب لو فجأة مجراهو انحدر
لا تمشي في درب الظنون من غير دليل وبلا اثر
ما اصعب السير في وعور في ليلة جافاها القمر
ولا تجري في درب الشرور يصبح فؤادك من حجر
وما أجمل الزول لو سريع تلقاهو في غلطة اعتذر
لا تدي سرك لي غريب مهما يكون لو فد نفر
باكر يعم ناساً كتار في لحظة تلقاهو انتشر
كم من هناك زولاً ضحوك لكنو زي لبن العشر
يعميك لو طار في العيون يؤذيك بالنوح والسهر
ولو كان معاك زول في نعيم ما بان عليهو ولا ظهر
والعرقو مر زي الحراز يتحتى في زمن المطر
بالله لا تمنع جناك يحرس بناتك في حذر
ما الزهرة من دون الغصون لا بد يغشاها الضرر
بهديك كمان دواء للنفوس تلقاهو في عطر الزهر
في روضة مرابا النسيم لو قمت ساعات السحر
وأهديك جواباً لي سؤال لو مرَّ بي خاطرك عبر
الريدة لو عجز اللسان تلقاها في عمق النظر
بالله يا أهلي العزاز وين المدايح والسير
كم مرة من عز الهجيع صحاني صوتاً كم نقر
يا حليل زمن ناساً كبار صنعو السواقي من الشدر
يا حليل حياض زمن الرفاق ملياني بي طير البقر
يا حليل هناك زمني الصغير قضيتوا في ليلات غرر
عشناها في تمر الحبيب ننجارا بي فوق البحر

شهرزاد
11-23-2008, 09:55 AM
الذكـريات
يا دنيا ما تنسيني يوم كان أسعف القلب الجريح
خليني افرح مرة فيك قبال يعاودنا المسيح
ريح الهموم لمان تهب تقفل منافذ كل ريح
ضاقت رحابك في العيون بالرغم من كونك فسيح
يا دنيا يرحمني الإله يا دنيا آه
آه يا زمن يومي الرسمت على السطور
باقات حنان محفوفة بي ورد الزهور
يوم انفجر فيَّ الحنين وأصبحت ما ياني الصبور
يومي الحكيت سراً قديم طاويهوا آلاف الشهور
يا دنيا يرحمني الإله يا دنيا آه
شاء الكريم رغم البعاد أكتب حروفك وارسلا
قاعد أعاتب في البريد يمكن يكون ما أوصلا
ومرات أقول باكر ترد تمسح جروحي وتغسلا
واليوم يفوت وتفوت شهور واطاتا كيف إتحملا
يا دنيا يرحمني الإله يا دنيا آه
مهما حصل أنا مابلومك يا عنيد
أملت منك في جواب لكنو كان أملاً بعيد
آه يا زمان بكيتني من أعماقي والبكا ما بيفيد
من بدري قنعان من هناك ما أظني تاني أكون سعيد
يا دنيا يرحمني الإله يا دنيا آه
آه يا زمن وآهاتي فيك متلاحقات
آه يا زمن من نار لهيب الذكريات
رحلة خيال فوق النجوم الساريات
وألسن لهيب شربت دموعي الجاريات
يا دنيا يرحمني الإله يا دنيا آه

شهرزاد
11-23-2008, 09:58 AM
الخصر النحيل
يا ست العيون الناعسة والخصر النحيل
ذكراك في الخيال تتمارى كل ما جنَّ ليل
لو قلتي ما بتدري العذاب البيَّ طبعاً مستحيل
عشان بحر الحنان واللهفة في عيني دليل
كم عانيت كم ساهرت كم من ليل وليل
كم ارسل دموع بالحسرة فوق خدي تسيل
وابحر في خيال أحلامي واتمناك خليل
تخفف لي مصايب الدنيا والعبء الثقيل
كم اتمنى اصبح زي حزام أو شنطة من هذا القبيل
أو اصبح كدمع الفرحة فوق خديك أسيل
ولو عبرت خواطرك حارة زي ابن السبيل
من أول نظرة لي عينيك للطرف الكحيل
اتخيل حروب الردة والسيف والصهيل
حسيت بيكي في نفسي وفؤادي عليك يميل
ومرت بي خيوط من ذكرى للماضي القبيل
اتذكر ركوب الساقية عند ساعة الأصيل
ومن قادوس يضري الموية رشاني العليل
مرت بي صور من ماضي زي حلماً جميل
ود شيخ والعشم زمراوي وأولاد كرنقيل
في نص المقات راكوبة فيها شباك وتيل
وشنطة من غير طبلة مفتوحة وفتيل
آه لو لقيت مرادي أرجع تاني أخش وأرفع واشيل
وأدردق في الضهر حلفاية عن ساعة المقيل
يا قلبي المعذب ديمة حب الماضي بي كتلك كفيل
مالك والعيون والبسمة والشعر الطويل
بحلف ليك يمين لو طرت لي خير الله ما بتلقى البديل
منو الغيروا اتخنق بالعبرة لحظات الرحيل
يا ما ناس في الدنيا ما بيرضو المثيل
وياما ناساً قنعوا بالرزق القليل
كنتي يا عهد الطفولة الماضي كالظل الظليل
كني زي جنة سندس وسلسبيل

شهرزاد
11-23-2008, 10:00 AM
الأماسي
كم بكينا على الأماسي بي كلام منظوم مسطر
تحسب الناس نظمو ساهل ونحن فيهو دمانا تقطر
فيهو نسكب دم قلوبنا كان تبين ماساتنا تظهر
كم بكت ناس لي بكانا وفي مشاعر غيرنا اثر
ولينا كم يصبح مراكب لو سماكم يوم تعكر
فيهو ريح الهم يشيلنا في بحار أشواقا نعبر
جيتو تسألو عن عواطف زي شجر بستان مغبر
إنطوت أيام ربيعو وحتى لون أوراقوا إصفر
والجفاف في ارضو يسري كل يوم بي صورة أكبر
إلا كان لقية عيونكم زي معالم موسم أخضر
لو سمحتم ميلوا إنتم علموا البان لو بيقدر
عيدوا للبستان نضاروا ولموا كل الكان مبعثر
يا حليل زولاً معذب في ديار الغربة عبر
عن مشاعروا وريدوا ليكم ولي بنات في قوزنا بُكَّر
ديمة يلهج بي غناكم وبرضو يحسب نفسوا قفر
لسه ما اتبارك جديدو وما وقف في داره بشر
قولو عرسك بيهو نسعد بالفرح لا حدي نسكر
كان يزيل ظلمة ليالي والدجى الفي دارنا عسكر

شهرزاد
11-23-2008, 10:02 AM
ست الحروف الخمسة
يا صفق النبت لي شيخ يصين التربة
بالليل والنهار وابل سماك ما غبا
***
بروق الساري لما تسيل تحاكي فؤادي أنا الخفاق
رعود الساري لما تكر تحاكي صداكي في الأعماق
مياه الساري لما تسيل تحاكي دموعي إلا دموعي مابتنطاق
أنا الجاكي وأنا الشاكي وأنا الباكي وأنا المشتاق
***
أنا الشايلك شموع وأخفيكي لو ريح السمايم هبا
أنا الزارعك ورد وأسقيك دموع لو كان مطر ما صبا
***
أنا المستني شوفتك عملت المستحيل ومحال
أنا الرسلت اشعاري بعد صفيتا بالغربال
أنا الجنيت وأنا الغنيت كلام لا قالوا لابيتقال
وكتير فكرت واتحيرت في قصة شقاي الطال
***
يا صفق النبت لي شيخ حريص طوالي
بالليل والنهار وابل سماك متوالي
***
حكايتي معاك عميقة عميقة واصلة القاع
قصايدي وراك جروح مطوية ما إبداع
حياتي بلاكي ما بتنطاق ومشوار بي وراكي ضياع
ومظلوم كوني من بعدك معلم الله من إشعاع
***
حياتي معاكي شن بتقولي غير دمعاً غزير انكبا
أو زولاً مصارع الموج في بر الأمان ما طبا
***
يا ست الحروف الخمسة لمان تحذف التعريف من الإخلاص
حكايتي معاك سنين وسنين طويلة خلاص
حكاية زول مرق ما عاد واتخلطت دروب ما فرزا القصاص
أنا الحبيت عيونك ولسه ما شفتك وشاعر بي بريقا رصاص
***
أنا المستني فوق قمم السهاد لو تدري حبك في الضلوع اتربا
حباكي الفؤاد من بدري يا ريت الفؤاد ما حبا

شهرزاد
11-23-2008, 11:41 AM
يا أعز إنسان
بكتب ليك يا دوب يـا أعـز إنسـان
عن شوقي وغرامي الكنت كاتمو زمان
***
عـن حـالـي وحيـاتـي أشـعـار
ماضي الذكرى كان قبلك صعاب وودار
شايل همي كان ياهو الرفيق والجـار
بحكي ليكي عن زول بالغرام انهـار
وأثبـت ليكـي بالبرهـان
***
كثير عزة كانت لـي حياتـو أسـاس
جميل آلامو كانت ضمة ما بتنقـاس
مجنون ليلى منسوب ليها بين النـاس
عنتر عبلة كان من أشهر الفـراس
بالغ فـي غرامـو زمـان
***
طه وريا ما شفتي الحرب كيف كـان
طالب شندي كان يلقالوا فيها أمـان
بس قوليلي كيف كانت حياة سيـران
كدَّر نفسوا مات في ظلمة الحرمـان
كلوا عشان تعيس روكسان
***
بكتب ليكي واشرح ليكي يـا نعمـات
حالـي البـيَّ زايـد منهـم مـرات
عايش في هموم ما بتطـردن آهـات
وآلامي وجراحي أنا برسلن نغمـات
دايمـاً والقلـب ولـهـان
***
باقي آمالي وا أسفي الشديد لـو راح
قاتم ليلي ما شايف بلاكـي صبـاح
يا نوري وسعادتي ومنبـع الأفـراح
راجـي سعادتـي بيكـي ارتــاح
ويصبح كوني بيك طربان
***
غاض الطرف دايماً ما بيصيب مرماك
سيوف الهند ما بلغت فعـل عينـاك
وحات اسم الله ما ظنيت يوم أنسـاك
وما ظنيت أواجه الدنيا تانـي بـلاك
وما شايف عليها إنسـان
***
بكتب ليكي مـا طلـع النجـم بالليـل
وبكتب ليكي ما ارتفعت ضفاف النيل
وبكتب ليكي ما رقرق عليهـا ضليـل
بكتب ليكي لامن تبقـي لـي دليـل
ويكون الهم زمان وزمـان

شهرزاد
11-23-2008, 11:46 AM
هواجس
أي لحظة معاكي كانت في سياج الماضي روعة
صرت بيها الليلة بحلم زي أمل تحقيقو بدعة
وكل شيء راجيهو يرجع ولي فات ما ليهو رجعة
وما محال من غير عيونك ألقى في دنيايا متعة
الظنون الفيكي عاشت وغيرت مجراك بسرعة
يا حبيب كان هواجس والهواجس ذاتا خدعة
والشموع الفي زفافك لما ضوت أخمدت جوايا شمعة
في غياهب نفسي كانت نور منور كل بقعة
إلا بس نيران فراقك ما محال تطفيها دمعة

شهرزاد
11-24-2008, 07:06 AM
محض صدفة

مرة صرح لي بي سؤال ... يوم لقاني كأني تمثال
مالي شايفك شارد البال ... قلت ليهو سباني الجمال
كان قريب وظريف الدلال ... ورغم قربو بعيد المنال
كالقمر في ليلة كمال ... في الضواحي يضاحك التلال
في العيون والجيد كالغزال ... يمشي كالطاؤوس باختيال
والقوام ممدود في اعتدال ... وفي طباعو بديع الخصال
محض صدفة ويوم كرنفال ... والبنات أنواع واشكال
كان أثر نظراتو ينهال ... في فؤادي كوقع النبال
قلبي من يوم شافو ما زال ... في الدرب إدبار وإقبال
أصلو مهمل وصدك الطال ... زادو فوق إهمالوا إهمال

شهرزاد
11-24-2008, 07:10 AM
العمـده
جرعة من السياسة العمدة
غير ادون بي صراحة نفسـي مـا بتلقالـة راحـة
يـا بنـات أشعـاري أنتـن العليكـن مـو شويـة
وانطلاقكن ما هـو هيـن ذي رصـاص البندقيـة
فيك لي التاريخ بـدون كـم حكايـات مـارا بـي
راسخي من زمن الطفولة وماخدي في الافكار مساحة
كان نسيت ما بنسي مرة في الصباح يوم جانا صايح
مو كتير والعمدة بـرة بـرة مـن عالمنـا سايـح
بـرة مـن دنيـا المضـرة الكتيـرة قليلـة رايـح
ولي في يوم من صباحوا وبقة قبـل النـور مناحـة
طاري في يومو اللي فارق جبنا زكراهـو العشيـة
مما شال من جارتو كبشاً دايرة لي عيـد الضحيـة
قلنا ليها أشكيهـو قالـت الا لـي اب ايـداً قويـة
اليشيل الدايرو يمشـي ربـي يخلفـة فـي مراحـة
أنزل الله السكينة لي قلـوب فـي الريـف بسيطـة
ماها ذي صخب المدينـة لمـن استرجـع شريطـة
ما بتحل الاسـرة دينـه الا مـن قطـع السبيطـة
كان هجير الحوجة راشـح النخيـل باقيلنـا واحـة
بعدها الايام توالـن فـي قفـا العمـدة وحكومتـو
انتقـل والرقـدة طالـت والبيرقـد قاسـي قومتـو
الزمن بي الفيهو جايط ما قطع لي العمـدة نومتـو
نومة لي ابد الاوابـد تانـي مـا بشـرق صباحـة
الملك يا عمـدة وينـك الاراضـي الليلـة ميـري
البحر مـا خلـه طينـك شالـو شـلال الدميـري
والزمـن شتـت عوينـك والحكومـات الكتيـري
بـددو الوارسنـو منـك الا بـس وش القبـاحـه
لا بهزنو الكـوارس لا الشمـوس يعـرف مغيبـه
لا الخريف كان جاهو كابس المطر يسمـع صبيبـه
لا اناشيـد الـمـدارس لا الطواحـيـن القريـبـه
خشمو من تالانا كارس في المقابـر مافـي راحـه
حتي الكلاب الكان تهو كان يجيـب العمـدة راسـه
بي رصاصاتو المدوزي ما بيقيـل كلـب الحراسـه
هسي جات بي قلب قوي رشـت الشاهديـن نجاسـه
فوقو نامت مطمئنـة هوكـان قبيـل يكـره نباحـه
المطر يا عمده قلـه وانكمـش فاصلـو المـداري
والعرب تنجيمة جل ضاقت الشر فـي الصحـاري
مالقت لي ريقـة بلـه جـات تشاركنـا الطـواري
والطواري زمانة ولى وقلـه بيـن النـاس نجاحـا

شهرزاد
11-24-2008, 07:13 AM
المهاجرة
كنت بحلم بي لقاك واتمنى يحصل
كنت خايف قبل أشوفك عمري يكمل
كل زول وصف لي عنك ما قدر لي وصفك اكمل
كنت بسمع بي جمالك ولما جيت لقيتك أجمل
يا سبيباً زي سواد الليل تهدل
ويا جبيناً القمر من نورو يخجل
ويا عيوناً فيها ماس الريد موصل
ويا نغيماً يفرح الفي القيد مكبل
ما تعالي اشوف رقيصك ليلي أليل
أصلي جايي عشان اشوفك وبكرة ارحل
إنتي عدتي الذكرى لي قلبي المهمل
لي حبيباً ديمة عن أحوالو بسأل
ياهو شوقي وياهو آخر وياهو أول
ياهو همي وسر عذابي الما حيكمل
يا المهاجرة سنين وهجرك ليا طوَّل
في غيابك ولى صبحي وليلي اقبل

شهرزاد
11-24-2008, 07:15 AM
مابتجف أبداً جفوني
مابتجف أبداً جفوني والدمع طوالي هاطل
والخلوق بعدك جفوني والضياع ياعابرة حاصل
عابرة ذكراك ياها عوني في الزمان الجاف وقاحل
في سراب توه عيوني في بحار من غير سواحل
عابرة من فارقتك إنتي أصلي ما ونيت مواصل
في طريق لو كان عرفتي سام وا أسفاي قاتـل
عابرة محتار كيف ألاقيـك لي عيونك وين أقابل
مدة في حرقة بواديـك قلبي مارشاهو وابل
عاد أجيبلو الفرحة من ويـن مني كل الشايفو جافـل
راجي من جملة مساكين رحمة الله الماهو غافـل
إلا بس وحياة حناني والمني الصعبان وساهل
بي غرامك يا أماني الفؤاد مليان وآهل
للفراق البينا أسباب يوم تزول يا عابرة آمِـل
نبقي زي مانحنا أحباب نمشي في الأعياد نجامل
عابرة لوكان ألقي خاطري بسرقن في القيط سنابل
وأهدي ليك من بين جواهـري أندر الماسات في بابل
ترتوي وتشرب بواديـك وينتشي الفي فرعو ذابل
ويرجعن صادات قماريــك ويصدحن في الدوح بلابل

شهرزاد
11-24-2008, 07:17 AM
عجل الزمان
يطول الليل علي البيشيلوا يتوجع
يقيف عجل الزمان تب فجروا ما بيطلع
يزيد الشوق مع نسماتو يترعرع
تبكي الزول قدر ما قلبوا يتشجع
وأنا أصلوا قليبي دايماً للهموم مشرع
تقول وكرا وبكانوا المنو تتفرع
طريت الكان زمان في قوزنا قام ودع
دا أورثني الدموع والعبرة لا هسع
كان ملك الرقيص في فنوا كم ابدع
لبس تاج الجمال فوق عرشوا إتربع
الفارس الشديد قداموا يتضرع
يشل فكر اللبيب وكلامو يتقطع
طريت البي الجزاير جاري كان يزرع
جفل وزينا من قداموا وإتفرزع
هبش بابورو دوَّر صوتوا كالمدفع
حقب طوريتوا مسروف جدولوا ودمَّع
طريت هناك مكان يتلملموا الشفع
نشيل الليل مع الطنبور صديقنا المنو ما بنقنع
طريت الصحو قام لك جاري ما بيسمع
يدعك في العيون نعسان وينترتع
حليل الماضي يا أحمد مكي ما كان الزمن أسرع
كم اتمنيت يعود لكنوا ما بيرجع

شهرزاد
11-24-2008, 07:28 AM
مشتاق للبلد

يا عابـرة مشتاق للبـلد
شوق الغفار الجافة لي صوت الرعـد
للروعة في أيام زمان وشليل وشـــد
للوقفة فوق درب الورود والصيـد ورد
لي زول يدودر للشراك في قينقـــرد
يدعوها يابت الملوك بحرك شـــرد
لي صوت حنون بينادي في صبح السعـد
ماتصحا يا زين الجنيات شايك بــرد
حبل الصلات البينا أقوي من المسـد
لولا مناشير المشايخ والعمـــــد
فجعوني في ريدي القديم لما إتفقــد
يوم فقدو كان يوماً عجيب هزاني جـد
باعوهو لي زولاً غريب شالو وشــرد
خلاني في غمرة شقايا بلاسنــد
حسيت إني فقد هنايا إلي الأبـــد
في لحظة عِن ساعة الصفاح لُمان عَقـد
طارت سحايب أحزاني بالشوق والكمـد
غطت سماي الفيهو نجمات بالعــدد
الحالة ياست العيون مابتنشرح مهما سـرد
يعلمبها الرافع سماهو بلا عَمــد
عالم الغيوب الخمسة بي جاهو لإتفــرد
الباسط الباري البديع صادق الوعــد
قلبي الوراك أنفق سنين ماليها حـد
رحالة فوق جمل الهجين طالبو الأمــد
وآخر كلام ياعابرة قدامك ولــد
راييو الأخير الموت ولا العيشي النكـد

شهرزاد
11-24-2008, 07:35 AM
يا نفسي ليه ..؟
إنتي ليـه يـا نفسـي ليـه ثابـت هواكـي
لي حبيـب ناسيكـي فـد يـوم مـا طراكـي
من بعد الحنان والإلفة والريـد فـي صباكـي
ليه جار الزمان الليلـة عكَّـر لـي صفاكـي
كم عانيت هموم يا نفسي كلو عشان رضاكـي
ولهان والصبر كملتـوا مـا اتحقـق مناكـي
ما هماني ليه يا غالية حـال النفسـوا باكـي
بي ألمو وجراحوا الدامية فد يوم مـا نساكـي
رغم الكان وهجرك ليهـو كتـر مـن غناكـي
كان متمني يوم يلقاكـي يسعـد بـي لقاكـي
كم في ظلمة يبكي ويبكي عبَّـر عـن هواكـي
يحكي لك عذابوا البيهـو والحاصـل وراكـي
راجيك بي عذاب خلاهو حفظـاً لـي ولاكـي
وما هماكي ليه يا حلوة كـم صابـر رجاكـي
ليه زدتيلوا ليـه آلامـوا والجـرح الطواكـي
والكان لي سعادة اياموا كانوا قصدوا اصطفاكي

شهرزاد
11-25-2008, 11:21 AM
حوار بين الغنى والفقر

التقى في إحدى الليالي المقمرة في إحدى القرى الريفية
وعلى شاطئ النيل ولأول مرة الفقر والغنى
ودار بينهم الحوار التالي وكان يجلس بالقرب منهم إبليس اللعين ..
النص :
الغنى :
يا فقر .. يا فقر خاف رب العباد
إنت كم بهدلت شحاد
في الصقيع علمتو الرقاد
لا غطا ولا موية لا زاد
وما بتفوت دمك دم قراد
الرسول منك استعاذ
وبرضو عامل فيها شحاذ ؟؟؟

الفقر :
لو تعوذ مني النبي
برضو ما اتمناك يا غبي
إنت كم أفشيت الفساد
وكم وكم ضللت العباد
فوق دروبك طشوا أولاد
جاهدوكا وسابو الجهاد
بيكا كان قارون استفاد
يا ما كان في الدنيا أسياد
خلو دربك وجوني زهاد
عرفو آخر دنياك فنى
ديل أولو الألباب يا غنى

الغنى :
يا فقر .. آ فقر ما تخليك صريح
لا تكورك وتقعد تصيح
إنت مجرم وخشمك فصيح
المجرَّح زدتو تجريح
وانت كم أمرضت النصيح
إنت واحد فاقد الراي
ولا تقارن نفسك معاي
أنا كم وكم ذللت الصعاب
وكم وكم زوجت أحباب
وكم وكم جمعت أصحاب
وكم كتير عمرت الخراب

الفقر :
ياخي ما تخليك يا غنى
ودار تلف مين دي علي أنا
إنت ما أفسدت الشباب
الصغير علمتو الشراب
إنت كم فرقت أصحاب
فوق دروبك ختو الرقاب
ولو حصل زوجت عشاق
عن غرامك ما عن وفاق
بكرة يظهر فيهو النفاق
ويبقى اسبابن في الطلاق
الزواج مش فكرة وإصرار
الزواج حكمة واختيار
إنت حاقد زي السجار
تبدو نكهة وكلك أضرار

الغنى :
يا فقر ما تنصف الحق
يا فقر ما تنصف الحق
إنت زولك ديمة ندمان
وطول حياتو عذاب وحرمان
يومي يشحد ويومي عدمان
مرة يلقى ومرة يتهان
والنفوس لو سمحة طباع
بي مشاكلك تصبح سباع
وتنحرف ويطويها الضياع
إنت كم أجبرت مسكين
بالكذب حلفتو اليمين
يا فقر تلعب على مين
أنا زولي من أقوى المؤمنين

الفقر :
إنت أوع تكون زول جبان
أنا عمري ما ضللت إنسان
إلا واحداً أصلو خيبان
أنا زولي لو صلى يصلي صاح
دمو رايق وعقلو مرتاح
لا بيكون ناسيلو مفتاح
لا بيضرِّب فيها ارباح
وإنت زولك عقلوا محتار
يترك الصلوات بالنهار
ويجمعن صلواتاً كتار
ويمسك الآيات القصار

الغنى :
إنت ليه ما قلت الزكاة
أصلو كل الدين في الصلاة ؟؟

الفقر :
الصلاة بيناتنا أنا وياك
والزكاة دي مصيبتك براك
إن دفعتها يدوك جزاك
وإن جحدتها تتعب هناك
يا غنى إنت مصايبك كتار
وبالعليك طماع وجبار
في قريش كم ضاعو تجار
وفي طريقك ماتو كفار
إنت مهما تنفع كتير
برضي شايفك ما فيكا خير

الغنى :
يا فقر الكلام واضح غير دليل
إنت زولك دايماً ذليل

الفقر :
يا غنى الكلام واضح غير دليل
إنت زولك دايماً بخيل

الغنى :
إنت كل الناس يكرهوك

الفقر :
وإنت ضيعت البحبوك

في هذه الأثناء يدخل إبليس قائلاً :
إبليس :
يا ولاد الجوطة فوق كم
اللكون بيناتكم حكم

الفقر :
أسمع .. أسمع .. أسمع إبليس
إنت أصلك راجل خبيث
إن بديت تدخل في الحديث
يتخرب ما نلقالوا ميس

إبليس :
ما الحكم واضح يا فقر
إنت أصلك حنضلاً مر
وكلها أفعالك ما بتسر
أي زول مبسوط ضل تاه
من ترافقوا بيذكر الله
يضغط على يده باسنانه ...
الله منك آه وأحي
كلهم عصيتم علي

الفقر :
أصلي عارفك ما راضي بي
لا تعضي اصابعك علي

الغنى :
كلام إبليس فيك كلو صاح
إنت دايماً راز ونطاح

الفقر :
ما تقول رأيك في الغنى
ولا بس حاقر بي انا

إبليس :
رأيي واضح فيك يا غنى
بيكا متسهل أمرنا
بيك كم غشيت إنسان
كان ملاك حولتوا شيطان
إنت أصلك راجل جدع
إن دفرتك في النار تقع

الفقر :
صائحاً ...
اليكون في صفو إبليس
يبقى واضح ياهو الخبيث
اليكون في صفو إبليس
يبقى واضح ياهو الخبيث

الغني :
أسمع .. اسمع .. أسمع يا فقر

الفقر :
بس خلاص أسكت يا رجيم
إنت ذاتو مصيرك جحيم

صوت :
يا أصحاب بيوت مرفوعة شامخة تعانق التاريخ
الزارع قرع ما بيحصد البطيخ
وإن مات الضمير ما بينفع التوبيخ

شهرزاد
11-25-2008, 11:25 AM
وإفترقنا
أذكريني يا حياتي كل ما عز المنام
وأرحميني وأعذريني كيفما كان الملام
يا ربيعاً ضاع مني
في متاهات التمني
لم تمت ذكراك عني
لا ولا مات الهيام
***
في زمانٍ من شبابي
خلف هاتيك الروابي
إلتقينا يا صحابي
عندما شاء الغرام
***
إلتقينا غير قصدِ
وارتشفنا كأس شهدِ
وافترقنا دون وعدِ
مثلما يمضي الغمام
***
يا عيوناً كل وقتِ
في شكاةٍ غير صوتِ
حينما تحكي بصمتِ
لا يضاهيها الكلام
***
ذكرياتٌ لست أدري
إفتراءٌ لا لعمري
ومضةٌ كالشهب تسري
ثم يطويها الظلام
***
يا إلهي أنت ربي
هكذا قد كان حبي
لحظةٌ يا ويل قلبي
بعدها طال الخصام

شهرزاد
11-26-2008, 10:18 AM
مواسم الفرحة
يا حليلكن يا مواسم الفرحة ويا حليل ماضي الليالي
ابكي وأنشد من رحلتي طال بكايا وطال سؤالي
فوق سحاب الشوق مسافر لسه ما حطيت رحالي
ما تعودن يا مواسم ما خلاص بشتنتو حالي
داير أعيد الماضي مرة عودي يا أيام تعالي
لحظة في دنياك اعيشا نعمة من تصوير خيالي
كنتي نسمة وكنتي بسمة وكنتي أنغامي وغنايا
كنتي جنة وبين أهلنا عشت فيك ايام هنايا
كنتي يا حلم الطفولة بقرأ في عينيكي آية
في ابتساماتن خجوله توحي ما تخفي الخفايا
اسه عارفك يا جريئة بتقري في ألواح شقايا
في ابتساماتن بريئة تمحو آثار الخطايا
في رجاكن يا مواسم أبكي ما خليت باقي
وانتظرت كتير وراكن طال عذابي واشتياقي
هبي يا نسمة شقايا وزيدي لي جمر احتراقي
ورشي يا غيمات بكايا إنتو ما ياكن رفاقي
يا مواسم الفرحة عودي ما خلاص طوَّل فراقي
عودي لي أوطان جدودي خلي طرف العين يلاقي
كنت قايلكن تعودن للديار من غير أنادي
وكم صبرت ويا ما إنتن كل يوم في رحلة غادي
صوت هديلكن يا حمائم لحظة ما فارق فؤادي
وطال غيابكن يا مواسم وضاع شبابي وطال سهادي
في رجوعكن يا مواسم برضو ما قل اعتقادي
فيها إيه لو مرة غيمكن رش في ساحات بلادي

شهرزاد
11-26-2008, 10:21 AM
ماضينا
أحكي لي بالبيكي قولـي والعلـي عالمبـو الله
يا حليل أيامنا بدري ما خـلاص ماضينـا ولـى
لجنيها الدارة جولي أدي روحنـا وشوقنـا بلـة
وأرمي كل الكان وراكي من عذابـاً بينـا حـلَّ
بالحنان ما ضينا حافل كنا نقعـد فيهـو سلـة
وانفرادنا مع الليالـي والقمـر يـادوب تجلـى
كان فراقك لينا قاسي وباقي فـي دنيانـا علـه
كم صبرنا وراك ليالي والصبـر مـا ذاتـو قـلَّ
بالكتب فكرت أنسى وكـم كتيـر صفـح مجلـه
إلا ذكرك ما نسيتو يـا خـي لالا وحاشـا كـلا
كت بقدر لي رجوعـك إلا كـل تقديـري جـلا
بي وراك في دارنا نورك يوم رحل لي كورتي هلا
النسيم في الشوق يزيدنا كـل مـا ادانـا طـلَّ
في لهيب أشواق بعاني قلبي آه يا روحـي مـلَّ
الجسيم بالطيب يجينا فوقوا لابسة حرير وحلـه
أصلوا كان البينا حاصل مـن غيابـك ليـس إلا
لي ديارنا الليلة جيتي وبيكي ينسى الدار مذلـة
ويوم وداعك تانى برجع يشهد الأحزان مـن الله

شهرزاد
11-26-2008, 10:24 AM
ذكريات مغترب
ما كنت أحب أنا كل زول وأصبحت احب كل الأنـام
لكنو حبك كان عجيب يا مـا لقيـت بعـدك محـن
بعدك نعاني الشوق دفين ألماً يطوف بين حين وحين
ذاكرك دوام أنساك محال عينيَّ كم بالشـوق بكـن
وينو الحنان أيام زمـان والزمـان البـدري كـان
مشتاق شديد والشوق عذاب يا حبي لي أيام مضـن
بشتاق ضليل مويةً زلال بانت زهـورو وفجـأة زال
ما كان حقيقة صبح خيال طلاني زي أحـلام وسـن
بنظر بشاير الخير سحاب في نصو برقاً لاح وغاب
وأفـرح واقـول يـا روحـي آه بيـديـك بــدن
لكن بشاير غير صحاح تب لا ظهـر لا تانـي لاح
تديني موعد ومابتعود يا ربي ويـن حـب الوطـن
لا بد أبدأ السفرة أقوم رغـم العواصـف والسمـوم
لكنو حبك بالعـذاب يـا روحـي قـدر ولـي أذن
بالشوق عليك سال قلبي ذاب لا عاد زمانك لا عتاب
لكني كيف ارجع واعيش أنسى القبيل من غير تمن

شهرزاد
11-26-2008, 10:27 AM
فجعة وفجأة
كلمات حنين للماضي خطاها اليراع
ودموع حسار تنجارا من غير انقطاع
ما إنت عجلت ومشيت لا همسة لا كلمة وداع
خليتني في بحراً كبير زورق يشابي بلا شراع
خليتني في دنية عذاب في ظلمة في لجة وصراع
بعدك حياتي بقت كهوف عدماني والله الشعاع
يا نخلة ليه ... يا دنيا ليه ؟
يا نخلة ما كان عيب عليك رباكي سوالك قلب
ومن ظلام حوراً صغير خلى النسايم بيكي تتلاعب لعب
الهابي من جهة الشمال والجايي من تالا الغرب
الموت دا ما كاسات تدور بيناتنا لا بد تنشرب
ولا بد من كأسك يجيك كان في سرير أو في حرب
لكني برجع تاني أقول كيفن عليك هان ما صعب
يا نخلة ليه ... يا دنيا ليه ؟
يا دنيا كم جمعتي ناس في بهجة باكر تتفرق
مخنوقة عن ساعة الوداع عبراتا سدت في الحلق
ترجع سريع تنسى الحصل عارفي البفوت ما بيتلحق
لكني كيف أنسى القديم والكية فوق الكية دايماً تنطبق
وريني عاد كيف الخلاص ما طال لو لمع البرق
تلقى القليب داير يطير بالشوق مقرب يتحرق
يا نخلة ليه ... يا دنيا ليه ؟
يا دنيا أديهو الأمان فد مرة لو كان يقتنع
ما إنتي رسلتي القدر عارفي القدر مابيندفع
وقفتي زي زولاً مشارك في جريمة وعندو فيها أكبر ضلع
ويتعوذ السواها عامل نفسوا لا شاف لا سمع
الدرب الطويل يا دنيا من غير رفيق مابينقطع
واللقمة من غير السرور ما مُرة تب مابتنبلع
بعدك حياتي بقت جبال مخروطة ما أظن تنطلع
يا نخلة ليه ... يا دنيا ليه ؟
خليتني في مشوار وعر تاهت خطاي مابيتمشي
والحلة من بعدك خراب لا تنقعد لابتنغشي
ما الدنيا اصلاً دار زوال ومن القبيح مابتختشي
كم من قلوب كم من نفوس صالاها بي نار الحشي
كم من صغار خلت هدومن بالدموع مترشرشي
يتباكوا فوق زولاً عظيم كان في حياتهم كل شي
لكنوا خلاهم رحل واحدين صغار لا هسي ما عرفوا المشي
يا نخلة ليه ... يا دنيا ليه ؟
يا زهرة العمر الكئيب ما كنت في زمنك مرح
ايام اشوف اشياء بتلمع في العمر وأمشيلا أقول شيتاً سمح
ألقاها يا قطعة قزاز أو قطعة صفيح ساكت قرح
ايام جهل مابتتنسي وذكراها دايماً في الفؤاد مابتتمسح
بالله ما تسيبوا الظنون في زول حياتو تدور شرح
ما اصلوا مهما كان حفيظ لي سروا لا بد ينفضح
وباباً مقفل بالسنين لا بد من يوم ينفتح
والدنيا اصلاً دار جروح والفيها لا بد ينجرح
يا نخلة ليه ... يا دنيا ليه ؟

شهرزاد
11-26-2008, 10:29 AM
في صورة ساقية
لحظات من الزمن مسروقة قبال البوابير
فيها كل الماضي منقول بالحذافير
في عيون الغيري صورة من التصاوير
إلا لي أنا فيها آلاف التعابير
في الدلس والعطفة والديو والإشيقير
ديمة بنظم شعري يوم ما خاني تعبير
بي حبال وجلود بقر منسوجة لا صامولة لا سير
تنساب المياه في دروة في بدل المواسير
جاري زي ايامنا في إيد المقادير
لو كان الفرق بيناتنا ينقاس بالمشاوير
كت بجيك والله مهما كلف السير
وين زمان عشناهو نجري ورا العصافير
وفي عشوش القمري فتشنا الزرازير
وين سنين الماضي وين لحن الطنابير
وين زمن فرحتنا وين طعم السنانير
داك زماناً ولى يا أحمد مكي والخير
عن زمانا الحالي هل تدوني تقدير
تهت دايماً فيهو كم فكرت تفكير
وأصلي غير الوجعة ما لاقيلوا تفسير
ولي جرح ما بيبرأ دايماً زايدوا تفجير
بي حبال الذكرى كم عورتو عوير

شهرزاد
11-27-2008, 01:22 PM
ساحر العينين
يا ساحـر العينين تعـال ما الدنيا غيرك عـندنا
رحلة عـذاب محفوفة بالخوف والضـنا
تفاح ظهـر بدأ يسـتدير
بالرغم من إنك صغــير
أنا بيك مـنك بستجـير
رهبة جمال بترجف الشيخ والجـنا
أرياح تفـوح زي العـبير
نعمـة رزاز فوق الغـدير
طيف قوس قزح في يوم مطـير
تصميم قدير في الفكـرة والـذوق والبنا
أنا زول غـريب داخل الوطــن
طالت حكايتي مع الشجـن
وتاهت خطايا مع الزمــن
طولت أروي على السنين قصـص الغـرام المحزنة
أنا زول سـئم ريح السمــوم
طولت مشـتاق للغــيوم
أنا ما خطـر بي بالي يـوم
الدنيـا فجـأة تلمـنا
بهواكي في كل الصـفات
وأقراكي بي كل اللغات
والقاكـي في كل الجهات
ما إنت أسـباب الدموع والبهجة والبكا والغــنا
أنا بشقى شان تسـعد عــيون
أنا بحتمـل مهما يكـون
من غير رضاك أنا كيف أكـون
أنا حبي اقوى من الظروف زي بعضو في الضيق والعــنا

الهادي قنديل
11-29-2008, 07:36 AM
شهرزاد

شغل نضيف والله

شهرزاد اقول ليك حاجة؟؟

ما اروعك

______

يلا واصلي

شهرزاد
12-01-2008, 09:33 AM
شهرزاد
شغل نضيف والله
شهرزاد اقول ليك حاجة؟؟

ما اروعك
______
يلا واصلي
الهادئ القنديل
شكراً للتشجيع
وللكلمات الطيبة
ـــ
تسلم ,,

شهرزاد
12-01-2008, 09:38 AM
يا سحايب
إنتي ليه الماحي يمدح ... ونحن نجهر بي غناكي
كلما طنبورنا يصدح ... ليه قلوبنا تذوب معاكي
كل شاعر قبلي أنشد ... وأوصفك من غير يراكي
إقتبس لي حبو أوجد ... لمحة من لمحات صفاكي
كنت أحلم إني أبقى ... ملك زمانك وسيد هواكي
شاءت الأقدار لأشقى ... وفي شقايا يكون هناكي
يا حليل الماضي أبعد ... فُتي ليه مرتع صباكي
بي سعادتك كنت بسعد ... وأبكي داماً لي بكاكي
من بحار دمعاتي بشرب ...يا سحايب خاب سماكي
آه أنا التائه معذب ... وعمري ضايع في رجاكي
كل ليل ذكراك معايا ... ولا تقولي الزول نساكي
أقرأ في ماضيك قرايا ... وأشكي للأيام عناكي
يا سحايب جودي مرة ... وأغسلي الأحزان براكي
أملي كل دنياي مسرة ... وأنفحيني بطيب شذاكي

شهرزاد
12-01-2008, 12:38 PM
بدر الضهابة
شن يجيبكن ليها إنتن *** فاطني في ريعان شبابا
في سمانا ظلاما ولى *** فاطني زي بدر الضهابا
ـ ـ ـ
فاطني لابسي قليب غوايش *** ديمة في ذكراها عايش
وغيري كم بي ريدا طايش *** وروحو ذابت في عذابا
ـ ـ ـ
تلقى طول الليل مصنقر *** يبكي متمحن مدنقر
وفي ضلوعو الشوق يزمجر *** زي صفير الريح في غابا
ـ ـ ـ
فاطني ما نوري وحياتي *** وفاطني فيها فقدت ذاتي
وفاطني تصبح طوق نجاتي *** الزمان لو مرة جابا
ـ ـ ـ
ذكرة الدار مافي بالك *** وما خطر يوم بي خيالك
والزمان من بينا شالك *** والسعادة قفلتي بابا
ـ ـ ـ
ليلي في ذكراك قصيِّر ***وقلبي في شوقك يحيِّر
يبقى زي طفلاً صغيِّر *** لما يصرخ يمة يابا
ـ ـ ـ
يا فؤادي كفاك وداري *** إنتي تبكي وماكي داري
السنين ما برضو جاري *** زي دموعك في انسكابا

شهرزاد
12-01-2008, 12:45 PM
دنية أحلامي


بريدك يا صــفا أيامي *** ومنايا ودنية أحلامي
إنتي يا عهدي والتزامي *** وهنايا وروحي وإلهامي
جـــوابك برد ظلامي *** كأنك ماثلة قــدامي

قلوبنا الليكي مشتاقة *** خطـــابك هيج اشواقا
تلاقي الذكرى خفــــاقا *** وتعبر ليك عن فراقا
يا حنين الروح واشتياقا ***صحيح الريدة عملاقا

كلامك يا حلوة جاني *** ووحات عينيكي بكاني
والظـروف بالفرقة راماني *** أقبل وين من زماني
لا متين أرجـع ليكي تاني *** وأتوج ريدي وحناني

نشوف الكون لينا طايع *** وتلوح من فجرك طلايع
وترقصي غصنك المـــايع *** وتوري الناس البدايع
وأعيش ايامك روايع *** وأعوض عمري اللي ضايع

شهرزاد
12-04-2008, 10:20 AM
لو كان عرفتك
لو كان عرفتك من زمان من قبل ما أطوي الألم
ما كنت عشت سنين طوال مرت عليَّ بلا طعم
كانت مجاهل ليل بهيم لا ضوا لا مرة ابتسم
أفقدني إحساسي الطروب خلاني جامد كالصنم
يا ما قتل جواي خصال والليلة عادت من عدم
تواقة ما بتعرف محال بسامة ما بتعرف ندم

شهرزاد
12-04-2008, 10:22 AM
يا ريت الزمان وداني
يا ريت الزمان وداني *** لي داركم وأزوركم تاني

يا زهر الروابي الغالي *** أرجوك أسمعيني تعالي
يا الوابل سماك طوالي ***بالليل والنهار متوالي

يا الزايد علي أحزاني ***إنتي القاسي ولا زماني
ولا أقدامي هي السايقاني *** دايماً في جحيم رامياني

يا مالك علي أعماقي *** يا الهين عليك فراقي
آه أنا من لهيب أشواقي *** في صيفي وشتاي متلاقي

طيفك من بعيد يوم جاني *** من عز المنام صحاني
كم هيج علي أحزاني *** و في الماضي البعيد زجاني

يا ريت النسيم يا أحلامي *** ياخد مني ليكي سلامي
بهدي ليك جميل أنغامي *** من شوقي وجراحي الدامي

شهرزاد
12-04-2008, 10:24 AM
الطفولة
عشت في عهدك حياتي روعة يا عهد الطفولة
وأسي في دنياي مآسي بس بلا ربـك يزيـلا
كنا حمديرة صبـي غنـوة للأمطـار نقـولا
تبتسم دنيانا تشرق نشوة في ساعة هطـولا
يا حليل أيام قضيتا فيكي يـا أرض البطـولا
كنت في لحظاتا بقرأ في الجدود معنى الرجولة
في بناتك بلقى ذاتي في ابتساماتـن خجـولا
وإنتي علمتيني ريدك وكنتي لي دايماً ميـولا

شهرزاد
12-04-2008, 10:26 AM
ريح الحظ
هب ريح الحظ كان صلاح == جاب مراكب اشواقك صباح
ولملم الربان الشراع == وانتهت رحلات الجراح
جايي شاقي الموج بارتياح == والبلد فرحان كلو صاح
الصغار الشيب والشباب ** يا حبابك يا مرحباب
النجوم مخضرة تحنان == والدباس والقمري طربان
والربوع الليلة مزدان == بي يواقيت قوزنا الحسان
بالنسيم تتعانق أغصان == زي عناق الجاري ولهان
والجميع في معنى الخطاب ** يا حبابك يا مرحباب
كلهم عاشوا مع الرباب == وكل واحد ليهو أحباب
والسرور خش بكل باب == زي غدير يتهادى منساب
ما خلاص فارقت العذاب == ألف مبروك من غير حساب
جات مراكبك كايسي الضباب ** يا حبابك يا مرحباب
وين مراكبي أنا عاد يا عريس == فاقدي دفة وكم رواويس
في محيط ما عارفلو ميس == دنيا قُبسة ومن غير انيس
موجو يضرب في الجواقيس == والزمان درسني تدريس
الهموم راحلي وفود وفود ** من زمن سيدنا داؤود
آه وآه يا قلبي العطوف == آه وآه آلاف الألوف
في محيط بالظلمة محفوف == موجو يطبق جبل ابنعوف
ضاع طريقك ماهو معروف == وما بتفيد الحسرة والخوف
حظي دايماً جايي مقلوب ** زي مصائب سيدنا ايوب
من زمان طاويها الجروح == بره سالم وجوة مضبوح
الضمير يبكي بلا أنوح == والمصائب بابا مفتوح
والسرور من نفسي ممنوح == ما بشوف دنياي بي وضوح
في ظلاما أنا ديمة مكبوت ** زي مصائب صاحب الحوت
يا الزمان من دارنا فريت == لسه في ذكراك ما نسيت
والرحال شديتا ومشيت == لا بقيِّل يوم لا ببيت
مرة دمعة ومرة يا ريت == كم كتير في دربك شقيت
حظي لامن أدخل الشيب ** زي حكاية ناقة شعيب
يا نسائم قلبي وصاك == والكريم بالسرعة خصاك
قولي لي إخلاص في مساك == الفؤاد متمني رؤياك
لا متين في حفلة القاك == ومن بعيد تحضني عيناك
يوم أشوفك يمكن يعود ** حظي يصبح حظ اليهود
العذاب البي والخطوب == في الأزل من بدري مكتوب
بي حنينك عقلي مشطوب == يا أمل شايلاهو الهبوب
يا حليل ماضينا الخلوب == ويا غنانا الفوق الدروب

شهرزاد
12-04-2008, 10:27 AM
يا بدير
يا بدير ليه نورك طفا == ومن ديار القوز اختفى
أصلو طبعك دايماً جفا == شتت الأفكار أتلفا
والنتائج فيك مؤسفا == والهموم راقدي مردفا
يا حليل أيام الصفا == قولو للطنبور يعزفا
كانت الدارة مستفا == والرزين نازل عوم قفا
حاكم الدارة موقفا == خلا كل الناس تألفا
فوقا يوماتي نصادفا == هالة من نورا مرفرفا
والشعر حزمة ملفلفا == راقدة بالبينسا مصففا
مافي بت في الدار تخلفا == في الرقيص عاد شن عرفا
الزمان روحي مكتفا == رامي آمالي مصفصفا
كل ما أحاول يوم أختفا == في الفريق الموج يقذفا
يا حليل أيام الوفا == جاها ريح الهم ينسفا
أوع يا أحمد مكي أحرفا == من قليبك يوم تحذفا

شهرزاد
12-04-2008, 10:29 AM
الجــــروف
ليكي كم غنيت وكم مقال == الجروف والتمر الطوال
كان فراقك شبه المحال == عمري ما ختيتلوا احتمال
فيكي ما جرَّ قلم خيال == إلا ما يوحيهو الجمال
***
كم في بعدك لاقيت صعاب == وكم شرب كاسات من عذاب
الدمع كالسيل يجري صاب == والشعر ينساب إنسياب
لازم أمشي القوز للصحاب ==رغم سيد الناس منو غاب
***
دار اشاقق فيهو بالنيل == في مريكب عند الأصيل
البنات واردات سلسبيل == وجاري حادر سر كرنقيل
دار اشوف شتلة مع العليل == زي عروس ترقص في التقيل
***
السواقي وعهدها الراح == كم بكيت كم عانيت جراح
في نسايم شق الصباح == زي بلابل الدوح صوتا ناح
داير أطير بالشوق إلا آح == كيف يطير مكسور الجناح
***
كل منايا أقابل الرفاق == داير اسالم ناس بالعناق
قلبي إسمك ليهو خفاق == وفي مداين شعرو عملاق
والكريم لو حلَّ الوثاق == ناوي أجيك والله مشتاق

شهرزاد
12-04-2008, 10:31 AM
جدار الماضي
يا عهد الطفولة الماضي دايماً في الفؤاد ذكراك
لكن وين دريب الرجعة عارف نفسي ما بلقاك
الشوق والحنين للماضي سيفن في الضلوع فتاك
رشن يا دموع الذكرى قدر المولى ما أداك
شامخ يا جدار الماضي طول المدة ما هداك
لا سيل الدموع الجاري شوَّه في العيون رؤياك
آه أنا من شقاوة عمري كل ما هلَّ يوم بطراك
وكل ما هلَّ يوم من عمري يبعد من خطايا خطاك

شهرزاد
12-04-2008, 11:47 AM
اوسلي
البقول يا أوسلي ينساكي ويطيق الفرقة وأشواقـا
أكيد ما شاف مآسيها وليالي الغربـة مـا ضاقـا
يكون من خاطروا راضيها ويميل للفرقـة وآفاقـا
يقوم يمشـي ويخليكـي ويقـول الدنيـا فراقـا
وهناك يصبح يهاتيبـك دمـوع تنجـارا مهراقـا
دوام ذكراك موالاهـو صحيـح الريـدة عملاقـا
كفاك ما شلتي ربيتي وضعتي الزاد علـى الطاقـا
رجال اصلتي ماضيهـا وبنـات قومتـي أخلاقـا
وليدك فرَّ خلاكـي يطـوف فـي بلـده واسواقـا
قدر ما طـاف بواديهـا جمالـك زيـو مـا لاقـا
قلوب مشتاقة لي نيلـك تلاقـي الذكـرى خفاقـا
وعيون في ظلمة تطراكي وعليها الدمعة رقراقـا
جروفك ديمـة نديانـة وعليهـا المويـة دفاقـا
نسيمك داعب أغصانك يغـازل خضـرة اوراقـا
هناك النيل بيحكيلنـا ويجيـب السيـرة ترهاقـا
زمان دانـت بـلاد لينـا ملـوك ذلينـا أعناقـا
زمان الدارة محكومة جنـوب وشمـال وشراقـا
سيوف وعجاج عجاج رابط يلوحلك فيهـا براقـا
حرام يا ناس دي عاداتنا يتم بالديسكـو إحراقـا
رقيص جامايكا ما لينا دي لي ناس سلوى وإشراقا
زمان كان الرقيص هولن جنات في الدارة صفاقـا
والبدور ياخـد شبابيلـن جـداول دمـو تتلاقـا
حليل العرضة والسيرة ورجال في النوبة ساساقـا
العيون تاقـت لماضيهـا القلـوب والله مشتاقـا
متين يا قوزنا ألقاكـا وأعيـد الماضـي والفاقـا
وأسِف الموية من نيلك وأغوص في ظلمة أعماقا

ود المقل
04-04-2009, 12:26 PM
الله عليك يا شهر ذاد ...
أينما حل يراعك رحل الضجر والهم وأشرقت
في الخاطر أفراح وراحة بلا إنتهاء .......
أنت بستان هذا الموقع وقطوفه الدانيه ..
الأستاذ ( الحبيب ) متفرد في كلماته وله مزاق
خاص لا يشبه الآخرين .. له التحية من منبرك
هذا .. ولك يا شهر ذاد المحبة والتقدير ........

محمد عبدالرحيم عبدالوهاب
01-03-2010, 07:49 PM
الملهمة شهرزاد تحية بحجم المستحيل علها تناسب ماخطه يراعك بلمسة من الوسطي والابهام لتنصع لوحة من كلمات الشاعر البرزخي ودالحبيب ولا عجب عندما ادخل المنتدي اولا ابحث عن مشاركاتك ثم ادلف الي رسايلي فلك ماشئت من تحايا