عبد القيوم الشريف قال كلام

[عمر جبريل ابو البروف]

الأخ الأستاذ الفنان الفنان / عبد القيوم الشريف
السلام عليكم ورحمة الله وبركاته
لقد كنت رائع يا فنان وكنت شايقي شايقي وكنت مثال للفنان المبدع وكنت خير سفير لدولة الشايقية وقد عيناك سفيراً للنوايا الحسنة عن دولة الشايقية بالأمم المتحدة .
أخونا الفنان عبد القيوم الشريف لقد كنت خير من يتكلم باسمنا في التجمعات الجميلة والليالي الحلوة زى ليلة ليالي النغم دي طبعاً للأسف الشديد المذيعين الذين لا يعرفون المنطقة مثل السيد ناجي والسيد طارق لا يعرفون الشايقي من المتشيقن لذلك تجد من يستضيفونهم لا يعرفون الحديث لا عن الشايقية ولا عن تراثها ولا عن شعرائها غير دق الطنبور وأسماء من تعاملوا معهم من الشعراء لذا تجد لقاءاتهم مملة ومضنية لأنهم يتكلم كالهبل أو الرعاع لأنه لا هو عارف ولا المذيع عارف وهذه مشكلتنا كدولة قائمة بذاتها ( دولة الشايقية ) حتى الصفاقين الذين ما من المنطقة معروفين وكان في واحد تحس بأنه سكران أو كالسكران في ذاك اللقاء .
أستاذنا عبد القيوم إلي الأمام وعلي الدرب ولا تتركوا أي متشيقن يتكلم باسمنا نحن كثيرون وكلنا كما قلت شعراء وفنانين ألما شاعر فنان والما شاعر أو فنان ناقد محترف أو مستمع مرهف السمع نحنا لمن الطنبور يرن تصدق الواحد تاني النوم يضروهو ليهو ما يجي وهذا عزانا الوحيد في هذه الغربة الله يحل قيدنا ويرجعنا .
أستاذنا الفاضل أشكرك علي ما أثلجت بها مسامعنا من كلمات نحن ما في زى كلامنا وما في زى شمالنا وما في زى شايقيتنا وما في زي ترابنا وما في زي تعاملني في كل شئ الأكل من الصحن نختلف عن الآخرين لك التحية وصح لسانك وصحيت وسلمت .
وزى ما قلتو : روقو كدي أدوها صنه وما في عسل زي عسلنا .
أخونا عاوزين سهرة كليلة سمر من أيام زمان علي تلال القرير ورماله بالليل تدعو فيها التلفزيون حتى يعرفوا كيف كانت ليالي سمرنا زمان ومن وين جا الكلام السمح دا .
لك التحية
من المستمع المعجب بكل من عزفت أنامله علي النقي منها ومن بره منها
عمر جبريل – البركل
Email: jibreel.300@hotmail.com

[عوض جلاس]

عبد القيوم الشريف فنان كبير بقامة هذا الوطن وقد مثل فن الشايقية خير تمثيل وهو فنان من النوع الذي يطربك قبل أن تستمع له ونحن نحيي فيه تمسكه الدائم بفنه وبشايقيته ورغم ظروف الغربة التي ابعدته عن السودان زمناً ليس بالقصير إلا أنه لم تلن له قناة وظل شامخاً ينحت في الصخر حتى وصل ما وصل إليه من مكانة مرموقة وحب جماهيري كبير ..
نتمنى له التوفيق دائماً في رفعة الغناء الشايقي وقد مثل الغناء الشايقي في مهرجان ميلاد الأغنيات الأخير وعندما سألوه لماذا يدخل في منافسة مع مطربين كبار من فناني الموسيقى قال إنه لا يطمع بالفوز في هذا المهرجان بقدر ما يطمع أن يكون للفن الشايقي وجود ومكان ثابت بين غناء الموسيقى والمطربين الكبار ويكفي أنه نافس فنانين في قامة الهادي الجبل ومحمود عبد العزيز .
لك التحية الفنان المبدع عبد القيوم الشريف وانت تحمل هموم المنطقة بكل هذا الحب
ولك التحية ابو البروف على ما أتحفتنا به من مواضيع شيقة وجميلة

[حسين علي الحاج]

الاخ عمر
سلامات وعبد القيوم راجل قامة ونتمنى له التوفيق في مشواره
وانا يا عمر الماغسني في بطني انو بجيبو بناتن كدي يتلفتن يمين وشمال وقالن ده رقيص الشايقية يا جماعة نطالب برقاصة عديل كدي من المنطقة النوع داك الرجولة تمشى مع النفارة
ولك تحياتي

[عمر جبريل ابو البروف]

اخوني عوض جلاس وحسين الحاج لكم التحية والتجلة
اخوتي لقد كتبت في هذا الموضوع لانني اعتبر فن الطنبور فن مفروض يكون تحته خط احمر بغض الظر عن المكان والقبيلة التي تتغني بهذه الالة العجيبة وما المني هو ما المك يا حسين لانو دائماً بيجيبو لينا فنان يتم استضافتهم وشعراء في التلفزيون الواحد ما عارف الحاصل بره شنو مجرد شاف الناس عاوز يتوهط نحنا فننا نظريات وفننا ذوق وشعرنا وشعراءنا مرتبين ومنظمين يعني الشئ لو ما سمح ما داروهو الناس عندي نسيبي رجل متدين قلت له رايك شنو في الغناء قال لي والله يعني لكن طنبورنا دا ما بنقول فيهو شئ يعني فيهو ما فيهو بنسمعوا انا والله لما يجي طنبور اقوم اقعد واتوهط في نص السرير واعاين لاني ما عاوز همسة واحدة تفوتني وبعدين يا اخي حتي الصفاقين ناسنا ليهم ذوق وترتيب معين ناس هاوين فنهم بجد لذلك من السوء ان يكون الشخص المستضيفنو ما يعرف يتكلم او يعبر عن تراثنا وفننا واشعارنا وغنانا وخدارنا وقيوفنا ومويتنا وشبالنا وكل شئ جميل والذي زار حي ا لشاطئ بالقرير قبل 1988م يعرف كم ان الشمال جنة .
انا زعلان لان السهرة التي كانت قبل عبد القيوم كان فيها ناس مابعرفو يتكلمو ولا المزيع ولا الفنان ولا ولا .
اما بالنسبة للراقصات لا بد ان يكون في اسس وضوابط يظهر بها الفنان في المسارح وامام الجماهير بعظمة هذا الفن الراقي المؤدب النظيف العالي .
التحية للشمال والتحية للفن الشمالي والتحية لكل محبي الطنبور في الوطن الحبيب .
مشتاق للبلد بي حاله والشوق للترابله اهلي مغستي انا وا شقاوتي رحلته ساكت ما قعد قبلي

[أبوزهير]

عمر ود جبريل
سلام عليك
الجنى ده عبد القيوم حبوبته ام امه من عندنا تب ما فيها كلام.. والولد مؤدب حقيقة وفاهم ويقدر اخواله تمام وزارهم في ديارهم وقعد معاهم واتوهط في واطات الله دي. وكان معانا هنا في الرياض والله هو الكاسنا وحصلنا واحترمنا احترام شديد والما فيه خير لى اهله ما فيه فايده.
دحين ندعو له بالتوفيق والنجاح وانت جزاك الله خير على ثناءك عليه وان شاء الله يكون عند حسن ظنك ويرفع راس القبيله.

[عبد الرحمن يوسف]

اخى عمرجبريل لك التحية وانت تثنى على الرائع الفنان عبد القيوم الشريف الذى فعلا يخجلك بتعامله وادبه ومجاملته .
الرجل فعلا همه النهوض بالاغنية الشايقية واظهار هذا الفن المعبر عن انسان منطقة الشايقية بكل مايحس وبكل مايعانى كان جاه الفيضان او المطر ، او سيرة عريس نازله البحر ويأخى عمر ياريت يتحرك التلفزيون لتسجيل مثل هذه الحلقات من البلد حتى يعطى الصورة الحقيقية للجمال والابداع وحتى يكون الرقيص على اصله .