الشاعر/عبد الله التاج

[شهرزاد]

يا نجيمات
لو سؤالكن يا نجيمات مالي ساهر ..؟
قلبي قاسم الليل معاكن ودمعي سادر
ماني عارف شن بقول انا يانجيمات ذاتي حاير
سببي زولا خدرو ضامر ديسوا فوق اكتافوا دافر
ما بيوالف يا نجيمات شال خيالي معاهو طافر
خضرك الفي جرفوا ناضر حاجروا تحت الموج يدافر
قاسي سيدو زرب دريبو يا نجيمات طبعوا ما بيالفلوا زاير
دهري يا نجمات مكاجر حظي دون خلق الله عاثر
اصلي من شافع صغير يا نجيمات شوم ومكتوب لي الدرادر
الزمن من طبعو جاير ماهو بس شان حبي نافر
ياما كم في الدنيا زي ويا نجيمات ما هو طاري العشري ذاكر

[شهرزاد]

جسور الدمعة
إنكسرت جسور الدمعة واندلقت منابـع احزانـه
الله لقلوب مكلومـة يـوم خبـر السـواد الجانـا
ادمنت العيون الدمعـة متوالـى الجفـون مليانـه
اغرقت الخدود بى سيله طبعت فى الوجوه أشجانه
الله من مرارة الفرقة وآه أنا من جحيـم احزانـه
سدت فى الحلوق العبرة لا من بالنويـح شرقانـه
القدر اللعين فاجعنـا لفـح الفرحـة مـن تالانـا
خلى صبرنا عاضى الجمرة تأكل فى الهشيم جوانا
الحزن الدخل جوانا باقى إلى الأزل فـى حشانـا
لا نوحنا وبكانا يزيلو لا بتغسل دموعـو أسانـا
تقودنا خطانا نحو آجالنا مو معروف محل مرسانا
يبرانا الممات وين نمشي شقيش ما نسوقه خطانا
الدنيا العبوس ملعونة اوعك من تنوم فـى امانـه
ترميلك ضليل خداعه ضامرى وراء مقيلو خيانـة
تتفتح زهور فى روضة تجذب للفـراش بالوانـه
من قبل الثمار تتحت قبال مـا تجـف اغصانـه
آه انا من نضارة وردة حين طلّ المحل بستانـه
ما اتمهلت تفوح طيبـه تبـرز للزمـان ألوانـه
وآه أنا من سكيل الوالدة وكتين ترسى اعز بطانه
تفتش فى الخلق كايسالو بيناتـن بـلا الضهبانـة

[شهرزاد]

إرادة الله مقدرة
ارادة الله مقـدرة قسمـة
مكـتـوبـة مـقــدرة
فيها نعمل ايـه ياتـري
ما خلاص سايبين القري
الزمان كيف جار افتري
جانـا بأحداثهـا مدبـره
هى النفوس باكية محسرة
والسفر من غير خاطرها
ياهو داك شبح القاطـرة
فى النفوس باكية محسرة
دقـة الساعـة مؤشـرة
وحس كبيبيـة مكسـرة
والسفر من غير خاطرة
تاني لا ونسات فى ضرا
لا حسيس نغمة معبـرة
لا نشوف ليلات مقمـره
لا حسيس صفقة منقـرة

[شهرزاد]

مسافر وين ..؟
وين قايـم مسافـر ماشـى خاليهـا الديـار خربانـه
وانت عارف رحيلـك بعـدو تتعـوج وراهـو قفانـا
ما بنحمل فراقك لحظة يـا القمـرة المضـوي سمانـا
كيفن هسـع حالنـا معـاك لامـن دار تفـوت تنسانـا
اسأل مرة قلبـك قلـو لـو كـان ليـك قليـب بأمانـه
يا خي هل يوم فى الخيال طارينا او ساكت خيالوا غشانا
الليل لو كان بالدلال خصـاك ربـك بالنـوح خصانـا
يا خى بس صون العهود البينا تحصد من ثمـارا وفانـا
زولا عالى جد فى قدوا سامـي وعنـدو بينـا مكانـه
يا خى شوقنا المستعر لى لقاهو من قبل السفـر هزانـا
الله مـن غصنـا نـادي يتمـايـل يحـاكـى البـانـه
ياخى حافاهو الورود بالخضرة نايم للزهور فى حنانـه
ينـده للنسايـم هابـي منـفـوح بالعـطـر رويـانـه
ياخـى هيجتـا فيـنـا لامــن بالـوصـف اعيـانـا

[شهرزاد]

جنا أمدرمان
نحن مانا لميم من عريب ناس فحم واقود ناس حطيب
نحن من اصل المجاذيب ناس ابل يعرفنا الوضيب
نحن ناس طنبور ناس دليب ناس سدارى عمم جلاليب
ناس تمور وقموح قواسيب خيرنا تشهدبو القساسيب
مافى بينا الراجل الضنيب الاضينى البسرق الجيب
مانا ناس ونسات فى المغيب نطق مع البنوت قرقريب
عزة الله الدارى بالغيب وتانى بى نبى الله الحبيب
نحن عند الوكرة ام لهيب سيفنا يأكل المو فى النصيب
الجانا منك كان جد غريب قولى فزع الناس شن يجيب
بلا شماتة ووجع قليب صون لسانك وكون زول اديب
اوعة تقرب وكر الدبيب
جنا امدرمان ابقى شوى شادى الحيل
شيل من ايدك المفدوعة عاج الفيل
خليهو الدلال للريل
ما بتعرف بلا التجميل
تعال فد مرة زورنا هناك عشان تعرف حضارة النيل
ناساً بالطوارى قسم يجسرو السيل
تعال شوف السواقى النايحة طول الليل
والتور البسوق ارقوق وتب مو فاضى فى الفتيل
يملأ عيون جداولنا ودموعنا تسيل
ولاد ترهاقا نحن هناك تراثنا اصيل
ناس بركاوى تن جريدو فادعو الشيل
اهل المنقة والمشرق مروق بالصفوف قنديل
اكلنا قمح وكلامنا سمح ويانا اهل حضارة النيل
وكت الحارة تتوتر وتسمع لى سيوفو صليل
تغنى مهيرة فوق الخيل
يتبل الركاب بالدم انين الخيل يقصو صهيل
جنانا بتلقى يملأ العين يزيد الكيل
ويسقى عدونا من شلاخنا نار الويل
ويبقى شلخ شوايقة اصيل
اصلو الخوف يمين مو هولنا الاعور نقولو عديل
نحن اولاد بعانخى وشبكة ابونا صبير
امنا ياها بت عبود صباح الخير
بناتنا يمين نعومة حرير
عويدن بان وغلاوة اكسير
وسمحات هن بلا منكير
حلات ايدن مع حبل الدلو الفى البير
كيف الحوش يرشن داجى ليهو الجير
دهينة الودكة فوق راسن تقطر بالشمس قطير
تسيل فوق الرحط تتدلا تملا عجاجى عاد للدير
نحن اهديل براك زورنا وتعال اعرف حضارة النيل
شن داير تقول يا نذار ..
بتسمع بالاسود فى الضيقة نحن اولاد على الكرار
اسأل كورتى عن تاريخنا عشان تحتار
وكت الباشا جانا هناك بلا انذار
مدرع وكان سلاحو النار
وكت الحارة ما بنعرف شى اسمو هظار
يمين لاقيناه بالفرار ..
واشعلنا المراكب نار ..
امانة يا جنى خسرلو خسار
ورجع لى بلدو شايل العار
نحن هاديل عشان تعرفنا يا البيقولو ليك نذار
صحيح لو قلته عننا اشو لا اسع نكوس التار
حليل الطابية يا امدرمان
حليل كررى وحليل ابوعنجة يا حمدان
حليل المهدى واسلافو اللى كانو زمان
حليل جيش الغبش يا هوان
جناكى الليلة يا امدرمان
فى جواى هز كيان
تعال شوف الغبش يا هوان
لا عرفو الماييج ضمة لافى دهان
الطاقية فوق الراس وبارمين عمة الدبلان
وعند الضيق امانى يا جنى امانى يا وليد امانى حنان
جنا امدرمان وليد ابو عاج
حصل يا وليد اكلت الكسرة من الصاج
نزل فى النيل تعوم راقد قفاك وفاج
حصل يا وليد نزل فوق ضهرك الكرباج
وجرب بالقرض تتداوى زى ما نحن لينا علاج
ما بتعرف بلا المكياج
واكلك يوت من الطوة بين كبدة وحمام ودجاج
جنا امدرمان هوى يا جنى
ما بتعرف بلا اكل الطوستى والبامبى
والبسبوسة والباسطة ام عجينا نى
بتعرف ترقص الجامايكا يا ابو شعرا مبرم طى
هوى يا جنى بتسمع بى بلاد الصى ؟
تعال فد مرة زورنا هناك عشان تعرف نحن ازى
نحن ايقاع دليب ينبح يشق الحى
وزغرودة فرح مصحوبة بالحمبى
وحس سوط العنج يصهل يفتق فوقنا جرحا نى
وفوق جرحا جديد يا دوب تخلف الكى
ودمنا يروى أرضنا رى
وحس بنوتنا مع الزغرود يسون سى
نحن اها ديل ايانا جنات بلاد الصى
جنا امدرمان شوف غباتو وجنو
مو عارف الشوايقة اظنو
الذرة والقمح زارعنو
الميرتق بنشرب منو
السيف والدرق راكزنو
للغارة الحصان ساعنو
والاسد البحجر الغابة نافش شاربو شافعنا البيرضع دابو يقلع سنو
اخير يا جنى لا تفلع وبيتكم من قزاز ساونو