أقبـــل ويــن ؟ أين أنت يا zahawi ؟

[نادر رشاد]

أقــبـــــــــــل ويـــــــــــــــــن

بعـد ضـيعت ريدتك مـن إيدي ضـيعت مفتاحه
ضـيعـت اللـيالي الحالـمة كــل لـذاتي و أفــراحه

يا شموسن كان بتسطع تهْز ظلماتي تجتاحه
و تغمر بي سناها الكون وتشتل نوره في الساحة

فقدتك يا صباح عمـــري و ليالي الفرقة جراحه
و زمان الآهـة مـا بيرحم وراك رويحـتي نواحة

ليالي الأنس ما طـابــت وراك مـــــا غنى صـداحـة
و لا رفت عصـافير ريدنا غـنت تاني فـوق واحــة

مــداين الشــوق مشــيت بيناته غــير راحـــة
أفــتش ليك يا النجــفة البرايا طــفيتو مصـباحه

بحر شوقاً عيون العين تفيض بي دمعو ســحاحة
تهز الروح ليالي الشوق وراك يا روحي براحة

عشت سنين تحت ضلك عطور نسامو فواحة
سقانى الريد تحت عـطفك لـيالي هـنية مرتاحة

برايا مرقْ من الجني مشيت للآهة و الآحة
صــلبتا قليبي بي ايدي مشــيت في دنيا رواحة

دنيا أشـــواقه لي غمة نســـيم بسـتانه كتاحة
لـيالي الريدة فيها أحزان تنق غـربانه مناحة

عـــليك الريد تعــوديلا و تجددي تاني أفراحة
تخلي قليبي يطرا البسمة ينهل تاني من راحه
أم بدة الأحد 6/5/1990م

[نادر رشاد]

شكراً جميلاً صديقي العزيز zahawi على هذه القصيدة الجميلة ، وبما أنك إبتعدت عنا وإرتضيت القطيعة برغم عدم رضانا ، فنجعل حضورك بأعمالك ، الى تعود إلينا كما نتمنى . وكانت قد جمعتني بك الأيام في خطفة من أيام الماضي فأحببتك وافترقنا لما يزيد عن العشر سنوات دون تواصل ، وفجأ ومن غير مقدمات يجمعنا موقع البركل ، فتحيا بيننا سنة التواصل لتختفي بعدها وينقطع التواصل لتقصير مني أولاً !! فهلا عدت إلينا ؟
ولك العتبى ...
كل الود ،،،

[نادر رشاد]

في ظروف غامضة ومنذ فترة ليست بالقصيرة إختفت مشاركات أخونا zahawi بعد أن إحتجب عن الظهور . وقد كانت له بوستات غنية بالشعر والصلاة على النبي . لن ننسى بوسته بعنوان (بقعة ضوء .. من المقل والحجير .. معاً ) والذي أتحفنا به بمجموعة قصائد من إنتاجه الخاص ، وكذلك بوست بعنوان ( تسجيل الحضور بالصلاة على النبي صلى الله عليه وسلم ) .
هو ابن الحجير المقيم بمنطقة الإفلاج جنوب السعودية .
فهلا بنت يا أسد كافوته ...
كل الود ،،،

[أب شخيت]

أخوي نادر
والله أنا ما محظوظ خالص خالص...الزول دا انا مما جيت البركل ماعرفتو وما اظن دخل ....ياخي دا شاعر لسانو طاعم خلاس ...!!.وقصيدتو دي عندها إيقاع سمح بالحيل إيقاع ما مطروق كتير...ياريت ياخوي تدينا منو زيادة ..!.مشكور وربنا يجيبو بالسلامة..
لمحة: القصيدة دي عليك الله بتلقى أحسن واصدق منها لي زول "طلّق وداير ينط"؟؟!!!.ممنوع التجربة رغم إني واثق التجربة ناجحة ناجحة..!!

[النافعابى]

اخونا نادر وانا كذلك اتسآل
ربنا يردك طيب يا زهاوى
اتمنى انو السمع يكلم الماسمع
عودو والعود احمد

[عوض جلاس]

مشكور الأخ نادر على القصيدة الجميلة ونتمنى أن يعود لنا شاعرها المبدع زهاوي حتى نتنسم من عبق عطره الفواح شذى وعبيراً يشنف به مسامع الجميع
تحياتي نادر والتحية للأخ زهاوي

[نادر رشاد]

أخوي نادر
والله أنا ما محظوظ خالص خالص...الزول دا انا مما جيت البركل ماعرفتو وما اظن دخل ....ياخي دا شاعر لسانو طاعم خلاس ...!!.وقصيدتو دي عندها إيقاع سمح بالحيل إيقاع ما مطروق كتير...ياريت ياخوي تدينا منو زيادة ..!.مشكور وربنا يجيبو بالسلامة..
لمحة: القصيدة دي عليك الله بتلقى أحسن واصدق منها لي زول "طلّق وداير ينط"؟؟!!!.ممنوع التجربة رغم إني واثق التجربة ناجحة ناجحة..!!


الاخ أبشخيت
لك من المحبة قواسيب ..
الحقيقة اخونا ده من شهور بعيدة اختفي في ظروف غامضة ولم يعد ، وفي ذلك الزمان لم نتشرف برفقتكم في هذا المنتدى , وبالنسبة لقصايدو نقول سمح الكلام في خشم سيدو !!! واذا ما رجع بنكيل ليكم كم كيلات من المطامير .

كل الود ،،،

[صلاح عبد النبي]

الأخ نادر
تحياتي ..
الأخ الزهاوي فعلاً من الاقلام التي افتقدناها في المنتدى .. وهناك الكثير من الأخوة الذين طالت غيبتهم ..
أتمنى عودة الأخ الزهاوي وهو بلا شك شاعر مجيد ويمتلك ناصية الحرف المموسق .

مودتي ..

[عمر مجذوب خطيب]

نادر كيف حالك فعلا اختفى هذا الرجل طويلا ليته يعود - وكمان في ناس كتار ما تعرف الهكر ولا المشاغل خلوهم يبعدوا تب - الحرص مطلوب على المشاركة والمرور والاطلاع عشان موقعنا يبقى فوق

[زكريا بابكر عمر]

أخي نادر نتمني أن يعود هذا الشاعر الجميل زهاوي فشعره فيه دفيء وحنان أهلنا بالشمال وتعابيره جزله وسهلة الهضم ..... واصل يا زهاوي ولا تحرمنا من هذا الكلام الجميل .....تحياتي ,,,,,

[رقيتون]

أقــبـــــــــــل ويـــــــــــــــــن

بعـد ضـيعت ريدتك مـن إيدي ضـيعت مفتاحه
ضـيعـت اللـيالي الحالـمة كــل لـذاتي و أفــراحه

يا شموسن كان بتسطع تهْز ظلماتي تجتاحه
و تغمر بي سناها الكون وتشتل نوره في الساحة

فقدتك يا صباح عمـــري و ليالي الفرقة جراحه
و زمان الآهـة مـا بيرحم وراك رويحـتي نواحة

ليالي الأنس ما طـابــت وراك مـــــا غنى صـداحـة
و لا رفت عصـافير ريدنا غـنت تاني فـوق واحــة

مــداين الشــوق مشــيت بيناته غــير راحـــة
أفــتش ليك يا النجــفة البرايا طــفيتو مصـباحه

بحر شوقاً عيون العين تفيض بي دمعو ســحاحة
تهز الروح ليالي الشوق وراك يا روحي براحة

عشت سنين تحت ضلك عطور نسامو فواحة
سقانى الريد تحت عـطفك لـيالي هـنية مرتاحة

برايا مرقْ من الجني مشيت للآهة و الآحة
صــلبتا قليبي بي ايدي مشــيت في دنيا رواحة

دنيا أشـــواقه لي غمة نســـيم بسـتانه كتاحة
لـيالي الريدة فيها أحزان تنق غـربانه مناحة

عـــليك الريد تعــوديلا و تجددي تاني أفراحة
تخلي قليبي يطرا البسمة ينهل تاني من راحه
أم بدة الأحد 6/5/1990م


وليدنا نادر هذا كلام ينقر فى الوتر الحساس

[نادر رشاد]

اخونا نادر وانا كذلك اتسآل
ربنا يردك طيب يا زهاوى
اتمنى انو السمع يكلم الماسمع
عودو والعود احمد

الحبيب النافعابي
والله الراجل ده مشتهنو بلا عدد
لكنوا وينو لينا ؟
كل الود ،،،

[نادر رشاد]

مشكور الأخ نادر على القصيدة الجميلة ونتمنى أن يعود لنا شاعرها المبدع زهاوي حتى نتنسم من عبق عطره الفواح شذى وعبيراً يشنف به مسامع الجميع
تحياتي نادر والتحية للأخ زهاوي

شكراً صديقي عوض جلاس
على كلامك الطيب
في الحقيقة هذا الرجل الفحل من الرعيل الأول لبركل ما قبل الهكر اللعين وأتحفنا بجميل كلماته ، لكن العين بصيرة والإيد قصيرة .
وتمنياتنا له بعاجل العوده لمواصلة الصلاة على النبي وتجديد بقعة ضوء المقل والحجير .
كل الود ،،،

[نادر رشاد]

الأخ نادر
تحياتي ..
الأخ الزهاوي فعلاً من الاقلام التي افتقدناها في المنتدى .. وهناك الكثير من الأخوة الذين طالت غيبتهم ..
أتمنى عودة الأخ الزهاوي وهو بلا شك شاعر مجيد ويمتلك ناصية الحرف المموسق .

مودتي ..

العزيز صلاح عبد النبي
اعجبني تعليقك وشهادتك في حق الرجل ، فقد جاءتنا من رمز من رموزنا التي تفهم الكلمات وتتزوقها بعمق وتجيد التقييم الشعري والفني .
شكراً جميلاً
كل الود ،،،