إخوانيات زكريا بابكر .. الشعرية

[عصام سرالختم]

يرجع الفضل لأخونا زكريا بابكر عمر فى البوست الشهير ( عتود دقش "1" و "2")وقد كانت ضربة البداية قصيدة خطيره عن العتود الشهير ..
كتب زكريا قائلا :
القصه وما فيها أخونا محمد الحسن دقش عندو عمبلوك ليهو ضل يربي ويدوعل فيهو وزول عارفو مافي _ملبتو في حوش السره بت صالح _ يقوم أخو البنات طارق علي صالح يقع في عينو العمبلوك أه ماكضب لباهو بالراحه وبدون ما زول يشوفو ورفعو في العربية وفللي علي الطريف وكانت عشوه جد . أه صاحبنا جا الصباح علي مراحو لقي دار الكلاب ترقع وجري جاي وجري غادي وما خلالو زولا ما سعلو ولا حس ولا خبر حتي العرب الفوق وصلن أه لمن خلاص قنع بقي يبكي ويمنح وناس أبراهيم بابكر ويعقوب موازرنو يشيلو ويختو معاهو شي شعر وشي نثر ورسلو لي عماد الطيب في الخرطوم والموضوع كبر وفي ديوان شعر كامل حايصدر قريب بعنوان ( عتود دقش ) فترقبوهو وأحجزو نسخكن من أسع لأنو الكمية محدوده . أه وصلني الخبر وأنا في جنوب السودان فقمته عزيتو نسوي شنو نشيل حالنا فكانت هذه المرثية :-


في الجنوب دابو جاني خبرك يا دقش
ماسمعته ويبقالي الطرش
الفاتحي..في عتودك البكيتلو وفرش
الشي قالو ماهو عتود نصاح قدر الدحش
أكلو فتريتي وأمباز ماضاقلو قش
وحلفو ناس(الطريف)اللحم شالوه بالطش
والله مغستك تشق وتجيب اللبش
بس مايدوكا الكوارع وباقي العفش؟
ناس أبراهيم ويعقوب طمبورن خرش
وبالكوراك حسهن اتقرش
وبالزعل الأكل قدامن مااتهبش
يغنو ويمنحو للعمبلوك الاتلطش
والكان ليمبارك هزه ليرشو ونفش
وعضعض ليلأصابعيهو وقرش
وقال ياخسارت عمبلوكنا الطفش
لحمو بج زي ديك الحبش
النار شمومه وحتي العضم هش
كان فيهو حلاة مزه حلاة نتش
مع جردلين شربوت يقطعن العطش
ألحق ياعماد الطيب زولك اتهبش
كوسلك فقير ان شاء اللة من العشش
حصلبو الزويل انشال حالو اتنبش
يجعر من صباحو ويلاقي بنات نعش
الحال بلحيل صعييب مادق الطنش
الشي المحيرني (طارق )وليهو اندهش
يكتل لأخونا الدش ويقبضو بالدبش

رابط البوست الاول :

http://albrkal.com/forum/showthread.php?t=1470

[عصام سرالختم]

زكريا يرد على اب شخيت
فى بوست عتود دقش ...

دربك أحمر ويادوب إنته جييت
وما قصرته معاك ياأب شخيت
شلته صينيتي عليكا ومشيت
ومن العتود لحما ما جلافيط
وعشان ضيفنا عليك حنيت
ضمره صاحبي أديتو الربيت
إلا شايفك يا زول نسيت
ومن كلامك برضي حسيت
زول محرش ولزوك جريت
إلا أسمع مني النجيض
إن كته نايم ويادوب صحيت
ولا جايي وللشر نويت
أحسن أرجع وماتقول حكيت
عندي ناسا يعفصو الشخيت
ومابيعرفوك نصيح ولاجنيت
ومابيخلوك الكان حبيت
وتبقي إنته علي نفسك جنيت
هاك نصيحتي وأمسك الخيت
أنسي إنك في يوم تحديت
والكلام ما بيبدو فليييت

[عصام سرالختم]

زكريا يواصل هجومه على اب شخيت
فى بوست عتود دقش

العطا ويعقوب قومو كب
ويا أبوخليل القطران للجرب
أم حذيفه وقبالو مصعب
جايبلكن خبرا كيف كعب
نطو في المنتدي بردلب
وألحقونا عمدتنا إنضرب
ولعوها النيران بالحطب
وتبت يدا بي لهب وتب
أب شخيت لمانا وخطب
وشتم الموزون بالدهب
وقال عماد الطيب كضب
حكمو جاير وسراق نهب
حكم علي طارق بلا سبب
وأصلو قاضي ضميرو إتخرب
باع قضيتو وقبض التعب
وليدقش يا ناس ما حسب
سواهو (دقييش) يا للعجب!!
وقالي ناسك(شبش)حتي ولا كرب
دي كتيره منك ياوليد العرب
عاد أبقي راكز وماأشوفك هرب
والعشرييف أصلو نجاضو اللهب
الجنا التقول لا فرا لاكتب
وأظنو لسع ماقاملو الشنب
لجمو الحادي لزوم الأدب
وأدو شفعنا دحيش الحلب
ضوقو الحنضل بدل العنب
وعلموهو طلوع العتب
نسوهو إسمو البيهو إنكتب
للضهر خلو يقول المغرب وجب
ودايرو يصوم رمضان في رجب
وداير أشوفو مكلبش في صنب
-------------
ياأب شخيت بنيانك قصب
واللعب بالنار ليك صعب
أسلم طريقه تزوغ تستخب
وتقفلو بابك بالمفتاح كرب

الرابط :

http://albrkal.com/forum/showthread.php?t=1470&page=5

[عصام سرالختم]

ويستمر الهجوم الكاسح ....

ياأب شخيت شغلك ما نضيف
إنته كارنك ناس الطريف
ألزم حدودك وأحسن تقيف
ولاخايف من قطع المصاريف؟
داير أقولك وخل سمعك خفيف
وأبقي عاقل وخليك حريف
مابتحوق في ناسي ختيف
عندنا الشعر ساونمبو الصريف
ويوم يجينا المتلك ياظريف
للكلام جاهزين مابنقيف
وأصلو قاعد في طرف الشلاليف
ورينا طارق (حشالك )كم رغيف؟
بس لا يبقي غشاك بيحريف
أكل المطايب وأداك الغضاريف
يا حليل راسك كيف خفيف
وزي بعضكم شبه التعاريف
وين لقاكا وأحكينا كيف؟
من كماسرة بصات الجريف؟
ولاجيت جالوبه من الرديف؟
أظنك من جماعة ناس أم شعيف
البيضفرو البروش بالسعيف
العايشين علي محريب الخريف
بنغتيك إن بقي توبك رهيف
ولو ما حرام في دينا الحنيف
كان لفيناكا في الدبلان النضيف
أمشي روح إنته لسع لين كتيف
جيبلنا القدرنا المازيك نحيف
والعميد النزلتو وكيل عريف
نديهو المقص ونزيدو تشريف
عندنا في المقام فوق علي عبداللطيف
والبهبشو نجز راسو بالسيف
ومابتهمنا حتي محاكم جنييف

[عصام سرالختم]

كتب زكريا :
أخي عصام لك الشكر أجزله وأنت توثق لإبن خالي بابكر بشير (بكوري )وجزاك الله خير فأمثال هؤلاء يجب علينا إكرامهم ولا نهملهم فببركتهم يعم الخير والرخاء ولهم علينا دين مستحق العنايه بهم والتوثيق لهم كما فعلته أخي عصام....وأنا بدوري أشارك للتوثيق لهذا المبروك بل المبروك جدا (بكوري )

http://sudaniyat.net/up/uploading/fcb6a42d756.jpg


البركه فيك من قمته شافع
وسر إلاهي الفيك عجيب
إنته يا (بكوري )زادنا
ويوم يقل الزاد تجيب
حكمه خصاك بيها ربي
وما لغيرك كان نصيب
إنته من فتحته قمته
كل زولا ليك حبيب
ريده من كل الخلوق
وحتي لو كان زول غريب
أيه تساوي الدنيا عندك!!
غير وساده وعنقريب
تكيه في ضل العصاري
ويجيكا غاشي الهمبريب
ما بتشوف في الجو نسورا
كل طيورك عندليب
وكل شمسا بكره طالعه
تحكي عن سر المغيب
تبقي تتلاشي المسافه
وكل بعيدا ليك قريب
سمحه فيك قدلة مشيك
إيقاعه زي نقر الدليب
حلوه عندك إبتسامه
صافيه زي لون الحليب
يا الوجودك بينا رؤيا
وقصه ما خطاها أديب
ويالمسارك فينا حجوه
تبدأ من شفق المغيب
نور قناديل في كنايس
يوم يكون قداس صليب
أو فوانيس في مساجد
يوم يكون واقف خطيب
ما في غيرك لينا يهدي
لمن يروح أتر الدريب
يحفظك مولاي يصونك
ما يزورك يوم طبيب
ويبقي توب العافيه هدمك
ربي سائلك تستجيب


من بوست "المبرووووك " ...
الرابط :

http://albrkal.com/vb/showthread.php?t=478

[عصام سرالختم]

زكريا يرد على عطمنو بعد ان طال لسانها
فى بوست ( التحالف يطالب بطرد العطا وحماره )

قبال نحاكم العطا والحمار
جاتنا تاني قصيدة التيوس
نحن ديمة نباري الزرايب
في مراحه كراسي الجلوس
نمرق من العطا بالبليلة
تجينا عطمنو ام تيوس
دي يا جماعة نصايب شنو
من حمار العطا للنحوس
تبه فوق تيس عطمنو القبيح
شيتن اصلو تعافي النفوس
شال من وشي عطمنو الشنه
لا خشيمه العدمان الضروس
في الضلمة ان لاقاك تجن
حتي لوضولو فانوس
العطا قوم حنسلنا التيس
قلولو هاك جبنالك عروس
ومافي غير عطمنو ام عيالك
يا التويس الما جاب فلوس
انت يا ضمرة عليك تقوم
تنهم التيران والجخوس
ما تنسي تغشي حمار العطا
تلقي زي العادة محبوس
يا ثريا عليك كوفير
ختي جرتق وباقي الطقوس
ابشخيت انت عليك مازون
لاتجيب الدابو ملحوس
شوف لنا ابدقن طويلة
البكش الحيطة العجوز
اب صماحاً قدامو ميل
ما بتنجضو نار المجوس
انت يا عطمنو مبروك
ام ضهيرن بكرة مفنوس
تلدي في البكرية العتود
ليهو طارق ديمة محجوز
يا حلات لو كانو تيمان
ويا حلات المزة في الجوز

[عصام سرالختم]

زكريا يرسل مسجات قصيرة
عن حمار العطا ردا على الاخت ميسار والاخ صلاح هاشم

(1)
يا ميسار لا تحامي الحمار غلطان
طامس في الغلط لاعند اللضان
سايط للبلد خلاها كم كيمان
يفجخ في الخدار شال تقنت الحيضان
خلا الفريق محزون مافي زول فرحان
يستاهل النفي ومفروض يشنقو كمان
إنتي يا ميسار ما قريتي في القرآن؟
الفساد في الأرض زي كاتل الإنسان
خلاص صدر الحكم ومابينفع التحنان
والكاين يكون علي مدي الأزمان
ومابتنفع شفاعه حتي لو سلطان
ربولكن دحيش بدل الحمار الفان
وباكوهو العطا وعزوهو ياالحبان

(2)

الكان للسماح زمااان حمار العطا إتعداهو
كمل كروتو الصفر وجات الحمر عاقباهو
ما خلا إنذارات وحتي الحكم دقاهو
ما فضلو غير جمهور السلك يغشاهو
فات كل الحدود ومافي حد خلاهو
باقيلك ده تاني نرحمو ونحجاهو؟

(3)

التحكيم ماهو فاشل شوفلك
ياهاشم عذرا سواهو
الحكم دولي ورجال الخط معاهو
الحمار مجنون وزايد في غباهو
يخلو يبرطع ؟مافي في الميدان بلاهو؟

(4)

دحشا في الدحوش كل الخلوق كارهاهو
وزولنا القبييييل ماأدبو ورباهو
خلا بلا أدب ماكرب اللجام سواهو
فات فواتو ماظن يخلي غباهو

(5)

ماهو دحيش أصيل جات الحلب جالباهو
مكعوج في المشي أشكالو ناعله قفاهو
مدبر في الضهر رديف اللبد خارباهو
جرجير الكواري والتراب هالكاهو
ملجن من زمااان البطري قال ده كفاهو
ودوهو الخلا الطلقه مابتسواهو
والله يستر علي سيدو من السعر يلفاهو

(6)

من قومة الجهل ماشفنا زول حباهو
مذموم في الفريق أمو القبيل خارباهو
تحلف بس تقول من صعيد جايباهو
ترباية محل والزلعه في محياهو
من آخر الجدود لاعن أبو السماهو
واقع رب العالمين وين شفتو زول خماهو!!

(7)
ماهو الهميم السيدو فوقو يشيل
وماهو البفك الحيره ويشفي غليل
محل ما قبلو يحرن يقيفلو عديل
فلاحتو في الأكل ساو كرشو زي الفيل
ما منو فايدي وزي غثاء السيل

[عصام سرالختم]

زكريا يواصل ابداعه فى بوست حمار العطا
ويرد على الاخ اب شخيت قائلا :

ماطالا ختيت الساس نفزعك ونخت معاك سريقتين :-

تشرد تعير بالبردعه
تصحي البلد بيشفعه
وعندك فنون متنوعه
قبضة البرسيم جب تبلعه
تجيب هبايب مسرعه
طلقات تقوم من مدفعه
الصاحب الوفي مايسمعه
تحلف تقول دي مدرعه
فكوهو دابو مشمعه
جديده كرت من مصنعه
نخرينا بالغازات مشبعه
وعيونا زاته مدمعه

رابط البوست :

http://albrkal.com/vb/showthread.php?t=2574&page=14

[عصام سرالختم]

كتب زكريا بمناسبة زار اخونا د. حذيفة " طيبان " للبركل قائلا :

بقه نور بركلنا وسطع
لما زارو غشاهو طيبان
للجريد الفوق في النخل
تكي سعفو وغني طربان
والقماري تقوقي وتردد
في الأغاني وأعذب ألحان
شن نقولك عاد يا ولدنا
مابتقصر عارفك زمااان
من جدودك صلة الرحم
نوري والبركل أصلو تيمان
تاني مرحب بيك في البلد
وألف مرحب أزيدك كمان
إن شاء الله بالتوفيق يا أمير
وبالسلامه تعود لعمان

بوست " طيبان من عمان للبلد "
http://albrkal.com/vb/showthread.php?t=3316

[عصام سرالختم]

زكريا يرد على احدى قصائد العطا على العطا
فى بوست " العطا وحماره يحاكمون عزالدين وزكريا "

ليك الحق تنعلنا
وزي ماك داير إنته تقول
وليك الحق تسلو لسانك
الداير القطع بالطول
ما ريحنا أصلو عصام
ومن كل الحصل مسئول
تجيب للعطا (لاب توب)
عليك الله إنته ماك مخبول
كته تجيبلو رقابيي-لبدي-لجام
ياهن شبهو لو في أصول
وليك الحق تنعلنا...
جاكا شكالك إنته (مصدق)
الكان ما بنشوف في الهول
ولا نويت عليها كروت
بعد كمل صحانة الفول
ما في رصيد يجيك أقنع
إن شكرته تميت حول
بتلف وتجيهو عزالدين
وحرمان تاني ليكا دخول
إن سبحته وإن أذنته
إن شرشرته جبته البول
يدين فيكا طول عمرك
كروت بالجمله يامنعول
كدي اليمرق دفاترو يعد
إن ماخلاكا زي مسطول
يعلق فيكا وجع الراس
وإلا تبلع البندول
وليكا الحق تنعلنا ...
أنا الغلطان العليك حنيت
ومن قولك عليا خجول
وزمان قالوها في الأمثال
خيرا تسوي في المنعول
حصادك يبقي بكره أكيد
ما بتلقي غير شره القندول
كضبك من زماااان معروف
أصلك فوته ابن سلول
الكان للزراق كاسيك
ولا كرعيكا لابسو حجول
دقش وبطانو زهجانين
قالو أذانا هااادي الزول
معسكر من قطعنا اليوم
بداها معانا بالعتدان
وختمه بالتلاته عجول
وليكا الحق تنعلنا ...
خليك من سواتي معاك
حصل حالك المشيول
فطور في مروي غداك في نوري
إنته حكيت جنا مبلول ؟؟؟؟
مدينك صيص هناك مجدوع
صبيتك زي إيدين مشلول
عدماني المطوط وأم راس
فوقه غنمنا دقو طبول
قرشن زيييين والله أداهن
رزق من الله كان مبهول
وليكا الحق تنعلنا ...
عمر عابدين متين سوك سكرتيره!!!
وظيفتا سمحي خاتي القول
كان شغاله فيها زمااااان
بنيتا ليمراد الشول
شد حيلك وإن نجحته هناك
دايرين سكرتيره في البترول

رابط البوست :
http://albrkal.com/vb/showthread.php?t=3389

..

[عصام سرالختم]

زكريا يهاجم عصمت دقش
فى بوست ( ده شنو السويتو يا عصمت )

إتلومت يا عصمت

أماااني يا عصمت ماإتلومته لوم
وتستاهل الكفيت في الجضوم
أخوي يجيك ويمرق خشمو مصموم
ويشم في ريحة الجكن واللحم المفروم
والسمك المقلي يشوف فيهو مردوم
حصة فطور آعصمت تجيبلو خروم!!
والله ستر الماجبتلو الدوم
الزول جاييك مريوق ونشفانلو قدوم
شايل الهجيري وضاربه السموم
قال يلقي عندك مطايب القوم
حاريلو عضه ويرجع ينوم
بس ما تجيبلو جدادي يحللبها الصوم!!!
تجيبلو قرع يا عصمت الشوم
أبيض ومسيخ ماخدلو كم يوم
القرع كمان ينهمولو حروم
خسارة فندقك الزي حلاوه لكوم
أبوك معاهو حق وللليلي مصدوم
قال معاي ما يبيت ودهو عسوم
ياهو شبه (طارق)وعليهو ملموم
طالع زيو وليهو برلوم
الأمر مرفوع ليقاضينا مختوم
مسكين أخوي وأنا عارفو مظلوم
دايرين حقنا سليقه بالتوم
كوارع العجل ما تدونا حلقوم
إن ما جاتنا الكوارع ياها السالت دموم
سامع يا عريس والكلام ده مفهوم؟؟؟[/frame]

رابط البوست :

http://albrkal.com/vb/showthread.php?t=3314

..

[بكرى سرو]

نواصل توثيق اشعار اخونا زكريا
(ضربة البداية كانت من الاخ عصام )

نقلا من بوست ( خروف ما فيهو كمونية ولاكبدة .. كرامة مقبولة )


الخبر الأكيد قالوا الخروف مغشوش
عدمان الكبد لا مصارين لا كروش
لا كوارع ولا ضنب حتي الرويس محشوش
لحماً أُسترالي وبالدهن منفوش
أصلو قاطع الطعم وتحتو الرغيف مرشوش
مرصوص زي تمر فوق الفلق في الحوش
وا شيل حالك يا عمر إنته البقيت منبوش
تدكن في الجقاجق وتحشا في الكنتوش
التلاجه إتملت ومن ريحة الزفاره تدوش
عفنته مابتروح إن غسله الخرطوش
الشي أصلو زبادي...ولا قايلو ماكنتوش؟؟
حسان أخوي مالو زولكن صبح مطروش
بعد ما كان كريم وما كان في حسابو قروش
بقي يحسب المليم ويجيب اللحم مغشوش!!
يا حسان وقعته ومافي زول لي عمر بيحوش
والله يستر عليك من دقة البرطوش

----------------------

رابط البوست :

http://albrkal.com/vb/showthread.php?t=3771&page=2