مسيخيــتات أب شخيت [الأرشيف]

طيبان

06-25-2008, 11:37 AM

عيشة الرّجــال ختّيف

أصلو عِيشة الرَجالة خِتِّيف
يا الطويرق ود الطريف
الكريم الكلس الظريف
إنت نادر وأصلك شريف
تبرا من الحمى أم نزيف
البلومك فهمو محدور وكاسر المقاديف
أصلو عيشة الرجالة ختِّيف
شيل العتود داير حريف
لحمو هش خاتي الشراشيف
الصحون مليانة سِتّيف
بوخا لاوي وحدو السقيف
فيها المشاوى وفيها نشّيف
فيها الكلاوى والفتافت قال نضفناها نضّيف
معاها اتنين طاولة رغيف
ويا حلاة السلقة للنيف
بي حِريف الكسرة الرهيف
قامبو جت وقرش الضليف
حتى العضام والقضاريف
لا شافو جار ولا جاهو ضيف
بعدو شاي مضبوط ما خفيف
بالهبهان وعويد القريف
مويتو نقاع زير الصريف
القناوي الصانعنّو في الريف
يوزن الراس و يضبط الكيف
لامن شعير جلدك يقيف
ختّاها سفة ملاها الشلاليف
كان عندو هبابي في راكوبة في القيف
إتوسد ضراعو وخلف كراعو مابهمّو تخويف
كان من دقش كان ودبابكر كان مليون حليف
والغريبة عماد القلتو ود ناس وزولا أليف
كان حكمو جور وكلو حيف
ما أصلو طغيان وزولا صليف
بدعو رب العزة اللطيف
ينعزل في هادا الخريف
من عميد يبقى وكيل عريف
والشريط العندو تشريف
و جيبو يخلا من المصاريف
ويبقي يشحد في التعاريف

*
من بوست عتود دقش

شهرزاد

06-25-2008, 12:32 PM

محاولة توثيق لمختارات من
إخوانيات وأشعار ومناكفات ومجادعات اب شخيت منذ دخوله البركل..

العسجد الــصّافي

العسجد الصافي
من قلباً نضيف دافي
ماهو الغليظ جافي
منك دوام عافي
يا بت ملوك وعزاز
بسأل لك الكافي
ال للشريك نافي
البعلم الخافي
بالنون والقافي
رحماتو ليكي رزاز
ربي الكريم شافي
البجمع الهافي
ما صدَّ قال مافي
ليكي الشكر ضافي
لا يجيك ألم لا خزاز
خيرك عميم وافي
وأنا قافل النغمة لكني بس "هزاز"
*
من بوست عتود دقش

لك التحية طيبان
وأنت توثق لأحد أعلام البركل ..
أخونا العزيزالمسيخيت ..
ــ
وآصل

محمد الامين

06-25-2008, 05:19 PM

محاولة توثيق لمختارات من
إخوانيات وأشعار ومناكفات ومجادعات اب شخيت منذ دخوله البركل..

العسجد الــصّافي

العسجد الصافي
من قلباً نضيف دافي
ماهو الغليظ جافي
منك دوام عافي
يا بت ملوك وعزاز
بسأل لك الكافي
ال للشريك نافي
البعلم الخافي
بالنون والقافي
رحماتو ليكي رزاز
ربي الكريم شافي
البجمع الهافي
ما صدَّ قال مافي
ليكي الشكر ضافي
لا يجيك ألم لا خزاز
خيرك عميم وافي
وأنا قافل النغمة لكني بس "هزاز"

*
من بوست عتود دقش

صاحبى طيبان ...

أب شخيت ده زول رائع ومبدع ..
يستحق أن نوثق لكل كلمه كتبها بهذا المنتدى
واصل توثيقك
فكرتك جميله
وأهنيك ..

تحياتى

طيبان

06-25-2008, 10:58 PM

مارشات عسكرية
الليلة وقَّفنا البرامج...شغَّلنا مارشات عسكرية
قطَّعنا كل الإتصال...كان بالموبايل كان بالثريا
وبرضو حاظرين للتجمهر.. والتجول من عشية
وحتى في القوات تأهب... مستعدين مية مية
ومالين الشوارع جيش..نسير دورية دورية
وانتظرو العميد يصدر.. قرارات نافذة فورية
وانتظرو العميد يصدر.. قرارات نافذة فورية
..بس مارشات عسكرية.. بس مارشات عسكرية.

*

من بوست عتود دقش والعود أحمد

طيبان

06-26-2008, 12:12 AM

همسة عتاب لود الصيدة أخوي

ود الصيدة اخوي هاك المفيد... وإنت زول مليان بالفوايد
الوضوح هو بيت القصيد....و لومي ليك أبيات من قصايد
أب شخيت لي زولك "بخيت" ما نديد....يعلم الله الخالق الندايد
بس نقول ونكرر نعيد....الفروق واضحة و عدايد
أولن ما زول طريد....ولا أجدادو كانوا من الطرايد
وعاشرن ما جلبوه بالصيد....الله لا جاب غارات الصوايد
وآخرن مافي زول الليلة سيد ....وكل زول على روحو سايد
ولَّى ياخوي زمن العبيد...و من قرون "حرّرنا العبايد"
والعتق ما كان زهيد....بس نحنا في "الإستغلال" زهايد
هُوْ ود العز المعروف تليد...الوارثو من أجدادو التلايد
وليد فراس وليهم حفيد... والفرسان أولادو و حفايد
ودَّ عمك و دم الوريد...البجوهو الناس ورايد
لو قال يجيكم يوم يصيد...يلقي نفسو لي روحو صايد
ياهو دمّك وهيلك شديد...مابيصح بيناتكم شدايد
أصلو التميرات العصيد... حلاته بعد الروب بالعصايد
والخصام الما حلّاهو عيد...أريتو عيداً ما يجينا عايد
حب الأخوان عندو الرصيد ...و داير يستلف منْكم رصايد
هُوْ الحنون البر الوديد....المابيفوت ناسو الودايد
المحب الوله المريد....حتى لو كرهوهو رايد
ياهو زيك في الجيل فريد...وإنتو ياكم ناس فرايد
و إنتا زولا معروف مابتكيد.... ضمة مابتعرف مكايد
وكمان مسامح وما حقيد...حتى لي حسادو الحقايد
وبرضو زيك سيد راياً سديد....الغطا للمقدودة و سدايد
العقلو ما توَّاه تام رشيد...الساعي في الناس بالرشايد
يوم يجيكم العدو بالحشود...تلقى ما بهمَّ الحشايد
سيفو السنين المن حديد....وسيف عداكم خرد حدايد
الدوا للجرح أب صديد....البيرُدْ خُصَّامكم صدايد
البعالجو بعيش عمراً مديد....لا يضوق "دِرب" و لا "أنبوبة مدايد"
الادب والأخلاق ليهو قيد...وفي القبايل راس وقايد
بسأل الله تكون عيشتك رغيد....وحياة اولادك رغايد

*

من بوست عتود دقش والعود أحمد

طيبان

06-26-2008, 12:34 AM

ودأخوي يا علي ود البلد
كان لقيتك كان سلّم قلد
إنت شاعر من يوم ماتولد
وفي الشعر ليك عوم الكلد
الكسل هو عدوك الألد
لو إنت صبّار وعندك جَلَد
ياهو مضمون ذكرك خلد

*

من بوست عاجل للأخ الشاعر ود العطــا

طيبان

06-26-2008, 01:06 PM

زيارة مودة للعميد عماد

مسك الختام

أخوكم ود رباط...زاير عماد ود عمو شايق
إلاّ عقابو أعوج...مسور يا دوب بتايق
قرّن الحيضان وجاكم... علا التقانت واللبايق
وصى للجنُّون يجوهو...لما يبقى خلاص متايق
ما خلا للأولاد قريشات ...كان هدومن كوم لتايق
ولا حق الدوا للحتالة الديمة تعبان وخلا ضايق
وأم العيال الصابرة ياخوي..توبا الوحيد مشروط فتايق
ما راضي يتلم بالخيوت...لابسه مضمومات رتايق
الشئ المطمنو يا أخوي...غنيمة لبن وحزمات تبايق
يضبحوها إن كانو جاعو...يتمزُّو بالشيات والسلايق
الحياة بتدور البصارة... ترانا نضاير فيها ونضايق
وحالنا مستور يا أخوي...ما اتفرجو فينا الخلايق
ونحنا ما طالبين كتير... ما شهوانين ولا شبايق
حريف الكسرة من صاجنا..نسو فوقو ملاح أم رقايق
والحسد تب مابنعرفوا...متل واحدين قروشن كلايق
زمان كبارنا وصُّونا...وصاتن في الإضنين حلايق
قالولنا أرضوه القليل... ولابد عليهو شكرنا لايق
لكين الفقر قاسي وصعيب... نسايس فيهو و نسايق
كان رضى يوم علينا..يدينا الشلاتيت والدلايق
وكان صبح غضبان في وشينا...يدينا الشلاليت والخزايق
يكسِّر في عضامنا عديل..وفوق روسينا مضروبين فلايق
وبرضو دافرنا الحنين جايين وللحبان شوايق
أصلو القلوب لو كان حُنان و لي عشرة الأخوان عشايق
تلقاها مضمومات شديد ترعى الوداد و حسن العلايق
و مابتقطِّعن الظروف رغم المصاعب والعوايق
***
ديك بنات عمك وخالك... مغبونات حمايق
واقفات بي قُبالك... شوف دمَّاعن خنايق
ما راضيات كتالك... تقوم في الناس حرايق
الساترات لحالك....وللأخوان شقايق
وكت شافوني جيتك...متقاودين رفايق
داخلين جوة بيتك...صرخو مندهشات شهايق
رجعن لي بيوتن...مرتاحات روايق
***
وجونا أخوانا شادَّين..هديك حمّارن هنايق
شن شايلين معاهم...غير ألوان زينة و زوايق
قصايد وا حلاتة..تدِّوب من غلاته..وفيها أبيات رشايق
نرجس وفل وياسمين...زهور فواحة وحدايق
نطرب بي لقاهم...نكون خلان صدايق
ضامِّين لي صفوفنا...متعاصرين لصايق
باذلين من كفوفنا...متحانّين شفايق
متواضعين حالنا ديمة...ما نخرات شنايق
***
العمدة ماهيلكم براكم...مقسّم وما هو حايق
وكان قلتولي أهلو... خلَّونا منضافين لحايق
نحنا أخوانو وصحابو ...معاو في اللَّقا في المضايق
تقول تيمان قادر الله...مقسومين فشايق
سنينا الفاتو عدَّو.... معاو مرن زي دقايق
ود ناسا كرام...نضافاً ما خرايق
شايلين للسيوف...ما متضارين بالدرايق
يكون لعداهو حنضل...والوجع الزرايق
عداك يا زول هديلك...مجدوعين فهايق
حب أخوانو شيمة...أنواع شتى وطرايق
والأرواح في حبو...مكتولات زهايق
ما زول "عوقة درويش" بشوفو رزين ورايق
إيدو الماطرة كابة بي رعدا وبرايق
الضامِّي اليتامى...وساس لي بيوتن مرايق
الكافل الفقير...ويبزم للناس رزايق
الدوا للسقيم...ولجروحن لزايق
نفرح بيهو ونقول...غنا وطمبارة ومزايق
(عمدة معاهو طينو ...والجزر البسايق)
(وكان قلنا العميد....قدرو وضمة خايق)
(زارع لينا صيفو...كمان للشتوي سايق)
(والعجوات نقّط عسيلة...حليوات وما حوايق)
***
والبدرو الفتنة ياخوي...ناس عُوَرا وفطايق
ديل فارغين كعابة...والهمّز أمو فايق
ديل ماكرين تعابة...ديل سفهه وصفايق
ماحقين ليهو حقك...ولي شكرك محايق
ناكرين للجميل...كمان همباته وسرايق
***
ما بنسى اولاد "دقشنا"..الماهلين ماضوايق
هم ساسنا وعرشنا...بقول فوقن حقايق
نفوس طاهرة وشريفة...ما للشر طوايق
تابعين لي نبيهم...وخيراتن دفايق
عافين لي دقونن...وللشنبات حلايق
للتقى والصلاح...كم للناس سوايق
كلام واضح عديل..لا لغاويس لا لوايق
القول بالدليل...غير التوحيد ما فوايق
دي السنة السبيل ...دا كلام الحق ما لفايق
بسأل الله الجليل...العالم أسرار الخلايق
أنا وأخواني وإنتو....نكون في الجنات رفايق

*

من بوست بيان العميد عماد الطيّب

عصام سرالختم

06-26-2008, 08:50 PM

اول اخوانيات المسيخيت فى بوست
" التحالف يطالب بطرد العطا وحماره "

خطاب عاجل بعلم الوصول
16 أبريل 2008

نبدأ بسم الله اللطيف ..ربي الكريم باعث الرسل
ثم الصلاة على الرسول يانِعْم من سلّم و صَلْ
من شرقنا الغالي الحبيب..من كوريا من ساحات هدل
لعناية العطا ودعلي...في البركل التحت النخل
والله مابينقصنا شي..ورؤياكا للعين ما كحل
بلّغ سلامي إلي المعاك من جملة الناس والأهل
وماتنسى ود حميد أخوي وارحامو في جوة المقل
وماتنسى ود الصيدة ودقش وكل العوايل و من كفل
وماتنسى أرحامنا الهناك ومن آل حُمّد طيب أسأل
و ناس الطريف ناس الكرو وحتى المدافن في الجبل
والساكن الكوخ والقصر والشايل المنجل نزل
وبالمختصر ياخويا سلِّم للعموم وما شمل
***********
خطابك المكتوب أمِس... الليلة حسع لي وصل
وقريتو ماخلّيت سطر وعلمت بي كل الحصل
أصلو الحصل ياخوي كبير وحتي المصاب أمراً جلل
أرجف تقول عندي أم برِد..ما حمي بس رجفة زعل
خلاني أكتب ليك خطاب أكتب حروفو على عجل
مرات أقول أكتب خطاب.. مرات اقول لازم أصل
وللآن وماسك للقلم مشطوب فكر و مغلوب حِيَل
قاعد أنقِّر في الورق زي التقول بشتل بصل
أنضم براي لا زول معاي زي مسة الجن والخَبَل
أو زول مطرطش قام شرب سكَّر رويحتو وإتهبل
أو زول قعد جنب الجرف لف السجارة وقام سطل
تلقاني ماسك ليّ كلام أقعد أقولو بلا ملل
"كيفن تطاوعن القلوب العامرة بالشوق للأهل"
"كيفن تقولّك يا العطا سوق الحمار شوف ليك محل"
"أمرق من البركل عديل أركب حمارك يلا أرحل"؟؟!!!!
"ونقفل وراك فرن الرغيف بالضبة والشوك والطِّبَل"..!!!
"وإن شا الله ناكل بي وراك الكسرة بملاح الكَوَل" ..!!!.
***********
أصلو التحالف لو شعر بالعظمة والعز والعضل
جمّع صفوف قوات هجين بيها إتَّكل
ما راعي للود والحنين والجيرة وللأرحام ركل
داير يقوم فوق التحزب والتفرق والشَّكَل
داير يثيرحمم الضغاين والغبار الفوق عكل
داير يشوف غضب الترمُّل والتيُّتم والثَكَل
لازم نقول ليهو الكلام الكان زمان مضرب مثل
"الزول وكت يلِدْ المحن لابد يضوق غرسو الشتل"
والزول وكت يهوى ويحب يعرف "من الحب ما قتل"
**************
أصلو العطا معروف رجل أشعار بطل
يغزل حروف أشهى الكلام كم جر للأشعار فتل
يكتب عن الأحباب حديث أعذب أحاسيس الغَزَل
ويكتب عن الأخوان شعر بالحكمة واللين والهَزَل
ماعندو غير حلو الكلام زي عجوة معطون في عسل
زول زي دا أقدر للدفاع عن نفسو بالأشعار "بياناً بالعمل"
لكن مزعلني الحمار ..مسكين و مكتول بالجَهَل
شن سوّى غير عمّر ديار...بي فارغة تب يوم ما انشغل
يا حليل شبابو صبح ودار.. لا كان عجوز لا كان كَهَل
كيفن يفارق للديار.. والخضرة والنيل والسَهَل
ياهو الصديق القلبو حار.. ضامر حشاهو الماترهل
طوالي محمول بالخدار... واللحمة والفول والبصل
لا مرة فنجط بالصغار.. ولامرة عاكَس واتمهل
ولا مرة لاوز من كديس لا خاف ولا نطّ وجفل
رضيان يحوم نص النهار..ممكون وصابر زي جمل
صبور قنوع لو بالعدار...ماراح زروع الناس أكل
عفيف شريف لا بيسرق الشاه لا السخل
واهط بديع.. مَشْيُو السريع.. معروف وديع ودعة حمل
أمين خدوم.. صديق كتوم.. لا يفشي للسر لا نقَل
لا ملَ من ظرفو الصعب... ولا سبّ لي زمنو ونعل
ولا قال ملازمني التعب...ولا كاس لأصحابو البَدل
ولمان يجيك سايق خبب... او مرة إتبختر قدل
تحلف تقول ما قول كضب ..."جايبنو حسع من زحل"
محسوب حمار بس في النَّسَب...لكنو من أكرم نَسَل
عارفنُّو ناس أهل الصعيد ناس دار عقيل سنجة وعبل
عارفنُّو ناس أهل الشمال من حلفا لي كرمة النزل
عارفنُّو ناس أهل الشرق ناس السيوف عرباً رُحَل
عارفنُّو ناس أهل الجنوب وكت المطر فوقن هطل
تلقى النضار مد البصر كاسيهو خضرة معاها طَلْ
عارفنُّو ناس أهل الغرب ناس الجبال وديان و تل
وكتين يجيبو البرتكان من مرة من فوق الجبل
****************
قبل الختامات والسلام أحسن أعوم بعد البلل
ياخوان ولاد منصور وشايق وود رباط واولاد جعل
جاييكم اسمعو للكلام داير اقولو بلا زعل
لا فيهو تمليس لا تملّق لا مخادعة لا دجل
للكان محكّر في الديار بي شينة فد يوم ما دخل
للعامل الجوة المصانع وكل أصناف العمل
وللهاجر البلد البعيد يمكن يحقق يوم أمل
انا داير أطالب وألتمس فسراع عشان ما ألقى حل
لو نحنا طاوعنا (التحالف) في القرارات الزلل
حاتكون بلادكم في ضياع تاريخ وحاضر في خلل
وحاتقوم مصالح أمة تنصاب بالشلل...
عارفين عشان إيه الحصل؟!!!
"أصلو لو غابت تماسيح البلد يقدل يعوم فيها الورل"
لو دار يفوت دارنا الحمار مطرود ومنبوذ وإتعزل
بنكون خلاص سقنا البلد للوكرة والطين والوحل
أصلو الحمار كلساً فحل..

رابط البوست :

http://albrkal.com/vb/showthread.php?t=2574&page=2

..._______

عصام سرالختم

06-26-2008, 08:55 PM

نواصل نقل اخوانيات اب شخيت من بوست
التحالف يطالب بطرد العطا وحماره

مناشدة على الهواء للحمار

يا حمار العطا إنت ليه
هسه ساكت وما قلت قول
شايف الناس جات عليك
حتى ناس إسحاق وناس شول
أما ناس الشرق المعاي
والشمال الفيهو كم زول
ياخي ديل زحمولنا الدروب
زي قيامة البعث والهول
يا حلاتك وانت مننا
ويا غلاتك وانت من دول
ولو قريت البوست الهني
تلقى حلفك صامد يصول
القصايد مالية الدرب
والورق كاتبنو بالرول
ولو لقيتو أخونا (أب حسين)
حسه قاعد يهتف "اللول"
المعارضة ست الكشك
وإنت سيد الساحة والمول
مابنقيف والله منك
كان يجينا شهرنا والحول
علا عشمانين فيك تجي
ياخ عليك الله والرسول

عصام سرالختم

06-26-2008, 09:05 PM

المسيخيت يرثى حال حليفه العطا فى بوست
"التحالف يطالب ....... "

دمعة في زريبة الحمار
شيخنا ابراهيم الخليل
البعاد الروح شوّقه
لي زمن طاريكم أخوي
بس كراع جيتي معوّقة
وحَسِّى فوق الحال العلي
المحن جاتني مطبّقه
والحصل ياخوي من عطا
شفّ روحي خلاص شفّقه
والدموع من أسى آبتقيف
سايلة سيل سيّال دفّقه
جنّ اخويا العطا ود علي
حتى خُلْق الناس ضيّقه
جاهو جن مسخوت مفتري
والنخيرة كمان شانقه
لما قولّو أراحكا العلاج
مني جبد الليد ينتقه
وبالحوامة يشق الدروب
حافي عاري الراس حالقه
ديمة جاري يسك الجداد
والحمام شقيش ما لقى
ومابيخلي الناس يوم تمر
بالدروب ديمة مفلِّقه
وين محل شاف ليهو كوم ناس
بالحجارة يكون فرتقه
مرة مرة يفوت البحر
والمراكب كم غرّقه
مرة يركب فوق الحمار
في خلا العتمور يمرقه
لا معاهو رفيق في الدرب
لا معاهو الزاد لا السُّقا
والهدوم الكان لابسه
يومي يومي يقوم يفتقه
لملم التيبان والهدوم
كبّ فوقه الجاز حرّقه
تاني قام شال كوم الرماد
كالضريرة الراس جرتقه
والمسور السيدو شقيان
داعي ليهو نفير متّقه
جاهو ود العطا بالدغش
حشّ فيهو ردمبو التقاه
وقال خلاص يكفيهو وكفى
و جاب حمارو بدا النورقه
ومن دريبو نزل في الخدار
مية من بطيخ فشّقه
وقلّع العجور والملاح
خدرة في الأحواض ورّقه
والطماطْمَ الكان في السراب
جابه في الأحواض شققّه
حتى للبابور ما نسى
التناكي عديل دفّقه
قطّع الخرطوش والسيور
والطرمبة أفَيْ لحّقه
وحسى خلّى البلد العزيز
جافة تب ما قام بُتِّقه
ولما باع طابونةَ الرغيف
والقروش في الشر بعزقه
يمشي يشحد فيها القروش
وإن أبولو يقوم يسرقه
همّل الأولاد والعقاب
والقروش قال آبيمرقه
والمريّة ان نضمت يقول:
"خِلْقة شينة الجن عولقه"
من غبينته شالت عصا
وباليمين شالت بندقه
جازمة إن ما مسك الدرب
حالفة بي الله الخالقه
يا يقوم بالواجب عليو
يا تكون هي عديل طالقة
يا كمان يستحمل يقيف
كان وقف زي راجل بقى
وحسِّي شال سكين الضراع
في كريمة مشي يطرِّقه
ولما يرجع قال زول ضبح
وعندو أمنية ما حقّقه
إنو يضبح أم الولاد
يمرق الفشفاش يسلقه
والحصل اليحصل يكون
وين رقيقة يكون رقّقه
ولما قُتْلو خلاص يا أخوي
"روِّق المنقات روِّقه"
قالِّي أبعد وسيب الكلام
وشوف عيون الناس شلِّقه

المسيخيت
بورتسودان
ظهر الأربعاء 19/6/2008

عصام سرالختم

06-26-2008, 09:13 PM

إحدى اخوانيات المسيخيت
ردا على قصيدة للاخ محمد عثمان نصر

(أبوالفاضل) أخوي راجلا عطوف وحنين
معروف زول شهامة وزول كرم زول دين
في الطامة العبوس تلقاهو بسمو رزين
يوم تلقى الصقور فوق الرؤوس حايمين
يقدل في الصفوف زي قدلة الوزين
علا كلامو الفوق الحمار مو زين
شن ذنب الحمار؟؟!! ما سوّا شيتن شين
لا خرب الجروف لا كبَّ ليكا عجين
لابيعرف كضب لا ياكل جرورة دين
أصلو حمارنا فوقو وداعة زول مسكين
صار مضرب مثل للكان في مشاكلو سجين
الزول إن وِرِط..يقولو "الحمار في الطين"
كيفن يا أخوي.. تزيد فوقو الهموم هينين..!!!
وحسع من بكاهو..دمعو الهطول و سخين
تسمع من بعيد أصوات قنيت وأنين
مغلوب منظلم عد الليالي سنين

عصام سرالختم

06-28-2008, 07:16 PM

رد اب شخيت على زكريا فى
احدى اخوانيات بوست " عتود دقش "

سجود السهو الشعري

إنتا يا زكريا مالك
دار تتاقي القلنا مسدود
نحن ما قادرين نقفِّل
ماتوسِّع لينا القدود
"الخليل" قال لينا يا ناس
الكلام بيجيب الردود
والردود مافيها يوم خير
بس تزيد النيران وقود
يلا نقفل دارة الشعر
بالخصوص الخاص بالعتود
وبإتفاق مع ود العطا
قمنا وثّقناها العهود
ما كلام قولناهو ساكت
ونمشي تاني نحفِّر نعود
ومابقول زي ما قالو ناس
وما ببارى الشعرا واخود
ولو "نسيت" وكتبت الشعر
يبقى لازمني عليهو السجود
مابقول بلّاني "أبو الزيك"
"والمبلبل أخيرلو البرود"
أنا أبوك يا زينة البنات
وأنا أخوك ياالنايرة أم خدود
ما حصل غلّبني الكلام
والشعر مربوط ما شرود
أمشي لقِّطو ليكا من جم
وما بكون تعبان ومهدود
وما بنطط تب في الكلام
التنطط صفة للقرود
الشعر شاديلو اللجام
بمشي كاتل وضهري مسنود
أصلو خوي "طيبان" قال زمان
قبال يجينا "الهكر" الحقود
(إن نزل بنزل للسلام
سرجي فوقو وحتى مشدود)
(النعال خاتيها "الملص"
وفي يميني عصاتي بارود)
(الحويطة تكون بي وراي
وما بشيل الكاس للحشود)
رجعة إستينافكم ظلم
وارتداد عن كل البنود
وتحكمو إستئناف إنتو ليه
أصلو سارق ليكم قعود؟!!
الكلام جيَّايب المشاكل
المظالم الفايته الحدود
حد ما نقول أختوهو الظلم
ألقى قولي عليّ مردود
يلا أرجو براكم إنتو
واحصدوا النكران والجحود
والمراح مادام فيهو شي
برضو طارق ليهو بيعود
يا دقش بس ماتنوم
وحتى فد يوم ما تنود
خلي نومك" ديك فوق حبل"
أو خلي نومك نوم السقود
أصلو لو ساعيلك غنم
الظلم جاب ليك الأسود
والعمير لو فيهو باقي
الفضل محسوب ومعدود
خاينة دنيا السجم الرماد
وألعنوها الدنيا أم قدود
مابتدوم مابتدَّي الحريف
النزوله يقابلو الصعود
وينو ناس ذات العماد
أو ناس ثمود أو قوم هود
وين صحاب الشرف التليد
وينن صحاب الملك العضود
لو تدوم يا خويا لي زول
كان رسولنا أدوهو الخلود
في النهاية لبسكم كفن
وفي التراب راجيكم الدود
والحساب يا خوانا قيراط
والسراط ياخوانا موجود
أتلو قرآن الأواخر
وخلو عينكم تابى الهجود
وبالتهجد باركو العمير
و الثواب عن رب الوجود
كان إلهك رفع "القديم"
للحجاز قوم أغشى باعبود
البحر أب سفراً رخيص
مابيدوره كتيرات نقود
كون عبادتك زي مصطفاك
والصيام سيدنا داوود
كتِّر الإنفاق في الخفا
ولو قليل وبسيط ومحدود
المضاعف عشرة أضعاف
دخري للميزان والشهود
تسعد حياتك ديمة بالخير
والعمير بالبركة ممدود[/frame]

رابط البوست :
http://albrkal.com/vb/showthread.php?t=317&page=4

عصام سرالختم

06-28-2008, 08:29 PM

ابيات اخوانية قصيرة ( دوبيت )
للشاعر اب شخيت ..
نقلا من بوست ( تعالوا ندوبى )
__________________

(1)
ملمومين دوام والخير دوام طارنّو
والعام الجديد الفي بدايتو أظنّو
موعود بالسلام والعسل المنقِّط منّو
يا عوض الجلاس جردل مديدتك فنّو
__________________

(2)
العام الجديد الليلة يومو التالت
وشغلتنا الهموم جابت حديثا فالت
بالدوبيت نقول كان نقدر عليهو نغالت
الجد والهزل قاعدين نسوطو نخالت
__________________

(3)
مسخوتي كان زعلان شديد كيفن ندوبي بلا غزل
فات مني راح حردان بعيد شايفو إتعزل
قال لي ماك سمعان أكيد قول المثل
قت ليهو يا السجمان عنيد قاصد (من الحب ما قتل)؟؟!!
__________________

(4)
حلاة طعم الحديث فوق درر البياضو مفلّج
حلاة الصحا وفوقو الجمال اتقلّج
حلحل مسمار القليب شال مفتاحو خلا محلّج
"آناس القوز" وداع شايف فجرنا اتبلّج
__________________

(5)
كيفن تمشي يا المسخوت وماك طارينا
كيفن تشيل فانوسنا ومعاهو رتينة
لو مستغني انت..نحن ما استغنينا
تعال اسمع حديثنا الما لحقنا بدينا
__________________
(6)
قادر الله الخلقو من التراب والطين
يحفظو ربي للفرح العديل والزين
القادل يعوم عومة جنى الوزين
شال نوم العيون شقيش نقبِّل وين
__________________

(7)
ود بروي اخوي الزول الكريم الفالح
بيناتنا الوداد يعبر بحور المالح
كنت بجيك براي يا الدخري اللزوم الصالح
علا عقابي اعوج في الزمن الكريه الكالح
__________________

(8)
الفردة ياخوي براك شايف كتال الناس
ينططو فوق بعض زي نطيط جنى النسناس
الشايل عصاتو والشايلو اعواد فاس
ديل "فل اتوماتك" بس أدغس الكبّاس
__________________

(9)
ود بروي تعال شوف الغرام كيف سوّا
جافاني المنام تحلف تقول فوق طوّة
مرات اتفرد مرات أقوم إتلوّى
إيش وداني للزول المحكّر جوّه
__________________

(10)
العام الجديد الليلة يومو الرابع
نحسب في دقايقو ولي خبارو نتابع
مرات بالكتابة ومرة مرة اصابع
يرفعني لافوق اوصل سماهو السابع
يخبت بي الارض مع الخنق المعاهو ملابع
__________________

(11)
طيبان العزيز دافق علينا شمارو
قال الديار خربت حتى الكبار يتجارو
والخرز ان فلت خليهو ياكل نارو
والراقصين كتار كيفن دقونو يضارو.!!!
_________________

(12)
بندور ندوبي فوق الجدايلو ضفيرة
وبندور الغزل فوق الزواج والسيرة
و مابنقدر نعوم بحرا وراهو دميرة
إتوكرنا ياخويا -ألحق- جنس وكِّيرة..!!!!
__________________

(13)
طيبان يا أخوي بركلنا أصبح فاضي
وفاتحين الملف راجنو حكم القاضي
حكم الله الكريم تلقاني واقف راضي
بس خايف أكون خبراً يكون في الماضي
__________________

(14)
عارفك زول نجيض تفهم كلامي الطاير
وعارفك زول اخو اخوان وجيهك ناير
ومابيغباكا دوباينا الصريح وأشاير
وإن كان بي رضاي ياني المعاكم ساير
__________________

(15)
الغنا فوق قمر دورين عشان النمَّة
والفوقو العبير لابد يبين ينشمّ
نعاين من بعيد تستر لقانا ملمة
وان مرق الحديث.. أخوك وقع ما سمَّ..
__________________

رابط البوست :

http://albrkal.com/vb/showthread.php?t=1429

عصام سرالختم

06-28-2008, 08:33 PM

نواصل دوبيت المسيخيت

(1)
ربنا يعلم المنشور والمضمّر خافي
ومعزة الاخوان زي العلاج الشافي
يرعوك في الحضور زي ما أكنَّك مافي
يرعاك الاله ربي الكريم الكافي
__________________

(2)
ست الريد معايا الكلام ناس برة
جارين للقروش صقراً لبد للفرة
في البشوفو براي غربة ومعاها مضرة
كان جيتونا جوة أرحم كتير فد مرة
__________________

(3)
السمك إن شبع بيدور يعوم في اليابس
والزول إن طمع تلقاهو ديمة يكابس
الزمن الجهوم خلاني نافر و عابس
لبسني الهموم فوق للهدوم اللابس
__________________

(4)
العام الجديد الليلة يومو الخامس
و قج الليلة نور كشح الظلام الدامس
من تالا الجنوب جات ام حديثا هامس
خلّتني فوق قمم الثريا ألامس
__________________

(5)
ود نصر العزيز شايف غيابك طوّل
وشفقانين وراك قلنا الحبيب إتحوّل
ما اتعودنا غيبتك في الزمان الأول
طار بينا الفرح شفناك بقيت تتجوّل
__________________

(6)
الليلة طيبان جاب حديث داردوق
ولمّا ناس بركلنا التحت والفوق
قال أب شخيت فوق القذارة يسوق
طيبان عديل داير يموت مخنوق
__________________

(7)
يا خوي البفور اللبن المردّم شخبو
زي مطر الخريف المركّم سُحبو
يتدفّق عديل لو ما نارو تخبو
حليل داردوقنا الشهيد في حبو
__________________

(8)
حليلك ود نصر طارين قويزك
وحليلك وانت تشرب بي كويزك
من النيل سلسبيل شايل جويزك
بشوف في الغربة مدود لي بويزك
__________________

(9)
نسيت اليوم احد كان في المقام السادس
وكت شفت اخوي في الغربة محزون عابس
و"ساقية ود نصر"قال ما بجيها اكابس
كفاي قرش الخواجة المنو شارب ولابس
__________________

(10)
العام الجديد الليلة يومو السابع
طرّاني النفور الفوق الخمايل راتع
يا ربي الشكور واسمو العظيم الباتع
بدعوك يا غفور تربط خويتنا القاطع
__________________

(11)
المرهف اخوي.. معاهو عثمان ود نصُر
ولاد امي وابوي.. عالين مقام سكان قصر
ومابنسى ود بروي..الفي "بريدة" يخم يصر
ربي الكريم يجمعنا اليوم دا العصر
__________________

(12)
البارح بعد كل الخلوق ما اتعشّو
هبّالي النسيم بي طيب ورودو وقشّو
ذكّرني الحبيب بسمة لقانا وبشّو
سهّد لي عيون ورم الجفون ما اتفشّو

(13)
عادل ود حمد آخوي أصلو الخريف من رشّو
و كاتلني الحبيب بي سهم العيون من رمشو
ما هميّة.. قبالي الكتار طافشين دوام يتمشّو
دفّقو موية فوق درب السراب إتغشّو
__________________

(14)
عارفك ودنصر.. في الحارة إنت مدارس
مابزيحك عدو.. راكز كراعك تارس
ومابهمك اخوي.. برد الصقيع القارس
وكت يتجّمد البحر السماهو نوارس
والحوت في محيطو.. تصطكَّ فيهو ضوارس
بس خليك حذر.. وتابع حياتك مارس
وماتباري العيون وان كان هبوبن كارس
باكر بجيك سيل الدميرة الهارس
تتندّم تقول: "ياريت اللسان كان خارس"
__________________

(15)
أمبارح للتعتِّر جيت فتحت الرادي
أسمعلك مذيعا حسو ليّن و نادى
قال: "هنا السلطنة رمز الصمود البادي"
"أحييكم جميع أهل المدن و بوادي"
"للسكن القصور والساعي الغنم في الوادي"
"أديكم نشرة الأخبار عليها زيادي":
"واحد إسمو طيبان قال: حرمان عليهو زبادي"
"وداير يمشي تام زين بالكراع وأيادي"
"عشان يفتحلو بارين عرقي وللمريسة أنادي"
__________________

(16)
طيبان العزيز صاحب طيور وقماري
خلّاها البلد بدّل خُدُرْتو صحاري
قال داير الريال وللدراهم حاري
كان تم المراد باكر بقوملنا جاري
__________________

(17)
عارفين يا أخوي أصلو العشوق مجبور
وعارفين الغرام قاعد يكوس البور
القلب إن خِلا تنقص مناعتو تخور
وقبال الغرام يهدر يدمِّر خور
حقو الزول يرمم يعدل المكسور

أب شخيت

06-30-2008, 03:03 AM

أخواني الأعزاء طيبان وعصام..
حقيقة ممنون جدا جدا..
ووقعتوا لي فوق جرح..
لغاويس المسيخيت والمبيريك إتكتبت مخصوص عشان المنتدى...
ومافي زول غير ناس المنتدى شافه أو قراها...
حتى أنا زاتو ما خليت لي منها رواب..كلها قاعد أكبها هني...
ولذلك..
فهي بمثابة روكة للجميع...
واصلوا مجهودكم دا وخلوني في الآخر اللقول لقيت لي زول لقط لي تمر الهبوب المشتت دا...
لأنو القصايد فعلا مشتتة...
واحدات في بوست منفصل..
واحدات في ثنايا مشاركات في بوستات تانية وخاصة بوست عتود دقش والحمار والشطار وبوستات أخرى لا أذكرها..
واحدات هكرن الهكر..
وواحدات ما عارف محلهن وين وما عندي منهن نسخة...
يلا واصلوا نفيركم دا وينوبكم ثواب...
مودتي التي تعلمان...

عصام سرالختم

06-30-2008, 08:25 PM

من بوست
"حزب ميسار للناس الشطار "

قبل السيوف نسمع صليلة
والناس يدُخْلوها المليلة
هاكم مديدة مع البليلة
أرضوها كان كانت قليلة
اللحمة ياخوي يا حليلة
والونسة في النيمة الظليلة
لعبة كعوت وكمان شليلة

رابط البوست :

http://albrkal.com/vb/showthread.php?t=619&page=3

عصام سرالختم

06-30-2008, 08:39 PM

نواصل النقل من بوست حزب ميسار :

حروف الهجاء"الألوف" الضكرة من راسه "الهميزات" وقعّن
الحروف الجارية شوف لامن "نقاطه" إتحتحتن
ماعرفنا "البا" من "التا" من "الثا" جابولنا المحن
أمات الكروش اللازة "حا خا جيم" لي جناهن طرّحن
و"الدال" طابق "الزال" و"الرا" جارية وراهو و"الذايات" جرن..
"السين" معاهو "الشين" بشوف طقم السنينات كسّرن
"الصاد" كايس "الضاد" و "الطا" و "الظا" وما اتلقن
حتى حرف "العين" القلنا عميان العوينات فتّحن
"الواو" الضكر شايل "نوين" النسوة قالوا أنحنا "ون"

عصام سرالختم

07-03-2008, 06:38 AM

نقلا من بوست
" تبيش .. مرق لكم الدفتر القديم "

(1)
بوستاتك عسل نقّط من القنديل
فدّع للجريد مالت سبايطو قبيل
بي تحتو الجرادل نقّاعو فيها يسيل
كان سووهو شربوت وأخدتَ فيهو مقيل
تتشربك رجولك فوقه الرؤوس حاتميل
وكان سووهو تامزين وشربتَ منو قليل
ياكا الشايف الشمس عزة نصايص الليل
___________________

(2)
شدينا الخيال راكبين ضهور الطيف
واتكرّفنا من ريحة الدعاش والزيف
من شجر الأراك وكتين يجيها خريف
وشايفك في "الحصان"راكب تملِّي حريف
تشمشم في السعوط تشرب قزاز الكيف

رابط البوست :

http://albrkal.com/vb/showthread.php?t=3111

عصام سرالختم

10-08-2008, 08:01 PM

واحده من اروع قصائد شاعرنا المسيخيت
منقولة من بوست الاخ محمد عثمان نصر
" ابشخيت وين ايامك .. لعلك عافية "

جقاجق بلد: عبور و عبرة

من غرائب بلد السجم
ومن عجايب آخرَ الدهور
ناس قبل ما يجيبوا السدود
وفوق مجاري النيل الجسور
بشّروا الساكنين بالعمار
وبالطرق الشاقّة القصور
والبديل اليرضي الجميع
في إنبساط خيرين والسرور
ما إغاثة وكوم من هبات
ولا تصدّق مَنْ والنذور
نحن أصحاب حق من زمان
نحن ورّاث جدي "منصور"
بي أرضنا العامرة الأمان
لابتضن بالخير لابتجور
وفيها طيبة الناس الحنان
الكرم عاميّها بالدور
وقلنا نحن عشان الوطن
نبقى ليهو جواز للمرور
للنماء والخير وإزدهار
نبقى نحن مراكب عبور
و في إنتظار الوعد القديم
التماطل فات الشهور
وجانا فيض النيل العظيم
موجو دافر شايل طرور
وانفتح طوفان الجحيم
غرّق الحيشان والتمور
والمدارْسَ الكانت زمان
من سناها تبق ضي و نور
والجوامعَ الفيها القيام
من تغيب لا حد السحور
أصبحت في الحال ذكريات
ذكريات للموت والقبور
فاتو فقراء الناس للخلاء
و راحو سكنوا الصي والجحور
في ظروف ما سكنة بشر
بس سكن فيران والجقور
وكان تشوفوا بيوت الخراب
ما تدوره البوم في الطيور
وماسكن الراح بالرضا
كان خيار مظلوم ومجبور
الكبير فوق حرقة و أسى
والصغير الخاطرو مكسور
والنواح والدمع السخين
فوق خدود ربات الخدور
وجونا ناس ياجوج وماجوج
من بلاد إنجيل والزبور
جونا شان يستلموا الأرض
هم أساس الشر والشرور
غيروها ملامح البلد
واتخرب مكنون الصدور
التعامل صار بالكذب
والكلام بالغش كلو زور
والفساد العمّ البطاح
في سماهو تحلّق صقور
@@@@@@@@@@@
في الظروف القاسية السجم
جانا "ود بروي" العرور
وجانا "صاحبو" غراب الخراب
وقال هو ضابح ليكم عبور
والبعرْفَ اللحم التمام
اليجينا يشيل ما يدور
والشرِط معلوم للجميع
الدفع بالكاش ما جرور
القضية قضية بلد
ما جقاجق فاسدة وفطور
القضية قضية كساد
وفي غلاء الزيجات والمهور
القضية قضية ضياع
للأسر الحاله مستور
والشوارع فيها النساء
كاشفات للراس والنحور
البلد ياخوانّا البقت
بالسفاهة انداية ماخور
والتدين صار إلتماس
للتشعوذ واطلاق بخور
والحروب القاعد تدور
في شرقنا جنوبنا دارفور
والرياضة البقت انهزام
ياحليل مريخو "شاخور"
ويا حليلو هلالنا الزمان
لما كان بيديرو "منصور"
علمتنا مصايبَ البلد
افتقاد الحس والشعور
قوموا يا اخوان نتحد
نعدل المقلوب من دهور

رابط البوست :

http://albrkal.com/vb/showthread.php?t=3773&page=2

.....

misar

12-10-2008, 06:53 AM

عافي منك يا بُنَيْ
نافي عنك كل غي
إنت ما لسع صِبَيْ
ما أظن تميت تِنَيْ
أصلي من تبَّيت جِنَيْ
زولا نجيض ما عوقة نَيْ
كنت شيَّال للهموم ما قلت آه ولا قلت حي
يوماتي سارح بالغِنيم فوق الوِدَيْ
حافي جاري ورا السِّعَيْ
ومن عِصيرا بدري حشّيت العِشَيْ
أربِّط الكليقة أكرِّب وبالحبال لاويها لي
وأبيِّت الجبادة في البحر الخِوَيْ
مرات أشيل النبلة ألقِّط في الحِصَيْ
قصدي زرزور كان دباس مرات حِدَيْ
أَصَلّي فجري مع الديوك والدنيا يادوب فالقة ضَيْ
ما بنوم لامن يزول ضل الضُّحَيْ
وفي المدارس ماني زول هملان غِبَيْ
الفطرة طرقة كسرة بايته ملاحا مَيْ
مرات سخينة أو لِبينة أو رويب مرات لِبَيْ
والدابة كان دحشا حرون طغيان وما بخاف من عِصَيْ
أديهو فوق فرق الأضان يرميني رُبْ لافوق وُشَيْ
كم مرة والجنُّون معاي غدوتنا كانت بي كُدَيْ
نختف..نكابس..ننطط..نصارع..نجوط الدنيا ما همانا شَيْ
مرات أكمرق للتميرات بين الكراريق والخُشَيْ
والله امتِّق في المسور والعرق كاسيني زَيْ
ما أصلو كان اليوم سموم والدنيا صَيْ
وبرضو ماسك البوغة أقرع واحاحي في الطير بي إيدي
أقرِّن الحيضان واصلِّح في اللبيقات عشان الموية ما تَكْسِر علي
والمرض مابدورلو زول ولا حكيم يكتب دِوَيْ
لبخة الشاي بتودر الحمي واللدغة ليها الفصد والكَيْ
حبات القرض للقحة ومصة الليمون الكمدة للقَيْ
للهلاويس نفتح كتاب أو نعمل حجاب أو بخرة لباناً نَيْ
عايشين في أمان وسلام لا بنشوف كعب لا سَيْ
نشرب الشاي في المغيرب معاهو عجوات ود لِقَيْ
شايا مقنن من ضريع محلوب جديد تريان رِوَيْ
والونسة والحجا والنكات والضحكة من قلباً رِضَيْ
ولو ما هي الظروف جابرانا مابنفوت نسافر في المسافات طَيْ

http://albrkal.com/forum/showthread.php?t=1470&page=3

misar

12-10-2008, 06:58 AM

أصبحنا وأصبح الملك ...لله العليم فتَّاح
زكريا ياخوي العزيز...قوم هاك لقيمات الصباح
واسمع مني قول الحق...كلمات عتاب تب ما قُباح
خلينا ننتهز الفرص...ما نحنا بيناتنا الصراح
أول تبادي اللقول ليك... إنت ما(مكتولة مابتسمع صياح)
إنت الفخر لي أماتو...دي الولدة المعاها نجاح
إنت رزين وكاسيك هيبة...مشهور بالجلال وضّاح
ما الزول البليد متزاكي...ود ناساً نجاض ونصاح
زول بتقول كلام معسول..فصيح وبليغ وموزون صاح
ومابيغباك قول الحق...وعقلك يا اخوي رجّاح
ولو ناسي البنعمل فيهو... بوريك لو ألقى ليا براح
ما تخت الهموم فوق قلبي..وتزيد فوق العليا جراح
عارف أخوكا قصدو شنو...أخوك زول قرقراب ومزاح
هو ما الزول البقول الروب... ولا الزول أب بكا الردّاح
ولا الزول المنيفيش ساكت...ولا الزول البذئ البجّاح
ما زول خوخة عالي الصوت...يجوط زي طبلة المداح
ولا الزول الفطوقة العوق.. كان زروهو كاسلو سماح
أنا الزول الركز في الساحة...ما زول من بعيد كتاح
أنا السم اليسل الروح...عديل زي كفتة التمساح
مدخور لي هوايل القوم...معروف بالشكرصدّاح
مازول نوم وفتران همة..لكين زول هميم كدّاح
الزول البكفّي الناس..مليانات صحون وقداح
يباشر ضيفو يكرم فيهو ....باذل للبقر ضبَّاح
يفرح يوم يجيهو غريب...دا كمّل كم مراح ومراح
كم مرات مسكتو لساني... لساني الحادسيوف ورماح
وأرجع تاني اقول لي نفسي إت يا زول غفور صفّاح
الغفران ياخوي ديمة...لي هم القلوب مسّاح
وكل زول يدِّي مما عندو...عارفين الإناء نضّاح
والزول كان عرف لي عزو...أكيد بينوم تمام مرتاح
أنا القلب الرهيف وولوف...ماأصلو الدمع فضاح
لكين قاسي ظلم أخوانا...في داخل القليب نقّاح
خايف يوم يعرفو البيَّ... يقاسوهو الندم نتّاح
يوم شمس الحقيقة تبين...والداخرنو تلجاً ساح
أصلو العمر كان فيهو باقي ...بروح زي الزمان الراح
ما معروف نعيش يوم بكرة...والموت يا أخوي لفَّاح
بسأل ربي حسن الخاتمة...نكون من زمرة الصلَّاح

http://albrkal.com/forum/showthread.php?t=1470&page=6

misar

12-10-2008, 07:03 AM

يا أخوانا الدنيا جمالا في ضحكة و لحظات صافية
و لقمة حلال تريانة و كافية
و علاقة حميمة رحيمة ودافية
و قولة أمك منك عافية
كلام منظوم موزون القافية
والناس تتعاصر ما تكون جافية
يقدمو خيرن ولي شرورن نافية
وعمل الخير بالليد الخافية
والبسمة حنونة فوق وشك طافية
وكلمة معليش لي قلوبهم شافية
و ذكري اخوانك ما رايحة وهافية
ومهما تعيش أيامك ضافية
في الآخرة الناس عريانة حافية

http://albrkal.com/forum/showthread.php?t=2494

misar

12-10-2008, 07:16 AM

ترتيل في محراب تام زين

تام زيْنُ ليست طفلةً تسبي العقولَ فلا تفيقْ
تام زيْنُ ليست شعلةً تَرمِى على الحق حريقْ
تام زيْنُ للشيطانِ والسفهاءِ ماكانت رفيقْ
أبداً ولا تَخِذتْ من الندماءِ خِلَّاً أو صديقْ
تام زيْنُ ميلٌ للقلوب للجّةِ السردِ الرشيق
يُعطي النفوسَ فساحةً تعلو على دَرَكِ المضيقْ
تام زيْنُ نورٌ للعقولِ إذْ إدْلَهمّ لها طريقْ
من نورِها الوضاءِ نَقْبِسُ للسناءِ وللبريقْ
تام زيْنُ رمزٌ للنقاءِ وللصفاءِ وللرحيقْ
تام زيْنُ بحرٌ للودادِ الحقِّ الفرِهِ العميقْ
يمٌّ من الشوقِ الخَلُوصِ طهارةً قلبي بها ولِهٌ غريقْ
إن ضاقتِ الدنيا عليها لا تضيقْ
بل تستبينُ ملاحةُ الوجهِ الطليقْ
يزكِي العبيرَ مضمِّخاً بالفوْحِ والوردِ العبيقْ
ماضرَّها لو قال شانِئؤها ثُغاءاً أو عواءاً أو نهيقْ
بعُدتْ عنِ الكِبْرِ المزَّيفِ لا ترومُ ولا تُطيقْ
هي من شموخِ الشُمِّ كدحاً طاهراً بُشراك ذيَّاك الفريقْ
العاملين وضاءةً العازمين مضاءةً بهمو تليقْ
رحماك ربي كن بها وبنا شفيقْ

http://albrkal.com/vb/showthread.php?t=111&page=8

misar

12-10-2008, 07:22 AM

نحن اخوان بنات وكتين سلاحكم رزّ
قاسم باليمين ما فينا زولاً فزّ
ثابتين كالجبال مافينا واحداً شذّ
نبشِّر بالعديل والزين وناخد هزّة
وشافعنا معروف للأشاوس بزّ
و رايتنا فوق راس الرجال تتغزّ
واليحدرنا ساكت...عينو تاخد طزّة
والراس التقيل بسيوفنا ليها الجزّة
والمأسور ندخّلو جوة في "ط...." وزّة..
ونملاها الجيوب-من الغنايم- و حِزّة

http://albrkal.com/vb/showthread.php?t=111&page=17

misar

12-10-2008, 07:57 AM

ود بروي عليك الذمة
ذمة نضيفة ما مجروحة
جاييك تقضي لي بالحق
وعندك نظرة ثاقبة رجوحة
ودبروي بجيكم شاكِي
في الحالة الصعيبة شروحه
الحالة البقت في العربة
المهرة الأصيلة جموحة
الفورد اللي كان للعندو
مال قارون ونفْسِ طموحة
الزول المعيشتو رغيدة
عايش يومو في بحبوحة
العربة التّلاصف ديمة
باسمة بشوشة هاشة صبوحة
الفورد ام صفات معلومة
زي ضو النهار في وضوحه
تقدل في الطريق تتهادى
غارِّيها الجمال في روحه
تهوى مشي الدروب الوعرة
تتساوى الجبال و سفوحه
وضارب في البنادر نوره
ضواية جبين مطروحة
أصلو الفوردِ من تبّينا
تاريخ من زمان ممدوحة
والداير يضوق الراحة
نفسو دوام تكون مشروحة
بس يمشي و"يعاينَ ليها"
دي الشروة الأكيد مربوحة..!!
وكيف لو كان هو راكب فيها
والكنداشة كان مفتوحة..!!
يغشاهو النسيم البارد
ممزوج بالعبير والفوحة؟!!
أكيد حايكون كأنو ملاك
يُوحَى إليه فيمن يُوحَى
وحتى بعد يموت ويفارق
الدنيا العبوس و شحوحة
لازم قبرو يبقى مزار
ويبقى منارة عالي صروحة
وعندو بَنيّة للزوار
طالقين البخور في ضروحه
.......................
ومن أغرب عجايبَ الدنيا
زي قصص الخيال و شطوحه
إنو "عمر" يسوق الفوردِ
ساط الدنيا ديك في "الدُّوحة"
راهِن بيتو في "المعمورة"
و"أم رنا" في بكاها و نوحه
وقال الفوردِ مابتتماشى
والصلعة الدوام مقبوحة...!!
يمرهم فيها نوع في نوع
وما غبّ الأماسي مسوحة
و قال يا خوانّا في الأسرار
العايز يقوله يبوحه:
"إنو كمان بدورلو زراعة
للصلعة البدتلو جلوحة"..!!!.
و إنو بعد عملّو كرامة
بي لحمة عبور مضبوحة
من جزار يكون بنغالي
نازح من بلاد منزوحة
كانت بايرة مشكوك فيها
بين موقوذة أو منطوحة
و أمو تصيح وتجلب فيها
تحنِّس في العوام ولحوحة
والبنغالة أمة عريقة
في الإجرام خبيرة كفوحة
وإنكشف المخبأ سرو
وكانت فعلة جد مفضوحة
وتاني عمر عملَّو كرامة
بعد ما تابلو توبة نصوحة
راح داعي المعازيم جملة
جهّز في العمارة سطوحه
وكت جاب الصواني ملانة
فايضات سايلة فيها قِدوحه
جاتن ريحة طاقّة عفانة
زي موية المجاري طفوحة
وكانت أكلة كل الفيها
بصل و جذر معاهو ملوحة

http://albrkal.com/vb/showthread.php?t=3846&page=2

misar

12-10-2008, 08:04 AM

يا حلاة القول الرزين
لما يبقى أشعار ناصحة
بالكلام الموزون رصين
في بحور الفن سابحة
أغنيات للوطن الحزين
منّو دمع الدم تمسحه
تبقى ساس للصلح المتين
وتبقى كل الناس رابحة

http://albrkal.com/vb/showthread.php?t=3687

misar

12-10-2008, 08:07 AM

لا حدود للنشر المضاد
والكلام مابدور السماد
خموا صرّوا وشيلو الرماد
أصلو طيبان ياهو حمّاد
يلحس الكوع وليها كدّاد
عندو كوكة تبين في المخاد
بيها يسهر غالبو الرقاد
فوق حبل يا نوم الجداد
أرجو للساعات ما بعاد
وبكرة لينا يكون المعاد

http://albrkal.com/vb/showthread.php?t=3649&page=2

misar

12-10-2008, 08:09 AM

الظر افة".....
تعني في اللاغوس "زرافة"..
ونزرف الدمعات زرافة
زي تماسيح في ضفافة...
تاكل السمك المعافى
لا بتخاف لازول يخافه
في بحار دجلة ورصافة

http://albrkal.com/vb/showthread.php?t=3649&page=2

شهرزاد

12-14-2008, 12:01 PM

عباس وكت جيت للشعر
يا دوب أخوي دربك مرق
أصلو الشعر ما فوقو حظ
لا فوقو إسنا ألّت ورق
لا فيهو دغميس للكلام
لا فيهو سرقة زول سرق
سرق الجهود الفي اللعب
جابوهو بالفن والعرق
خليك محل لعبك سجم
حظك يكون ليك الدرق
خليك محل تدخل تقوم
زي زنقة المعصور زرق
خليك قبل تقعد تقوم
تلقى اللعب فار واتحرق
من بوست ما فوقو أسنا ألت ورق

شهرزاد

12-14-2008, 12:13 PM

أنا مهكور...!!..والبمرقني مشكور..!!
ياخوانّا كتّفني الهكر
الما صلى لي ربو وشكر
خرّب مزاجنا وليهو عكّر
هو أصلو ما سودانياً ضكر
غشاهو إبليس جانا ومكر
زي التقول رامي السكر
كان سألتو إتلعثم نكر
ياخوانا لو ممكن مساعدة ولو بالفكر
وحلان عديل حتى للأضنين موكّر
وخالد الحاج الفوق قلوبنا قعد محكّر
ما تزيدو العليهو "ووبين" و "كُر"
جاريلكم السبحة التكر
أسرعو ألفوني قبال الضهر
من بوست ينصر دينك يا خوي الزعيم خالد الحاج

شهرزاد

12-14-2008, 12:20 PM

زكريا بابكر عمر: إنت كارنك ناس الطريف

يا أب شخيت شغلك ما نضيف
إنته كارنك ناس الطريف
ألزم حدودك وأحسن تقيف
ولا خايف من قطع المصاريف؟
داير أقولك وخل سمعك خفيف
وأبقي عاقل وخليك حريف
مابتحوق في ناسي ختيف
عندنا الشعر ساوينبو الصريف
ويوم يجينا المتلك يا ظريف
للكلام جاهزين مابنقيف
وأصلو قاعد في طرف الشلاليف
ورينا طارق (حشالك) كم رغيف؟
بس لايبقي غشاك بيحرييف
أكل المطايب وأداك الغضاريف
يا حليلو راسك كيف خفيف
وزي بعضكن شبه التعاريف
وين لقاكا وأحكينا كيف؟
من كماسرة بصات الجريف؟
ولا جيت جالوبه من الرديف؟
أظنك من جماعة ناس أم شعيف
البيضفرو البروش بالسعيف
العايشين علي محريب الخريف
بنغتيك إن بقي توبك رهيف
ولو ماحرام في دينا الحنيف
كان لفيناكا في الدبلان النضيف
أمشي روح إنته لسع لين كتيف
جيبلنا القدرنا المازيك نحيف
وعمدتنا النزلتو وكيل عريف
نديهو المقص ونزيدو تشريف
عندنا في المقام زي علي عبد اللطيف
والبيهبشو نجز راسو بالسيف
من بوست عتود دقش القصائد الشعرية بعد كمين الكاميرا الخفية

شهرزاد

12-14-2008, 12:26 PM

لامعات جنجلوس و سحالي...و الخدين كساها بثور
ود بروي صديقي الغالي.... يا زينة ولاد منصور
"البركل" بلاك بقى خالي...زي وحشة خلا العتمور
بذكر فيك دوام ما سالي...ليك الغيبة تامة شهور
أسأل من غفير لي والي...الخاطر دوام مكسور
جانا من الجناب العالي...خبرك في الصحف منشور
شافوك في أم نويرا يلالي..راكب في الظلط بابور
بقيت تركب عجيلة الرالي...ساكن في الكلاكلة قصور
مزروب بالحديد و نمالي...من الشامبو قاجي عطور
تاكل في الرغيف الآلي...ما فطيت غداك لا فطور
وعندك رقشتين وطبالي...واخوك بالدين صبح مأسور
ماسورة الفلس كابالي...فوق حالي الدوام معسور
كان قتليا مالك مالي... عارفك زول كريم وجسور
داير لي عجول و سخالي...و أصلك للتقيل مدخور
كمان داير تويب بنغالي...و بدور حبة لبانة بخور
وأوعك ياأخوي تبقالي...واقف مع البنات طابور
قاعدات بين زهور ونجالي...يشربوا في القرين معصور
لابسات بنطلون و فنالي..مكشوفات نهود و خصور
لامعات جنجلوس و سحالي...و الخدين كساها بثور
شايلات القفاف و مخالي...ماخلن رياش و دثور
طاقَّات اللبان و تسالي...و كيس الإسكريم ممصور
ديل يا خويا غايظات حالي....في وجه البلد ناسور
كان تم المراد في بالي...في رمضان قبل عاشور
يكون كف السعار الصالي....مقطوع منجدع مبتور
من بوست عتود دقش القصائد الشعرية بعد كمين الكاميرا الخفية

شهرزاد

12-14-2008, 12:33 PM

أب شخيت: يهجو نفسه متنكراً بإسم (أبو أواب)
هوي يا أبشخيت بديك حديث قرِّب أضانك واسمعو
جايينا من سفراً بعيد راكب حمارك تلكعو
ما جيتنا بي شيتاً جديد غير "تعالى" وكوراك قعو
وحبة "تطاول" مستفز...وهرشات و "فلّيق" بالبعو
ورقك معرِّج .. وورقنا فاتح من زمان وما لاقي بايظ نجدعو
أخير ترجع تتم باقي الشراب وخمِّر عويشك وزرِّعو
أصلك سجيمان من زمان والهاري يومي تكرِّعو
ما تنسي الحمار تديهو المشك...عارفنو فنجاط ما مطيِّعو
وإنت كان يوم إنحشك..مافي شك مابنهبشك لكين خشيمك شمِّعو
الجانا بي "أدب واحترام" نكرم مقامو نشبعو
حتى الوليدات الصغار ماسكين حمارو يرتِّعو
وكبارنا حالفين باليمين ضابحين و للعربان دعو
شوف ناسنا متكسرين شديد..جايين علينا و أسرعو
كان جيت براك...والله آلافاً معاك ما فارقة تب ومابيُمنعو
وشبابنا شايلين الصحون... وقداح زيادة إتبرعو
كفّو الخلايق كوم لحوم والباقي للناس وزعو
أدوهم الحلو والجلي...حتى الفواكه تبّعو
و مافي زول أدوه خير.. قام أباهو ورجعو
إلا زيّك "لزِّاهو زول"...طمع نفيستو وشجعو
أدَّاهو سيفين من عشر...(حزَّم هدومو ودرَّعو)
وسوسلو بي قول (بارك الله في من إستفادو و نفّعو)
"قبض المقدم" وتوش دخل..خلاهو حاري وطمّعو
يختو فوق وش "المدافع"...كم خيَّب ظنونو و فجَّعو
ولو ما الأدب مانعنا والجيرة والأرحام و "شفّعو"
كان حرَّشنا درفونا صغير...يكفَّت جضومو يلبِّعو
يمعط رويشات "الغراب" ينتّف ضنيبو يمزّعو
كان تاه يوريهو الدرب...وكان خلقو ضيّق يوسعو
لكن وصاة أهلا كبار (حانن وليدك وطبعو)
(ربيهو يحترم الكبير يرعى المقامات وماتدلعو)
(إن درت تأمن من شرور...ماتنسى "كلبك جوعو")
"ود الصيدة" و "أولاد بابكر" إتنفشو فوقو إتضرعو
ديل بحار شعر القصايد...هم مصبَّو عديل و منبعو
ديل ياخي ما خلولو شي ...إتفنّو فيهو وبدّعو
ياخوانّا كان شعرن رصين...أطرب قليبنا ومتعو
بالضحك قطع المصارين... لامن كلانا إتفقعو
طربت نفوسنا وانتشت...وقلوبنا حنّو إتلوعو
زاد شواقه لي شوفة حبيب سافر بعيد ماودعو
زي مغترب مشتاق شديد لي أم عيالو وشفّعو
زي وردي بالعود بالمزاج يغني سايلات دمّعو
(هجرة عصافير الخريف في الموسم الفات قنّعو)
العمدة عود صندل عبير عطاهو طيب للجدعو
شمعات علم تضوي السبيل...أو قول نخيل يرمي الرطب للفلعو
و ختاكا كان ياأبشخيت...كاسات ألم مابراهو شربو إتجرعو
أحبابو الكتار برا البلاد.. خاتمين جوازن طلعو
وإتنادو من داخل البلاد...إتلمو ليك واتجمعو
قالو حالفين جوه الحرم ...مهللين طافو و سعو
(الما احترم مقامات الكبار...أتمان عزيزة ندفّعو)
(نخلص حقوقنا مضاعفة...نبهدل حياتو نبشِّعو)
(كان فات "أدب أولاد رباط"...وما شال نصيبو الوزعو)
(خلونا تب بنجيهو....ونعدل عوجتو و نردعو)
(ماأصلو زول "بومة خراب"...نهدم بناهو نصدِّعو)
(ينسى أبوهو الوالدو زاتو وحتى مين الرضَّعو)
(ينسى إسمو الكان أبشخيت...نمسح خطوطو نبقِّعو

صابرين

12-14-2008, 12:47 PM

شهرزاد

12-15-2008, 07:23 AM

شهرزاد
يامن علمتينا التوثيق لروائع الكلام
لك كل التقدير والاحترام وانت توثقين لقامة من قامات البركل الذى يتشرف به اهلها
الصادقون و العارفون لمقامات الرجال ومعادنهم الاصيلة التى لا تصدا ابدا
لك كل الود يارائعه وبانتظار المزيد
الغالية ثريا
الدرر المكنونة في هذه القصائد
تستحق الجمع والتوثيق ..
حتي يسهل أن يطلع عليها الجميع
ويتناولوا معنا ما لذ وطاب من حلو
ثمارها ..
ـــــ
ألف شكر ,,

شهرزاد

12-15-2008, 12:41 PM

الطريف الجريح في وجه الريح
ودالعطا حليفنا الجديد..........يا صاحب الذوق والأدب
جاتنا معلومات أكيد.............من مصادر موثوقة تب
برسِّلة ليك أنا بالبريد............عبر الأثير ما جيّة خب
حسان يكورك من بعيد........قال أبشخيت باعنا و قَلَب
ياخوانا محتارين شديد..........ورونا بس إيه السبب
تقولو مرات زول العميد........و مرات مع طارق نهب
مرات تودوهو العبيد...........ومرات تقولو من الحلب
يعني ما نحر ِّش نكيد..!!؟؟..ولا نجدِّع ولا نجيب الحصب..!!!؟؟
حسع دا ما الخبر الأكيد........ولا عشان كده أنا كتب
يا زول شماري بكون غليد....ليهو ضل حار من لهب
قالوا الطريف تبرق رعيد......مابيرضو بالقول الكعب
عاملين تمام جِد لي حفيد......وجامعين كمان ناس النسب
وانا مابلوِّح بالوعيد................وانا زول معاك عكاز مضبب
وإنت ما واقف براك مقطوع وحيد..معاك أبشخيت يبلع عدوك ياخويا "جب"
وإنت كان مظلوم تب مابحيد..وحتى لو ظالم علي نصرك وجب
أسمحلي اقول راياً سديد..........كان يطفي نيران الغضب
لسه الأمر ماسكنِّو بالليد............قبال يزيدو النار حطب
ياخوي ختاك جَد كان شديد.......يقطع علايق الخوة تب
أهل الطريف هم ليك رصيد....لو جبت الكتاب جمّع حسب
ضرِّب حساب الخوة في الريد..وارفع مقام العشرة طارح السب
تلقى الحساب ياخوي يزيد......و البيعة ليك ربحانة طب
وانت ما الزول البليد........ولا في الحساب فد يوم رسب
ولا الزول اب عقلا كسيد........القالولو صلِّح طبَّظ خرب
ولا في خوة الجيران زهيد...خليك من رباط الدم والعصب
أهل الطريف هم ناس المسيد..البصومو رمضان من رجب
قوم المكاشفي وأهل الجنيد.....خاتمية وأنصار من لبب
ديل هم سلالة الجيل الفريد.....الخلطة بين زنج وعرب
الثابت الأركان وطيد..........ولو جاتن الريح هابة هب
لو جاهم العدمان فات سعيد......فرحان ينطط بالطرب
شافعن من قام رشيد...........حافظ الكتاب من دون تعب
ديل ياخي قدمو كم شهيد.........خاتيهم اللوم والعتب
حد ما أشكر فيهم وأعيد........ألقى الكلام جافاني وغلب
يا خوي إعتزارك ليهم مفيد......يبقي زي قطران للجرب
ترتاح عيون جافاها الهجيد ......تخضر زروع بعد الجدَب
قبال يهل رمضان المجيد...........إعتذارك عز الطلب

من بوست الطريف الجريح في وجه الريح

شهرزاد

12-15-2008, 12:54 PM

زكريا بابكر عمر: كلنا شربنا المقلب
السماح يا صحاب السماح
والعذر مننا أقبلو
كلنا المقلب شربنا
وييداك أب شخيت أسألو
هو وعماد شدونا العتود
وزازو بالنيران مرجلو
خلونا ننطاقش بالجري
للبحش فنن منجلو
والكان بيقرع فاتح اللبق
وقف البابور بطلو
والمودي للسوق الخدار
خلا في شوالو وبلبلو
والعندو مشوار للصباح
مامهم قال بطلو
وحتي ناس البكاء للعزاء
زولن الميت سبلو
الله يجازي محنك ياعماد
ساوي راسك زي الدلو
الرباطابي جنا أصول
مالك عليهو مبهدلو
أداهو إبراهيم بالتقيل
وسلا من جنسو وحولو
سواهو عبدا ليهو ضل
ليبخيت وداهو وسجلو
وسماهو يعقوب الغراب
وكان غراب الشوم مدخلو
مسحو بالإستيكه أم قرش
ومسكو من كرعيهو ودلدلو
أما العطا بالغ عديل
تكي الزويل ضبحو وحللو
أنا من الأول ماقلته ليك
ناسي في عماد مابيحملو
ماشفتهن من سمعو الخبر
بقو في القعاد يتململو
في النهايه وبيت القصيد
آخر الموضوع وأولو
كل زول من الإبداع يشيل
يغرف يكب في جردلو
أعفا مننا ياأب شخيت
نحنه كبرنا والناس هللو