مجموعة أشعار .. العطا على العطا

[عصام سرالختم]

توثيق لكل مشاركات
اخونا الشاعر العطا على العطا
الشعرية بمنتدى البركل

من مشاركات العطا فى بوست
( التحالف يطالب بطرد العطا وحماره من البلد )

إنت يا لحّاق من بعيد
أب شخيت المهدي الإمام
وشيخي إبراهيم بابكر
ليكا عندي مقام واحترام
"البلاغ" مفتوح مني انا
ومن حماري " بيان وأمر هام"
عند أهلنا وصلني الخبر
حلف دابو الليلة هسِّي قام
حلف مابين طارق وعماد
وبرضو لام زكريا وعصام
حلف ضد العطا والحمار
المعارضة ضد النظام
قالوا: "فوق الكارو انت قوم"
"سوق حمارك شدَّ اللجام"
"أمشوا امرقوا أختوها البلد"
نمهلك ساعتين للقيام"
يا تحالف الهواء إختشوا
ولا تدِفْنوا الراس كالنعام
مابتعرفوا العطا إنتو شي
وشن قضيتْو و هدفو المرام
شن بجيب "اللادا" ام صفيح
جنب حديد الكارو التمام
أنا حماري حمار من طرف.؟!!!
أنا حماري حمار يا سلام.!!!.
أنا حماري حمار يستحق
هني يكون موجود عالدوام
أنا حماري حمار البلد
أصلو فصلو سلالة كرام
أحمر الإستوب أقولّو "وِش"
أخضر الإستوب "عَر" قيام
للفرامل بس أقولّو "حاو"
ولما يمشي المشي بانتظام
مابيخِلْ بقواعدَ المرور
عندو حرْصِ شديد والتزام
و في مشيهو يراعي الجميع
ماخرب ذات يوم النظام
أدِّي طاسة عيش الدغش
الصباح التنكِ ألقى تام
حافي لابس أركب أسوق
ماحصل شدّيت الحزام
لا بلاقي عساكرَ المرور
و لافي ساعة ذروة و زحام
لا شهادة بحث أمرقا
وللحمار تأمين مستدام
ما بفِك "بلوتين" أو "بلك"
لا "لديتر" دايرَ اللحام
لا "بجر الزيت" الصباح
لا "بجر النور" في الضلام
ما مطالب أعمل فحص
وامشي للترخيص كل عام
الحمار وانا يومي انبساط
و ديمة نحن على ما يرام
يومي أسألو قيّلتَ كيف؟
بس يقولِّي "تمام التمام"
يوم أدور انا احشش كتير:
تبقى راكبه يميني المدام
قرقرابنا يطق بالدرب
بالإشارة نرد السلام
نمشي نقعد تحت الجبل
قعدة بين آثارنا القدام
الطراوة الهوا والهبوب:
ذكريات الريد والغرام
والحديث بي لغة العيون
والتخاطب بالعين كلام
من عيوني سهام العيون
في عيونا تقالدَ السهام
والمهم الزول ينسجم
عمرو كلو يقضِّي انسجام
كلّها الأيام كمّها؟!!!!
مهما عاش الزول يومو تام.!!!.
و كونو إنو نفوت البلد:
يا حماري علينا السلام
مابفوته يمين البلد
لو عدمتا لقُمْةَ الطعام
ولو مصيري أموت بالعطش
وقدَري أواجهَ الموت الزوؤام:
إلا اسدد دين العلي
من كترْةَ الدين بيهو هام
بلدي حقها واجب علي
واجبي عندي محل إهتمام
ومابيفوته حماري البلد
قال حماري "عليهو الحرام"
رايو: "عندنا فيها الف راي"
"و فيها عندنا عدة مهام"
قال: "نصالح للبركلين"
" ونطفي نار الجفا والخصام"
"و فوق دروب أماتنا القبيل"
"فوق طريق أبواتنا القدام"
"الطريق مرصوف يتفتح"
"من تحت لا فوق يبقى عام"
" والجداول تسقي وتسوق"
الجناين القش فيها قام"
قال"مناهو ينورْقَ القمح "
"و في تقاتنا يركَّ الحمام"
" ونفسو يحضر بركل/جبل"
"في نهايْةَ الدوري الختام"
"لا يكون الغالب غلب"
"لا الخسر خسران إنهزام"
"و يبقى غالبَ البركل جميع"
أصلو غالْبَ الغير ألف عام"
إنت قوم يا طارق تعال
حيّو وادّو حماري التمام
و نادي باقي تحالْفَك يجي
ناس عماد زكريا وعصام
قومو شدّو الكارو التقوم
نمشي جملة نسير للامام
البلد نرخيلا الأضان
والحمار نرخيلو اللجام
الحمار دا حمار البلد
ونحن كلنا ولاد البلد
لينا فيها يطيب المقام
.............

آمل أن يرتفع تحالف الهوى والهبوب "تحالف المعارضة" "عصابة الأربعة إلى مستوى الحدث ويلحقوا بالكارو ...سيحفظ لهم حماري ذلك وكذلك البلد ويشاطرونني الرأي في أنه يستحق التكريم لا "الطرد"...

العطا علي العطا
17/4/2008

[عصام سرالختم]

مسكول من حمار العطا لتحالف الهوى والهبوب

وينك انت الأغى ابشخيت
انا ثلاثة ايام ما اكل
الحمار حردان جاي يطق
فوقو باين ظاهر الزعل
شيخي إبراهيم بابكر
شيخ شيوخي تعال شوفلي حل
قالو امرق أختى البلد
سوق حمارك كوسلك محل
شيخي انده لي عوض جلاس
والولي الحميد في المقل
حق حماري يبين في عماد
فيهو أشوفو بيان بالعمل
يجري طابور ذنب الصباح
يمشي كرري يلف الجبل
والحرامي السرق العتود
ينسجن مقبوض بي جمل
وما يسيب زكريا الرقيص
كل مسابقة يبقى البطل
بس يزازي هناك في الجنوب
للبلد سنتين ما يصل
يا حماري عفارم عليك
فيك سماحة البلد الاهل
قال حمارى نسامح عصام
شان هو ضيف والضيف يحتمل

[عصام سرالختم]

رد العطا على العطا
على قصيدة محمد عثمان نصر

انت يا الارباب ود نصر الحمار القلتو اطردو
الحمار اتلوم متين الحمار سوالكم شنو
في تراثنا مقام للحمار عالى قدرو يزيد في علو
للحمار تاريخ في البلد الحمار ما نا صر منو
الحمار يكفيهو وكفا بيهو جدك قاوم عدو
وبيهو كم مرضان اتنجد وبيهو كم ملدوغ لحقو
وصلوه محل الحقن والحبوب انبقن اسبرو
تطردو التاريخ والتراث والمغالت يسأل ابو
امو كانت كيف بالحمار حايمى نص الليل في الكرو
شيل فواتح لى عند جلاس ما بتغيب ان جنى طهرو
نورى فيها حمار ود كنيش وفى المقل حق على ود شبو
الحمار مهضوم الحقوق وللحمار الفضل انسبو
وتانى احسبو جمايل الحمار الجميل يا ناس تنكرو
الطرمبة قبل ما تجى اطرو زمن البير والدلو
خرجو هيئة توفير مياه منو نملى الزير والسقو
نلقى موية الزير صافى شب مافى زيرمليان دنبرو
الحمار دكان الحلب الحمار اسعاف البدو
الحمار لموزين الجدودالحمار طيران امنتقو
قولى يا الارباب ود نصر نفسى هادي السر أعرفو
الحمار اليسوى ملين قولى قيمتو تكون كم يرو
اسرع آالأرباب ود نصر قوم حمارى أطلبو العفو
وتانى سيب جعجعة الكلام كان ختام صدام في قبو

العطا على العطا

[عصام سرالختم]

سياحة داخل حديقة الحيوانات

مالو لو جاب دقش العتود... وانتى يا عطمنو بالتيس
الحمار موجود عن عطا... بس تجيبلها زينب كديس
شان نكِّون محور الخير... في النظام الدولى الحديث
نبدا بسم الله المشى... نبدا سير الخطو الحثيث
دنيا فيها يسود السلام... لافي جيش لا فيها بوليس
دنيا كل الناس شعبها... وفيها كلْ انسان هُوْ الرئيس
يصبح الانسان عندو حق... وحقو غالي عزيز ما رخيص
نملأ هادى العالم سماح... والخلق مبسوطة وتهيص
نبني جنب الجامع كنيسة... الامام بقى جارو قِدِّيس
يومي نصحى نصابحَ الحمام... القماري غنى الدندريس
بينّا يبقى الامن إستتبْ... ما نشوف في النوم هلاويس
القنابل تصبح اقلام... والكلاشنكوف كراريس
الحَراسة تكون منتزه... والسجون صالات للرقيص
في الشوارع بدل الهتاف... نسمع أبشر هوي يا عريس
المتاهه تصل حدها... والشقاوة نَوَصِّلا الميس
للحمار جردل كركدي... وللعتود جكّين قونقليس
اللبن محلوب مو علب... المبسْتر لبن الكديس
دعم في المليان مو خمج... بالفياجرا حا ندعم التيس
بالكليت والشاف والطلح... ريحتو قاجي على القرمصيص
في إعتقادي حنطرد الشر... ومن قلوبنا حنطرد ابليس
في حسابي انا قاسم صعب... -رغم انو في أملاً بصيص-:
يبقى طارق خلّى الختف... او يسيب زكريا الرقيص

العطا علي العطا
البركل
مساء الأربعاء 30/4/2008

[عصام سرالختم]

مشاركة للشاعر العطا فى بوست
(عتود دقش بثوبه الجديد)

بإسم الله إبتدي
يا كريم يا الله يا لطيف
صنو يا الأخوان وأسمعو
أصلو ياهو ده حال الخريف
منو ليهو يقوم العجاج
والغبار العالق كثيف
في النهايه يجي الهمبريب
هابي بعد الريح العنيف
ويدخل الرقراق أي ضل
هو البخلي الضل ضل وريف
أب شخيت يكفيهو وكفي
إنو قادر يقدر يضيف
وقادر الأضداد يجمعا
يوم يكون العدو يوم حليف
أنا موصي قبيل من أبوي
ماأشيل الشيل الخفيف
مابفرز ناس بالكلام
ومابقول ديل ناس الطريف
وإنته يا أبراهيم شيخي أنا
إنته شيخي الشيخ الشريف
وأصلي منك وفيك يا عماد
ماشعر ذات يوم إني ضيف
بيني وبين زكريا وأخو
جاري بينا الحن مابيقيف
عندي طارق زول فيهو سر
والله واضع السر في النحيف
زول يقلب المقلب ضحك
وهمو يبقي الموقف طريف
أصلي شايف الناس كلهن
ديمه متماسكين كالصريف
وكلهن أصحاب عندي أنا
ياكن أخوان شخصي الضعيف
همي يومي أقوم الصباح
أسأل الأخوان صبحو كيف
قبل أمرق أشد الحمار
أمشي أصابح الفرن الرغيف

العطا على العطا

[عصام سرالختم]

فى رده لاحدى قصائد الشاعرة
ام مصعب .. فى بوست عتود دقش


المرأة البتساوي الرجال


التمر من جبّد بشيل
ومن يشيل للهم تلقى شال
ويقدلو الأطفال فوق عدل
وفوقو تقدل أم العيال
والحريم في ستره وصلح
والرجاله تبين في الرجال
نصحى زايد ضوء الشمس
ونمسي زايد نور الهلال
لمّ حواء تئم الخلق
ده المنى القدام الرجال
من صحابة شيخي أب خليل
وليهو ليهو وليهو بت خال
وصح ضراع زكريا اليمين
وياها إيد يعقوب الشمال
لاب نعدها ضمن الحريم
ولاها من ربات الحجال
داير أصبق الناس كلهن
ونالو شرف العطا فيها قال
فيها فيها وفيها الكثير
إلا بس لله الكمال


العطا علي العطا
الجمعة 16 رمضان
28/9/2007

[عصام سرالختم]

حلبنة الكلمات
(( صدقة فى الذكرى الأربعين لحلبنة الطريف ))


جاءنى هاجس فى خاطرى طاف
قت هادى الإيد أربطـه
واتنى خيط الربط المتين
يبقى رابطنى ورابطه
وكتن أصلاً أنا زول مو يا
كون إنى بديت الخطأ
وكل شئ مسيوط سطو أنا
وفى النهاية أنا السايطه
خوة بين إخوان من زمان
عشرة جيرة الدم خالطه
معركة تحرير من وهم
صح وهم تعديل خارطه
منى كان مقبول الكلام
لمّ كان فوق توب الغطاء
ياحليلى ألوج فى الشمس
واشريرى الضل ما أطا
ومنو أمشى بعيد أبشخيت
ومن شخوتو الكان شاخته
اجرى يا ابراهيم شيخى أنا
يى دى حالتى تعال حوطه
بارى يا زكريا الحروف
إن نسيت أنا نقطه أنقطه
وين محل مفتوقه أرقعه
يا أخوى يعقوب خيطه
قومو اسندو معاى الحيط
وبرضو أقيفو معاى نبلطه
هيلاهوب إيديكن معاى
نقلب المقلوب بالخطأ
شن يفيد الصقر إن وقع
فى البتابيت والبلبطه
الله ربى يجازى الحلب
وكل حكومات البلعطة
كل دجال رافع شعار
كل منافق شال يافطه
أىّ بدعه مصيره السقوط
فى النهاية تكون ساقطه
وأىّ طائرة تطير بالكضب
لو صبرنا تقع هابطه
جيت أكوس للناس فى الضحك
نيتى كل الخلق أبسطه
جم تعاستا أخت السرور
فوق سروره أزيده أغبطه
أىّ كلمة تكون بانطلاق
مانى قايل الناس تقرطه
وأىّ خطوه مشيت دون قيود
كان من المفروض أضبطه
هسه داير أفك الرباط
داير أفك إيدى الرابطه
بيها ألملم كل ورقى داك
أىّ ورقة ألقاها أشرطه
تانى شان إتفشه ارتاح
بى كراعى ادوسه أخبطه
بيها إيدى أجر الشخيط
ألف شخطه وشخطه أشخطه
يا ترى الغلطان كت أنا
أم هو كان سوء فهم العطا
للسلام الجاء وما وصل
لسه بين الناس ما وطأ
برضو للبترول المرق
وما لقى السواق نافطه
أو للقالو الصاح دوغرى صاح
ماهو قول إعلام وأشرطه
القبيل اختارو القبور
شان وراهم نلقى واطه
فيها تصديق جامع طلع
جم كنيسه القس خططه
للبعرفو الله عرفه صاح
ماها عرفه جور سلبطه
أو اللفى إيدو شريحة البلد
شال قروشنا وما نشّطه
أم هو فارس الشعر العنيد
لمّ شد جوادو امتطى
ثورة مو ضد سارق العتود
ضد على الحرمات يوم سطا
يا ترى الغلطان فينا مين
ويا ترى وين كان الخطأ

العطا على العطا
البركل ـ 22رمضان

[عوض جلاس]

تسلم الأخ عصام على التوثيق الجميل
مشكور وعمل رائع وكبير يستحق الاشادة
التحية للشاعر العطا
وتقبلوا مودتي

[شهرزاد]

رد العطا على العطا
على قصيدة محمد عثمان نصر

انت يا الارباب ود نصر الحمار القلتو اطردو
الحمار اتلوم متين الحمار سوالكم شنو
في تراثنا مقام للحمار عالى قدرو يزيد في علو
للحمار تاريخ في البلد الحمار ما نا صر منو
الحمار يكفيهو وكفا بيهو جدك قاوم عدو
وبيهو كم مرضان اتنجد وبيهو كم ملدوغ لحقو
وصلوه محل الحقن والحبوب انبقن اسبرو
تطردو التاريخ والتراث والمغالت يسأل ابو
امو كانت كيف بالحمار حايمى نص الليل في الكرو
شيل فواتح لى عند جلاس ما بتغيب ان جنى طهرو
نورى فيها حمار ود كنيش وفى المقل حق على ود شبو
الحمار مهضوم الحقوق وللحمار الفضل انسبو
وتانى احسبو جمايل الحمار الجميل يا ناس تنكرو
الطرمبة قبل ما تجى اطرو زمن البير والدلو
خرجو هيئة توفير مياه منو نملى الزير والسقو
نلقى موية الزير صافى شب مافى زيرمليان دنبرو
الحمار دكان الحلب الحمار اسعاف البدو
الحمار لموزين الجدودالحمار طيران امنتقو
قولى يا الارباب ود نصر نفسى هادي السر أعرفو
الحمار اليسوى ملين قولى قيمتو تكون كم يرو
اسرع آالأرباب ود نصر قوم حمارى أطلبو العفو
وتانى سيب جعجعة الكلام كان ختام صدام في قبو

العطا على العطا

مشكور شاعرنا العطا علي العطا
وتحية كبيييييرة للحمار ملهم هذا الإبداع ...
واصل ياعصام في التوثيق نحن في الإنتظار

[ضمره بغدادى]

العمده عصام
نثمن لك هذا المجهود الجبار فى توثيق قصائد المبدع العطا فلك وله منى الف تحية واحترام ويلاكم نواصل توثيق .

[أب شخيت]

الأخ عصام..
هذا مجهود جبار ومضني من التوثيق لشاعر يستحق ذلك عن جدارة..
شاعر مطبوع وله جرس موسيقي واضح النغمة..
ويمتلك نواصي الكلمة الرفيعة...
يخوض في الإخوانيات بإسلوب رفيع ومعاني طريفة مضحكة...
جدير بمثل هكذا شاعر أن تحفظ أشعاره بالوسائط الحديثة..
وهو مازال يكتب في الأوراق المنزوعة من كراسات المدارس ويحتفظ بها في جيبه..
وكم من مرة أضاع قصيدة من إبداعاته...
حتى أنه في كثير من المرات يستعين بي لإرسال نسخة مما كتب ونشرت له لأنه أضاع النص الأصلي...
واصل أخي في توثيق وجمع أشعاره بهذا المنتدى وهنالك بقية لم تجمعها بعد خاصة في بوست "عتود دقش" للصديق العزيز زكريا بابكر...
أما بالنسبة لأعضاء المنتدى فإنا نبشرهم بأن هنالك مجهودات قطعت شوطا بعيدا لإنضمام هذا الشاعر للمنتدى بصورة فاعلة وأنت بالقطع لك إسهام فاعل في ذلك ومعك كثيرون من أصدقاء الشاعر ومحبية...
لك تقدير وامتنان اخي عصام...

[عصام سرالختم]

واصل أخي في توثيق وجمع أشعاره بهذا المنتدى وهنالك بقية لم تجمعها بعد خاصة في بوست "عتود دقش" للصديق العزيز زكريا بابكر...



الاخ اب شخيت
ارجو ان نتعاون انا وانت وبقية الاعضاء
فى نقل كل اشعار اخونا العطا وتوثيقها
رجعت الى الارشيف ( عتود دقش ) ولم اجد سوى قصيدتين
ويظهر انو الهكر دمر باقى قصائد العطا :D:D:D

[عصام سرالختم]

كتب شاعرنا العطا ردا على قصيدة
شيخ الشعراء ابراهيم ودالصيدة ( رهف توب الغطاء )
فى بوست التحالف يطالب بطرد العطا وحماره


بركلي المعطون بالسماح

أبشِروا البركالة ابشِرو
وأي زول يا ناس يطمئن
حمِّسوا الطارات للمديح
وانقروها النوبة التوِن
شدّو كل العصب السلوك
وقِّعوا الطمبور اليرن
توب غطانا الماهل تخين
فوق تخانتو التوب زاد تخن
بركلي المعطون بالسماح
ألف عام جايات يتعطن
بركلي الموزون بالسماح
بالجرام محسوب الوزن
يرمي ضل أرتيقو الصباح
فوق شِعِبْتو ملان السعن
الحلق مليان قرقراب
أي زول مبسوط فارِّي سن
يا بشارْةََ الطفل الرضيع
و يا وقار الشيخ المسن
شوفو حِن أماتنا القبيل
شوفوا كان الحِن ياتو حِن
زي (بت عنكسة) عاد مِنِي؟!!..
و زي (بتَ السكسوك) ديل منن؟!!.
فوق رقَبْةَ الحال الشحيح
ورغم أنف الزمن المضن:
يوقِد الفانوس للصباح
لمّن الأذان يأذِّن
فوق صلاة أمي على الحبيب
ويا كريم يا الله تهوِّن:
حاسي أمي تتم البرش
وكل شوط في شوط يتقرن
منو تمشي تضُرْبَ الدقيق
ما الفطور قراصة و سمن
كانوا زي "جوفيال" الولاد
والبنات ماشات "سيتيزن"
كلو زول كان صادق أمين
وايي زول من جم ينضمن
لا "سلم" لا بيع "بالنَّبِل"
ما حصل السوق ركبو جن
لا كتابة شيك لا وصِل
وياتو بيت الكان بترهن؟!!.
وشوفو إرث الناس القبيل
وشوفوا كان الحِن ياتو حِن..!!.
ما مرق بيناتن مضار
ومابيكونو الحق "بالمرن"
أي زول يبقالك أبوك
وأي أم تبقاله الإبِن
وانت وين ماك داير تخش
مابتطُلْبَ الناس الإذِن
و كل عِينة يسوقو القمح
ويوم ينورقوا يلِّموا التبن
في الجروف الترمس يقوم
جنبو قايمَ اللوبي العفن
كان دا حلم (البلك) الحليم
وبعد نظر (البدوي) الفطن
فزتَ يا (المقبول) بالقبول
لسه ثابْتَ الساس ما وِهِن
يابه (ود علي فور) و (النصيح)
مابيموت تاريخ يندفن
(كمبلاوي) و (عمر الأمين)
فوقنا توب الغطا زاد تِخِن
عندو (محجوب جعفر) بقيف
داير أحيي العارض الهتن
يابه ياابن العارض الهتن
يا ابن ابن العارض الهتن
يا سلالةَ العارض الهتن
إنت ماشاء الله يا"أب دقن"
"عنبر الأطفال" بس كفاك
إسمك المنقوش كالحصن
قولو "كب" يا ناس نتّفق
وايي زول للتاني اليحن
النّصُد للحالة القبيل
نحن عاد فوق كم نتفتن
شوفو صدّ ورجع الجنيه
جانا ماهو متعتع...سِمِن
صدّ للعيدية القرش
وتاني رجع البيع بالشلن
ويرقص أب قرشين بالفرح
جوه جيب الساعة بْيَرِن
لينا فال القرش- الجنيه
ويا معين يا الله لينا عِن..

العطا علي العطا
البركل
صباح 12/6/2008

[عصام سرالختم]

كتب اب شخيت :

العطا ود علي الليلة ضارب نار تقيلة بعد ما حج البيت الحرام..ودعا فيهو من شرور طارق و زكريا ومن أكل اللحوم الحرام اللت "عتود دقش"..وكمان عمل ضمرة شيخو مكان ود الصيدة وفارق درب اب شخيت..وقال أصلو مابيجي جنب النسوان المدلعات ناس زينب "ست الكديس" وشهرزاد "ست السحلية" و عطمنو "ست التيس"...وكمان داير يراعي حقوق الحيوان مع صاحبو الجديد...
شوفو القصيدة براكم:

ضمرة ربي يزيدك سماح
فوق سماحتك اخوي تتمهل
تبقى ضمن الألف الكرام
إسمك أول زول في السجل
أنا معاكا نطوف بالحرم
نمشي نسعى حجل بي رجل
و نحن بين مزدلفة ومنى
و في البقيع الأشرف نحل
ننده الله العفو والسماح
والدعاء في الحال يتقبل
نبرى من شر "طارقَ" الخطير
و ننجى من "زكريا" الشبل
من عتود ناس "دقش" آبنضوق
إن بقينا نخلِّي الأكل
يبقى رزقي و رزقك حلال
يومي كبدة ضان أو إبل
وتبقى شيخي أخلِّي الشيوخ
خترو ود الصيدة إن زعل
دايرَ افارقو طريق "أب شخيت"
"أب شخيت" إن أبى إن قبل
جنب كديس و سحالي و تيوس
الحريم الفهمن كمل
كان نضربَ الخلا ما نجي
تاني جنب الدلع الممل
قالو اهلنا أخير الخلا
من رفقةَ الصاحبَ الفسل
باقي عمري وعمرك يا اخوي
النقرنَ القول بالفعل
أنا أراعي حقوقَ الحمير
وانت راعي حقوق النمل

العطا على العطا
البركل 13/6/2008

[عصام سرالختم]

شاعرنا العطا يواصل ابداعه فى بوست
( التحالف يطالب بطرد العطا وحماره )


شيخي ضمرة الحافظَ الكتاب
الأحاديث هو موثِّقة
شيخي بعد الحاصلَ الحصل
شيخي بعد الباقي البقى
إنت شفت محن ناس عماد
والعصابة البي طارقه
والسجم زكريا اب رقيص
كلهم أخوان في الشقاء
قالو أمشي انا افارقَ البلد
و بي حماري الما فارقه
وبي اصابعيني اسوط عيني انا
أنا أشدْ الكارو امرقه
انا تعبتَ وما هان علي
المبادي براي اخرقه
الوسيعي انا ضاقت علي
انا بقيت نقناق نقنقه..!!!!
و في رقادي اتقلّب كتير
المخدة أتنيها أطبقه
الملاية خلاص دار تقع
كرفسه الملميل زحلقه
الحمار الحايمَ البلد
و بي شواليتو الساسقه
ياهو أصلو ضراعي اليمين
شال معايا الهم والشقاء
ما بفك من حنكو اللجام
لا صريمتو في يوم أطلقه
في الحمار ياخوي ودنصر
لو أقول ألف معلّقه
في عوالي الكرو عندكم
كان تقولّي تعال علِّقه
طعنة من أخوان في البلد
من أعزّ اصحاب واصدقاء
كيف وجعني سكات أب خليل
وشيخي كان عندي محل ثقة
كنت عادّو انا ضمن الشيوخ
النصاح الصاح الثقاه
شيخي أصلوتقول ماهو في
شيخي ستة شهور ما اتلقى
أب شخيت هو أظنّو إتسخت
الشياخة خلاص طلّقه
كنت قايلو بيحوى الدبيب
وعندو قايلَ الإيد لاحقة
و منو كان الرايحة آبتروح
و أي سرقة يجيب سارقه
بالقراية وفتحَ الكتاب
كنت قايلو يعالجَ الجنون مو سقايه شراب معلقة
ومن قبل ينسخت اب شخيت
ديمة كنت بقولّو الأغا
شيخي ضمرة انا جيتك وقيع
عندي أمنية لي حقّقه
شيخي ضمرة أطلْقَ البخور
ولِّع النيران علِّقه
جر سبِحْتك فوق الحريم
والبنات منطقة منطقة
التقول هي "أطُرْدوا الحمار"
داهية فيها حريق يحرقه
والبتاخدو يكون في الرجال
شكلو زي تنقو هبنّقة
شوف رجاء وميسار باصرن
كان يخلّن ها المحرقة
و شوف ثريا ام نضماً كتير
ام كلام كالطير ورجقة
شيخي أكتب لي بت بشير
كتّر البخرات طبِّقه
بس تناهد ناهد دوام
حق حماري يبين عشرقة
قحة طول الليل ما تنوم
الطراوة ان جات تخنقه
شيخي ضمرة إن رِسن الحريم
الحمير بتكون رايقة
و كان كمان يا الشيخ ما رِسن
إستعد للحرب الوغى
وتبقى ضمرة شياختك نفاق
كُضُّبُنْ ساكت زندقة
إنت لملم ورقك عليك
وشيل محايتك ديك أنشقه
تاني أرجع انا لأب خليل
واستعيد في شيخي الثقة
وتاني انده شيخي أب شخيت
واعتزرلو أقولّو الاغا
و في حماري انا أمسك قوي
مستحيل الكارو امرقه
وين رقيقي اخير تتقطع
ماني فاضي ارقعه ألتقه
وإن دا كلو كمان ما نفع
والامور برضومجوبقة
ماشي اسوقو عوض من جلاس
أيوة أدردقو ليك دردقة..!!!!
نمشي نضرب جيهةَ المقل
وتسمع الحلة مجقجقة
واحدي من حميد بس كفى
كل زول فينا يبقبقه
و العوض بيقول للعطا:
"الشراب بالبوز مو سمح..القزازة سريع يمحقه"..
"أيوة كب الكاس نستمخ
هاكا ضوق طعمه إتمطّقه"
وإن دا كلو كمان ما نفع
الشياخة علي ألتِّقه
وابقى شيخكم انا في البلد
وتسمعوبو العطا شيخ بقى
وان دا كلو كمان مانفع
وكتن أصلو الحل ما اتلقى
ودِّعوني خلاص أنا زِهِج
ماشي هادي الرقبة أشنقه



العطا علي العطا
البركل
صباح الاربعاء 19/6/2008

رابط البوست :
http://albrkal.com/vb/showthread.php?t=2574&page=12
__________________

[عصام سرالختم]

العطا يناشد زكريا الانسحاب من التحالف
والإنضمام لحزب الزريبة


شيخي حاج زكريا الهمام
الفقير المابيتلحق
بادي فوقو التقى والصلاح
والسكينة الورع الصدِق
شيخي انا الغرقان من زمان
ماهو دابو الشيخ الغرق
ماحصل لاقيت زيو شيخ
أصلي مما قم من خِلِق
لاهو متل الشيخ اب خليل
وماهو ضمرة المابيستحق
و لا هو زي الشيخ أب شخيت
شتى بينو وبينن فرِق
شيخي لو كان يلقى البراح
والبخور والجو الطلِق
والمديح والطار والذكر
يا رقيص الشيخ إن عشق
الرقيص الما ليهو زي
وفيهو قاسي الشيخ يتلحق
شيخي لو موجود في البلد
العتود ما كان بنسرق
أصلو ما كان داش يوم دقش
وباقي عمرو هو عايش قلِق
صاحي شايلَ الليل للصباح
يبكي فيهو النار دار تبق
المعاش البقى مابيجي
ويشكي ديمة ضنين الرزق
الزبادي بقى ماهو في
و عاد محل الغاز ما حرِق
يحكو عنّو الناس في الغرب
وياهو مضرب مثل الشرق
شيخي لو موجود جنبي انا
لا بنقنق لا كت بنق
مافي زول كان هبش الحمار
ومافي راجل قال ينطلق
لابجيبو عوض من جلاس
لا بحنسوا لا بدردق
لابنكوس حميد في المقل
شان نبوِّز أو نبقبق
ولابنرشَ الحوش العصر
ومافي حلة ليل تجقجق
زاتو ما كان ضاقت علي
شان أفكِّر يو إتشنق
في حماري انا بمسك قوي
والحمار فيني انا بتلصق
وفيكا شيخ زكريا الهمام
وا حلالو العطا فيك وِثِق
و فيك حماري كمان اعتقد
ليكا ينده و ليك يهونق
وبي بركةَ الشيخ قالِّي هو:
"نحن باذن الله نتّفق"
و بركلي البي فوق والتحت
إتفاق صح صح بي صِدِق

العطا علي العطا
البركل
ظهر السبت 21/6/2008



http://albrkal.com/vb/showthread.php?t=2574&page=13

.....

[طيبان]

يديك العافية ياعمدة وأنت توثّق لعقود الشعر التي ينضما العطا علي العطا ..
دي يدي معاك ..بقصيدتو الجميلة أم سماح (تهت يوم باريت السراب).. تحفة من الإعتذار الشفيف عن مشاكسات شيطان الشعر
اب قرون ..

تهت يوم باريت السراب


دنيا فيها تسوقنا الظنون
ونمشي كلما الهاجس هجس
ويصدق الإلهام ويوم يخيب
وبرضو ياهو دا حال الحدث
واصلها الأقدار راح تقع
مهما كان الزول احترس
وفي المسارح في الواقعي
ومسرح المعقول والعبث
والسيناريو يجيك بألف لون
وكل يوم تتحبك القصص
وتفرض الأحداث كلمتا
والمهم تبعات الحدث
لا الأماني تجيب الغنى
ولا في نقة تطرد الفلس
والبيأكل الحوت رزقو حي
ورزقو حي البيأكل العدس
داير أقول للأغا أب شخوط
ليهو ذات بالذات بالأخص
ودحميراء صلاة النبي ياكه دوخري الحوجة الامس
كلما الأعناق تشرئب تبقى انت المعنى انت بس
يا حفيد القيقر سلام يا جنا النعمان يا كلس
فيك شرافة أهل أم دويمة البسوقو العدو للقفص
وكربكان تنشاف فيك عديل
وفيك شفنا النور والقبس
رغم عنف الريح انت في
ورغم انو الريح ماكرس
ما رخيت ذات يوم اللجام
وما نزل من ضهر الفرس
يوم سمعنا صليل السيوف
ما سمعنا البكاء والجرس
إلاّ صاحبي وصاحبك عماد
مالو غير رأيو انتكس
مالو خلى جماعتو المعا
مالو من وسط أهلو اتفرز
وين محاكم طارق تروح
وشن لزوم الحجة الهوس
يوم نهارت انسرق العتود
التقول مسروق تور جخس
اصلي دابي عرفت الكثير
يوم قعدت حسبت ودرس
وفوق حروفي بخت النقط
وداير أقول القول مافي دس
تهت يوم باريت السراب
يعني أقولها صراحة أنا دقس
وداير أقول العطا حي وفي
وفيهو حي الحس ما خرس
ولسه باعو بيلحق طويل
وعندو طولة البال والنفس
ماب يخاف من زول عندو تاج
وعندو كم دبورة ومقص
يمشي طول اليوم مطمئن
ماب ينوم غافرنو الحرس
يا هو حالي ان طال العمير
بيهو اموت إن قصر نقص
________

العطا علي العطا
البركل11/9/2007م

*
من بوست ود العطا يقول ..

[عصام سرالختم]

شاعرنا العطا يواصل تألقه فى بوست "حمار العطا"

للخليج بي فيزة رعي
قبل أطلبَ الإذن آبشخيت
ليك أقيف وارفع أصبعي
و تاني اطاطي الراس باحترام
بالي حاضر وكاملَ الوعي
وإن قدرتَ أدسَّ الحياء
الله عاد يسترن أدمعي
في محل إعراب الهموم
شيخي ورّني وين موقعي
و ليه أنا المجنون ما أجن
وكان نصيح الجن ما ادّعي..؟!!!!..
ما قدرتَ أعيش في الخيال
ولا قدرت أعيش واقعي
قدري يومي ألوج في الهموم
حدّو وين يا شيخنا السعي.؟؟
صورة مو ياها بتتقلب
طالما ديمة مكوّعي.!!!
مو براي "يا نفسي نفسي"
كل زول "شفَّعي شفَّعي"..!!!!
الهموم زهللن الجنات
كلهم أمي وجامعي
والكفاءات طفشت مشت
للخليج بي فيزة رعي
والعقول التربط تحل
حايمة بين الإبل السعي
شيخي كر من حال بين بين
مرة مالكي يوم حنبلي
ومرة حنفي ويوم شافعي
وقبلو وحًّدو -شيخي- القرار
يوم يكونوا الضد صانعي..!!!
تب دبيتو انا بالله الخدار
البحَصْدو الهم زارعي..!!!
دنيا ياها وماها ياها
ديمة لابتفهم لابتعي
و ديمة نلدغ من فد جحر
من جحور الجاهل الدّعي
فيها قلتَ أحالْفَ الحمار
والحمار يتحالف معي
شان ألاقي الموت مطمئن
يستحق الرثا والنعي..!!!..

العطا على العطا
البركل
الأحد 6 يوليو 2008

[عصام سرالختم]

العطا يخاطب عصمت دقش
فى بوست ( شنو السويتو آ عصمت دقش )

أهدأ عصمت روق وإطمئن
طالا ما بالعطا إعتصم
مابيخيب في العطا يوم رجا
وياتو يوم إنقطع العشم
مطمئن أنا راقد قفا
أنا معاكا طلع متهم
قالي أبوك (بالغاز) مرتشي
قول لأبوك أنا غازي الفحم
كان كروسع كان بالجريد
البيصلني بياكل اللحم
وهبهاني يطق بالدرب
وعندي جبنه تداوي الخرم
كنته قايلك عصمت رزين
وفي إعتقادي إنسان محترم
إنته ماخد من والديك
من(ثريا)الجود والكرم
وبيصراحه أقولك عديل
من أبوكا أخد سوء الفهم
تسقي لييعقوب منقه بس
وإنته عارف صايدو القرم
وجاكا قاصد الحوت والسجك
والجداد يوم جاك شامو شم
وعندك الخيرات ألف نوع
الكريز..العنب..النعم
برضو تسقي الزول في القرع
يشكي يحكي هو فاقد الطعم
مستعد أنا أحلف الكتاب
ومستعد أنا أضرب القسم
إنته زول شغال مرمطون
ما مسك في إيدك قلم
وكان ده كان الهيلتون نقول
إنته زول في التاكا السجم
لم سجكك ولحمك عليك
والعصير القاطع الطعم
نحنه مانا ولاد أوبها
ومابيغشنا يوم الزخم
نحنه ناس الويكي أم قرون
ورجله من الحوض بالحزم
عندنا الكداد والورق
وعندنا السبروق يا سجم
ولليجينا نعوس الفطير
وقطع شك نحلبلو الغنم
ونشرب الليمون السمح
وحلبي عافي تداوي الألم
وإن نقصنا نتم مننا
عوجي مافي وكعب العدم
وهسي ماني مكتر عليك
إنته زولنا وأخونا وإبن عم
إن تشد الحيل تتكرب
مابتعضعض أصابع الندم

رابط البوست :

http://albrkal.com/vb/showthread.php?t=3314

..

[عصام سرالختم]

هدية العطا (هلال من الشعر الخالص)لأسرة دقش بمناسبة زواج عثمان :-

دقش وثريا-آدم وحواء
يا أهل الحضره أهل الحظوه
ياالهدي والصلاح والتقوي
في الدار المفرشه فروه
في البيت التملي تكيي مفتوح خلوه
دقش الله يزيدك قوه
وفوق افوقه تلقي ثريا تاني مروه
سمحي المهلي طيبة العشره ونعم الخوه
في أسمي أمومه وأعظم أبوه
زغردي أبشري هوووي يا ثريا
أحمدو الله
دقش الدايرو ييده إنسوه
الله مناكي حققو توه
عازه وعزمي وعصمت برضو وعثمان أيوه
في دارة الفرح إتلاقو
يعرضو فيها فطن الداره يعرضو جوه
دقش وثريا
إنتو الله يزيدكن عافي
تشربو ترووا منها نحنه نشرب ونروه

[عصام سرالختم]

العطا يهاجم زكريا
فى بوست ( العطا وحماره يحاكمون عزالدين وزكريا )

حلف بالله ما صدق
ولا زول في البلد صدق
عطا ( الراسي)
وجنا بدوي ( الهدي) مصدق
عملنا شنو عشان دايما نصاقر الحر
ويتصبب جبينا عرق
مخير خترو عز الدين
مصيرو الراجي يوم الحق
حايتعذب ومن كرعينو يتعلق
ولا مثقال فرد نسمة
من الكانت هي لمصدق
تروح ساكت تروح هدرا
وتتبعزق
قريب جدا باذن الله يبين
يظهر عليهو الحق

ايا زكريا يا حقار ويا احمق
ماك عارفني انا القادر اجيب حقي
واذا دعت الامور بالدق
وقعت معاي يا مسخوط
علي مالك بتتمحرق
ويا حاسد زراق نيتك
هو الخلاك طلع ازرق
سعيدي عليك مروحتك
بخيتي عليك شبابيكك
والاوضة الملاني فلق
دحين قلي اعدك في عداد ياتن
اقول اطرق
اقول جن اقول ودر
والزول عز شبابو طلق
ده ياهو جزاي انوم في الحر
وتتمسح عيوني عرق
انا الجاييك من وين وين
ومن ساعة طلعت مرق
اجك واجري
اجاري عليك خطوتي فشق
اخوض جدول وانط جدول
فترت خلاص من النطيط
عصرت على التمر شاقق
مديني الجاي شايلو عليك
اريتني انا ليهو كان دفق
نفطت الكيس مليتو نبق
ايا نساي منو غيري أنا
وكت ترقص هو ليك لصّق
واللصقتو ما هو حديد
الله وخلقه شافو ورق
دحين اسمع اذا ما جاء
منك للعطا اعتذار مكتوب
واذا ما للكلام نمق
احذرك ايوه واحسن لك
قريب تلحق رقبتك دي
او حا تعيش دوام في قلق
وعاد خم صر ..
بعد زٍعٍل الحمار نقنق
شيل شيلتك انا اكتب لك
سٍمع صوت الحمار هونق
رابط البوست :

http://albrkal.com/vb/showthread.php?t=3389

...

[العطا علي العطا]

مخيرة في رايا مروي تسوي الشي الشايفو كيفه
ولادها وما بنرضا ابداً نشوفا هي ذات يوم ضعيفه
حلفنا يمين ما بنقصر ولاداً قدر الحليفة
بهذا الكبري البنينا مروي اتعدلت ظروفها
بقت كالمدن العواصم معاها اتساوت كتوفا
كهارب الكبري المضوي منوري شبا لطريفا
طلقنا طريق المراكب قبيلك دخلتنا خوفا
نسينا عجاجة السقالة ولواري تزح في صفوفا
سماحة بدال الكواري تكنتك للهوندا فولفا
رصفنا طريقنا ونسينا رمال القوز الكثيفة
وجري وصاجات المساعد البدفن الصاجة ويشوفا
البنرجا يتم اللساتك نحرسو يوزن البلوفا
كراسي النص يا حليلن حليل العظمة المخيفة
نشتت من اوسلي فللي بقينا دقيقا ابنقيفه
بقينا نسافر سياحي الكراسي مريحة ونضيفه
قاعد في الكرسي تفطر تجيك الوجبة الخفيفة
مع الزيتون في المربة وشرايح جبنه ورغيفا
نكركع في الريتش بارد وموية الصحة النضيفة
تجينا طراوة المكيف تخلي البص كلو زيفه
نعاين في السي دي نسمع ونقرأ نطالع الصحيفة
نشاهد الكاميرا الخفية ومقالب الكاميرا الطريفة
وكت منعونا السجارة بقينا نكوس في السفيفه
نعاين في امري الجديدة وظلال أشجارها الوريفة
نعيدو مسلسل حياتنا نمثلو ونعمل بروفه
كسح وابو زيد الهلالي وصابر وجابر الخليفة
يطالبو السواق يهدن يلف ام جقره ويطوفه
نأشر بالإيد نسالم في أم الحسن الولوفه
نحي قهاوي الحميدي معانا نقدر وقوفا
كريمة هي كانت معانا وتعدنا دايماً ضيوفا

وقريباً يا مروي منك نطير في طايرة انتنوفا
ندوس الزر بس تجينا تصنقر فوقنا المضيفة
رشاقة ورقة ولطافه نحس بي انها ظريفه
تباري رباطات حزامنا ِِ تطول بالها ووقوفا
توري مخارج الطواري تحاكي وتشرح نشوفها
وتقرا درجة الحراره تخلي الأجواء لطيفة
ونسهل كل القواسي نتم الناقصي ونضيفا
كشفنا يكون بالأشعة أشعة ليزر خفيفة
علاجنا رنين مغنطيسي بعد مو الحلبه السفوفه
مريضنا يصنقر يقنب يضوق العافي ويشوفا
ابشري مروي وابشري بشارةً دقت دفوفه
ولادك في الجامعة طلبة وعميد كليه ...وبروفا[]

[انس البدوي بابكر]

تعظيم سلام يا العطا ...بدايه قويه و رائعه و قصيده معبره و جميله .....و عقبال نشوف مروي تنافس لندن و باريس و نيويورك ودبي ......لك التحيه مره اخري يا لعطا و ما زلنا ننتظر الكثير

[خالد البدوي بابكر]

القصيدة دمها خفيف خاصة كرم المضيفة
حالف نصل البركل نعزمها ونضبح لها خروفا

تعظيم سلام للعطا وقصيدته الظريفة

[ناصر قدور]

مخيرة في رايا مروي تسوي الشي الشايفو كيفه
ولادها وما بنرضا ابداً نشوفا هي ذات يوم ضعيفه
حلفنا يمين ما بنقصر ولاداً قدر الحليفة
بهذا الكبري البنينا مروي اتعدلت ظروفها
بقت كالمدن العواصم معاها اتساوت كتوفا
كهارب الكبري المضوي منوري شبا لطريفا
طلقنا طريق المراكب قبيلك دخلتنا خوفا
نسينا عجاجة السقالة ولواري تزح في صفوفا
سماحة بدال الكواري تكنتك للهوندا فولفا
رصفنا طريقنا ونسينا رمال القوز الكثيفة
وجري وصاجات المساعد البدفن الصاجة ويشوفا
البنرجا يتم اللساتك نحرسو يوزن البلوفا
كراسي النص يا حليلن حليل العظمة المخيفة
نشتت من اوسلي فللي بقينا دقيقا ابنقيفه
بقينا نسافر سياحي الكراسي مريحة ونضيفه
قاعد في الكرسي تفطر تجيك الوجبة الخفيفة
مع الزيتون في المربة وشرايح جبنه ورغيفا
نكركع في الريتش بارد وموية الصحة النضيفة
تجينا طراوة المكيف تخلي البص كلو زيفه
نعاين في السي دي نسمع ونقرأ نطالع الصحيفة
نشاهد الكاميرا الخفية ومقالب الكاميرا الطريفة
وكت منعونا السجارة بقينا نكوس في السفيفه
نعاين في امري الجديدة وظلال أشجارها الوريفة
نعيدو مسلسل حياتنا نمثلو ونعمل بروفه
كسح وابو زيد الهلالي وصابر وجابر الخليفة
يطالبو السواق يهدن يلف ام جقره ويطوفه
نأشر بالإيد نسالم في أم الحسن الولوفه
نحي قهاوي الحميدي معانا نقدر وقوفا
كريمة هي كانت معانا وتعدنا دايماً ضيوفا

وقريباً يا مروي منك نطير في طايرة انتنوفا
ندوس الزر بس تجينا تصنقر فوقنا المضيفة
رشاقة ورقة ولطافه نحس بي انها ظريفه
تباري رباطات حزامنا ِِ تطول بالها ووقوفا
توري مخارج الطواري تحاكي وتشرح نشوفها
وتقرا درجة الحراره تخلي الأجواء لطيفة
ونسهل كل القواسي نتم الناقصي ونضيفا
كشفنا يكون بالأشعة أشعة ليزر خفيفة
علاجنا رنين مغنطيسي بعد مو الحلبه السفوفه
مريضنا يصنقر يقنب يضوق العافي ويشوفا
ابشري مروي وابشري بشارةً دقت دفوفه
ولادك في الجامعة طلبة وعميد كليه ...وبروفا[/size][/size][/size]

شكرا استاذنا العطا و مروي ستكون افضل من لندن فقط عندما يتحقق السودان الجدبد رؤية المفكر جون قرنق و حلمنا جميعا

[عمر مجذوب خطيب]

صديقي العطا - تعظيم سلام - كيف نوظف الشعر والمعرفة في احداث المزيد من التغييرات في شكل ومحتوى حياتنا - جاء الظلط - كيف نجمل الشارع مثلا - زراعة جير تسوية الجدران من الطالع نازل والمزيرات ومراحات الحمير والنمر الفاضية - الفوضى والقبح في طرق العرض في سوق كريمة الاكشاك البائسة -الاوساخ الملقاة على قارعة الطريق - برندات المحلات العتيقة - ماذا عن صيانتها انها تحف معمارية - عايزين ثورة في هذا الجانب

[عصام سرالختم]

احدى قصائد شاعرنا العطا فى بوست
( حميد يصوط البركل فوق وتحت )
حميد يمقلب العطا وعمر عابدين وحسان تالت ايام عيد الاضحى المبارك

من وصل حميد عندى انا
اصلى زول غبيان معترف
ليا اسبوعين مافى نوم
فى الفرن سهران معتكف
لابودى ولاكت بجيب
اجرى اجارى الجرى ماوقف
الخروف عدمنى القرش
وكتر الشربو ت الصرف
المكادة الزيت الشطوط
بيهن اكبر جيب يتنسف
اصلو تالت العيد ياهو نوم
مافى زول بيحوم او يلف
جانى مقطوع طارى الضهر
زول مقالب وزول محترف
جانى يسال كايس الدقيق
غايتو نشف ريقى النشف
قتلو اهلا بيك انت ضيف
قالى جيب الكييس بس نسف
مانى زيك انا يا عمر
انت طبعا زو ل مختلف
باشمرو ق حالتك تقه
انت زول بيجوك بالو صف
ماسمع فى يوم بالفلس
وماهو حار ن حالك وقف
قولى كيف يوم جاك شحاد
ليهو ماقدر ت الظر ف
فى الرقيص تدفع عشرة صم
وفى سبيل الله فرد الف
المروءة الشيخ ابشخيت
اجرى ياابراهيم شيخى خف
جرو فوق حسان السبح
حتى فى الشحاد بقى ينف
قولو يا ودحاج فى الدويم
وياصهيب الروم فى الجرف
ان نقول زكريا الرقيص
وطار ق المشهور بالختف
مانى فارز زول حتى انا
يا خسار ة الايمان ضعف
الحنين بقى مبرى مقطوع
يا كريم يا الله تلطف
نحن مننا راح الحنين
و ياحليل الحن والولف
لو ننطط نصل السماء
ولو ندق الراس فى السقف
غايتو ما فضلنا وشى
ترضى يا حميد نتكسف؟؟؟؟

رابط البوست :

http://albrkal.com/vb/newreply.php?do=newreply&p=72327

[عصام سرالختم]

العطا يرد على احدى قصائد الاستاذ خالد الباشا قائلا :

عفوا يا الباشا الخالد000لم احظى بعد بالتعرف عليك كما اود00 احس اننا نتعارف
مند اكثر من الف عام00 الشىء الذى يزيح عن كاهلى الاثار المترتبة عن هذيان
سلطان شعرى هذا -00 وكفى

بركلى المعروف من قديم
نورو اضاء القرى والمد ن
بركلى المشهور بالكر م
والخضار والوجه الحسن
شاد قوافل الخير للجميع
الجُمال شايلا ت والسفن
اهلو اهل الجود و الكرم
ناس يلاقوا الناس بالحُضن
بالحباب والوشى منطرح
والعناق الحار السُخن
ناس يلاقوا الضيف بالفطور
ثم بعد الشاى يسقو بن
وكل قاعدة فيها الشواذ
والشواذ الناس تعذرن
ناس عمر عابدين وحسان
مــالو ياخـــــالد فليــكن
قولى زى العطا عاد فى كم
وكم وكم العطا فى اخرن
اصلى لو ولدونى فى ابودوم
اهلى كت عديل انكرن
البيضبحو ياكلو الحمير
ياتو ضيفا يجى قاصدن
اواصلى مانى مكتر عليك
قولى ليك لو تسمعو اذن
نارنا تاكل النار تقرضا
نارنا تدفرو غادى القطن

ويواصل شاعرنا العطا شعر الاخوانيات فى نفس البوست
ويرد على اخونا الشاعر خالد الباشا

ابشر الدرويش اطمئن
مانى ضد ابودوم انا معا
الشمال مملوك ع الشيوع
لينا كلنا ياهو الوعا ء
الصفوف جم جم والكتوف
ياهو حالنا الداعى ان دعا
يانا نحن اساس والاصل
السمات كل زول دارعا
فى سبيلو الروح ال تروح
النفس قربا ن ندفعا
بركلين وابودوم والمقل
فى الحساب واحد مو اربعة
الاشيطان شعرى العنيد
االقصيدة وكت يسمعا
لابيفرز عدو لاصديق
يبقى فاقد الرشد الوعى

[عصام سرالختم]

ويستمر العطا مع خالد الباشا فى شعر الاخوانيات قائلا :

ما تضن ياخالد علي
عندك الدرر الرائعة
افتى قول يا مالك الشعر
فتو ى من مالك نسمعا
بينو انت حلال من حرام
قولنا الفتوى القاطعة
شان نتابع جيهة حلا ل
الحرام جيهتو نقاطعه
بينا تجرى جداول القصيد
اليباس قض مضاجعه
القوافى تقوم فى النفوس
والحصاد يجنى الزارعا
السبيطة تشيل قرقراب
من كترت الشيل فادعه
الهبوب ان جات كل يوم
ماب تحت ضحكة تقطعه
قرقرابنا يزيد كل عام
حق زكاتو دبل ندفعه
نحن زادنا الرضا والقبول
وهو البنملكو من امتعه

[عصام سرالختم]

مواصلة لاخوانيات العطا وخالد الباشا
كتب العطا :

العطا يضم عطنو الى غرفة تسجيلاته

( تحت شعار وافق شن طبقة )

معاك ياخالد برسل قوافل شوقى وسلامى
سلا م يغشاكم جميعا نسابة طارق الحرامى
سلام لى ابودوم بى هناك محل حتقو م القيامى
سلامى يبرد سمومكم عشان الناس تمشى حائمى
سلام يبقالكم نصير ا وسطكم يقعد محامى
يشاكى الخلاء والصقيعة ويقاضى الخور الامامى
عشان متنغرق بيوتكم تلوج فى الخور ديمه عائمى
اقولك انتو اطمئنو ا وواثق انا من كلامى
يجن حميد ماب يجيكم يزيده نقيصه المو تامى ؟؟
يخلى البلد الوهيطى محل الصاج ديمه حامى
يبيت ويقيل معاكم ؟؟ بقيت انا اشك فى كلامى
واصدقو انا مرة مرة يجوز فى عالم درامى

[عصام سرالختم]

// (( عملا بالقول الماثور ان المصائب لاتاتى فرادى ))

بقول لى طارق الحرامى البسر ق الغنم العتايد
البسو ط ويلخبت تملى ويغش ويدبر ويعمل مكائد
كفاك ارتاح مافترت تسو ط لمتين فى المدائد
كتير العطا انت عارفو وكتير مالا ى عارفو خالد
بينا النار ما ب تولع لاننا بينا القصا ئد
على بتنز ل سلاما وعليهو تكو ن برد جامد
دحين يا خونا اهدا وارسى وراك فى طلبة معاهد
وهلالك يعلمبو الله يصرفو يخربو الله شاهد
حليلو زمن ناس كلتشى وعلاء فتاشة ومجاهد
خلاص ماغتستو حجرو بعد ماكان نادى رائد
لعيبتو حفايا وعجائز رواكيب تمشى وتناه
وفاق اسطيف كم غلبكم هو جايب كم جبتو واحد
وسماحة القون البلنتى (( قريبا زيو اب نشاهد))
سمعت انا قالو انسحبتو وسمعنا فلان داك شارد
تشارط كم كم تراهن حيمشى جريدة المشا هد
نحمدو الريحنا ربك نخلى قراية الجرائد
نحمدو الادانا والى نكلمو ا ليكم يساعد
عشان ماتبيعوا الزريبة وتطشو تلفو المساجد

رابط البوست :

http://albrkal.com/vb/newreply.php?do=newreply&p=72897

[عصام سرالختم]

ما تضن ياخالد على عندك الدرر الرائعة
افتى قول يا مالك الشعر فتو ى من مالك نسمعا
بينو انت حلال من حرام قولنا الفتو ى القاطعة
شان نتابع جيهة حلا ل الحرام جيهتو نقاطعه
بينا تجرى جداول القصيد اليبا س قض مضاجعه
القوافى تقوم فى النفو س والحصاد يجنى الزارعا
السبيطة تشيل قرقراب من كترت الشيل فادعه
الهبوب ان جات كل يو م ماب تحت ضحكة تقطعه
قرقرابنا يزيد كل عام حق زكاتو دبل ندفعه
نحن زادنا الرضاء والقبول وهو البنملكو من امتعه
سلام يالعطا وانت عارف .. معزة بركلنا كيف
وبحر حبو الفاض مدفق .. وطمح ماخلالو قيف ...
وتراكا اخوي ماك مقصر .. شتاء الساكنين قالبو صيف ..
قصايدك توجع تفرح .. ومزاجك باقينا كيف ..

..
وسلام يالعطا داير اقولك .. وعارف القول مابزعل
ينط البركل يشابي وكتوف ابودوم مابيحصل ..
زمان ادوكم حجارة وهني المكبوبة الحضارة .. وعلم شقيش ماتقبل
وكرمكم ماييده باااين .. جنيها مهرود يخجل
وصور يوم عيدكم فضيحة وخبر شحادتكم مجلجل..

...

ومصيبة طارق مصيبة .. وشقاوتو تضرو وتبهدل ..
تحرش عطا فينا يكتب !! تحضر ورقو وتسهل ؟؟
ينعل جمبك نسابتك .. ومصبتك وين دار تقبل ..
يضرو ابدوم تاني ليكا .. ويسد ابوابو ويغفل ..

..
اخوي حميد لايهمك .. وتعال بي هني كان معجل
بيوت ابدوم ياها بيتك .. تشيلك وربك يسهل

وتتواصل اخوانيات العطا وخالد الباشا فى نفس البوست
(حميد يصوط البركل فوق وتحت)

المرافعة الختامية عن البركل

عزيزى الخالد سلاما
كلامى انا ليك لا يزعل
ندفن البركل فى حفر ة
ونرايم الحفر ة ونهيل
يطير ابودوم من مطارو
عشر فى الحفرة اب يحصل
تسلو اكان يبقى طالع
تدلى حبالك وتدلد ل
حبال شلتين ماب يكفن
قدر ما تربط وتطو ل
وتفزع فتنة الدبيبة
تقنب كل واحدة تفتل
تجيكن مروى الحنينة
تتلب فى الحفرة تنز ل
تاخد يومين تحنس
تفاو ض وترجا وتامل
تقنع وتمرق عشية
بعد الليل ما يفلل
تقول ابودوم ضمه حارن
وضمه على ابى يقبل
اصر وقال مانى مارق
فى جنب البركل محيل
اخير من هادى الصقيعة
وجور الخور الببهد ل
وبتاتا قال مانى راجع
يكو س فى الياخد ويبدل
عقا ب واطاتو الهناك
وشبر الجرف المفضل
وحالف من عندو يدفع
رسو م تسجيل البسجل
وحق توثيق المحامى
وقرو ش الرقشة التوصل
حيقعد دائما معانا
عليكم تانى اب يقبل
ويمين ابودوم مو براهو
كتيرة بلا د دار تبركل
عشانن كونا لجنة
تحصحص تفرز تعزل
نمسك ال تنفع معانا
ومشاكل التانيات نحلحل
فيهن فى الدار تاجر
تسال لو تلقى منز ل
جلاس من وافقنا ليها
تراها تكبر تهلل

[ضمره بغدادى]

العمده
الله يديك العافيه
متابعين
واصل

[عصام سرالختم]

من بوست الاخ خالد الباشا ( اللجنة العليا لدرء آثار العطا على العطا ) نقتبس بعضا من اخوانيات الشاعر العطا


معركة تحرير خالد الباشا

عزيزى الخالد نصيحة سيبك من ها اللواصى
دحين كيل من مورى اهلك شويى ولو نص طاسى
رووق يا خالد وقنب متل ناس هنى وابقى راسى
تقدل فى ابودوم تخوجل تراحم فتنة تنقاسى
طراوة البركل تجيكه ويجيك العبق الجلاسى
وتكون زيى اخويا خالد ماهو صعب لاهو قاسى
نهارت تفقد نهارك تغيب ما تلقى الاماسى
تصنقر حاس كل ليلك وطول الليل تبقى حاسى
شنو الخاتو هناك خالد وعليك الله شنو الانته داسى
مأمل تصبح نفيدى وليك شركات زى ابرسى
تغشك خالد المدينة وتخش فى لعبة كراسى
تغير اكلك وكلامك وتخلى العطا اخوك حاسى
بانو هو اقلق منامك ويبيت فى بيتك وهو حاسى
ينقنق وينضم براهو وسواتو هو ليك ماهو ناسى
يجوز شان اكلتو ويكى وعمل مخصوص ويكى يابسى
وفطير ما خليتو ليهو ومسكتو مليتو قراصى
وحالتو المره تجرى وتجارى وضاربى دقيقة وهى عايسى
تقلب القراصة تخ كأنها ضربت رصاصى
وتضاير فى البيت ترصرص اعاين القاها راصى
واقعى نفض فى الملايا طريفه النازل تواسى
وتكورك للبت تعالى اجرى تعالى اسى اسى
تعالى انسلى ابقى مارقى امسكى الحوش تانى اكنسى
ابوك قال جاييهو خالد وعليهو هو يسكت يوصى
حلف تركين ما اسوى قال انا عازملى محسى
ولحمة بلا صلصة كرر يجوز ممنوع من الصلصى

خالد الحق رقبتك قبل الاسف التأسى
اخاف لا اسمعبك انت بقيت ابو جيهان ونانسى
وبيتك مافيهو فاطنى ولا على خالتك نفيسى

شنو الزول كان عندو شركة وقروش وكامرى وبكاسى
وشنو الزول كان ماعندو ضمة ويجرى يجارى ويقاسى
هبوبك وطراوة المكيف اخير منها نسمة كارسى
امانى هى عاد ماها حلوة وسمحى حياة القواسى
ونعيمك داك بى سماحتو اخير مالا هو الماسى

وعشان انا ارجع واجيكه تكون بلدى ده شرط اساسى
وان ما جيت ما تلومنى لاننى انا ما بنسى ارثى
طباعى وخصائص اهلنا معايا هى دائما خواصى

يجينى الضيف اسقى موية اخير مالا اديهو بيبسى
ونفرش فى الواطة نفطر مملسة واطاتنا ملسى
ونخلى الكلمة المشاترى ونقولو الكلمة الكويسى
يفوتنى وتلقاهو يحلف يمين العطا فطرنى ونسى

رابط البوست :

http://albrkal.com/vb/showthread.php?t=5985&page=2

........

[عصام سرالختم]

نواصل اخوانيات العطا فى بوست ( درء آثار العطا ) كتب ردا على احدى قصائد الشاعر خالد الباشا قائلا :




عزيزى الخالد عن اذنك ادخل ايدى فى قدرك
منو القالك انا نديدك ومتين العطا قال هو قدرك
معمد بيناتنا سيد ومقدر زول عالى قدرك
قدرنا ان لمانا بيك وكمان لماك بينا قدرك
ونهارت شعرى ابا يشكرك حلفت على انا مايغدرك

انت خالد وباشا وشيخ وعمدة وشويات عليك
انت زول سمح

بحور الشعر انت سيدا وزول سيد حق اصلى مالك
وزمانك انا قتلك افتى وبين وقول افتى مالك
عشان نهتدى للحقيقة ونجنب روحنا المهالك
فى جرف الشعر ان ضرعنا وقسمنا معاك اب نشارك
وفى عشر العشر اللقينا ننده فى الله ال يبارك

[عصام سرالختم]

تداعيات انضمام طارق لى حلف العطا :-


عزيزى الخالد نصيحة اخيرلك بس تبقى مارق
خلاص العطا اطمئنه بعد مابقى جنبو طارق
رماحك تانى اب تصلنا ولا محتاجين ندارق
ومباصرة تانى اب ندوره حتى ان وقدت حرائق
شغل تكتيك تانى بس وبالتمويه ليك نسارق
حكايتك ماراح تطول وكلها كم بس دقائق
نجيبك فو ق المنصة ونشد اعواد المشانق
*** ***
اقولك خالد اقولك دحين يا اخوى مانى فائق
اخلى الاغا بى شخيتو واقعد ارجالى سارق
برايا حسبت وقرطت وكتير عاين فى السوابق
هزيمتى بشرف انتصار ليا واخير من مكسب بى طارق

[عصام سرالختم]

احدى قصائد العطا ردا على قصيدة للشاعر خالد الباشا :


تعال يالعطــــــا وينـــو ضمره
لعل مـــا حردان وحــــــارن
ولعل ما اتلومـــــــــــنا فيهو
حبيبنا وشـــــــــوفنا البعاين
البعدلو مــــــــــزاج البراكلة
البضاير الحتي ويمـــــــــارن
البخيت في السوق هدومــــنا
ويعبي ويمـــــلأ الرتــــــاين
فقدنا قمرنا آعطــــــــــــــانا
ضـــــلام الليـــل ماهو بــاين
اخاف يالعطـــــا وانت اشتر
ولســــــانك ماك ليهو صاين
تكـــون نزلت الســـــــــتاره
وراها يقيف مـــــا بيعــــاين
ومتل ما اتشـــــالقت قـــبلك
وحمــــــيتو يحوم في الجناين

عزيزى الخالد اقولك واحلف ماك زول مدائن
سوالك عن ضمرة وينو ووينو الزول ماهو بائن
يبنقر بى وين هو يظهر صبح مديون ماهو دائن
هناك فى السوق ناسى روحو مع ناس زينب وكسارن
ويافطة خضر الكبيرى وتعال يازول سف وقارن
وحريم الشاى جارطنو وجرن منو الزبائن
نهارت انا اقولك كيفك تراهو مقهى ويعاين
ينقنق وينضم براهو ويقول السوق ماهو امن
اظنو نساها الخياطة وبقى للابرى اب يعاين
وقريبا يا اخوى تشوفو يدق فى الطوب فى الكمائن

[عصام سرالختم]

اقيفو اقيفو آجماعة
اسكتو وخلو الهزار
النكنس بيتنا ونضايرو
النفرشو جاتنا ميسار
طاعمي منقة كسلا وطريي
وفي جبل توتيل الوقار
دي الببق النور من حروفا
الحروفا تولع النار
امشو جيبو الببسي ود كولا
اجرو ناس طارق والصغار
وانت يالعطا اوعك تحوم
بي غباشتك وهذا الحمار
وكلم الآغا كدي اليروق
المحل ماهو محل كبار

ردا على القصيدة اعلاه كتب العطا :

انت ياخالد زول رقيق زول تعصر الرقة اشعار
ومن اميسو حديثك سمح وزول كلامك كلو مسدار
كلمة كلمة تنقى الكلام من سبيطتك تدى الثما ر
همبريبك بارد وسمح وزيف طراوتك يمشى للجار
زول هواك يزيد الهوى لاعجاجة يجيب لاغبار
وان نفختبو نار ماب تقيد وان تولع نار ماها نار
حتى لو ينشاف الحمو ويبقى ماخد لون الحمار
واليمد الايد ماب يحس انو دخل ايدو فى نا ر
واصلو ماب يشعر بالحمو وان شعربو حموك موحار
داير الومك خالد اخوى ومانى طالبك اخوى اعتذا ر
انا قبلت غباشة العطا ومارضيتا غباشة الحما ر
الحمار يا خالد عزيز وعندو عندى مقام واعتبار

[عصام سرالختم]

والله ياضمرة اجرى جرى قلت الحقك قبل ماتصبح الواطة خالد ان جاك بى
قصديتو ياكه المفارقنا . نان باقيلك انا غشيما لمن اديهو الفرصة وانا عارفو زولا
ماب يتلحق
هاك دى وزى ماب يقولو الاولانية اخير من مية وبعد ده الله يستر

شيخى ضمرة الحافظ الكتاب ضمرة شيخى محلك هنا
نقرأ طول الليل فى الصور وفى القرائن والبينة
ليلنا كلو تهجد وقيام شيخى راكع وساجد انا
تأذن الاذان الفجر وبدرى تطلع فى المئذنة
لا بقولك شيلك سلاح لاشغلتلك شغلة عنا
ان بقيت دار تمشى السجن ودار تدق الطوب للبنا
انت فارق العطا والصلاح وبارى خالد واهل الغنا
شيخى نفسك وبينك وبراك اوزن الحالتين قارنه

[عصام سرالختم]

اقتبس لكم احدى قصائد العطا من بوست درء آثار العطا على العطا


مبادرة العطا للسلام

تعال ياخالد نغنى ونغنى الفرح الجميل
نلملم ناسك وناسى ونقنب ديل جنب ديل
خناس وجلاس وناس اسامه وتبقى قاعدة معاهن هديل
وبرضو مانكرم ودكروم وود اخونا واصل الاصيل
واشرف الشرف من بعيد ما بخل بى جهد او حيل
والحبيب درويش وود نصر وشيخنا ضمرة الزول العديل
وحتى للعمرين وابشخيت وماب نخلى الهادى قنديل
ونرجأ لى زكريا البعيد نرجأ لو يوصلنا فليل
وللمعلم طارق نقيف احترام نحفظلو الجميل
وناس بت السكسوك وميسار والمراه الندهت ود بليل
تجرى ام عمار جات تجك جاتنا قاصده سواء السبيل
وايى زول تاوق نشكرو ليهو مننا شكرا جزيل
مانخون بيناتنا زول ومانأشر داك كان عميل
ونبقى فوق ميزانا السنج مافى كفة تميل وتميل
من براميل صندل عطا ايى زول نديهو برميل
ويى ده محلب خالد سبيل منو زى مو داير يشيل
وبينا خالد الحاج يوم يجى يلقى بركلو ضل مو ضليل

[عصام سرالختم]

قصيدة اخر للشاعر العطا على العطا ( مقتبسة )

جيتك راجع حسب الوعد شيخى الاغا
(( موسم هجرة العطا الى اروبا ))
الجزء الاول :

اقولك انا ماشى اروبا اروبا آالاغا مو اروما
مفارق العطا دربو احمر مفارق الدنيا الجهومه
مفارق نكدى وتعاستى وشقاوة ايامى وهمومه
وكيتا لى صاحبى خالد وقراص صالحة وسمومه
اماسى الليل فى فيينا واقول كدى اديها نومه
هناك ياخالد فى زيفه تشمها قدحه وشمومه
واصبح فى المانيا بدرى الفها برلين احومه
نشد حميد مالقيتو بقالى يكون فى عزومه
كريسماس عطا فى فرنسا ورأس السنة امشى روما
معاى ياخالد اليزابث اناقة ورقة ونعومه
سماحة الهناء فوق اليزابث سماحتا سمحى معلومه
هدوما اللابساها فوقه يكونن هن كل هدومه
وشنط الايد الصغيرى مجكنة يورو مردومه
شهر عسلى انا فى الملايو واشوف جاكارتا وتخومه
كمان مدريد امشى ازوره واشاهد البرسا ونجومه
صبحت الليلى انا فى لندن محل الدنيا ملمومه
زرت انا ويلز ومنستر وحضرت الملكة وقدومه
وقاعد فى الهايد بارك قعادا ما منو قومه
طرحت مشاكل الشباب ومآسى الطفل الامومه
واناقش انا فى السياسة وادافع عن الظلومه
وحقوق الشعب العراقى ومصير ابناء العمومه
المدام تنحاز لى اروبا اعاتبه بى رقه الومه
اقولها بلدك اوربا هى كانت تابعه وتمومه
مبارى البقر الامريكى وكتن شنت هجومه
تقصف بغداد تدمر تراثه اثاره وعلومه
مجارى الدم سائلى جارى وناس تتخابط دمومه
واناصر حزب الله آأيد واهاجم انا كل حكومه
فى وطنى العربى المسجم وفى كل دوله انا الومه
قنعنا خلاص مافى فائدى ضمائر مافى معدومه
اذاعات مماهى تصبح تبث فى اوهامه وسمومه
حكومات من يوما ميتة ومن يوم جات تامى يومه

[عصام سرالختم]

وفى رده على الاخ عمراحمد عمر دهب كتب العطا :




حمار العطا صاحبى خالد حمار موفور النفائل
حمارى كمان ماهو هين حمار معروف ود قبائل
اقولك فى الكامرى ديكه طق بى طق لو تبادل
ويمين للعطا لو توسط وتدخل ما تخلى راجل
وتمسك عطا من حريمو قدام وجداد والاوائل
مع الموريتانية ديك ومعاها اليزابث تحاول
وحتى مع المن زمانك مقنبة ساكنة البراكل
يقولن عطا مابيرضى بتاتا تب مابيجامل
حمار العطا ماهو هين وعند العطا ماهوساهل
يساسق يوماتى بيهو ويطلع و مندلى نازل
يقرقر سن سن ويضحك شائل العيش فى الطوائل
مسمى حمارو المكوكب سريع النهمه المو هامل
تملى العطا فيهو يكتب وكتير الغنا فيهو قائل
دحين ياخالد اخيرلك قبل تنساط المسائل
يصلنى الليلى اعتذارك نهارك اليوم يبقى واصل
وتانى حمارى ان وصلتو يمين انا فيك املأ فائل

[عصام سرالختم]

عطانا شنو الببقى قائد عطانا يقود الجيوش !!؟؟؟؟
عطانا بقودو الحمار .. ويسوقو يحش القشوش
وعطانا وكت نار توقد وحاتك بطلع فشوش
عطانا ده زول اروبا وعطانا ده ذاتو حنكوش
وبراك ودنصر هسة تعرف بانك كنت مغشوش




رد العطا على قصيدة خالد الباشا المقتبسة اعلاه بالاتى :




عيون مكفوفه اب تعاين
وحتى ان شافت طشاش
وطحين الزيف مابينفع
يضبطو النمرة ودرا ش
وكلام الجخ ماهو غالى
رخيص مجان بى بلا ش
بعض الناس كيف تحير
تلقى الزول نفسو غاش
براهو هو يكتل رقبتو
ويبكى يفرش الفراش
حسابى معاك تانى خالد
بتطرشو نقدى انت كاش

[عصام سرالختم]

حمــار العطا والا نقلب .. ونقول ياهو عطــا الحمار
منـــو الفيكم ســـــــيد رفيقو بقيت انا ذاتي محـــــتار
وعشــــان الواجب بنكتب وحمارو العـــــالي مقدار
اجيب برسيمي واجيكــــا .. وكداد وعقيلة خــــدار
ادق البن في مراحك وننادي الضان والصُــــــــبار
اقنب في الواطــــه واتبتب .. مدردق ومليان غــبار
اعذب روحي واحنس اريت كان تقــلاني نــــــــــــار
كلامي قبيل كت بونس .. كـــــلامي معاك كان هزار
ختيت انا يالمــافي متلك وخلاس معـــــــليش يالحمار

عزيزى الخالد سلاما يشيلك شوقى اشتياقى
يشيل ويكيل فى المحبة وامانى كتار من بواقى
يتتكنه ليك فى جروفكم ويرمى ويسقى الاناقى
وجداول الريد ليك خالد تسوق منى انا ليك سايقى
هناك فى ابودوم عند اهلكم تسقى الناس ساقى ساقى
دليبكم يندقه يخبت زغاريد قاج صفقة شايقى
كباركم يجوا بى نحاسن جناتكم ست بالطواقى
حريكم كالعاده خالد تجى الفطرات بدرى مارقى
تلاقى العطا وانت باش بشاشة تبين فى التلاقى
وحمير ابودوم من تهونق خلاص معناها انوضائقى
حمارى يكون طب مروى وحميركم مرقت تلاقى

[عصام سرالختم]

لا حولا ولا قولا ...لا عصيت لا نسيت...والشكيي ليبإيداً قويي....ده شنو آ أب شخيت؟؟؟آ ناس الزول ده ما سوا البلاوي كلها فوقي أنا:)...العطا أها الرأي شنو ؟؟تعال شوف صاحبنا كابي الزوغه ليهو زمن ووقتو الظهر شوف المشاكل الجابه لينا...كلو منك إنته آ العطا ماااالك هابشو:cool:أها خم وصُر...الموضوع ده يا العطا يا أخوي دايرلو إجتماع فوق العاده إجتماع طاريْ...وشوف صاحبك خالد الكلام وقعلو صااااقط....غايتو أنا ما بعرفو لكن يا العطا إن ما برأتني من التُهم المنسوبه ليّ دي بيكون عندي راي ...كدي التصبح الواطه ونشوف البلد دي فيها حكومه ولا مافيها.....الله يجازي محنك يا أب شخيت:):):)
حتى فى السهراجة ام سقط
صاحبى خالد اخير البدار
وفوق جروفى بخت النقط
وما بجيك باسما مستعار
وفى تحالفى انا حسب الخطط
ماب ندخل نحن فى النار
لا البنات اللابسات فوط
زى هديل وثريا ميسار
لا الولاد اليلبسوا الكط
لا الحريم لا الناس الكبار
حاشا مابيناتنا القطط
لاتحالفى انا فيهو الصبار
شوف جماعتك يجروا بط بط
الجميع لايذين بالفرار
من ظهر حميد على الخط
نحن جاتنا اسلحة الدمار
والقروش الجات بالشنط
يورو استرلينى دولار
وفى لسانك انت فرط
لما قلت غباشة الحمار
وابشخبت الشيخ انسخط
قال عطا وزكريا سمار
يشربو الشربوت يبقو لط
فى الانادى ويمشو للبار
وشوفو طارق وشوف اللبط
بى قصائدو ويكتب اشعار
وشوف قصديتو اللابسى زط زط
بيها فات الاعشى بشار
حد ما أكل زكريا ولهط
الشجاع البأكل النار
مابيشرب غير الشطط
لا بيلوك لاتوم لا شمار
العميد القائد الرهط
بس معاهو تلاتة انفار
من معاى فى الحلف ارتبط
اضحى عندو مقام واعتبار
وان مشينا على ها النمط
انتو اضحى مصيركم ودار
وتانى بس باقيكم فقط
ترفعوا الايدين بانكسار

[عصام سرالختم]

أنا غايتو برفع ظلامتي ضد العطا لصحاب الفخامة والسمو المفدّى أميرنا (الحمار)..:).
حفظه الله ورعاه....
ونشوفو بيعمل شنو لأنو مابيرضى الظلم لرعاياه..:)..



يا صاحبَ الفخامة والسيادة والجلالة
حمارنا الموسوم بالشجاعة والبسالة
سلامنا عليك في أوائل الرسالة
موضوعنا: إتهامنا "بالسخط" والخبالة
في شرعكم "تبيّنوا"...
(مخافة الإصابة عن جهالة)
فأنتمو القانون والإنصاف والعدالة
لأنّكم من فضله عليكمو تعالي
قد إصطفى أباءكم بأكرم السلالة
والظلم في قضائكم نعدُّه إستحالة
فاسمح لنا من فضلكم نقول في عُجالة:
أن العطا "يسختنا" في أوضح الدَّلالة
وكاد أن يوسمنا بأقذر العمالة
مشوهاً سمعتنا في عَمةٍ وخالة
فقوِّموا اعوجاجه وصلِّحوا الإمالة
ونطلبُ التغريم والتنكيل والإقالة
يا سيدي المبجّل الأمير:
يا سيد السادات في الحمير
يحفظكم إلهنا لعبده الفقير
شخيتكم...
وفائق المودة والتقدير


موسم العودة الى الاغا ابشخيت
لا بساوم الا غا ابشخيت بى غرامة وهو لى يدفعه
ومابطالبو كتابة اعتذار او قصيدة يقوله اسمعه
من زمانك خالد وقبيل لبشخيت صفحات ناصعة
من دخلنا معارك العتود كان معاى الاغا كت معا
ومن زمن موقعة الحمار عاد ديك كانت موقعة
البدأت فى شهر اربعة ولما تم الحول اربعه
صوتو عالى صليل السيوف ومن سنابك الخيل قعقعه
تانى وكتو الجانا حميد البلد ساطه وفرزعه
ان بقيت زليت لسان اللبينا الاغا تقطعه ؟
راضى راضى انا زى مايكون والتقوله االشيخ بتبعه
وايى كلمة يقوله الحمار فوق كراعى رقبتى اسمعه
جيتك اسه االاغا معتذر جايى جارى عطاك ليك سعى
وانت ياخالد تر بعيد شرط اوراقك قطعه
امشى اترد نار بعيد غادى غادى بعيد ولعه
اوعه جنبنا هنى لاتحوم وما تكوسلك هنى منفعة
الحمار حرداان يا ابشخيت ومن عليهو رمى البردعه

[عصام سرالختم]

والله يالآغا إعتذار اكتر من الإعتذارده بيلومني تاني مع حمير ابودوم ...

وكمان هن حمير من شدة غلاوتن وحسب ما ذكر العطا في إحدى قصائده هن لامن ياكلو لحمن ..
خالد اخوى انا حمير ابودوم مابنسى هونيقن وكت حمارى طب فى مروى
تعال يالخالد براك شوف حمارى قال فيك شنو .. ماقصر معاك :


الحمار يا الاغا تانى قال انو شاف خالد فى البلد
جابتو الجمعة من الصباح يوم مع العطا قيل وقعد
الحمار قال لاحظ وشاف لم خالد للعطا قلد
وهوززو الروسين بى رضاء الحمار فى ظنو اعتقد
انو ها الخالد زول براه وزيو زى العطا صح ولد
ومايبارى العطا من طرف كل لماتو شيوخ او عمد
ولملم العطا ما خل زول وحضر الشعراء الفى البلد
وقالو قالو الغنا فى البنات وفى القلوب الميتات كمد
ويمشوا للكاسنجر ويجو ويمرقوها قريب للكرد
وصلوا ناس السر فى القرير وجابو سيرة نورى وسند
والحمار قال خالد ده خلو شان قصيدة ( يوم والبلد )
لا تطلبو تانى اعتذار ولا تصروا يجيبلكم رد
وانا عفيت منو وانا رضيت وانا عفوى ورضاى للابد

[عصام سرالختم]

كتب العطا فى نفس البوست :


حباب كل الوصلنى
وحبا ب كل زول ماشى قرب
كترتو االناس المعاى
بعد ده انا دايرلى مكتب
اسجل حزبى وتحالفى
ويكون هو الحزب المرتب
رئيسنا الفخرى اب شخيتنا
نقييمو ندى اعلى منصب
وامسك زيكو الادارة
ونائبة زكزيكو زينب
واعين ضمرة المجاهد
يجاهد من دون مرتب
وندشن حزبنا نسمى
وكتن قررنا نتحزب
ويشيل اسمو من الحمار
ونسمى الحزب المكوكب
ابشرو االناس المعاى
شغلكم شغلا مكرب
تباشير النصر لاحت
وحات الله النصر قرب

[عصام سرالختم]

كتب العطا قصيد ة (( زينب واخواتها ))




الصلاة على النبى فوق بناتنا بناتنا الصامدات تلكى
يعرفن ضرب الرصاصة وتجييك البت شائله سونكى
فوارس بنوت مهيرة ... حلاته البت فارسة جوكى
وصبر الخنساء الزمانك .. ولا بت تتباكه تبكى
بنات البركل وقريرنا وجلاس والبار موره واركى
ومقل حميد المعايا ... واراك ود سورج اراكى
بناتنا الوقفن معايا ... بناتنا الحسمن معاركى
تجارى البت من اميسه وتنزل فى حلفى راكى
نهارت نتشها كسرى يتردن كل واحدى دوكى
ويضربن من ضو دقيقن يفركن كان درنا ويكى
يقعدن للونسة يحكن .. .. ويحلفن بابوى وابوكى
ولا ويحيدى بتنقنق ... وبينن مافى البتشكى
بناتنا الراسيات اريدن منى الرافعى الحس مكوركى
لباسن توب حشمة ديمة وتوبن فى الموضة(donkey)
راس القائدى اصلو زينب وام منتقى جايى جاكى
وام عمار عامله ندوة .. تشرح فى المدنى مكى
تنصح فيهن يصومن .. وتقول لكل واحدى زكى
امرقن لله حقو .... صباحكن مايبقى حلكى
وهديل البين بين وبينه .. وبينه وبين بينه شاكى
قريبا نديها نحن ... خطاب تعيينه وبى سيركى
وتزامل الاغا فى العيادة ... طبيبة رحمة وملائكى
وختره الماجات معانا نطيره وين هى اصلو لكى

[عصام سرالختم]

واصل العطا ...


صاحبى ودعلى صالح الاغر الخصال سمحات وارثة
شفتو خالد جاك كيفن داقى طارتو وليك حمسه
وزيف التارخ غيرو وكل قصيدتو عليك كرسه
ان نسيت ياخالد وغبيت اوعه تحسب طارق نسى
المعلم كيمياء وعلوم وبرضو ماشاء الله هندسه
ايدو كم اتمدت وتمد ياتو يوما كان حابسه
زول اخو اخوان زول اخول ونيتو لله وخالصه
يدى طارق من الصباح ويدى طارق العصر المساء
اصلو ماشال مرة حال زول ولابيقول للناس حدثه
يمشى من المدرسة البيت ويمشى من بيتو المدرسه
لابيكوس فول او اقاشى ولافى باسطة يحوم كايسه
محترم مشهور ومعروف لاغتاتة ولا بلبصه
حتى يوم اداك القروش كان هو راضى ولا كرفسه
ويوم نكرتها صنه وسكت كلمة واحدة ابا ينبثه
ماشاك ذات مرة لى زول لازعل جاك شائل عصا
ديمه فى ايدو قلم كتاب وهمو كلو هو فى المدرسه
مو غريبة ان جانا بى جاى احتمال ولعل وعسى
منو نتعلم وبالكتير اصلو زول استاذ مدرسه
حصه فى حصة نشيل علم ومنو ناخد الحكم الوصاه


خلو وزن الشعر القصيد الكلام بيدور المجال
ماب نصل والله لى حل لو كتبنا مقال فوق مقال
انت دار تفتحلك دروب دايرة يبقى الزول عندو بال
اليمين ياخالد يمين والشمال ياخالد شمال
الا لمن توقد الحروب والسيوف تنشال والنبال
مرة تلقى شمالك يمين ومرة تلقى يمينك شمال
نحن وانت اخالد الحبيب النقول لله الكمال

[عصام سرالختم]

انشــــاء الله خير قول يالعطاء وانشاء لا كان لابقيت

والدنيــــــا حر والحر شديد ..والنومة شالتني وغبيت

وزي ما تقول كدي بالنهار شفتك معاك جاي ابشخيت

وناس البـــــلد ناس المقل وناس الأراك وناس البخيت

الكرنفـــال والإحتفـــال .. والتاح تراح والظيط وظيط

ووقفت انت مع الحــــــــمار .. وطرق لسانك يالسليط

حيَيت جموع الحاضرين وقطعت بي اللـــفت الشريط

ووقع الهتاف عيك . عيك . سيك سيك .. تيت.. تيت

ورفعت راية الإنتصــــــــــــار والهيلمان.. والظمبريط

وقبال تدقو الصفقة في عـــــرس الحلف.. بنقر صحيت

انشاء الله خير انشاء الله خير وانشاء الله لاكان لابقيت

قالوا اهلنا اخالد قبيل قالوا بالغفلات بجى اللوم
وكون انو يكون العليك من كترتو تشوفو فى النوم
فى منامك ديمة كباس او تنط يوماتى مهجوم
ماخلاص ياخونا انتهيت زول قيامتك عاد دار تقوم
وانت كان ماك ذاتك شقى وانت كان ماك زول شقى وشوم
تشكى تحكى العطا مابينوم ويى ده انت تراك مابتنو م
لانى جنبك لا ليك قريب لا رجع جيت تانى خرطوم
ولاك معانا كمان بى هنا .. المنام ماجاك فى ابودو م
ماتجينا اخونا بى جاى .. دعوة منى وانت معزو م
تبدأ ايوه تبارى الحمير وفى النهاية المبدى متمو م
وان سمعت كلام الحمار واحلالك واحلالك تانى بالنوم
او تشيل شيلتك ان ابيت ... بالنهار بتشوف النجوم

[عصام سرالختم]

نواصل نقل اشعار العطا فى بوست درء اثار العطا على العطا :


وينك يا العديل مالك قطعت الحركة
يازول قوم كفاك ما تبقى زولا لكه
انسله وتعال طير طير اخدلك ركه
قاعد فى بكان عقبة وضعيفة الشبكه
طول ليلك جرى وتلتين نهارك جكه
قوم شيل البلد من ها التلاتل اتفكه
ان درت اليقان تلقى اليقان والبركه
ان شفت التمر تمرك مخمخم وتكه
ان قلت القرين مارق ومارقى ام سمكه
وان كان للقروش هنا بس تشيلك فكه
قاضيات للغرض ومن الخضار تتفكه
الناس فى البلد تسأل وتنشد عنك
وابودوم ياالسمح احسن من الفين شركه

[عصام سرالختم]

بيتين بيتين


ليالي العطا كنت فيها معاي ومعانا المحبة
غمامات حبك ترشرش وحنين شعرك فينا كبة

****

تعال يالعطا تاني راجع ..وراك الخرطوم مضلم
وشجير الجوف ياعطانا بلاك مكرضم مهضلم

****

وحاتك مشتاكا اجيكا سماحتك وطيبة البيوت
ملم الناس الحنان .. وجوها بي شوقا اموت

****

خلاس انا يبقالي النهاية نهاية البوست آعطانا
بعد اعلنت انضمامي وخزلت الناس المعانا

****
حفل توزيع جوائز الاوسكار
1) خالد الباشا
على قدر اهل العزم تأتى العزائم

سمح الحن الينقط ينقع منو البشاشة
وسمح الضحك اليطنبج نفوس بالحن حية عايشة
تكبكب تدى الموده وتسقى وتروى العطاشه
ومادام شيخ وانت عمدة ومعمد بيناتنا باشا
حتى إن جات منى مرة ومنك جات طلقة طائشة
يشيلنا الارث اللبينا واصالة الغبش الغباشه

[عصام سرالختم]

حفل توزبع جوائز الاوسكار
2) لكل زول كان بى هناك او بين بين او بى هنا
وبلا فرز

نهارت قمنا وقعدنا ومن يوم نحن ابتدينا
ولاد الريف الولدنا قلنا نناقر المدينة
ونقول للناس البتطفش تخلى ترابه وحنينا
حياة الزيف ياجماعه تنسى الناس حتى دينا
وحياة الريف يارفاقه .. ولو الزول شافه شينه
حمار الزول او دحيشو ولا الف كورلا او كورينا
وكسرة صاجنا التترتس وعشاء الجنيات اب لبينه
اخير لكل من يعاين ويشوف الشىء الفيها فينا
اخيرلو واخيرلو واخيرلو من التوهان فى المدينة

3) للبلد
وايها زول وبلا فرز :-
انا يابلد
انا فوق مناى اتمنى ليك ديمه السعد
سعدا يعم ييغشى البنات بى عافتن ينزل على جملة رفاقتى ولد ولد

4)
للاغا ابشخبت وللحبيب درويش

( انا فى الشمال اعزكم ابدا واحلم ان الاقيكم بلا جسر يحول ولا عوائق )

[عصام سرالختم]

كتب العطا :
اخوى خالد
بعد جلود باقى كلامنا .. طلع يازول من الحترب كلام يتقال



------
بعد ما الصيف فات وروح وشتانا الجا ء .. جانا بارد
بعد نزلنا المعانا ... وخلاص فضينا المقاعد
حتى الباص زاتو قرش ... وربط صاجاتو المساعد
أعاين .. اشوفلك فى راكب كمان اثتنين ما هو واحد
فى ناس لا بتسمع روادى وأكيد ما بتقرأ الجرائد
فى ناس راكبين الطروره .. ولسه تأيد تساند
سمعت بضانى التمرد وبراك بتشوفو وتشاهد
اذا الصحاف قلنا يقدر ..دحين زكريا بيجاهد
جهادا يختا المطاعم.. تمرد يختا الموائد
عليهو يمين مابيقبل وكمان احلفك ياخالد
----------
وشوف الوقعت علينا كمان بى جاى جانا خالد
حكاية غريبة وعجيبة يحرس ويرجأ وهو قاعد
مأمل دايرلو رقشة عديل الزول جانا قاصد
اقولك .. احسن نقولو خلاص خلينا القصائد
وكمان نديهو النصيحة ونقولو القول اب فوائد
اكان للرقشة أأخونا .. اخيرلك تقع المساجد

[عصام سرالختم]

تقيم الليل كلو تقرا
و في المحراب تبقى عابد
تقع وتقوم في صلاتك
وتدعو شديد وإنت ساجد
تقول: "يا رب يا مهوِّن
عزيز رحمن إنت ماجد"
"تراكا بتعرف حويلتي
وإنت كريم ليكا قاصد"
"بسيب الدنيا العبوسة
وببقى كمان فيها زاهد"
"بدور لي شيتن سِويهلة
وغرضي بسيط ياهو واحد"
"تسخِّر يا رب (عطانا)
ويبقى كريم لي موادد"
"يجيني يقول هاكا رقشة
رقيشة كفاي وإنت شاهد"
عليَّ طلاق بالتلاتة
أكان تلقاها ابقى حاسد :):):)



محل الرقشة آجماعة قريب ياهو داك بى هنوكه
انت عليك بس تفكر ... تخطط تقع البنوكه
رهن البيت ماهو قاسى .. ولو البيت حق ابوكه
وكتابة الشيك ماها حارة.. كأنو الزول طاعنه شوكه
وبعد مو فى قش حمارك .. كلامك يبقى التنوكه
وماشى تعلى المسجل .. وبراكه توصل سلوكه
ومحل الناس تبقى ماشى نهار او ليل بس يجوكه
توصل داك منو تقبض .. وتوصل ده انو اخوكه
مع الرائقين تبقى رائق .. مع التجار انت روكه
تجكس تخطب تعرس .. تتم نص دينك وحلوكه
ونهارت الشيك يبقى حل .. امانى تشوفلك زكوكه

[عصام سرالختم]

انا لا بقع البنوكة ولاني غشيم لاني جاحد
حقي عديل ماهو روكة لا مكلف زول لاني شاحد
اصلو نصيب لي في الجوائز يزيد الدخل ويساعد
سماحة الرقشة آآ رفاقة تخلي الصحاف يجابد
اقوم فوقة اسوي( تنده ) اجيبلها حلة ومساعد
اسوي الصاجات بي صفحة وسقوياً بي صحفة راقد
واباصر اسويلي عظمة زيادي كمان في المقاعد
اب شخيت اديني فرصة اقيف بس لا تبقي حاسد





اسوى شنو انا ياجماعة وحات الله مانى عارف
بعد حددت اتجاهى .. وبعد حددت المواقف
ضرب رصاص تانى مافى ولا ارسال للقذائف
سلام واعلان للمبادىء وتضامن القوى والتكاتف
بعد قررت التوحد .... بعد حليت التحالف
وبعد مو اخبار التمرد تراهو الجيش جانا زاحف
وحاتكم انا ضمة ارجف وبقيت ياناس مانى شايف
هديل وينك قومى اكتبى بيان فى كل الصحائف
عطانا الماشفنا يحلف طلاق بتلاتة اسه حالف
اذا فى الرقشة انا اساوم اكون للمبدأ انا مخالف
واكون انا بعت القضية وكمان تاريخ التحالف
واصلى ان قمت اب اقنب يمين لو رفعوا المصاحف ]

[عصام سرالختم]

كتب ردا للاخت هديل قائلا :
يا أم كلاما ماب يتعقب ..


يا هديل الكلك هديل يا أم كلاما زى الدعاش
كلو نضمك طيب وسمح والكلام ياكده يابلاش
وقولك انتى القول الفصل وياهو ذاتو خلاصة النقاش
من تنادى سلام فى سلام ومافى زول يضربلو رشاش
يوم رفضتى طريق الحرب وحلمك ايى انسان يبقى عاش
لا نشوفو اترتع وقع .. ولا بنسمع انو يوم داش
عمرو كلو فى امن وامان حدو يوم البكى والفراش
يالتعرفى تداوى الجروح وببراعة تلفلفى الشاش
انتى زى ماقلتى بالصح ديمه سائق الرقشة غشاش
واصلو جن فكوه انطلق وهمو كلو يلقط الكاش
لابيراعى ظروف اليتيم لا الكبير البقى فى المعاش
وآ سجمنا ان اصبح وزير وياحليلنا ان ضرب الطناش

[عصام سرالختم]

QUOTE=العطا علي العطا;107885]ود العطا نصيحتك طايرة..:)..
وغلطانين انا واسامة و زكريا السمعنا كلامك وطمعنا في ناس البنوك يدونا رقشة...
أها شوف البقت علينا.:)..
[frame="7 80"]
[color=#8b0000][font=tahoma]
[size=5] صاحبى الاغا مو مصدق اظنو الشيخ دار يكارن
يشيل سلفيتو ويروق وفى الاحوال بقى يقارن
ويلوج فى البنك الزراعى بدل مايمشى التضامن
والمفروض لم يمشى يسوق انسان ليهو ضامن
سياسة بنك التضامن هنا الاجراء دوغرى باين
موظفة او كان موظف ناس يحترموا الزبائن
يدوه الزول حاجة باردة وجريدة ويقعد يعاين
ملفات تدخل وتمرق ولا مديون لا فى دائن
كم توقيع والخزينة ولا ابقار لا جنائن
اخر اليوم يمشى يقبض ويكوس الرقشة ويتامن
ويوم الشيك يبقى حل ادلة قضايا وقرائن
واذا كان زول عندو واسطة ومن وجهاء المدائن
يكون مسجون فى الجنينة وعليهو انا احلف اراهن
لا بيكنس مكاتب .. ولا دق طوب فى الكمائن

[عصام سرالختم]

الجود بالموجود

انت داير الرقشة كيفن قولى بس ياخالد الجود
البنوك ماك دار تقربه وماك داير تمضى العقود
وللجوامع ماك دار تمش وماك داير تبقى معدود
ضمن من سوولن كشف ولقطولو الناس النقو د
وماهو عاجبك رأى العطا وانت قلت الاغا زول حسود
لامعاك زكريا وهديل ولا فى طارق صاحب العتو د
ولا تحالفك فيهو فد زول مافى لاضباط لا جنود
ولامعاك صقور لاحمام وما اظن ليك كتلة ليكود
انت بس دار تركب تسوق بس تخلط الزيت بالوقود
انت طول بالك معاى وخل حبل الصبر ممدود
داير اقولك طلع جواز وامشى سافر خارج الحدود
وانت فى حراج اشتغل ومالو سمسر زى الهنود
يا تجيبلك رقشة وتجى او اقولك اوعك تعود

[عصام سرالختم]

]
خمسة يوم ونتم الشهر ... نحن شلنا الشيلة والشيل
المجابدة من الصباح ........ المداخلة اخر الليل
فيها خضنا بحور الشعر ..وفى مجارى المطره والسيل
لابنطعن زول من قفاه... ولابنقول القول مو عديل
ماحصل دقينا تلفون.... ولابنخاطب زول فى ايميل
كل قصدنا هدفنا السمح.. وياهو هدف البوست الجميل
قرقرابنا يطق سوا سوا.... نحن جملة زميلة او زميل
وايى واحد فيكم اهل ......ومانى داير غيركم بديل
والقصائد تجى فى ايى زول فيها ايه لو جات فى هديل
[/ ]

.............

[عصام سرالختم]

من على الهامش
-----------------
نحن كلنا فى الشوق شرق ..وشوقنا واحد وواحدة المشارق
مالو بينا الزول لو يروق ونحن بينا الزول يبقى رائق
وماكتيرة الزول لو قعد .... بينو بين نفسو خمس دقائق
كان عرف ياخوانا الكتير... وماهو قاسى يعرف الحقائق
نحن بينا اخونا الاخو ..... وفى اخوه الاخو ديمة وائق
نحن مستنداتنا الصدق ..... .....والامان ميثاق الوثائق
وبينا يوم ان حصل الزعل..... ماب تدودى وتوقد الحرائق
لا فى زول فى ايدو شال سيف ..لافى زول بى درقة بيدارق
والقصيدة قدر تشيل .......... ماحصل يوم كانت مطارق
بيها اعزو رفعتو الحمار... بيت فى بيت وصلتو الف طابق
شان ارد الوفاء والجميل ....... مانى مجنون ولانى طالق
وجات هى فى زكريا وهديل ....... وياما ياما وياما طارق
ومرة فى ناس خالد وخالد ..... تمشى تمشى عديل مابتشاقق
حائمة بين الناس من طرف ....بالنهار باليل يوت تساسق
داير اقولك انا منى قول .......... ولاخوه الزول مابتافق
ما تفوت الناس المعاك ........... وماتعود نفسك تفارق
مافى زول يابلو فد زول ,, واصلو من الناس ماهو مارق
وحتى انت ان جيتنا بى جاى ....ماتقول انا فت ومفارق
ان بقيت بى هنا بى هناك .... كلو فى الحالتين ماهو فارق
انت نحن وهم والجميع ....... يبقى بينا الود والعلائق
تانى تصفى تروق الامور .. ويبقى بينا الجو صافى رائق
ويانا كلنا فى الشوق شرق .وشوقنا واحد وواحدة المشارق





......................

[عصام سرالختم]

منو غير الطويرق الممكن تكتب فيهو تساعيتك دي وتمشي تنوم في بيتكم مرتاح البال والضمير...
و بدون ما الزول المقصود يتخذ ضدك موقف خصام ومقاطعة..؟..
وريني....
بالعكس طارق تلقاهو طوالي يخطط يقلب الموقف دا لبرنامج ونسة ومجادعات إخوانية وتقريق وفرفشة....
قلت ليكم الزول دا من ارجل الرجال....

باقيلك ياخوي زكريا ما بلقى لي منو رقشة زي رقشة أخوي خالد الجود.؟..:):):)..
سماحة شيخى انا عن اذنك
داير اتولى المهمة
اقوم بالواجب تجاهك
انت عليك بالاهم
قريتو كلامك فى طارق
قريتو آالشيخ كلمة كلمة
وكلام زكريا الملولو
نهارت قال قولو رم
دحين يا الشيخ ادع ليا
عشان زعلان فوقى حمى
ومغبى انا تب مانى شايف
اعاين كيف فى الضلمه
وكيف يا كيف انت شيخى
وامام بتئم الائمة
يقلب زكريا قولك
يأول ماخل كلمه
ويقول فى طارق حبيبنا
يقول مو زول ضمه ضمه
اقولك يا شيخى اقولك
قريب الزول يومو تمه

[عصام سرالختم]

عوووك يا خالد الباشا :

الحق خالد اخوك .. وياعملاتك عطانا
جماعتى انا دخلو البنوكه وكلامن بقى فى الضمانه
من المفروض يااخى نحن نقول للناس بى امانة
قروش البنك آجماعه ..... تجيب للزول المهانة
بعد ما الزول كان يلعلع وعالى الحس والمكانه
يدندن ماشى ومدنقر وكأنو الما كان معانا
يلوكوا الناس يومى سيرتو .. فلانه تقول لى فلانه
وكبار البلد العجائز وصغار الحلة وبطانا
يقولوا القول فيهو دوغرى وقول يتقال بالعيانه
يقولوا عليهو الحرامى.... وزول بيخون الامانة


......................

[عصام سرالختم]

[ "]
الجخ الفى الفاضى

خلاص ياالخالد كبرنا وقريب يااخوى راح نخرف
أكنك رووق انت مرة .... عشان اشرحلك وتعرف
نقوم نمشى على البنوكه ... ونشيل البنك اليسلف
كتابة الشيك ماها قاسى ... ورهن البيت شن يكلف
نشيل مليارين ونمرق .... نزور القاهرة ونشرف
نروح اسوان ونمشى طابا ....هناك ياخالد نصيف
ونقول كدى نخفس فرنسا ..ونجيبلنا ماكينة ونزيف
ونطبع فى العملة ساكت ......ونبنى الجامع نوقف
ونسوى فريق كورة نحن... ونجيب من بره البهدف
صورنا تكون فى الجرائد ......وندفع زى ماتكلف
وكلامنا يكون دبلوماسى.. متل معليش سورى وآسف
وننفخ فى الفاضى ننضم ونواعد الناس ونحن نحلف
ونكب الزوغة ونطنش.. ولما الناس ينسوا نخلف
نشيل موبايلاتنا زينة .... نهار او ليل ديمه تلصف
ساعة نغماتو تضرب ..... نزحبو غادى ونطرف
وسجل الاسماء اب غتاتة نسجل هدى بأسم يوسف
ويومى نراجع الرسائل... كمان واحدات ليها نحذف
عشان المرأة لو هى شافت .....امانى بتعكر مواقف
امانى المرأة مابتخوف ....وتهرش الواحد ترجف
اذا بالليل جات رسالة .. واذا ما المرسل هو يوسف
تنقنق وتقعد تطنطن ...... و تحمر فيك و تنفنف
يدخل الزول فى ضفورو... وتلقى يزاوغ يلفلف
لانو الموقف ده قاسى ....ولابيشوف زيو موقف
واقولك خالد يا اخوى....... قالو الحج مو مكلف
ونحجز فى طائرة نركب تطيربنا بى فوق ترفرف
وهناك فى الحج مابنتعب... نأجر كل زول مطوف
ويومنا النصل الكرامة .... والانوار قاجى تلصف
تشوف الحوش المنضف ونخت فى الحوش المكيف
ونجيب الموكيت ملون .... نجرجر فيهو ونكفكف
ونحكى نقول للطيابة .... ونحكى نكضب ونحلف
اقولك خالد اقولك .......... اقولك انا داير اوقف
باقى القصة آاخوى ....... غلبنى أتمو وألف
خفت الله يا اخوى .... بقيت يا اخوى كلى ارجف
دحين قوماك ال نصلى ..... وننده يا الله تلطف[ ]

.....................

[عصام سرالختم]

هديل زعيمنا العطا قفلو!!!باقيلك إن مشينا لللأرباب ما بيفكو لينا:confused: قدر ما نصحتو يا هديل يا أختي أبا يسمع الكلام ..قلتلو الصرف البزخي ده علي التحالف بيركبك التونسيه ..أها الحل شنو ؟؟؟ أقولك يا زوله خليهو ياخدلو شهرين تلاته جوه علي الأقل نرتاح من نبيحو شويه:p:p:p:p

هديل اقولك زى ماقال زكريا انا اتقفلت صح صح بس مو بسبب البنوك بسبب
السياسية الداخلية ولكن سرعان ماتم الافراج عنى والاعتذار لى وبى كبايتين
ليمون . مقطوع الطارى القال انا مقفول اتحداه يرد على قصيدتى دى وموضوعه
ويتحدث عن سياستو الداخلية واراهنك بغم مايقوله :

اقولك زكريا اسمع وهاك الانباء السعيدة
اريتك بس تبقى زيى حكايتى بدأت بالجريدة
شويتين مافى المسلسل وبداية الحلقة الجديدة
وحكاية الكتب الزمانك خلاص خليته انا بعيدة
وجاء الموبايل الخرابة وجاب البدع الجديدة
صور بالفيديو ومقاطع ورسائل الشوق الشديدة
تملى المرأة بس تنقنق وحياتك كدى اب تريده
تدورلك بس ما تشاهد خلاف الكورة المفيدة
واصلو اللابتوب عدوها عداوة براها وفريدة
---------
عمدا تخرب مزاجك وكت تقعد للقصيدة
وتقولك دايرين مكادة وشوية الرجلة انت زيدة
وكمان العيش مابيكفى وراك ترسل وليده
يقولك يابا امى قالت بس يا انا يا الجريدة
واذا اللابتوب ماختانا حياته معاك ماب تزيدة
ولبست كدى توبه مرقت وياها المرقة البعيدة
وتراهو ابوك مو مقصر فلانه تريدو ويريده
ومخير لو دار يعرس بخيته عليهو وسعيدة
واصلى البيت مابفوتو افوتو انا كيف للجديدة
وامانى هى عاد مابتعرف وتضوق المغسة الشديدة
---------
مخمخم انا كل حاجة وكمان القالوها ازيده
وصلتى انا جات هى تجرى وتشيل الفى ايدى فى ايده
وتقول للشفع اسكتو ابوكم يأخد غميدة
وتسوط الليمون تجيبو وتقدمو بكل ريدة
وتملا الكباية ليا وكمان تحلف تانى ازيدة
وتقولى انا ما كان فى داعى اقوم واخلى القصيدة
وتجيب اللابتوب تختو وتخت بى جنبو الجريدة
ويمين نحن قلبنا ميت بعد ده الواحد يريده
حريم اوهامن كتيرة وكمان روسيهن عنيدة
شمارك زكريا زيى وكمان زى بعض المديدة

[عصام سرالختم]

"]وحات الله ياعطــــــــانا بخاف الزمن اليفرق

وبخاف الدرب اللجابنا يضيق بالحب مابيمرق

اقولك قول ياعطــــــانا .. اقولك قول ما بتصدق

انوم واحلم بالجماعة وقصايدك في الجـــو تحلق

ويسيل الحب في البراكــل .. يفيضبنا لامن يغرق

اخاف من هذي السعادي وايادي الدنيـــا التعوق

وكتير اشـــواق التلاقي تقلب فيني وتحــــــــرق

اشيل اليل في المــــــداين واقرب مــــرات ارقرق

تنوم الدنيا آبنوم .. اعـــاين في الشاشـــة ابحلق

انقنق مــــرات برايـــا وبرايــــــا اغني واصفق

اســــــالم في الناس واقالد .. احرم مرات واطلق

سماحتو البركـــــل محنة محل ما الطيبين تبتق

وشموع الأمـــــل المضوي .. قوي كمـان ما بتبقبق

قلوب ملياني آعطــــــــــانا ومستفة لامن تطقطق


زيك خالد تماما .. حليلو النوم طار ومافى
وقدر ما احكى واقولك اشوف القول ما هو كافى
انمق فى قولى ليك ... وعصير القول القوافى
تجى الكلمات طائعة تقدل احس الشوق فيها دافى
يكبن فى الريد معتق ........ يقصر بينا الفيافى
ويدلقن مطر المودة.. وحن الحن يجرى صافى
وحليب الود المقنن .. يسند الحيل يملآ عافى
واقدل فى ابودوم اطوفكم واكتر سعيى وطوافى
هناك اكون مانى يانى .. وحاتك انا زول خلافى
وهادى النفس التفتش تكوس فى العشق الخرافى
خلاص لمت فيهو فيكم .... بعد قنعت انو مافى
يطير النوم وين تسلو .. عيون شايفات التصافى

[/ ]

[عصام سرالختم]

سنة اولى سجن
المدردح وكان رأس هوس .. ومن نهارت عرس عقل
ومن هو دابو انسجن الشهر .... المسمى هو شهر العسل
ومن نهارت سافر طبق .......ومن اميسو ويومو النزل
قلنا يامكتوب عن فقير ....... ويا كمان ممسوك بى عمل
لاب نشوفو يمشى رحلات ......ولا بيمشى العصر الجبل
ماحصل يوم شالو تلفون..... ومابيشوف غير المسلسل
ومابيهمو أكان ما شرب ....ومو ضرورى ان كان ما اكل
وآمغستو ان مرة فى يوم ....والله قال بى قولو ان حصل
يوم لقوهو يبصبص بعيد ....حتى لو بصبيص مو غزل
او حصل مدالو يوم ايد....... او سلام لى بت مو اهل
او هو شال للبكاء يوم فطور... وآمغستو ان حصل البدل
مرة لى سرويس او طبق...... داك عاد مو يوم الشكل
ديمة تلقى يرشرش الحوش..... وماهو باين فوقو الزعل
وتلقى لام العده فى الحوض....... الكبابى كتار والحلل
وباقى ليهو ينضف الفول...... وتانى بس قطيع البصل
ثم دابو هو يلبس يفوت .....تلقى جارى كمان بى عجل
الغريبة هناك فى الشغل....... ياهو اكتر زول فى العمل
زول مهاب وكلامو مسموع وياهو كل فى الكل فى المحل



.......................

[عصام سرالختم]

[ "]


من صغير ودوبو يادوب تلقى وسط اخوانو الصغار
المسوى النقه بس هو ......... و الهو دائما يبدأ النقار
وكا ن مغلغل دائما ابو..... وديمه حاشر امو فى غار
يومى تنبح فيهو..... وتقول بس اريتو اكان مرق طار
وكان ولادة الناس متل ده ...... كان اريتن يبقوا عقار
لابيحش القش للغنم .......... ولا بيقرب جنب الحمار
همو طول اليوم فى الضحك بس مزازى الناس بالهظار
لما خل الناس على شك .......... انو زولا بلعب قمار
وفيهن القال عنو عربيد ...... من تمغرب يمشى للبار
يشكو منو الناس فى البلد..... وذات وذات بالذات الكبار
من بنات العالى مكروه .... وعن بنات الروضه سحار
وكل جميع الناس فى البلد ..... الغريب والغاشى والمار
عرفو ساكن جنب العمود....... مايزح من جنبو امتار
فى ايديهو تملى الخلال....... شايلو طول الليل والنهار
الغريبة يحب الشعر ........ وفى اعتقادو بيكتب اشعار
عندو راقد رز الغنا ............. والقصائد راقدات كتار
مرة فى ناس سيدة وسعاد... ومرة فى ناس منى وانتصار
وايى زول بس فيهو محتار..... والفريبة هو فينا محتار

[/ ]

....................

[عصام سرالختم]

كتب العطا ردا على احدى قصائد اب شخيت :

البراءة آالاغا ابشخيت عنى ليك جات فى اقتباس
وشوفو قال الخالد شنو قال عيونى محاربى النعاس
وقال وقال العطا ود اصول عيبو طول الليل تلقى حاس
والكلام ده آشيخى معناه انى زى ما شفت حساس
ومو مبارى الاكل اللهط .. وحاشا يوم ما قالو رقاص
ويا ابشخيت الزول بيتعرف اليغسل ويومى كناس

واليضائر البيت الصباح واليرص وفى العدة رصاص
تأبى نفسو تدور الاكل ..حتى لو كان هو القعد عاس
مافى ايى نفس للاكل ..واشريرى واحليلو مكتم انفاس
زول تملى يدور المروق... ويوم يلم فى مرقة خفاس
يوم داك عاد وآمناهو ........... يبقى اكال لما لحاس
وكلما يشبع يرقص كتير وكل مايرقص يبقى رقاص
ــــــــــــــــــــــــــــــــــــــــــــــــــ ــــ

[علي ود بت الكاتب]

حلبنة الكلمات
(( صدقة فى الذكرى الأربعين لحلبنة الطريف ))


جاءنى هاجس فى خاطرى طاف
قت هادى الإيد أربطـه
واتنى خيط الربط المتين
يبقى رابطنى ورابطه
وكتن أصلاً أنا زول مو يا
كون إنى بديت الخطأ
وكل شئ مسيوط سطو أنا
وفى النهاية أنا السايطه
خوة بين إخوان من زمان
عشرة جيرة الدم خالطه
معركة تحرير من وهم
صح وهم تعديل خارطه
منى كان مقبول الكلام
لمّ كان فوق توب الغطاء
ياحليلى ألوج فى الشمس
واشريرى الضل ما أطا
ومنو أمشى بعيد أبشخيت
ومن شخوتو الكان شاخته
اجرى يا ابراهيم شيخى أنا
يى دى حالتى تعال حوطه
بارى يا زكريا الحروف
إن نسيت أنا نقطه أنقطه
وين محل مفتوقه أرقعه
يا أخوى يعقوب خيطه
قومو اسندو معاى الحيط
وبرضو أقيفو معاى نبلطه
هيلاهوب إيديكن معاى
نقلب المقلوب بالخطأ
شن يفيد الصقر إن وقع
فى البتابيت والبلبطه
الله ربى يجازى الحلب
وكل حكومات البلعطة
كل دجال رافع شعار
كل منافق شال يافطه
أىّ بدعه مصيره السقوط
فى النهاية تكون ساقطه
وأىّ طائرة تطير بالكضب
لو صبرنا تقع هابطه
جيت أكوس للناس فى الضحك
نيتى كل الخلق أبسطه
جم تعاستا أخت السرور
فوق سروره أزيده أغبطه
أىّ كلمة تكون بانطلاق
مانى قايل الناس تقرطه
وأىّ خطوه مشيت دون قيود
كان من المفروض أضبطه
هسه داير أفك الرباط
داير أفك إيدى الرابطه
بيها ألملم كل ورقى داك
أىّ ورقة ألقاها أشرطه
تانى شان إتفشه ارتاح
بى كراعى ادوسه أخبطه
بيها إيدى أجر الشخيط
ألف شخطه وشخطه أشخطه
يا ترى الغلطان كت أنا
أم هو كان سوء فهم العطا
للسلام الجاء وما وصل
لسه بين الناس ما وطأ
برضو للبترول المرق
وما لقى السواق نافطه
أو للقالو الصاح دوغرى صاح
ماهو قول إعلام وأشرطه
القبيل اختارو القبور
شان وراهم نلقى واطه
فيها تصديق جامع طلع
جم كنيسه القس خططه
للبعرفو الله عرفه صاح
ماها عرفه جور سلبطه
أو اللفى إيدو شريحة البلد
شال قروشنا وما نشّطه
أم هو فارس الشعر العنيد
لمّ شد جوادو امتطى
ثورة مو ضد سارق العتود
ضد على الحرمات يوم سطا
يا ترى الغلطان فينا مين
ويا ترى وين كان الخطأ

العطا على العطا
البركل ـ 22رمضان

شكرا عصام على التوثيق الرائع لدرر الشاعر العطا
قصائد العطا مفروض ان تكتب بمداد من ذهب
وتعلق في كل منزل ......... وفي كل نخلة
لانها مغروسة في وجدان كل من استمع لها
نتمنى لشاعرنا دوام الصحة
وانت ياعصام ابد ا ما قصرت

[عصام سرالختم]

كتب القصيدة التالية ردا على مشاركة الاخت بت النيلين فى بوست ( درء اثار العطا على العطا )

["]

بيكى مرحب واهلا حباب ونحن لينا عظيم الشرف
وياكى بت العم اللزم ..وماكى زى الناس من طرف
ونحن كل الفينا معروف ..جبنا نحن وما كان صدف
ونحن ناس بيناتنا التمر... والجريد واشميق والسعف
داير اقولك قول اسمعى ....وليك قسم بالله وحلف
قدر ما باصرت جاى جاى ...... قلت الا افتحلك ملف
الصفوف فجيتن جميع ..... ليكى ما خليت ولا صف
اصلها الرقشات مابتفيد ..ما خلاص ترخيصن وقف
والبنوك مابتنفع معاك ....ماكى دايره حكاية السلف
والسياسة اظنو الزعيم .... استقال خلاها اعتكف
باقى ليكى النقة النقار ....وياها ذاته دى اخر ملف
ويانا عبر النقة النقار ....دار نعرف الما اتعرف
وكل زول باليقدر عليهو ...مافى داعى كتير للكلف
بى قصيدة أكان بتعليق ....نحن كل قصدنا الهدف
تبقى بين الناس اللمه . ومافى زول مع اخوه اختلف
وتانى مرحب واهلا حباب...وتانى لينا عظيم الشرف[/ ]

[عصام سرالختم]

المر .. البعد الحلومر
ياهن العيدين من زمان فيهن الاسواق تنتعش
ياهو عيد رمضان والخبيز والهدوم الماب تتهبش
نقة البوبار الكتير ..... حجة الموكيت والفرش
وفى البيوت يتعالى النقار عالى لما الحس يتقرش
الحريم دايرات كل شىء والمهم بس قولن يمش
وفى الرجال البسمع سمع وبعض فيهن من يتهرش
وبرضو فيهن من بين بين ونحمد الله كمان فى الحمش
مابيهمو ان كتر النقار تلقى يسمع وعامل طرش
اما عيد الاضحى الكبير البضحى يكون زول قرش
وفى البيأخد التيس والعبور وفى البشوفو شويى الكبش
والزريبة تفرز الرجال ... وفيها كم صنديد يرتعش
والقيامة تقوم فى الجيوب والقروش فى الجيب تنطقش
وفينا من بيودى ويجيب وفى المسهى مقرب يطش
غايتو صح صح اعوج عديل فى النهاية نجيب الكبش
والفطور والشية ام شطوط ونشرب الشربوت ننتعش
ونحن من الدين كيف بعاد غايتو ماشى الحال غش فى غش

.......................................

[التهامى كروم]

اشعار العطا علي العطا في بوست
( نحمد الله الجودو موجود وما تكلنا علي جنا الجود )
وذلك بعد ان لم يقم عضو المنتدي خالد الجود بزيارته
هو وصديقة شريف محجوب وكان سبب في عدم حضورهم
للرحلة الاولي للمنتدي.


المتور نفسك شنو واوع اخوى لاتبقى مورود
وارمو حبل العشم الشريف وفى رميك ماتخلى مشدود
كان قى خير يا اخوى فى المدن كان زمان سكنوها الجدود
ياهو حال الناس فى المدن وطبع ناس المدن الصدود
واحمد الله الودلوك هنا وما اتولد فى العاصمة مولود

وماها قاسى مشية الصعيد وماها دايرى كروت الصعود
وماها قاسى الرحلة الشريف وماهو قاسى نجيب العتود
وماهو قاسى الضل يا الشريف مرمى ماهل ضل التمود
غايتو اوصيك صدق ابليس ماتصدق خالد الجود

[التهامى كروم]

وهنا بعد ان شاراك عوض جلاس في البوست


بى روائع النضم السمح جانا سمح القول من جلاس
الصدى المعطون بالصدى والسجع مقرون فى الجناس
وياها عادة ناس البلد وسر سماحنا الحافظو التراث
ناس يربو حمائم السلام وناس يقولو القول بى مقاس
وانت قولك صح يالعوض الا بعض الناس ماها ناس
من لسانو الزول يتقبض وياهو شرط القول فى الاساس
فينا خالد الجود ما انستر لا خبرنا الزول ليهو كاس
ولو كتبت انا مليون قصيد ولو مليت انا الف كراس
مابقول للشعر انت اقيف جبت حقك بالقول خلاص
واصلو كان لى صاحبى الشريف منو طار النوم والنعاس
صايدة حمى الزعل الشديد حتى طائرى الحمى فى الراس

[التهامى كروم]

مواصلة المساجلات مع عوض جلاس

يالعوض معروف انت شيخ وعالى قدرك انا عندى خاص
وعالى عندىمقام الاراك وكل شىء ولا البرصة وجلاس
ومابنقلب القول ليك يوم ومابنكتب ان قت خلاص
وان نهرتنا ليك نتنهر ولو ننقنق نبقى مو ناس
ويبقى فينا خسارة التعب وماحفظنا اصول التراث
ياشريف يا اخوى اهدا روق ويااخوى ماتركب الراس
خلو خالد خترو ان حرن وماتحوم فوق دربو قصاص
ان بلعت الريق مابتموت ومافى حلقا شقه اليباس
وان بقيت مشتهى للصعيد فى البلد مليون الف باص
فى البجيك بى فتنه بى فوق وفى البيندله يجيك خاص
وكلهن كم ساعة وتصل ومتل اكنك راكب افراس

[التهامى كروم]

بعد دخول طارق علي صالح البوست شاكراً لود الجود


نحن برضنا ناس كرم وجود ورضعونا اهلنا الكرم
ومن اميسنا الجود فينا فى وفينا عند اللقا والعدم
ان قدرنا بنتكى الخروف وان عدمنا نحلب الغنم
ونحن ناسا قدر الكلام للصغير فينا ان نضم
ويوم نوينا نجيكم هناك نحن كان فى البال والعشم
التعارف وسط الصحاب يوم يلم الناس الملم
والكلام ياطارق عتاب والعتاب ياطارق مو ذم

[التهامى كروم]

رداً علي خالد الجود الذي قال بان ذعل
العطا والشريف هو عدم حضورهم لوجبة
الرحلة الدسمة ( المندي )


المروة عوض ود جلاس الحق الكترابه الكتل
والحكاية بقت مو سفر وصلت الارزاق والاكل
ونحن اخر الدور يالعوض قالوا فينا حكينا النمل
ودروه الماضى القبيل وعز سبيطنا الشايلو الشتل
ومتل اكنو الفول ماهو فى ومتل اكنو الفول هنا كمل
شوفو خالد بقى يحكى كيف وفى الحكاوى كمان متمهل
قولو شفت الجوع فينا وين واليقولك فى يات محل
والكلام ان وصل البطون تانى قاسى القول يتعدل
بينا بينو اخير ياالعوض بس نسد الباب يتقفل
وقاسى تانى نروح للصعيد منو نحن قلعنا الرجل
نحن اخيرلنا نقعد هنا جم غنمنا ووسط الزبل
نرمى قش الغنم الصباح يلقى لبنو الشافع الطفل
ولو صرمنا نشد الحزام ولى بطونا نكرب الحبل
والاكل فىالخاطرسمح وعندنا احسن نوع فى الأكل
ونحمد الله ان قسا ان سهل وكل من الله يتقبل

[التهامى كروم]

رد العطا علي خالد الجود بعد اتهمه بأن سبب
ذعله هو وودالسندس هو تفويتهم للطيبات من الاكل

الشرافة هى موهيلنا شىء وماب يغرنا اكلا سمح
وبرتكانك وباسطة هناك نحن عندنا زى الملح
نحمدالله ادانا الجداد فوق صفار البيض فيهو مح
والفطيربالروب الحلو وفوق سماحتو سماحة القمح
ومن قلية البصلة اب نتر فيها نأكل ونقعد نزح
وتسمع الدق دق الصباح فندك الويكى نبح نبح
لابيكمل فينا اليقان والقبول والرضاء ماب يشح
ومن جرارة الموية الكبار ان شربنا شراب بالنتح
وشاينا حرجلو يغلى ويفورومافى راسا موجوع يوح
لاطفشنا وراهو الاكل لا انطقشنا وراهو الربح
يا التبيعو الاخو بالقرش ده المرضكم وزايد اللفح
الحوادث كترت كتير وناس مكسرة يا دوب تزح
عم كل المدن الورم واصبح السرطان فيها صح
وفيها فيها وفيها الكتير ومابيدور توضيح او شرح

[التهامى كروم]

محاولة العطا لتطيب النفوس والاعتذار لخالد الجود ومن معه


صاحبى خالد الجود السمح وصاحبى خالد الباشا اب شنب
بيضاء بيضاء النية ارفاق وفى بياضه النية كالشب
والكلام لو بقى فضة يوم السكات بيكون من دهب
والقوافى قدر ماتشيل شيل سبيطه العجو والرطب
والموقع تحت السبيط ماب نعدو مكرمش وكعب
وياهو حال الدنيا ام قدود مدت الله طوال الحقب
عاشوا فيها الناس العوام وعاشوا فيها السادة النخب
والبيأكلو التمر الهرود والبيأكلو التين والعنب
والمشوكش فى كل يوم والموفقو الله وخطب
والبعرس فى كل سنة واليلاقى الله زول عزب
وفيها فيهاالزول وحدو زى مافيها الحسب النسب

والله يهدى الناس اجمعين ويلعن الشيطان السبب
لا نقول القول المو يا ولا نقول القول الكعب
فى النهاية واخر المطاف كلهم ماشين للترب
واهلى اهل ابودوم الملوك وناس حزيمة شيوخ العرب
خلفوا التاريخ السمح بيهو تشهد كورتى وصنب
نحن بس لازمنا اعتذار حد منانا وعز الطلب

[التهامى كروم]

محاولات العطا لاقناع رفيقة ود السندس للجلوس لطاولة
الحوار وعقد اتفاقية صلح


شريف محجوب السمح شفيق ياراجل شفيق
ارخو حبل المهلة آاخوى واتمهل ياخوى لاتضيق
فى الزراعة زراعة المطر وبرضو فيها زراعة الحريق
وكل موسم بى عينتو بس وعينه غير موسمه ماب تليق
وان زرعنا القمح السمح ياهو نحصد سمح الدقيق
وان مشينا اخير ياشريف نحن نسلك احسن طريق
اليوصل دائما سريع واليوطد صلة الصديق
ياهو نرجا الناس تعتذر وان ابولنا كمان انت ريق
حقى حقك تب مابيروح ومافى شيتا يازول يعيق

[عصام سرالختم]

جائزة قيمة لم ياتينا بالشاعر العطا على العطا
وينك يا العطا .. لعلك طيب