عوده ... نص بمناسبة العوده

[محمد الامين]

أحبتى ... وها نحـــن نعود تسبقنا الخطاوى كى تعانق هذا المكان الحنين وليعلم الجميع بأننا باقون هنا فهذه أرضنا وما يجمعنا أقوى من أن تعبث به الأيادى الاثمه ... لكم أحبتى أهدى هذا النص ... وعوداً جميلاً .
أحلام الرجعه

كلما الخطوة تباعد منك
تكبر فينا أحلام الرجعة
ونرجع تانى نفتِّش عنَّـك
ونَبْرَى خُطانا الحولك تسعى
نسقى غنانا مقاطع حِنَّك
ونملا بيك أيامك روعة
فاكر أظِنّك ......
ماضى هوانا سنين اللوعة
يوم ماكنا نقدِّس حُسنك
ولى عينيك نسابق الشوق
وبدون ما نوعى ..
يبقى النَفَس الطالع منك
لى أحلامنا كأنُّو شهيق
نحلم بيك وندارى الوجعة
ومن أحلامك نابَى نفيق
نَــدِّى أقدامنا احساس الشمعة
لو فى العتمة نلاقى طريق
نبدا عليك دريب الرجعة
وبين ايديك الدنيا تروق
يوم نلقاك تسيل الدمعة
ويصدح جوفنا الكان محروق
يا مسكون بى عشق عنيد
فينى غرامك وين حيحوق
وأنا فى دربك لسة وليد
دابو يتاتى فى أول ريد
وضى عينيك اللسَّة بعيد
فى الأحلام يبقالو شروق
فى
الاحلام
يبقالو
شِـــــــــــــروق
............

محمد الامين - دبــــى

[kabalo]

تسلم يارائع كلامك سمح بلحيل اخوي محمد الامين انت ما حصل جيت نادي الطنمبور في النادي السوداني ابوظبي وهو كل يوم خميس
لك حبي وتقديري

[محمد الامين]

تسلم يارائع كلامك سمح بلحيل اخوي محمد الامين انت ما حصل جيت نادي الطنمبور في النادي السوداني ابوظبي وهو كل يوم خميس
لك حبي وتقديري


العزيز ... كبلو
شكرا على الكلمات الرقيقه

أنا على اتصال دائم بالأخ منتصر الحاج شرشاب وكم مره حاولت الحضور ولكننى لم أتمكن ..
اليوم انشاء الله سأحاول بقدر المستطاع الحضور لأبوظبى حتى نلتقيكم ونتعرف عليكم
تحياتى لجميع الأحباب بأبوظبى ...

[kabalo]

تسلم يازوووق وراجنك ان شاء الله لنا لقاء وحتي لو جيناك انا ومنتصر في دبي لانك فعلا تستحق ان يتم التعارف بك اخ عزيز
لك حبي وتقديري

[حميد]

يبقى النَفَس الطالع منك
لى أحلامنا كأنُّو شهيق

ابداع حرفك يزهل يا ود الامين..
ولا زفير بعد هذا المقطع..

تسلم يا غالي..

[عوض جلاس]

الأخ محمد الأمين دائماً ما تغيب وتجيب ومشكور على هذه الروعة التي تنسمنا منها عبق وعبير الرجعة وإنشاء الله تكون رجعتك زي الأول واكثر ونتمنى أن ترجع بنا إلى التوثيق للمبدع محمد أحمد الحبيب ولا تفتر همتك بعد المجهود الكبير الذي بذلته سابقاً وسوف نكون معك ونمدك بالكثير من اشعار الشاعر المبدع الحبيب فسير بنا غلى إبداعاته ونحن من خلفك

[الهادي قنديل]

ودالامين
كلما الخطوة تباعد منك
تكبر فينا أحلام الرجعة
ونرجع تانى نفتِّش عنَّـك
ياخي انت من الروعه اروع

[النافعابى]

مافى زود
حلو الكلام من الرايعين ياود اخوى

[ضمره بغدادى]

محمد الامين
قمة فى الابداع

بس عندى طلب صغوووووير قولى اها
جيبلنا ازهرى الحاج وفتشلنا بلدو وين وقولو ضمره يسلم عليك كتييييييير . باقى صاحبى من زماااااااااان

[الخزين ود نصر]

أصبح لزاما على الجمال الذى سكنت فيه يا صديقى أن يبادلك الحب عرفانا ..

ود نصر

[محمد الامين]

ابداع حرفك يزهل يا ود الامين..
ولا زفير بعد هذا المقطع..

تسلم يا غالي..

الغالــــى .. حميد
بركه بالعوده
وبالتأكيد وجودك هنا يجعلنا نبدو أكثر وسامه
شكرا لحضورك الجميل

تحياتى

[Adil Assoom]

Up 2 see the keen face:)

[المرهف]

ويبقي النفس الطالع منك
لي أنفاسنا كأنو شهيق

حمدالله ألف علي السلامة سألنا عليك محل ماكان السؤال متاح في بويست قرض ولا حياة لمن تنادي ...
ويا حلاة عودتك وأنت تحمل معك أريج العودة الهادي قنديل الذي طال غيابه أيضاً ...

مودتي ،،،،،،،،

[علي محمد سند]

محمد الأمين ،، عليك الله غيب (كل يوم ) وتعال بي نص ،،

[طيبان]

حبابك...
(يمين ما أزيدك كلمة واحدي...)

[طيبان]

كنا وكنا ياما عزاز
ولحظات التلاقي لذاذ
____________

(حميد)

[طيبان]

زمن ياخير......
ورا طرف الحقاب كان روض

[محمد الامين]

كنا وكنا ياما عزاز
ولحظات التلاقي لذاذ
____________

(حميد)

صاحبى .... د . طيبان
كيفنك يا غالى

أولا انتو لسه عزاز ولليلى ولى باكر ...
ولحظات التلاقى والله مانعنى منها الشديد القوى ...
طبعا عارفك ما حتصدق انى مشغول شدييييييييييييييد .

لكن والله قريب منكم ويوماتى معاكم

وربنا يقدرنى وما أغيب

لك التحيه يارائع

تحياتى ....

[طيبان]

صاحبى .... د . طيبان
كيفنك يا غالى

أولا انتو لسه عزاز ولليلى ولى باكر ...
ولحظات التلاقى والله مانعنى منها الشديد القوى ...
طبعا عارفك ما حتصدق انى مشغول شدييييييييييييييد .

لكن والله قريب منكم ويوماتى معاكم

وربنا يقدرنى وما أغيب

لك التحيه يارائع

تحياتى ....
_________

أهيلييييييين يا صاحبي..:p
الغريبة مصدقك ..رغم لدغاتك الكتااااااااار....
ان شا الله دايما طيب انت..
راجينك تب ..
ومانا مستعجلين...
_____
حبابك...في الدار