ديوان عاشا بت سيداحمد ود الحسن ودهندي

[عثمان الحليبي]

ابتديت بالقادر ربنا الرحمن

[

*****

إبتديت بالقادر ربنا الرحمن
ربنا الناظر الخالق الانيس والجان
الحي القادر الما راهو انسان
يحفظ الشابات ويحفظ الشبان
ويهدي الشايبات ويهدي للشيبان
ينزل التوفيق ويطهر الابدان
يتركوا الفاني ويعبدو الرحمن
نحمد القادر ربنا الرحمن
النجحهم وسواهم نبات احسان
فوقم اية الكرسي والحمد والفرقان
تبوا يا شبان كلم شجعان
شرفوا التاريخ وكرموا البلدان
ووجدوا التوفير للضمي العطشان
وافتحوا الديوان واكرموا الضيفان
نعمة يا تاريخ البينشر الشجعان
ناس عكود الشيخ وهندي في القيزان
كانوا اهل الجود والعجب فرسان
وفي القرير الغالي كانوا اعز مكان
القرير معروف اخير الاطيان
فيك جناين مدني وزهرة البستان
وفيك ولاد سوار ود دغور وخمجان
رمز درقة وسيف في الحرب شجعان
في شمالك اوسلي دوحة الاوطان
ام شتيلا شايل ومروي في الحيضان
فوقة صوت القمري يطرب الغضبان
ولدو فيها مهيرة فارسة الميدان
وولاد عبود بهجة السودان
الفي مداخل كورتي ولعوا النيران
بالدم العباسي سجلوا العنوان
قولي للشايقية الكلهم فرسان
مافيهم الخواف البقولوا جبان
لبسوا توب العز الما فيهو قولة ان كان
فيهم الشاعر الملهم الفنان
وفيهم الاجواد البي الكرم مليان
وفيهم التجاني البيعبد الرحمن
وفيهم السالكين طرق الختم عثمان
السلام بالدين ممزوج من الريحان
يغشى لي نبي الله احمد العدنان
بالسلام الدايم يحفظ السودان


*****

[عبد القادر ابراهيم]

الحليبي...بارك الله فيك وانت توثق لي امنا الحرازي بس حسب معرفتي في نصوص
كثيرة ماموجوده...
اتمني الا تكون قد ضاعت...

[عثمان الحليبي]

*****

ابتديت بالحي الحنين
الله ما شافوه بالعين
نذكر الحيين والمييتين
الرجال السلفو راقدين
ماتوا راقدين مظلمين
يرحمم رب العالمين
ويجعلم من اهل اليمين
وفي نعيم الجنة ساكنين
وفي الارائك متكلين
يا شباب لا تبقوا غافلين
وفي الظلام لاتبقوا طاشين
اطلبوا العلم ابقوا بينين
واظهروا وضوا القبلتين
العلم مصباح حسين
يرفع القوم الجاهلين
نحمد الله الحي الحنين
الفننت ودورت السنين
وشفنا لي نصرتنا بالعين
الله جعلو قريرا مكين
وشرفك رب العالمين
وقارنك بالارض الامين
وانشا فيك نباتا حسين
فيك دكاترة ومتخرجين
للفنون والعلم دارسين
فيك شعراء شموس وبينين
ومنهجن فوق الموازين
فيك اسودتن مضاريين
في ضفاف الشاطئ ساكنين
بي نفوسن متبرعين
ختوا مالن بالملايين
ديل الكدنقاب الاصيلين
النسبة في العباس واصلين
رمزدرقة وسيفا سنين
شرفوا وزادوهو دبليين
ولبسوا التاج والنواشين
نعمة واجدة وخيرامتين
مويتو دلقت بالبساتين
وقمري غرد في العراجين
دي جنة التفاح مع التين


*****

[عثمان الحليبي]

http://www.albrkal.com/upload/uploads/asha-whab.mp3*****


ابتديت بالحي الوهاب
الله ناظر من غير حجاب
يا جماعة الدنيا دولاب
العمد كانوا العكوداب
وينو عثمان بحر التساب
الامين الماهو كضاب
الفي القرير ما بدى بالخراب
جا سيدي عثمان يفتح الباب
الصدرو دكان وعلمو وهاب
وسرو فايض ليهو ميزاب
للمعاني ورسم الكتاب
سيدي قمرا ضو السحاب
للقرير ولفت الخطاب
بالعناوين وردالجواب
القرير النخلو هباب
نعمة واجدة وخيرو صباب
بحرو كارب وموجو كباب
شقي بي وسط الرباطاب
غرق الاشجار والتراب
زغردن وغنن يا الشباب
شكرن ود الهندياب
الاسود قياد الذهاب
فوق اخوالو الحسيناب
العفاف تايبين الشباب
ونصرة يا اعمامو الجباراب
كلهم وزراء واهل نصاب
نصرة لي مساوي والساب
واوسلي لا دار الزليطاب



*****

[عثمان الحليبي]

*****


ابتديت بالحي الفريد
القادر يفعل شن ما يريد
نرفع الصوت يحمل الجيد
وفيك قماري تردد نشيد
مكرفونو يسمع بعيد
للقرير النور جديد
الاستلم حريتو في اليد
من رجال ماب يحملوا القيد
الاسود في قفص الحديد
وعنتر الفي ارض اليزيد
هو شكرو شيبون ماهو تقليد
وفيهو جوهر ودرا فريد
وزيطو طالع سفلي وصعيد



*****

[عثمان الحليبي]

*****


سجل التاريخ الكلامو صحيح
الكبريات العالي الفاتت المريخ
وفي ارض سودانا الترابو فسيح
فيهو الاديب عبدالله الكلامو نصيح
ناطق العربية الكلامو فصيح
بالمعاني السامية والقوة والتصحيح
السلام محمول فوق بساط الريح
يغشي لي ابطالنا في كل ضريح



*****

[عثمان الحليبي]

http://www.albrkal.com/upload/uploads/asha-sudia.mp3*****


دار سعود
الريد الريد يا الاهل
لي دياركم لامتين نصل
ببكي في الليل دمي جدول
وعيني سهرانه مع زحل
هامة لي اولاد الدهر
قلبي ليهم وقلبم حجر
جملة السودان فيك اهل
الدكاترة واهل العمل
مركز التعليم بالكمل
اتحاد في كل الحصل
يا حنان يا ولدي جعفر
يا اميرة صباح القمر
لا تتركوا الخوة بالمر

انا لو لقيت جوا معتدل
عندي موهبة زي المطر
فيها انظم عقدالدرر
وفيها اصنع للمجوهر
لي جنة الفردوس والزهر

من زمان حبولة الاهل
ومن قرون فرض الحج تجر
من ورا دارفور والجبل
بالتكارير زول ما فتر
هبشوا الطبل الطار نقر
بالمراكب قطعوا البحر
طافوا الكعبة وباسو الحجر
طلعوا عرفة الذنب اتغفر
ولا في طيارة ولا قطر
تعبوا جابوا الحج الابر
نحمد الله الحي ما غفل
القديم بي طول الدهر
الالهم الانسان بالخبر
وبالعلوم الكون انتصر
الانسان في السودان فطر
صرف ساعة يعدي البحر
ظاهرة جيزان زي القمر
روعة يا عاصمة الجبل
العمارات فوق البحر
والظلط بالكبري انحدر
يجري بين ريقان النخل
والكهارب نورة يجهر
والسواحل مد البصر
والعساكر واقفين غفر
دي جنة الفردوس والزهر
السلام بالدين معطر
يشحن الكون يملى بالمر
يغشى نبي الله المفضل
طه يسين المبشر
صاحب الحوض المسبل
لينا يشفع يوم الزعل
يملى للرياض والخبر
ويغشى لي فهد المظفر
خادم الحرمين البطل
الفي العدالة الفاروق عمر
يا اهل نجد ملوك الدهر
ابن سلمان طلع القمر
الفي الفراسة الرمزعنتر



*****

[عثمان الحليبي]

http://www.albrkal.com/upload/uploads/asha-hmama.mp3

نفيسة سافرت السعودية معارة.ساعت سافرت لقت البكان الماشالو ده كان بكان قاسي اسمو وادي الساهي في الخلاء.
رسلت لي جواب قالت : انا كان اخواني ما قاعدين يقرواما كت جيت اتغصبت جيت في البكان ده . اني المحل ده محل بدو الا يجيبوا ولادن بالجمال للمدرسة ...وبكان مقطوع.
ساعت رسلت لي الجواب ده جاني انا بكيت اليوم داك ما نمت . اصبحت الصباح ، عندي عيش قاعدي انضف فيهو جات حمامة تلقط في العيش .تنقد جنبي. قمت قلت :

*****


يا الحمامة الراكي جنبي
الرسول ترسليلي
يا حليلة بلا ملام

اقطعي الورقة وسطري
يا حمامة احملي رسالتي
يا حليلة بلا ملام

فري لي ريشك وغردي
بالفصاء شقي الفيافي
واقطعي المالح وعدي
وروحي جدة شروق النبي
يا حليلة بلا ملام

روحي حجي وناجي لبي
وفي الغصون ما تستبدي
يا حليلة بلا ملام

حضري الواقود زودي
وامشي في جيزان وانزلي
وشيلي للكاميرا وصوري
في قدرة الباري الغني
يا حليلة بلا ملام

وشقي وادي الساهي شوفي
قبــليها نفيــسة بـتي
يا حبيبتي اللي بترتي
ويا هديتي المعطي ربي
الله يبقالة ضرى وغتي
يا حليلة بلا ملام

يا نفيسة لا تبكي وتحزني
ولا تكتبي تخربي قلبي
احمديه الله احمدي
ربنا الرحمن احمدي
القادر السبحان احمدي
بالسجود والركعة جازي
دي ماها توريت (بلد النبي)
يا حليلة بلا ملام

انا جيت اوصيك يا الحمام
يا ابيض اللون رمز السلام
يا حليلة بلا ملام

يا الحمام لا تبقى لوام
وفي الغصون ما تبقى نوام
اقطع المر وابقى عوام
وارسى جدة شروق ام رخام
يا حليلة بلا ملام



*****

[عثمان الحليبي]

القصة كان ابوك ..هي مانجحت ..البنات ..جات نفيسة بكت وهو حلف تاني ما تمشي ...ما تمشي تقرى.وانا استغظتا خلاص . جا عبد الله لقاهو يتحدث معاي .قاللو:نفيسة كان ما قرت انا ما حا اشتغل . بعدين قمت طوالي..مشوا سولن .السنة الجات عملولن فصل في تلودي . وقرت فيهو جات الاول وبعد داك مشت قرت ومشوا لي اب جبيهة مشوا الامتحان .انا قمت غنيت.ياهو غنيت:
http://www.albrkal.com/upload/uploads/asha-yaalah.mp3
*****


يا الله تسمع لي نداي
ويا الله تقبل لي دعاي
الله قادر والله رتاي
والله زايل المحني واداي
جيت انادي اهل الله من جم
من جميع من فيهو دين وسم
العرض لي النبي مقدم
يا محمد شافع الامم
يا النبي الي النبيان ختم
جاء سيدي عثمان المعظم
قال لي يا عاشا مناك تم
يقبلوها تشيل القلم
لي نفيسة ختمت ورسم

يا نفيسة خطوتك لبن
انا جيت انادي سيدي الحسن
اللي المستعقد راحة بدن
يقبلوها وتدرس الفن
وما تضيع من اول زمن

انا ندهت لي الختم العارفين
ست زينب وسيدي الحسين
تقولي اولادك ناجحين
من ولد لي بت فالحين
قلبي يفرح وشافتو العين

وانا جيت انادي شيخي الختم
يا تلبنا الشايل ردم
ويا بحرنا الماب تنعدم
ويا قمرنا الوسط النجم
تقولي يا عاشا مناك يتم
لي نفيسة اختم وارسم



*****

[عثمان الحليبي]

زينب بتي كانت تعبت شديد بالازمة سنة تمانين وانا قدر ما سويت لها شئ ما نفع. قمت ندهت المراغنة الاشراف. واخدت الرواية من ستنا بت الملك بت كساوي بتد درداب في الزومة. غناها الجيت اغني عليهو ( يا حليلة بلا ملام ) وهي كانت برضو غنت لي ولده محمد الحسن. وانا جيت فوق روايتة التاني ( الحج عليك مبروك يا العظيم شانِك) سويت القصيدة دي عليها:

http://www.albrkal.com/upload/uploads/zenab.mp3
*****


انا جيت اناديكم ودايري اناديكم
انا نادهي لي الكمل بي لياليكم
يا الختم عثمان انا لي عشم فيكم
يا الختم عثمان انا لي عشم فيكم

انا جيت اناديكم يا الكُمَّل البينين
انا جيت اناديكم يا اهل بدر وحنين
انا جيت اناديكم يا الكُمَّل الصالحين
انا جيت اناديكم يا سابقين رمشة العين
انا لي عشم فيكم

انا بنده السادة وبنده الستات
ساكنات كسلا وساكنات سنكات
ساكنات البقعة بضعة الطاهرات
انا اصلي قاعدي اندهكم في الهيني والقاسات
يا الختم عثمان
تدحر الافات يا الختم عثمان
الدرع حجبات يا الختم عثمان
من بعد ها المرضة والرقدة والحدرات
تمشي لي نادية وتجي تنادي سعاد
جلسة جنم مرضية وكلهن عابات
صحبة في جاهوري وتركب الباصات
عودة لي مروي وتدرس الكتبات
نورولة طريقة الفيهو الشمع ما مات
وافتحوا الميزاب الفوقو موهوبات
تبقي في النجحوا البيقروا في الجامعات
يا رسول الله

انا جيت انادي القادر الما عليك مضهوب
ربنا القادر البيحيي لي المتروب
يا سيدي عبد الله الميرغني المحجوب
يا الختم عثمان تحرق المكروب
افتحولة طريقو ونورولة دروب
تنجحوا الاورنيق الفيهو الدرس مكتوب
يا الختم عثمان

جاء دابي رندة العال
وشيخ الطريقة ابوه
الفي قواسيا
ديمة يتلقوا
انا جوني بالاسعاف
زي برق حضروا
يا الختم عثمان
الالم ديروهو يا الختم عثمان
المريض شوفوه يا الختم عثمان
الزهور تسقوه يا الختم عثمان
لا اتحسر دسوه يا الختم عثمان
ولا يبس حشوه يا الختم عثمان
انا بنده الصلاح


*****

[عثمان الحليبي]

بعد فتح الرابط
قم بتحميل الملف الي جهازك
استمع للشاعرة تغني أشعارها بصوتها

أضغط هنا

http://www.mediafire.com/?ojzm2yyyl5w

http://www.mediafire.com/folder/8d9817b5d35d255907258ee67c679e4a3e95172df8a6aa7fb8 78de785cc0f59e