الشاعر/ علاء الدين ابسير

[شهرزاد]

جن الريد
أحمد معروف بالطيبـة حسـن أخـلاق وعليهـا إتربـه
تكفي شهادة ناس الحلـة إنـو خلـوق وخجـول ومُربّـه
مهذب رغم حداثـة سنـو لبـس تهذيبـو أصالـة وهيبـة
أدي الناس الحـب أدوهـو حسـن الظـن بيناتـن شبـه
خشت فجأة أميمة حياتـو وصـارت بينـو وبينـا محبـة
قلبو إختارها عشان معروفة زولة حنينة وراقيـة وطيبـة
دسو الريد في السر بيناتُن وخلّـو حبيـس دفيـن ومخبـه
وكيف تنضارى متل أشواقن وليه زي ريدُن يـوم يتخبـه
بعد أيام وصلتـو رسالـة جـواب مليـان تقيـل ومعبـه
قبال ما يفتحو عرف الراسل باينة وظاهرة رسائـل وهبـة
أخوهو الليهو زمن متغرب تسعة سنيـن قضاهـن غربـه
مرسل ليهو تذاكر وفيزا دايرو يجيهو هنـاك فـي طيبـه
طار في الأول أحمد فرحه كلـم كـل النـاس والصحبـه
لما إتذكر أميمة حبيبتـو فجـأة إنتابـو شعـور بالخيبـه
لكن قـرر إنـو يسافـر سرعـة يعـود ويتـم الخطبـه
لأنو الغربه طريقه قصير وفيهـا يهـون تحقيـق الرغبـه
جاتو اميمة حزينة توادعـو جاتـو تجفـف دمعـو الكبـه
جاتو توصي عشان ما يقوى لا ينساها هناك فـي الغربـه
جاتو تطمنـو إنـو حيفضـل ريـده الخالـد مهمـا غبـه
حافظه عهود الريدة البينُن ومهمـا كـان ح يظلـو أحبـه
أهدتلو المصحف شان يرعاهو من العين والهـم والكربـه
لبّسه عهد الريد في جيده عقـد ممهـور بصـورة الكعبـه
قامو إتوادعو زين إتباكـو فـات خلاهـا وحيـدة وخبـا
سافر شال همو وأحزانو بعـد أيـام فـي المملكـة طبـا
لاقو الناس يا زول كيف حالك بالأحضان قام سالم وهبـه
قالو نصاح ناس أمـي وأبويـا مشتاقيـن راجنلـك أوبـة
قالو أحمد سافـر يـا وهبـه غيـر جـوَّك وروِّق حبـه
أمـك ياخـي تلاهـي عليـك لاخـلالا ضريـح لاقبـه
السودان مشتاقلك كلو ضفـاف ورمـال سواقـي وتربـه
وحتى النيل فرحان راجيك تجي وتنهل من مويتـو العذبـه
بعد أيام كان وهبه هناك بيـن أصحابـو وأهلـو وأحبـه
في حضن أمو الطول منو في حيشانـو الواسعـة الرحبـه
قالتلـو أمـو أخوانـك كبـرو ومـا فضلنـا زول يتربـه
بس فضلي أشوفو جديـدك وكتيـن لسـع حيـه وطيبـه
إختارولو بنيي سميحـي تشـع حيويـه ورونـق وهيبـه
أديبه وراقيه وكلها عفه وبرضو أهل وقراب فـي الحسبـه
يوم العرس الحي صباحي فرح مطبوق والنـاس منطربـه
شاق الليل صوت كم زغروده وحس طنبور ودليبـن ربـه
إلا في واحده حزينه وباكيه سايلـه دموعـا دوام منسكبـه
وفي دموعا سؤال بيحير وفـي آهاتـه أسـرار محتجبـه
وقالو الناس دي دموع الفرحه وغيرا شنو الحا يكون السِّبه
بعد أيام ساق وهبه عروسو ساقا رجع لـي بلـد الغربـه
سايقو حنين لي كل أصحابو ولي أحمد أخوهو أشواق ملتهبه
وصل الباب كورك يا أحمد فتح أحمد بـي لهفـه ورغبـه
شاف قدامو الما متوقع هم الكـون فـوق راسـو إنصبـه
شاف السلسل عهد الريده نفس السلسـل وصـورة الكعبـه
شاف قدامو أميمه حبيبتو كانت قاسيـه وقاضيـه الضربـه
شاف أحلامو تضيع قدامو بعـد مـا كانـت منـو قريبـه
كانت لحظه تفيض بالدهشـه شـاف الدنيـا كأنهـا كذبـه
كورك أميمه أميمه وصنقـع صنقـع ودنقـر ودّر وغبـى
وجن أحمد في نفس اللحظه جن الريـد مـا أظـن ينطبـا

[شهرزاد]

ميسرة
الزمن مهما كان عنيـد شكـل أفعالـوا وصـورا
برضو ننسى سواتـو ونقـول قسمـه والله مقـدرة
كل يوم يرويلنا بى فـن قصـة مختلفـة مغايـرة
بحكى من أفعالو واحدة بس مثال ما داير احصـرا
عاش منعم بيـن والديـن ريدتـو فيهـم متفجـرة
شبّ بين والد كان عطوف وبى حنان والدة مبطـرا
أسرة غرتو كل الحنـان وليهـو سقايـة محـدرة
***
ولـفّ دار دولاب الزمـن والقـدر يتـم ميسـرة
مات أبوهو الكان حنين وليهو كان الضل والضـرا
خلى لى أم ورثت الهم والنحيب ودمـوع ممطـره
خلى لى شابة اترملـت زهـرة يـا دوب منـورة
لسه فى ريعـان الشبـاب حلـوة أمـورة وآسـرة
فلته من عالمنا الضنيـن مستحيـل تانـى يكـررا
***
قررت تتحزم تقيف جـم وليـدا تكونلـو الضـرا
وتنسى إنو فقد أبوهو وتبقي هى الراجـل والمـره
رغم جو الهم والنكـد مهـدت لـو طريقـو يقـره
ورغم إنو زمانـا غالـى كـان بتقعدلـو مذاكـره
كان بتحلم بى وليـدا يبقـى كـان كابتـن طائـرة
والا يصبـح باشمهنـدس والا يتخـرج دكـتـره
***
والوليد اصبـح كبيـر وفاتـا يـا دابـو العاشـرة
والزمن غيـر كـل شـئ الا والدتـو مـا غيـرا
زادا فى نظر الكل سماح وفى عيون النـاس كبـرا
مرة يوم الحلى جاطت وقالـوا إنـو سعيـد دايـرا
كان سعيد راجلاً مهذب يملـك الجـاه والسيطـره
***
قام طلب إيد أم الوليد ونيتو صافيـة لبـن طاهـرة
دار يكون لها راجل أمين ويبقى والد لـى ميسـرة
حست إنو أماما إمتحان قاسي بيـن إتنيـن خيـرا
ختـت الشافـع أمامـا ومغريـا الكـون بـى ورا
بين وليدا الفارق كبير وبين قروش وحلى وأسـوره
رفضت الفكرة وبى أدب رسلتـو جـواب معـذرة
ورتو إنها داب وليدا وفى العـرس ماهـا مفكـرة
***
يوم سعيد نادى الشويفع رغبو وقال ليهـو واغـرى
جيب لى قلب أمك يا ولـد ولينـا طلباتـك آمـره
كان طلبت الشي المستحيل يبقى ممكن شان خاطره
كم فرح ميسره وإنبسط ولى ديارن فرحان جـرى
فتحت أمو احضانا راجا شان تضمو يطيب خاطرا
وبين ضلوع أمو الحنيني غزّ سكيـن لـى آخـره
***
وانتزع قلب أمو عجلان من محـل ريدتـو موكـر
وماتت الأم جم وليدا فوق دمـوم سالـت طاهـره
وشال قلب والدتو بين ايدى وزود السرعـة كتـرا
ومن كتر سرعتو قام وقعد وما عرف حاجه ومادرا
غير سمع قلب أمو ينضم وفيهو كم أنات عاصـره
بى كلام أشبه بالبكا ومـن حلـق ساداهـو عبـرة
يا جناى إن شاءالله طيـب بـى وقعتـك متأثـرة
***
كان كلام قلب أمو تيار فى دواخل الوجدان سـرى
رغم إنو يفيض محنه .. ضاق طعم كلماتـو مُـره
حس إنو فعـل جريمـه مستحيـل تلقـى المغفـره
سل سكين داير يموت وفى وسـط ضلعـو يوكـرا
دار يموت كان يرضى الضمير أو يكون للزيو عبره
الا تانـى قليبـا نـادا رجـع السكيـن لـى ورا
ولاتكتـل أمـك مرتيـن يـا جنايـا كفايـا مـرة

[شهرزاد]

سحابة حزينة
بعد طلَّتنا سحابـة حزينـة.. أحالـت ليلنـا.. نـواح وأسيـة
بدت الفرحـة خطاهـا علينـا.. تعـم آفاقنـا ..شويَّـة شويَّـة
نـار الغربـة ملهلبـة فينـا.. ونـار الشـوق ..اللِّـسـع حـيـة
حلاة اللقيا بعد طـول فرقـة وبعـد الغربـة سماحـة الجيَّـة
***
شوقى كتير لى لحظة شوفتك.. وشـوق أطفالـك بالكميَّـة
مشغولين بى ذكرة بابا.. وبسمـع بابـا.. صبـاح وعشيَّـة
جانـا جوابـك شايـل البشـرى.. بـى تحقيـق أجمـل أمنيَّـة
عودتك وعودتك بلسم شافى يداوى جروحنا الطالت نيَّـة
***
كنا نمنِّى الروح بى اللقيـا.. نـدارى دموعنـا ورا الحنيَّـة
وكنـا نطـوِّع زمنـا ً قاسـى..لـو الأقــدار تنـسـاق بالنـيِّـة
يفرح بيك طنبورنـا ويصدح..يعـزف ليـك أجمـل أغنيَّـة
وبعد إحجام صامتبو قريحة حترجع توحى إلهامه سخيَّة
***
لما تعـود حتكـون أيامنـا.. رايعـة ورايقـة وهاديـة هنيَّـة
عودتـك قمـة هـرم أفراحنـا .. هداهـا الينـا زمَّنَّـا هـديَّـة
لما تعـود حيهلل(ناجـى).. تجيـش أشـواق كانـت مخفيَـة
ورغم طفولة (نازك) إخيتو يقولها زغردى هوى يا بنيَّة

[شهرزاد]

أتحداك
أتحداك لو تنسيني أو لي حبي تلقى بديل
أنا الدرب الخطاي تمشيهو تعجز عن مشيهو الخيل
حبك ليا لو تخفيهو يظهر فى وشيك عديل
تبدأ ملامحو فى عينيك يقراها الكفيف بالليل
***
ما أتولد البسير فوق دربي والبخبر دروبي قليل
والدرب التطول ايامو بوصل ميسو في فد ليل
***
مابتنسينى مهما كان لأظنك تلاقى سبيل
والضاق الظلال فد مرة مابيرويهو حتى النيل
***
مابحزن عليك والله لو سالت دموعك سيل
جافة عيوني مما قمته مابتعرف عناق منديل
***
لو راجنى ارجع ليكى ماترجينى مدى حبل رجاك طويل
أموت والله مليون مرة أفضل من اجيك ذليل
***
برفض أطرا زول ناسينى مهما كان فراقو تقيل
لمن أريد بريد بالجد لمن انسي بنسى عديل
***
مابحزن على موت ريدنا بى أيدك كان أغتيل
والموت فى بعض مرات يكون افضل من العلعيل
***
لو كان الجمال غاريك بى احساسى ببقى جميل
لو معتادة يجرو وراك مابتلقينى من نوع ديل
***
حترجعى يوم براك تكتشفى انو هواى مالو مثيل
حترجعى لي حماي تكوسى في جنة غرامي ضليل
***
والبهدى لي لحن مثالي ابادلو جميع غناهو هديل
والحاول يمازح قلبى بلعب بى قليبو شليل
***
متأسف على إحساس اتخيلتى انو جميل
متأسف على أوهام سمينها عشق جميل
***
متأسف على أحلام بيني وبينا مليون ميل
متأسف لانى اهديت مشاعر ضوقتنى الويل
***
متأسف على شتلات زرعتها في الصحارى قبيل
أتخيلتا أنها تبقى واحة ريد ثمار ونخيل
***
ارتاح في ربوعا أنجما واحد من ثمارا أكيل
لكن ياخسارة زراعتي كانت جوه مجرى السيل

[شهرزاد]

حليل الفارقتهم
انا في منامي اذكرتهم يا حليل حليل الفارتهم
المعز ومعاذ وامهم
خالد وابوي وابوي انا كيفنهم
انا أي طير بسألو منهم
انا قالي لي قاعدين في ضلهم
قاعدين يلعبو جنب عمهم
انا عارفوا ما بقصر منهم
قول لي يا عمي وضوهم هي
قمت لي منو عاد خالهم
بالله يا ادم طلهم وانت اقرب زول منهم
***
ود السيد عمي التلب المعز اوعا من الضرب
في العقاب خليك مستند والعقاب اوعك يتخرب
***
الجيلي خل بالك للصغير عمر الجا بيك مستجير
لا تغيبوا من البيت كتير يبقوا زي صابر والزبير
***
قسم السيد شوف البضربو للوليدات خليك ابو
اوعك الاولاد يتعبوا والبيعد ليهم قربوا
عايز اقوم انا اكتب جواب عنوانو عثمان عبد الوهاب
انا عارفو ياهو البجري العقاب يبقى في بدل الابو الغاب
***
عمي عبد الله تراك قريب والجواب مكتوب لي حبيب
يا هارون اصلا لا يغيب خالد من بالكم لا يغيب
***
قولي لي دفع السيد انا عارفوا عارف فرق الجنا
بالله اغشى ام زين طمنا اوعك الاولاد من عنا
ود ارباب يا عبد الرحمن اطرى لي خوتنا الزمان
انت لا تغيب من المكان شوف اليبكي وشوف الجعان
***
يا مدثر وفتحي وابزيد انا قولي لي جيران البريد
انت يا قيوم ماك بعيد وخلوا بالكم لابن الوليد
يا المبحر يا المقبل يا سائق العربية اتمهل
انت من السرعة قلل اوع قدام الحوش طفل
***
يا شباب حلتنا اجمعين يا الكبار ابقو لي سامعين
اه انا اه انا اه انا الكاتلني الحنين
للشمال الوطن البلد واهلي الطيبين

[شهرزاد]

حبي أنا ليك كان زادي
حبى أنا ليك كان زادى وكان جوه الحنايـا دفيـن
كتّ بضارى من الناس وخايفه عليهو مـن العيـن
عليهو كت بصوم وافطر عليهـو بكابـد الناريـن
كت بحسب سنين الغربة لما تعـود تجينـى متيـن
وكت برجاك فوق النار لمـا وكـت لقانـا يحيـن
نونس فى براءة أطفال وفى الحب نروى ننهل زين
وكلما يوم يزيد البينـا لمـا بقينـا قـاب قوسيـن
اتارى أنا كت فيك مخدوعه وكم من زي مخدوعين
ما قايـلاك حبيـب آلاف وقلبـك قبلـه للضاليـن
وما قايلاك بتنسي حبيب صبر راجيك ستـه سنيـن
وساهر كم ليالـى طـوال يتقلـب شمـال ويميـن
كيفن يهون عليك تنساهو زولاً كان عليـك حنيـن
وتشغـل بالـك الأشـواق لمّـن تزبـل الياسميـن
كت دايراك بسمة عريضة فى وجه الزمان الشيـن
وكت دايراك ساعة الحاجة تبقى ليّ دخرى خزيـن
كت دايراك مقنع حوبه وكتيـن المضـارى يبيـن
وكت دايراك فارس احلامى تشاركنى ونتـم الديـن
وكت دايراك أمل بسام يزيل ألـم البعـاد والبيـن
كت دايراك شريك الروح واخدمك حافيـة القدميـن
وكت بحلم بك انت معاي مجرتق بالعديـل والزيـن
جنبك فى يمينك قاعده نسمع فـى دقـر يـا عيـن
تبشر زين مع الأصحـاب وتتشبـل مـن الوزيـن
أنا الأبحرت راكبه الموج اكيد مرسايا بين موجتين
وداعاً يا زمـن ظالـم وبالأفـراح علـيّ ضنيـن
وداعـاً يـا قلـب قاسـي لا بيحـن ولا بيلـيـن
وداعاً يا سراب خداع محال ما بيروي عطشانيـن
وداعاً يا كلام معسـول حـدو ومكمنـو الشفتيـن
وداعاً يا سحابة صيف شايلى مطر ضليـلا رهيـن
تبشر بى خريف جايينا ياما الناس رجوهو سنيـن
كل زولاً يفكـر فيهـا مـا معروفـة تنـزل ويـن
وألف سلام عليك يا قلبي المسالم وديمه طبعو حنين
يتاورو الشوق ويلعب بيهو تنحر فى حشا السكيـن
تعاودو الذكري تنتر جوا حالـو يحنـن المسكيـن
أخيراً مى ليك سلام وقبل ما تجـف دمـوع العيـن
وقبال منى ما تعـدى وقبـال الفـراق مـا يحيـن
بخيت وسعيد عليك إن شاءالله يبقالك عمار وبنيـن
وقلبى أنا خلى فى أناتو بعدك يامـا راجـى أنيـن
ولو كان يا قلب حبيت بعـدو بعـد قسمـت يميـن
ما ينتمّ ليك مـراد لا تضـوق لا حلـو ولا زيـن
وتفضل طول حياتك تبكى طول عمرك تعيشو حزين
وعمرك ما تجيك سعـادة مـا تتهنـا قـول آميـن
وتانى الحب عليك حرمان ووعد الحر أمانه وديـن

[شهرزاد]

جارو الاهل
جاروا الأهل خلوكى تتباكى بين نارين
نار الظلم والجور وبعد الحبيب الزين
ظلموكى فى أفراح راجاها ليكى سنين
كتلو الفرح جواك وئدوا السعادة جنين
خلوكى زى طفلاً باكى وتملى حزين
وعايش حياتو عذاب مابين نواح وأنين
لوقدروا جاروا على وشالوكى من العين
حتظلى فى جواي يقدر يشيلك مين
لاتبكى تشكى البيك يبقن على همين
مابيتحملو بكاك قلبى العليك حنين
بيناتنا ختو أميال شان نتفرق ناسين
إنو الحبيب بالشوق بيطير بلاجنحين
أنا مامته موتت ذله انا مت بى سكين
لكن قدربى صديق بى سيف خيانة سنين
لامينى ليل ونهار عارف الشهير ودفين
وريتو أدق أسرار ما كان عليها أمين
صبراً على الأيام يمكن شويه تلين
تجمعنا بعد الحال ننساهو مر البين
وكت انتى زى تمام وقلوبنا متعاهدين
حنعيش حياتنا أحباب ونشوف حيخسر مين

[شهرزاد]

رسالة من الآخرة
ســـــــارة من الآخــرة بكتــب ليـــك تحـــية
من حبيب مات يوم فراقك الا نارك لسة حية
من جهنّــــم ليك بكتب رغــــم آلامى العـــلى
أقلب الأحزان مباهج كان يخـف ألمـك شوية
عارف إنى أنا فى قليبك وعـارفو قلبك لسة لىَّ
وعارفو باب سكـة فرحنا سدتو الإيد القــــوية
أهلك القايلين سعادتك تبقى فى العيشـة الثرية
شالو فرح الدنيا خلوك تبكى بالدمعـة السخـية
رغم أفكارم بريدك ريدة ظـاهرة ومو خـــفية
واختلاف الفكر عمرو ما فسـد للود قضــــية
حالتى من غيرك تمحن عيشــة فى نار سرمدية
مافى زول أحكيلو حالى وإنتى مــاك عارفة العلى
سارة مابقـــدر ألومــــــك إنتى ما اتلـــومتى فيــاَّ
والبزح فى الواطة قاعد ما بتطــول قدمــو الثريا
سارة أمسحى سيل دموعك وعيشى لحظاتك هنية
والفرح فد مرة قالوا عنـدو فى أعمــارنا جيـــــة
أوعى تحزنى يوم زفافك إنتى ما شبه الأســـــية
الاَّ أقدارك معــاندة وإنتى ليهـــا دوام ضــــــحية
افتقدتك فى إحتضارى يوم أحاطــت بى المـــنية
وقالوا فى الليل المضَّلم يفتقد قمـــــــر العـــــشية
سارة طاريك ما نسيتك وكيفن أنســــــــاك يا ب

[شهرزاد]

أصدقلك دميعاتك
اصـدقـلـك دميـعـاتـك ولا أقـــول كـلامـهــم صــــاح
اعيـش علـى الماضـى ولا اقــول ده مـاضـى وراح
حيران مانى لاقى جواب عشان ارتاح وتانى ارتاح
وفــى الدمـعـه لا تـبـكـى خـلــى الـدمــوع الـتـرتـاح
***
سلاح الدمعة حـاد وسنيـن ومافـى احـدا منـو سـلاح
لكـن مـا بتفيـد دمـعـات الـمـات مــا تجيـبـوا ســلاح
كـل مـا احـاول استسلـم اجبـر نفـسـى ابـقـى سـمـاح
انـت يـا قليبـى انـزف دم واحـس بمشـرط الـجـراح
***
يقطـع فـى قليـب الهـم ويزيـد علـى العليـهـو جــراح
كيـف اكـذب كـلام مثبـوت عـمّ الدنيـا سمعـوا وفـاح
اصبح زى اثـر منحـوت لا بفـوت لا بتشيلـوا ريـاح
شقيان اصلى لامن اموت ومـا اظـن بنكتبلـى نجـاح
***
رجعـتـا زى حالـتـى خـســران جـيــت بـــلا ارواح
بعـد عبـرتـا بـحـر الـريـد انــا الـربـان انــا المـنـاح
يتبلـد سـمـاى غـيـوم وهـبـت تـانـى عكـسـى ريــاح
***
رجع مظلوم وزادى كفاى همـى الشايلـو كلـو نـواح
بعـد مـا زرعنـا واحتنـا ريـد وحنـان حـب وافــراح
وقـام فرهـد نبـت ريدنـا قـرب يــوم حـصـادو ولاح
مـات البانـى املـى عليهـو ورجعتـا بحسـرة الـفـلاح

[النافعابى]

أتحداك
أتحداك لو تنسيني أو لي حبي تلقى بديل
أنا الدرب الخطاي تمشيهو تعجز عن مشيهو الخيل
حبك ليا لو تخفيهو يظهر فى وشيك عديل
تبدأ ملامحو فى عينيك يقراها الكفيف بالليل
***
ما أتولد البسير فوق دربي والبخبر دروبي قليل
والدرب التطول ايامو بوصل ميسو في فد ليل
***
مابتنسينى مهما كان لأظنك تلاقى سبيل
والضاق الظلال فد مرة مابيرويهو حتى النيل
***
مابحزن عليك والله لو سالت دموعك سيل
جافة عيوني مما قمته مابتعرف عناق منديل
***
لو راجنى ارجع ليكى ماترجينى مدى حبل رجاك طويل
أموت والله مليون مرة أفضل من اجيك ذليل
***
برفض أطرا زول ناسينى مهما كان فراقو تقيل
لمن أريد بريد بالجد لمن انسي بنسى عديل
***
مابحزن على موت ريدنا بى أيدك كان أغتيل
والموت فى بعض مرات يكون افضل من العلعيل
***
لو كان الجمال غاريك بى احساسى ببقى جميل
لو معتادة يجرو وراك مابتلقينى من نوع ديل
***
حترجعى يوم براك تكتشفى انو هواى مالو مثيل
حترجعى لي حماي تكوسى في جنة غرامي ضليل
***
والبهدى لي لحن مثالي ابادلو جميع غناهو هديل
والحاول يمازح قلبى بلعب بى قليبو شليل
***
متأسف على إحساس اتخيلتى انو جميل
متأسف على أوهام سمينها عشق جميل
***
متأسف على أحلام بيني وبينا مليون ميل
متأسف لانى اهديت مشاعر ضوقتنى الويل
***
متأسف على شتلات زرعتها في الصحارى قبيل
أتخيلتا أنها تبقى واحة ريد ثمار ونخيل
***
ارتاح في ربوعا أنجما واحد من ثمارا أكيل
لكن ياخسارة زراعتي كانت جوه مجرى السيل

شهرذاد ما اروعك وانتى تنتقى الروائع
المعطره من شذاك لكى ننعم بروائع الشعر
العطره اتحدكى ليها وقع خاص عند خالك
ويما سمعتها وحسيت بيها فى جواى والشكر عبرك موصول
لابن منحى النيل الباثق علاء ابسير الذى ابدع فى كل كلامته يديك العافى
بنتنا شهرذاد (أنا الدرب الخطاي تمشيهو تعجز عن مشيهو الخيل )

[شهرزاد]

نوى الرحيل الى الى ارض الغربه شانه شان الكثير من ابناء قريته ليحسن حالته المعيشيه ومن ثم يعود ليتزوج ويرتبط بمعشوقته التى لا يرى الاها بين بنات حيه.
تردد كثيرا قبل السفر لعله يعود ويجدها فى معية رجل اخر برضاها او بغيره طالما ان الابوات فى بلدته دائما يقولون (ماعندنا بتاً يشاوروها) قرر ان يخطبها قبل ان يسافر عله بتلك الخطبه يضمن الزواج منها وتكون ايضا الخطبه والارتباط دافع للاجتهاد فى الغربه ليعود بعد عام واحد فقط ليتزوج ايفاءا لوعد قطعه مع والدها الذي اشترط ذلك...
حمل صاحبنا حقيبته وغادر وسط دموع الاهل وحزن المحبوبه تعتصره الام الفراق والعيون تفيض دمعا سخينا سافر وهو يمنى نفسه بعودا احمدا يوفى فيه بعهده ويلتئم جرحه بلقاء المعشوقه...
وصل الى بلاد الغربه وكله امل فى ان يتحصل على عمل ليحقق من خلاله مبتغاه
لكننننننننننننن..
هاهو يكمل شهره العاشر ولم يتحصل على عمل وبدأ يخاف على فقدان حبيبته الغاليه ولم يستطع ايضا الاعتذار من والد الحبيبه فساء حاله واوقف الاتصال بها خوفا من ان يفاجأ بما لايحب و.. واخذ العوازل والحساد يناوشونها بالكلام والاسئله اين خطيبك اين وعده لماذا لاتتركيه وانتى بهذا الجمال والف من يتمناك اختارى من وجهاء الحله وستجديه بين يديك ووووووو
بعد جهد وعناء كتب لها ...

أرجينى فى الميعاد (طارق عبدالقيوم)
ارجينى فى الميعاد وادى الصبر مده
وفراقنا مهما طال نتلاقى لابدً
عارفانى مابنساك لو طالت المده
وتشرق شمس لقياك مهما الدجى امتده
زمناً ظلمنا وجار راجنو يتعده
وباب الاسى المفتوح لابد ينسده
طيفك معايا دوام من فكرى ماعدا
وبلقاكى فى الاحلام لو مره جات غمده
كلما بنينا امال فى الغربه تتهده
دا الاغتراب ممحوق لاجاب ولا وده
صاح للظروف احكام يوم لين ويوم حده
ومهما ظروفى قست ثابت على المبدا
مو عنى يوم سألوك ليه طوَل المده
ليشن نساكى وفات ليه ليكى مارده
قوليلم الاشواق بيناتنا ممتده
ويكفينى انى براى قى قلبو فد واحده
..
ثم انتظر
وانتظر
وانتظر

فاذا برد الرساله يصل من المحبوبه مباشرة


يانـي أنـا (عبدالرحيم ارقى)
راجـاك لاتقلق لو غبت تسعة سـنة
ويوم بالسلامة تعود تلقاني ياني انا

* * *
لا غيرتني ظروف لا ريدي صابو عنا
لا قلبي شالو سواك لا عنك استغنى
تلقاني منتظراك فوق نار ومستنه
والله غير لقياك ما عندي تاني منـى

* * *
كـل مـا يجيني الليـل انا ببكـي وإتالم
تلقاني سـارحه معـاكا وبي لقـاك بحـلم
مالك قليبي هواكا وجاري مجرى الـدم
فيك التروح الروح وأنا عندي زيك كـم

* * *
طال الزمن بالحيل وانا قاعده مستناك
وبرجاك ومابندم وانا عمري كـلو فـداك
بس يوم تعود ارجوك لاتسيبني تاني وراك
يا أقعد إنت معاى يا إمـا سـوقني معـاك

* * *
سألوني عنك يوم وعن غيبتك العزال
قالوا لي فتَ خلاص غبت وبعادك طال
زول من رحـل خلاك لا جيه لا مرسال
وكتين نساكي وفات خاتاهو ليه في البال

* * *
قالوا لي انسى خلاص زي ما هو برضو نساك
صهين يكون مشغول بي واحـدة تانيه سواك
إبتسمي للأيـام تلقى الزمـن ضحـاك
خطابك انتي صفـوف الآف بتتمناك

* * *
رديت حياتي بقت مقـرونه بـي إنسـان
رابطنا فد شريان ساقينا ريد وحنـان
بيهو بنعيش أحباب في روقة وإطمئنان
ويصبح مصيرنا المـوت يوم ينزف الشـريان

* * *
خليني في جواك لا يبقي بينا عزول
نوم مُطمئن وارتاح واسمع خلاصة القول
لا مال بغيرني لا إغراء بينا يحـول
لا بيملا عيني سواك لا تاني بعشق زول

* * *
همش كلام الناس زي ماجَ خلي يفـوت
واسمع حديثي عديل لا يجيبوا ليك ملفـوت
ماناسيه عهدي معاك جوه الفـؤاد منحوت
ويوم ارتبط بسواك انشاء الله قبـلو امـوت

منقول من منتديات محمد النصري

[شهرزاد]

دخلت الصالون عندما استدعاها والدها فجدت على يمينه والدتها وعلى يساره شقيقها الاكبر وخالها واحد اعمامها وزوجة عمها واقفه مستنده على الحائط ...
فاجأها والدها بعد ان قالت السلام عليكم مباشرةً
الوالد: يابت ودعمك (.........) دا قال دايرك يعنى طلب يدك رايك شنو؟
الابنه :دون تردد قالت وبدون تفكير (انا دايره اقرأ)!!!!!!!
اندهش الجميع وهم بين مصدق ومكذب فلم ينبثوا للبنت شفه تراجعت البنت قليلا قليلا حتى وجدت نفسها خارج الصالون تسترق السمع الى الحوار المقتضب الذى يدور بالداخل
الام :والله البت دى مجنونه انا عارفاها دايره الولد دا بس السخته شنو مابعرف.
الاب : ياود انت رأيك شنو ؟
الاخ: والله ياابوى انا حاس بى انو العلاقه بيناتم جيده جدا وهو صاحبى وودعمى وهى اختى يعنى لو بتكرهو كنت عرفت
الخال: كدى ياجماعه نخلى الموضوع دا شويه وانا بتكلم مع البت واجيب لكم خبرها
زوجة العم : قالت دايره تقرا قالت طيب الونسه والاحترام الكلو يوم والطلوع والنزول دا يسمو شنو ؟؟؟؟؟؟
تركتهم يتحاورون بين مندهش ومستغرب وخرجت لاتلوى على شئ فصادفها ابن عمها العريس المرفوض عند الباب ... فقال لها : انا عارف السبب ماقرايه عاوز اعرف البينا دا نسميهو شنو ؟ واعرف سبب الرفض الحقيقى شنو واعتبري دا اخر طلب.
فقالت ....

ود عمـى ياغالـى (طارق عبدالقيوم)
ود عمى ياغالى اسمعنى فد مرَّه
خجلانه اقول ليكا لكنى مضطره
***
تكفيك وسامتك بس كان الجمال مقياس
فضلا عن احلى خصال راقى ورقيق وناس
زان كبريائك زوق وانفه ورجوله وباس
وفوق الذكرتو كمان مابتنقصك شهره
***
عاجب بنات الحى وليهن فتى الاحلام
وانا زاتى معجبه بيك وبعتزه بيكا دوام
لكنو اعجاب زول يملك مشاعرو تمام
ما قايله للامال بيقيف حجر عثره
***
يوم شاورونى عليك ما قلت فيك عيوب
ما انت ود عمى ولى اخواتى مقنع وتوب
كان عذرى واهى صحيح عذر انفعال وهروب
وبين دهشه واستغراب انا قلت دايره اقرا
***
لكنو ما كان صاح وماها القرايه سبب
وانا خفت اقول الصاح ويقولوا قلة ادب
مانى البت البتقيف ترفض لى ابوها طلب
وانا باره بى والدى من العقوق ابرا
***
لكنو كان مفروض وواجب على اختار
وكان العقل مابين حب واحترام محتار
مالقيت مكان فى النص بين الجنان والنار
وانحزت لى قلبى واخترت بالفطره
***
صاح الحديد بيذوب وبينصهر بالنار
وبين مطرقه وسندان يتقوَم المسمار
وعاتى الجبال بيزول بالعزم والاصرار
الا القليب مابريد بالقوه والجبره
***
صعب انو تلقا مناك فى الدنيا زى ماتدور
وهراوة الاقدار بين الامانى تدور
الصدفه باعه طويل والحظ بيلعب دور
ودايما مع العشاق ما بتسلم الجره
***
صدقنى ما بالايد الدايرو ينسوه
ومين يستطيع تبديل القسمه بالقوه
سامح اخيتك اخوى لا تنسى للخوه
ومهما الاخت غلطت مقبول اكيد عذره
***
دايراكا تبقى ربيع يغشى المحل والصى
ودايراك تكون للناس قدوه ونموذج حى
يشمل عفوك الكل ينشره غيمه على
زى زهره للقاطفين برضو بيفوح عطره
***
الدنيا كوم احزان تتخلله الفرحه
ومعانى متناقضات يصعب دوام شرحه
الحزن مهما طال يتلاشى فى لمحه
ومواسم الافراح دايما عجول قطره
***
لو غربت ضحكه الدمعه بتشرِّق
وبتجمع الاقدار كان القسم تفرق
ليل الالم لو طال شمس الهنا بتشرق
وبترحل الاحزان مهما يطول عمره
***
اعذرنى ودعمى والله مابيدى
وانت الطلبتو عزيز وانا زاتى ماعندى
وبقولو فاقد الشئ من وين وكيف يدى
وانا قلبى ماهو معاى شالو الملاك فره
منقول من منتديات محمد النصري

[شهرزاد]

لم ولن توفنى بنت عدنان حقى فى سرد هذه القصه الواقعيه المعاشه التى المتنى كثيرا حاولت سردها فى قصيده ولو استطعت وصف نصف مأساتها اكون قد وفقت لأنها اعمق من الحروف والكلمات ......
تبدأ القصه عندما يموت والد محمد ويتركه فى بداية المشوار ليترك الدراسه ويسافر ويجتهد ويعمل فى كل المجالات ليعين والدته فى تربية اخوانه ودراستهم رغم يفاعة سنه . فعل كل شئ من اجل اخوانه الاثنين وشقيقته حتى تخرجوا وسافر اكبرهم الى الخارج وعمل هناك ليرسل لأخيه محمد خطاب يطلب فيه منه ان يخطب له ابنة عمه وهى حبيبة شقيقه(محمد) ......
ماذا فعل محمد وكيف تصرف هل مزق الرساله واكتفى. ام خطبها لنفسه وضرب باحلامه عرض الحائط من اجل شقيقه وقتل افراحه لتكتمل دائرة افراح اخيه هذا ماستعرفونه بعد قليل .

أمــل وألـــم
مين القال الدنيا بخيلة وديمة تشيل أبداً ما بتدي ؟
طبع الدنيا متِل ما قالوا زي الموجه تجيب وتودي
زي ما الفرح أيامو جميلة بتمشي بسرعة بدون ما تهدي
الأحزان تتنسي لحظاته وبرضو تقضي أيام وتعدي
*** *** ***
حزنت كل الدنيا عليه لمان مات الحاج (ود احمد)
يتم خمسة صغار يتباكوا أكبر واحد إسمو (محمد)
بعدو (أميرة) و (أمجد) و (سامي) وأصغر واحد فيهم (أحمد)
رمَّل (فاطمة) الباكية عليهو ونار أحزانه أبت ما تخمد
قعدت ومسكت راسه تمنح وتبكي الزمن الجاير وأسود
كيفن أقدر أشيل الشيلة أصلو الحال سجمان ومرمد
وكيف يا خويا تسيبني برايا في نص ليل وأمواج ورعد
حست بي أيدين ضاماها وحركة زول قدامه قعد
رفعت عينه تشوف الحاصل كان قدامه وليده (محمد)
قالها يُمه أنا عاوزك تصبري وأعرفي أنو جد وقت الجد
ليشن زغردوا ناس الحلة لمان قالوا ولدتي ولد
صغير أنا يمكن بس لكين في الحارّه الشبل بيستأسد
بشيل الشيلة علي لا تخافي بس دعواتك لي َّ مدد
بعود يا يمه الفرح الضاع مهما إتغيب وطالبو أمد
وفعلاً خلَّ المدرسة سافر وللأرزاق ما خلا بلد
والله أجاب لي دعوات أمو بقاله وليده يمين وسند
وكان بت عمو (أمل) شايفاه فتي الأحلام وبطل الغد
وكانت أمل الكل في الحلة جمال متميز وفايت الحد
تحبو وكل ما مرت سيرتو بتلقى خياله معاهُ شرد
وكل ما تحاول تكتب ليهُ آخر لحظة تخاف تتردد
تقولوا إتكلم وريح قلبي انا مبعا بت وأنت ولد
وكيف البت تتطاول وتعشق ويبقى سكات الولد الرد
كيفن تسكت ولي تتجاهل ويبقى أخير ملاك (السيد)
الدرويش الزاهد وهامل لا عندو أهل لا عندو بلد
الدرويش الجابو الشارع وفي زاوية حلتنا قعد
يسقي الشتل الضال بي جوزو ولي أزيار الزاوية إتجند
تقولو تعال بخطبلك أملَ معاى أخدم يتخيلو جد
تلقى حرت لك إنقايتين وبوَق وتيلن ومارن وسنَّد
ويومو اليبقى جعان ومفلس وسط الناس ينضارى ويشحد
وكلما شِلت صفيح للموية توتل جوزو معاي ورد
يحكي لي عن حبو وريدو وليهو سنين بس راجي الرد
وأنت سكاتك طال يا غالي وأنا راجاك مستني وعد
آخر يوم في إجازتو مشاله حكاله ظروفو وليها سرد
إنو الحالة مِتل ماك عارفه خليط ممزوج من فرح ونكد
يوم الفرحة تطير بالواحد ويوم أحزان وسهاد وكمد
وأول فرحة تعطر بيتنا يوم ما إتخرج وسافر (أمجد)
قال في الغربة بحقق حلمو وفيها طريق أحلامو معبد
بس نستنَ (أميرة) تكمل وأفرح بيك وبي حبنا نسعد
وتبقى الدنيا إبتسمت لينا وليك بتقدم وما بتردد
وخلي البينا يكون بيناتنا وسوي ضلوعك للريد سد
وسافر وعاد لي شغلو محمل بي إحساس أخضرَّ ورفهد
سنين عشرين من عمرو تمر مما سافر ويمكن أزيد
ما ضاق فيها حلات النوم ولا مرتاح فد مره هجد
وبنيت عمو هناك منتظرة والعرسان كل يوم تتردد
يناجي خياله يقولها أصبري لا ناسيك لا شوقي برد
قريب ألقاكى وأبل الشوق ويبقى لقاي لي حُزنك حد
*****
يوم جابولو جواب مستعجل فتحو ولي صفحاتو فرد
لقا جواهُ الما متوقع وآخر شي في عقلو ورد
سيل الدهشة جرف تفكيرو ولي لحظات بي عقلو شرد
طول الليل راقد سهران لا جاه النوم لا لحظة غمد
قرر بكره يسافر بدري ولما يعود حيكتب الرد
ولمن صبحت كان في اللوري حجز قدام في الكرسي قعد
وصل البيت الطوَّل منو بعد ما إستن وصبرو نفد
سالم خالتو وعمتو (زينب) وبالأحضان لي أمو قلد
حكى بالحاصل ليهم كلو ولي مضمون القصة سرد
إنو الجابو أمر مستعجل تفصح عنو رسالة من (أمجد)
كاتب قال نخطبلو بسرعة وحدد لي بت عمو قصد
قامت عمتو (زينب) فاتت لي بيت عمو تجيب الرد
أمل قالتلها خير يا عمة دون ما تفكر أو تتردد
ضمته عمتها قالت ليها إنشاء الله يكون بيت مال وسعد
إنتي جميلة بتملي العين وبرضو مهذب ورايق (أمجد)
سكتت لحظة وقالت تضحك عمتي غلطت قالت (أمجد)
(أمجد) مين يا عمتي صلي الإتقدم أخوه (محمد)
قالت عمته لا لا الدايرك ورسل خطبك (أمجد)
ويلا معايا براك بي نفسك شان ما نمشي هناك نتأكد
ولما (محمد) أكد ليها كان إنهارت وحيله برد
قالها (أمجد) فعلاً عاوزك ودمعو يكبكب فوق الخد
عشانو بضحي بأعظم حاجة ولو الحلم عشانو إتبدد
إنتي الروح بهديك إياهو وراضي أموت لو بيكي بيسعد
أنا المهدت طريق أفراحو كيف في يوم أجي أكون السد
ديل أخواني الأنا ربيتم وريدي أنا ليهم ما بتحدد
أنا خليت الدنيا عشانم وضقت عشانم ويل ونكد
ولو بتقسم فوقم عمري بقسمو فوقم ومابتردد
ونحن خلاص أصبحنا أخوان والموضوع بيناتنا أتعقد
كيفن ترفضي (أمجد) وترجعي عاد تنتظري (محمد)
واقفة (أمل) قدامو وتسمع ودمع العين في عينه جمد
كأنو إغتال الشوق العارم ولي أفراح جواها وئد
قالت كيف إتهنى بدونك وكيف في الدنيا بدونك أسعد
جرح الليد سرعان ما يبرأ وجرح الجوف كيفن يتضمد
وقلبي العشقك كده يستاهل إنو يعيش طول عمرو مشرد
وفاتت خلتو واقف ينضم ساهية وسارحه وباله شرد
وكان الريح تنهر بي بره هبوب وأمطار وبروق ورعد
والسكان من بدري إتلمو وكل واحد في بيتو هجد
ترجف وتبكي مباري الحيطة نص الليل كان قاصدي (السيد)
كان في الزاوية رقد هلكان راح في النوم لي إيدو إتوسد
متفرشلو دلق شوال جنب الحيطة رقد وإتمدد
صحتو قام مخلوع من نومو من قدامه بسرعة شرد
قالتلو رضيت بك وبكرة نعرس ما صدق بالهجمة قعد
وفعلاً بكرة بلا زغريد جاب شاهدين وعليها عقد
وبكت الحلة عليها هي حية وعاشت يومه دموع ونكد
وبكى بي حرقه وسافر وراجع جاري زيول الخيبة (محمد)
كتم الحزن العايش فيهُ وحكى بالحاصل كلم (أمجد)
قالو قسمت البت لي غيرك وكلو نصيب مكتوب ومقيد
خبر (السيد) وامل اتوزع بين الناس إنزاع واتردد
إنها عاشت في تعذيب والعبرات إنقلبو غدد
وإنو قليبه على الأحزان والالآم بالحيل إتعود
ويومه الفرحت وجابت بت حزنت تاني ومات (السيد)
ويوم الصدقة سمايتة كانت قالو الناس سموها (شهد)
وبعد سنتين إتحكى بالصدفة وفي الحاضرين كان قاعد (أمجد)
عرف القصة تدور حوالينو وقف الدم في جسمو جمد
كِره الدنيا وكِره الفيها وبكى وإتألم ولحق الحد
قاعد يبكي ويبكي ويبكي لمن غاب ولي وعيو فقد
كيفن أخوي الضحى وعانا عشاني إتبهدل وحلمو إتبدد
وكيفن أكون أنا سبب أحزانو وكيفن أكون لي فرحو لحد
دا المن قام ما غلط حاشا ولا بي حاجة على جحد
بعد يومين رجع السودان دون إنذار أو سابق وعد
عانق أخوه عناق مشتاق لي محبوبو أحضانو فرد
قالوا أنا عايزك توعدني وتحلف وتقسم ولي تتعهد
إنك إنت و (أمل) تتراضو وعهد الريد المات يتجدد
وبينك وبينه يعود الماضي ويحيا شرار الريد الهبد
هِن حلين يا أرجع أسع ولا كمان في عقدك أشهد
أخيراً وافق أخوه وخاصة بعد ما العودة طريقة إتمهد
وعاد من تاني فتى الأحلام وللمحبوبة العود أحمد
عادو وعاد الفرح الغاب وعاد من تاني وإتجدد
وفوق راس بيتم غنَّ القمري رقص طربان غنَّ وغرد
ونخل الحلة رقص فرحان مال طربان سل وجبد
وقعدو سوا الإتنين في الكوشة وكان بيناتم قاعدة (شهد)
بسمته ضاوية أطراف الدارة وختت فوق كل واحد يد
رسمت لوحة حلم اللقيا بي تحنان في أروع مشهد
وكل الناس بالفرحة إتباكو وكل إنسان للتاني قلد
وكانت (أمل) القمر الضاوي وكل الشافه وقف وإتشهد
وكان الفرح الفي عينيها دون ما تحسبو غنَّ وردد
زي ما الدنيا أحزانه كثيرة الأفراح ما ليها عدد

منقول من منتديات محمد النصري
(بقلم علاء الدين ابسير)

[شهرزاد]

بدايات الفرح
ريدك بدايات الفرح لٌُقياكِ حد عُمر الشقا
حُبك امل لاح في الأفق كان للتفاؤل بارقه
بالله كيفن زي هناى في لحظة اقسى وافارقا
كيفن عيونى يجيها نوم وهي بي هناكا مأرقه
وصل الجواب شايل الفرح رايع حروفو منمقه
حلق بي في جو من هُيام ورجع بي لي يوم اللقا
بعد السلام أسرِع تعال الغربة سيبه وفارقا
خليتني وحدي بلا رفيق باكية وحزينة مقلقه
قالت لي ساو كيفن هناك والعيش بلاى كيفن بقه
والدنيا من غيرك جحيم لكن تراها مدردقه
سافرت خليت الدموع من عيني ديمة مدفقه
وخليتني لاموت لا حياة بينن صِبحت معلقه
ساعة الوداع شلتك حُضن وفضلت فيك متعلقه
ما خُفت من كل العيون الكان علي مبحلقه
ايديَّ كانت في ايديك ماكنت رضيانه امرقه
بي لهفة أطوّل في الوداع مذهولة ماني مُصدقه
وساعة خلاص حان الفراق ولمحت دمعة مرقرقه
فجأة إنفجر بركان بكاى رَجَّ البوادي وغرَّقه
بهواك عشق من نوع فريد هتك القوانين خرَّقه
لو قسَّموه علي الخلوق براحه اكيد بيحوقه
إنت الفرح إنت الأمل وإنت الأماني المطلقه
وإنت الهدف في كون بقت أهدافو ماها محققه
دونك ثواني الليل طوال ومعاك تمُر متلاحقه
وليلاَ يضمنا مابنحس بي وقتو لما نشرَّقه
نشرب سلاف الريد كئوس بيناتنا دايره مطبقه
نسكر نغبي من الهيام خَمرة غرامنا مُعتقة
مليت رصيف الإنتظار في أفقو ديمة مُحدِقه
وراجاك تراني علي جمر بي نار فراقنا مُحرقه
ملعون ابو الغربة إن بقت تسبي السعادة وتسرقه
وعيشتاَ تنسيك لي اخير قبال ده يحصل طلـقه

[عصام سرالختم]

اليوم كانت هناك سهرة مع الشاعر علاء الدين بقناة النيل الازرق قدم فيها الشاعر علاء الدين الكثير من قصائده القديمة وبعض القصائد الجيدية
وينك يا شهرزاد لتواصلى التوثيق عن شعراء المنطقة