مامان يكتب : يتبع ـ وحكاية بت بدس

[صلاح هاشم السعيد]

يتبع ـ وحكاية بت بدس
عندما كنا شبابا ومغرمين أشد الغرام بقراءة المجلات، كنت أتضايق أيما ضيق من المواضيع التي تكتب مسلسلة في المجلات.. وعادة ما كانت تذيل بكلمة يتبع... وقد أعتدت في كتاباتي في مواقع الانترنت، على قلتها، أن أنزل مواضيعي كاملة ومرة واحدة. ويظل الموضوع مدلدل فوق فرعو لفترة بسيطة ثم يغطس في الكير ويحتل الحتلة الياها... وعليه فقد قررت منذ الآن أن أنزل مواضيعي بالقطارة والهدف هو شحتفة أرواح القراء في المقام الأول ثم ابقاء المواضيع مطفحة ... طبعا الأخوة المشتركين في سودانيز أون لاين وقرائها يعرفون أن هنالك شلليات ترفع المواضيع لبعضهم البعض... والماعندو شلة يروح شمار في مرقة. أفضل ما في موقعنا البركل الذي نعتز به إنو الشللية واطاتا عطرون...
ختاما أحكي لهم حكاية (بت بدس)... تربطنى صداقات مع شيب وشباب أهلنا الحسانية ، وهم يعيشون بيننا وأصبحوا جزءا لا يتجزأ من منطقتنا.. العم فضل المولى وشهرته فنقلت (بكسر الفاء والقاف والللام وتسكين التاء) يجيد العزف على الزمارة أو الزمبارة وهي آلة موسيقية يجيد الرعاة في البوادي العزف عليها... وكل قطعة موسيقية قصة .. ومنها قصة بت بدس... سألت العم فنقلت عن حكاية بت بدس فقال: بت بدس دي يا ولدي واحدي من بنات العرب .. كانت يتيمة الأم وما عندها خالات ولا عمات... ومن عادة سكان البوادي في مناسابات الأعراس أن تزغرد النساء كبيرات السن من الخالات والعمات لبناتهن عندما يرقصن في الدارة... ويبدو أن بت بدس نزلت في الدارة عشان ترقص وما في ولا واحدة من الحريم زغرت ليها... لكنها واصلت الرقص وكانت ترقص وتزغرد بنفسها... وهكذا تعزف المقطوعة الموسيقية.. الماعندو شلة في منتديات الانترنت عليه أن يرقص ويزغرد براهو

[صلاح هاشم السعيد]

صاحب النص الاصلي علاء أحمد الحسين كرار
يا زول اعتبرني خالتك و هاك الزغرودة دي . ايوي ايوي ايووووووووووووووووووووييييا..
بس الحقني بسرعة موضوعي قرب يغطس ..

[صلاح هاشم السعيد]

صاحب النص الاصلي : صلاح هاشم السعيد
الأخ مامان :
أن تكون في معزوفة سودانية ليها قصة دي معلومة جديدة ومفيدة ـ دا إذا كان فهمي صحيح لما قلت .
وبعدين منتديات البركل مش علمتنا النشر بالقطارة نحن اتعلمنا الكتابة والتفكير بالقطارة..

[صلاح هاشم السعيد]

كاتب النص الاصلي : عادل عسوم
بالجد ياأخ مامان مواضيعك نرجاها ومن أوائل المتداخلين برغم قلة متاوقتك علي بضاعتنا المزجاة
ليك الود وزغرودة فوق اللت صاحبنا علاء

[صلاح هاشم السعيد]

كاتب النص الاصلي : عيدابي
الاخ مامان تحياتى
ما ذهبت اليه فى كلامك صاح الى حدِ ما
ولكن الوضع فى البركل يختلف ناس البركل ماشين بى مفهوم ماب نمشى لى ناس
ماب يجونا يعنى انت تزورنى وانا ازورك بمعنى مامان نزل موضوع مرا عليهو عادل
عسوم بى تعليقِ مامان لازم يرد على عادل عسوم بما يراه مناسب حسب
التعليق ويشكره على المرور وكذلك مامان المفروض يمر على مواضيع الزملاء
ويسجل تعليقه والمزيور يرد على مامان وهكذا ومن خلال ذلك تبنى العلاقات
وعلى هذا الاساس تأسس الشلليات
لاحظ الزائر الذى انا اغتبست تعليقه حاول يزكرك ان انت لا تسجل ايى زيارات للزملاء
ولكن لم يضع ذلك شرطاً لزيارتك بل جاء لزيارتك ومن باب الحوش فكالو بيت زغاريد
وفى ذلك اقول ناس زى مامان فى هذا المنتدى يشكلو اضافة مهمة جداً وهم مكسب فى الحقيقة
لما لهم من مرجعية تراثية فنية وقصصية شاملة وما نأمله منك اخى مامان ان تطل علينا على
الاقل كل اسبوع بى موضوع وانا فتحت بوست بأسم الفنان الراحل النعام آدم رحمة الله
عليه توقعتك اول المشاركين فى هذا البوست ألا انك لم تشارك فى هذا الموضوع حتى الآن
لعلمى ان لك قصص وطرائف كثيره مع النعام آدم
وانا زى اخوانى ديل اختم بى زغروده وفى قلب الحوش ايوايوى.........؛؛؛؛

[صلاح هاشم السعيد]

كاتب النص الأصلي : عيدابي
الاخ مامان تحياتى
ما ذهبت اليه فى كلامك صاح الى حدِ ما
ولكن الوضع فى البركل يختلف ناس البركل ماشين بى مفهوم ماب نمشى لى ناس
ماب يجونا يعنى انت تزورنى وانا ازورك بمعنى مامان نزل موضوع مرا عليهو عادل
عسوم بى تعليقِ مامان لازم يرد على عادل عسوم بما يراه مناسب حسب
التعليق ويشكره على المرور وكذلك مامان المفروض يمر على مواضيع الزملاء
ويسجل تعليقه والمزيور يرد على مامان وهكذا ومن خلال ذلك تبنى العلاقات
وعلى هذا الاساس تأسس الشلليات
لاحظ الزائر الذى انا اغتبست تعليقه حاول يزكرك ان انت لا تسجل ايى زيارات للزملاء
ولكن لم يضع ذلك شرطاً لزيارتك بل جاء لزيارتك ومن باب الحوش فكالو بيت زغاريد
وفى ذلك اقول ناس زى مامان فى هذا المنتدى يشكلو اضافة مهمة جداً وهم مكسب فى الحقيقة
لما لهم من مرجعية تراثية فنية وقصصية شاملة وما نأمله منك اخى مامان ان تطل علينا على
الاقل كل اسبوع بى موضوع وانا فتحت بوست بأسم الفنان الراحل النعام آدم رحمة الله
عليه توقعتك اول المشاركين فى هذا البوست ألا انك لم تشارك فى هذا الموضوع حتى الآن
لعلمى ان لك قصص وطرائف كثيره مع النعام آدم
وانا زى اخوانى ديل اختم بى زغروده وفى قلب الحوش ايوايوى.........؛؛؛؛

[صلاح هاشم السعيد]

كاتب النص الاصلي: عثمان الحليبي :
الاخ مامان
موقع البركل هذا فرصة اتاحها لنا الزمن. ان اردنا الاستفادة منه يجب علينا ان نكتب بجدية. ولا شك ان الشللية موجودة. لذلك اتمني من الاخوان في المنتدي تكوين مجلس شيوخ من اكثر الناس اهتماما بامر المنتدي وان توضع خطط وبرامج يلتزم بها الاعضاء . وللعلم سالت اخ كان مواظبا علي المشاركات عن غيابه من البركل ولكنه اجابة بنفس طريقتك .

اتمني ان يكون البركل موقعنا الذي نناقش ونحل فيه قضايانا الهامة بجدية . والشكر للاخوة جميعا في احياء تقابة البركل.
وان كان الزغرودة فانا ساربط عراقيه في نصي واركز ليك بي سوط عنج حر ما لم يسيل ضهري دما من ضربك ما بمرق ولو شالوني منك اجيك راجع ...ابشر

عبدالرحمن يوسف
اخى مامان بعيدا عن الشلليه ونحن نتظر منك اضافة الكثير والكثير وانت الذى كتبت اشعار الدابى وعاشرة الاخ العزيز محمد سعيد وانت الحاضر والماضى للقرير وانت العاشق لصوت طمبور اذا مارنت ااسلاكه وانت العازق العازف اذا وضعت كل اصبع على سلكاية .
اخى مامان الموقع ما شاء الله اتنشر زى نجما فى سماه ضواى
نحصل ده ولاده نزغرت وين ولا وين ونرقص وين فى قليب الداره ولا فى طريفه البره والحكاية ماشى منشره ولا نبقى متل بت بدس . الموضوع يكون اليوم قى الوش بعد يوم تلقاه حتل . المهم حقوا الناس تتناقش فى تحديد الموضوعات المنشورة لاعطاء فرصة لكل المتداخلين وفرصة الرد
اخى نحن فى انتظار الجديد وان شاء الله تكون القطارة ضاعت منك عشان تكب كل الفى الفتيل

[صلاح هاشم السعيد]

كاتب النص الأصلي : أبو أيمن
الشغل هنا زي ماقالك عيدابي شغل كسيق يامامان.....جيتني في طهورة الوليدات أنا كمان أجيك وزيادي جبتلي أب خمسي ....أجيبلك ريال كامل....جيتك تشرف... إنشاء الله أخذتلك شبال ساكت...برضك رفعت المعنويات.......وغزرت الناس... نان ياااااااامامان يومك الجيت مو سلمنا عليك سلاماً كيف حار...حرارة العلاقة القديمة...ذكرناك بي ناس كانوا ساكنين معاك في بيت العزابة في حي الجامعة وقلنالك الجماعة ديل معانا بي هني...بس أصلك ماقتلي قعد تقول في شنو..... ورغماً عن كدي قلنا يبقى الزول نسى والشوق تبدل وبرضو ماهمانا...وخالطناك في مواضيعك بقدر مانستطيع......القضية ماها قضية شللية بل قضية تفاعل....يعني زيك كدا الواحد يعشم في رايو ويتشرف بو ويمثل إضافة للنقاش ويثريه ومن هنا يحدث التفاعل في المنتدي ويكثر رواده...أما أن يضن الإنسان بمشاركاته مع الآخرين ويطلب أن يشارك الناس معه......فهذه قد تكون فيها بعض الصعوبة إن لم تكن صعبة.......مع تحياتي الغالية..عباس محمد أحمد عباس

[صلاح هاشم السعيد]

كاتب النص الأصلي : طيبان
والمديعة لما سألت الفنان النعام آدم في الأغنية الجات فيها كلمة مامان عن معني (مامان)
رد ببديهته الحاضرة
مامان دا نوع من الطيور حسن الصوت.....
هده القصة طافت بخاطري وأنا أقرأ اسمك ومداخلة أحد الأحباب عن علاقتك بالنعام آدم...
أرجو تصحيح القصة أولا
والكتابة
لنا
مادمنا نستحق

[صلاح هاشم السعيد]

كاتب النص الأصلي : Al-Shaygi
مامان أخوي
ما تنكر حقوقي ...
في ذمتك أنا ما قاعد أزغرد ليك
والله أظني كمان قاعد أدي الشبال بالنيابة!!!!
أنت بس كدي أكتب في الأول وبعد داك شوف