مشيه رشيقه وخطوه دقاقه

[شهرزاد]

مناسبة القصيده هي:
جات بت ماشه قدام الشاعر و(عترت) ووقعت
(وأعتقد إنو الجماعه الحضور قالوا سبب الوقعه هوشلاقه البت)العتره
الشاعر /خليفة عثمان خليفة

مشيه رشيقه خطوه دقاقه
أبداً ماوقعتي شلاقه
عينيك باب نعاسه متاقه
والسماء والأرض عشاقه
رايداكي الأرض والوقعه
تعبير ليكي عن أشواقه
خوفي عليكي بكره تطيري
لمه تكون سماك مشتاقه
عتبت من وجع تتهادى
في رقه ودلال متناهيه
وعاتبنا الأرض لمناها
وريناها إنها خاتيه
حذرناها ماترميها
فتشي عن وسائل تانيه
تمتمت الأرض محزونه
قات لي غلبني هوايا
زاد الشوق وقلب قلبي في القلايه
شوق إيه يا أرض جنيتي؟؟
يومي عليكي ماشه وجايه
وأربعه فوق تلاتين مره
تسجد فوق وشيك صلايه
فندت الأرض أقوالي
بي نفس الوزن والقافيه
اَه أنا من سجوده عليّ
واَه من غيرة المصلايه
كيف تلمس ترابي جبينه
أو زهر الخدود الناديه
وفيها رشاقه ماخلتني
أشعر بيها ماشه وجايه
تلبس لي الكعاب العالي
ماحصل أنغرز في حشايا
سرعه قبل تختو قديمه
ترفعوا للخطيوه الجايه
أرجوك: تمشي مكتوب ريده
لي ست الجمال الأيه
قوليها: الأرض رايداكي
بالبي ما أظنها داريه
حني عليّ حققي لي
مناي ورجايا
تسلمي من زمان الغش
تلاقي وفايا
قلب الريده عندي مداهو
كم قيس إندفن جوايا
حبة ريد وزي ماك دايره
حبي سوايا
باقي المويه والبارد
خساره تخلي في الكبايه
كلما والارض يكفيها
تكشح فوقي فضلة شايا
ضحكتّ عليها قالت لي
دا الإنسان وظلموا معايا
من يادوبه شافعه صغيره
حزّره بي أوامر ناهيه
ابعدي من التراب ياشافعه
أوعي من عليها تلعبي لاهيه
ناسي الناسي إنو أنا أم
عطوفه وحانيه
والإنسان ولد اَدم
واَدم في النهايه جنايه
صبرّت الأرض واسيته
صدّقتك كلامك صاح
إتعكر سماي ناداني
قال ماصاح
البت بتي كانت نجمه
تهدي الراح
تواسي العاشق المجروح
تسامر في البنوموا صباح
قريبه من الأرض ضوّايه
دايماً للبشر ترتاح
وكت بقت الأرض غابات
والإنسان صبح سفاح
نزلت نجمتي الضوايه
تملأ الدنيا ريد وسماح
وأقسمت الأرض ترعاها
حتى تصوم من الكتاح
وتتوحم عليها المنقه
والأنناسه والتفاح
وتهدي أنفاسه للياسمين
شذى الفواح
ولمه اشتاق
أقالدا بالمطر وإنداح
وأريح باله زين وأرتاح
وماحوى إتفاق بيناتنا
قصة ريده للإصفاح
وأضطرب السما إتعكر
وزمجر وصاح
ودنقرت الأرض خجلانه
تستسمح سماها سماح
قالتلوا العهود مرعيه
وأعتبر السمعتو مزاح
الريد مرتبط بالروح
وللسما تصعد الأرواح

[الهادي قنديل]

الرائعه للحد البعيد شهرذاد

ما اروعك وانت توثقين لهذا الجمال
____________________

وحلفت ماني مارق من هنا ساكت

وسوف اواصل معك رحلة التوثيق هنا وهناك
______________________
يلا قولي واحد


مامعقول
خليفه عثمان خليفه

انــا الـعـلــيـت هـواك بـراي لــمــن طـال وطـال معناي
وقــادر تــانـي بـرضـو بـراي اهـد اركانـو غادي وجاى
يا خي ما معقول
تحبي سواي وتنسي وفاي وتغدري بي
تـهـدى بـنـاى تـقرري تانى ترجعى لى ؟
يا خي ما معقول
اكــــون لـلـــيـــــلـى مــســتـــنـــــيــك وراجـــــــى الرى
حـلـيـلـو زمن بسوقنى الشوق على لقياك رضى ورضى
هـسـى بـقــيـت يـجــيـــنـى نـــداك اطـانـش واقـول مالى
خــريــفـــك كـان شــلـع بـــراقــو بـرفــع للكريـم ايدي
اقــــول حـــولــيــنــا ماها عليـنا تنزل في الهويد والصى
رفـضـتـا هـواك مـن طـرفك عشان ربطك مرخرخ ونى
طــويــت ذكــراك والاحـــلام ونـجـضـتـــا الجرح بالكى
ودقــيــت صــدرى لـلأيـــام مـــســارب لـلأمــل والضى
بــعــد مـا كــنــتـى كـل حــــيـــاتـى هـسع ما بتمثلى شئ
فــرصـه سـعـيــده كـانـــت بــيـك علـيك بتعرف احزانى
واعــرف ويــن مــقــاس صـبــرى قــوة عزمى وايمانى
وحـــات الله مـــا مــحـــزون عــلـى الــراويـهـو شريانى
زمــان اديـــتـــك الـمـعــدوم ووســدتــك قـلــــيــب حانى
ومـنـك مـالـقـيــت غـيـر طعنه سكنت فى صميم اعضاى
وضـريـت ريــدى لـيـك لـلــريـح وشــدت للامـاني قواى
وشـقـيــت بـيـن جروحى دروب ومن غدر الحبيب نجاى
وكــت اظـــلــم عــلـي الـكــون وودع في الـنـجـم ضواى
رغــم الـــبـي مــن احــزان وكــنــت عـلـي الـفرح هداى
والـجـرح الـبـيـنـتـح جـوه يـطـلـع مـن صــمـيــمـو غناى
مـا الـقـمـريـه رغــم الـنـبـله وصـوت الـطـلقه والحاحاى
مـــالـى غـــنــاهـا عــصـريـاتـنـا يـوم مـا خـلـت القوقاى

ياخي مامعقول

[ود إدريس]

مناسبة القصيده هي:
جات بت ماشه قدام الشاعر و(عترت) ووقعت
(وأعتقد إنو الجماعه الحضور قالوا سبب الوقعه هوشلاقه البت)العتره
[U]الشاعر /خليفة عثمان خليفة[/
ودنقرت الأرض خجلانه
تستسمح سماها سماح
قالتلوا العهود مرعيه
وأعتبر السمعتو مزاح
الريد مرتبط بالروح
وللسما تصعد الأرواح

[/align]

الرائعه دومـــا شهرذاد .. لك التقدير وأنتى تسعدينـــا بأعمال
شعـــــــــراء عمالقة الشايقيه .. واليوم نسعد غاية السعاده بأن
نقـــــــــراء لهذا الشاعر الجــاد خليفه عثمان خليفه .. واسمحى ان أهنئك على
هذا الأختيار الموفق.. اســأل الله لك العافيه ومواصلة الإبداع

[ود إدريس]

[/align]

الرائع الهادى قنديل .. لك التقدير وأنت توثق للناس أعمال هؤلاء
الشعــــــــــراء .. والشاعر خليفه عثمان خليفه اظنه من الشعراء الشباب
قد سمعنــا له بعض الأغــانى من بعض فنانى الطمبور ولكن مجاراة لموضة السرعه فـــى الأداء
قد لا نفهم إلا القليل من الفنان حيث السرعة فى الأداء صار الطابع الأعم
لكل الفنــانين .. ولكن أن نقرأهــا بهذه الطريقه .. نستطيع نقول شــاعر
مبدع ... لك التحيه وأتحفنـــا دومــا بهذه الروائع .. دمت بعافيه

[شهرزاد]

الرائعه للحد البعيد شهرذاد

ما اروعك وانت توثقين لهذا الجمال
____________________








وما أروعك وأنت تشكل حضوراً أنيقاً ...
شكراً

[الهادي قنديل]

وما أروعك وأنت تشكل حضوراً أنيقاً ...
شكراً


وكان لابد لهذا الحضور ان يستمر

لكِ وللرائع ود أدريس ولهم

حق الام

أبوك لبى نداء الأجل خلاك فى الأرحام جنين
عند المخاض ساعة مجيك طار المنام من أى عين
يوم قالو لى أمك ولد وفى الفرحة غرقو الحاضرين
سرحت مع الأحلام سمت قالت عشاى يكبر متين
أشوف جديدو أضوق حلوهو الناس يقولو عديل وزين
يزرع حياتى هنا وسرور يملاها بالمال والبنين
اتحزمت واتلزمت وسألت إله الكون يعين
صدت جميع المغريات ورفضت إعانة كل معين
صبرت على ظلم الحسن وجازيت بى ظلم الحسي
*****
حليلك يا الضميرك مات ودست قيمنا واتوطيت
تابع نفسك الأمارة حدك فتو واتعديت
قول لى يا خى لو بالجد وعقلك فيك وما جنيت
تسمع كيف كلام مرتك وترضى أمك تفوت البيت
زهدت فى نعيم الدنيا شان فاخر الثياب تكسيك
ورفضت بى أدب خطابا شان ما يبقو ليك شريك
حلمك قبل يصبح منية ختتو ليك بين إيديك
بالهنا والنعيم العشتو حلمك رابك الحوليك
صبحت جنتا وأحلاما غيرك ما فى ليها طريق
راس الشوكى لو مساك يشعل فى قليبا حريق
تطويها الهموم والغمة لمان إنت تصحى تفيق
لو فد يوم حردت غداك يومين ما تفك الريق
بالجد والعزم والنخوة والصبر النجد من ضيق
وربت بالحلال والله شاهدين العزول وصديق
ناس الحلة والعرفوها والجيران فى أى فريق
ما ذكروها غير حمدوها بالمصلاية والإبريق
لكن وا ضياع ترباتا حقها ذرة ما أوفيت
حليلا ووا خسار بلالا يبقالك سعيد وبخيت
كايس للسعادة دروبا دابك بى جدارة شقيت
فرشك تانى يبقه جحيم ومابتقدر عليهو تبيت
غرقت فى الهموم والآهة ايدك ليها ما مديت
ومرضت ما سعيت فى علاجا لا هماك لا اهتميت
مهما تصلى والله تزكى كان عمرت كان حجيت
رب العزة كيفن يرضى أمك ليها ما أرضيت
كيف ينتم ليك مراد وضاع راس العشم والخيط
ولسة فى الغلط متمادى السويتو قايلو بسيط
مفضوح تانى ما ضاراك لا ليل لا زمن لا حيط
عين الناس محل ما تمشى استنكارا بيك يحيط
وين راح تلقى زى الأم قلب وافى وحنانو وهيط
وما فى شبيها غير نخلتنا لما تشيل تسوى سبيط
جازت بالرطب راميها ما قالتلو إنت قسيت
قاومت أى ريح جاييها عشان الطير عليها يبيت
يا شارب كؤؤس الغفلة لو صحاك غناى ووعيت
حصل والدتك رضيها طوق جيدا بالسوميت
والله أحسن جناك الوالدو فيك يسوى ما سويت
حق الأم قرض .. صدقنى.. ضاقتو فى جليدا كريت

[الهادي قنديل]

الرائع الهادى قنديل .. لك التقدير وأنت توثق للناس أعمال هؤلاء
الشعــــــــــراء .. والشاعر خليفه عثمان خليفه اظنه من الشعراء الشباب
قد سمعنــا له بعض الأغــانى من بعض فنانى الطمبور ولكن مجاراة لموضة السرعه فـــى الأداء
قد لا نفهم إلا القليل من الفنان حيث السرعة فى الأداء صار الطابع الأعم
لكل الفنــانين .. ولكن أن نقرأهــا بهذه الطريقه .. نستطيع نقول شــاعر
مبدع ... لك التحيه وأتحفنـــا دومــا بهذه الروائع .. دمت بعافيه

شكرا كتير اخي ود ادريس

وروعتك تتجلى في ردودك

ووعد مني عشان عيونك امشي للافراح واجيبا

ود ادريس اقول ليك حاجه؟

بس خليك قريب

[شهرزاد]

باب الرجال
جيبي موسك وشرحّيني
وقطّعيني حتت صغار
وأكمديلي عيوني شطه
أملي كل أحشاي نار
وكهربيني ومدّديني
علي القضيب تحت القطار
وجيبي فندك وفندكيني
وضرّي ذاتي مع الغبار
أصلي كايس الموت بنازع
من بقيتي توقفيني
علي محطات الترقب
والحذر والإنتظار
ولاهو داير الموت يجيني
ولاني قادر أخب عليهو
عن طريق الإنتحار
قبل أريدك بي قلب زهر البنفسج
ويبكي يتعلق قليبي
يحاكي شفّعنا الصغار
إغتسلت وإعتصمت ف الف غار
وناديت علي ريدك تعال
وشلت سكيني ومشينا ورا الجبال
ريدك فتح صدري ونزع
أي مثقال ذره ميل
لي سواكي يابت الحلال
وإبليس حقد صبغ السحاب
بي دمي حار
وأهدي الشمس
قال ليها البسي للمغيب
اَخر النهار
دايرني شان أحقد عليك
كلما أشوف لون الحَمَار
وبدل يكون البينا ريد
البيني بينك يبقى تار
قلبي البريدك
مابفرط حتى لو كان ف الخيال
بعدك قفل باب الحريم
ما أدى لي غيرك مجال
وكل البنات الجن وراك
دخلنّوا بي باب الرجال

[شهرزاد]

الأم تقــول أصـــبر

البت تقول أصبر الأم تقول أصبر وابوها قال نصبر
جاها الغريب وعقد ما قالوا ليهو اصبر
علمتها وربيت إن شاءالله حسنه وأجر
ده زرعك الراويهو قوم لى حصادوا وصُر
ده ضلك الحارى يصبح رهين ويشُر
ورغم إنك آ المسكين ما خلو ليك صبر
وأنا ذاتى شن لى غير ليك أقول أصبر
إنفرهدت يا داب تعجب نضاره يسُر
دابها هلاّ هلال قبل إكتمالها بدر
الكسوة والمصروف واجب عليك نزُر
وتلقى ما تلقى إن شاء الله تمشى تجر
الرجعة آخر الليل والقومة بدري فجُر
والريد مروة جان والعاشق آ بيفتُر
ما خافوا فيك الله وما قدروا أى عذُر
وكل البقولوا مُجاب ست الحسان تأمر
خيلك تجقلب حد وما تلقى أى شكر
استاذ خصوصى صباح وواحد يقري عصر
وتعبك على جيدها يلصف سلاسل ودر
بجي من دبي مختوم أصلى ومجمر وحُر
نكران جميل وجحود لو كنتا بتذكر
تمرنا لما يشيل وتكون صبايتو خُدر
يمسك يكنكش زين لا يقسى لا ينكر
ويقع براهو يحت أول ما يبقى تمر
من العليك والبيك رب العباد يستر
قدرك تقاسى الويل بيك الحبيب يغدر
وتعد نجوم الليل والدنيا لسه عصر
وتضيع أمانى رحاب حصاد سنين وعمر

[شهرزاد]

تلفــــــــون العـــــــالم
تلفون العالم حوّل تلاته أصفار إتنين
حاولنا وقالوا نراجع خدمات المشتركين
ولقينا الوعي أصفار والصف العربي إتنين
وعالمنا التالت كلوا مادافع ليهو سنين
ومازالت جوليا تغني الشعب العربي وين
..................
بالمشنقه والتعذيب صهيوني كتل طفلين
جرايد وتلفزيون خبر مأساوي حزين
نقراهو زي التحزير الفوق علب التدخين
بالجرح ولا شاعرين ونقبل في السكين
لمتين لمتين لمتين
.................
جراحك يافلسطين تتعمّق كل مايوم
ويتباكى طفل بغداد والشعب العربي ينوم
والخط الوهمي فصل القاهره والخرطوم
وفي الواقع هم تيمان راضعين من ثديّ النيل
بيناتم إلفه وريد ومشاتل ورد جميل
لمتين لمتين لمتين
................
الطيبه بلاد الشام القبله والحرمين
أحبابي المصريين أحبابي الليبيين
ليه بس يلزمني جواز وأنا ماشي علي البحرين
أخوان كلنا أخوان في الضاد والدم والدين
لمتين لمتين لمتين
...............
وإتحطم سور برلين ويتلموا أطراف الصين
ونتخاصم ومختلفين لمتين لمتين لمتين
...............
لمتين لمتين لمتين في دمنا تجري غُزيه
وعبيد حايكتل زيد ماطال بيملك ديّه
ياعربي نعرفك كيف من غير إثبات وهويه
بالجنز الأمريكاني والجزمه الإيطاليه
والعطر الماتايواني والبنز الألمانيه
لمتين لمتين لمتين
................
شارعنا العربي ضجيج عادات وقيم غربيه
الليله فتاة عدنان كأنها باريسيه
وماينتج في هوليود (عادات عندنا عصريه)
والطفل العربي هزيل يحتاج لي نشأه سويه
وماما وبابا غياب في المشغله والورديه
ياساده ياحكام على مين المسئوليه
القوه بقت أفكار وثورات معلوماتيه
ومقص السلطه يطول أفكار طيبه وثوريه
وللمشنقه راحوا عقول جباره وواعيه ذكيه
والفكر العربي سجين في حوجه إلى حريه
تعليم تعليم تعليم الخبز ولاهميه
أوراق وكتب وأقلام تستورد بالكميه
وبالصوت العالي ننادي بي وحده متينه قويه