الشاعر / حسن الدابي

[شهرزاد]

اه يا خلايه
مسخت عوم البترطن في جروفه
اه يا خلايه فجولي اللشوفه
الصدير رجفاته سبب لي خوفه
خام ثمار ال الله قال دانيت قطوفا
الرقيبه قزازة الروم في وقوفا
جرعتني العلاقم بي صنوفه
بروقيها الداره لخبطي لي صفوفا
خلي حسادك عديل تخضع انوفا
ديسه شوف عيني من شكت كتوفا
الا دايما نافره يا ناس ما ولوفا
صممن جاراتا قال لي عطوفه
ملا شوفته لي تشهر لي سيوفا
العلي والبي كلو سبب عزوفا
لو تحلو رموز اصابع اليد حروفا

[شهرزاد]

يا عيون ابكي دمع الدم

الزمان بي عذابي حكم
تراني بقوقي بغني واترنم
اجرو مع الخيال النم
على الامي زدت الم
مضروب من عيونو سهم
دقيت بابو قالي نعم
غلبني معاهو اتكلم
قال بي مطلبك بهتم
قلتلوا ياخي جود وارحم
لو في بيتو يتبسم
عبيرو يفوح بعيد ينشم
طريحة وبيها يتبلم
اظنو على هلاكي عزم
قاسي قليبو ما بيرحم
حديد ما من لحم او دم
مر علي ما سلم
منو وليهو بتظلم

[شهرزاد]

** عبدو اخوى **

صحيح ياعبدو اخوى قولك حقيقه
كتير الطفشه ( الجلا ) من فريقه
يزازى نقل سميحات الخليقه
ورنين صفارتو نفسى ابت تطيقه
معاها انا كيف اسوى شنو الطريقه
تعيق فى الناس اله الناس يعيقه
اتمناله فى دالة غريقه
تحتل فيها ما تفضل شقيقه
تطير ريشاته منها بى فريقه
وصميم مكناته تلتهمو الحريقه
قمرات نومه تسكن ام دريقه
وتولد فى عنابرو عشان غريقه
بناتنا حليل سروحن فى السبيقه
لقيط ام راس مبقعى و الكريقه
اديهن حلوه غير لبس ام دقيقه
وبدون كترت غويش نفسن طليقه
جمالن خلقه لو لفحن طريقه
وبدون مضغوط فراد باهى زيقه
يا حليل قتانن الفوق السليقه
ليقيمتو تطمن الضارباهو ريقه
كتير قبلك يئن مضروب بديقه
تسد عبراتو تسمع لى شهيقه

[شهرزاد]

تسفكي دماي

تسفكي دماي تقولي مسافره يا محبوبه كيف
حرام لحظات تهدي بناي تقلبي ربيعي صيف
صيف نظاهو ينشف السما في الخريف
لادعاشات لامطر لاهمبريب لاحتى زيف
شبح الفرقه كشر نايبو طل علي مخيف
خلق لي زهور اقرقر وابكي ادور بقفاي واقيف
يا حليل الامو سارحابيهو بي ساي والعريف
الجبوب ما جاب قرن يادوبو من الجش مو اريف
عايني كفيلو هوجج صدرو اما وسط نحيف
يوقل في يدفن خوف بعد ماكان اليف
اما بسيمتو تلخم لخمه منها يا لطيف
عارفوا براي كايس بلوه لي بلواي يضيف
قلبي العندو قلت يسندو سله عليهو سيف
قلت اشكيهو لي قاضيهو عارف القاضي في صفو بيقيف
اقيفوا معاي وقيعكم يا حواجنين الجريف
انهمو الفكيه شيخ ابوكم قولوا جانا الدابي ضيف
كفوفكم ارفعوهن لي المهيمن واللطيف
يجيب لي دعاي انا الواقفلي بين هدام وجيف
لا قطر ينهر يقوم لاطايره بالسما تستضيف
لا باصات ولا عربات تحرك سنت من ضلو الوريف

[شهرزاد]

ساري الليل
ما شفت عوض تابع النجمات فات لي قدام ؟؟
ياساري الليل
من يوم البحر الجانا وتسب وقام
يوم دخل الحلة وهدم بيوتنا ترا وهدام
صبحنا ضيوف ما خلاّ وراهو صلة أرحام
يوم داكا عوض خلاها مرق في سفره طويل مع الأيام
درويشاً صغير عشرة أعوام
الزول زول الله من الصلاح الرفعت عنهم الأقلام
من غرس الرسل الدارو الآخرة أم خيرن دام
التركو نعيم الدنيا الزايل للعبدوها وللحكام
***
متجلبب بي تيبان الرحمة غتا وهندام
متنعلت بي أرض الله الواسعة خطى الأقدام
متزود شايل خير الزاد تقى وإلهام
يا ساري الليل ما شفت جناح جبريل غتاهو بقالو مظلة جلوس وقيام
يبقالي نجع متوجه قاصد أرض الشام
ما شفتو هناك مع الحجاج لابس الإحرام
بين يثرب ومكة وفي بيت الله المكسي رخام
يبقالي هناك يكون مندسي مع الخدام
***
فتشنا سما أرض ما شفنا منام
في التمر الشايل تكا سبيطو مدلول خام
في الجرف الأخضر في لوبيهو وفي النجام
في جدول جاري تسرسر مويتو نعيماً دام
يا ساري الليل أنا داير أوصيك وأديك كلام
الروح إن صعدت لي باريها وفي جنات الخلد مقام
لو لاقيتو في إي مكان في إي زحام
روح كلمو قولو الحلة بكت من شوقا إليك تغريك سلام

[ود إدريس]

الرائعه روعة الشمـــــــــــــــال شهرزاد .. لك التحيه
ماذا نقول فى حسن الدابـــى غير أنه معلم الأجيال .. وضع لبنة الشعر
المغنــــــــــــى وسار على دربه السايرون .. عاد حسن الدابى عندو من الشعر
مـــا يفوق الخيال .. عشان كده إجتهدى وأمتعينــا بشعره السلـــــــــــس ..
ملاحظه : أنا بعرف أغنية يا ســــــــــارى الليل ما شفت عوض لإبنه حــاتم ..
لك التحيه والتقدير على كل جهد تبذلينــــه .. لك الود

[شهرزاد]

الرائعه روعة الشمـــــــــــــــال شهرزاد .. لك التحيه
ماذا نقول فى حسن الدابـــى غير أنه معلم الأجيال .. وضع لبنة الشعر
المغنــــــــــــى وسار على دربه السايرون .. عاد حسن الدابى عندو من الشعر
مـــا يفوق الخيال .. عشان كده إجتهدى وأمتعينــا بشعره السلـــــــــــس ..
ملاحظه : أنا بعرف أغنية يا ســــــــــارى الليل ما شفت عوض لإبنه حــاتم ..
لك التحيه والتقدير على كل جهد تبذلينــــه .. لك الود

ود إدريس
طلاتك فرح .....
فعلا ملاحظتك في محلها ...
ساري الليل للشاعر / حاتم حسن الدابي
عزراً

[شهرزاد]

البرتكان تقليد صفاره
يا خلايق لي جاره البرتكان تقليد صفاره
فرهدت في عز عماره ما بجيبو حرام خباره
حابكة بالمليون تجاره نهار وليل قاعدين حياره
سيدا قال ليهم صغاره ما استوت دفيق ثماره
مرة ليها مشيت زياره عاكسوني أهل الغفاره
قالوا زي شوفتك خساره يا خي سيبنا بلا عواره
في الفؤاد موقودة ناره وقلبي مجروح بي حساره
زاد شراييني انفجاره إلا وقفت لي الجباره
رحت استفسر كباره هدوني قالوا غراق بحاره
العقلة فايتي من الحدارة والخدود زاد ازدهاره
جبينة يشهد بالنضارة عبيرها منو الناس سكارى
تبتسم يغريك هزاره رموش عيونا أخد حذاره
شوفو عقليتي وجساره بقت تجيد لحن العذارى
لو تعود تسكن دياره بودي للفقرا المزارة
ما لقيت لي طريق بصاره دابة روحي قرب وداره

[صلاح هاشم السعيد]

بنتنا/ العزيزة / شهرزاد
ما أروع ما تفعلينه في هذا المنتدى ـ

[شهرزاد]

بنتنا/ العزيزة / شهرزاد
ما أروع ما تفعلينه في هذا المنتدى ـ

الغالي / صلاح هاشم السعيد
جياتك ندي الياسمين ..
ما أروعها ..

[عادل عثمان الطيب]

شهرذاد يارايعة يا غالية كيفنك وازيك
الذي تقومين به لهو كبير جدا وعمل رايع
روعتك لانك اصيلة ومن طين بلادي
تسلم تلكم الايادي التي تمدنا بالروح
اللا انهزامية والفن الجميل المروح لانفسنا
تسلمي ويسلم كل جميل يا رائعة الجمال شكرا

[شهرزاد]

شهرذاد يارايعة يا غالية كيفنك وازيك
الذي تقومين به لهو كبير جدا وعمل رايع
روعتك لانك اصيلة ومن طين بلادي
تسلم تلكم الايادي التي تمدنا بالروح
اللا انهزامية والفن الجميل المروح لانفسنا
تسلمي ويسلم كل جميل يا رائعة الجمال شكرا

مبدعنا / عادل عثمان الطيب
نحن نمتلك فن جميل جمال نيلنا
وأصيل أصالة اهلنا ..
وشامخ شموخ عزتنا وكرامتنا ..
لذلك من الواجب ..
حفظه .. وجمعه .. وتنظيمه .. وترتيبه ..
حتي تتطلع عليه الأجيال القادمة ..
ويسيرو علي نهجه ..
دمت بكل الود ..
وحفظك الله لتسكن الأبداع في دواخلنا ..