أب شخيت
09-19-2007, 01:25 PM
الفصل الأول: قبل الإعلان عن الكاميرا الخفية
سيرة ذاتية لأب شخيت الفنيطيط[/color]
يا حبان ويا أهل...نازل جديد لي كم يوم في بيت (بوست) أخونا زكريا بابكر (عتود دقش)...الحقيقة جابتني ريحة الشية...النفيسة الصغيرة طمعتني ونزلت هناك ..وفكيت قوقل الكنت راكبو ورجع لي مراحو...ومن اليوم داك ما ضقت طعم الاكل ولا الشراب مع إني ضيف..قرّبت أقول الحكاية (إما الناس كسالى أو فسالى أو دغالة) لكن ربك ستر مسكت لساني علي وختيت الخمسة فوق الإتنين.!!!ولي يوم الله دا مافي زول قال لي مرحبتين ولا حتى مرحبة واحدة.!!!
قلت ياخي الجماعة ديل بيكونو قالوا الزول دا شن نفرو ما داير يفوتنا ليه؟!!!...خاصة بعد ما الهكر شطبو من العضوية ومسحبو الواطة..قام تاني اتنفّض وقعد!!!!
قلت لي نفسي مرحب بي نفسي وحباب نفسي إتفضل يا نفسي وحرم تقعد عزيز مكرم!!!!بعد الإستقبال الحار دا من نفسي لي نفسي قلت لي نفسي:
عافي منك يا بُنَيْ
نافي عنك كل غي
إنت ما لسع صِبَيْ
ما أظن تميت تِنَيْ
أصلي من تبَّيت جِنَيْ
زولا نجيض ما عوقة نَيْ
كنت شيَّال للهموم ما قلت آه ولا قلت حي
يوماتي سارح بالغِنيم فوق الوِدَيْ
حافي جاري ورا السِّعَيْ
ومن عِصيرا بدري حشّيت العِشَيْ
أربِّط الكليقة أكرِّب وبالحبال لاويها لي
وأبيِّت الجبادة في البحر الخِوَيْ
مرات أشيل النبلة ألقِّط في الحِصَيْ
قصدي زرزور كان دباس مرات حِدَيْ
أَصَلّي فجري مع الديوك والدنيا يادوب فالقة ضَيْ
ما بنوم لامن يزول ضل الضُّحَيْ
وفي المدارس ماني زول هملان غِبَيْ
الفطرة طرقة كسرة بايته ملاحا مَيْ
مرات سخينة أو لِبينة أو رويب مرات لِبَيْ
والدابة كان دحشا حرون طغيان وما بخاف من عِصَيْ
أديهو فوق فرق الأضان يرميني رُبْ لافوق وُشَيْ
كم مرة والجنُّون معاي غدوتنا كانت بي كُدَيْ
نختف..نكابس..ننطط..نصارع..نجوط الدنيا ما همانا شَيْ
مرات أكمرق للتميرات بين الكراريق والخُشَيْ
والله امتِّق في المسور والعرق كاسيني زَيْ
ما أصلو كان اليوم سموم والدنيا صَيْ
وبرضو ماسك البوغة أقرع واحاحي في الطير بي إيدي
أقرِّن الحيضان واصلِّح في اللبيقات عشان الموية ما تَكْسِر علي
والمرض مابدورلو زول ولا حكيم يكتب دِوَيْ
لبخة الشاي بتودر الحمي واللدغة ليها الفصد والكَيْ
حبات القرض للقحة ومصة الليمون الكمدة للقَيْ
للهلاويس نفتح كتاب أو نعمل حجاب أو بخرة لباناً نَيْ
عايشين في أمان وسلام لا بنشوف كعب لا سَيْ
نشرب الشاي في المغيرب معاهو عجوات ود لِقَيْ
شايا مقنن من ضريع محلوب جديد تريان رِوَيْ
والونسة والحجا والنكات والضحكة من قلباً رِضَيْ
ولو ما هي الظروف جابرانا مابنفوت نسافر في المسافات طَيْ
أب شخيت: ضربة البداية[/color]
يا الطويرق ود الطريف
الكريم الكلس الظريف
إنت نادر وأصلك شريف
تبرا من الحمى أم نزيف
البلومك فهمو محدور وكاسر المقاديف
أصلو عيشة الرجالة ختِّيف
شيل العتود داير حريف
لحمو هش خاتي الشراشيف
الصحون مليانة سِتّيف
بوخا لاوي وحدو السقيف
فيها المشاوى وفيها نشّيف
فيها الكلاوى والفتافت قال نضفناها نضّيف
معاها اتنين طاولة رغيف
ويا حلاة السلقة للنيف
بي حِريف الكسرة الرهيف
قامبو جت وقرش الضليف
حتى العضام والقضاريف
لا شافو جار ولا جاهو ضيف
بعدو شاي مضبوط ما خفيف
بالهبهان وعويد القريف
مويتو نقاع زير الصريف
القناوي الصانعنّو في الريف
يوزن الراس و يضبط الكيف
لامن شعير جلدك يقيف
ختّاها سفة ملاها الشلاليف
كان عندو هبابي في راكوبة في القيف
إتوسد ضراعو وخلف كراعو مابهمّو تخويف
كان من دقش كان ودبابكر كان مليون حليف
والغريبة عماد القلتو ود ناس وزولا أليف
كان حكمو جور وكلو حيف
ما أصلو طغيان وزولا صليف
بدعو رب العزة اللطيف
ينعزل في هادا الخريف
من عميد يبقى وكيل عريف
والشريط العندو تشريف
و جيبو يخلا من المصاريف
ويبقي يشحد في التعاريف
زكريا بابكر عمر: إنت كارنك ناس الطريف
يا أب شخيت شغلك ما نضيف
إنته كارنك ناس الطريف
ألزم حدودك وأحسن تقيف
ولا خايف من قطع المصاريف؟
داير أقولك وخل سمعك خفيف
وأبقي عاقل وخليك حريف
مابتحوق في ناسي ختيف
عندنا الشعر ساوينبو الصريف
ويوم يجينا المتلك يا ظريف
للكلام جاهزين مابنقيف
وأصلو قاعد في طرف الشلاليف
ورينا طارق (حشالك) كم رغيف؟
بس لايبقي غشاك بيحرييف
أكل المطايب وأداك الغضاريف
يا حليلو راسك كيف خفيف
وزي بعضكن شبه التعاريف
وين لقاكا وأحكينا كيف؟
من كماسرة بصات الجريف؟
ولا جيت جالوبه من الرديف؟
أظنك من جماعة ناس أم شعيف
البيضفرو البروش بالسعيف
العايشين علي محريب الخريف
بنغتيك إن بقي توبك رهيف
ولو ماحرام في دينا الحنيف
كان لفيناكا في الدبلان النضيف
أمشي روح إنته لسع لين كتيف
جيبلنا القدرنا المازيك نحيف
وعمدتنا النزلتو وكيل عريف
نديهو المقص ونزيدو تشريف
عندنا في المقام زي علي عبد اللطيف
والبيهبشو نجز راسو بالسيف
أب شخيت: رسالة لأم عسجد الغاضبة
العسجد الصافي
من قلباً نضيف دافي
ماهو الغليظ جافي
منك دوام عافي
يا بت ملوك وعزاز
بسأل لك الكافي
ال للشريك نافي
البعلم الخافي
بالنون والقافي
رحماتو ليكي رزاز
ربي الكريم شافي
البجمع الهافي
ما صدَّ قال مافي
ليكي الشكر ضافي
لا يجيك ألم لا خزاز
خيرك عميم وافي
وأنا قافل النغمة لكني بس "هزاز"
وبطّلنا إستفزاز
أب شخيت: تلغراف لعلي ود محجوب
أمانة ما صيَّحت لي ناسا كتار
النسوّن والشباب واحدين كمان عجزان كبار
وكل زول لابد يكون شد الحمار
ودّع مريتو وشال عصيتو ووصي الصغار
حلحل ديونو وسجّل طيونو وحشى الخدار
ياخوانا الخايف يقيف جنب الجدار
والراكز اليحضر معانا قبال يروح نص النهار
أصلو الحكاية حا تكون موقده نار
أب شخيت: تلغراف لحسان سر الختم
حسان وليد سر الختم
قطعا تكون ما فاهم الفلم
ما العمدة عاملنو الطعم
خاتنو للحوت الكبار ما ينشرم
والكلام القلتو ما ظن يوم يتم
ياخونا فلِّق من بعيد واختا الوعيد واختا الشتم
زكريا بابكر عمر: نصيحة لأب شخيت
دربك أحمر ويادوب إنته جييت
وما قصرته معاك ياأب شخيت
شلته صينيتي عليكا ومشيت
ومن العتود لحما ما جلافيط
وعشان ضيفنا عليك حنيت
ضمره صاحبي أديتو الربيت
إلا شايفك يا زول نسيت
ومن كلامك برضي حسيت
زول محرش ولزوك جريت
إلا أسمع مني النجيض
إن كته نايم ويادوب صحيت
ولا جايي وللشر نويت
أحسن أرجع وماتقول حكيت
عندي ناسا يعفصو الشخيت
ومابيعرفوك نصيح ولاجنيت
ومابيخلوك الكان حبيت
وتبقي إنته علي نفسك جنيت
هاك نصيحتي وأمسك الخيت
أنسي إنك في يوم تحديت
والكلام ما بيبدو فليييت
أب شخيت : زكريا "اللامك دارك"
أصبحنا وأصبح الملك ...لله العليم فتَّاح
زكريا ياخوي العزيز...قوم هاك لقيمات الصباح
واسمع مني قول الحق...كلمات عتاب تب ما قُباح
خلينا ننتهز الفرص...ما نحنا بيناتنا الصراح
أول تبادي اللقول ليك... إنت ما(مكتولة مابتسمع صياح)
إنت الفخر لي أماتو...دي الولدة المعاها نجاح
إنت رزين وكاسيك هيبة...مشهور بالجلال وضّاح
ما الزول البليد متزاكي...ود ناساً نجاض ونصاح
زول بتقول كلام معسول..فصيح وبليغ وموزون صاح
ومابيغباك قول الحق...وعقلك يا اخوي رجّاح
ولو ناسي البنعمل فيهو... بوريك لو ألقى ليا براح
ما تخت الهموم فوق قلبي..وتزيد فوق العليا جراح
عارف أخوكا قصدو شنو...أخوك زول قرقراب ومزاح
هو ما الزول البقول الروب... ولا الزول أب بكا الردّاح
ولا الزول المنيفيش ساكت...ولا الزول البذئ البجّاح
ما زول خوخة عالي الصوت...يجوط زي طبلة المداح
ولا الزول الفطوقة العوق.. كان زروهو كاسلو سماح
أنا الزول الركز في الساحة...ما زول من بعيد كتاح
أنا السم اليسل الروح...عديل زي كفتة التمساح
مدخور لي هوايل القوم...معروف بالشكرصدّاح
مازول نوم وفتران همة..لكين زول هميم كدّاح
الزول البكفّي الناس..مليانات صحون وقداح
يباشر ضيفو يكرم فيهو ....باذل للبقر ضبَّاح
يفرح يوم يجيهو غريب...دا كمّل كم مراح ومراح
كم مرات مسكتو لساني... لساني الحادسيوف ورماح
وأرجع تاني اقول لي نفسي إت يا زول غفور صفّاح
الغفران ياخوي ديمة...لي هم القلوب مسّاح
وكل زول يدِّي مما عندو...عارفين الإناء نضّاح
والزول كان عرف لي عزو...أكيد بينوم تمام مرتاح
أنا القلب الرهيف وولوف...ماأصلو الدمع فضاح
لكين قاسي ظلم أخوانا...في داخل القليب نقّاح
خايف يوم يعرفو البيَّ... يقاسوهو الندم نتّاح
يوم شمس الحقيقة تبين...والداخرنو تلجاً ساح
أصلو العمر كان فيهو باقي ...بروح زي الزمان الراح
ما معروف نعيش يوم بكرة...والموت يا أخوي لفَّاح
بسأل ربي حسن الخاتمة...نكون من زمرة الصلَّاح
أب شخيت: طلقة أخرى
يا محيميد الحسين دقيش
عشان إنت زول سوق وعندك قريش
تقوم العتود تديهو صالة وغرفة وحويش؟
فطورو برسيم وغداهو لوبا وعشاهو عيش
كمان مبغبغ.. وسمان جضومو.. وخلي الكريش
مدوعلو فوق كم..؟ وراجيبو ايش؟
وابو الزيك يقول أكان شفتو والله التقول دحيش!!!
حكاية زي دي..اليعميني الله ويديني الطريش
لا بسويها مسلم..لا بسويها كافر..لابسويها عاقل ولا مهيبيش
وأنا ما كنت عارف.......... لكنو معليش..!!!!.
ما كت بجيكم..و أربطو في الدروة وأحكِّم النيش
وأديهو بس........... طلقة خريتيش
تلخبت الراس مع العفيش
نريِّح الناس كأنو ما فيش!!!!
عتودا متلو...مفروض نكتلو... و ما كان يعيش
أخونا طارق.. جزاه الله.... ويوم شكرو ما يجيش
هو ما أصلو زولا... جدع وكمان حميش
يقوم يجيهو بشيش بشيش
والدنيا نايمة نومة الدغيش
لا عندو جبخانة... لا عندو جيش
مسك خشيمو لفاو في خيش
ربط رجولو بي جوز كلابيش
ما اداهو موية ومات بالعطيش
ويا حلاة لحمو في الكنيش!!!!
ما لحمو طاعم وكمان هشيش!!!
أخونا العمدة سمعنا قالو أخد بقيشيش
ملوة قمح..ورطلين عماري..وسخلة و كبيش
غشو الجماعة...فشان عوقة درويش
سووه قاضي..ولزوه غادي..في وشح القباحة زادوهو تحميش
صلح هدومو..ونفخ جضومو..وفتح قدومو بي حكم قريقيش
قام ولع النار وجاب العويش
هو الفتنة راسا ولسانا وفيها
ويشعلل النار وينفِّخ فيها
ويزيد في وقوده ويقول طافيها
يا هوي......يا رحتَ فيها والله الروح تفيهة
ود الصيدة: أب شخيت "العبد"
قادر الله وقادر السيد ... ويفعل الله هو شن ما يريد.
داير أشوف شرشير الحلب ... وداير أشوف دق الحداديد.
السلام يا أهل المنتدي ... جيتي أصلها غير مواعيد
جيتي جية زول منفعل ... داير أموت بالزعل الشديد
ومافي زول يحجالو مظلوم ... ما الأمر مارق من الأيد
والكلام الداير أقولو ... ببقى قدرو يمين ما أحيد
والرصاصة الطايشه تدوش ... خاصة كان من زولاً بعيد
جبهه فتحت تالا الشرق ... سمى نفسو الحاج أب شخيت
وزى كلامو البيقولو دا ... عندى لا يمسى ولا يبيت
قال الحريم والشفع ورا !!! يا سلام يا الأغا ود عقيد !!!
العلوج والجبناء ياتن ؟؟ ... العيونا تجافي الغميد ؟؟!!!
الكلام ما كان معمم ...والقصد شعرانا تحديد
دا ما لو زي ديك (بت السرف ) البطفر غير مواعيد
هاك بسم الله وابدأ ...وهاك مني كلاماً مفيد
أنا داير أجرك ساعة الزمن ... داير أجيب السيرة وأعيد.
وأبدأ من زمن الموالي .. في بساط هارون الرشيد
ما لقيت أسم الزول دا أنا ... ولا قريب من اسم أب شخيت
إلاّ تاني رجعت صديت ... ما الأسم مقرون في بخيت
أب شخيت وهلم جرا ... ديل أسامي هنا ألات عبيد
إلاّ نحن إن درت تعرف ... نحن ناس تقابة المسيد.
ونحن ناس حلقتنا زاكرى ... ما في بينا قطيعه وشديد.
ونحن ناس سيره وناس حديث ... نحن ناس قرآن وتجويد.
ما انطفت نارنا وماب تموت ... وفوقنا تنطقش البراريد.
إن نقصنا نتم مننا ... وبي مشاريعنا الفي الصعيد.
لاب نمد إيدينا لي زول ... لا لحاسه ولا شحاحيد.
نحن أهل ( ود الكرسني ) ... نحن ما وافدين ... مواليد.
أسمحولي آيعقوب أرد ... خلني أنضم ذي ما أريد.
ما في صفحة عشان إتكي ... داير أموت بالزعل الشديد.
ليك يا زكريا السلام ... وإنت يا حسان تر بعيد
لا تقيف قدامي مظلوم ... ولا تجيبلك ناس أجاويد.
(أب شخيت ) اتفلت علينا ...(.....) يمرق من الأيد.
داير أعري من الفوقو دا ... وداير أفصلو قميص جديد.
يبدأ ألف باء تاء الشعر ... ويبدأ تاني من أول جديد
يبدأ من سنة أولى طيشه... ويبقى بالفصل سنة ويعيد.
وأنت يايعقوب في الشعر ... لما يبقي التلميذ بليد ؟؟!!
لا قرأ لا حصلو لوح ... لا الأدب لا يكتب يجيد.
لا هو قاري ولا يستمع ... تلقى بس حافظ الأناشيد.
كان تسولو درس عصر ... كان شوية كمان يستفيد.
هو ما بيعرف الشعراء من جم ... وما سمع بي حميد أكيد.
وما سمع بي يحى وأبو ... وما سمع بي ود العبيد.
وما سمع بالسر وابنعوف ... وما سمع بي حمد سعيد.
برضو قسم السيد وأبو شعب ... والهلالي الجدك أبوزيد.
وبين عطا ويعقوب ألف ود ... ولسه نترقب في المزيد
ديل كلها ناس لواءات وفيهن الرتب المن عميد.
ديل ما ضباط صف صغار ... هم ديل فحول القصيد
إنت وينا رتبتك هنا ... والله كت تعيين مرافيد.
استفيد دي مدارس الشعر ... لسه منها ميسك بعيد.
البشكر نفسو إبليس ... وأنا ما في زولاً بلويلي إيد.
ما نزل في ساحه إتكسر ... حقي قادر أجيبو وأزيد.
ما سمع تمساح أبنعوف ... البعوم فوق الجبابيد.
يلا خشها دارة الشعر ... لاقو إنت نديد لي نديد.
ياعماد ما سمعت المثل ... السفيه النبذ السيد
البولع نار يحملا ... واعتذار الناس مابيفيد.
الضرب من قطاع الطرق ... أصلو ذاتو دا بيت القصيد
شفتو يا يعقوب والعطا ... دا البخج الترعة ويصيد
قولو بل راسك واستعد ... للزياني المنها العيد.
وأنت رسل لي المقاسات ... شان أفصلو قميص جديد
داير أغسلو وأكويهو أنا ... وما تقولو كلامي تهديد.
داير أولع دارفور حرب ... قولو للفور اليستعيد.
يا زعيم باشمرقا إنسحب ... ماك قَدُر عرب الجانجويد.
ما بطلع التمره من القفا ... وان نزل بنزل بالجريد.
عمري ما بفزع لي زول ... وإن سأل تلقاني ويحيد.
ماب تتطاقش البيضة الحجر ... العصايي تقابل الحديد.؟؟
يلا أرفع رأية السلام .... دون شروط أو أي تحديد
وأرجى رمضان شان نعتقك ... وين في (....) كان عندو سيد
مهما جبد وفقش الجاو ...ماشي نازل ويرخص يزيد
( الـ ....) ينساق بالعصا ... ما (الـ ....) أنجاس مناكيد.
أب شخيت:همسة عتاب لود الصيدة أخوي
ود الصيدة اخوي هاك المفيد... وإنت زول مليان بالفوايد
الوضوح هو بيت القصيد....و لومي ليك أبيات من قصايد
أب شخيت لي زولك "بخيت" ما نديد....يعلم الله الخالق الندايد
بس نقول ونكرر نعيد....الفروق واضحة و عدايد
أولن ما زول طريد....ولا أجدادو كانوا من الطرايد
وعاشرن ما جلبوه بالصيد....الله لا جاب غارات الصوايد
وآخرن مافي زول الليلة سيد ....وكل زول على روحو سايد
ولَّى ياخوي زمن العبيد...و من قرون "حرّرنا العبايد"
والعتق ما كان زهيد....بس نحنا في "الإستغلال" زهايد
هُوْ ود العز المعروف تليد...الوارثو من أجدادو التلايد
وليد فراس وليهم حفيد... والفرسان أولادو و حفايد
ودَّ عمك و دم الوريد...البجوهو الناس ورايد
لو قال يجيكم يوم يصيد...يلقي نفسو لي روحو صايد
ياهو دمّك وهيلك شديد...مابيصح بيناتكم شدايد
أصلو التميرات العصيد... حلاته بعد الروب بالعصايد
والخصام الما حلّاهو عيد...أريتو عيداً ما يجينا عايد
حب الأخوان عندو الرصيد ...و داير يستلف منْكم رصايد
هُوْ الحنون البر الوديد....المابيفوت ناسو الودايد
المحب الوله المريد....حتى لو كرهوهو رايد
ياهو زيك في الجيل فريد...وإنتو ياكم ناس فرايد
و إنتا زولا معروف مابتكيد.... ضمة مابتعرف مكايد
وكمان مسامح وما حقيد...حتى لي حسادو الحقايد
وبرضو زيك سيد راياً سديد....الغطا للمقدودة و سدايد
العقلو ما توَّاه تام رشيد...الساعي في الناس بالرشايد
يوم يجيكم العدو بالحشود...تلقى ما بهمَّ الحشايد
سيفو السنين المن حديد....وسيف عداكم خرد حدايد
الدوا للجرح أب صديد....البيرُدْ خُصَّامكم صدايد
البعالجو بعيش عمراً مديد....لا يضوق "دِرب" و لا "أنبوبة مدايد"
الادب والأخلاق ليهو قيد...وفي القبايل راس وقايد
بسأل الله تكون عيشتك رغيد....وحياة اولادك رغايد
يعقوب بابكر عمر:أب شخيت غراب الشوم
ياغراب الشوم ياأب شخيت تبري كيف طاؤوس تتبعو
وإنته عارف البركل جسر وزيك الكانديك يجمعو
جيتنا ديك العدي الغشيم بي حروف شفع ماوعو
وإحترام الناس الرموز في الرباطاب كان منبعو
إنته ماك حاضر زمان لما أهلك كان وزعو ؟
شفته ناس الشعر الرصين بقو زي أفلاك يشلعو
لو أصلي ماهديت أب خليل والعطا العضعض أصبعو
كان قيامتك قامت زمان وكان لحقته كتار ودعو
وكان يخلوك عظه للخلوق كل ماشافوك توعو
مين سمحلك تهبش عماد أو دقش تنزل مشرعو
بي مقامن وعزة جباهن حاشا ليزول مابيركعو
إنته داير تعزل عماد؟وبره حوش الجيش تدفعو؟
إنته عارف الخلق الأدب حكمه فوقو عماد ربعو
وإنته عارف عمر البشير
كان حيدي عماد المشير
إلا رفضو ورجعو
قال أخيرلو يكون العميد وأوعه من إعلام لمعو
بالتواضع وحسن الكلام هو الوقفو ورقا ودرعو
إنته طارق أداكا كم؟جيت مغمد دار تتبعو
وطارق أصلا عارف النظام ووافق التحكيم طاوعو
لو سعاكا عشان الردود يبقي ساعي البوم والقعو
يفلح الأول في الخراب والتاني حر الصيف يفقعو
ولو رفض تنفيذ القرار زي شخوتك مابيشفعو
وإنته حدك الإستيكه أم قرش أويبل الشافع أصبعو
ويوم يزيد الضفر أو يطول أمسك الضفاره أقطعو
موقع البركل مو لعب لمن إنته تنط تفلعو
حافي حالق تجي بإحترام وحابي زي الدار يركعو
بي أدب وأخلاق وإنكسار وحتي ريقك ماتبلعو
وحالف أقعد قبلك عديل ومافي جندي يفوت مدفعو
والشخيت في الورق أب رصاص حاألوكو وتف أجدعو
أب شخيت: يهجو نفسه متنكراً بإسم (أبو أواب)
هوي يا أبشخيت بديك حديث قرِّب أضانك واسمعو
جايينا من سفراً بعيد راكب حمارك تلكعو
ما جيتنا بي شيتاً جديد غير "تعالى" وكوراك قعو
وحبة "تطاول" مستفز...وهرشات و "فلّيق" بالبعو
ورقك معرِّج .. وورقنا فاتح من زمان وما لاقي بايظ نجدعو
أخير ترجع تتم باقي الشراب وخمِّر عويشك وزرِّعو
أصلك سجيمان من زمان والهاري يومي تكرِّعو
ما تنسي الحمار تديهو المشك...عارفنو فنجاط ما مطيِّعو
وإنت كان يوم إنحشك..مافي شك مابنهبشك لكين خشيمك شمِّعو
الجانا بي "أدب واحترام" نكرم مقامو نشبعو
حتى الوليدات الصغار ماسكين حمارو يرتِّعو
وكبارنا حالفين باليمين ضابحين و للعربان دعو
شوف ناسنا متكسرين شديد..جايين علينا و أسرعو
كان جيت براك...والله آلافاً معاك ما فارقة تب ومابيُمنعو
وشبابنا شايلين الصحون... وقداح زيادة إتبرعو
كفّو الخلايق كوم لحوم والباقي للناس وزعو
أدوهم الحلو والجلي...حتى الفواكه تبّعو
و مافي زول أدوه خير.. قام أباهو ورجعو
إلا زيّك "لزِّاهو زول"...طمع نفيستو وشجعو
أدَّاهو سيفين من عشر...(حزَّم هدومو ودرَّعو)
وسوسلو بي قول (بارك الله في من إستفادو و نفّعو)
"قبض المقدم" وتوش دخل..خلاهو حاري وطمّعو
يختو فوق وش "المدافع"...كم خيَّب ظنونو و فجَّعو
ولو ما الأدب مانعنا والجيرة والأرحام و "شفّعو"
كان حرَّشنا درفونا صغير...يكفَّت جضومو يلبِّعو
يمعط رويشات "الغراب" ينتّف ضنيبو يمزّعو
كان تاه يوريهو الدرب...وكان خلقو ضيّق يوسعو
لكن وصاة أهلا كبار (حانن وليدك وطبعو)
(ربيهو يحترم الكبير يرعى المقامات وماتدلعو)
(إن درت تأمن من شرور...ماتنسى "كلبك جوعو")
"ود الصيدة" و "أولاد بابكر" إتنفشو فوقو إتضرعو
ديل بحار شعر القصايد...هم مصبَّو عديل و منبعو
ديل ياخي ما خلولو شي ...إتفنّو فيهو وبدّعو
ياخوانّا كان شعرن رصين...أطرب قليبنا ومتعو
بالضحك قطع المصارين... لامن كلانا إتفقعو
طربت نفوسنا وانتشت...وقلوبنا حنّو إتلوعو
زاد شواقه لي شوفة حبيب سافر بعيد ماودعو
زي مغترب مشتاق شديد لي أم عيالو وشفّعو
زي وردي بالعود بالمزاج يغني سايلات دمّعو
(هجرة عصافير الخريف في الموسم الفات قنّعو)
العمدة عود صندل عبير عطاهو طيب للجدعو
شمعات علم تضوي السبيل...أو قول نخيل يرمي الرطب للفلعو
و ختاكا كان ياأبشخيت...كاسات ألم مابراهو شربو إتجرعو
أحبابو الكتار برا البلاد.. خاتمين جوازن طلعو
وإتنادو من داخل البلاد...إتلمو ليك واتجمعو
قالو حالفين جوه الحرم ...مهللين طافو و سعو
(الما احترم مقامات الكبار...أتمان عزيزة ندفّعو)
(نخلص حقوقنا مضاعفة...نبهدل حياتو نبشِّعو)
(كان فات "أدب أولاد رباط"...وما شال نصيبو الوزعو)
(خلونا تب بنجيهو....ونعدل عوجتو و نردعو)
(ماأصلو زول "بومة خراب"...نهدم بناهو نصدِّعو)
(ينسى أبوهو الوالدو زاتو وحتى مين الرضَّعو)
(ينسى إسمو الكان أبشخيت...نمسح خطوطو نبقِّعو)
ود العطا: معركة تحرير الطريف
(أب شخيت الحلبي)
قبل نمشي نخش في الغريق ... ونبدأ من يوم طارق نهب
السلام زكريا وأخو... يا سلالة الشعر الأدب
شيخى إبراهيم بابكر ... نلقى كل ما الواجب وجب
البقيف قدام الصفوف ... وشيخي عندو المشي يبقى خب
داير أحي عماد الحليم ... وتاني أحي جميع الرتب
والشهود ادعاء واتهام ... جلسه كاملة لفحص الطلب
حنو في حال طارق كتير ... وبرضو عملو حساب للنسب
برروها دوافع اللفح ... لما عرفو الجوع السبب
خلو كل سوابقو الكتار ....في التعدى واثارة الشغب
خففولو الحكم الصدر ... جنبوهو الحكم الصعب
الببتر الايد من خلاف ... والكراع من حد الركب
داير اقول لى كل من يقول ... مالو لسه العطا ما كتب
معركة تحرير الطريف ... موعدا آخر يوم في رجب
منى يمشي فصيل مستجد ... لسه للنيران ما ضرب
البنادق الفى ايدو طين ... والسيوف كرتونه وخشب
كلهن ساعتين والطريف ... يبقى فيهو الأمن استتب
فر شرد الرخم أب شخيت ... قبل يصلو فصيلي انسحب
يجري فات قدام الحريم ... يجري قبل الشفع هرب
ياتو فينا الجبناء العلوج ... ياتو طلع الشبش الكرب
وفي الطريف الناس كلهن ... احسبو الحيين والترب
وان تلمو تمور الطريف ... ما تكفي كمينة الحطب
ماب يعشي النعجي الجرف ... وماب يغدى حمارا القصب
الطريف التنتج الجير ... وياتو جير!!! الجير الكعب ؟؟؟
الطريف المو تام طرف ... ياهو مسقط رأس الحلب
فيهو رايجي تجارة القزاز ... واغلي شئ الجركان والعلب
وفيهو افهم زول أبشخيت ... حلبي نافخ الكير والقرب
عندو خير من ولدو الحمار ... ودحشو خايل فيهو الكشب
حلبي فوق السجم العليه .... يبقى حلبي قليل الأدب ؟؟؟
نفسي أعرف مين أبشخيت ... وابن مين لو كان عندو أب
أب شخيت: تشغيل شريط مارشات عسكرية
الليلة وقَّفنا البرامج...شغَّلنا مارشات عسكرية
قطَّعنا كل الإتصال...كان بالموبايل كان بالثريا
وبرضو حاظرين للتجمهر.. والتجول من عشية
وحتى في القوات تأهب... مستعدين مية مية
ومالين الشوارع جيش..نسير دورية دورية
وانتظرو العميد يصدر.. قرارات نافذة فورية
وانتظرو العميد يصدر.. قرارات نافذة فورية
بس مارشات عسكرية.. بس مارشات عسكرية.. بس مارشات عسكرية.
الفصل الثاني: بعد الإعلان عن الكاميرا الخفية
بيان هام من العميد عماد الطيب محمد الطيب
الأخوة الأحباب الأهل والعشيرة
السلام عليكم و رحمة الله
(1) في البدء لابد لي أن أشكر كل الأحباب الذين أوصلوا لي تضامنهم العميق لما رأوه "محنة" تعرضت لها ومعي آخرون في منتدى "عتود دقش"... ولعلي أسميها "منحة" من التواصل الطروب بيننا..!!!.
(2) ما كان يحدث في بوست "عتود دقش" في خلال الفترة الأخيرة بعد ظهور "أب شخيت" المفاجئ والغريب لغالبيتكم ,كان حلقة مستوحاة من برنامج "الكاميرا الخفية" تحت عنوان "كمين للشعراء والمبدعين"...كان لي شرف وضع الخطوط العريضة للخطة و أوكلت للأخ الشقيق و الصديق العزيز جداً "أب شخيت" للقيام بالتنفيذ مع تزويده بكافة الصلاحيات للقيام بكل ما من شأنه إنجاح الحلقة..ونحسب أنه قد أدى دوره المطلوب بفاعلية...فله التقدير..
(3) هذه الفكرة كانت ترمي إلي الدفع بشعرائنا الأفذاذ لنظم جياد القوافي وكرام القصايد بإعطائهم الدافع الشعري الملهم الذي يقدح زناد الشاعرية ...ولعلنا جميعاً إستمتعنا بتلك الغضبات المضرية الشعرية لأولئك العمالقة الشعراء وعلى رأسهم المبدع ود الصيدة والمبدع ود العطاء و المبدعون "أولاد بابكر عمر" وآخرون...فلهم جميعا نحني الهامات إجلالاً وتقديراً واحتراماً...فقد كانوا عند حسن الظن بهم تماماً...
(4) ولابد لي أيضا أن أشكر لفيفاً من الأخوان الذين دفعت ظروف مجريات تنفيذ الخطة على الأرض إلى إشراكهم في "سر الحلقة"...فلم يبخلوا علينا بإسهاماتهم السرية المقدرة "بالتنسيق والإرشاد من وراء خطوط الهاتف" ..وبالمشاركة الفاعلة المعلنة في البوست بما يدفع الخطة بالسير في مراقي النجاح.. وقد ننشر لكم أسماء هؤلاء الأعزاء لاحقاً
(5) أسمحو لي أخيراً أن أسأل أخي رفيق الدرب "الرباطابي" العقيد طبيب الفاضل الفكي عوض الله إختصاصي طب وجراحة العيون بالسلاح الطبي كيف تتخذ لنفسك إسمين غريبين "أب شخيت و أبو أواب" دون أن تخطرني بذلك مسبقاً..!!!......" الله يجازي محنك ومقالبك"..!!.
(6) أكرر شكري وعرفاني و امتناني للجميع و نرجو أن نكون قد وفقنا في البرنامج فكرة وخطة وتنفيذا وتنسيقا وإخراجا ونشرا...و نرجو أن تكونوا قد إستمتعتم بالقصايد الشعرية البديعة التي كانت هي هدفنا المنشود... ونعتذر عن أي ضرر غير مقصود لذاتة قد أصاب بعضاً منا....
العميد/ عماد الطيب محمد الطيب
الخرطوم العاشر من سبتمبر 2007[/color]
أب شخيت:زيارة مودة للعميد عماد
أخوكم ود رباط...زاير عماد ود عمو شايق
إلاّ عقابو أعوج...مسور يا دوب بتايق
قرّن الحيضان وجاكم... علا التقانت واللبايق
وصى للجنُّون يجوهو...لما يبقى خلاص متايق
ما خلا للأولاد قريشات ...كان هدومن كوم لتايق
ولا حق الدوا للحتالة الديمة تعبان وخلا ضايق
وأم العيال الصابرة ياخوي..توبا الوحيد مشروط فتايق
ما راضي يتلم بالخيوت...لابسه مضمومات رتايق
الشئ المطمنو يا أخوي...غنيمة لبن وحزمات تبايق
يضبحوها إن كانو جاعو...يتمزُّو بالشيات والسلايق
الحياة بتدور البصارة... ترانا نضاير فيها ونضايق
وحالنا مستور يا أخوي...ما اتفرجو فينا الخلايق
ونحنا ما طالبين كتير... ما شهوانين ولا شبايق
حريف الكسرة من صاجنا..نسو فوقو ملاح أم رقايق
والحسد تب مابنعرفوا...متل واحدين قروشن كلايق
زمان كبارنا وصُّونا...وصاتن في الإضنين حلايق
قالولنا أرضوه القليل... ولابد عليهو شكرنا لايق
لكين الفقر قاسي وصعيب... نسايس فيهو و نسايق
كان رضى يوم علينا..يدينا الشلاتيت والدلايق
وكان صبح غضبان في وشينا...يدينا الشلاليت والخزايق
يكسِّر في عضامنا عديل..وفوق روسينا مضروبين فلايق
وبرضو دافرنا الحنين جايين وللحبان شوايق
أصلو القلوب لو كان حُنان و لي عشرة الأخوان عشايق
تلقاها مضمومات شديد ترعى الوداد و حسن العلايق
و مابتقطِّعن الظروف رغم المصاعب والعوايق
@@@@@@@@@@@@@@@@@@@@@@
ديك بنات عمك وخالك... مغبونات حمايق
واقفات بي قُبالك... شوف دمَّاعن خنايق
ما راضيات كتالك... تقوم في الناس حرايق
الساترات لحالك....وللأخوان شقايق
وكت شافوني جيتك...متقاودين رفايق
داخلين جوة بيتك...صرخو مندهشات شهايق
رجعن لي بيوتن...مرتاحات روايق
@@@@@@@@@@@@@@@@@@@@@@
وجونا أخوانا شادَّين..هديك حمّارن هنايق
شن شايلين معاهم...غير ألوان زينة و زوايق
قصايد وا حلاتة..تدِّوب من غلاته..وفيها أبيات رشايق
نرجس وفل وياسمين...زهور فواحة وحدايق
نطرب بي لقاهم...نكون خلان صدايق
ضامِّين لي صفوفنا...متعاصرين لصايق
باذلين من كفوفنا...متحانّين شفايق
متواضعين حالنا ديمة...ما نخرات شنايق
@@@@@@@@@@@@@@@@@@@@@@
العمدة ماهيلكم براكم...مقسّم وما هو حايق
وكان قلتولي أهلو... خلَّونا منضافين لحايق
نحنا أخوانو وصحابو ...معاو في اللَّقا في المضايق
تقول تيمان قادر الله...مقسومين فشايق
سنينا الفاتو عدَّو.... معاو مرن زي دقايق
ود ناسا كرام...نضافاً ما خرايق
شايلين للسيوف...ما متضارين بالدرايق
يكون لعداهو حنضل...والوجع الزرايق
عداك يا زول هديلك...مجدوعين فهايق
حب أخوانو شيمة...أنواع شتى وطرايق
والأرواح في حبو...مكتولات زهايق
ما زول "عوقة درويش" بشوفو رزين ورايق
إيدو الماطرة كابة بي رعدا وبرايق
الضامِّي اليتامى...وساس لي بيوتن مرايق
الكافل الفقير...ويبزم للناس رزايق
الدوا للسقيم...ولجروحن لزايق
نفرح بيهو ونقول...غنا وطمبارة ومزايق
(عمدة معاهو طينو ...والجزر البسايق)
(وكان قلنا العميد....قدرو وضمة خايق)
(زارع لينا صيفو...كمان للشتوي سايق)
(والعجوات نقّط عسيلة...حليوات وما حوايق)
@@@@@@@@@@@@@@@@@@@@@@
والبدرو الفتنة ياخوي...ناس عُوَرا وفطايق
ديل فارغين كعابة...والهمّز أمو فايق
ديل ماكرين تعابة...ديل سفهه وصفايق
ماحقين ليهو حقك...ولي شكرك محايق
ناكرين للجميل...كمان همباته وسرايق
@@@@@@@@@@@@@@@@@@@@@@
ما بنسى اولاد "دقشنا"..الماهلين ماضوايق
هم ساسنا وعرشنا...بقول فوقن حقايق
نفوس طاهرة وشريفة...ما للشر طوايق
تابعين لي نبيهم...وخيراتن دفايق
عافين لي دقونن...وللشنبات حلايق
للتقى والصلاح...كم للناس سوايق
كلام واضح عديل..لا لغاويس لا لوايق
القول بالدليل...غير التوحيد ما فوايق
دي السنة السبيل ...دا كلام الحق ما لفايق
بسأل الله الجليل...العالم أسرار الخلايق
أنا وأخواني وإنتو....نكون في الجنات رفايق
زكريا بابكر عمر: كلنا شربنا المقلب
السماح يا صحاب السماح
والعذر مننا أقبلو
كلنا المقلب شربنا
وييداك أب شخيت أسألو
هو وعماد شدونا العتود
وزازو بالنيران مرجلو
خلونا ننطاقش بالجري
للبحش فنن منجلو
والكان بيقرع فاتح اللبق
وقف البابور بطلو
والمودي للسوق الخدار
خلا في شوالو وبلبلو
والعندو مشوار للصباح
مامهم قال بطلو
وحتي ناس البكاء للعزاء
زولن الميت سبلو
الله يجازي محنك ياعماد
ساوي راسك زي الدلو
الرباطابي جنا أصول
مالك عليهو مبهدلو
أداهو إبراهيم بالتقيل
وسلا من جنسو وحولو
سواهو عبدا ليهو ضل
ليبخيت وداهو وسجلو
وسماهو يعقوب الغراب
وكان غراب الشوم مدخلو
مسحو بالإستيكه أم قرش
ومسكو من كرعيهو ودلدلو
أما العطا بالغ عديل
تكي الزويل ضبحو وحللو
أنا من الأول ماقلته ليك
ناسي في عماد مابيحملو
ماشفتهن من سمعو الخبر
بقو في القعاد يتململو
في النهايه وبيت القصيد
آخر الموضوع وأولو
كل زول من الإبداع يشيل
يغرف يكب في جردلو
أعفا مننا ياأب شخيت
نحنه كبرنا والناس هللو
ود البلد يقول:
حميرا يابت الرجال واخت الصناديد العرب
يا الكنتي للايتام سند ويالكنتي للضايعين ادب
حميرا يا الطاهره وعفيفه وماعستي في يوماً كعب
ربيتي لي اختي واخوي ومحتجتي لي مالً كعب
يحفظك الله يا المبروكه وان شاء الله ميزانك دهب
@@@@@@@
وبعيد وقولّك
انا لاني شاعر لا أي شي
انا شافعاً صغير ماعندو شي
لاكن وكت ألقى الكبار بسمع كلامن وكل شي
وبقعد بعيد واسمع شعركم وارتشي
وبنظمكم السمح الجميل بنسى الوجود واي شي
وكان جبتو يوم طاري البلد تذرف دموعي بلا اي شي
بتذكر اخوالي الكبار وناسي الكتار وحت البنيه التختشي
والنيل وساقية حاج بدر وطورية تحفر كل شي
وتمره عاليه تصارع الريح وتنتشي
أب شخيت: ود البلد تعال هاكا رد
ودأخوي يا علي ود البلد
كان لقيتك كان سلّم قلد
إنت شاعر من يوم ماتولد
وفي الشعر ليك عوم الكلد
الكسل هو عدوك الألد
لو إنت صبّار وعندك جَلَد
ياهو مضمون ذكرك خلد
بيان من العمدة العميد الي العطا
نحن مع الطريف قلبا وقالبا حسباً ونسباً أصلاً وجذرواً ولن نتخلي عن اهلنا ابدا .....اما العبدلاب فهم الديرة والديار والاخيار ولن تستطيع ان تجلس بالقرب من ضُلهم ناهيك عن تحريرهم وان عدتم عدنا وكل إناء بما فيه ينضح
أب شخيت:الطريف الجريح في وجه الريح
ودالعطا حليفنا الجديد..........يا صاحب الذوق والأدب
جاتنا معلوماتن أكيد.............من مصادر موثوقة تب
برسِّلة ليك أنا بالبريد............عبر الأثير ما جيّة خب
حسان يكورك من بعيد........قال أبشخيت باعنا و قَلَب
ياخوانا محتارين شديد..........ورونا بس إيه السبب
تقولو مرات زول العميد........و مرات مع طارق نهب
مرات تودوهو العبيد...........ومرات تقولو من الحلب
يعني ما نحر ِّش نكيد..!!؟؟..ولا نجدِّع ولا نجيب الحصب..!!!؟؟
حسع دا ما الخبر الأكيد........ولا عشان كده أنا كتب
يا زول شماري بكون غليد....ليهو ضل حار من لهب
قالوا الطريف تبرق رعيد......مابيرضو بالقول الكعب
عاملين تمام جِد لي حفيد......وجامعين كمان ناس النسب
وانا مابلوِّح بالوعيد................وانا زول معاك عكاز مضبب
وإنت ما واقف براك مقطوع وحيد.معاك أبشخيت يبلع عدوك ياخويا "جب"
وإنت كان مظلوم تب مابحيد............وحتى لو ظالم علي نصرك وجب
أسمحلي اقول راياً سديد..........كان يطفي نيران الغضب
لسه الأمر ماسكنِّو بالليد............قبال يزيدو النار حطب
ياخوي ختاك جَد كان شديد........يقطع علايق الخوة تب
أهل الطريف هم ليك رصيد.......لو جبت الكتاب جمّع حسب
ضرِّب حساب الخوة في الريد....وارفع مقام العشرة طارح السب
تلقى الحساب ياخوي يزيد.........و البيعة ليك ربحانة طب
وانت ما الزول البليد.................ولا في الحساب فد يوم رسب
ولا الزول اب عقلا كسيد...........القالولو صلِّح طبَّظ خرب
ولا في خوة الجيران زهيد........خليك من رباط الدم والعصب
أهل الطريف هم ناس المسيد...البصومو رمضان من رجب
قوم المكاشفي وأهل الجنيد.....خاتمية وأنصار من لبب
ديل هم سلالة الجيل الفريد.....الخلطة بين زنج وعرب
الثابت الأركان وطيد..................ولو جاتن الريح هابة هب
لو جاهم العدمان فات سعيد......فرحان ينطط بالطرب
شافعن من قام رشيد..............حافظ الكتاب من دون تعب
ديل ياخي قدمو كم شهيد.........خاتيهم اللوم والعتب
حد ما أشكر فيهم وأعيد............ألقى الكلام جافاني وغلب
يا خوي إعتزارك ليهم مفيد.........يبقي زي قطران للجرب
ترتاح عيون جافاها الهجيد .........تخضر زروع بعد الجدَب
قبال يهل رمضان المجيد.............إعتذارك عز الطلب
بيان وقصيدة ود العطا :معالجة التداعات
بسم الله الرحمن الرحيم
الحادي عشر من سبتمبر
وتداعيات معركة تحرير الطريف
تعديلات طفيفه على خارطة العبدلاب في اضاءة للمدخل أقول: ـ
أخي في الله وفي التسكع بين جزوع الكلمات وفي السعي حثيثاً بين غروب الشمس وخلف صدى أنغام القافية المدعو ( منهم ومنه ) أب شخيط ومني أب شخوط.
حياك الله...
تخيلتك أغبر .. أغبش طويل القامة نحيف الجسم .. تميل النحافة فيك إلى النحافة عند أهلي وأهلك البسطاء .. الطول خمسة قدم وستة بوصات .. العيون عسلية بالقدر الذي تتطلبه معايير المهنة...
استوقفك لأناشد العماد والعلي والزكريا أن يكفوا عن الاعتذار عن ذلة لساني أنا حريُ وخليق وجدير بي أن أفعل ذلك وبالقريض نفسه ومثلي كانت به يكون زوالها به ويا عملات المجنون ( حميد)
إذا كان العكار من طين كمان من طين يجي الرواق ( الله يطراهو بالخير)
داهمني الاحساس ... إن خلقي أصلاً كان في مهمة واحدة ... أن أخرج يوماً من طوري لأخرجك من التخفي لتخرجنا جميعاً من عتمة الملل والنكد إلى تلك العوالم الرحبة التي سُقتنا إليها والتي لا يراها إلا العائدون من الموت .. واسأل الله ان يديم علينا نعمة الخروج ابداً ونكون من الخارجين من الخروج إلى الخروج إلى الخروج إلى أن نلقاهو تعالى ... آمين.
يا أبن حميراء
أخذت كل ما تملك منها سنتباهى نحن دوماً ونقول أخذنا كل ما نملك من ابن تلك الحميراء ... أكرمها الله ...
نعم التقينا في الوجهة والاتجاه .. اتمنى ألا نلتقي أبداً وجهاً قبالة وجه ... أنا أدمنت التلذذ والتلهف والتشوق للقياك وهذا كف .. لانه من نعم الله عليّ.
القيام لك حتى وإن أذنت لي بالجلوس.
دنيا فيها تسوقنا الظنون
ونمشي كلما الهاجس هجس
ويصدق الإلهام ويوم يخيب
وبرضو ياهو دا حال الحدث
واصلها الأقدار راح تقع
مهما كان الزول احترس
وفي المسارح في الواقعي
ومسرح المعقول والعبث
والسيناريو يجيك بألف لون
وكل يوم تتحبك القصص
وتفرض الأحداث كلمتا
والمهم تبعات الحدث
لا الأماني تجيب الغنى
ولا في نقة تطرد الفلس
والبيأكل الحوت رزقو حي
ورزقو حي البيأكل العدس
داير أقول للأغا أب شخوط
ليهو ذات بالذات بالأخص
ودحميراء صلاة النبي ياكه دوخري الحوجة الامس
كلما الأعناق تشرئب تبقى انت المعنى انت بس
يا حفيد القيقر سلام يا جنا النعمان يا كلس
فيك شرافة أهل أم دويمة البسوقو العدو للقفص
وكربكان تنشاف فيك عديل
وفيك شفنا النور والقبس
رغم عنف الريح انت في
ورغم انو الريح ماكرس
ما رخيت ذات يوم اللجام
وما نزل من ضهر الفرس
يوم سمعنا صليل السيوف
ما سمعنا البكاء والجرس
إلاّ صاحبي وصاحبك عماد
مالو غير رأيو انتكس
مالو خلى جماعتو المعا
مالو من وسط أهلو اتفرز
وين محاكم طارق تروح
وشن لزوم الحجة الهوس
يوم نهارت انسرق العتود
التقول مسروق تور جخس
اصلي دابي عرفت الكثير
يوم قعدت حسبت ودرس
وفوق حروفي بخت النقط
وداير أقول القول مافي دس
تهت يوم باريت السراب
يعني أقولها صراحة أنا دقس
وداير أقول العطا حي وفي
وفيهو حي الحس ما خرس
ولسه باعو بيلحق طويل
وعندو طولة البال والنفس
ماب يخاف من زول عندو تاج
وعندو كم دبورة ومقص
يمشي طول اليوم مطمئن
ماب ينوم غافرنو الحرس
يا هو حالي ان طال العمير
بيهو اموت إن قصر نقص
إستنفارات طارق علي صالح
الاخوة الاعزاء اتصل بي احد ابناء الطريف المخلصين ورقم صغر سنه وحداثة عهده اعتقد انه ابلي بلاء حسنا كما المقاومة العراقية ضد اقوي قوة في الدنيا
العم طارق انا من سيتصدي للمدعو العطا انا ابن الثامنة عشرة رغم انها المرة الاولي التي اكتب فيها بالدارجة واعرف انني ساجيدها علي ضهر العطا قريبا ....هن عشر صواريخ سأطلقها انا احد اشبال الطريف ...شعرا سيحفظه الناس وتسير به الرُكبان ...فلا داعي لان يشغل الكبار انفسهم بمثل هذه المسئوليات للدفاع بالحرف ضد دون كيشوت المنابر.. ساقوم بارسال باقي الصواريخ عبر اشتراكك اذا سمحت......كما ارجو ارسال السيرة الذاتية للعطا ومعلومات عنه ببريدي الالكتروني...وشكرا
طريف الخير
من القصر البزين ضحك الجبل لليل
وللحلة الكتب تاريخا موج النيل
ربوع بلدا اصيل وجميل
سلام الآف
فوارسٍك ديمة قدامك
اذا داست علي طرفك سنابك الخيل
*******************************************
ملعون ابو النضِم السجم
ملعون ابو الشعر الرماد
من العطا ولي قوم عاد
**********************************************
ملعون ابو الزمن البخلي البسوا والما بسوا يشتم في كرام الناس
وفي البلد الصلاحا اساس
سلالة الفقرا والفرسان
اذا صاب البلد هملان
والجيران
اذا ضل السبيل حيران ولو سكران
كما حالة الجنا الهلواس
والنيرا ن
اذا طال الطريف غبيان
كما حالتك
اريت تسأل عن الحسن الكبير ونبيل
عن العلم البدوهو اسيادو من صديق ولي ولدو البشيل قرآن نصايص الليل
ولي حمد الكبير واصيل
وللحسن الختام وعديل
ولي هسع
حمتياب ممدة في الزمن قنديل
وهاك القول
من الولد الغناهو صهيل
وليد اسمر
كِساهو من العفاف اكليل
مأصل تب
مِداد داخرنو للمقطوع وللسّراق وللمطلوق ولي الزيك
مفصل تب
اذا مديت لسانك بالغنا السجمان بيقطعو جب
وليد اسمر
كما سيفو المداد مسنون
اذا بات الطريف مغبون
من السجم اليسوي البسوا والمايسوا والزيك
وتعال جربنا
فرسان الشعر والسيف
منو الغشاك
عشان تدخل عرين الما بعرف الخوف
منو الخلاك تدق باب التحرق الجوف
منو الغشّاك
عشان تركب غنم ابليس
وتتخيل
ركوبك فوق خيول عسكر
وحطب عُشرك سيوف عنتر
وعكازك عصا موسي
دي الدقسة التخلي الزول يظل اشتر
وكان تقدر
من الوهم السكن جواك تتحرر
قبل تحرير طريف بلد الطريف والناس
بلادا في شموخ شمس الله
سوّاها الكريم للكون عشان تحكم خلوق الله
بما فيهم ملوك خلق الله
والباقين عموم الناس ودون الناس ولي الزيك
جزء من رسالة سابقة من ود العطا لطارق علي صالح
(لم تنشر من قبل)
[color=#00008B]داير أقول لي طارق أخوي...الطبيعي الشي المنطقي
إنت زي العطا عندي انا...وعندك إنت العطا طارقي
نحن بينا ملامح وسمات...وفي العديل والشين نلتقي
زي ما إنتو تعشقو الطربف...الطريف أنا من عاشقي
...............
...............
إلى أن يقول:
الله ربي يجازي الشعر...اليخلِّي الشاعر شقي
العطا علي العطا....البركل....الخميس أول رمضان
(القصيدة كاملة ستنشر فيما بعد)
سيرة ذاتية لأب شخيت الفنيطيط[/color]
يا حبان ويا أهل...نازل جديد لي كم يوم في بيت (بوست) أخونا زكريا بابكر (عتود دقش)...الحقيقة جابتني ريحة الشية...النفيسة الصغيرة طمعتني ونزلت هناك ..وفكيت قوقل الكنت راكبو ورجع لي مراحو...ومن اليوم داك ما ضقت طعم الاكل ولا الشراب مع إني ضيف..قرّبت أقول الحكاية (إما الناس كسالى أو فسالى أو دغالة) لكن ربك ستر مسكت لساني علي وختيت الخمسة فوق الإتنين.!!!ولي يوم الله دا مافي زول قال لي مرحبتين ولا حتى مرحبة واحدة.!!!
قلت ياخي الجماعة ديل بيكونو قالوا الزول دا شن نفرو ما داير يفوتنا ليه؟!!!...خاصة بعد ما الهكر شطبو من العضوية ومسحبو الواطة..قام تاني اتنفّض وقعد!!!!
قلت لي نفسي مرحب بي نفسي وحباب نفسي إتفضل يا نفسي وحرم تقعد عزيز مكرم!!!!بعد الإستقبال الحار دا من نفسي لي نفسي قلت لي نفسي:
عافي منك يا بُنَيْ
نافي عنك كل غي
إنت ما لسع صِبَيْ
ما أظن تميت تِنَيْ
أصلي من تبَّيت جِنَيْ
زولا نجيض ما عوقة نَيْ
كنت شيَّال للهموم ما قلت آه ولا قلت حي
يوماتي سارح بالغِنيم فوق الوِدَيْ
حافي جاري ورا السِّعَيْ
ومن عِصيرا بدري حشّيت العِشَيْ
أربِّط الكليقة أكرِّب وبالحبال لاويها لي
وأبيِّت الجبادة في البحر الخِوَيْ
مرات أشيل النبلة ألقِّط في الحِصَيْ
قصدي زرزور كان دباس مرات حِدَيْ
أَصَلّي فجري مع الديوك والدنيا يادوب فالقة ضَيْ
ما بنوم لامن يزول ضل الضُّحَيْ
وفي المدارس ماني زول هملان غِبَيْ
الفطرة طرقة كسرة بايته ملاحا مَيْ
مرات سخينة أو لِبينة أو رويب مرات لِبَيْ
والدابة كان دحشا حرون طغيان وما بخاف من عِصَيْ
أديهو فوق فرق الأضان يرميني رُبْ لافوق وُشَيْ
كم مرة والجنُّون معاي غدوتنا كانت بي كُدَيْ
نختف..نكابس..ننطط..نصارع..نجوط الدنيا ما همانا شَيْ
مرات أكمرق للتميرات بين الكراريق والخُشَيْ
والله امتِّق في المسور والعرق كاسيني زَيْ
ما أصلو كان اليوم سموم والدنيا صَيْ
وبرضو ماسك البوغة أقرع واحاحي في الطير بي إيدي
أقرِّن الحيضان واصلِّح في اللبيقات عشان الموية ما تَكْسِر علي
والمرض مابدورلو زول ولا حكيم يكتب دِوَيْ
لبخة الشاي بتودر الحمي واللدغة ليها الفصد والكَيْ
حبات القرض للقحة ومصة الليمون الكمدة للقَيْ
للهلاويس نفتح كتاب أو نعمل حجاب أو بخرة لباناً نَيْ
عايشين في أمان وسلام لا بنشوف كعب لا سَيْ
نشرب الشاي في المغيرب معاهو عجوات ود لِقَيْ
شايا مقنن من ضريع محلوب جديد تريان رِوَيْ
والونسة والحجا والنكات والضحكة من قلباً رِضَيْ
ولو ما هي الظروف جابرانا مابنفوت نسافر في المسافات طَيْ
أب شخيت: ضربة البداية[/color]
يا الطويرق ود الطريف
الكريم الكلس الظريف
إنت نادر وأصلك شريف
تبرا من الحمى أم نزيف
البلومك فهمو محدور وكاسر المقاديف
أصلو عيشة الرجالة ختِّيف
شيل العتود داير حريف
لحمو هش خاتي الشراشيف
الصحون مليانة سِتّيف
بوخا لاوي وحدو السقيف
فيها المشاوى وفيها نشّيف
فيها الكلاوى والفتافت قال نضفناها نضّيف
معاها اتنين طاولة رغيف
ويا حلاة السلقة للنيف
بي حِريف الكسرة الرهيف
قامبو جت وقرش الضليف
حتى العضام والقضاريف
لا شافو جار ولا جاهو ضيف
بعدو شاي مضبوط ما خفيف
بالهبهان وعويد القريف
مويتو نقاع زير الصريف
القناوي الصانعنّو في الريف
يوزن الراس و يضبط الكيف
لامن شعير جلدك يقيف
ختّاها سفة ملاها الشلاليف
كان عندو هبابي في راكوبة في القيف
إتوسد ضراعو وخلف كراعو مابهمّو تخويف
كان من دقش كان ودبابكر كان مليون حليف
والغريبة عماد القلتو ود ناس وزولا أليف
كان حكمو جور وكلو حيف
ما أصلو طغيان وزولا صليف
بدعو رب العزة اللطيف
ينعزل في هادا الخريف
من عميد يبقى وكيل عريف
والشريط العندو تشريف
و جيبو يخلا من المصاريف
ويبقي يشحد في التعاريف
زكريا بابكر عمر: إنت كارنك ناس الطريف
يا أب شخيت شغلك ما نضيف
إنته كارنك ناس الطريف
ألزم حدودك وأحسن تقيف
ولا خايف من قطع المصاريف؟
داير أقولك وخل سمعك خفيف
وأبقي عاقل وخليك حريف
مابتحوق في ناسي ختيف
عندنا الشعر ساوينبو الصريف
ويوم يجينا المتلك يا ظريف
للكلام جاهزين مابنقيف
وأصلو قاعد في طرف الشلاليف
ورينا طارق (حشالك) كم رغيف؟
بس لايبقي غشاك بيحرييف
أكل المطايب وأداك الغضاريف
يا حليلو راسك كيف خفيف
وزي بعضكن شبه التعاريف
وين لقاكا وأحكينا كيف؟
من كماسرة بصات الجريف؟
ولا جيت جالوبه من الرديف؟
أظنك من جماعة ناس أم شعيف
البيضفرو البروش بالسعيف
العايشين علي محريب الخريف
بنغتيك إن بقي توبك رهيف
ولو ماحرام في دينا الحنيف
كان لفيناكا في الدبلان النضيف
أمشي روح إنته لسع لين كتيف
جيبلنا القدرنا المازيك نحيف
وعمدتنا النزلتو وكيل عريف
نديهو المقص ونزيدو تشريف
عندنا في المقام زي علي عبد اللطيف
والبيهبشو نجز راسو بالسيف
أب شخيت: رسالة لأم عسجد الغاضبة
العسجد الصافي
من قلباً نضيف دافي
ماهو الغليظ جافي
منك دوام عافي
يا بت ملوك وعزاز
بسأل لك الكافي
ال للشريك نافي
البعلم الخافي
بالنون والقافي
رحماتو ليكي رزاز
ربي الكريم شافي
البجمع الهافي
ما صدَّ قال مافي
ليكي الشكر ضافي
لا يجيك ألم لا خزاز
خيرك عميم وافي
وأنا قافل النغمة لكني بس "هزاز"
وبطّلنا إستفزاز
أب شخيت: تلغراف لعلي ود محجوب
أمانة ما صيَّحت لي ناسا كتار
النسوّن والشباب واحدين كمان عجزان كبار
وكل زول لابد يكون شد الحمار
ودّع مريتو وشال عصيتو ووصي الصغار
حلحل ديونو وسجّل طيونو وحشى الخدار
ياخوانا الخايف يقيف جنب الجدار
والراكز اليحضر معانا قبال يروح نص النهار
أصلو الحكاية حا تكون موقده نار
أب شخيت: تلغراف لحسان سر الختم
حسان وليد سر الختم
قطعا تكون ما فاهم الفلم
ما العمدة عاملنو الطعم
خاتنو للحوت الكبار ما ينشرم
والكلام القلتو ما ظن يوم يتم
ياخونا فلِّق من بعيد واختا الوعيد واختا الشتم
زكريا بابكر عمر: نصيحة لأب شخيت
دربك أحمر ويادوب إنته جييت
وما قصرته معاك ياأب شخيت
شلته صينيتي عليكا ومشيت
ومن العتود لحما ما جلافيط
وعشان ضيفنا عليك حنيت
ضمره صاحبي أديتو الربيت
إلا شايفك يا زول نسيت
ومن كلامك برضي حسيت
زول محرش ولزوك جريت
إلا أسمع مني النجيض
إن كته نايم ويادوب صحيت
ولا جايي وللشر نويت
أحسن أرجع وماتقول حكيت
عندي ناسا يعفصو الشخيت
ومابيعرفوك نصيح ولاجنيت
ومابيخلوك الكان حبيت
وتبقي إنته علي نفسك جنيت
هاك نصيحتي وأمسك الخيت
أنسي إنك في يوم تحديت
والكلام ما بيبدو فليييت
أب شخيت : زكريا "اللامك دارك"
أصبحنا وأصبح الملك ...لله العليم فتَّاح
زكريا ياخوي العزيز...قوم هاك لقيمات الصباح
واسمع مني قول الحق...كلمات عتاب تب ما قُباح
خلينا ننتهز الفرص...ما نحنا بيناتنا الصراح
أول تبادي اللقول ليك... إنت ما(مكتولة مابتسمع صياح)
إنت الفخر لي أماتو...دي الولدة المعاها نجاح
إنت رزين وكاسيك هيبة...مشهور بالجلال وضّاح
ما الزول البليد متزاكي...ود ناساً نجاض ونصاح
زول بتقول كلام معسول..فصيح وبليغ وموزون صاح
ومابيغباك قول الحق...وعقلك يا اخوي رجّاح
ولو ناسي البنعمل فيهو... بوريك لو ألقى ليا براح
ما تخت الهموم فوق قلبي..وتزيد فوق العليا جراح
عارف أخوكا قصدو شنو...أخوك زول قرقراب ومزاح
هو ما الزول البقول الروب... ولا الزول أب بكا الردّاح
ولا الزول المنيفيش ساكت...ولا الزول البذئ البجّاح
ما زول خوخة عالي الصوت...يجوط زي طبلة المداح
ولا الزول الفطوقة العوق.. كان زروهو كاسلو سماح
أنا الزول الركز في الساحة...ما زول من بعيد كتاح
أنا السم اليسل الروح...عديل زي كفتة التمساح
مدخور لي هوايل القوم...معروف بالشكرصدّاح
مازول نوم وفتران همة..لكين زول هميم كدّاح
الزول البكفّي الناس..مليانات صحون وقداح
يباشر ضيفو يكرم فيهو ....باذل للبقر ضبَّاح
يفرح يوم يجيهو غريب...دا كمّل كم مراح ومراح
كم مرات مسكتو لساني... لساني الحادسيوف ورماح
وأرجع تاني اقول لي نفسي إت يا زول غفور صفّاح
الغفران ياخوي ديمة...لي هم القلوب مسّاح
وكل زول يدِّي مما عندو...عارفين الإناء نضّاح
والزول كان عرف لي عزو...أكيد بينوم تمام مرتاح
أنا القلب الرهيف وولوف...ماأصلو الدمع فضاح
لكين قاسي ظلم أخوانا...في داخل القليب نقّاح
خايف يوم يعرفو البيَّ... يقاسوهو الندم نتّاح
يوم شمس الحقيقة تبين...والداخرنو تلجاً ساح
أصلو العمر كان فيهو باقي ...بروح زي الزمان الراح
ما معروف نعيش يوم بكرة...والموت يا أخوي لفَّاح
بسأل ربي حسن الخاتمة...نكون من زمرة الصلَّاح
أب شخيت: طلقة أخرى
يا محيميد الحسين دقيش
عشان إنت زول سوق وعندك قريش
تقوم العتود تديهو صالة وغرفة وحويش؟
فطورو برسيم وغداهو لوبا وعشاهو عيش
كمان مبغبغ.. وسمان جضومو.. وخلي الكريش
مدوعلو فوق كم..؟ وراجيبو ايش؟
وابو الزيك يقول أكان شفتو والله التقول دحيش!!!
حكاية زي دي..اليعميني الله ويديني الطريش
لا بسويها مسلم..لا بسويها كافر..لابسويها عاقل ولا مهيبيش
وأنا ما كنت عارف.......... لكنو معليش..!!!!.
ما كت بجيكم..و أربطو في الدروة وأحكِّم النيش
وأديهو بس........... طلقة خريتيش
تلخبت الراس مع العفيش
نريِّح الناس كأنو ما فيش!!!!
عتودا متلو...مفروض نكتلو... و ما كان يعيش
أخونا طارق.. جزاه الله.... ويوم شكرو ما يجيش
هو ما أصلو زولا... جدع وكمان حميش
يقوم يجيهو بشيش بشيش
والدنيا نايمة نومة الدغيش
لا عندو جبخانة... لا عندو جيش
مسك خشيمو لفاو في خيش
ربط رجولو بي جوز كلابيش
ما اداهو موية ومات بالعطيش
ويا حلاة لحمو في الكنيش!!!!
ما لحمو طاعم وكمان هشيش!!!
أخونا العمدة سمعنا قالو أخد بقيشيش
ملوة قمح..ورطلين عماري..وسخلة و كبيش
غشو الجماعة...فشان عوقة درويش
سووه قاضي..ولزوه غادي..في وشح القباحة زادوهو تحميش
صلح هدومو..ونفخ جضومو..وفتح قدومو بي حكم قريقيش
قام ولع النار وجاب العويش
هو الفتنة راسا ولسانا وفيها
ويشعلل النار وينفِّخ فيها
ويزيد في وقوده ويقول طافيها
يا هوي......يا رحتَ فيها والله الروح تفيهة
ود الصيدة: أب شخيت "العبد"
قادر الله وقادر السيد ... ويفعل الله هو شن ما يريد.
داير أشوف شرشير الحلب ... وداير أشوف دق الحداديد.
السلام يا أهل المنتدي ... جيتي أصلها غير مواعيد
جيتي جية زول منفعل ... داير أموت بالزعل الشديد
ومافي زول يحجالو مظلوم ... ما الأمر مارق من الأيد
والكلام الداير أقولو ... ببقى قدرو يمين ما أحيد
والرصاصة الطايشه تدوش ... خاصة كان من زولاً بعيد
جبهه فتحت تالا الشرق ... سمى نفسو الحاج أب شخيت
وزى كلامو البيقولو دا ... عندى لا يمسى ولا يبيت
قال الحريم والشفع ورا !!! يا سلام يا الأغا ود عقيد !!!
العلوج والجبناء ياتن ؟؟ ... العيونا تجافي الغميد ؟؟!!!
الكلام ما كان معمم ...والقصد شعرانا تحديد
دا ما لو زي ديك (بت السرف ) البطفر غير مواعيد
هاك بسم الله وابدأ ...وهاك مني كلاماً مفيد
أنا داير أجرك ساعة الزمن ... داير أجيب السيرة وأعيد.
وأبدأ من زمن الموالي .. في بساط هارون الرشيد
ما لقيت أسم الزول دا أنا ... ولا قريب من اسم أب شخيت
إلاّ تاني رجعت صديت ... ما الأسم مقرون في بخيت
أب شخيت وهلم جرا ... ديل أسامي هنا ألات عبيد
إلاّ نحن إن درت تعرف ... نحن ناس تقابة المسيد.
ونحن ناس حلقتنا زاكرى ... ما في بينا قطيعه وشديد.
ونحن ناس سيره وناس حديث ... نحن ناس قرآن وتجويد.
ما انطفت نارنا وماب تموت ... وفوقنا تنطقش البراريد.
إن نقصنا نتم مننا ... وبي مشاريعنا الفي الصعيد.
لاب نمد إيدينا لي زول ... لا لحاسه ولا شحاحيد.
نحن أهل ( ود الكرسني ) ... نحن ما وافدين ... مواليد.
أسمحولي آيعقوب أرد ... خلني أنضم ذي ما أريد.
ما في صفحة عشان إتكي ... داير أموت بالزعل الشديد.
ليك يا زكريا السلام ... وإنت يا حسان تر بعيد
لا تقيف قدامي مظلوم ... ولا تجيبلك ناس أجاويد.
(أب شخيت ) اتفلت علينا ...(.....) يمرق من الأيد.
داير أعري من الفوقو دا ... وداير أفصلو قميص جديد.
يبدأ ألف باء تاء الشعر ... ويبدأ تاني من أول جديد
يبدأ من سنة أولى طيشه... ويبقى بالفصل سنة ويعيد.
وأنت يايعقوب في الشعر ... لما يبقي التلميذ بليد ؟؟!!
لا قرأ لا حصلو لوح ... لا الأدب لا يكتب يجيد.
لا هو قاري ولا يستمع ... تلقى بس حافظ الأناشيد.
كان تسولو درس عصر ... كان شوية كمان يستفيد.
هو ما بيعرف الشعراء من جم ... وما سمع بي حميد أكيد.
وما سمع بي يحى وأبو ... وما سمع بي ود العبيد.
وما سمع بالسر وابنعوف ... وما سمع بي حمد سعيد.
برضو قسم السيد وأبو شعب ... والهلالي الجدك أبوزيد.
وبين عطا ويعقوب ألف ود ... ولسه نترقب في المزيد
ديل كلها ناس لواءات وفيهن الرتب المن عميد.
ديل ما ضباط صف صغار ... هم ديل فحول القصيد
إنت وينا رتبتك هنا ... والله كت تعيين مرافيد.
استفيد دي مدارس الشعر ... لسه منها ميسك بعيد.
البشكر نفسو إبليس ... وأنا ما في زولاً بلويلي إيد.
ما نزل في ساحه إتكسر ... حقي قادر أجيبو وأزيد.
ما سمع تمساح أبنعوف ... البعوم فوق الجبابيد.
يلا خشها دارة الشعر ... لاقو إنت نديد لي نديد.
ياعماد ما سمعت المثل ... السفيه النبذ السيد
البولع نار يحملا ... واعتذار الناس مابيفيد.
الضرب من قطاع الطرق ... أصلو ذاتو دا بيت القصيد
شفتو يا يعقوب والعطا ... دا البخج الترعة ويصيد
قولو بل راسك واستعد ... للزياني المنها العيد.
وأنت رسل لي المقاسات ... شان أفصلو قميص جديد
داير أغسلو وأكويهو أنا ... وما تقولو كلامي تهديد.
داير أولع دارفور حرب ... قولو للفور اليستعيد.
يا زعيم باشمرقا إنسحب ... ماك قَدُر عرب الجانجويد.
ما بطلع التمره من القفا ... وان نزل بنزل بالجريد.
عمري ما بفزع لي زول ... وإن سأل تلقاني ويحيد.
ماب تتطاقش البيضة الحجر ... العصايي تقابل الحديد.؟؟
يلا أرفع رأية السلام .... دون شروط أو أي تحديد
وأرجى رمضان شان نعتقك ... وين في (....) كان عندو سيد
مهما جبد وفقش الجاو ...ماشي نازل ويرخص يزيد
( الـ ....) ينساق بالعصا ... ما (الـ ....) أنجاس مناكيد.
أب شخيت:همسة عتاب لود الصيدة أخوي
ود الصيدة اخوي هاك المفيد... وإنت زول مليان بالفوايد
الوضوح هو بيت القصيد....و لومي ليك أبيات من قصايد
أب شخيت لي زولك "بخيت" ما نديد....يعلم الله الخالق الندايد
بس نقول ونكرر نعيد....الفروق واضحة و عدايد
أولن ما زول طريد....ولا أجدادو كانوا من الطرايد
وعاشرن ما جلبوه بالصيد....الله لا جاب غارات الصوايد
وآخرن مافي زول الليلة سيد ....وكل زول على روحو سايد
ولَّى ياخوي زمن العبيد...و من قرون "حرّرنا العبايد"
والعتق ما كان زهيد....بس نحنا في "الإستغلال" زهايد
هُوْ ود العز المعروف تليد...الوارثو من أجدادو التلايد
وليد فراس وليهم حفيد... والفرسان أولادو و حفايد
ودَّ عمك و دم الوريد...البجوهو الناس ورايد
لو قال يجيكم يوم يصيد...يلقي نفسو لي روحو صايد
ياهو دمّك وهيلك شديد...مابيصح بيناتكم شدايد
أصلو التميرات العصيد... حلاته بعد الروب بالعصايد
والخصام الما حلّاهو عيد...أريتو عيداً ما يجينا عايد
حب الأخوان عندو الرصيد ...و داير يستلف منْكم رصايد
هُوْ الحنون البر الوديد....المابيفوت ناسو الودايد
المحب الوله المريد....حتى لو كرهوهو رايد
ياهو زيك في الجيل فريد...وإنتو ياكم ناس فرايد
و إنتا زولا معروف مابتكيد.... ضمة مابتعرف مكايد
وكمان مسامح وما حقيد...حتى لي حسادو الحقايد
وبرضو زيك سيد راياً سديد....الغطا للمقدودة و سدايد
العقلو ما توَّاه تام رشيد...الساعي في الناس بالرشايد
يوم يجيكم العدو بالحشود...تلقى ما بهمَّ الحشايد
سيفو السنين المن حديد....وسيف عداكم خرد حدايد
الدوا للجرح أب صديد....البيرُدْ خُصَّامكم صدايد
البعالجو بعيش عمراً مديد....لا يضوق "دِرب" و لا "أنبوبة مدايد"
الادب والأخلاق ليهو قيد...وفي القبايل راس وقايد
بسأل الله تكون عيشتك رغيد....وحياة اولادك رغايد
يعقوب بابكر عمر:أب شخيت غراب الشوم
ياغراب الشوم ياأب شخيت تبري كيف طاؤوس تتبعو
وإنته عارف البركل جسر وزيك الكانديك يجمعو
جيتنا ديك العدي الغشيم بي حروف شفع ماوعو
وإحترام الناس الرموز في الرباطاب كان منبعو
إنته ماك حاضر زمان لما أهلك كان وزعو ؟
شفته ناس الشعر الرصين بقو زي أفلاك يشلعو
لو أصلي ماهديت أب خليل والعطا العضعض أصبعو
كان قيامتك قامت زمان وكان لحقته كتار ودعو
وكان يخلوك عظه للخلوق كل ماشافوك توعو
مين سمحلك تهبش عماد أو دقش تنزل مشرعو
بي مقامن وعزة جباهن حاشا ليزول مابيركعو
إنته داير تعزل عماد؟وبره حوش الجيش تدفعو؟
إنته عارف الخلق الأدب حكمه فوقو عماد ربعو
وإنته عارف عمر البشير
كان حيدي عماد المشير
إلا رفضو ورجعو
قال أخيرلو يكون العميد وأوعه من إعلام لمعو
بالتواضع وحسن الكلام هو الوقفو ورقا ودرعو
إنته طارق أداكا كم؟جيت مغمد دار تتبعو
وطارق أصلا عارف النظام ووافق التحكيم طاوعو
لو سعاكا عشان الردود يبقي ساعي البوم والقعو
يفلح الأول في الخراب والتاني حر الصيف يفقعو
ولو رفض تنفيذ القرار زي شخوتك مابيشفعو
وإنته حدك الإستيكه أم قرش أويبل الشافع أصبعو
ويوم يزيد الضفر أو يطول أمسك الضفاره أقطعو
موقع البركل مو لعب لمن إنته تنط تفلعو
حافي حالق تجي بإحترام وحابي زي الدار يركعو
بي أدب وأخلاق وإنكسار وحتي ريقك ماتبلعو
وحالف أقعد قبلك عديل ومافي جندي يفوت مدفعو
والشخيت في الورق أب رصاص حاألوكو وتف أجدعو
أب شخيت: يهجو نفسه متنكراً بإسم (أبو أواب)
هوي يا أبشخيت بديك حديث قرِّب أضانك واسمعو
جايينا من سفراً بعيد راكب حمارك تلكعو
ما جيتنا بي شيتاً جديد غير "تعالى" وكوراك قعو
وحبة "تطاول" مستفز...وهرشات و "فلّيق" بالبعو
ورقك معرِّج .. وورقنا فاتح من زمان وما لاقي بايظ نجدعو
أخير ترجع تتم باقي الشراب وخمِّر عويشك وزرِّعو
أصلك سجيمان من زمان والهاري يومي تكرِّعو
ما تنسي الحمار تديهو المشك...عارفنو فنجاط ما مطيِّعو
وإنت كان يوم إنحشك..مافي شك مابنهبشك لكين خشيمك شمِّعو
الجانا بي "أدب واحترام" نكرم مقامو نشبعو
حتى الوليدات الصغار ماسكين حمارو يرتِّعو
وكبارنا حالفين باليمين ضابحين و للعربان دعو
شوف ناسنا متكسرين شديد..جايين علينا و أسرعو
كان جيت براك...والله آلافاً معاك ما فارقة تب ومابيُمنعو
وشبابنا شايلين الصحون... وقداح زيادة إتبرعو
كفّو الخلايق كوم لحوم والباقي للناس وزعو
أدوهم الحلو والجلي...حتى الفواكه تبّعو
و مافي زول أدوه خير.. قام أباهو ورجعو
إلا زيّك "لزِّاهو زول"...طمع نفيستو وشجعو
أدَّاهو سيفين من عشر...(حزَّم هدومو ودرَّعو)
وسوسلو بي قول (بارك الله في من إستفادو و نفّعو)
"قبض المقدم" وتوش دخل..خلاهو حاري وطمّعو
يختو فوق وش "المدافع"...كم خيَّب ظنونو و فجَّعو
ولو ما الأدب مانعنا والجيرة والأرحام و "شفّعو"
كان حرَّشنا درفونا صغير...يكفَّت جضومو يلبِّعو
يمعط رويشات "الغراب" ينتّف ضنيبو يمزّعو
كان تاه يوريهو الدرب...وكان خلقو ضيّق يوسعو
لكن وصاة أهلا كبار (حانن وليدك وطبعو)
(ربيهو يحترم الكبير يرعى المقامات وماتدلعو)
(إن درت تأمن من شرور...ماتنسى "كلبك جوعو")
"ود الصيدة" و "أولاد بابكر" إتنفشو فوقو إتضرعو
ديل بحار شعر القصايد...هم مصبَّو عديل و منبعو
ديل ياخي ما خلولو شي ...إتفنّو فيهو وبدّعو
ياخوانّا كان شعرن رصين...أطرب قليبنا ومتعو
بالضحك قطع المصارين... لامن كلانا إتفقعو
طربت نفوسنا وانتشت...وقلوبنا حنّو إتلوعو
زاد شواقه لي شوفة حبيب سافر بعيد ماودعو
زي مغترب مشتاق شديد لي أم عيالو وشفّعو
زي وردي بالعود بالمزاج يغني سايلات دمّعو
(هجرة عصافير الخريف في الموسم الفات قنّعو)
العمدة عود صندل عبير عطاهو طيب للجدعو
شمعات علم تضوي السبيل...أو قول نخيل يرمي الرطب للفلعو
و ختاكا كان ياأبشخيت...كاسات ألم مابراهو شربو إتجرعو
أحبابو الكتار برا البلاد.. خاتمين جوازن طلعو
وإتنادو من داخل البلاد...إتلمو ليك واتجمعو
قالو حالفين جوه الحرم ...مهللين طافو و سعو
(الما احترم مقامات الكبار...أتمان عزيزة ندفّعو)
(نخلص حقوقنا مضاعفة...نبهدل حياتو نبشِّعو)
(كان فات "أدب أولاد رباط"...وما شال نصيبو الوزعو)
(خلونا تب بنجيهو....ونعدل عوجتو و نردعو)
(ماأصلو زول "بومة خراب"...نهدم بناهو نصدِّعو)
(ينسى أبوهو الوالدو زاتو وحتى مين الرضَّعو)
(ينسى إسمو الكان أبشخيت...نمسح خطوطو نبقِّعو)
ود العطا: معركة تحرير الطريف
(أب شخيت الحلبي)
قبل نمشي نخش في الغريق ... ونبدأ من يوم طارق نهب
السلام زكريا وأخو... يا سلالة الشعر الأدب
شيخى إبراهيم بابكر ... نلقى كل ما الواجب وجب
البقيف قدام الصفوف ... وشيخي عندو المشي يبقى خب
داير أحي عماد الحليم ... وتاني أحي جميع الرتب
والشهود ادعاء واتهام ... جلسه كاملة لفحص الطلب
حنو في حال طارق كتير ... وبرضو عملو حساب للنسب
برروها دوافع اللفح ... لما عرفو الجوع السبب
خلو كل سوابقو الكتار ....في التعدى واثارة الشغب
خففولو الحكم الصدر ... جنبوهو الحكم الصعب
الببتر الايد من خلاف ... والكراع من حد الركب
داير اقول لى كل من يقول ... مالو لسه العطا ما كتب
معركة تحرير الطريف ... موعدا آخر يوم في رجب
منى يمشي فصيل مستجد ... لسه للنيران ما ضرب
البنادق الفى ايدو طين ... والسيوف كرتونه وخشب
كلهن ساعتين والطريف ... يبقى فيهو الأمن استتب
فر شرد الرخم أب شخيت ... قبل يصلو فصيلي انسحب
يجري فات قدام الحريم ... يجري قبل الشفع هرب
ياتو فينا الجبناء العلوج ... ياتو طلع الشبش الكرب
وفي الطريف الناس كلهن ... احسبو الحيين والترب
وان تلمو تمور الطريف ... ما تكفي كمينة الحطب
ماب يعشي النعجي الجرف ... وماب يغدى حمارا القصب
الطريف التنتج الجير ... وياتو جير!!! الجير الكعب ؟؟؟
الطريف المو تام طرف ... ياهو مسقط رأس الحلب
فيهو رايجي تجارة القزاز ... واغلي شئ الجركان والعلب
وفيهو افهم زول أبشخيت ... حلبي نافخ الكير والقرب
عندو خير من ولدو الحمار ... ودحشو خايل فيهو الكشب
حلبي فوق السجم العليه .... يبقى حلبي قليل الأدب ؟؟؟
نفسي أعرف مين أبشخيت ... وابن مين لو كان عندو أب
أب شخيت: تشغيل شريط مارشات عسكرية
الليلة وقَّفنا البرامج...شغَّلنا مارشات عسكرية
قطَّعنا كل الإتصال...كان بالموبايل كان بالثريا
وبرضو حاظرين للتجمهر.. والتجول من عشية
وحتى في القوات تأهب... مستعدين مية مية
ومالين الشوارع جيش..نسير دورية دورية
وانتظرو العميد يصدر.. قرارات نافذة فورية
وانتظرو العميد يصدر.. قرارات نافذة فورية
بس مارشات عسكرية.. بس مارشات عسكرية.. بس مارشات عسكرية.
الفصل الثاني: بعد الإعلان عن الكاميرا الخفية
بيان هام من العميد عماد الطيب محمد الطيب
الأخوة الأحباب الأهل والعشيرة
السلام عليكم و رحمة الله
(1) في البدء لابد لي أن أشكر كل الأحباب الذين أوصلوا لي تضامنهم العميق لما رأوه "محنة" تعرضت لها ومعي آخرون في منتدى "عتود دقش"... ولعلي أسميها "منحة" من التواصل الطروب بيننا..!!!.
(2) ما كان يحدث في بوست "عتود دقش" في خلال الفترة الأخيرة بعد ظهور "أب شخيت" المفاجئ والغريب لغالبيتكم ,كان حلقة مستوحاة من برنامج "الكاميرا الخفية" تحت عنوان "كمين للشعراء والمبدعين"...كان لي شرف وضع الخطوط العريضة للخطة و أوكلت للأخ الشقيق و الصديق العزيز جداً "أب شخيت" للقيام بالتنفيذ مع تزويده بكافة الصلاحيات للقيام بكل ما من شأنه إنجاح الحلقة..ونحسب أنه قد أدى دوره المطلوب بفاعلية...فله التقدير..
(3) هذه الفكرة كانت ترمي إلي الدفع بشعرائنا الأفذاذ لنظم جياد القوافي وكرام القصايد بإعطائهم الدافع الشعري الملهم الذي يقدح زناد الشاعرية ...ولعلنا جميعاً إستمتعنا بتلك الغضبات المضرية الشعرية لأولئك العمالقة الشعراء وعلى رأسهم المبدع ود الصيدة والمبدع ود العطاء و المبدعون "أولاد بابكر عمر" وآخرون...فلهم جميعا نحني الهامات إجلالاً وتقديراً واحتراماً...فقد كانوا عند حسن الظن بهم تماماً...
(4) ولابد لي أيضا أن أشكر لفيفاً من الأخوان الذين دفعت ظروف مجريات تنفيذ الخطة على الأرض إلى إشراكهم في "سر الحلقة"...فلم يبخلوا علينا بإسهاماتهم السرية المقدرة "بالتنسيق والإرشاد من وراء خطوط الهاتف" ..وبالمشاركة الفاعلة المعلنة في البوست بما يدفع الخطة بالسير في مراقي النجاح.. وقد ننشر لكم أسماء هؤلاء الأعزاء لاحقاً
(5) أسمحو لي أخيراً أن أسأل أخي رفيق الدرب "الرباطابي" العقيد طبيب الفاضل الفكي عوض الله إختصاصي طب وجراحة العيون بالسلاح الطبي كيف تتخذ لنفسك إسمين غريبين "أب شخيت و أبو أواب" دون أن تخطرني بذلك مسبقاً..!!!......" الله يجازي محنك ومقالبك"..!!.
(6) أكرر شكري وعرفاني و امتناني للجميع و نرجو أن نكون قد وفقنا في البرنامج فكرة وخطة وتنفيذا وتنسيقا وإخراجا ونشرا...و نرجو أن تكونوا قد إستمتعتم بالقصايد الشعرية البديعة التي كانت هي هدفنا المنشود... ونعتذر عن أي ضرر غير مقصود لذاتة قد أصاب بعضاً منا....
العميد/ عماد الطيب محمد الطيب
الخرطوم العاشر من سبتمبر 2007[/color]
أب شخيت:زيارة مودة للعميد عماد
أخوكم ود رباط...زاير عماد ود عمو شايق
إلاّ عقابو أعوج...مسور يا دوب بتايق
قرّن الحيضان وجاكم... علا التقانت واللبايق
وصى للجنُّون يجوهو...لما يبقى خلاص متايق
ما خلا للأولاد قريشات ...كان هدومن كوم لتايق
ولا حق الدوا للحتالة الديمة تعبان وخلا ضايق
وأم العيال الصابرة ياخوي..توبا الوحيد مشروط فتايق
ما راضي يتلم بالخيوت...لابسه مضمومات رتايق
الشئ المطمنو يا أخوي...غنيمة لبن وحزمات تبايق
يضبحوها إن كانو جاعو...يتمزُّو بالشيات والسلايق
الحياة بتدور البصارة... ترانا نضاير فيها ونضايق
وحالنا مستور يا أخوي...ما اتفرجو فينا الخلايق
ونحنا ما طالبين كتير... ما شهوانين ولا شبايق
حريف الكسرة من صاجنا..نسو فوقو ملاح أم رقايق
والحسد تب مابنعرفوا...متل واحدين قروشن كلايق
زمان كبارنا وصُّونا...وصاتن في الإضنين حلايق
قالولنا أرضوه القليل... ولابد عليهو شكرنا لايق
لكين الفقر قاسي وصعيب... نسايس فيهو و نسايق
كان رضى يوم علينا..يدينا الشلاتيت والدلايق
وكان صبح غضبان في وشينا...يدينا الشلاليت والخزايق
يكسِّر في عضامنا عديل..وفوق روسينا مضروبين فلايق
وبرضو دافرنا الحنين جايين وللحبان شوايق
أصلو القلوب لو كان حُنان و لي عشرة الأخوان عشايق
تلقاها مضمومات شديد ترعى الوداد و حسن العلايق
و مابتقطِّعن الظروف رغم المصاعب والعوايق
@@@@@@@@@@@@@@@@@@@@@@
ديك بنات عمك وخالك... مغبونات حمايق
واقفات بي قُبالك... شوف دمَّاعن خنايق
ما راضيات كتالك... تقوم في الناس حرايق
الساترات لحالك....وللأخوان شقايق
وكت شافوني جيتك...متقاودين رفايق
داخلين جوة بيتك...صرخو مندهشات شهايق
رجعن لي بيوتن...مرتاحات روايق
@@@@@@@@@@@@@@@@@@@@@@
وجونا أخوانا شادَّين..هديك حمّارن هنايق
شن شايلين معاهم...غير ألوان زينة و زوايق
قصايد وا حلاتة..تدِّوب من غلاته..وفيها أبيات رشايق
نرجس وفل وياسمين...زهور فواحة وحدايق
نطرب بي لقاهم...نكون خلان صدايق
ضامِّين لي صفوفنا...متعاصرين لصايق
باذلين من كفوفنا...متحانّين شفايق
متواضعين حالنا ديمة...ما نخرات شنايق
@@@@@@@@@@@@@@@@@@@@@@
العمدة ماهيلكم براكم...مقسّم وما هو حايق
وكان قلتولي أهلو... خلَّونا منضافين لحايق
نحنا أخوانو وصحابو ...معاو في اللَّقا في المضايق
تقول تيمان قادر الله...مقسومين فشايق
سنينا الفاتو عدَّو.... معاو مرن زي دقايق
ود ناسا كرام...نضافاً ما خرايق
شايلين للسيوف...ما متضارين بالدرايق
يكون لعداهو حنضل...والوجع الزرايق
عداك يا زول هديلك...مجدوعين فهايق
حب أخوانو شيمة...أنواع شتى وطرايق
والأرواح في حبو...مكتولات زهايق
ما زول "عوقة درويش" بشوفو رزين ورايق
إيدو الماطرة كابة بي رعدا وبرايق
الضامِّي اليتامى...وساس لي بيوتن مرايق
الكافل الفقير...ويبزم للناس رزايق
الدوا للسقيم...ولجروحن لزايق
نفرح بيهو ونقول...غنا وطمبارة ومزايق
(عمدة معاهو طينو ...والجزر البسايق)
(وكان قلنا العميد....قدرو وضمة خايق)
(زارع لينا صيفو...كمان للشتوي سايق)
(والعجوات نقّط عسيلة...حليوات وما حوايق)
@@@@@@@@@@@@@@@@@@@@@@
والبدرو الفتنة ياخوي...ناس عُوَرا وفطايق
ديل فارغين كعابة...والهمّز أمو فايق
ديل ماكرين تعابة...ديل سفهه وصفايق
ماحقين ليهو حقك...ولي شكرك محايق
ناكرين للجميل...كمان همباته وسرايق
@@@@@@@@@@@@@@@@@@@@@@
ما بنسى اولاد "دقشنا"..الماهلين ماضوايق
هم ساسنا وعرشنا...بقول فوقن حقايق
نفوس طاهرة وشريفة...ما للشر طوايق
تابعين لي نبيهم...وخيراتن دفايق
عافين لي دقونن...وللشنبات حلايق
للتقى والصلاح...كم للناس سوايق
كلام واضح عديل..لا لغاويس لا لوايق
القول بالدليل...غير التوحيد ما فوايق
دي السنة السبيل ...دا كلام الحق ما لفايق
بسأل الله الجليل...العالم أسرار الخلايق
أنا وأخواني وإنتو....نكون في الجنات رفايق
زكريا بابكر عمر: كلنا شربنا المقلب
السماح يا صحاب السماح
والعذر مننا أقبلو
كلنا المقلب شربنا
وييداك أب شخيت أسألو
هو وعماد شدونا العتود
وزازو بالنيران مرجلو
خلونا ننطاقش بالجري
للبحش فنن منجلو
والكان بيقرع فاتح اللبق
وقف البابور بطلو
والمودي للسوق الخدار
خلا في شوالو وبلبلو
والعندو مشوار للصباح
مامهم قال بطلو
وحتي ناس البكاء للعزاء
زولن الميت سبلو
الله يجازي محنك ياعماد
ساوي راسك زي الدلو
الرباطابي جنا أصول
مالك عليهو مبهدلو
أداهو إبراهيم بالتقيل
وسلا من جنسو وحولو
سواهو عبدا ليهو ضل
ليبخيت وداهو وسجلو
وسماهو يعقوب الغراب
وكان غراب الشوم مدخلو
مسحو بالإستيكه أم قرش
ومسكو من كرعيهو ودلدلو
أما العطا بالغ عديل
تكي الزويل ضبحو وحللو
أنا من الأول ماقلته ليك
ناسي في عماد مابيحملو
ماشفتهن من سمعو الخبر
بقو في القعاد يتململو
في النهايه وبيت القصيد
آخر الموضوع وأولو
كل زول من الإبداع يشيل
يغرف يكب في جردلو
أعفا مننا ياأب شخيت
نحنه كبرنا والناس هللو
ود البلد يقول:
حميرا يابت الرجال واخت الصناديد العرب
يا الكنتي للايتام سند ويالكنتي للضايعين ادب
حميرا يا الطاهره وعفيفه وماعستي في يوماً كعب
ربيتي لي اختي واخوي ومحتجتي لي مالً كعب
يحفظك الله يا المبروكه وان شاء الله ميزانك دهب
@@@@@@@
وبعيد وقولّك
انا لاني شاعر لا أي شي
انا شافعاً صغير ماعندو شي
لاكن وكت ألقى الكبار بسمع كلامن وكل شي
وبقعد بعيد واسمع شعركم وارتشي
وبنظمكم السمح الجميل بنسى الوجود واي شي
وكان جبتو يوم طاري البلد تذرف دموعي بلا اي شي
بتذكر اخوالي الكبار وناسي الكتار وحت البنيه التختشي
والنيل وساقية حاج بدر وطورية تحفر كل شي
وتمره عاليه تصارع الريح وتنتشي
أب شخيت: ود البلد تعال هاكا رد
ودأخوي يا علي ود البلد
كان لقيتك كان سلّم قلد
إنت شاعر من يوم ماتولد
وفي الشعر ليك عوم الكلد
الكسل هو عدوك الألد
لو إنت صبّار وعندك جَلَد
ياهو مضمون ذكرك خلد
بيان من العمدة العميد الي العطا
نحن مع الطريف قلبا وقالبا حسباً ونسباً أصلاً وجذرواً ولن نتخلي عن اهلنا ابدا .....اما العبدلاب فهم الديرة والديار والاخيار ولن تستطيع ان تجلس بالقرب من ضُلهم ناهيك عن تحريرهم وان عدتم عدنا وكل إناء بما فيه ينضح
أب شخيت:الطريف الجريح في وجه الريح
ودالعطا حليفنا الجديد..........يا صاحب الذوق والأدب
جاتنا معلوماتن أكيد.............من مصادر موثوقة تب
برسِّلة ليك أنا بالبريد............عبر الأثير ما جيّة خب
حسان يكورك من بعيد........قال أبشخيت باعنا و قَلَب
ياخوانا محتارين شديد..........ورونا بس إيه السبب
تقولو مرات زول العميد........و مرات مع طارق نهب
مرات تودوهو العبيد...........ومرات تقولو من الحلب
يعني ما نحر ِّش نكيد..!!؟؟..ولا نجدِّع ولا نجيب الحصب..!!!؟؟
حسع دا ما الخبر الأكيد........ولا عشان كده أنا كتب
يا زول شماري بكون غليد....ليهو ضل حار من لهب
قالوا الطريف تبرق رعيد......مابيرضو بالقول الكعب
عاملين تمام جِد لي حفيد......وجامعين كمان ناس النسب
وانا مابلوِّح بالوعيد................وانا زول معاك عكاز مضبب
وإنت ما واقف براك مقطوع وحيد.معاك أبشخيت يبلع عدوك ياخويا "جب"
وإنت كان مظلوم تب مابحيد............وحتى لو ظالم علي نصرك وجب
أسمحلي اقول راياً سديد..........كان يطفي نيران الغضب
لسه الأمر ماسكنِّو بالليد............قبال يزيدو النار حطب
ياخوي ختاك جَد كان شديد........يقطع علايق الخوة تب
أهل الطريف هم ليك رصيد.......لو جبت الكتاب جمّع حسب
ضرِّب حساب الخوة في الريد....وارفع مقام العشرة طارح السب
تلقى الحساب ياخوي يزيد.........و البيعة ليك ربحانة طب
وانت ما الزول البليد.................ولا في الحساب فد يوم رسب
ولا الزول اب عقلا كسيد...........القالولو صلِّح طبَّظ خرب
ولا في خوة الجيران زهيد........خليك من رباط الدم والعصب
أهل الطريف هم ناس المسيد...البصومو رمضان من رجب
قوم المكاشفي وأهل الجنيد.....خاتمية وأنصار من لبب
ديل هم سلالة الجيل الفريد.....الخلطة بين زنج وعرب
الثابت الأركان وطيد..................ولو جاتن الريح هابة هب
لو جاهم العدمان فات سعيد......فرحان ينطط بالطرب
شافعن من قام رشيد..............حافظ الكتاب من دون تعب
ديل ياخي قدمو كم شهيد.........خاتيهم اللوم والعتب
حد ما أشكر فيهم وأعيد............ألقى الكلام جافاني وغلب
يا خوي إعتزارك ليهم مفيد.........يبقي زي قطران للجرب
ترتاح عيون جافاها الهجيد .........تخضر زروع بعد الجدَب
قبال يهل رمضان المجيد.............إعتذارك عز الطلب
بيان وقصيدة ود العطا :معالجة التداعات
بسم الله الرحمن الرحيم
الحادي عشر من سبتمبر
وتداعيات معركة تحرير الطريف
تعديلات طفيفه على خارطة العبدلاب في اضاءة للمدخل أقول: ـ
أخي في الله وفي التسكع بين جزوع الكلمات وفي السعي حثيثاً بين غروب الشمس وخلف صدى أنغام القافية المدعو ( منهم ومنه ) أب شخيط ومني أب شخوط.
حياك الله...
تخيلتك أغبر .. أغبش طويل القامة نحيف الجسم .. تميل النحافة فيك إلى النحافة عند أهلي وأهلك البسطاء .. الطول خمسة قدم وستة بوصات .. العيون عسلية بالقدر الذي تتطلبه معايير المهنة...
استوقفك لأناشد العماد والعلي والزكريا أن يكفوا عن الاعتذار عن ذلة لساني أنا حريُ وخليق وجدير بي أن أفعل ذلك وبالقريض نفسه ومثلي كانت به يكون زوالها به ويا عملات المجنون ( حميد)
إذا كان العكار من طين كمان من طين يجي الرواق ( الله يطراهو بالخير)
داهمني الاحساس ... إن خلقي أصلاً كان في مهمة واحدة ... أن أخرج يوماً من طوري لأخرجك من التخفي لتخرجنا جميعاً من عتمة الملل والنكد إلى تلك العوالم الرحبة التي سُقتنا إليها والتي لا يراها إلا العائدون من الموت .. واسأل الله ان يديم علينا نعمة الخروج ابداً ونكون من الخارجين من الخروج إلى الخروج إلى الخروج إلى أن نلقاهو تعالى ... آمين.
يا أبن حميراء
أخذت كل ما تملك منها سنتباهى نحن دوماً ونقول أخذنا كل ما نملك من ابن تلك الحميراء ... أكرمها الله ...
نعم التقينا في الوجهة والاتجاه .. اتمنى ألا نلتقي أبداً وجهاً قبالة وجه ... أنا أدمنت التلذذ والتلهف والتشوق للقياك وهذا كف .. لانه من نعم الله عليّ.
القيام لك حتى وإن أذنت لي بالجلوس.
دنيا فيها تسوقنا الظنون
ونمشي كلما الهاجس هجس
ويصدق الإلهام ويوم يخيب
وبرضو ياهو دا حال الحدث
واصلها الأقدار راح تقع
مهما كان الزول احترس
وفي المسارح في الواقعي
ومسرح المعقول والعبث
والسيناريو يجيك بألف لون
وكل يوم تتحبك القصص
وتفرض الأحداث كلمتا
والمهم تبعات الحدث
لا الأماني تجيب الغنى
ولا في نقة تطرد الفلس
والبيأكل الحوت رزقو حي
ورزقو حي البيأكل العدس
داير أقول للأغا أب شخوط
ليهو ذات بالذات بالأخص
ودحميراء صلاة النبي ياكه دوخري الحوجة الامس
كلما الأعناق تشرئب تبقى انت المعنى انت بس
يا حفيد القيقر سلام يا جنا النعمان يا كلس
فيك شرافة أهل أم دويمة البسوقو العدو للقفص
وكربكان تنشاف فيك عديل
وفيك شفنا النور والقبس
رغم عنف الريح انت في
ورغم انو الريح ماكرس
ما رخيت ذات يوم اللجام
وما نزل من ضهر الفرس
يوم سمعنا صليل السيوف
ما سمعنا البكاء والجرس
إلاّ صاحبي وصاحبك عماد
مالو غير رأيو انتكس
مالو خلى جماعتو المعا
مالو من وسط أهلو اتفرز
وين محاكم طارق تروح
وشن لزوم الحجة الهوس
يوم نهارت انسرق العتود
التقول مسروق تور جخس
اصلي دابي عرفت الكثير
يوم قعدت حسبت ودرس
وفوق حروفي بخت النقط
وداير أقول القول مافي دس
تهت يوم باريت السراب
يعني أقولها صراحة أنا دقس
وداير أقول العطا حي وفي
وفيهو حي الحس ما خرس
ولسه باعو بيلحق طويل
وعندو طولة البال والنفس
ماب يخاف من زول عندو تاج
وعندو كم دبورة ومقص
يمشي طول اليوم مطمئن
ماب ينوم غافرنو الحرس
يا هو حالي ان طال العمير
بيهو اموت إن قصر نقص
إستنفارات طارق علي صالح
الاخوة الاعزاء اتصل بي احد ابناء الطريف المخلصين ورقم صغر سنه وحداثة عهده اعتقد انه ابلي بلاء حسنا كما المقاومة العراقية ضد اقوي قوة في الدنيا
العم طارق انا من سيتصدي للمدعو العطا انا ابن الثامنة عشرة رغم انها المرة الاولي التي اكتب فيها بالدارجة واعرف انني ساجيدها علي ضهر العطا قريبا ....هن عشر صواريخ سأطلقها انا احد اشبال الطريف ...شعرا سيحفظه الناس وتسير به الرُكبان ...فلا داعي لان يشغل الكبار انفسهم بمثل هذه المسئوليات للدفاع بالحرف ضد دون كيشوت المنابر.. ساقوم بارسال باقي الصواريخ عبر اشتراكك اذا سمحت......كما ارجو ارسال السيرة الذاتية للعطا ومعلومات عنه ببريدي الالكتروني...وشكرا
طريف الخير
من القصر البزين ضحك الجبل لليل
وللحلة الكتب تاريخا موج النيل
ربوع بلدا اصيل وجميل
سلام الآف
فوارسٍك ديمة قدامك
اذا داست علي طرفك سنابك الخيل
*******************************************
ملعون ابو النضِم السجم
ملعون ابو الشعر الرماد
من العطا ولي قوم عاد
**********************************************
ملعون ابو الزمن البخلي البسوا والما بسوا يشتم في كرام الناس
وفي البلد الصلاحا اساس
سلالة الفقرا والفرسان
اذا صاب البلد هملان
والجيران
اذا ضل السبيل حيران ولو سكران
كما حالة الجنا الهلواس
والنيرا ن
اذا طال الطريف غبيان
كما حالتك
اريت تسأل عن الحسن الكبير ونبيل
عن العلم البدوهو اسيادو من صديق ولي ولدو البشيل قرآن نصايص الليل
ولي حمد الكبير واصيل
وللحسن الختام وعديل
ولي هسع
حمتياب ممدة في الزمن قنديل
وهاك القول
من الولد الغناهو صهيل
وليد اسمر
كِساهو من العفاف اكليل
مأصل تب
مِداد داخرنو للمقطوع وللسّراق وللمطلوق ولي الزيك
مفصل تب
اذا مديت لسانك بالغنا السجمان بيقطعو جب
وليد اسمر
كما سيفو المداد مسنون
اذا بات الطريف مغبون
من السجم اليسوي البسوا والمايسوا والزيك
وتعال جربنا
فرسان الشعر والسيف
منو الغشاك
عشان تدخل عرين الما بعرف الخوف
منو الخلاك تدق باب التحرق الجوف
منو الغشّاك
عشان تركب غنم ابليس
وتتخيل
ركوبك فوق خيول عسكر
وحطب عُشرك سيوف عنتر
وعكازك عصا موسي
دي الدقسة التخلي الزول يظل اشتر
وكان تقدر
من الوهم السكن جواك تتحرر
قبل تحرير طريف بلد الطريف والناس
بلادا في شموخ شمس الله
سوّاها الكريم للكون عشان تحكم خلوق الله
بما فيهم ملوك خلق الله
والباقين عموم الناس ودون الناس ولي الزيك
جزء من رسالة سابقة من ود العطا لطارق علي صالح
(لم تنشر من قبل)
[color=#00008B]داير أقول لي طارق أخوي...الطبيعي الشي المنطقي
إنت زي العطا عندي انا...وعندك إنت العطا طارقي
نحن بينا ملامح وسمات...وفي العديل والشين نلتقي
زي ما إنتو تعشقو الطربف...الطريف أنا من عاشقي
...............
...............
إلى أن يقول:
الله ربي يجازي الشعر...اليخلِّي الشاعر شقي
العطا علي العطا....البركل....الخميس أول رمضان
(القصيدة كاملة ستنشر فيما بعد)