اشعار الشاعر هاشم صديق من1976-1985 لومااكون منك واليكمعناى شنو؟ واصبح منو؟

[صابرين]

جواب مسجل للبلد

يابلد
اسمعينى وهاك كل البيعه كامله
اسمى هاشم امى امنه
ابوى ميت وكان خضرجى
ومرة صاحب قهوه فى ركن الوزارة
بيتنا طين واقع مشرم ولما حال الطين يحنن
نشقى شان يلقى الزباله
خلى القاب الجرايد
من ممثل ولا شاعر
ولاكاتب ولا ناقد
كلو زى يفط الدكاكين والمطاعم
كلو زينه وماهو شاهد
تلقى مكتوب ترزى احلام العرايس
وجوه فستان مرمى واحد
او مطعم الجنه الفريده
وجوه قدرة فول وحله
ومويه للعطشان فى قله
وزى كلام شاعر بقدر
فى بلدنا الحاله واحدة
المطار ياهو المحطه
والكوميت يوم تبقى كارو
والزمن بيروح اونطه
يابلد
هاك ايديا ووحاتك
انتى زادى وقصرى والمال والكتابه
منك اتعلمت اصبر
وكيف احس الم الغلابه
واتحدى بيك تعب الطريق
وشقا الزمان وكتين يضيق
واتملى بيك
واحس بيك
واغنى ليك من الصغر
حتى القبر
واحلف عليك ترجف عروقى من المهابه
يابلد
والله طول كل السفر
جرحك معاى صاحى وحزين
وبليون نجم بليون نجم
فى كل ليل
اسمك يشع فيهن ويبين
خاتيك فى صدرى النفس
وتحت الجلد نص القلب
جوه العروق
حاضنك ثبات
ماظن يلين
ارجف وكت تعكس
عيون كل البنات زرقة سماك
وانقز واطير
لامن رزيم كل الغنا
القاهو من طبلك غناك
والله لابدلت جلدى
قلعت شارتك فى المراقص
ولاشان رفضت وقلت لالا
رفعت راسى وقلت فارس
ولسه بقول مابستريح
لومايطل فجر الخلاص
لوبالحروف لوبالهتاف
لوبالسلام لوبالرصاص
مابستريح
لومااموت ليك وعليك
ولوما اكون منك واليك
معناى شنو؟واصبح منو؟
معقول اسيبك يابلد
زى مابتقول خدم الامير؟
معقول انا
ملعون ابو السفر السنه
لوكان يقيف بينا ويحول
اتحدى بيك كل المتاريس والكضب
وحتى الافول
وحبل الكضب زى مابنقول
دايما قصير لو حول يطول
وياالفى بلاط حاكم البلد
عايشين خدم وسط الحشم
وشايلين ختم وتصنفوا
اتغوا زيدوا وصنفوا
او زيفوا او الفوا
والحق بجى
قسما يمين والدنيا نار
ويوم الحساب غدر الخدم
زيف الحشم
ظلم الامير
نحنا النقيف ونصنفوا
بالفكر ماحقد الصغار
نحنا الشقينا عشان بلدنا
ونحنا يادنيا الكبار
يوم المجازر
مارجف رمش الشهيد
وقدام عدد كل البنادق
كانوا صادحين بالنشيد
يابلد
اسمعينى وهاك كل البيعه
اسمى هاشم
امى امنه
ابويا ميت وكان خضرجى
ومره صاحب قهوة
فى ركن الوزارة
بيتنا طين واقع مشرم
ولما حال الطين يحنن
نشقى شان يلقى الزباله
ومابهم
انتى زادى وقصرى
والمال والكتابه
منك اتعلمت اصبر
وكيف احس الم الغلابه
واتحدى بيك تعب الطريق
وشقا الزمان وكتن يضيق
واتملى بيك
واحس بيك
واغنى ليك
من الصغر
حتى القبر
واحلف عليك
ترجف عروقى من المهابه
ترجف عروقى من المهابه

[شكري حسن]

ما اجمل اشعار المبدع الاستاذ هاشم صديق
مشكورة الاخت ثريا على اتحافاتك الجميلة

[صابرين]

ما اجمل اشعار المبدع الاستاذ هاشم صديق
مشكورة الاخت ثريا على اتحافاتك الجميلة

شكرا الاخ شكرى لمداخلتك ان شاء الله سانشر لك اشعر تلك الحقبه من الزمن
لك الاحترام

[صابرين]

شان بلدى

وحاة دمى النزف يوم داك
وبل الطين
اقيف واركز
ولابتهد بالكلمات ولا السكين
وشان بلدى
وشان الخير يزيد ويدى
اقيف مارد اريد ارضى
اعيش فوقها
اموت فوقها
ومحال يرخص تراب اهلى

[شهرزاد]

الغالية ثريا :
لا أملك غير أن اشكرك علي القصيدة الرائعة للشاعر
الفذ هاشم صديق وأشاركك بأخري من درره ...
قصيدة تعجبني كثيراً .
ربما لأني أول ما سمعتها كانت بصوته في ساحات
جامعة الخرطوم وكانت تلقي لأول مرة ..قرنتية

قرنتية ..
لا دبابة برمائية .
لا جاسوسة مدسوسة .. لا غواصة روسية .

لا جندية في "حركة" .. لا مختلسة مال شركة .
لا قصفت حدود "فشَلا" .
لا كسرت صريف كسلا .
لا معروفة ختمية .

قرنتية ..
لا صعلوقة لبست "شورت" .
لا بتعرف شنو البظبورت .
لا محتاجة جنسية .
هي قايلة النيل سقِف بيتها ..
وقايلة ضِفافو "محمية" .
جات منسابة عز الصيف ..
قايلة الناس بِكِرمو الضيف ..
وقايلة النيل أمان والقيف ..
وقايلة "الحاضرة" عصرية .

قرنتية ..
جات بصغارها دايرة الخير .
لا شافت يٍفَط تحذير .
لا نزحت تكوس توزير .
لا جاطت حركة السير .
لا دارت وسام تقدير .
لا مستلفة عشرين وش .
ولابتعرف تعيش بالغش .
كان محتاجة بس للقش .
وجات أحلامها دوغرية .

قرنتية ..
لا بلعت عديل السوق .
لا نضمت بدون طايوق .
لا كنزت دهب أو ماس .
لا ظلمت بدون احساس .
لا عصرت شباب الناس .
لا كتمت على الانفاس .
لا قطعت عشم بي فاس .
لا داستنا زندية .

قرنتية ..
لا دست سلع في الخيش .
لا شربت مريسة عيش .
لا ضبطوها في التفتيش .
لا خانت قسم او ديش .
لا اجتمعت "بمستر جون" .
لا أكلت "مؤنة العون" .
لا سدّت علينا الكون .
لا سبت كتاب أو دين .
لا سامتنا حمرة عين .
ولا باعتنا ضهرية .

قرنتية ..
جات مشتاقة للخرطوم .
تزور أحبابها خايفة اللوم .
تصيح وتنادي بالحلقوم :-
"جنينة النزهة" وين يا زول .
"جنينة النزهة" وين يا زول .
………………………
لقت حال الجنينة خلا .
حليل زمنها وحليل أهلها .
لا قرنتية .. لا أصلة .
لا صوت ككّو .. لا بغلة .
لا حلوف .. لا أسداً مهاب بالخوف .
لا نمراً يشد للشوف .
لا ضل فيل .. لا تيتل جريهو جميل .
ولا غزلان .. ولا طاؤوس يباهي النيل .
لا زفة طيور ونعام .
لا نمراً دفر قِدّام .
كل الشُلّة ياقرنتية غمضة عين ..
أحالوهم لصالح عام .
تقول الدنيا "مهدية" .

قرنتية ..
جات زي ضيفة ما غارة .
لا محتاجة لي فيزا .. ولا تصديق على زيارة .
جات والشوق دموع حارة .
تجدد في العيون الشوف .
بين توتي وعلالي أبروف .
قايلة الدنيا لسة سلام ما خيم زمان الخوف .
لسة هناك ضفاف حرة .
ما مطمورة للمُرّة .
قايلة الناس بعزو الضيف .
ما بسوقوهو لي حفرة وجوار القيف .
ما بياكلوهو في الصفرة ومصيرو مخيف .
قايلة الحاضرة ما غابة .
وقايلة حقوقها محمية .

قرنتية ..
لا قدلت في شارع القصر .
لا حامت في وكت الحظر .
لا خشت على المأمور .
ولا نطت سلك أو سور .
لا دخلت على أمد رمان .
ولا كسرت قفل دكان .
لا دفرت على التلفاز ..
ولا عضّت كراع فنان .
لا ذاعت بيان للناس .
لا احتلت كمان "حيشان" .
ولا نصبت شبك للحشّ .
جات بصغراها كايسة القش .
تلاقي القوت صبح محظور .
وخير البقعة جوة السور .
سماحة الدنيا منسية .

قرنتية ..
لا بتعرف عجن أو لخ .
وجات أحلامها دوغرية .
عجب … ساقوها جوة الفخ .
عجب … من طولها وقعت تخ .
عجب … سلخوها صبحية .
عجب … ونحنا بنسلخ الإنسان ..
كيف ما نغدر الحيوان .
عجب … والدنيا عصرية ؟!

قرنتية ..
لا دبابة برمائية ..
لا جاسوسة مدسوسة ..
لا غواصة روسية ..
لا جندية في حركة ..
لا مختلسة مال شركة ..
ولا حزبية بعثية ..
قرنتية !!!

[صابرين]

الحبيبه شهرزاد
اشكرك على روعه المشاركه
ولك هديه


نبض ابريل

ضفرك محنن بالسكن
نومك مقطع بالمحن
غيظك كبر جرحك رطن
ويبست شفايفك ياوطن
فى عيونك اندلع الشقا
وسرح الجفاف
ضهب الفرح من دمعتك
وانشق بى غيظك
سدر نخل الضفاف
قلوك فى لهب الظروف
مدوك فى ابر الكفاف
كل البيوت صبحت سجون
كل الحدود قامت جدار
وراها معزول الزمن
ومن فوقها مكتوف النهار
وزى كل ليل لو طال وجال
تتململ الشمس العظيمه
ويكره الفجر انتظار
دمدم هديرك ياوطن
صحا العباد
قلعت شوارع الحله تبيان الاسى
نفضت غبار زمن الحداد
ورفعنا صيوان الاسف
وطلينا بالشمس السواد
وعبرنا فوق موج الغبينه
وفينا مات
زمن التصحر والجفاف
اتفتح القلب النعس
واتفجر الصوت البخاف
واتشقق الاسفلت
وقام فرح الشوارع
ومن مسام كل الارض
طلع الهتاف
طلع الهتاف
طلع الهتاف

[الهادي قنديل]

ثريا ابريل تااااااااااااني:D

وحلفت ماني مارق من هني ساكت

لك ولهم رائعة هاشم صديق ابتسمي


إبتسمي


ابتسمي

الدغش البدري…يلالي ويسطع

العشم المحري …في عرق الشارع…يناغم ويجري

الصوت من ليلنا… يتاوي ويطلع…عيون الفرح

الكتلت مرة…وضاقت المرة…تفتح وتلمح

ابتسمي

البزرة تفتق...البزرة تفتق...وتصبح فكرة

تسامر وترفع …الوجع الطاغي…يفارق غادي

هاجر ويرجع… الامل الغامر…الامل الغامر

يحاور ويدفع… حروف الشعر…في صدر الضلمة

تولع جمرة …وترقص تتركع…ابتسمي

الشمس الغامرة تنادي خيوطها …تطرز وتجمع

الارض السمرا… تمد ايدينا …تقلد الفقرا

تبارك الشفع… المدن النايمة…تكبر قايمة

ويجلجل صوتها… في وش المدفع

[شهرزاد]

الحبيبه شهرزاد
اشكرك على روعه المشاركه
ولك هديه


نبض ابريل

ضفرك محنن بالسكن
نومك مقطع بالمحن
غيظك كبر جرحك رطن
ويبست شفايفك ياوطن
فى عيونك اندلع الشقا
وسرح الجفاف
ضهب الفرح من دمعتك
وانشق بى غيظك
سدر نخل الضفاف
قلوك فى لهب الظروف
مدوك فى ابر الكفاف
كل البيوت صبحت سجون
كل الحدود قامت جدار
وراها معزول الزمن
ومن فوقها مكتوف النهار
وزى كل ليل لو طال وجال
تتململ الشمس العظيمه
ويكره الفجر انتظار
دمدم هديرك ياوطن
صحا العباد
قلعت شوارع الحله تبيان الاسى
نفضت غبار زمن الحداد
ورفعنا صيوان الاسف
وطلينا بالشمس السواد
وعبرنا فوق موج الغبينه
وفينا مات
زمن التصحر والجفاف
اتفتح القلب النعس
واتفجر الصوت البخاف
واتشقق الاسفلت
وقام فرح الشوارع
ومن مسام كل الارض
طلع الهتاف
طلع الهتاف
طلع الهتاف
هدية ولا أحلي ياثريا
شكراً كتييييييير

[صابرين]

اخونا الهادى شكرا لمداخلتك الرائعه
ولك من روائعهوللاخت شهرزاد
سوال
شيلوا الفاتحه واقروا السورة
وابدو الونسه
وناقشو الكوره
خلو بلدنا تموت بالسكته
وحللوا سانتو
واعظم هجمه واروع لقطه
ولو دايرن الماتم
يصبح محو اميه
وتبقى الونسه معاها قضيه
ممكن نخلق من الكوره
سوال يتسطر فى السبوره
نسيب الكلفه ونسال دوغرى
مين الاحرف
سانتو الاسطى ولا السلطه"؟

[شهرزاد]

زول بحبك 30/9/1990م

وماكا خابرو.
ياما لاقيتو وبسالمك
وداسِّي منك
حال دواخلو.
جُوّه فيها
الموج يدافر
وانت يا محبوبو
فاكر
انو رايق
وقلبو شاغر.
أصلو زول
بِتْدَّس ملامحو.
يَا ما لاقيتو
وبصافحك
موت بجيك
وما كا عارفو.
زول بحبك
وما كا شايف
يا ما سالَم
وصوتو غالَب
رجفه
فس همس الشفايف.
مره شَدّ
على ايديكا
وقلبو جنّح
ورقّ ليكا
ركّ
في شُفة عينيكا
وقرّب يشرح
جنو بيكا.
إلا حلّق
في المخاوف
أصلو جرّب
وحلمو نازف
موت بريدك
وما كا عارف.
زول بحبك
وفيهو ساكن
يا ما دسّاكْ
في ملامحو
وفيها ليكْ
سوَّر مساكن.
كم لقاك
حياك وصبَّح.
وفي ابتسامتك
قرَّب يسرح
كان مناهو
يقيف ويشْرح
إلا خاف
من "بس" و"لكن"
وينكسر خاتر
مشاعرو
ويبقى صبح الدنيا
داكن.
أصلو زول
ممكون وصابر
جوه فيهو
الموج يدافر
وبره
في قسمات وجيهو
تلقى
موج البحرِ ساكن.
زول بحبك
وما كا خابرو.
يا ما لا قاكا
وبسالمك
وداسِّي منك
حال دواخلو.

[شهرزاد]

حروف اسمِك
جمال الفال
وراحة البال
وهجعة زول بعد ترحال
وتنّية حلوة للشبال
ودنيتنا ومشاويرنا
وغنواتنا الى ما بتِنقال
حروف اسمِك
نجوم ركّت على الياسمين
فرح فى عين جمالها حزين
أساور فى إيدين طفلة
بتحفظ فى كتاب الدين
زَفَافَ عاشقين بعد فرقه
وسط باقات دُعَا الطيبين
حروف إسمِك
عقد منضوم بخيط النور
وطلة وردة من السور
ونغمة تنادى من طمبور
وشُعلة فرحة فى الوادى
تَشِع جَذلانه ليها شهور
حروف إسمِك
وَكِت أشتاق وأرحل ليك
وأسرح فى عسل عينيك
بِتَحضِنّىِ
قَبُل ألمسَ حرير إيديك
تأرجِحنى..وتَفَرحنى..وتخلينى
أدُق سدرى
وأقيف وسط البلد واهتف
بريدك يا صَباح عمرى