حوار مباشر مع أخوي ضمرة عبر الماسنجر

[أب شخيت]

في ساعات الفجر الأولى لاحظت عبر الماسنجر أن ضمرة يدخل الإنترنت ثم ما يلبث أن يخرج سريعا..ثم يعاود الكرة مرة أخري..فاتصلت به بواسطة خدمة الرسايل الفورية فلم يستجب لرسالاتي إلا بعد عدة محاولات..ثم جرت بيننا المحادثة الفورية التالية ولم تكن معدة للنشر إلا في اللحظات الأخيرة فقد عنّ لي أن انشرها في هذا البوست....مع العلم أن هنالك مقطعا تم حزفه من المحادثة لعدم ملاءمته للنشر في تقدير الاخ ضمرة...ولا مانع لدي في ان ابعثه لمن يريد عبر خدمة الرسايل الخاصة شريطة ان يتحصل علي موافقة صريحة من الاخ ضمرة..والى الحوار..


elfadil says:
ضمرة يا خوي قلت ليك انت مالك بقيت لي زي امدريقة تمرق راسك وتغتسو
ضمرة says:
(لا يجيب)
elfadil says:
لو ما عارف امدريقة اكيد بتعرف ابو القدح
ضمرة says:
(لا يجيب)
elfadil says:
اوعك تكون دخلت راسك في القدح وانا قاعد انبح معاك...برضو بتكون سامعني زي الدندهوب
ضمرة says:
(لا يجيب)
elfadil says:
لو ما عارف الدندهوب بشرحو ليك بس انت امرق راسك تاني
ضمرة says:
هلا بى الدكتور انا بس مشغول مع محمد التاج ولد اخوى فى محادثة صوتيه
elfadil says:
اها عرفت الدندهوب؟؟؟
ضمرة says:
(لا يجيب)
elfadil says:
بجيك صاد "وعين ونون"لمان تكمل كلامك الكتير
ضمرة says:
ما عرفتو وبعد شوية بجيك ليه
elfadil says:
الدندهوب هو الزول المدفون في الرملة بعد يغطوهو بي توب عشان يتنفس والجماعة بعداك يتكلمو معاهو وهو مدفون
ضمرة says:
(لا يجيب)
elfadil says:
ياخوي انا ماشي انوم..خلاص لقيت الساحة فاضية وشخبتها كلها بي فحمة"حضرنا ولم نجدكم"...باكر الجماعة يصحو يلقو حزب البعث ملالن الحيطان كلها بالشعارات
ضمرة says:
(لا يجيب)
elfadil says:
مع السلامة
ضمرة says:
عفيت منك آ الضو
elfadil says:
انا طفيت النور خلاص تقوم تقول لي الضو؟!!!
ضمرة says:
هههههههه هههههههه هههههههه
احفظ الضحكة دى عندك
elfadil says:
نقراها من اليمين والله من الشمال
ضمرة says:
على كيفك
elfadil says:
كفيك يلع " معكوس علي كيفك"
ضمرة says:
ساكنين وين فى بورتسودان
elfadil says:
فالامنجو
ضمرة says:
الحرور جاكم ولا لسع
elfadil says:
اتسلخنا وقام لينا جلد تاني
ضمرة says:
الله يكون فى عونكم
elfadil says:
حسع خليتني ولعت لي سيجارة في الضلمة بقت زي لمبة السيمافور
ضمرة says:
عندى ابن عمى مساعد طبى عيون كان فى مستوصف حى العرب
elfadil says:
الملكية للاسف ما قاعدين نعرفن
ضمرة says:
كيف سيجارة بعد الفطور
elfadil says:
كويسة بس كعبة القبلو
ضمرة says:
هههههههه هههههههه ههههههه(فاصل محذوف)
elfadil says:
تاني من الشمال..الضحك بالمقلوب حايخليك تجر هواء
ضمرة says:
ههههههه هههههه ههههه هههههههه
elfadil says:
يا زول الضحك بالقلبة مخاطرة زي بتاعة زولك القالولو مخاطرة يعني شنو قال ليهم "يكون عندك اسهال تقوم تحاول تمرق ريح"
ضمرة says:
هههههههه هههههههههههههه
elfadil says:
يا زول لا اله الا الله.السجارة كملت
ضمرة says:
شربت منها كم نفس
elfadil says:
من كترة السخانه والهوا مافي حسع الانفاس كلها قدامي زي ضنب النفاثة..النقوم نعدهم ليك
ضمرة says:
اسمع انت بيجيبولك برنجى جوبا
elfadil says:
جوبا بتاع خضرا ونحن بتاعيين حمرا باقي انا ولد حميرا
ضمرة says:
تسلم حميرا الجابتك
elfadil says:
ايه رايك تنزل الحوار دا في بوست
ضمرة says:
أوعك تعملا.....ياخى صاحبك ود بروى وينو؟؟

[عوض جلاس]

يلعني الله كان فهت شيء

[أب شخيت]

يلعني الله كان فهت شيء

أخوي عوض

أعذرنا ياخوي ..في الاول نزلنا البوست محلوب دابو من ضرع ال(MESSENGER..حسع قمنا نجضناهو ليك مقنن كمان...و في النهاية الموضوع كلام ليل يمحوه النهار...لكين بيني بينك.. أخوي ضمرة لمان شاف الكلام الدار بيناتنا كلو نزل في البوست.. ضرب الكواريك والتحانيس عشان نحذف ليهو "مقطع كارب" خاف منو عديل كده ...المقطع دا متاح عبر الرسايل البريدية الخاصة بعد موافقة ضمرة على طلب المتقدم...

[عصام سرالختم]

الاخو ابشخيت
حواركم ظريف ....
وفعلا محتاج انو الواحد يولع سجارة ويتابعو وهو متكئ ..

( الدندهوب هو الزول المدفون في الرملة بعد يغطوهو بي توب عشان يتنفس والجماعة بعداك يتكلمو معاهو وهو مدفون )

الاخ ابشخيت
كلمة الدندهوب من الواضح انها اسم لعبة من الالعاب الشعبية القديمة وقد تختلف تسميها من مكان الى آخر ..
وعندنا نسميها ( حمردوق ) أو ( حماردوق )

ومن اسماء الالعاب قديما :

أول حول :
رامى الكرة يقول .. أول والفريق التانى يقولو .. حول
التانى .. حبانى
التلات ... حبات
ثم ينتقل الى :
اول ويره : حيره
تانى ويره : حيرة
ثم المرحلة التالية :
أول سوس : حوس
تانى سوس : حوس .
ونواصل اللعبة حتى النهاية مرحلة مرحلة

وهناك العاب اخرى :
سكج بكج .... فره شعير ...... الرمه والحراس .... صفرجت .... السيجة ..... شدت ....
شليل ..... ( كعود وينو اكلو الدودو كعود وين راح اكلو التمساح )

[أب شخيت]

[font=Tahoma][color=#FFFF00][color=#00008B][size=5]الاخو ابشخيت
حواركم ظريف ....
وفعلا محتاج انو الواحد يولع سجارة ويتابعو وهو متكئ ..

( الدندهوب هو الزول المدفون في الرملة بعد يغطوهو بي توب عشان يتنفس والجماعة بعداك يتكلمو معاهو وهو مدفون )

الاخ ابشخيت
كلمة الدندهوب من الواضح انها اسم لعبة من الالعاب الششعبية القديمة وقد تختلف تسميها من مكان الى آخر ..
وعندنا نسميها ( حمردوق ) أو ( حماردوق )

ومن اسماء الالعاب قديما :

أول حول :
رامى الكرة يقول .. أول والفريق التانى يقولو .. حول
التانى .. حبانى
التلات ... حبات
ثم ينتقل الى :
اول ويره : حيره
تانى ويره : حيرة
ثم المرحلة التالية :
أول سوس : حوس
تانى سوس : حوس .
ونواصل اللعبة حتى النهاية مرحلة مرحلة

وهناك العاب اخرى :
سكج بكج .... فره شعير ...... الرمه والحراس .... صفرجت .... السيجة ..... شدت ....
كعود : ( كعود وينو اكلو الدودو كعود وين راح اكلوا التمساح )


أخوي عصام
تحياتي ومشكور على المساهمة... ويا ريت لو تفتح لينا بوست لتوثيق اللعبات الشعبية القديمة في زمن البلاي ستيشن وألعاب الكمبيوتر واللعب عبر النت...انا متأكد لو تم توثيق هذه اللعبات بأوصافها وقوانينها وكيفية اكتساب المهارات..الخ سوف نراها في القريب برامج ألعاب كمبيوترية

[النافعابى]

هيى يا دكتور العيون اللون الاصفر ده لون فسالى
انت قايل الناس كلها نظرا سته على سته والله شنو
سوى احمر والله ازرق والله انت موردابى
يديك العافى يادوك

[أب شخيت]

هيى يا دكتور العيون اللون الاصفر ده لون فسالى
انت قايل الناس كلها نظرا سته على سته والله شنو
سوى احمر والله ازرق والله انت موردابى
يديك العافى يادوك

أخوي النافعابي

من أجل التثقيف الطبي: ستة على ستة مقياس للنظر البعيد مش القراية..النظر القريب مقياسه "جيقر " ون تو ثري...على حسب حجم البنط المقروء... إنت محتاج لنظارة قراءة لأنك تجاوزت سن الأربعين بإفتراض أن نظرك البعيد طبيعي( ستة على ستة) أو عندك طول نظر (مهما كانت درجته) أو عندك قصر نظر كبير...أما إذا كان عندك قصر نظر خفيف فما عليك عند القراءة إلا خلع النظارة...
هذه إستشارة طبية مجانية..أما إذا احتجت لإستشارة أخري فما عليك إلا أن تدفع في كشف أخونا العريس" أبو الحصين" لغرض الكفارة الرمضانية...