يا حليل رمضان

[انس البدوي بابكر]

هناك في الشارع التحت حركه غير عاديه ناس جايه من لا تحت شايله صفوري و البعض الاخر علي ظهور الحمير فوق روسين القش يحث الخطي و البعض الاخر جاي من علي الجبل و اكياسه مليئه بعجور محجوب عمر لسلطه الروب و هناك في الرمله الباااااارده في النادي العربي تجمع بنو اسرائيل كما يحلو للمرحوم حسن عبد الحفيظ ان ينادينا ال بابكر نشاغل الماشي والجاي .....و تمد النظر الي جهه العبدلاب فتري حمار بابكر ود ابراهيم الابيض الماخمج و وراهو حمار عثمان علي ابراهيم القصير و كرعين عثمان جارات بالواطه و هم يتسابقان قبال اذان المغرب....و تلتفت الي الكردي ( الوادي) فتري ال ود بابا و قرض و عبد المجيد و عابدين عبد الرحيم و بروشهم تعكس لون الشمس التي تستعد للرحيل و خلوه المغفلين يستعد مؤدنها لانهاء يوم طويل من العطش و التقوي ...وهناك قدام دكان حسن عبد الحفيظ تجد الوالد عليه رحمه الله ومعه المرحوم فؤاد احمد السعيد و عبد الغني و محمد علي بابكر وهم ينفضون جلاليبهم مما علق بها من باقي غبار دكه الدكان قدام الكول بوكس وهم يستعدون للتفرق قبل ان برتفع صوت طه ود القبنه او وداعه الله ود طه اوبابكر عمر بالاذان.....و بعض مرضانين الكونكان لا يكاد الاذان يرتفع الا وتجدهم يكادون يكملوا الافطار امام بوابه النادي و علي راسهم الطيب الفزوعي و ناصر بدوي و المرحوم عمر فؤاد و هنالك خطه مبيته من مجموعه من المتمردين بقياده حسان سرالختم و انس البدوي و الريح عبد الحليم و فتاح الفكي بزرب النادي في هذه الليله احتجاجا علي الممارسات التعسفيه لسكرتير النادي احمد فؤاد بمنع الشفع من دخول النادي و لعب الكونكان الا يوم ليله سمر يوم الخميس و ......و هنالك مجموعه من الفتيات الصغيرات شايلات صبارات تلج من تلاجه المرحوم محمد خير لتوزيعها علي الجميع....عفوا احبتي ان اختلطت التواريخ لكن الصور تزاحمت علي راسي و انا اعرف تماما ان فطوري غدا جغمه مويه من الماسوره في مستشفي قد اكون اول من يركع لله فيه ......رمضان كريم

[عمر مجذوب خطيب]

دكتور مشاهد رمضانية اصيلة لا اقول انها ولت ولكن ولى ابطالها ورموزها الذين زينوا تلك العصراويات والليالي الرمضانية. كل سنة وانت طيب وناس مدريد طيبين
مودتي

[على محجوب جعفر مصطفى]

وانت طيب فى ارض الاندلس التى يحزن الشخص فى حضارة الاسلام التى اندثرت
وفى جنوب اسبانيا التى لم يبقى فيها غير السحنه العربيه
وكما قال الشاعر فى حق الاندلس
لكل شئ اذا ماتم نقصان
فنسال الله ان يعيد امجاد المسلمين
وربنا يعيدك سالم غانم اخ انس

[ضمره بغدادى]

هى فعلا زكريات ستظل عالقة بأذهان الناس الى ان يرث الارض ومن عليها .
بس نقول لدكتور انس تبكى بس :D:D:D:D

[حسان سرالختم]

ياسلام يا انس ..ياخى دى ذكريات عجيبه جدا
ورسمت اللوحه بشكل دقيق وكأنو الواحد بيشاهد
فى هذه المناظر حاليا..
جامع العبدلاب ورمضان والذكريات ودا موضوع
طويل جدا وكانت ايام رمضان جميله جدا رغم
حراره الجو ..
كانت هناك مجموعتين للافطار ..ناس الجامع
وناس البرش جنب البئر وياريت الاخوان الحاج
وزكريا يسردو لينا شويه عن تلك الايام .
ولنا عوده عن ناس فطور الجامع ...

[على بابكر ابراهيم بابكر]

لك التحية دكتورنا وحبيبنا فقد أوقدت نار الزكريات فينا وانها لأيام لاتنسى فنسأل الله أن يجمعنا جميعاً فى رمضان بين الأهل والأحبة .

[محمد علي عشرات]

عزيزي أبو مالك والأخوة الكرام...سلامات ورمضان كريم

ويا حسان أخوي لبيك لبيك .

نعم حليل رمضان وأيامه الطيبات ...

كان الجميع يترقب بشري إعلان رمضان بلهفة ويومها لم نكن نعرف الكهرباء إلا من خلال المسجد(بحي العبدلاب) ووابوره المشهور...ولم ولن أنس المرحوم وداعة الله طه وهو يردد جاءنا من الشيخ عوض الله صالح (المفتي حينها يرحمه الله) بأن غداً أول أيام رمضان ...حينها كنا نري السعادة تعلو وجوه الجميع إستبشاراً بالشهر الفضيل ....ورحم الله الأخ حسن ميرغني (أو حسن تويرية كما كان يلقب) فقد كان قائد مسحراتية الحلة في أيام كانت تتعزز فيها المنبهات حيث كان صوت المرحوم حسن يشق سكون القرية مؤذناً بحلول وقت السحر والسحور ..يا صايم رمضان قوم إتسحر ويا فاطر رمضان أرقد إتندل ...وقد إستمر المرحوم حسن علي ذلك المنوال سنوات عديدة حتى انقلبنا من المتندلين( ونحن صغار) ألى المتسحرين وهو هو يؤدي ما آلي علي نفسه خير أداء.................... فاللهم إني أسألك أن تغفر له وترحمه بقدر ما أحيا فينا سنة السحور ومن عليه من فضلك الكبير فقد كان أحد معالم القرية التي لا يمكن تجاوزها.........كما لا أنسي ممازحة المسحراتية لأخي عثمان ووقوفهم عند بابنا لفترة أطول مما عند غيرنا من المنازل حتي يخرج عليهم عثمان أحياناً ساخطاً وهم يضحكون...ما أحلاها أيام..

وما عشت سأذكر بالخير نافورة المياة التي كنا نتلذذ بها ببرندة جامع العبدلاب في أيام لم نكن نعرف فيها حتي المروحة وكانت سياط الحر تلسع أجسادنا فنستعين بها عليه ونتمرغ تحتها ونقضي الوقت مابين الظهر والعصر في ذلك ...ورحم الله العم محمد أحمد حاج عثمان فقد كان يقضي ما بين الصلاتين معنا بالمسجد وكان رغم كبر سنه أكثرنا صموداً حيث كان ينأي بنفسه عن نافورتنا ما استطاع لذلك سبيلاً وهو منشغل بتالتهليل والتحميد وقراءة القرآن ( يرحمه الله).

حان الآن وقت الفطور ...والكل منهمك في الإستعداد لذلك حيث كان علي أبناء العم محمد خير ( يرحمه الله ) تجهيز مكان الإفطار بالشارع (عند البير البره) وذلك بفرش البروش وإعداد المكان ..وكان علي أخي عثمان حمل صينية الإفطار وأقوم أنا بترحيل الشاي والقهوة..

.تجمع الإفطار لحظات لاتنسى حيث يؤم برش إفطارنا الأعمام عبد الله عشرات (أمد الله في أيامه ) وأبنائه , العم المرحوم بابكر عمر (يرحمه الله) وأبنائه ..العم المرحوم محمد محمد خير وأبنائه ..العم بخاري أبوشعر(أمد الله في أيامه) وأبنائه...المرحوم العم سيد أحمد ود عثمان وأبنائه..المرحوم العم محمد إبراهيم عشرات وأبنائه ..والعم عباس عشرات (أمد الله في أيامه) وأبنائه......المرحوم سيد أحمد ودبلي وآله ...إضافة لأسرتنا بقيادة الوالد (يرحمه الله تعالى)...كانت ساعة الأفطار أحلي ساعات اليوم ونحن نردد ذهب الظمأ وابتلت العروق وثبت الأجر إن شاء الله تعالي...ولا أنسى كباية الليمون التي إعتاد أن يناولني إياها المرحوم محمد محمد خير (يرحمه الله) فمن حلاوتها أكاد أعض الكوب شبقاً بها.....وتسلم يداك يا أم زكريا فصينية العم بابكر عمر (يرحمه الله) كانت صاحبة كأس الفول المدنكل .....وياسلام علي سلطة الروب التي أمد يدي وأقربها من صينية العم بخاري.......وملأك الله عافية يا أيها العافية فلطالما استمتعت بقراصة المرحوم العم سيد أحمد ود عثمان التي أعدتها يداك المبروكتان .......ولن أنسى عصيدة ود بلي ( وملاحها المظبط ) ...........وتمر الكلم بصينية عمي عبد الله عشرات....وتطوف يداي في تجوالهما واتعشرق بموية البليلة عند عمي عباس عشرات
ورحم الله عمي محمد عشرات فلم أتذوق ملاح أخضر بالشبت أمتع مما كنت أجده عنده.

في الشارع المقابل لنا كان يتجمع أبناء المرحوم بابكر إبراهيم ...خضر موسى ..الأمين موسي وإبنائهم وكان العم المرحوم بابكر إبراهيم يفطر علي عجل ويمر بنا ويلقي علينا بالسلام وهو في طريقه لأداء صلاة المغرب بالمسجد.

صلاة العشاء والتراويح بجامع العبدلاب فيهما متعة روحية لا توصف ونحن نردد خلف الإمام ...سبوح قدوس رب الملائكة والروح ...الله...الله.

حنيني لتلك الأيام لا يوصف ولهفي عليها يعصف بوجداني وذكري من مضي تؤرقني... فيا الله ...يا رحمن ..يا رحيم ألطف وأرحم موتانا جميعنا وتجاوز عنهم واكرم نزلهم واجمعنا وأياهم بمستقر رحمتك حيث لا فراق بعده.

فيا ...عباس عشرات......محمد ود بلي...عثمان عشرات .....................صديق سيد أحمد........التوم عشرات...بخاري وإبنه محمد أحمد....خالد محمد خير وأبنائهم...إذا حملتم مؤائد إفطاركم اليوم ..الفاتح من رمضان (تقبل الله منا ومنكم) اليوم وتوسطتم ذلك الشارع الواسع من حي العبدلاب فتأكدوا أن روحي تحلق في آفاق رؤياكم ..فالبعد لا يعني الفراق وإنما تبقى القلوب منازل الأحباب....ولا بد عائدون إن كان بالعمر بقية ..................................................

..وتصومون وتفطرون على خير.

[محمد علي عشرات]

عزيزي أبو مالك والأخوة الكرام...سلامات ورمضان كريم

ويا حسان أخوي لبيك لبيك .

نعم حليل رمضان وأيامه الطيبات ...

كان الجميع يترقب بشري إعلان رمضان بلهفة ويومها لم نكن نعرف الكهرباء إلا من خلال المسجد(بحي العبدلاب) ووابوره المشهور...ولم ولن أنس المرحوم وداعة الله طه وهو يردد جاءنا من الشيخ عوض الله صالح (المفتي حينها يرحمه الله) بأن غداً أول أيام رمضان ...حينها كنا نري السعادة تعلو وجوه الجميع إستبشاراً بالشهر الفضيل ....ورحم الله الأخ حسن ميرغني (أو حسن تويرية كما كان يلقب) فقد كان قائد مسحراتية الحلة في أيام كانت تتعزز فيها المنبهات حيث كان صوت المرحوم حسن يشق سكون القرية مؤذناً بحلول وقت السحر والسحور ..يا صايم رمضان قوم إتسحر ويا فاطر رمضان أرقد إتندل ...وقد إستمر المرحوم حسن علي ذلك المنوال سنوات عديدة حتى انقلبنا من المتندلين( ونحن صغار) ألى المتسحرين وهو هو يؤدي ما آلي علي نفسه خير أداء.................... فاللهم إني أسألك أن تغفر له وترحمه بقدر ما أحيا فينا سنة السحور ومن عليه من فضلك الكبير فقد كان أحد معالم القرية التي لا يمكن تجاوزها.........كما لا أنسي ممازحة المسحراتية لأخي عثمان ووقوفهم عند بابنا لفترة أطول مما عند غيرنا من المنازل حتي يخرج عليهم عثمان أحياناً ساخطاً وهم يضحكون...ما أحلاها أيام..

وما عشت سأذكر بالخير نافورة المياة التي كنا نتلذذ بها ببرندة جامع العبدلاب في أيام لم نكن نعرف فيها حتي المروحة وكانت سياط الحر تلسع أجسادنا فنستعين بها عليه ونتمرغ تحتها ونقضي الوقت مابين الظهر والعصر في ذلك ...ورحم الله العم محمد أحمد حاج عثمان فقد كان يقضي ما بين الصلاتين معنا بالمسجد وكان رغم كبر سنه أكثرنا صموداً حيث كان ينأي بنفسه عن نافورتنا ما استطاع لذلك سبيلاً وهو منشغل بتالتهليل والتحميد وقراءة القرآن ( يرحمه الله).

حان الآن وقت الفطور ...والكل منهمك في الإستعداد لذلك حيث كان علي أبناء العم محمد خير ( يرحمه الله ) تجهيز مكان الإفطار بالشارع (عند البير البره) وذلك بفرش البروش وإعداد المكان ..وكان علي أخي عثمان حمل صينية الإفطار وأقوم أنا بترحيل الشاي والقهوة..

.تجمع الإفطار لحظات لاتنسى حيث يؤم برش إفطارنا الأعمام عبد الله عشرات (أمد الله في أيامه ) وأبنائه , العم المرحوم بابكر عمر (يرحمه الله) وأبنائه ..العم المرحوم محمد محمد خير وأبنائه ..العم بخاري أبوشعر(أمد الله في أيامه) وأبنائه...المرحوم العم سيد أحمد ود عثمان وأبنائه..المرحوم العم محمد إبراهيم عشرات وأبنائه ..والعم عباس عشرات (أمد الله في أيامه) وأبنائه......المرحوم سيد أحمد ودبلي وآله ...إضافة لأسرتنا بقيادة الوالد (يرحمه الله تعالى)...كانت ساعة الأفطار أحلي ساعات اليوم ونحن نردد ذهب الظمأ وابتلت العروق وثبت الأجر إن شاء الله تعالي...ولا أنسى كباية الليمون التي إعتاد أن يناولني إياها المرحوم محمد محمد خير (يرحمه الله) فمن حلاوتها أكاد أعض الكوب شبقاً بها.....وتسلم يداك يا أم زكريا فصينية العم بابكر عمر (يرحمه الله) كانت صاحبة كأس الفول المدنكل .....وياسلام علي سلطة الروب التي أمد يدي وأقربها من صينية العم بخاري.......وملأك الله عافية يا أيها العافية فلطالما استمتعت بقراصة المرحوم العم سيد أحمد ود عثمان التي أعدتها يداك المبروكتان .......ولن أنسى عصيدة ود بلي ( وملاحها المظبط ) ...........وتمر الكلم بصينية عمي عبد الله عشرات....وتطوف يداي في تجوالهما واتعشرق بموية البليلة عند عمي عباس عشرات
ورحم الله عمي محمد عشرات فلم أتذوق ملاح أخضر بالشبت أمتع مما كنت أجده عنده.

في الشارع المقابل لنا كان يتجمع أبناء المرحوم بابكر إبراهيم ...خضر موسى ..الأمين موسي وإبنائهم وكان العم المرحوم بابكر إبراهيم يفطر علي عجل ويمر بنا ويلقي علينا بالسلام وهو في طريقه لأداء صلاة المغرب بالمسجد.

صلاة العشاء والتراويح بجامع العبدلاب فيهما متعة روحية لا توصف ونحن نردد خلف الإمام ...سبوح قدوس رب الملائكة والروح ...الله...الله.

حنيني لتلك الأيام لا يوصف ولهفي عليها يعصف بوجداني وذكري من مضي تؤرقني... فيا الله ...يا رحمن ..يا رحيم ألطف وأرحم موتانا جميعنا وتجاوز عنهم واكرم نزلهم واجمعنا وأياهم بمستقر رحمتك حيث لا فراق بعده.

فيا ...عباس عشرات......محمد ود بلي...عثمان عشرات .....................صديق سيد أحمد........التوم عشرات...بخاري وإبنه محمد أحمد....خالد محمد خير وأبنائهم...إذا حملتم مؤائد إفطاركم اليوم ..الفاتح من رمضان (تقبل الله منا ومنكم) اليوم وتوسطتم ذلك الشارع الواسع من حي العبدلاب فتأكدوا أن روحي تحلق في آفاق رؤياكم ..فالبعد لا يعني الفراق وإنما تبقى القلوب منازل الأحباب....ولا بد عائدون إن كان بالعمر بقية ..................................................

..وتصومون وتفطرون على خير.

[عيدابي]

د انس لك التحية يا صاحب الفضل الاول
بى انذالك لهذا البوست الجميل الذى ما قراءنا تلك الذكريات الجميلة
الا وترورقت اعيننا بالدموع وما ابداع الاخ محمد على عشرات
فى هذا الجانب ببعيد ونقله لهذه الصور البديعة فى شهر رمضان المبارك
من ماكل وشعائر دينية توارسها الابناء عبر الاباء عبر الاجداد
ونسال الله ان تستمر الى ان يرث الله الارض وما عليها .فى هذا الشهر
انا كنت حريص جدا ان لا تنسى الوالدة ان تضع فى البليلة
كشحت تمر مع كشحت عيش ريف والتمر لازم يكون من نوع المسيخى
او الوهدانى والعجب العجيب مويت التمر جغمتين منها يساون الدنيا
باكملها يا لها من ايام ولها من ذكريات
مشكور د انس

[عصام سرالختم]

الاخ انس وبقية الاخوة المتداخلين
ما احلاها ايام وما اجملها ذكريات
ومازال صوت المرحوم المغفور له بإذن الله
الحاج محمد أحمد حاج عثمان ..
يرن فى أذني وهو يردد والمصلين جلوسا بعد كل اربعة ركعات فى صلاة التراويح
( سبوح قدوس رب الملائكة والروح ... الله )
وقتها كان الجميع يفطرون فى الجامع ..
ونحن صغار نتحين لحظة بداية الصلاة ونرجع خلف الصف الى صوانى الفطور التى كانت بعيدة عن متناول يدنا لناكل منها ....
ونكون حريصين عندها بان لا يصدر مننا صوت خوفا من العقاب

[انس البدوي بابكر]

الاخ المتداخلين كلو زول يطلع العندو و البكاء يا ضمره في رمضان مطلوب و يا ريت لو البكاء بيرجع الايام السمحه دي ....يا محمد علي بكاك صوتو اعلي من صوت بكاي و يا حسان و ابو التيمان لا اتمني الا صلاه ظهر في الجامع وبعد دا مقيل في جلسه تضم كل الاحباب و بالمناسبه دي وين محمد هاشم....وياعيدابي رمضان دا ليه طعمو الخاص في البلد ربنا يجمعنا فيها ان شاء الله .....يا عمر مجذوب و علي محجوب ما تدونا صوره عن رمضان في العرب و ياعلي سبحان الله اليوم جمعني الافطار مع مسئول في السفاره السودانيه في مدريد اسمو عثمان بيك و هو يسال عنك بشده و داير رقم تلفونك ....عصام يا الحبيب انت طبعا اخدت زوادتك بالزايد من البلد لكنه برضو ما بتغني عن رمضان في البركل فانا احس بان عدد الملائكه الذين ينزلون في البركل شويه زياده فالرحمه في كل مكان

[عوض جلاس]

مشكور د. أنس وأنت تذكرنا بايام مضت عشناها في زمن جميل بين الجدود والحبوبات وأهلنا الطيبين ونحن نعايش رمضان القرية الجميل قبل أن تأخذنا الغربة والشتات إلى بلاد لا تعرف جارك فيها وتمشي وحدك وتصوم وحدك وتأكل وحدك ولك الله وأنت في بلاد غريب اليد واللسان لا تجد من يشاركك فطور رمضان .

[ضمره بغدادى]

انس والاخوان
مادام القصة جابت لها بكى وزكريات تبكى لكن مازى بكى انس وعشرات:D:D
ونحن صغار فى السن ولا ندرى عن الصوم شى (يعنى قبل ما نلم سامى بدوى )كان والداتنا (حبوبتنا وامى وخالتى وعمتى )وكلنا فى بيت واحد وبيتنا الذى اصبح اليوم خرابة بسبب الهجرة الى المدن الاخرى كان ملىء بالناس وكان به ثلاثة وثلاثون بابا وهى موجوده حتى الان .
نرجع لموضوعنا الاصلى رمضان فى حوش البغاديد .
كنا مقاطعة قائمة بذاتها وكان جدنا عمر هو الآمر والناهى وكانت له كلمته الاولى والاخيرة .فى رمضان ولكثرة تعدادنا كنا لانذهب الى خلوة القرونة القريبة منا بل كنا نطلًع الفطور برًه امام دكاننا وكانت هناك مسطبة كبيرة وجميلة وهى على الشارع الرئيسى .
اذا جاء وقت الفطور واذن الاذان كان جدى والعم رابح يقفون على الطريق العام لجلب سالكى الطريق من المارة راكبين ام راجلين ولايمكن ان يفلت منهم احد ولا يبارح حتى يفطر .
اما نحن الزبالعة فكانت مهمتنا جلب المياه وخدمة الصائمين .
كانت حبوبتنا تغرينا بالاتى :
الذى يلقط حصى التمر ويحضر كميه من الواقود نصحيه ليلا للسحور (طبعا السحور كان فى الغالب يكون فطير بى لبن او رقاق ) وهذه اكلات دسمة والكل منا يحبها .
وفى يوم من الايام انا اجتهدت جدا لجلب اكبر كمية من الحصى ولم انم الى ان جاء وقت السحور وسامع الحركة والجماعة يضربوا جنبى وما قالو لى شى وكان سريرى بالقرب من الحيطة .اتقلبت على الحيطه لكى اشعرهم بأنى صاحى ولا حياة لمن تنادى . اخيرا وقعت بين السرير والحيطة فى الارض وحينها انتبه والدنا وقال للوالده شوفى الولد ده واعطيه من السحور. وبالفعل لقد تم ذلك .. ومن يومها لم اتعاون معهم فى جمع الواقود .

وبرجع لكم تانى

[عمر مجذوب خطيب]

انس - يجئ رمضان كل عام وفي الخاطر رمضانات تعلمنا منها وفيها الكثير لذلك رسخت في الذاكرة. في العرب كان هناك فريقان للفطور الاول حقنا في مجرى سيل قديم غطته الرمال وامام مبنى طيني من برندا كبيرة وغرفة كان يسمى بالديوان البرة. المكان كان مخصصا اصلا لاستقبال الضيوف على ايام جدنا جعفر. المهم استمر اولاده الثلاثة رحهمهم الله حسن ومحجوب ومصطفى على ذات المنوال لا سيما في رمضان.

برشان وانا احكي هنا عن ما عاصرته فالمسألة استمرت لعدة اجيال. برشان كانا يوضعان في بيت جدنا حسن جعفر عليه الرحمة ، يخرجهما ابو الروس او جعفر او بشرى لست متأكدا فتلك لحظات لكل ما يشغله.

كان جدي حسن يجلس في البرش الجنوبي قريبا لبيته اما جدي مصطفى فيجلس عكسه على البرش الشمالي فيما كان جدي يتوسط المائدة.

وكان المرحوم سيد احمد شايقي واولاده والمرحوم احمد نعمان واولاده والمرحموم عبد الله الشيخ ووالدي - كان بيتنا بعيدا بعض الشي كان ابي يحمل الصينينة بحكم صغر سنا لكن بمجرد ان كبرنا دارت الصينية علينا واحدا تلو الاخر ومن لا يحمل الصينية كان يحمل جكا او اثنين.

يحضرني نداء تفرد به العرب في تلك السنوات ، فقد كانت الفتيات الصغار ممن لم يصلن سن البلوغ يجلس فوق دكة عالية مشرفة على الخور حيث كنا نفطر. كان جدي يعرف زمن الفطور وكان ادخاله يده في جيب الساعة ايزانا ببدء ذاك الاغاوء الغريب والانتظار وتشعب اراء الحضور يحسم جدي الموقف افطروا مشيحا بيده للفتيات الائي ينطلقن بعدها مرددات:
وي فطروا الناس اكلو - وي فطروا الناس اكلوا

نداء كان يصل لاذان الامهات فيفطرن هن بالتالي - واليوم تحضرني صورا غنية عن تلك الايام واللحظان ف الذاكرة كورية صفراء ونشاء لعبدالله الشيخ وصحن طلس ملون ومتوسط الحجم وبليلة لوبة منجضة تماما بالشمار والليمون وفي الخاطر فول امي وطعميتها وسلطة الروب واشياء اخرى ونواصل

[انس البدوي بابكر]

يا جماعه الليله رمضان وجعني وجع شديد و الله لا يوريكم وجع رمضان ووجع العيد و بقدر شوقي لهذه المناسبات الجميله صرت اخاف وجعها ...صمت في بدايه رمضان وقلت اشغل نفسي و انسي ياولد ..لكن اليوم لم استطع ان احتمل اكثر الوجع و كادت العبره ان تذهب بما تبقي من يومي فجيتكم جاري قلت تواسوني و لقيت رقيتون كمان زايده الطين بله .....و مشيت بحت لا ورا لقيت بكا السنه الفاتت وقلت الستره و الفضيحه متباريات بدل ابكي براي النمرق بكا السنه الفاتت علي الاقل كان في ناس بكوا معاي..تصوموا و تفطروا علي خير

[حسان سرالختم]

رغم سنين الغربه الكتيره دى يا انس
لسه قلبك مامات ,,غريبه جدا

[بكرى مجذوب خطيب]

يا د. انس
كل عام وانت بخير وذكريات الشهر الفضيل تثير فينا شجون مضت ولن تعود
وامنيتي الوحيدة اصوم رمضان القادم في البلد مع الجيل الجديد ان جاز التعبير وان مد الله في العمير
واعود للذكريات ومن حيث وقف عمر مجذوب
انتقل الفطور الي درب العرب قدام بوابة منزل جدي محجوب جعفر من الديوان البره لحكمة يعلمها جدي واصر ان يكون الفطور علي درب العربات بدل من ديوان والده جعفر مصطفي . ليتمكن جدي من اصطياد الضيوف في الشارع اصحاب العربات...
وايضا يتم فرش برشين ويجلس جدي واحفاده والموجود من اولاده مع عمر الحر واولاده
و وقيع الله المحيسي وابنه احمد ومحمد المحيس (يرحمه الله ) واولاده ومحمد ابراهيم الحر( يرحمه الله ) واولاده ومجدوب خطيب 0 اطال الله في عمره واولاده
وكان عمر الحر ريحانة الجلسة بعد الصلاة بقفشاته ومداعباته لعمر مجذوب وينتهي الفطور ونذهب لصلاة التراويح ولو سعيد يكون شخينا وراق عبد الرحمن موجود في البلدويصلي التراويح وتتمني ان تطول الصلاة والشيخ الوقور يرتل القران بصوت لم اسمع مثله في حياتي ومن ثم دروسه المختصره المفيدة
وكل رمضان تحضرني جرسة حبوبتي الروضة بت جمل زوجة صالح ضحوي من الصيام واهواله
وكانت كل يوم تقول خلاص رمضان انتهي ونستغرب كيف انتهي وهو في العشرة الاوائل وترد ان اليوم الفيهو ده خلاص مايتحسب ويوم الصدقة مايتحسب ( الرحمتات )
ويوم وقفة العيد ايضا ما يتحسب ويوم باكر ما يتحسب وكل هذا للجرستها من الصيام ويومه الطويل وامنيتها بانتهاء الشهر سريعا
وايام وذكريات لاتنسى يادكتور انس ( وقلتلي تفطر من حنفية في المستشفي لك الله ياصديقي )
ونواصل

[صابرين]

رغم سنين الغربه الكتيره دى يا انس
لسه قلبك مامات ,,غريبه جدا

الناس تقول غريب الشيطان الا انا بقول غريب حسان

انس سلام وانت واخوانك تسردو لنا اجمل الذكريات فى رمضان البلد
وياسلام على صلاة التراويح للنساء وتتقدمهم المرحومه بخيته بت عوض الكريم
وكل يوم برش النساء مزدحم بهم الا عندما تصادف التراوويح المسلسل لاتجد فى الجامع
الا بخيته بت عوض الكريم ونعيمه وقليل من النساء وباقى البنات فى المسلسل
عندها تقول بخيته الليله البنات خلن عمل الله مشن لعمل الشيطان
رحم الله المرحومات رقيه وبخيت وزينب وبت حمد وبخيته وبت ابوديه وام الخير
وخليفه ونعيمه وبت دباى وجمال بت عمر والصيده بت عمر وبت عبدالرسوله
وعائشه بت عبيدالله والنزه بت على فور وبت الماذون وست النفر وباب الشفيع
وبنات السرف وام النصر وزينب بت عنكسه وعائشه بت حاج على وبت بناوى
والسره بت صالح وحسونه وبت حريزاوى وبت دباى وكل من لم اذكر اسمه ربنا يرحمهن رحمة واسعه ويدخلهن الجنه مع الصديقين والشهداء

[خالد البدوي بابكر]

رمضان كريم د. أنس والحيان ..
أما ذكرياتنا الرمضانية فقدييييييييمة ,,
التجمع للفطور كان في واطات الحسيناب جنوب جنينة القاضى ويضم كل الناس من االمحس لاعند العبدلاب .. أما تجمع العبدلاب فكان في جامع الجالوص القديم .. أما الناس ماكانوا كتار .. حصريا كان تجمعنا يضم المراحيم حسن الفكي والوالد (أصحاب الثلاجتين الوحيدتين) ومحمد وداعة وفؤاد السعيد وناظر المدرسة عباس أحمد داؤود وهؤلاء الثلاثة هم روح المجلس المرحة .. ثم من الكرادة شيخنا مختار الذي لاأذكر ملامحه جيدا وكان الإمام ثم عمنا إبراهيم بابكر ومحمد علي بابكر
كانت الكواري أمقعر هي السائدة والخير باسط البليلة لوبي أخضر وناشف والمويات
حلومر وآبريه وقمردين وليمون وبرتكان وقرين ... يفطروا الكبار ونحن ننتظر حتى يقيموا الصلاة فنهجم ..
كنا في العصرية نلعب اللفة (أول حول) وحين يؤذن (وزان البليلي) كماكنا نسميه نجري علي طلمبات الموية (المضخات الماصة) ننشطف ولم نكن نلبس
إلا العراقي واللباس الدمورية أو الدبلان في أحسن الأحوال ..
لاكان في كهرباء ولاموية ولا حتى مولدات .. لكن كل شئ كان له طعم آخر
الطماطم تفاح عديل وقس على ذلك البرتكان والقرين واليوسفندي والعنب والتين وكله مزروع بي تحت وفي متناول اليد .. والله صح ...
طبعا ده كلو ونحن صغار ماصايمين .. وبعدها جاءت مرحلة المدرسة الوسطى والداخليات .. ده كمان عالم براه دايرله قعدة طويلة ..

[انس البدوي بابكر]

يا حسان يا اخوي السر في الموضوع انو قلبي عمرو يوم ما اغترب لانو خليتو هناك في البركل حتي ما في الخرطوم عشان كدي لسه حي ..عرفت ليه يا لحبيب؟.....بكري واصل باقي ذكريات العرب ما اجملها و خاصه ذكريات رمضان ..كل برش ليهو زول بيطعمو يا ريت نسمع منك حكايات العمرين ....لاحول يا ثريا يوسف انت من زمن عاشه بت عبيدالله ..اللهم اشملهن برحمتك و مغفرتك في هذا الشهر الكريم امين يا رب العالمين...خالد رمضان كريم ذكريات رمضان تثير في اشجان واشجان و اول مره اعرف انو كان في برش فطور جنب جنينه القاضي و ياريت تواصل في سردك الجميل

[بكرى مجذوب خطيب]

الحبيب د. انس
ذكريات عمر محمد ابراهيم الحر .. جميلة وخاصة وهو ساخر جدا وعندما نتطرق للموضوع لايروق له يقابله بالتهكم والسخرية وبالذات عند مايقول عمر مجذوب اليوم اللمليشيات الدرذية ومليشيا امل الشيعية فعلت كذا وكذا وهو يرد يا ود مجدوب خلنا من طرف كريمي جاي نحن مالنا ومال لبنان وحرب لبنان
ولوتذكر ايام ظهرت موضة الحريم يقتلن ازواحهن بدس السم في الاكل وصاحبك ود الحر كان خائف وعندما ترسل له زوجته الفطور ببلد بتحت يقول لولده بازرعا اكل اول انت بعدين اكل انا ويوم بازرعا قال يا ابوي انا شبعان مابقدر اكل قال له خلاص شيلوا وصد لامك (وحاشاها بت سيداحمد ود الفقير بت الصلاح )
وذكر لي كيف انه يستنكر كل الناس يصحوامن النوم متاخرين وهو الذي يصحا لصلاة الفجر باكرا ً ويتجه لحقله الذي هو كل حياته بعد بيته واهل بيته وقصد يوما ان يصحى من النوم متاخر ويشوف رد فعل الناس فاذا بزوجته تقول له ماها عادتك تصحى متاخر ياراجل الشمس طلعت فاذا به يعنفها الشمس صبحت لود الحر براهو
وقصصه كثيرة ويعلمها عمر مجذوب وليته يتحفنا
ونواصل

[طيبان]

رمضان كريم يا د. أنس

هاك الحلو مر دا ...:):)

____
تصوم وتفطر علي خير ..

[انس البدوي بابكر]

العريس طيبان كل رمضان و انت طيب...و السنه الجايه طيبان الصغير معكم لكن في مكان اخر غير صحراء الربع الخالي...حلو مرك وينو؟؟!!!

[صلاح عثمان صلاح]

انس


عيون فى الغربة بكاية


(دى عبارة كانت مكتوبة على مؤخرة احد بصات ناس لا جوه ديلك)


ردك الله الى اهلك سالما حتى تصوم رمضان البعد الجاى فى العبدلاب


عندما جئنا من وادى حلفا فى اوائل التمانينات ..اقترح والدى على جيراننا الخروج ببرش فى الفسحة الجنب البيوت .ولكن اعتذر احد الجيران بحجة ان اولادو كتار ويخشى عليهم من العين...ومن يومها وكل واحد بيفطر فى بيتو ( هذا فى حلة الخلاء)..لذا لاذكريات لى مع البرش احرر بيها بوستيك دا...دخلت شلاقة منى ساى

[انس البدوي بابكر]

انس


عيون فى الغربة بكاية


(دى عبارة كانت مكتوبة على مؤخرة احد بصات ناس لا جوه ديلك)


ردك الله الى اهلك سالما حتى تصوم رمضان البعد الجاى فى العبدلاب


عندما جئنا من وادى حلفا فى اوائل التمانينات ..اقترح والدى على جيراننا الخروج ببرش فى الفسحة الجنب البيوت .ولكن اعتذر احد الجيران بحجة ان اولادو كتار ويخشى عليهم من العين...ومن يومها وكل واحد بيفطر فى بيتو ( هذا فى حلة الخلاء)..لذا لاذكريات لى مع البرش احرر بيها بوستيك دا...دخلت شلاقة منى ساى

امين يا صلاح يا اخوي....و خش ورينا زكريات رمضان و اخد لك نخجه نخجتين ..البوست ليس محصورا علي اصحاب البروش بل لكل من وجعه رمضان و اظنك صاحب وجعه رغم انها ما زي حقت صاحبك

[التهامى كروم]

رغم اني بركلاوي بالتجنس
لكني عايشت جمال وخصوصية رمضان في البركل
وذلك من خلال افطاري في برش العم علي الحسن
الذي كان يجمع كل من عم علي وابنه ياسر والعم
عبد الغني والاستاذ/ خليفة والعم الامين السوكري
وكل من يمر علي هذا البرش كان لابد عليه ان يجلس
وكانت هذه المجموعة خليط ما بين الختمي المتزمت
( عم علي ) وما بين السلفيين ( خليفة والامين السوكري)
وكانت المناقشات الكوميدية .
للبركل اجواء خاصة في رمضان لم اراها ولا حتي في
الغرب ( فتنة )

[عمر احمد عمر دهب]

العزيز د/ انس
انا اعرف وجع رمضان واعرف ماعنيتة بعنوانك ياحليل رمضان . كم وعشرين و انا ا
منى نفسى برمضان فى البلد . عشان كدة كنت كنت مبارى البوست والعبرة سادة الحلق
بس نحن برضو احسن منك -وتخيلتك اذان المغرب اختلك جغمة موية وواصلت شغلك - ربنا يحقق امانيك وترجع لوطنك عامرا ظافرا

[زكريا بابكر عمر]

والله يا أنس ذكرياتك الرمضانيه دي سوت فينا جنس سوا (إنته بس يلقوك للبحيت):) والزاد الطين بله أخونا الحاج علي عشرات غايتو قام بالواجب وزياده في حق برشنا الجنب البير والله سرحته معاهو سرحه طويييييييلي ولمن أفقته لقيت دمعتين شقت طريقهما نزولا ....أنا غايتو يا أنس الحاج ماخلي لي شي أقولو صور برشنا تصوير لدرجة تخيلته أمامي ....لكن أنا بجيك راجع يوم الحاره(الحاره ما مرقت):D:D

[عمر مجذوب خطيب]

انس كل سنة وانت طيب - عام بالتمام والكمال مر وهذا البوست ما يزال يسع الكثير من ذكريات الشهر الفضيل - افهم واعي الموت - لكن يؤسفني ان معظم الاحبابا رحلوا - دنيا

[شهرزاد]

عفوا احبتي ان اختلطت التواريخ لكن الصور تزاحمت علي راسي و انا اعرف تماما ان فطوري غدا جغمه مويه من الماسوره في مستشفي قد اكون اول من يركع لله فيه ......رمضان كريم

شكراً لرمضان الذي أنعش هذه الزكريات بداخلك ودفعك
لكتابتها هنا حتي نستمتع بها ..
وهي حتما ستظل معلقة علي جدار القلب والعقل معاً ..
ــــ
رد الله غربتك أخي د. أنس البدوي بابكر ويارب رمضان الجاي
أنت وسط أهلك وأحبابك وأول فطورك تمرة من نخلة حنينة ..
ساقياها موية النيل ...
وتقيم الصلاة مع قلوب عامرة بحب الله ومليئة بالتقوي والإيمان ..

[انس البدوي بابكر]

برش علي الحسن يا تهامي من البروش الحبيبه الي النفس و خاصه ونحنا جارين علي صلاه المغرب في الجامع يمكن تغشاهو تاخد لك جغمه جغمتين حقات حلومر..امد الله في ايام عمنا علي و نخبته ...و ما اجمل مناقراته هو و العم عبد الغني ....
العزيز عمر دهب....اري وجع رمضاني قد زاد وجع رمضانك ..اللهم اجمعنا هناك في رمضان غريب لندفن اوجاعنا في قوز رمله باااااااارده و فيهو برش فطور ممدود لكل السابله ..قول امين يا الحبيب و امسح دميعاتك فربما وجب عليك القضاء فملح الدموع لا يستاذن و لايعرف رمضان فهو اول ما تحسه وهو يتسرب في حلقك ....
زكريا الغالي ..انا اكان منك بنط في اقرب بوكس ماري بجنبي و ما تفوت بليله امونه بت بابكير اكان رجاء فضلت لك فيها حاجه ..راجين الحاره بس ما تزوغ..
الحبيب عمر مجذوب ...عام اخر يتسلل من بين ايدينا و نحن ما زلنا نذرف دموعنا ..وانت طيب ان شاءالله..رمضان ارتبط بالرحيل و سعاده الراحلين فراحل رمضان ليس كراحل غيره ...و هاهم بشاره و فاطمه بت سيداحمد و احمد رجب و التوم العطا يلحقون بالركب لهم الرحمه ....السنه الجايه رمضان حيث تحب و نحب
عروستنا شهرزاد ...اعاده الله عليك و طيبان صغير يجري بين الاقدام في مكان غير الربع الخالي ان شاءالله ....المناسبات دائما تفتح جراحاتي فانا لم اكن احتمل ان اقضي رمضان في الخرطوم فكيف بي بناس سقط لقط الانا معاهم ديل...كتري من الدعوات لاخوك فقد بلغت التراق....