رحبوا معي بأبوسمر

[زكريا بابكر عمر]

الأخوه الكرام تعالوا معاي نرحب بالضيف الجديد أبوسمر (ولو إنو رايح علي ) لكن نرحب به في بركله وبين أهله وعشيرته وما طله وصلنا هنا يبقي وصل تب ....ألف مرحب بيك اخونا أبوسمر مره أخري والله يخليلك سمر ياااااااااارب ....تحياتي ,,,

[عوض جلاس]

ألف مليون مرحب بالأخ أبو سمر
ويا هلا وغلا وأدخل لا جوة وصلت تب
البيت بيتك ونحن ضيوفك وقول بسم الله وابدأ
وإنشاء الله ستجد ما يسعد قلبك في هذا المكان الطيب بأهله

[ابوسمر]

والله حليلك يازكريا حالتك بقت تحنن كبرت وللا شنو يظهر عليهو الخرف دخل يعنى الا اقول ليك ياخال عشان تعرفني وتعرف بنتي سمر .... الحي الله والدايم الله ....... آآآآآآآآ ناس هووووىىى زكريا راح في حق الله ...... زكريا بقي مابيعرف ولاد اهلو , عاد اشكيلك ابراهيم وللا عزالدين وللا اقولك في الباقيلي اقوم اضرب تلفون حار لي مبارك عشان يديك فوق راسك

[ابوسمر]

يا عوض جلاس اولا الف شكر ليك لهذه الترحيبات , وانا فعلا سيد بيت ان جيت تفتش علي تلقاني ساكن في اي ركن من اركان البركل ( بين الباء والراء تلقاني ,وبين الراء والكاف تلقاني ,وبين الكاف واللام تلقاني ) اعز مايملك الانسان امه وانا امى آسيا بت الصيده بت ام الخير عبدلابية من جوه الجوه يعنى بالعربي غرقان لاضنى وماأعظمه من شرف ان تنتمى لهذه القبيله . انا أخوالي ولاد الصيده بت عمر وخالي يعقوب بابكر وخالي زكريا بابكر , اديك وللا كفاك

[حسان سرالختم]

معقول خالد حسن ظهر فى البركل
ياخى الزيك دا بيظهر طوالى من
غير ما تتعبنا كده !!!
شرفت ونورت المنتدى
والحق اخوالك ديل قبل ناس الطريف
مايزعلو ويحردو العبدلاب

[ابوسمر]

حسان ازيك وكيف اخبارك انشاء الله تكون طيب والاسرة عساها بالف خير , طبعا لي شهرين من غادرت السودان الي الشارقة

[ام محمد]

سلام كتير لابو سمر ومرحب بيك في بيتك

[ابوسمر]

ام محمد الف شكر علي السلام ما عرفتك لكن في الباقيلي انتى عاشة بت محمد احمد نسيبتك وللا انا غلطان

[ضمره بغدادى]

هلا بى ابو سمر هلا بى خالد ولد الراجل الطيب شرفت ونورت دارك وابقى داخل لى جوة والجابك يجيب ناس العقدة الباقين كلهم ونحن سعيدين بوجودكم بيننا .

[ابوسمر]

اخي ضمرة شكرا لك علي هذا الترحيب الطيب وهذا ليس بغريب عنك من عرفناك فارد قلبك للناس وربنا يقدرنا نكون اضافة لاهلنا في المنتدي

[على بابكر ابراهيم بابكر]

ترليون مرحبأ بقدومك أبو سمر وتعال داخل على الدار فهى دارك ورمضان كريم عليكم، فرحبوا معى يا أهل المنتدى بأبو سمر وهو ( إبن أختى ــ شقيقتى الكبرى ) عشان ما تقولوا على دا كبير وبالمناسبة أنا أصغر من المحتفى به ، ولا أذكيه عليكم فسوف تعرفونه من خلال اسهاماته وتتأكدون بأنه اضافة حقيقية للمنتدى والآن يعمل مراقباً مالياً لسودانير بالشارقة .ويا أبشخيت دا تابع لأولاد الصيدة ولكن للأسف عندو عرق فى الطريف من أبيه .

[على محجوب جعفر مصطفى]

مرحب ابو سمر وشرفت ابن اختى وودعمى ولك التحابا
وبعدين ياضمره يفوت عليك خرف زكريا الماعرف وداختو
جنس ده حجوك بيه من هنا ودربك على ريقتون تحدسه بالحاله دى
انا ماقتلك الزول ده قدر جدى عمر ودبابكر

[ابوسمر]

صحيح الماعندو خال يشوفلو خال , شكرا شكرا علي الترحيب يا خال ورمضان كريم .
لكن عاد ده كلام ده تقول للأسف عندي عرق في الطريف من ابوي .. ياخال ديل اهلي ناس القران خلوة الحمتياب ماها غايبي عليك ....لاتسرح ياخااال احفظلي حقي

[ابوسمر]

سلام الله عليك خالي علي ودمحجوب وتقبل الله منا ومنكم الصيام والقيام وانشاء الله يوم شكركم مايجي فقد انزلتمونى منزلا ياشابي ليهو الناس لكم الشكر والتقدير , اما المخرف خالي زكريا منو العوض وعليهو العوض

[زكريا بابكر عمر]

والله حليلك يازكريا حالتك بقت تحنن كبرت وللا شنو يظهر عليهو الخرف دخل يعنى الا اقول ليك ياخال عشان تعرفني وتعرف بنتي سمر .... الحي الله والدايم الله ....... آآآآآآآآ ناس هووووىىى زكريا راح في حق الله ...... زكريا بقي مابيعرف ولاد اهلو , عاد اشكيلك ابراهيم وللا عزالدين وللا اقولك في الباقيلي اقوم اضرب تلفون حار لي مبارك عشان يديك فوق راسك


يا ود أختي إنته جايي داخلنا بيسمر أسع أنا لو دخلته بيأبو أصاله بتعرفني؟؟؟ والله إن نطق ما تعرفني وبيني وبينك الكبر حاصل( بس ضمره وعلي محجوب مايسمعوني )أصلن قاعدين يلبتو ليجنس الحاجات الزي دي وأسع ما عارف دي فاتت عليهن كيفن... تسلم يا خالد ومليوووون مرحب بيك وأحذرك من أسع من معركة الطريف والعبدلاب تدخل فيها إنته موقفك صعب بلحيل ولاحتي في حجازي تدخل .....تحياتي ,,,

[نادر رشاد]

ترليون مرحب وحباب صديقي خالد
ترليون أهلاً وسهلاً
ترليون سعد وهناء حل بالبركل دوت كوم
شكراً على الرسالة لكن زي ما قال أخونا زكريا كنت دايرني أعرفك كيف ورسالتك لاتحمل إسم إلا أبو سمر .
فحقاً تشرفنا بك أيها الرافد .
ولايسعني إلا أن أردد لأهل المنتدى كلمات خالك علي بابكر : لا أذكيه عليكم فسوف تعرفونه من خلال اسهاماته وتتأكدون بأنه اضافة حقيقية للمنتدى .
كل الود ،،،