يا متغابي عديل العرفة - نص جديد لخالد يس

[عبد الله إبراهيم الطاهر]

ظهر أمس مع تقفيلات الجريدة والانشغال الشديد ولحساسية الحبيب الشاعر خالد يس أرسل لي رسالة حتى لا يزعجني أفادني فيها بأنه منح الحرية للخروج من المستشفى بعد أن استقر وضعه الصحي ... وفي المساء غافلا أشواقي هو وأبوبكر حامد وأطلا علي في البيت اطلالة رائعة المحيا ... وكانت أجمل مسائية
استهلاها العزيز خالد بهذا النص الجديد ...
وقال ان العزيز عبد القادر محمد عبد القادر قد وضع له لحناً ...
وحينما قلت له أنني سأنشرها في موقع البركل طلب مني أن أضع لها هذا الاهداء:

إلى صديق محمد طه
وهو يتلمس الخطى تحت سماوات جدة ...
والدكتور أسامة علي بشير
وهو يبحث عن أياماً مضت ...
وإلينا جميعاً ونحن نحُنُ إلى شموس لا أظنها تشرق من جديد ...

خالد يس

يا متغابي عديل العرفة

أكتب ليك عن فيض أشواقي
والا غرامي وخيبة أملو
عن احساسي في كل تلاقي
إنك ساحلاً ما أظن أصلو
وعن دمعات صبت حراقي
وماك دار تشعر مهما هطلو
وياما أحاحي اللهفة في بعدك
وكم في قربك حسرات نزلو
وأنت بعيد مفتون بي صدك
وشوقي قريب لو تقدر تصلو
ويا متغابي عديل العرفة
في تحنان لو رسل مطرو
كان عماك حنين للضفة
شن بتسوي إن وصلك بحرو
وخوفي عليك من باكر تصحا
تلقى قوافل حِنك سدرو
والقى أشواقي دقش فاتوني
شدو خيول الذكرى ورحلو
ديك الساعة أعاتب احساسي
شان ما اتمهل والف قدرو
والا ظروف الزمن القاسي
لحظة غافل ريدنا ونحرو
والا أعاتبك أنت آناسي
إنو القيف بيفارق بحرو
لحظة يشعر أنو الموجة رغم الريح
ما قدرت تصلو
ويبقى يعيش ما بين الحسرة
وبين ذكراك اليوم من فجرو
لمن تمسي ملامح بكرة
كتي خداراً وشح عمرو
وكتي جزيري ترقرق خدره
وياما هواك كان شفعو ووترو
ولو حنيت رسلتلو طيفك
كان انعشته خدارو وشتلو

ــــــــــــــــــــ
احتراماتي

[محمد الامين]

الحبيب ... ود الطاهــــر
تحياتى لك وأنت تأتينا بهذا النص الـــرائع ...
خالد يس هو من الشعراء المميزين فى كتاباتهم الا أن كتاباته لم تجد طريقها الى الناس لا أدرى ما هو السبب .. كما هو حال صديقـــى بدرى الياس فكلاهما رائع - لكن لابدين بى روائعهم -
أتمنى أن أسمعها أغنيه وبالتأكيد أستاذ عبد القادر محمد عبد القادر يكون أوضع ليها لحــــن جميل جدّاً ....
وكلما تلقى ليك فـــرصه ألفح منو وجيب ...
تحياتى للأخ خالد يس وحمداً لله على سلامته ...

تحياتى وكل الود ..

[عوض جلاس]

مشكور الأخ عبد الله إبراهيم على هذه الرائعة التي نثرتها فوق سطح المنتدى ليعبق شذاها بين حنايانا عطراً فواحاً وعبيراً منعشاً ننعش به أنفسنا من ملل الغربة وسمومها اللافح ..
والتحية للشاعر الجميل خالد يس ونتمنى أن نسمع له المزيد والمزيد من الكلمات الرائعة
بس ملاحظة بسيطة في الشطر الأولى أنت كتبتها كما يلي :
أكتب ليك عن فيض أشواقي
والا غرامي وخيبة أملي

وعلى ما أعتنقد إنها يجب أن تكون :
أكتب ليك عن فيض أشواقي
والا غرامي وخيبة أملو
حتى لا يختل وزن القافية
وأرجو أن تصححونا إذا كان اعتقادنا فيه خطأ
ولك تحياتي الدكتور عبد الله ولشاعرنا خالد يس

[عبد الله إبراهيم الطاهر]

الحبيب ... ود الطاهــــر
تحياتى لك وأنت تأتينا بهذا النص الـــرائع ...
خالد يس هو من الشعراء المميزين فى كتاباتهم الا أن كتاباته لم تجد طريقها الى الناس لا أدرى ما هو السبب .. كما هو حال صديقـــى بدرى الياس فكلاهما رائع - لكن لابدين بى روائعهم -
أتمنى أن أسمعها أغنيه وبالتأكيد أستاذ عبد القادر محمد عبد القادر يكون أوضع ليها لحــــن جميل جدّاً ....
وكلما تلقى ليك فـــرصه ألفح منو وجيب ...
تحياتى للأخ خالد يس وحمداً لله على سلامته ...

تحياتى وكل الود ..

مُحُمَد اللمين
أنزيك يا زول يا زين
مشكور كتير على طلتك الرائعة هنا ....
فعلاً خالد كتّاب لكنه مُقل خاصة في الفترة الأخيرة ...
لكن ليك علي أجيبه هو شخصياً المنتدى ...

احتراماتي

[انس البدوي بابكر]

مُحُمَد اللمين
أنزيك يا زول يا زين
مشكور كتير على طلتك الرائعة هنا ....
فعلاً خالد كتّاب لكنه مُقل خاصة في الفترة الأخيرة ...
لكن ليك علي أجيبه هو شخصياً المنتدى ...

احتراماتي

اخي عبدالله لك التحيه و انت تجلب الدرر و اولاد دفعتنا خالد يس و بدري الياس و استاذنا العزيز عبد القادر محمد عبدالقادر اسماء تتردد كثيرا و لكن مكانها في المنتدي خالي فياريت تتم جمايلك و تجرهم جاي .....و رمضان كريم

[عمر مجذوب خطيب]

فعلا يا عبد الله الببمنع خالد يدخل الموقع شنو عليك الله اقنعوا ضروروي

[عبد الله إبراهيم الطاهر]

أنس مالك
عمر الخطيب
مشكورين على الحضور
جية خالد يس هينة لكن الكلام التواصل ... كل القصة يا جماعة أنو هو يعني ما متواصل مع التكنولوجيا الحديثة دي وما بيعرفها تب .... لذلك الموضوع داير ليهو شوية زمن نديهو المفاتيح ونخلي الباقي عليكم هنا ..

احتراماتي

[أسامه على بشير]

الأخ عبد الله,,
سلام و رمضان الجميع كريم وكلم كرماء...
سلامة الأخ خالد عبركم ,,و تحية و تقدير لمتابعة أخباره عبركم,,لا أدري لماذا لم يصدق معي رقم تلفونه الذي أنزلته لنا عبر البوست الآخر.. سلام مطبوق و تحية مكررة لك وله ولكل من معكم....و النص رائع روعة خالد نفسه,, وأخونا عبد القادر أكيد ما بيقصر..
بالمناسبة لك الأخوة بالمنتدى تحيات الأخ علي سند موصولة ,الراجل اليومين ديل مشرفنا فى مكة و كمان مجتهد جدآ في العمرة و الحرم..
و سلام مطبوق

[عبد الله إبراهيم الطاهر]

أسامة علي بشير
مشكور يا أخي
وأهو خالد بي نفسه أصبح عضو بالمنتدى تقدر تتواصل معاهو عيان بيان ... لكن غريبة أنو الرقم ما دخل معاك ...

المهم لك التحية والتقدير ...

احتراماتي

[عبد الله إبراهيم الطاهر]

مشكور الأخ عبد الله إبراهيم على هذه الرائعة التي نثرتها فوق سطح المنتدى ليعبق شذاها بين حنايانا عطراً فواحاً وعبيراً منعشاً ننعش به أنفسنا من ملل الغربة وسمومها اللافح ..
والتحية للشاعر الجميل خالد يس ونتمنى أن نسمع له المزيد والمزيد من الكلمات الرائعة
بس ملاحظة بسيطة في الشطر الأولى أنت كتبتها كما يلي :
أكتب ليك عن فيض أشواقي
والا غرامي وخيبة أملي

وعلى ما أعتنقد إنها يجب أن تكون :
أكتب ليك عن فيض أشواقي
والا غرامي وخيبة أملو
حتى لا يختل وزن القافية
وأرجو أن تصححونا إذا كان اعتقادنا فيه خطأ
ولك تحياتي الدكتور عبد الله ولشاعرنا خالد يس

الحبيب عوض جلاس
مشكور يا حبيب
واعتقادك صحيح .. خطأ طباعي ورد في النص وقد قمت بتعديله بصورته الصحيح ...
مشكور كتير على تصحيحك وعلى مرورك ..

احتراماتي