ثرثرة مع مرور الايام

[الخزين ود نصر]

بعد أن رمى قش البهائم و ربط الحمارة دخل على آل بيته :

* كيف قيلتي آ الحاجي

* بخيرين تلاتي آ بو الحسن

* أملي لي الابريق هو الاتوضأ

_ قام لصلاة المغرب بطوله الفارع تخللته إنحناءة خفيفة جراء فعل الزمن .

بعد ذلك ذهب لعنقريبه المعهود في حوش الديوان و جلس بعد يوم عمل طويل .

* الحاج مد لي كرعيك اللمسحن بالدهيني دي .

* إنتي آ لمبروكة ما تصبري شويي لليلي الناس داخلين و مارقين .

* ماني فاضالي في فد زول .. طول نهارك حايم في الهجيري دي ..

* الله يديكي العافي آ بت علي من أجي تاني ما عندك شغلة بلاي .

* أيي ما عندي .. بتك سعاد تسوي في شاي المغرب هسه بتجيبو .

* الليلي آ بت علي ما سمعتي ولد بتك سعاد قال لي شنو بتحت ...

* قال لك شنو الجنا المصيوب ترباية السعوديي ده .

* جاني جاري شايلو منقايي صفرة لقاني قاعد في العنقريب التحت الليمونة التالا الازيار .. قال لي ( جدو هاك المنقه دي سرقتها من شجرتك الفي الجرف ) ..هاهاها

* مي قاع يسمع البطان يقولو ... حكاية الزول يسرق حقو حكايي .

_ تدخل سعاد : كيف قيلت يابا ..

* الحمد لله يابتي بخير .

_ تكب الشاي و تخرج في هدوء

* يا الحاجي .. سعاد ماله حاله ما عاجبني اليومين ديل ... راجله ما قاع يضرب التلفونات ..

* قاع يضرب لكن ليهو خمس تشر ما رسل لها شي .. قال الشغل بقى كعب .

* شي يشترو ده نحنا مانا محتاجنلو نحمد الله مخزنا ملان عيوش و تمر عمن أول نصه ما بعنا .. أديتيها القريشات القلتهن ليكي ..

* أيي يعلم الله ماها محتاجي لقروش .. راقدات بصمتن في دولابه .. لكن رجال آخر زمن فالحين في نقة التلفونات طول الليل .

* نسوي شنو عاد آ لحاجي ... الولد تشوفوا قدامك يخالت في الناس .. و هميم يرفع لده و يحفر لداك ... تقول يبقالي سند ...تعرسلوا بتك بلا يجي يسافر و يسوي متل الطرطشة دي ..

* ما تهم يا حاج الله كريم .

_ أحضرت له الحاجي كورية الفطير باللبن بعد أن صلى العشاء .

* حاج عمر أمرق العراقي ده اللمسحك بباقي الدهيني دي ..

* الانوار ديل مالك ما طفيتيهن لليلي ..

* بقوم أطفيهن لكن يا بوحسن زمنك الصغير ما بتخاف كدي من الداخل و المارق .. أمك الله يرحمه داخلي و مارقي و إنت تقول لي تعالي مسحي لي كرعي ديل .

* داك كان زمنن سمح بلحيل و النفوس صافي .. كمان الله يرحما كانت تفرح وكت تشوفك تضحكي معاي . لكن يا بت علي غايتو ما بتفوتي لك شي أبدا .

* يا عمر أنا حافظاك من زمن بعيد الله يديك العافي .

* وكت تقولي لي عمر ساكت قاعد تعجبني و تذكرني كلامك زمان .

* ما قاعد تعجبك عند أخواتك .. كل يوم ياعمر جيب لي و يا عمر أدني ؟

* ها ها ها ... ما قلتي لي ما بيهمني كان قسمت قروشك لناس الشارع .

* ما بيهمني لكن يوجعني البياكلو و ينكرو .

* ماني داير لي شكيري ربنا بسألني منهن . أه وكت حافظاني كدي قولي لي شي من أيام زمان .

* سمح .. قبل ما تاخدني مرات وكت يكون في عرس ول سمايي .. أنا و البنات نقعد نغسل العدي و نسوي الشاي .. بلا إنت تجي داخل .. ما شاء الله بطولك ده و جادع الشال فوق راسك و شايل عكازك متل الرجال الكبار و تنهر ( يا بنات الشاي ده مالو إتأخر كدي ) بلا البنات يتهجمن و يطيرن عويناتن و يقومن ينطقشن .. و أنا يغلبني الضحك .

* مالك يغلبك الضحك آ بت علي ؟

عشان عارفاك مو بصحك و قاصد تهجمن بحسك الغليد ده .. كمان عشان عارفاك حنين و ما بترضي زعلي و مرات بتقول لي كلام سمح بلحيل .

* أيي قولي كدي آ بت علي من يومك ملجماني ..

* ما عاش البلجمك آ بو حسن ...إنت سيد الرجال لا حدهن .

* باكر عندي قراعي و بوغة قمح كان قدرت نمت بدري يكون أحسن ...

* خلاس باكر بتذكر لك كلام سمح يعجبك .

[عبدالجليل خضر]

الخزين قريبى شايفك الليلى قعدته فى الواطه
الذكرك الكلام ده شنو الليلى ؟؟؟؟
مره واحدى طلعت من عالمك المحيط
ورجعت بينا لى زمن سالم مسالم تتجسد
فيه كل المعانى الحلوه والاحساس
انت عارف تعبى ده كلو عشان
اعيش حياه ذى دى ما شفتها كيف
متاصله فينى ....لايف استايل
ايى اخير تتفشى واصل

[بت مسيمس]

الخزين رمضان كريم
والله موضوعك فنان جدا
والله صاح رجال الزمن دا غير الكلام الكتير فى التلفون ما عندهم شغله.
تخريمه:
باقيلك الزمن دا فى رجال قاعد يمسحوهم فى الليل ولا انتهى العهد دا؟
------------ فى انتظار المزيد لا تطول-----------
لك تحياتى

[الخزين ود نصر]

اقتباس:
المشاركة الأصلية كتبت بواسطة عبدالجليل خضر http://albrkal.com/vb/images/styles/greendeluxe/buttons/viewpost.gif (http://albrkal.com/vb/showthread.php?p=246684#post246684)
الخزين قريبى شايفك الليلى قعدته فى الواطه
الذكرك الكلام ده شنو الليلى ؟؟؟؟
مره واحدى طلعت من عالمك المحيط
ورجعت بينا لى زمن سالم مسالم تتجسد
فيه كل المعانى الحلوه والاحساس
انت عارف تعبى ده كلو عشان
اعيش حياه ذى دى ما شفتها كيف
متاصله فينى ....لايف استايل
ايى اخير تتفشى واصل

و الله يا قريبي الحياة البسيطة في أي ريف في السودان تعجبني شديد لكن ما نا لاقين خترنا .. و أنا زيك غاية أمنياتي متل العيشي دي .

[الخزين ود نصر]

اقتباس:
المشاركة الأصلية كتبت بواسطة بت مسيمس http://albrkal.com/vb/images/styles/greendeluxe/buttons/viewpost.gif (http://albrkal.com/vb/showthread.php?p=246709#post246709)
الخزين رمضان كريم
والله موضوعك فنان جدا
والله صاح رجال الزمن دا غير الكلام الكتير فى التلفون ما عندهم شغله.
تخريمه:
باقيلك الزمن دا فى رجال قاعد يمسحوهم فى الليل ولا انتهى العهد دا؟
------------ فى انتظار المزيد لا تطول-----------
لك تحياتى

يا بت مسيمس قالوا حلم الجعان عيش ... عشان كدي من غير ما نشعر نلقى سيرة المسوح في تفكيرنا ... الله غالب . العهد دا سمعنابو سمع:d

[الخزين ود نصر]

* أها آ عمر قلت لي الموية إتسترت معاكم الليلي ؟

* أي و الله آ فاطني سقينا و طبقنا كمان ... الليلي جدول الباجور مكروب موية من صباح الرحمن .. قالوا الايام ديل لجنة البابور فيها رجال ياكلوا النار ..

* قبل شويي حسن وليدك ضرب تلفون .

* كيفنو إن شاء الله صحته تمام .

* الحمد لله تمام و بخير .. و قال تاني نقلو محل إسمو القصيم .

* لا حول و لا قوة إلا بالله آ بعرفو المسك الولد ده في السفر شنو و كان سامع بلاد بره ديل بقى مافيهن قروش .

* يا الحاج الزول كان ما جرب براهو الكلام آب ينفع .

* نان دي السني التالتي ليهو ما جرب لليلي .. و كت جا الاجازي عمن أول غير هدومو و موبايلو ما عندو شيتن يقولوا عليه ... يمرق ديل و يلبس ديل سهر طول الليل مع أصحابو و نوم طول النهار .. ما عرفنا ناخد و ندي معاهو في الكلام .

* طول بالك عليهو ياهو وليدنا الويحيد .

* زمان كان بينا شوية تفاهم يجي يشاورني كان داير يبيع تمر ول كباشي ول ورتاب .. و إمورو ماشي تمام ..

* من قصفة بت عبد الوهاب عرسوها و سفروها دبي البلد دي مسختلو .

* نان الله ما خلق غيره .. كلمتو لامن ريقي نشف .. بس يأشر لاي بت نعرسه ليهو ... في الاسمح منها و الاشطر منها .. البيوت بنيناهن عوضتين و صالون بالطوب اللحمر .. و الخرفان و قفناهن مرتين و تاني بعنا و ضبحنا منهن و هو ما جايب خبر للعرس .

* خلو شويي آ الحاج ما فاتلو شي .

* عرس السغرة سمح يعلمو المسعوليه و يخلي الطرطشة و السهر و الحوامة الفاضية .

* كلو من عرفة هي المسخت عليهو العرس .. كل يوم حسن أشرح لي الدرس ده .. حسن جيب لي شريط الفنان داك .. و مرات ألقاهم ينضمو براحه في الطاقة البيناتنا في برندة الحمام .. و أمها حليمي عارفي ..

* يا حاجي إستغفري الله ده كلام شنو .. الموضوع ده إنتهى ربنا يسترنا دنيا و آخره .

* لكن يا الحاج موجعني السوتو البت و حليمي .. من جاهم ود بت مديني و قالو شغال في دبي زغاريدن بقت تجيب الطاش .. و يا شريري و آ مغستي الشديدي حسن شهرين ما قادر ياكل سمح ..

* كلو قسمة و نصيب .. من زمان بقول لك الولد ده فرد وآحد لا تدلعيهو خلي لي بربيهو بطريقتي و طريقة أبوي عشان عودو ينشف و قلبوا يبقى جامد ... ما سمعتي كلامي .. تجري و تقلدي و تسلمي فيو أكتر من أخواته .

* هسه مالو سيد الولاد لا حدهن ..عيني باردي . و بنات الحلي ديل كلهن يتمنن كلمة منو .. لكن آ حليمي بت عاشه حسادتك و عمايلك السودي رجيت الله تلقيها في عضامك ..

* إستغفري الله آ بت علي إنتي السويتيهو فيها ماهو شويي ..و لدا و كت جا لبتك سامية حرشتي البنيي و قلتي لها قول ماني دايره .. وهم نافشين ريشم و قايلين مافي ناس بيابوهم .

* أيي قلت ... ولده الكضاب الهراط ده آب يدخل علينا .. جني و جن الزول الكضاب .

* أعوذ بالله من غضب الله .. البارح بتحت جاني عمو و قال لي ولد حليمي ماسكنو في شيكات في سجن بورسودان و قاعدين يجمعولو في القروش . فاطني الوكت روح .. البارح قلتي لي بقول لك شي من حكاوي زمان .

* أيي بقول لك آ عمر .. أصبر لي اللجيب الغتا من لاداخل ......

[عوض جلاس]

الخزين كيف حالك ورمضان كريم بعد الزحمة
بالله الكلام السمح دا ليهو يومين وأنا ما جايب خبرو ؟؟
راجين كلام المرة السمح الزمان بي فارغ الصبر
لكن مالا كل مرة تطرطش الكلام لامن الراجل ينعس ويبقى زول نوم
وحسن دا نقلوهو القصيم بعد كدي إلا يشوفوا ضمرة دا يجيبلهم خبرو
يا زول تاني من هني ماني مارق

[ابو مبارك]

الخزين كيف حالك يازول ياسمح
هواك مشرًق وهمبريبك ضارب:d العنقريب جاتو الشمس أدو جرررره على الضل .. ماداير اقاطعك بس جيت اقولك رمضان كريم ... واصل في الكلام الطاعم ده باقي ذي الكلام ده قعد يحميني الرقده .. انت وخالي ود البدوي مابتريحونا :d اسكت واصل خلنا نتقلًب ..

[زكريا بابكر عمر]

الخزين !!آآيابا إن شاء الله الخزنه الملياني دولارات:d... عليكن الله تشوفي الزول الغتيت ده !! إنته وكت عندك جنس النضم الطاعم ده ساكت عليهو مالك الزمن ده كلو؟؟؟ هو نحنه تاني من هني بنمرق:eek:..عوض أحجزلي معاك اللمشي أجيب بنمبري وأجي ...يلا قول.. أها وبعدين؟؟ ...عندك المحن يا الخزين:d:d:d

[الخزين ود نصر]

اقتباس:
المشاركة الأصلية كتبت بواسطة عوض جلاس http://albrkal.com/vb/images/styles/greendeluxe/buttons/viewpost.gif (http://albrkal.com/vb/showthread.php?p=246790#post246790)
الخزين كيف حالك ورمضان كريم بعد الزحمة
بالله الكلام السمح دا ليهو يومين وأنا ما جايب خبرو ؟؟
راجين كلام المرة السمح الزمان بي فارغ الصبر
لكن مالا كل مرة تطرطش الكلام لامن الراجل ينعس ويبقى زول نوم
وحسن دا نقلوهو القصيم بعد كدي إلا يشوفوا ضمرة دا يجيبلهم خبرو
يا زول تاني من هني ماني مارق

عوض جلاس مشكور يا صاحبي على كلامك المشجع الظريف .. المره الجايه نوم مافي للصباح .:d

[الخزين ود نصر]

اقتباس:
المشاركة الأصلية كتبت بواسطة ابو مبارك http://albrkal.com/vb/images/styles/greendeluxe/buttons/viewpost.gif (http://albrkal.com/vb/showthread.php?p=246797#post246797)
الخزين كيف حالك يازول ياسمح
هواك مشرًق وهمبريبك ضارب:d العنقريب جاتو الشمس أدو جرررره على الضل .. ماداير اقاطعك بس جيت اقولك رمضان كريم ... واصل في الكلام الطاعم ده باقي ذي الكلام ده قعد يحميني الرقده .. انت وخالي ود البدوي مابتريحونا :d اسكت واصل خلنا نتقلًب ..

صاحبنا حسن أبو مبارك أريتك طيب
الهمبريب و الخير و الطيبة هني راقدي كيمان كيمان يعلم الله . مشكور شديد .

[الخزين ود نصر]

اقتباس:
المشاركة الأصلية كتبت بواسطة زكريا بابكر عمر http://albrkal.com/vb/images/styles/greendeluxe/buttons/viewpost.gif (http://albrkal.com/vb/showthread.php?p=246800#post246800)
الخزين !!آآيابا إن شاء الله الخزنه الملياني دولارات:d... عليكن الله تشوفي الزول الغتيت ده !! إنته وكت عندك جنس النضم الطاعم ده ساكت عليهو مالك الزمن ده كلو؟؟؟ هو نحنه تاني من هني بنمرق:eek:..عوض أحجزلي معاك اللمشي أجيب بنمبري وأجي ...يلا قول.. أها وبعدين؟؟ ...عندك المحن يا الخزين:d:d:d

زكريي أستاذنا شخصيا حبابك ألف

تشديعك ده شهادي نفخر بها و الله .. و نحنا تلاميذك .. شكرنا ما ليهو حد .

[الخزين ود نصر]

* أه آ عمر إنت نم ؟

* لالا ما نم و باكر الصباح ما عندي شي غير أقوم أضبح لكم العتود الازرق ...ماشاء الله بقى غليد و سمح .

* طيب يا سيدي الامانتي ليك ... الحكوة دي فيها شي إنت عارفو وشي ماك عارفو .
* سمح قولي كلو ما تستعجلي .

* يا سيدي البدايي من جا أبوك الله يرحمه مع خالك عوض و قالو دايرني ليك ... أنا كت عارفي سبب جيتن لكن يعلم الله من بدو الكلام و أنا كت بتصنط ورا الباب ... أحسلك بجسمي ده برد ضمه و إيدي عرقن و قلبي يسوي في الدو دو ... أبوك بدا الكلام : يا محجوب نحنا جينا عندنا غرد دايرنك تقضا باذن الله .نحنا طالبين بتك فاطني لولدنا عمر . دحين شاور جماعتك و بلغنا الرد . أبوي قال لهم بصوتو الغليد داك الله يرحمه : موافقين تب . و علي الطلاق ما عندي مشاوره لاي مخلوق . و انا داخل جوه بس عشان أجيب لكم العشي ... و أقول كدي أقوم جاري لاداخل قبل ابوي ما يشوفني ... اليوم التاني أمي قالت لي بعد عمر قال دايرك تاني دخله و مرقه عندهم مافي إلا إيدك في إيدي فشان الناس ما يشيلو حالنا .. العرس قالو بعد 3 تشر بعد حش التمر .. أه بقيت بالاسبوعين و التلاتي آ بشوفك ... قريب حش التمر خالتك ماتت الله يرحمه دفرو العرس لاقدام .. و بعد أربع تشر لحقته حبوبتك أم الحسن الله يرحمه ... و أنا دي كان مت كان أخير لي من حالتي العلي ... أمي بجيهي حاماني الدخله عندكم و كمان خفت الناس يشوموني من عرسك .. لكن اليمن أمك الله يرحمه و يحسن لها كانت تشيل و ترضي و تشكر فيي و تخفف علي ....

* أه آ فاطني و كت إنتي بتدوريني لا كدي مالك من لاقيتيني يوم العرس بقيتي تبكي و تتنخجي لامن حيرتيني ... و تاني نمتي متل الزول الغمران .

* ده كان نذر آ عمر .... قلت كان ربنا تم العرس ده و لماني فيك يا عمر ود اليمن .. عليي أمسكك من رقبتك و ابكي زييين لامن امرق المغسه السووها فيني الناس بعدم شوفتك و ملاقاتك .

* دي معناتا ريدي شديدي خلاس .. ما كنت قايله قدر ده .

* و لليلي يعلم الله الدنيي دي كلها عندي كوم و إنت كوم أكبر منها ..

* أه و الغمران داك حكايتو شنو ؟

* الله يقطع بخيتي بت عمي قالت لي أوعك تتكلمي معاهو من اليوم اللول يقوم يقول عليكي جاسر و قاهر .. سوي رقبتك نايمي ول غمراني ... كت اسمع فيك مرق و قلت لامك بت الناس دي ماله تقول غمراني ...قالت لك تكون فتراني خلها الليلي ... و الفجر اذن و سمعت ابوك يقح في الحوش ماشي الخلوة . لكن حنيتك و شفقتك علي و كل مره تجي تتبن و تمسح راسي و انا ساوي رقبتي نايمي فرحتني ذيادي ...

* عمر إنت نم ؟

* ماظنيت يجيني نوم الليلي قبل اصلي الصبح .........

[الخزين ود نصر]

* و بعد جبنا بطانا ديل الله يحفضن ريدتي ليك زايدي يعلم الله ... و بخاف عليك متل وليدنا حسن ..

* تخافي علي من شنو آ فاطني ؟

* مافي شي بس قليبي رهيف وكت تغيبوا من عيني ... ولامن تتأخر في بلد بتحت دي قاعد أشفق عليك متل الشافع . قبل يومين وكت غشيت الخلوة بقشك وصليت المغرب غلبتني القعده في البيت . مرق قلت اللشوفك جيهت الخلوة لقيتك جاي من عندها ... بلا قلت كدي دخلت دكان جعفر ود العمده .. لقيت بنيتو فاتحي الدكان شلتلي منها كبريتي و لوحين صابون .

* قولي بسم الله يا الحاجي .. الاسبوع الفات جبت لكن كرتونتين صابون .

* أي جبت يديك العافي .. بس أنا قلت يبقى تزعل كان عرفتني قافراك عند الخلوة ... عشان كدي و كت شفتك جاي دخلت الدكان .. و قلت ما بمرق ساكت البنيي تقول شنو .. و ياهو الجاني في بالي شلت لي كبريتي و لوحين صابون .

* ياسلام عليك يا فاطني .. أتاريني غشيم ما فهمتك ....

* لالا و حات سيدي الحسن .... إنت زين الرجال لا حدهن و أنجض منك عمري ما لاقاني . و عارفاك ما بتخت زول في محلي و عاجباك و مالي عينك .

* بلحيل آ فاطني .. أجمل نعمي في حياتي .

* سجم خشمي ( نعمي ) دي مني ... نعلها نعمي الحلبيي ..

* هاهاها عندك المحن آ فاطني بت علي ( عملات زكريي بابكر )

شوفي آفاطني حسادة الديك ده قام يتنفض و يعوعي ... و لليلي الواطه ضلمه كيفن ... و الونسي بقت حلوي .

* جيب أضانك جاي ..... يبقى مسكته الغيره آ عمر ... هاها . ............

[عوض جلاس]

* هاهاها عندك المحن آ فاطني بت علي ( عملات زكريي بابكر )

شوفي آفاطني حسادة الديك ده قام يتنفض و يعوعي ... و لليلي الواطه ضلمه كيفن ... و الونسي بقت حلوي .

* جيب أضانك جاي ..... يبقى مسكته الغيره آ عمر ... هاها . ............


قشريي دا كان ما اتحشر في أي مكان ما بيعرفو ؟؟؟؟
بعدين هو الديك براهو الحاسد
يمين نحن ذاتنا حسدناهو على الريدة دي
أها وبعدين
لا يكونو دايرين يعيدو زكريات يومها الغمرت ؟؟ :d :d :d

[الخزين ود نصر]

عوض جلاس الباقي تاني يعرفو براااهم .....
نمشي نلحق تلفون سعاد .. القالداهو .. طول الليل .

[ابومنذر]

خزيننا ... الثرثار :d:dيا زول انت تربيه حبوبات عديل كده ..نضم سمح بالحليل ومفردات من طين البحرطين البحر ( لكى ) وفيهو كل العناصر المعدومه ..اها مصنقرين و(ومقهين ) نسمع نضمك كلهطلع الفى (الجراب ) كله وما تخلى شى مكروم وراك ..

[الخزين ود نصر]

يا أبامنذر ياخي ما تتعبنا في النحو ... أبا .. أبي .. أبو ... بعدين عرفنا ولدك إسمو منذر إنت إسمك منو .... بالله دي حالة دي عامل صاحبنا و ما عارفين إسمك .

مشكور شديد على كلامك الطاعم في تربية حبوباتي :d

[الخزين ود نصر]

* ألو أيوه الخط بقطع سامعاني ؟

* سامعاك

* يا سعاد أنا عارفك بتكوني زعلانه و زهجانه عشان ما رسلت ليك مصاريف .
كان أقول ليك الحقيقة من يومه و ما أدس عليك .

* حقيقة شنو كلو هين ما يبقى متل القالتو لي سوسن بت خالك .

* قالت لك شنو كمان المهترشي دي ؟

* قالت لي الزمن دا الرجال في السعوديه قاعدين يعرسوا البنات العندهن إقامة في السعودية .

* و أنا مالي عليهن ما يعرسوا .

* طيب الحقيقة الدار تقوله شنو ؟

* كان موقفننا من الشغل 6 شهور نحنا السواقين و العمال كلهم .. و الكفيل سوالو مول جديد و أدانا فرصة نشتغل معا تاني ... و صرفولنا شهر مقدم .

* و كت قاعد تسوي شنو الزمن دا كلو ؟

* نمشي الحراج يوم نلقى و يوم لا .

* و أبوك بهني يفتش في الناس البقلعولو البصل ....

* خليني من البصل و الجرجير .. هسه داير أزيد لك غويشاتك و لا قدام إشتريلك سلسل الجنزير و دلاية قلب كبير كمان .

* إنت قايل ما عندي قلب ول إحساس ؟

* عارفوا لكن داك صغير .. الشفتو البارح ده كبير و فيهو فاروظة سمحي خلاس .

* يا مصطفى ركز معاي شوية أنا عاوزاك إنت ما عاوزالي دهب .

* كيف يعني ؟

* عاوزاك تضرب حساباتك يا نكون معاك يا تكون معانا .

* و الله دي غلوتيه عديل كدي .

* أفهمني يا مصطفى أنا لمن أشوف النسوان لابسات و مجيهات مع رجالن يبقن لي متل الساكنات في الجنه .

* و الله إنتي ست الجيهي و السماحة و عندك الدهب و التياب التوتل الموخمج .. و أبوك حاج عمر على سن و رمح ...

* مصطفى باختصار كده لو ما جيت و خليت السعودية تاني أصلي ما بتكلم معاك .

* معقولة يا سعاد ... دي مصيبة شنو دي آ ناس .... و قطعة الاندلس نسوي فيها شنو ؟

* يعني لامن نبنيها و نسكن فيها كم سنه ؟

* قالو لامن تعمر و نبنيها دايراله 10 سنه .

* يعني طارق يكون قرب يتخرج من الجامعة و سارة دخلت الجامعة .

* معقولة هم هسه عمرن كم ؟

* المهم الاندلس يجو يبنوها براهم .. أنا بيتي هني جاهز و العبرة تمسكني لامن أشوف الطير معشش فيهو .

* هسه أنا جيت جاري من الشغل يا سعاد قلت أفرحك و أسمع كلامك الزي العسل داك .

* و الله أنا ذاتي مشتاقة لكلامك السمح بس طوالي عقلي مشغول بالحياه العايشاها دي .

* خلي امورك على الله و علي ... ما بتجيكي عوجي . و الله كان درتي روحي دي هسع ما بقصر .

* و الله كان ما عارفاك بتموت فيني كده كان كرهت الحياه ذاته .

* أيوه كده وصلنا للكلام الحلو .... دقيقه نازل لليماني التحت أجيب لي كرت تلفون إحتياطي .

**** معليش يا المغتربين عصرنا عليكم شديد .

[عوض جلاس]

* **** معليش يا المغتربين عصرنا عليكم شديد .

لكن ياها الحقيقة المرة الما دايرين يعترفوا بيها الناس
إلا من رحم ربي
والليلي ذاتا سعاد عصرت عليهو شديد
قدر الشهير الصرفوا دا بتخلصوا ليهو مكالمات

[الخزين ود نصر]

عوض جلاس يا صاحب أريتك طيب

المعروف أن الغالبية من نساء المغتربين يشجعن أزواجهن على الاغتراب فالحياة الرغدة لديها مفعول سحري لديهن .. لكن هناك أيضا البعض في كفة الميزان الاخرى و أن كن أقل لكن لهن رأيهن المختلف ... يبقى الموضوع هنا لا يعمم بل يترك للظروف و الاراء الشخصية لكل مغترب و شريكة حياته .

* و سعاد هني من ناس كفة و زوجها من كفة تانية :d
ربنا يوفق بينهم و يسعدهم ..

[عصام سرالختم]

دى ما ثرثرة يا الخزين ..
بل حِكم ودروس وعِبر مع مرور الايام ..
متابعين ... ( ميم المندهش )

[الخزين ود نصر]

اقتباس:
المشاركة الأصلية كتبت بواسطة عصام سرالختم http://albrkal.com/vb/images/styles/greendeluxe/buttons/viewpost.gif (http://albrkal.com/vb/showthread.php?p=247115#post247115)
دى ما ثرثرة يا الخزين ..
بل حِكم ودروس وعِبر مع مرور الايام ..
متابعين ... ( ميم المندهش )


غايتو يا عصام أخوي بكلامك ده طلت لي شبرين ....

يجبر خاطرك و يديك الفي مرادك بركة هذا الشهر الكريم .

[ودالحوش]

سرد جاذب

وتنسيق موحد


متاااااابع:d:d:d

[عمرعابدين]

ود نصر الله ينصر دينك
ما كنت جايب خبر للحكي السمح ده
الظاهر في ابداعات مدفونة كتيرة بس الواحد لو اتحزم بجيب شي كتر خلاص

تعرف اكتر شي عجبني ريدة الناس الكبار لبعضهم لانو فيها محنة شديدة وانت وصفتها صاح

[الخزين ود نصر]

اقتباس:
المشاركة الأصلية كتبت بواسطة ودالحوش http://albrkal.com/vb/images/styles/greendeluxe/buttons/viewpost.gif (http://albrkal.com/vb/showthread.php?p=249325#post249325)
سرد جاذب

وتنسيق موحد


متاااااابع:d:d:d


ود الحوش العيد مبارك ربنا يديك لامن يرضيك إنت و أهلك و كل أحبابك ..

مشكور ياخي على كلماتك الحلوة الراقية .

[الخزين ود نصر]

اقتباس:
المشاركة الأصلية كتبت بواسطة عمرعابدين http://albrkal.com/vb/images/styles/greendeluxe/buttons/viewpost.gif (http://albrkal.com/vb/showthread.php?p=249332#post249332)
ود نصر الله ينصر دينك
ما كنت جايب خبر للحكي السمح ده
الظاهر في ابداعات مدفونة كتيرة بس الواحد لو اتحزم بجيب شي كتر خلاص

تعرف اكتر شي عجبني ريدة الناس الكبار لبعضهم لانو فيها محنة شديدة وانت وصفتها صاح

عمر عابدين كيفك يا هندسة .. عيدكم مبارك و كل سنه إنت و أهلك طيبين و بكل خير و عافية .
مشكور على كلماتك الجميلة المشجعة وهذا من شعورك الراقي .

[الخزين ود نصر]

معا نتابع مسلسل ( فاطني بت علي )


* أه بعد صليت و إتعشيت الحمد لله دايراك يا سيدي تقول لي حكوة سعيدي بت عمك الكان دار تجنن ود جلاس .

* العاجبك فيها شنو قلتها ليكي يبقى سبع مرات .

* يعجبني كلامك يا بو حسن .. و إنت كل مره تقوله يكون في شي سمح نسيتو المره القبله ... و الليلي مزاجك رايق و فرحان و جيبك ملان تحمد الله .

* حق شوالاتك ماني ناسي بديك يا الصباح .

* ماني دايرالي شي خلهن عندك ... أه قول علي راحتك ما تخلي شي .

* زي ماكي عارفي الزمن داك أنا كت سغير .. لكن بعد زمن سمعت الحكايي من خليفه ود المشاي ذاتو ... الناس هني سيرو عليهو ود جلاس ... علي البلد الجا منها.. كان يحكي لصاحبو و أنا كت قاعد ... قالو : كت نايم و الدنيي شتي من بعيد أسمعلك حس ناس يضحكو و بقر و غنم يتصايحن مع المغارب وآحد قال لي ديل ناس صنب ... من وسط الخدار جات بنية تتقدل طويلي و جسمه مبروم و ماها فاكري في زول .. الناس صنو و بقوا مقهين فيها و هي ماشي لامن وصلتني ... ضحكت سنونه برقن في وشي ... خفت منها ... نادتني .. إتلفت وراي مافي زول ... قالت لي : إنت إنت خليفه تعال . و قبلت غادي و مشت ... و أنا ماشي وراها ... جرت .. و أنا جاري وراها .. لامن نفسي قام و غلبني المشي .. بلا جات راجعي و مسحت لي راسي ... يديها متل الحرير ... شعره جا متكبي في وشي ريحة ضريرة المحلب غمرتني لامن وقع .... قمت من نومي في الشتي داك عرقان .. و قلبي يسوي في الدو دو دو . كلمت أهلي قالو لي إستغفر الله دي يبقى جنيي ... لكن قلبي حدسني أمشي جيهة صنب يبقى عندي فيها نصيب ...
سقت أخوي الكبير و ولد عمي و ركبنا مركبنا و قبلنا علي صنب ...قبل المغارب بي شويي و صلنا تنقاسي من بعيد شفنا يوسف ود الوناس يسقي في بقرو في الجرف .. قلنا نسلم عليهو باقي راجلا ضكران بلحيل ... و لليلي ما نزلنا من المركب قال لي أخو أسرع بالضبيحة و بعد سالمنا كورك لبنيته : يا سعيدي يا سعيدي ألحقي أحلبي البقرات قبل المغارب .
بلا أشوف لك بنيي جاري و تنقذ وسط حيضان اللوبي طويلي و عوده نديان و شايلاله قرعتن كبيري و تلعب و تضحك مع شافع جاري وراها ... و تقول : سمح يابا أنا جايي جايي .. و مع الهمبريب و شمش قبل المغيب ديك البنيي وشيها بقى يضوي و سنونه يبرقن و شعره يطير و يرصف متل سلاسل الضهب المجمر وهي تشيل و تردم فيهو لا ورا و تاني يجيها صاد .... و كت وصلتني و شافتني أنا إتسمرت و تبكمت و هي إتهجمت وخجلت و بضحكة لمت قنلته القصيري علي كرعيها .. و جرت إنضارت ورا البقر .

* القنلة : لعوض جلاس و الاصغر منو القنلة كانت منتشرة في الماضي عند البنات و هو فستان بحمالات قصير نسبيا يلبس تحت الفستان الخارجي .

[الخزين ود نصر]

حذف و يستكمل في وقت لاحق .

[الخزين ود نصر]

يرفع البوست حتى يتطلع عليه أخونا حسن العليش و الاخوة و الاخوات الجدد .

[صلاح عبد النبي]

يرفع البوست حتى يتطلع عليه أخونا حسن العليش و الاخوة و الاخوات الجدد .

أخوي الخزين ..
أحياناً يتقاصر النظر عن مكنون الدرر ..
اطلعت على ثرثرتك المدهشة هذه صباح اليوم فقط .. وصراحة كما يقولون you made my day ..
حقيقة أعجبني سردك الرائع .. واهتمامك بالتفاصيل الصغيرة في الحكي هو مربط الفرس .. قصة سعيدي التي لم تكتمل ورواية بطلها خليفة ود المشاي لمنامه العجيب حملتني إلى عوالم الطيب صالح وأبطاله الذين تحكروا في وجداننا ..
أحسنت صنعاً برفع البوست .. وأتمنى أن تواصل عاجلاً ..
لك التحية ..

[الخزين ود نصر]

و الله يا خوي صلاح دي شهادة أعتز و أفخر بها ..

وبعد قررت إنو ما أواصل القصة لكن تشجيعك خلاني اراجع موقفي دا ..

[الخزين ود نصر]

* أها تم الحكاي آعمر إنت نعست ول شنو ؟

* لالا ما نعس.... أها ود جلاس كان يحكي لصاحبو قالو :
أبو البنية يوسف ود الوناس حلف ندخل ناكل الكرامة ..و أنا قتلو ماني داخل كان ما قضيت لي غردي ...أنا داير البنية الحلبت البقر بسنة الله و رسوله .
ود الوناس قالو :
أنا موافق بس الكلمة الاخيرة عند أخونا الكبير حاج طه .. اللمشي أنادي ..

* العجيبة يا فاطني حاج طه كان راجلا صعب بلحيل خاسة في مواضيع الزواج دي لكن حكمة الله من شاف ود جلاس و إتكلم معاهو وافق طوالي .. ياهو النصيب . ول شنو آ فاطني ؟
* أيي آعمر ربنا قال لها كوني .. أنا الليلي دار اقول لك حكايات جديدي ما قلتها ليك قبل دا ..السبب الخلاني أفكر فيك و أريدك هو كلام أمي الله يرحمه كلما يجبوا سيرتك تقول عمر ولد السرور عمر زين الجنيات لا حدهم ..بقيت أجي جاري وكت أخواتك يقعدن لغسيل الهدوم و أقولهن أدني هدوم عمراللغسلن انا ... يضحكن و يدني ياها .... و وكت سافرت بورسودان لعرس ود عمك إسبوعين ماشفتك الدنيي دي مسخت عندي .. يوم كدي أختك كوركت لي بالطاقة وقالت لي عمر جا .. كت قاع أسقي في الغنم... أقول كدي أطفر من الزريبي وأجري عليكم.. لاقتني أمي عند الباب قالت لي جاري كدي وين.. كلمتها ..قالت لي تعالي آلغبياني ..أول شي أمشي غسلي كرعيك ديل و دهني شعرك دا و ألبسي جلابيتك الجديدي .. و أبقي فالحي .. إنتي أسمح من البنات الجرن ديل كلهن .

* نان ما تقولي آ فاطني اليوم الشفتك داك تقول في حياتي ماشفتك قلت متين البت دي بقت سمحي كدي ...و كت دار أحش التمر و أرجع بورسودان فيها بنات متل الصيد لكن الحمد لله لقيت الصيد البصح في ضهر حوشنا .. و من اليوم داك الدخلت فيني من تالاكي ما مرقت .

* و أقول لك سر كمان آعمر ... و كت أشوفك كت بفرح و كلما أسلم عليك أقول يا رب يا رب تجعله من نصيبي .

* عشان كدا ما قدرت أفرفر البنات كلهن بقنلي مساخ .. وكت ألقاكن متلمات ضمه مابشوف غيرك ..

* يعلم الله لا يوم الليلي وكت أشوفك أفرح و قلبي يرقد في بكانه .

* ليكي حق تزعلي وكت أمك أحمتك تجي عندنا بعد طلبنا يدك .

* أي و الله زعلت لامن سويت النذر الكلمتك بيهو أول البارح .

* أيي كان نذرا عجيب بلحيل .. من الحريم دخلنك يوم العرس بلا شبيتي لي في رقبتي بيديك الاتنين و بقيتي تتنخجي ..

* و الله يا عمر نفسي أعمل النذر داك تاني .. هسه مافات شي قوم لاحيلك العوضه ياها دي مابعيدي ياها ذاته ماتغيرت .

* سمح بلحقك .. عندك المحن آ فاطني بت علي .

* العراقي خلو قبلو .. شايلو وين إنت ماشي تصلي .....ههههههههههههههياي .

[اشجان]

اريتها ثرثرة السرور يا الخزين .. امانة نضميك مو سمح
اها دي قعدة .. ومن فجتي ماني زاحة

احكي اااا الخزين احكي

[الخزين ود نصر]

مشكورة على المرور و رفع المعنويات يا خيتي أشجان .. الله يجبر بخاطرك يا طيبة .

[خالد البدوي بابكر]

آآآآآآآآآآآآآآآآآآآآآآآآآآآآآآآآآآآآآآآآخ خ خ خ خ خ خ خ خ خ خ خ
يا الخزيييييييييييييييييييييييييييييييييييييييييييييي يييييييييييييييييييييييييييييين
يا خي انا الليلي اول يوم اشوف الكلام ده
كان يا اخي تديني تلفون.. والله زعلان منك..
تكتب الابداع ده كلو وانا ماجايب خبر..
قريتو كولو في فد قعده ....
رهيييييييب رهيب
لا تقول لي خالد البدوي ولاتقول لي قريبنا بتاع المغرب داك.. ولا ود عمي قشريا..
دا إنت فتّ الورا والقدام..

[الخزين ود نصر]

خالد ود البدوي عندنا .. زارتنا البركة و الفال الزين ...

يا خوي قول بسم الله لاتكبر لي راسي دي أول قصة أكتبه في حياتي و ماني عارف أتمها كيف ..
لكن عارف الحنية بتعجبك يا حنييين إنت . الله يجبر بخاطرك يا زين يا لون منقة :d.

حللللوة لون المنقا دي... ما زي قميصك..
لكن بالجد ما بهظر أنت قصّاص ماهر..
ليتك تستمر وتكتب بالفصحى المخلوطة بالدارجي الفصيح وسيولد طيباً صالحاً جديداً..

[الخزين ود نصر]

* أها سوق التلاته الليلي كيفن معاك آ عمر ؟

* تبارك الله آ فاطني متل اليوم دا زمن ما جاني ماشاء الله شريت و بع يبقى عشرة خرفان أمسك دا و أطلق داك من أصبحت .

* أيي دي بشارة الخير و الفال السمح .. الليلي جونا أهلك ناس جلاس الحاجي آسيا بت ود جلاس و بنيته السغيري ندى .

* يا سلالالام زمن ما تلاقينا مع الاغتراب الفرق الناس دا ... بلا تسمعبهم جوا و فاتو .. مالكم ما مسكتوهم باتو معانا و ضبحنالم .

* جابن راجل بتها الكبيري .. وقالو لازم يرجعوا عازمنلهم ضيوف عشي .

* أسمع اللحدسك .. يا سيدي .. جات معاها بنيته السغيري ندى ..ما بتتطرا الشافعي البيضا السميحي ديك ؟

* أيي طاريها ..

* أها تبارك الله كبرت و يا سماحت الدنيي عليها .. من جات دخلت مع سعاد يسون في الشربات و الغدي و يتونسن و يضحكن تقول أصله قاعدي معانا . إنت في دا ول كلامه الطاعم .. صايدالي : يا ماما فاطمة .. و كمان سلامه .... أماني مو حنيين تقول لك : الله يطول عمرك .. يخليك يارب .

* و الله يا فاطني عجبك قليل لكن يبقالي البنية دي قلبك إتفتح لها ..

* إنت ماسمعت شي أصبر لي ..مسكتها من إيده و قلتله أقعدي هني من جيتي داخلي و مارقي مع سعاد ما تونسنا معاكي .. قالت لي حاضر يا ماما فاطمة .. قلتله أول شي الجلابيي السودي دي ما قاع أريده الرسول تمرقيها مالك متخمخمي كدي في الحر دا ... بلا قالت كدي مرقته و كانت لابسه تحته فستان أصفر يلصف مع سلسل الضهب ... و الوشي يقول لقمر اربعطاشر شن بتعرف .

* يا الحاجي إستغفر الله لا توصفي لي البت كدي .

* الرسول تخليني الاتفشى ... أها و كتين طلقت الشعر و جا متخرت لانص ضهرا .. قلت عيني باردي عيني باردي و جريت جبتلي توب من تياب سعاد و قلتله إتغتي يا بنيتي ما تجي فلانه باقي عينه حارة نسعل الله السلامي ..و الشافعي تسكت تضحك في كلامي ....

* هاهاهاهاااي يبقالي طريتي حليمي ..

* أصبر أصبر و قالت لي كمان شنو يا ربي؟؟؟ أيي أيي قالت وهي تضحك من كلامي : و الله ماما فاطمة دي لذيذة خلاس .

* و الله آ عمر ندهت الله و ما خليتلي فقيرا ما ندهته تبقى من نصيب حسن وليدي

* عرفتك آ فاطني بعد الشكر و العجب دا كلو بتختميها بحسن ..

* أيي صدق آبو حسن و باكر من الصباح سعاد تجيب لي كرت أضرب لحسن و أكلمو ... سبحان الله الاسبوع الفات كلمني و قال لي : و الله يمه البت البتعجبك كان وآفقت أعرسه طوالي ..

* أهااا قال لك كان وآفقت وهي لا شافته لا شافه ....

* لالا أصبر ما كلمتك .. قالو شافو حسن السني الفاتت في جده وكت جو حضرو عرس ود عمهم هناك ... و شكرو حسن و قالو وصلن المطار وكت بقوا راجعين الرياض ... هو حسن في متلو الصله علي النبي . و أنا أسوي معاها في الهظار و أقولها : حسن ولدي مالو ما كلمني في نفس اليوم الشافك فيو و وصف لي سماحتك دي ....كت وقف في نص الحوش دا و زغرت .... و الشافعي تقول كدي تنفقع بالضحك .

* ماني دايرك آ فاطني تستعجلي يقوم حسن يوافق و البت يكون عندها رايا تاني .

* سلام يابا .... كيف قيلت في السوق الليلي .

* حباب سعاد .. نحمد الله في خير ....تعالي آبتي سامعي كلام أمك دا ؟

* أيي سامعه آ يابا ....و البت ما عندها رايا تاني و أدتني رقم تلفونه و راجي أخبار حسن .

[اشجان]

حسن يا حسن السرور يا ود ليلة القدُر
ان شاءالله عمرك يطول متل مجاري البحور
;)
اريتني كان بعرف انزل اغاني كان نزلت ليكم فال البنية السموها ندى على حسن ود فاطنة :)

[الخزين ود نصر]

أي و الله ما قصرتي يا أشجان .... يا ذوق و حنان ..
اليجي عوض جلاس ينزل لنا غنوة جناي البريدو ..
ربنا يتمو على خير .

[عوض جلاس]

http://www.sudanyat.org/upload/uploads/sbbbbbbbad.mp3

[خالد البدوي بابكر]

اسمح لي أبدي إعجابي بقلمك وتميزك وأسلوبك الراقي وتألقك
واصل يعطيك العافية

[الخزين ود نصر]

اقتباس:
المشاركة الأصلية كتبت بواسطة خالد البدوي بابكر http://www.albrkal.com/vb/images/styles/greendeluxe/buttons/viewpost.gif (http://www.albrkal.com/vb/showthread.php?p=280201#post280201)
اسمح لي أبدي إعجابي بقلمك وتميزك وأسلوبك الراقي وتألقك
واصل يعطيك العافية

و الله يا خالد أخوي كفاي كلامك الحلو دا ... في ناس كت راجيهم يدوني دفرة علا ما مشكلة إنت القاص الوحيد البعترفلو
مشكور جزيلا

[زكريا بابكر عمر]

والله يا جماعه الخزين ده حاسد جنس حسادي :d:d إنته النضم الطاعم ده من زمان حارمنا منو مالك :confused:... يا أخي ده سناريو لمسلسل جاااهز ... والله يا الخزين إنته تملك موهبه ما عاديه بس براك دافنه ... واصل في هذا الإتجاه بالجد تجيده وتتقنه ..خلينا نستمتع معاك يا أخي ...تحياتي ,,,,

[الخزين ود نصر]

هسعيتي أمانتن في ضمتك آ زكريي أطعم من كلامك دا في .... كان عارف كدي كان أووولي كتبت ما خليت كتابي ... تصدق من زمن الثانوي العام كتبت لي منلوج و سويناهو في الجمعيه الادبية تاني من الزمن داك ما كتبت شي إلا هني في البركل .

غايتو كبرت لي راسي المتل.......عملاتك :d...

[خالد البدوي بابكر]

اقتباس:
المشاركة الأصلية كتبت بواسطة الخزين ود نصر http://albrkal.com/vb/images/styles/greendeluxe/buttons/viewpost.gif (http://albrkal.com/vb/showthread.php?p=280475#post280475)
هسعيتي أمانتن في ضمتك آ زكريي أطعم من كلامك دا في .... كان عارف كدي كان أووولي كتبت ما خليت كتابي ... تصدق من زمن الثانوي العام كتبت لي منلوج و سويناهو في الجمعيه الادبية تاني من الزمن داك ما كتبت شي إلا هني في البركل .

غايتو كبرت لي راسي المتل.......عملاتك :d...

تصدق يا ود نصر أنا زاااتي العامل فيها أديب وبتاع فصص دا.. من المدرسة الثانوية ما كتبت تاني إلا في البركل..
ألا رحم الله خالد الحاج

[الخزين ود نصر]

* ما دام كدي يا خلودي النسكت نكتب .

* ألووو

* هلا يمة و الله مشتاق لك يمه كيف أحوالك و كيف صحتك .

* نحمد الله يا وليدي طيبي . إنت كيف حالك أريتك طويب ومافي شي موجعك بركة إلهي و سيدي .

* الحمد لله أنا تمام .. أبوي كيفنو ..

* طيب يغريك السلام ... الليلي ضرب مخسوس دايري أفرحك ... لقيت لك العروس آ حسن لقيته ليك آ وليدي ... أماني بنيتن كيف سميحي و عديلي و زينة البنات لاحدهن ..

* أبشري آ يمه البيجي منك كلو سمح ..

* هاك سعاد التكلمك بيها .....
أمسكي آسعاد غلبني النضم .. دموعي جرن الولد دا قاطع قلبي ربنا يعدل ختوتو ..

* سلام يا حسن .

* الله يسلمك يا سعاد كيف أحوالكم و كيف مهند ..

* كلنا تمام الحمد لله ... يا سيدي البنية إنت بتعرفه وهي بتعرفك .. بت حاجه آسيا بت ود جلاس ... ندى .

* لكن ندي ما قالو مخطوبه ..

* كان مخطوبه لكن القسمه ما تمت ... الاهل الكبار إختلفو .. و الولد البشوفه كلها يقول بس ياها دي .

* بالله شوفي الزول دا كان عاوز يضيع علي ندى ..

* يعني موافق ؟

* موافق الشوية دي بس هي راضية ؟

* ماله ما بترضي ... و الله يا حسن تواضعك الشديد دا يغيظ .. مع إنك عارف البنات كلهم يتمنن كلمة منك ..

* معذور ... عارفه الدخلته فيني صاحبتك زمان ..
عليك الله يا سعاد خليها تعمل لي مس كول عشان إتاكد و إطمن .
* سمح .. تلفونه آخرو 455

* هاك أمك ياها دي جرت نفسه شويي من الفرحه ..

* بالعديل و الزين يا وليدي ربنا يتم لك و يحضرنا عرسك .. أها جاي متين ؟

* باكر بعد باكر بكلمك يمه .

* أها في أمان الله ورسوله ربنا يغتيك بركة سيدي الحسن .

* تسلمي يمه سلمي على ابوي .

[زكريا بابكر عمر]

متابعيييين ومستمتعيييين ... يلا ألكع ألكع :d:d:d

[عوض جلاس]

يلا ألكمع زي ما قال زكريي
لكن شايف غنوتي الجبتها ليك ما جابت حق مريسة الخادم
كدي اللمشي عليها أحذفها :d

[الخزين ود نصر]

و الله يا عوض أخوي الغنية أبت تفتح معاي عشان كدي قلت يبقى أصله ما نزلت . .. دحين نزله لينا من اليوتيوب .

[الخزين ود نصر]

أطلق عليه أصحابه و معارفه في جده لقب الوجيه حسن وقد تبعه هذا اللقب الى القصيم حيث سبقه بعض زملاء العمل إليها ..فهو شاب صبوح الوجه أنيق الهندام و لا تجده إلا كذلك حتى لو وجدته في المطبخ يعد وجبة العشاء للعذابة عندما يكون عليه الميز .. لا تفارقه الابتسامة و التعليقات التموت من الضحك .. و بما أنه حريف وست و أربعطاشر فالكل يريد مزاملته .. في صباح تلك الجمعة كان جميع من بالسكن يعلم أن حسن يتوقع مس كولا من أرض النخيل و الحنان البصح ..

ورن هاتف حسن في المساء :

* ألوو مرحبا .

* الفي الطربيزة منو يا وجيه ؟

* هلا هلا مستر شفقة إنت طوالي مستعجل كدا .. سيادتك الوست مدور .. و أنا مع جعفر ... و أبو السيد و عوض جلاس مميلين الطربيزة .

* ما تخاف بنجي نستعدله ليكم .. معاي ضمرة بس عشره دقايق نوصل النسوان ديل البيت و نجيكم .

_ و كالمعتاد ألف الوجيه حسن أرجوزة للمس كول المتوقع .. وصار العذابة يرددون معه بلحن صاخب :

أنا جاني مس كول

ما بكلم زول

عرفتو الفي بالي وحات الرسول

جاااني مسكول


_ و عندما أتت المطربه جدية البطانة كانت لها مع فرقتها قعدة خاصة من العذابة حيث أسمعها الوجيه حسن بصوته العذب مع أصحابه أرجوزة عاين لي بحنيا بلحنها و صخبها :

عاين لي بحنيا

و قام سلم عليا

وكت إيدو جات في إيديا ..... كهربتو وصلت ليا

الريد بقى لي بليا ...... يا ناس خلوهو ليا قبل أعمل جنيا

ووووووب ووبين عليا


ما أن إنتهى من الغنوة حتى ترورقت عيون جدية و هي نتظر الى ذلك الشاب الوسيم الضحوك في إندهاش لم ندر ما سببه .... و فجاءة خصته بسلام حار و حنين ... حسده عليه صديقه زكريا قائلا : إن شاء الله ما تنفعك يا حسن .
و بعد أيام إنتشرت الاغنية في السودان وقد زادت عليها جدية البطانة : الشايقي عاين ليا .... الجعلي عاين ليا ..... غرباوي عاين ليا ..... فزادت جماهيريتها و زاد وزنها و عكشها .

* هلا مرحب بمستر شفقة ود حلال جيت في وكتك أمسك الورق دا جاني مس كول .

_ يسرع حسن الى غرفته حافيا و قد تسللت حبيبات عرق يتلألأ الى جبينه الوضاح .

* ألوو سلام .

* تسلم يا رب .

* أكيد ندي .

* أيوه .

* أخخخخ يا ندى الكلام طار مني و قلبي ذاتو طار .

* يسلم قلبك الكلام هين .

* المس كول معناهو يعني ... يعني إنتي ..

* أيوه معناهو يعني يعني أنا .

* طيب أنا هسه أسوي شنو أزغرد .. أبشر .. أنطط .. ول شنو ؟

* ههههههههههههههههه ضحكتني لكن . بالله دا كلو يطلع منك .. و لمن جيناكم في جده عامل لي فيها الود تقيل . و عديت الوكت كلو كلام في السياسة مع أبوي لمن لاقيناك . و قدر ما أعاين ليك يوم العرس عامل فيها مولانا ؟

* دا أنا غلبان و مسكين يا ندى و ما بقدر على الكلام إلا في السياسة .

* لا لا يا سيدي أوراقك مكشوفه عندي .

* كيف الكلام دا يا ندى .

* بت عمي المعاكم في جدة بتكلمني عنك طوالي ... و إنك دنجوان سودانيين جدة بغير منازع .. و أنا جيت جدة للعرس مخصوص عشانك .

* المهم أنا ما بفهم سريع قولي لي بصراحة و على بلاطة .

* يا سيدي موافقة ... موااافقة .

* لكن يا ندى دي ما ليلة القدر جاتني في شعبان .

* هههههههههههه و الله إنت ...

* أنا شنو ؟

* ما بقدر أقول ليك هسه ... لقدام .

* أنا الليلة البنومني شنو يا ندي ... مالك علي يا ندى .. أنا ما قدر دا .

* هههههههههه أخليك على كدا نوم العافية يا سيدي .

* خلاس بكره بدق ليك زي الوكت دا .. و نخت النقط على الحروف .

* سمح .

_ و نواصل .

[حسن العليش]

أطلق عليه أصحابه و معارفه في جده لقب الوجيه حسن وقد تبعه هذا اللقب الى القصيم حيث سبقه بعض زملاء العمل إليها ..فهو شاب صبوح الوجه أنيق الهندام و لا تجده إلا كذلك حتى لو وجدته في المطبخ يعد وجبة العشاء للعذابة عندما يكون عليه الميز .. لا تفارقه الابتسامة و التعليقات التموت من الضحك .. و بما أنه حريف وست و أربعطاشر فالكل يريد مزاملته .. في صباح تلك الجمعة كان جميع من بالسكن يعلم أن حسن يتوقع مس كولا من أرض النخيل و الحنان البصح ..
ورن هاتف حسن في المساء :
* ألوو مرحبا .
* الفي الطربيزة منو يا وجيه ؟
* هلا هلا مستر شفقة إنت طوالي مستعجل كدا .. سيادتك الوست مدور .. و أنا مع جعفر ... و أبو السيد و عوض جلاس مميلين الطربيزة .
* ما تخاف بنجي نستعدله ليكم .. معاي ضمرة بس عشره دقايق نوصل النسوان ديل البيت و نجيكم .
_ و كالمعتاد ألف الوجيه حسن أرجوزة للمس كول المتوقع .. وصار العذابة يرددون معه بلحن صاخب :
أنا جاني مس كول
ما بكلم زول
عرفتو الفي بالي وحات الرسول
جاااني مسكول


_ و عندما أتت المطربه جدية البطانة كانت لها مع فرقتها قعدة خاصة من العذابة حيث أسمعها الوجيه حسن بصوته العذب مع أصحابه أرجوزة عاين لي بحنيا بلحنها و صخبها :
عاين لي بحنيا
و قام سلم عليا
وكت إيدو جات في إيديا ..... كهربتو وصلت ليا
الريد بقى لي بليا ...... يا ناس خلوهو ليا قبل أعمل جنيا
ووووووب ووبين عليا


ما أن إنتهى من الغنوة حتى ترورقت عيون جدية و هي نتظر الى ذلك الشاب الوسيم الضحوك في إندهاش لم ندر ما سببه .... و فجاءة خصته بسلام حار و حنين ... حسده عليه صديقه زكريا قائلا : إن شاء الله ما تنفعك يا حسن .
و بعد أيام إنتشرت الاغنية في السودان وقد زادت عليها جدية البطانة : الشايقي عاين ليا .... الجعلي عاين ليا ..... غرباوي عاين ليا ..... فزادت جماهيريتها و زاد وزنها و عكشها .
* هلا مرحب بمستر شفقة ود حلال جيت في وكتك أمسك الورق دا جاني مس كول .
_ يسرع حسن الى غرفته حافيا و قد تسللت حبيبات عرق يتلألأ الى جبينه الوضاح .
* ألوو سلام .
* تسلم يا رب .
* أكيد ندي .
* أيوه .
* أخخخخ يا ندى الكلام طار مني و قلبي ذاتو طار .
* يسلم قلبك الكلام هين .
* المس كول معناهو يعني ... يعني إنتي ..
* أيوه معناهو يعني يعني أنا .
* طيب أنا هسه أسوي شنو أزغرد .. أبشر .. أنطط .. ول شنو ؟
* ههههههههههههههههه ضحكتني لكن . بالله دا كلو يطلع منك .. و لمن جيناكم في جده عامل لي فيها الود تقيل . و عديت الوكت كلو كلام في السياسة مع أبوي لمن لاقيناك . و قدر ما أعاين ليك يوم العرس عامل فيها مولانا ؟
* دا أنا غلبان و مسكين يا ندى و ما بقدر على الكلام إلا في السياسة .
* لا لا يا سيدي أوراقك مكشوفه عندي .
* كيف الكلام دا يا ندى .
* بت عمي المعاكم في جدة بتكلمني عنك طوالي ... و إنك دنجوان سودانيين جدة بغير منازع .. و أنا جيت جدة للعرس مخصوص عشانك .
* المهم أنا ما بفهم سريع قولي لي بصراحة و على بلاطة .
* يا سيدي موافقة ... موااافقة .
* لكن يا ندى دي ما ليلة القدر جاتني في شعبان .
* هههههههههههه و الله إنت ...
* أنا شنو ؟
* ما بقدر أقول ليك هسه ... لقدام .
* أنا الليلة البنومني شنو يا ندي ... مالك علي يا ندى .. أنا ما قدر دا .
* هههههههههه أخليك على كدا نوم العافية يا سيدي .
* خلاس بكره بدق ليك زي الوكت دا .. و نخت النقط على الحروف .
* سمح .
_ و نواصل .
[left]
[B]
سلام عليك يالخزين ود نصر
اول يوم الليلي ادخل علي الكلام السمح دا
وانا خايف لا ابقى خارتو صفق عشان ماني عارف الحديث بي قِصو ولِبانُو وخايف لاابقى راكب من المحطة الفاتت دابي
المهم ماكت قايلك شاب عشريني يالخزين ماشاء الله لايوم الليلي المنديل الاحمر مدخل في اللياقة والشعر مسرح لاورا والقُجِي قِدام
الدور لبستو تمام الواحد يقول بالصح المس كوووووول جاك
بالله يالخزين انت لا يوم الليلي جنس الامات والاخوات ديل فِي؟؟ ولا يوم الليلي جنس البت البرمكِيِي دي فِي؟؟
الله يتملك بالخير يالخزين ود نصر

[الخزين ود نصر]

حسن العليش هني ... يازول كيف حالك أريتك طيب صحي الحي يلاقي .. مالك إت ماك ظاهر ....
متل الامات ديل أيي لليلي في ربنا يحفضن .. بس خلالالاس فترن .. فشان كدي البركة قلت وكمان البنيي البرمكيي في ... أيي لاقيته هسه أول البارح دا يعلم الله جنس أدب و طيبة و سماحة تقطع القلب ... سلوك راسي ديل كلهن إنطقشن و حسيت بروحي دي ضايعي ... و المالقي متله ياخسارة عميرو في الزايلي دي ..
ترانا نجابد مع البطان السغار ديل مانا دايرين نصدق إنو عمرنا فات و غناينا مات وقاعدين نهجج مع نانسي عذاب و رزان الانقاذ بس الرطوبة ماها مداني راحتي ... أماني كت كيف هميم و عراض و ياما ركزت و إنجلد لامن دمومي إتخابتن يا حليلنا منها ..
لا تنقطع آخوي .

[حسن العليش]

حسن
ترانا نجابد مع البطان السغار ديل مانا دايرين نصدق إنو عمرنا فات و غناينا مات وقاعدين نهجج مع نانسي عذاب و رزان الانقاذ بس الرطوبة ماها مداني راحتي ... أماني كت كيف هميم و عراض و ياما ركزت و إنجلد لامن دمومي إتخابتن يا حليلنا منها ..
لا تنقطع آخوي .

العريس الخزين ود نصر سلام تاني
لانقوم نخرب عليك حبل افكارك ونمرقك من المجرى لكن عشان الرطوبة قعد تشيل نص مروة الراجل قت اوصيك بالعلاج دا
انا ماجربت عشان انا عندي "الحرارة" ما جاتني الرطوبة لا اسع لكن حدثوني الناس العندهن الرطوبة قالو عندهن ليها مُقلاع
قالو تجيب لك زيت سمسم مُرْ بِكِرْ تمَسِحبُو كرعيك وتعارِضْلَك عيدان طلحاً نجيض فو كانون لامِن النار تخُت فِيهِن وتملأ ايدك مويه تكشحة فوقِن تكتل النار وتصبر شوَيِي لامِن الدخان يَعِج وماتتعِب نفسك بس تدعك كِرعِيك بالزيت المُر و تلقي كِرعِيك قبل الكانون وتكبُت كِرعِيك وتَدِي الدُخان صَفِحْتَك وتَقَبِلْ غادي عشان الدخان مايدخل في عيونك ويدَمِعِن وماتقدر تقعد كتير وبعداك قالو بس تجيب زيت السمسم تلخبتو مع المُرْ الحِجازِي وتدق الشاي الحب تلخبتو معاهِن وتلبخ كرعيك وتلفهِن بي قشلين وللا دِلِق طرقِي قديم والله قالو بس الكمده بالرمدة
والله انا ما جربت الحكايي دي يالخزين لكن الكلام دا علي ذمة الناس القالو وجابو لي

[الخزين ود نصر]

يا خوي العليش الشي القتلو دا آبقدر أسوي لامن أشوفلي مرتن تاني هديي و رضيي و ضلعته قويي تسوي لي .. حليل جدي عم أبوي كان معرسن تلاتي وكت يقول جسمو موجعو من القراعي و مناتلت تور الحراتي بلا التلاتي حريم واحدي ماسكي الكرعين واحدي ماسكي الايدين واحدي تدعك في الضهر .. نان هو ويحيدتن تقدر تقيف بلا يقولها .. الله قادر آخوي .

[الخزين ود نصر]

* أسمعو الخبر الحلو دا يا جماعة : طبعا الوجيه حسن جانا من فرع جدة ما تم شهرين .. ماشاء الله تبارك الله .. اليوم أصدر الباب العالي سمو الشيخ هزاع القحطاني فرمانا بتعيين السيد / حسن عمر الحسن مديرا للتوزيع بزيادة 50% في الراتب .

* ماشاء الله بت الناس دي وشي خير عليك ياخي ..يلا يا جماعة عشرة وست سريعة كدا خلونا نمشي أهلنا من ضو ... السهر مضر بالصحة للمتزوجين .

* و الله إنت يا ضمرة فت مستر شفقة في رفع الراية .. ويا حسن من هسه لو متوقع تلفون ما تدخل الملعب .. أول أمس أديت ورقك لمستر شفقة قام عمل حريف قص قبل دورو يجي ضيع علينا الاسنا .

* و إنت إتعلمتها وين يا جعفر من كريمي ولا تنقاسي نحنا لمن لعبناها في الموردة و حديقة الريفيرا إنت كنت ما عارف الوست دا تمر ولا دوم .

* ههههههههههها هههاي الكلام حرقو ... معليش بس خلي الشفقة الكتيري .. و نزل الراية شويي .. يلا يا جماعة ربعوها .. و إنت يا عوض جلاس خليك مع الحلة ما تحرق متل يومك داك .. إلا قرضنا الرغيف .الوجيه العاشق الولهان خليك بعيد مع تلفوناتك .

* اوكي يا جعفر تلفون سريع و أجي راجع ألقاك طقطقت الجماعة ديل على الاقل يرجعو بدري بدري ما يشيلو حالنا كفانا نبيشي .

* أخير نحنا بنرجع بدري إنت بعدين ما حتجي كلو كلو ههههههاي .

- يدخل حسن غرفته بعيدا عن صخب الكتشينة .

* ألوو السلام عليكم .

* أهلين و سهلين و عليكم السلام .

* الليلة أنا محضر كلامي يا ندى و أعصابي رايقة و مبسوط ما حاسة نفسي هادي كيف ؟

* إن شاء الله دايما مبسوط و هادي .

* ما قلتي لي هسه و صلتي وين في القراية ؟

* يا سيدي أنا في السنة الاخيرة جامعة مروي تقنية معلومات ..يعني بعد أربعة شهور كدا بخلص و برجع الرياض مع أمي و الله مشتاقة لبابا شديد .

* لالا الشوق دا كان فتحتي بابو هسه ببكي ليك... بعدين الرياض وين تاني بعد الاربعة شهور تجي معاي الحجل بالرجل لبيتك في القصيم هنا .

* معقول بالسرعة دي ؟

* أربعة شهور و تقولي سرعة الظاهر عليك ما مشتاقة لي .

* لالا كيف ....بس فاجأتني .

* تصدقي أنا كنت ناوي بعد شهرين أشيل الشيلة و أمشي السودان و أنا و نصيبي قلت على الاقل أرضي أمي ما دام ندى خطبوها ..

* يعني كنت بتفكر فيني ... و شمار الخطوبة وصلك .

* أفكر فيك الشوية دي ... يعلم الله يا ندي يوم شفتك و كت جيتو لعرس ود عمكم في جدة ... جاني إحباط عديييل كده ...

* معقول أنا إتوقعتك تقول فرحت .

* فرح يا ندي لدرجة الاحباط و الخوف و حسيت بالضياع لاني شفتك بعيييدة ما بقدر أحصلك و الشبان كلهم بعاينو و بسألو منك .. ما عرفت ضحكاتك عشاني ولا بتضحكي على حالي و كبكبتي .. فقلت ألم باقي كرامتي و أسكت . كمان لما سألت بت عمك و قالت لي ندى خطبوها الدنيا دي مسخت عندي .

* ياخ ما عارفه الولد داك طلع لي من وين .. يوم كان عندهم مناسبة مشينا زرناهم ... من شافني تقول ما شاف بت قبل كدا .. وبقي يرسل لي في أخواتو . و يجيني الجامعة و يكتب لي في الشعر هو فعلا أستاذ محترم بس بس زي ما بقولو بكاااي شديد خطب قبل كدا مرتين .. المهم الناس أصرو علي و أقنعوني .. و أنا قلت أهو خطوبة لمن نفهمو كويس .... يا سيدي بعد شهرين كدا أمي سألت منو كويس و قالت لي دا ما بنفع نهائي ... و فرتكنا .

* كان كدا أمك دي خطرة و منها خوف .

* لالا ما تخاف و الله لمن سعاد أختك كلمتني و قالت لي كان موافقة أعملي ليهو مس كول و الله أمي فرحت فرح شديد .

* بس يا ندى في حاجة لازم تعرفيها من هسه .

- و نواصل .

[ام زينب]

تسلم يا الخزين الزين وخاصة انك بتسرد تفاصيل دقيقة وبترجع الناس لي زكريات حلوه ( والله زكرتني ايامنا كانت الظروف مشابة ) :):):)
انتظار وترقب الى ان تما الموضوع باقيلي المغتربين ديل كلهن ياهو حالم .
وااااااااصل الشمار كتلنا لكن بس ما تحبطنا ويقول ليها كلام يكسر خاطرنا وخاطر البنية .

[الخزين ود نصر]

- نواصل :

* زي ما عارفة يا ندى إنو أنا الولد الوحيد عند أمي و أبوي .. يعني لو يوم شعرت إنهم محتاجين لي أرجع نهائي برجع طوالي حتى لو هنا بلقى الملايين .

* بس كدا ..... ياخي قطعت قلبي ...دي حاجة بسيطة أنا ذاتي ما بحب الغربة و محل ما تمشي أنا معاك .. كمان كلامك دا رفع مكانتك عندي زيادة .. هو كان قلبك ما على أمك و أبوك حيكون على منو تاني .

* يا سلالالام و الله يا ندى إنتي كتيرة علي .

* ولا كتيرة و لا شي أوع تكون عاوز تزوغ من هسه ههههههههههههه .

* إنتي قايلاني حأقول شنو خلاكي خفتي كدا ..

* ما عارفه لكن تصرفات أغلب الرجال عموما غريبة .. و خفت تنقص لي فرحتي بيك .. يعني تتحكم فيني شديد ألبسي كدا و ما تلبسي كدا أمشي لديل و ما تمشي لديل و بتضحكي مع دا كدا ليه ... زي ما حاصل مع أختي .

* لا لا أنا العقد دي ما عندي ... يا ستي أنا من يوم إقتنعت بيك تكوني زوجتي معناها وآثق فيك بلا حدود ... ألبسي زي ما عاوزه و أمشي محل ما دايرة إنتي البتحكمي نفسك . ما عشاني أنا بس عشان دينك و نفسك و أهلك كمان .

* و الله عارفاك شاطر و واعي لكن ما قايلاك قدر دا هههههههههههههه أعفى لي . كان كدا الاربعة شهور كتييرة و الله يا حسن .

* الله الله أول مرة أسمع إسمي بالحلاوة و الموسيقى دي ... عليك الله قولي تاني ..

* ههههههههههههههههه ما تخجلني يا .. حسن .

* برضو يا ندى في حاجة ما كلمتك بيها .

* تاني يا حسن أنا خفت .

* عاوز أقول ليك قبيل إتصلت على أبوك في الرياض و سلمت عليهو .. ما كنت عارف أبدأ الموضوع من وين .. لكن هو طلع تفتيحة و ظريف .. طوالي قال لي مبروك يا حسن على خطوبة بتنا الامورة ندى .. دربك أخدر يا ولدي ..
بالله شوفي الذوق و الطيبة دي كيف .

* طبعا نحنا كلمنا بابا قبل أكلمك أول أمس .. و الله شكرك و قال دا ولد تمام و أهلو طيبين ... خلاص أوع تقول في حاجة تانية نسيت ما أقوله ..

* في كلمة وآحدة بس نفسي أقوله ليك و ما قادر .

* عرفتها قوله لي بكرة .. أوع تنسى .. يلا بااااااي .

* تسلمي .

[الخزين ود نصر]

- في مرورها الصباحي قابلت شامة و التي تلقب بشامة شمارات قابلت نادية بت أمونة قرب بيتها .

* كيف حالك آنادية أريتك طيبي .

* حباب شامة تعالي لاجوة أشربي لك شاي .

* مره تاني هسع ماشي على فاطني بت علي نحضر معاها الكرامة مسواها غدي في الخلوة . تبارك الله عيني باردي الدخان شايك فيكي بلا الجداد المحمر .

* مافي زولن جابلي وجع الكرعين غيرك آشامة .

* براكي جبتي الوجع لرقبتك علا ما مغربت لفحتي شملتك و ولعتي حفرتك . ما قاع يسوا يوماتي كدي .. أصبري لي بجي يوم أوصيكي يا بنيتي .

* يجازي محنك آ شامة خلاس باكر تعالي أفطري معاي يوسف من الصباح شايل كريمي . النبي آ خالتي شامة لا تزعلي مني أنا صاحبة ستنا بتك .. الرسول هي كيف حاله .

* طيبي الحمد لله قاعدي بعافته مع راجله و بناته في بورسودان . خلاس ما دام قلتي صاحبة ستنا بجيك باكر .


* ألوو

* هلا سعاد يا وش الهنا و السعادة .

* حباب حسن دا لون جديد كتر لينا منو ربنا يسعدك و يهنيك على طول .

* أول شي أديني أمي أكلمه بالاخبار الحلوة .

* طبعا أنا كل الاخبار معاي أول باول من جامعة مروي هههههههههه و الله البت فرحاناله فرحة .

* عليك الله قالت ليك شنو ؟

* لا لا دي أسرار و كلام بنات .. مش قلت عاوز أمك أول شي هاك ياها دي .

* كيف حالك يا وليدي أريتك طويب .

* الحمد لله بخير و في أمان الله .

* دايما طيب رجيت الله و رسولو .. الليلي ضابحين كرامة لله للقبول و الفال الزين .. يجيبك طيب و نفرح بك .

* بأذن الله بعد أربعة شهور جاي للعرس .

* تبارك الله تبارك الله يا سعاد هاكي التلفون دا .. حالفي أزغرد وكت أسمع الكلام دا .. أييوووي أيووووييي .. تتعدل عليك يا وليدي شقيش ما تقبل .

* بالله كيف يا سعاد أحوالك .

* الحمد لله .. كلم فلان داك الما جايب خبر .. خلي يتلحلح يجي معاك على الاقل يقعد شويه مع ولدو .

* حلوه مع ولدو دي ههههههه .... إطمني بجيبو ليك في إيدي .. يلا مع السلامة عندي تلفون تاني .

[جعفر مصطفى جعفر]

يا بوووووووووووووووووووووووووووووي دا في عاااااالم تاني بي جااااااي

يا حليلي أنا القايل مافي شي غير المنتدى العام والرياضي والاجتماعي والسياسي..

أول مره أجي بي جاااااااي

والله عظمة وجمال يا صاحبي...

كلام عسل وسرد جميل ومع حسن وندى يا خوي سااااااااحت عواطفنا..

الوقت تأخر لكن بالتأكيد سنكون حضوراً لو شاء ‘رادة المولى عز وجل..

دنتا طلعت مصييييييييييييبه يا الخزين:d:d:d

[ام زينب]

- نواصل :

* زي ما عارفة يا ندى إنو أنا الولد الوحيد عند أمي و أبوي .. يعني لو يوم شعرت إنهم محتاجين لي أرجع نهائي برجع طوالي حتى لو هنا بلقى الملايين .

* بس كدا ..... ياخي قطعت قلبي ...دي حاجة بسيطة أنا ذاتي ما بحب الغربة و محل ما تمشي أنا معاك .. كمان كلامك دا رفع مكانتك عندي زيادة .. هو كان قلبك ما على أمك و أبوك حيكون على منو تاني .

* يا سلالالام و الله يا ندى إنتي كتيرة علي .

* ولا كتيرة و لا شي أوع تكون عاوز تزوغ من هسه ههههههههههههه .

* إنتي قايلاني حأقول شنو خلاكي خفتي كدا ..

* ما عارفه لكن تصرفات أغلب الرجال عموما غريبة .. و خفت تنقص لي فرحتي بيك .. يعني تتحكم فيني شديد ألبسي كدا و ما تلبسي كدا أمشي لديل و ما تمشي لديل و بتضحكي مع دا كدا ليه ... زي ما حاصل مع أختي .

* لا لا أنا العقد دي ما عندي ... يا ستي أنا من يوم إقتنعت بيك تكوني زوجتي معناها وآثق فيك بلا حدود ... ألبسي زي ما عاوزه و أمشي محل ما دايرة إنتي البتحكمي نفسك . ما عشاني أنا بس عشان دينك و نفسك و أهلك كمان .

* و الله عارفاك شاطر و واعي لكن ما قايلاك قدر دا هههههههههههههه أعفى لي . كان كدا الاربعة شهور كتييرة و الله يا حسن .

* الله الله أول مرة أسمع إسمي بالحلاوة و الموسيقى دي ... عليك الله قولي تاني ..

* ههههههههههههههههه ما تخجلني يا .. حسن .

* برضو يا ندى في حاجة ما كلمتك بيها .

* تاني يا حسن أنا خفت .

* عاوز أقول ليك قبيل إتصلت على أبوك في الرياض و سلمت عليهو .. ما كنت عارف أبدأ الموضوع من وين .. لكن هو طلع تفتيحة و ظريف .. طوالي قال لي مبروك يا حسن على خطوبة بتنا الامورة ندى .. دربك أخدر يا ولدي ..
بالله شوفي الذوق و الطيبة دي كيف .

* طبعا نحنا كلمنا بابا قبل أكلمك أول أمس .. و الله شكرك و قال دا ولد تمام و أهلو طيبين ... خلاص أوع تقول في حاجة تانية نسيت ما أقوله ..

* في كلمة وآحدة بس نفسي أقوله ليك و ما قادر .

* عرفتها قوله لي بكرة .. أوع تنسى .. يلا بااااااي .

* تسلمي .





ياخي يالخزين وقعتا قلبنا وقلب البنية أسع نحنا من امبارح راسنا دا يودي ويجيب

تشويق مشوق ودلالات وتعابير ليها وقعها في هذه الفترة التمهيدية ما قبل بداية الخطوات الرسمية .

[ام زينب]

- في مرورها الصباحي قابلت شامة و التي تلقب بشامة شمارات قابلت نادية بت أمونة قرب بيتها .

* كيف حالك آنادية أريتك طيبي .

* حباب شامة تعالي لاجوة أشربي لك شاي .

* مره تاني هسع ماشي على فاطني بت علي نحضر معاها الكرامة مسواها غدي في الخلوة . تبارك الله عيني باردي الدخان شايك فيكي بلا الجداد المحمر .

* مافي زولن جابلي وجع الكرعين غيرك آشامة .

* براكي جبتي الوجع لرقبتك علا ما مغربت لفحتي شملتك و ولعتي حفرتك . ما قاع يسوا يوماتي كدي .. أصبري لي بجي يوم أوصيكي يا بنيتي .

* يجازي محنك آ شامة خلاس باكر تعالي أفطري معاي يوسف من الصباح شايل كريمي . النبي آ خالتي شامة لا تزعلي مني أنا صاحبة ستنا بتك .. الرسول هي كيف حاله .

* طيبي الحمد لله قاعدي بعافته مع راجله و بناته في بورسودان . خلاس ما دام قلتي صاحبة ستنا بجيك باكر .


* ألوو

* هلا سعاد يا وش الهنا و السعادة .

* حباب حسن دا لون جديد كتر لينا منو ربنا يسعدك و يهنيك على طول .

* أول شي أديني أمي أكلمه بالاخبار الحلوة .

* طبعا أنا كل الاخبار معاي أول باول من جامعة مروي هههههههههه و الله البت فرحاناله فرحة .

* عليك الله قالت ليك شنو ؟

* لا لا دي أسرار و كلام بنات .. مش قلت عاوز أمك أول شي هاك ياها دي .

* كيف حالك يا وليدي أريتك طويب .

* الحمد لله بخير و في أمان الله .

* دايما طيب رجيت الله و رسولو .. الليلي ضابحين كرامة لله للقبول و الفال الزين .. يجيبك طيب و نفرح بك .

* بأذن الله بعد أربعة شهور جاي للعرس .

* تبارك الله تبارك الله يا سعاد هاكي التلفون دا .. حالفي أزغرد وكت أسمع الكلام دا .. أييوووي أيووووييي .. تتعدل عليك يا وليدي شقيش ما تقبل .

* بالله كيف يا سعاد أحوالك .

* الحمد لله .. كلم فلان داك الما جايب خبر .. خلي يتلحلح يجي معاك على الاقل يقعد شويه مع ولدو .

* حلوه مع ولدو دي ههههههه .... إطمني بجيبو ليك في إيدي .. يلا مع السلامة عندي تلفون تاني .


بعد دا تاني حليلي عليهو التلفونات ما إتقسمت ظهر ليهو درباً جديد .
الله يرحم والديك واصل وبي أجزاء أطول حتى لا تبتر إستمتاعنا بي القصة .

[الخزين ود نصر]

اقتباس:
المشاركة الأصلية كتبت بواسطة جعفر مصطفى جعفر http://www.albrkal.com/vb/images/styles/greendeluxe/buttons/viewpost.gif (http://www.albrkal.com/vb/showthread.php?p=282083#post282083)
يا بوووووووووووووووووووووووووووووي دا في عاااااالم تاني بي جااااااي

يا حليلي أنا القايل مافي شي غير المنتدى العام والرياضي والاجتماعي والسياسي..

أول مره أجي بي جاااااااي

والله عظمة وجمال يا صاحبي...

كلام عسل وسرد جميل ومع حسن وندى يا خوي سااااااااحت عواطفنا..

الوقت تأخر لكن بالتأكيد سنكون حضوراً لو شاء ‘رادة المولى عز وجل..

دنتا طلعت مصييييييييييييبه يا الخزين:d:d:d

و الله يا جعفر عارفك حريف كورة عشان كده لازم تكون حريف كتشينة و حاجات تانية ما بفسرة عشان كده لعبتك زميل مع الحريف الوجيه حسن عشان تطقطق لينا ناس عوض جلاس ديل:d
* أما ناس حسن و ندي يعلم الله كان ما ناس طالبان الهني ديل كان بدعت ... لكن خفت يجو يقولو لي كل بدعة ضلالة:confused:

[الخزين ود نصر]

اقتباس:
المشاركة الأصلية كتبت بواسطة ام زينب http://www.albrkal.com/vb/images/styles/greendeluxe/buttons/viewpost.gif (http://www.albrkal.com/vb/showthread.php?p=282111#post282111)
بعد دا تاني حليلي عليهو التلفونات ما إتقسمت ظهر ليهو درباً جديد .
الله يرحم والديك واصل وبي أجزاء أطول حتى لا تبتر إستمتاعنا بي القصة .

أمرك عزيزتي أم زينب الحلقة الجاية دي طويلة و فيها إختلاف عشان كمان نخلي حسن و ندي ياخدو راحتن شوية بعيد من عيون العوازل( ناس زكريا ):d:d

[الخزين ود نصر]

- لبت شامة دعوة نادية للفطور بعد مدة طويلة لم تزر فيها نادية أو أمها حيث كانت تعتبرهم ناسا مسيخين و رافعين نخرتن منذ أن رقد زوجها المستشفى قبل عام و لم يزرنه .

* أقعدي بهني آخالتي شامة المحل دا كيف بارد و سمح . اللجيب الفطور و أجيكي .. قراصة ببامية خدره مخسوس عشانك عارفاكي بتريديها .

* ما قصرتي يا بنيتي ... أها أقعدي بجنبي هني الناكل و أكلمك .

* سمح أها قولي و صاتك و كلامك كلو لا تنسي شي .

* يا بنيتي الظاهر عليكي إنتي و راجلك ماكن مقصرين و دايرين الجنا .

* أيي آ خالتي شاحدي الله ليل و نهار يديني بنيي ول وليد .

* نان مو كدي تعقلي كرعيكي لامن يغلبك المشي .

* ههههههه يجازي محنك آ خالتي شامة .. لالا و حات الله بس يوم كدي العنقريب إتكسر و إنتجيت على مخروقتي ...

* نان مي يا .... شن قلت لك ... الجنا دا بيجي بالمهلة و الروقة لا تجرو ورا شديد .

* عاد نسوي شنو آخالتي .

* أول شي راجلك قعدلو يجي خمس سنين مع مرتو اللولانيي ناظرة المدرسة و ما ولد منها .. و هي كان عندها ولدين من راجله المات في الديش ... لكن إستغفر الله يبقى هي كانت ماها دايري تاني جنا باقي كانت متفلهمي و تغياني . و إنتي هسع دي سنتك التاني .

* الرسول هو طلقه مالو آ خالتي شامة .

* إنتي ما سعلتي ؟

* لالا آبقدر بخافو يزعل .. من اليوم الاول قالي حياتي مع الناظرة لا تجيبيلي طريقه الفات مات .

* و الله يا بتي طوالي كانو متكاجرين و هي طول اليوم في المدرسة و و كت تجي البيت تلقاها تقري في شفعه و مرات تلقاها مدغمري ول تهرج معا .... فشان كدي دخلتي عليهن كانت قليلي . و في يوم سمعتو يقول لها أنا ماني تلميذ عندك لامن ترفعي حسك فوقي . هي بالصح كانت نافشي ريشه فشان هي ناظرة و هو تربال ساكت .... لكن يوسف عيني باردي قلبو حار ما بيسكت لها .. بعد طلقه بشهر كدي جاني و قال لي دايرك تشوفي لي بت حلال هديي و رضيي و مسيكيني ست بيت و حسبتلو تلاتي إنتي ماكي فيهن .

* ليه يا خالتي شامة .

* فشان أمك دي رافعي نخرته علي الحريم كلهن و ما جات شافت راجلي و كت كان راقد في الاستبالي ... قسما بالله مش كان بقت أخت نايب الوالي كان بقت أخت حسن البشير أنا ماني فاضي في واحد فيهن .
دحين يا بنيتي البتسوي فيو دا و كلام الفقرا دا ما بينفع .

* فقرا شنو آ خالتي شامة ؟

* مافي شيتن بيفوتني يا نادية يا بتي .. ما تتابعي أمك المطرطشة دي .. شايفاها قاع تمشي بيت ناس التكروري و كمان يوم ساقتك معاها .

* يعلم الله أنا مشيتلو فد مرة .

* مالك بتمشي ماكي عارفي يوسف كرهتو في الدنيا يشوف خلقة التكروري ؟

* هو بالصح مالو بيكرهو كدي ؟

* يبقى ما نسى حكاية التكروري الزمان مع بت رابحة بت الجزار .

* الرسول تقوليها لي .

* الزمن داك حريم كتار كانن يسوقن بناتن للتكروري يكتب لهن فشان يعرسوهن بسرع .. يوم كدي العصر دخلت عند ناس التكروري بلا أسمع لك الجوطة و حس بت كبيري تسرخ .. أصلو التكروري وكت يجي يكتب بيدخل وآحدي وآحدي .. أها الظاهر دخل البت .. بعد شويي البت بقت تسرخ يمه ألحقيني .. الام دفرت الباب و دخلت في الساعة ديك أنا جيت و دخلت معاها طوالي .. أشوف لك التكروري منبطح بالسروال بس .. و ماسك البت من رقبته بايديهو الاتنين و البت تذافت و تفرفر ... و الام تجر في التكروري ما قدرت غلبه .. مشت شالت المبخر بناره الملهلبي و قالت كدي كشحته في ضهر التكروري ... بلا نط و قام يكورك و يضغي و يتنفض و ينعل .. أها في الساعة ديك جا يوسف داخل و شايلو جريدي غليدي كدي .. و بقى يسعل في الحاصل شنو .. و كت شاف الام و التكروري يتناعلو و البت مطيري عيونه و جلابيته مشرطة .. قام نزل لك في التكروري ضرب .. عمري ماشفت يوسف هايج متل دا .. يضرب محل ما تجي في بطنو في راسو في ضهرو و الدموم ديل بقن يسون شووو ..الام ساقت بتها و جرن مرقن و أنا مرقت و إنضاريت ورا الباب و بقيت أعاين ... أها التكروري وكت الدنيا ضاقتبو إتمدد في الواطة و بقى يرفس و يشخر متل الخروف المضبوح .. أنا قلت خلاس كتلو ..
فشان كدي يا بنيتي أعملي حسابك .

* و الله يا خالتي فد يوم مشيت مع أمي و دخلنا العوضه سوا .. أمي قالتلو البت دي دايراك تعزم لها فشان تلقاله جنا .. و كمان شوف لها شي لمخروقته موجعاها .
أها أداني زيت و كب فيهو رماد من المبخر و قال لي إتمسحيبو قبل الحمام كل صباح . أها المرة التاني أمي مشتلو براها و قالتلو الزيت ما نفع الوجع .. قال لها خليها تجي أوريها تمسحو كيفن .. أها تاني ما مشيت .

* كان شافك يوسف داخلي هناك قبل يطلقك يكسر لك كريعاتك .

* وووووب علي يا خالتي جسمي بقي كلو يضرب .. أمسكيني عليكي .

* قولي بسم الله ربنا مرقك و ستر حالك .. بسم الله بسم الله يا حافض يا حافض .
بس يا بنيتي نصيحتي ليكي تسوقي راجلك و تمشوا الخرتوم تقابلو الدكتور .. متل شاديه بت زينب عرسوها سبعه سنين ما ولدو .. مشو الخرتوم للدكتور .. بعد رجعو شهرين تلاتي بلا حملت و ولدت التيمان ديل يا حلاتن . أمشي أسعليها من إسم الدكتور و العلوان .

* نان هم ما قالو مشولن لدكتور .

* أنا قت لك مافي شيتن بيفوتني .. إنتي كلميها برااحة بتحن عليك و بتكتب لك العلوان .

* الرسول آخالتي شامة تاكلي لامن نكمله سوا ..

* الرسول عزيز كفاي شبع و الله قراصتك كيف سمحي ... نعمي دايمي .
أها إتأخرت بعد دا ماشي ناس فاطني بت علي ... ودعتك الله ما تنسي كلام الخرتوم كلمي راجلك برااحة و حنسي و رضي ... خلي يحن عليكي أصلن الرجال ديل متل الشفع .

[ام زينب]

غايتو آمنتا بي إنو الشوايقة أكتر ناس مرتبطين بي الماضي والتراث وأكبر دليل المنتدى في جزء كبير مغتربين أو غادروا البلد من بدري ومع ذلك متشبعين بي ثقافة وتراث البلد في الحديث والتصرف والفن ‘ وقصتك فيها كمية من الصور والعادات تعكس صدق قولي ........
واصل ...........

[الخزين ود نصر]

صدقتي و الله يا أم زينب ... مع إني شايقي تايواني لكن إتحدي أي شايقي ضمة ما مرق من البلد في كلام و ثقافة أهلي .

تسلمي يا خيتي .

[زكريا بابكر عمر]

الله عليك يا الخزين .... أمتعتنا والله وخليتنا مشدودين معاك ...مسلسل جاهز ...قمة الإبداع والله ...يا أخي إنته طلعته مُصيبه كبييييري خلاس...واصل واصل متابعنك ...تحياتي ,,,,

[الخزين ود نصر]

عالم الله وشاهد يا ظكريا كان ماك قاع تجي مره مره تديني دفره كان ضمه زقلت الشي دي :d..

[الخزين ود نصر]

* معقول يا ندى أنا لساني إنطلق و بقيت أقول لك بحبك يجي عشرة مرات في المحادثة و إنتي مره وآحده تغلبك ... المهم وعد الحر دين عليه أمس قلتي بكره .. يلا سمعيني ..

* لكن أقولها ليك بطرقتي .

* بأي طريقة أنا راضي .

* خلاص ... ب ح ب ك .

* مع إنها برضو حلوة لكن أنا إتمقلبت قايلك حتقوليها لكن بطريقة برااحة ..

* ما عارفه بكون متشجعه أقول ليك أي شي لكن من تتصل بحس ببرد و مرات برجف كمان ... خاصة لمن تقول لي قوليها . مع إنو مع صاحباتي هنا أجرأ مني مافي .

* المهم أنا بستمتع لمن أقوله ليك ..

* بختي ... بس أوع بعد الزواج يحصل القالتو لي صاحبتي الاتزوجت السنه الفاتت .
* قالت ليك شنو ؟ غايتو مقدما كدا كلامه ما صاح ... لكن نسمع برضو .

* طبعا هي سافرت مع زوجها قطر ... أول أمس كنت بتونس معاها .. طبعا جرجرتني في الكلام لمن قلت ليها : أكيد كلمة بحبك بقى يقوله لي كتير .. فقالت لي دي أحلى ايام تسمعي فيها كلام حلو ... لانو بعدين كلمة بحبك ببح ...

* أنا مختلف طريقتي ما حتتغير .

* ألذ حاجة قالت أمس كان عيد ميلاده .. جيهت المناسبة ما خلت شمع و بخور و عطور و لبست كيف كيف حاجة خطيرة .. قام جاء من الدوام التاني فترااان و نعسان شديد ... كل القالو ليها كل سنه و إنتي طيبة ... قالت ليهو وأنا بحبك بحبك شديد ... قال ليها كويس .. و دخل نام .

* هسه كيف باقي إسبوعين إن شاء الله مستعدة للامتحان و أستقبال العريس .

* طبعا بالنسبة للامتحان أنا معروفة من أوائل الدفعة .. أما بالنسبة للاستقبال ,,

* لالا أقيفي إستقبال منو ؟

* يعني ما بتفوت أي حاجة .... إستقبال حبيبي ياخ ..

* يا سلالالام معقول ... فاجأتيني ما سمعتها كويس قوليها تاني ..

* بكره ... يلا بااااي

* تسلمي .

[ام زينب]

أيام جميلة والكلمات والأحداث بيكون ليها وقع خاص وهاله من الإهتمام .
ما تشحتفنا وتسل رويحتنا دي واااااااااااااااااااااااصل .

[الخزين ود نصر]

الله يفتح عليكي يا أم زينب ...أيي أنا أصلي كان ما شكروني و أدوني دفرة ما بتشدع و أكتب .. أها نواصل :


* و الله يا فاطني بت علي ما برتاح في الزايلي دي علا لامن أجي آخد لي قعدة معاكي يعلم الله في بيتي آبرتاح كدي .

* حتى انا آ شامة يعلم الله بريدك و بريد جيتك... هو نحن سوا من الليلي ول البارح ... مي من زمن شفع نلعب في الصج و ننضم في سبح الدفيق .. آبتطري السبح الدقانا بيهن أبوكي وكت عرفنا خرتناهن من تمرو .؟

* أيي آ فاطني و الله طاراهو متل التكنو البارح دا .

* الرسول آ شامة كيفنو حاج طه مع الرطوبة أريتو خيير شويي ..

* و الله آ فاطني الراجل دا ما عرفتو طلق ول جنا راسو عديل ... ترا يسكت يطنطن و قدر ما تقول تخفف عليهو يمسخ عليك الدنيي ... بعد أديتو فطر و شرب الشاي قتلو النكلم ود أخوك يقلب الموية في الشتل الفوق عطشان .. بنهرة قال لي : ما تتحشري في الكلام دا .. قومي من قبلي ضيقتي خلقي .

* وآ شريري آشامة معذور المرض دا أماني مو حار .. حاج طه طول زمنو تحت قعور التمر ينضف هني و يمورق هناك و يزرع و يقلع ... إنجيتي اللوصيكي كلميلو إخيتو مريم التحدثو أصلو في الدنيي دي ما قاع يريد غيره .

* سمح بكلمه صدقتي يعلم الله من مرض ما ضحك علا مع مريم . حكمتو بالغي .

* إنتي آشامة أكان ولدو جا مارضو مي كان ريحك شويي ..

* دا كان مناهو .. يعلم الله حاج طه الماشفت دمعتو علا في موت أمه .. الجمعة الفاتت نص الليل قام يبكي و دموعو يسون شووو .. قال لي طريت أحمد ولدي . قلت لو نرسلو .. قال لالا خلي ما نخرب علي .. هني ما بيرتاح . و كلامو صح آ فاطني .. الولد معرسلو مرتن غريبي من الخرتوم .. السني الفاتت و كت جونا قالت مويتنا فيها ريحتن كعبي و طعمه مر .. يا حليلو وليدي المسيكين مشى كريمي جاب لها صندوقين الآت ببسي . و كل ما تسمع القرقراب مع أبوه و معاي تنادي في العوضه : أحمد يا أحمد تعال دقيقة .... الله كريم ما تمولن سبوعين سافرو .. بعافتن .

* يا سعاد جيبيلي المنقد و عدت الجبنة اللسوي جبنة سيدي الحسن .. ولا تنسي غسلي لك تمرات جيبيهن .

* البارح كت عند نادية بت أمونه جات من الخرتوم .. و الله آفاطني أماني كيف طيبي من دخلت ما خلت لي شربات و شاي و بسكويت لامن مسكتها قعدتها فطن العنقريب .. الحمد لله الدكتور طمنه و أداها تلات أصناف من الدوي و الحبوب . أيي و الله تستاهل الخير .. ماها متل أمها البومة ديك .

* أمها أصله من قامت شافعي ياها طيارته دي آ شامة .. آبتطريها تطلبش مع البطان في البحر لامن عرفت العوم و كمان بقت تعدي للجزيري و تجي لابي شبكت السعدي في صفحته ...

* و الله آفاطني أصلك آبتنسي ... أيي طاراها جنس طيارتن و قهارتن تعميني في البنيات ... و كمان بعد الجلابيي التخيت فيها ليل و نهار آخر الزمن بقت تلبس توب و تمرق توب يعني يا الباشا أخوي .. يتخلخلن سنيناتك رجيت الله عليكي . و أخوها شن طعمه اول البارح يشوف فينا أنا و زينب و بخيتي وآقفات في درب الجمل شايلات إسبتالت كريمي .. بلا فووو ما لقينا منو غير العجاجي .. ياهو آخر الزمن أبوه لامن مات راكبلو حمارتن مطفوقه و عرجي .

[اشجان]

يا سلام ياخي

سرد غاية في الجمال والعذوبة .. تنوع يجبرك على المتابعة .. اصالة في التعابير تأخذك حيث للحنين طعم الوطن والجزور


واصل يا الخزين مي ياكا الخزين ;)

تسلم الانامل يا اخوي

[الخزين ود نصر]

مشكورة على رفع المعنويات أختي أشجان الله يجبر بخاطرك .

نواصل :

* هييي وآحايتي آ شامة .. أصبري لي ما قت لك ... اليومداك مشينا نعزي في بكي أحمد أفندي بلا أمونة جات داخلي مادي طراريمة .. وبقت تمنح وووووب علي يا ود أبوي وووووب علي يا زميل أخوي .

* هيي سب دبيته بالله .. زميل أخوي ؟ الذممة التلحقه الزينين ... يعني يا شغال متل أخوها في الحيكومة .. يحكموا عليها بالمعبد ... ما لقتني قاعدي اليومداك ... و شافت حريم الغرب مالات البكان كيفن آبتهرط و تخت .

* هيي المره سرك آخرابة إنتي كمان .

* ماها سري ولا بعرفه ... مع حاج طه عندها لحمتن بعيدي .. الله لا عرف خليقته . اللقوم بعد دا .. ماشي أدي حاج طه الدوي .

-- وفي منتصف الشارع الضيق المتعرج و الذي تعبدت نتؤآته الحجرية بروث الحمير و البهائم و صلت شامة قرب بيت نادية بت أمونة . فنادتها نادية :

* خالتي شامة تعالي داخلي شويي من الهجيري دي ..

* لا لا آبنيتي ماشي أدي عمك طه الدوي ... صلات النبي العرجة خلتك ..

* أيي الحمد لله .. أصلو الدكتور وكت شال الصوره قال في شق سغووير في الفخد و كتب لي دوا فتيلين و قبل أكمل الفتيل التاني الوجع راح ..

* أي الدكتور أخير ما تقولي لي فلانه سحرتني و فلان عاين لي .. و الخرابه المصيوب داك لا تجيبي طريقه .

* لالا تبت و حرمت .

* تاني يا بنيتي خلي خدمت الضيق و جيهي حالك و جيهي بكانك من بدري .. أصلن الرجال ديل في حالات كدي يبقالي و كت قسمو الصبر ما لحقن شيتن نعيم .

* هههههههههه الله يجازي محنك يا خالتي شامة .. صدقتي .

* أول زول تكلميني أنا و كت يحصل المراد .. أها فتك بعافي .

في نهاية ذلك الاسبوع و لم يتبق الكثير من الامتحانات النهائية كانت مناسبة لبعض الطالبات للترويح عن أنفسهن بالداخلية في غرفة ندي معلنات تباشير أفراحها . فكانت الضحكات و الزغاريد و كذلك الدليب كان حاضرا يدغدغ أحلام العذارى .

* ألوو ... ندى ؟

* إذيو حبيبي ..

* يا سلالام معقول ... متأكده إنتي ندى .... إنتي في حفلة ؟.. سامع زغاريد و ضحك .

* أيوه ديل صاحباتي عاملين لي حفلة في غرفتي ... و من الصباح بدربو فيني في الكلمة القلتها ليك دي...

-- يسمع من بعيد مجموعة فتيات ... ندى يا ندي قوليها ملحنه ... يلا وآحد إتنين تلاته :

* إذيوو حبيبييييييي و نوووووور عينييييي ... ههههههههه ههاي .

* يا سلام ياخي صاحباتك ديل ظريفات شديد .

* و أنا الاظرف ول شنو ؟

* إنتي كلامك براهو .. إنتي الاظرف و الاحلي و الاطعم .. إنتي عيوني .. إنتي ...

* كفاية كفاية خلي باقي لبعدين ما تكملو ... بعدين تقول لي كويس و تمشي تنوم ههههههههه هههاي ...... بحبك .
صاحباتي قالو ليك سلم على المعاك ..

* هنا معاي هسه هنود و بنغال .

* لالالا عبير قالت ليك سلم علي السودانيين الما متزوجين بس .

* يعني أبو منذر و أبو خالد و أبوعمر حقهم راح ؟

* خنساء قالت ليك أعمامنا ديل الفيهم مكفيهم ... هههههههه هههاي .

* كلميهم يجو معاك المطار طبعا عارفه المواعيد .. الاربعاء بعد المغرب .

* كيف كلهم جهزوا شنطن ماشات جلاس معاي بعد نستقبل سيادتك .

* جلاس بعيده .. تعالوا بيتو معانا ...

* هههههههههه هههاي يا ريت .... لكن هانت يا إنت ..

* يا شنو ؟

* يا حبي ........... يلا باااااااااااي

* تسلمي يا روحي .

[حسن العليش]

نواصل :قال نواصل قال
آيا الخزين سلام
آيا خرابا احميتنا الغمده
متعة الحكي والسرد والدبلجة والمنتاج
الحوار ووصف الدرب والله بالغت فيه
الشئ القتو دا بالغت في وصفو
لكن المحيرني يالخزين كلامك عن الداخليي والطالبات
آخرابا انت كت قعد تلبس توب حاجي شامة وتدخل علي البنات في الداخليي بي عمود كسري؟؟
يااخي حفلة البنات جننتها جن
وفعلا البنات والحريم ساعة الجو يكون جو عرس قعد يرفعن الكلفة في الكلام والمكياج والخجل والله من شدة ماقعد يطلقن الحكايي الواحدي لامِن تجئ تخوجل قِدام ابوها بي كلوشه ونفس الحال والمنظر يتكرر علي الحريم يوم العيد تجئ من العيد تلقى الحريم في حالا كُتر ورافعات الكلفه والخجل والبت تناضم الطير جنب اخوانا وعيونا كُحُلِن سِلَق سِلَق
فتك بي عافي

[الخزين ود نصر]

هيا حسن العليش أريتك طيب
مالك طولت علي ياخي .. عارف الكلام المتل دا قاع يعجبك .. و مخسوس سوينالك جبنة سيدي الحسن قلنا تجي تتبرك ...
يا ربي بهم و بآلهم عجل بالنصر و بالفرج .
آزول و الله كان عارف منظر بنات الداخليي دا بيعجبك أماني كت سرح فيو جنس سرحة :)...

[الخزين ود نصر]

* ألووو سعاد كيف الاحوال و كيف خالد و نسرين و الاهل

* نحمد الله طيبين

* خلاس حجزت أنا و حسن جايين يوم الاربحه .. أدوني إجازة إطرارية .

* كدا كويس و الله يا مصطفي كان قلت ماك جاي كان مسخت علي الحيا ذاته .. ياخي ما معقول إنت تميت سنه و عشره شهور .

* و الله بس حسن دا لو ماهو ضايق .. بس شهرين تلاته كان إشتريت لك الحباسات .

* تاني يا مصطفى قت لك ماني دايرالي قشرينات .

* خلاس ما تزعلي .. أصلو صاحبي عمر إشترى لمرتو ...

* ما تجيب لي طريق صاحبك دا ... نحنا مالنا علي ... خليك في حالك ..

* مالو حالي .. أحمد الله سايق لي عربية 14 لستك و بيدوني قريب ألفين ريال .
ناس كتار ماهن لاقنها .. و الهنود و البغال بيدوهم أقل من ألف .

* لكن يا مصطفى العندك هني هم ما عندهم .. أبوك بلا الطين الفوق عندو ربع جزيرة الفرحاب طالع نازل .. السني دي أداها ولاد حامد بالتزرعة ...جابو لو شوالين فول بس ... ييداك يهرج ... البارح كت عندهم قالي وكت مصطفى كان معاي بنجيب لنا أكتر من عشره شوالات فول . قت لو السني الاولى الحضرتها معاكم هني جبتولكم 12 شوال و كيلتين ... هم قايلني أنا يا الدايري السفر لكن كلمتهم بجرجيري ليك دا كلو فشان ترجع ..

* كمان تولعي في النيران حاسباهو حتى الكيلتين ما نسيتيهن . و الله يا سعاد أنا دا كلو عارفو لكن قلت نسويلنا بيوت في الخرتوم متل الناس ...مدير فرعنا هني في جده سوداني من عرب الجزيرة تماهن أربعه قطع في الخرتوم و 5 فدادين مزرعه في غرب أمدرمان .

* زراعه في غرب أمدرمان هو الجنب الخزان عطشان .. بعدين إنت مالك و مال الناس كل زول براسو يعرف خلاسو .. عندك قطعه في الاندلس خمسه سنين ما شفت محلها وين ...

* ديك درجة تالته ... ناس الحكومة الايام دي جو قالو القطعة في الوادي اللخدر بي خمسطاشر ألف ريال درجة أولي ..

* يا مصطفي الحصل لك شنو كنت فالح و نجيض تزرع مع ابوك قضيت معاك هني سنه واحده كانت أحلى سنه في حياتي .. يجي موسم البنضوره تلقانا نقطع في الصلصة و موسم البامية نقطع و ننشف تاني يجي البصل و الفول و العيش ريف لامن تاني يجينا التمر و تبارك الله تبيع و تشتري في الغنم ..

* الغريبة كل النسوان فرحانات برجالن المغتربين علا إنتي .. خلينا نضحي شويه عشان الولاد .

* قول نضحي بالولاد .. الولاد تربية مش قطع أراضي و فشخره في الفاضي .
المهم أنا كلمتك ... و أبوك قال عندو معاك كلام لامن تجي .. يعني بالواضح كدا كان عندك شي مهم ما تخلي وراك . يلا معاك سلامة البت صحت قامت تبكي عندها نزلة شديدة .

* سلامته أوع يكون عندها حمي ...كدا مسختي على الاغتراب .

[الخزين ود نصر]

* سلام ناس البيت خالتي شامة يا خالتي شامة ...

* مرحب حباب نادية و يوسف كيف حالكن الليلي زارنا سيدي الحسن ..

* كيف حالك يا خالتي و حال عمي طه أريتكم طيبين .

* نحمد الله يا يوسف يا ولدي عمك طه لاداخل .

* السلام عليكم عمي طه .. إنشاء الله في تحسن من الرطوبة .

* أحمد الله أحسن .. علا ياهو مرض الكبر يخف دا يجي دا نحمد الله .

* عربية جلال واقفي في أي وكت داير تمشي المستشفى نحنا جاهزين .

* ما بتقصروا يا ولادي .

* خالتي شامة .. خالتي تعالي اللحدسك ..

* خير آنادية ..

* فشان قلتي لي أحدسك أول زول .. دي جيتنا أنا و يوسف من العيادة .. قالو لي حامل .. و بتكوني تميتي الشهر ....

* تبارك الله .. تبارك الله .. يتم لك بالسلامي بركة إلاهي و سيدي .

* يلا كلمي يوسف النروح عندي دوشه .

و هما في الطريق الى البيت عبر تلك الازقة الملتوية ظهر التكروري راكبا حماره الاسود .. فطنطن يوسف بصوت مسموع ( لعنة الله على الشيطان الرجيم ) فارتعدت فرائص نادية و شعرت برعشة برد خفيف في ذلك الحر القائظ ...فقالت :

* أمسكني عليك آ يوسف بطني طامي .

* خلاص شدي حيلك و صلنا البيت ..

* أفتح الباب بسرع .. و أمسكني عليك شديد .... عوووووع ... طرش في العتبه . و خايفي أقع .

* خير و الله أطرشي محل ما يريحك ياهو دا الراجيهو من سنين . تعالي اللشيلك ..

* يوسف ضحكتني و انا في الحالة دي .. ما قت لك شيلني ... و آآآي قطعت مصاريني بالضحك وآآآآ فرحتي الشديدي الليلي .

* خليني اللحوم بك الحوش دا كلو ... يا مرادي ما أنزلك و أوديكي محل ماكي دايري .

* لا لا الرسول تنزلني في البرنده .... أيي هناك في العنقريب الكبير ..

* أها تاني أسوي شنو .. أقوم أضبح الكرامة مو كدي ..

* لالا بنسوي كرامة البليلي .. و دايراك تمش براحة تدي خالتك شيتن سمح مسكيني تربي في أيتام ...... مالك بتبكي آ يوسف .

* حياتي بلاكي كانت ضايعة آ نادية ..

[ام زينب]

سبحان الله كل القصة سطر سطر وكلمة كلمة تحكي عن البلد وتراثا ومفرداتها ( يعني ما جلّت منك كلمة كدا ولا كدا اللت بندر )
عليك الله كتر من كلام حاجه شامة وخاصة وهي بتشاكل أو تشنف أو تقطع في زول .

[الخزين ود نصر]

أختي أم زينب مشكورة جدا على الاهتمام و المتابعة .. نعم بالنسبة للناس الكبار كلامهم شايقي صرف لا تشوبه لهجة أخرى .. أما الجيل الجديد مثل( سعاد ) حيث تأثر كلامها الى حد ما بالمقررات المدرسية و الاختلاط بالطالبات و المدرسين من مناطق مختلفة الى جانب سهولة التنقل الى الخرطوم و غيرها .. عليه ستجدين نطق بعض الكلمات قد دخلها بعض التغيير .. و هذا هو واقع الحال اليوم بالنسبة للهجة . من هنا نكتب عل هذا يكون مساهمة بسيطة مع غيري في توثيق لهجة الشايقية و ما صاحبها من تغيير . نتيجة للتأثيرات سابقة الذكر . و هو موضوع يطول شرحه .

تسلمي أم زينب .

[ام فئ]

الخزين!!!،،،صراحه قمة الروعه ،،،عكس للواقع بطريقه كوميديه مهضومه
ما كنت متابعه !!!عجبتني المشاركه 77 ،،،المدام عاقله ،،،ولب الدراما العوده الي الجزور
سلمت يُمناك
واصل التوثيق
متااااااابعين
تحياتي

[الخزين ود نصر]

شكرا جزيلا أم فيء على كلماتك الطيبة المشجعة .

أيه رأيك في لهجة أماتنا ديل ياها ول مو ياها .

[ام فئ]

شكرا جزيلا أم فيء على كلماتك الطيبة المشجعة .

أيه رأيك في لهجة أماتنا ديل ياها ول مو ياها .

التشجيع مُحفز للإبداع،،،
يلا دور

اللهجه الشايقيه دي لهجه جميله جداا ومميزه خالص،،بحبها إكتير ،،،

ف أُماتنا ديل كلامن حِنين وكولو حِكم ودُرر
يديك العافي

[الخزين ود نصر]

مشكورة أم فيء على المرور الباهي و التشجيع .

نواصل -

* و الله ماني مصدقي أنا في حلم ول علم .. معقول بتريدني قدر دا آ يوسف .

* منديلي وينو ؟

* لالا الرسول تخليني أمسحن ليك بايدي .. خت راسك بهني شويي .. من زمان أنا بريدك علا كت بخاف منك .. و كت أشوفك زمان شايل عكازك و مبرم شنبك كت بخاف إتكلم معاك .

* ههههههههههه أيي كانت روحي عاجباني شايل عكازي بس دايرلي واحد يغلت علي .. و كيفن تريديني و تخافي مني آ نادية ..

* أيي و الله و كت تجي مندلي بقدام حوشنا كت بعاين لك بشق الباب لامن تصل تحت و التمر يغتيك . و أمي كانت و كت تقول لي أمشي نادي فضل المولى يضبح لنا الكرامة أقول لها لالا أخير أنادي يوسف قريب . أها من تجي تلقاني داخلي و مارقي أحضر لك في الصواني و إنت منشده مع الضبيحي تقولي المفراكة وينه .. أجر أجيبه ..أصلك آ بترفع راسك تعاين لي سمح .. بقلبي أقول هسع أديك ضربه بالمفراكة دي في راسك المدنقر طوالي دا ...

* ما تشوفي العكاز و الشنب داك و الله كت بخاف من الكلام مع البنات .

* كمان في عرس أخوك جلال ما خليت لي مسيح و مكياج ... و كت جيتكم ولقيت لي فرصة إتكلم معاك بلا الضرب و قع مع بطان الجبل .. شاديه قالت لي بركة الماشافك من قريب .. و ضحكت و قالت لي قصة عزيزة أختك مع المكياج ...

إنت نم ؟

* لالا سامعك أها قالت شنو ؟

* قالت لي اليوم داك كان عرس صاحبتنا في البركل مشيت لعزيزة قلت نمشي سوا و شايلي معاي المكياج ... أها هناك إتمسحنا و إتمكيجنا ما خلينا شي .. و كت بقينا مارقات لاقانا يوسف عند الباب ... عاين لنا كدي و قال لعزيزة تعالي هني .. و مشى على الابريق و بقى يكب لها و يقول لها غسلي و شيكي دا يغسل طعمك وهي تشيل و تغسل و خايفي .. بعد الابرق كمل قال لها طيري من قدامي ...

* قت لك كت صعب خلاس .. هسع و الله إشتهينا عزيزة من سافرت أبوظبي 3 سنه ما جات . و الحنيي الشديدي دي جاتني بعد عرستك . عشان طيبتك دي يعلم الله .

-- بعد أن زارت أمونة و حمدت لها السلامة على خلع ضرسها ذهبت فاطني بت علي لزيارة شامة و زوجها المريض حاج طه .

* سلام ناس البيت

* حباب فاطني بت علي .. تعالي لاداخل مافي زولن غريب .

* سلامتك يا حاج طه أريتك طيب . خلك قبلك أخوي لا تقوم .

* نحمد الله .. كيف حالكم سلمي لي على حاج عمر ..

* يسعل منك الخير .. حاج عمر قال بيجيك بعد صلاة المغرب

* تعالي آفاطني أقعدي شويي في التكل النسويلنا شاي .

* بقعد شويي فشان ماشي اعوس كسرت الغدي . كت عند ناس أمونة قلعت ضرسه .

* أيي لاقيته نازلي من الباص .. ساوي كشره متل خشم السعن ... مديت لها راس أصابعي .

* إنتي آ شامة تريدي بتها و تكرهيها كيفنو دا .

* بتها طيبي و حتى راجله الله يرحمه كان طيب أبعرفها الشيطان الرجيم دي جات من وين .

* يبقى جبدته حبوبته أم سروال آشامة .

* صدقتي قالو الشيطان كان يحتار في مصايبه .. طوالي لابسي السروال متل الراجل قالو من شافعي لا لبستلها رحط لا كسرت لها فركي قرقاب ... ودارعي سكينه في ضراعه .. و كانت و كت تشرب تقيف وسط الرجال شايلي عكازه و تحلف بالطلاق . صح أمونة الجن حارسه لا بتشتري لا بتشحده .

* ما سمعتي الغنوة القاطعنها لام سروال وكت شاكلت المفتش التركي السعله من طلب التمر ؟

* إيي سمعتها :

يا الحلبي أمسك لسانك ... قبل أجي أرميك من حصانك .
تاني إن كتر في كلامك ... طلاق تلاتي أقطع لك أضانك .

لكن قالو كانت فالحي التمر الطوال دا كلو قالو زارعه هي .. لكن الخرابه دي لا تحت لا بتهش لا بتنش ..

* أها باكر الله يحيينا من الصباح تجينا آشامة للخبيز .

* سمح ربنا يديم الافراح ياخيتي .

[ام زينب]

غايتو نادية ويوسف اريتوا حالنا بعد ما نكبر :d:d:d
ناس العرس وصلوا وين

[الخزين ود نصر]

مشكورة ما قصرتي يا أم زينب في الويك أند دا نشوف ناس العرس عملو شنو .

[الخزين ود نصر]

عندما حطت الطائرة بسلام في مطار مروي الدولي تأكد حسن أن أغلى أمنياته قد بدأ يتحقق . فقط تبقت دقائق معدودة ليرى أهله تتوسطهم درة حياته ندى . نظر من على البعد و هو في صالة الوصول : نعم ذاك هو والده الحاج عمر بطوله الفارع و يداه وراء ظهره كعادته عندما يطول الانتظار .. و تلك وآلدته الحاجة فاطمة تلتفت هنا و هناك علها تظفر برؤيته .. و بجانبها سعاد و خالته و عمته ..و ليس ببعيد بعض الشابات في مرح و سرور لكن أين ندى ؟
بعد أن وصلت حقائبه .. هم بالخروج فاذا بشخص يربت على كتفه من الخلف ... و عندما إلتفت كانت أحلى مفاجأة في حياته .. إنها ندى .. فأطلق للهاند باق و ثاقها من كتفه لتسقط على الارض .. و بكل حنان الدنيا أعطى و أخذ قسطا من السعادة سلاما و شوقا ..

* ندى ما بصدق .. و أنا بتلفت ليك هناااك و إنتي معاي هنا .. كيف بالله و الله شوق مبالغة .

* كيف و الله أنا ما مصدقة أشوفك .. و عملت وآسطة عشان يدخلوني هنا في الصالة ما قدرت أصبر لمن تجي بره . يلا نطلع الجماعة بحسبو فيها بالدقيقة ..

* أيوه ياها ديك أمي تمسح في دموعه تكون لمحتني .. يلا نمشي سريع .

-- و هو بين أحضان أمه و أبيه و أخته و أهله أحس براحة و سعادة غامرة .. و كأن حملا ثقيلا قد أزيح من ظهره . لم ينس السلام و بعض الغفشات مع صويحبات ندى .. وقد لون الفرح و الخجل محيا ندى و هي تعرفه بصديقاتها ..و الضحكات المرحة تملأ ساحات المطار .... مر الوقت سريعا ... فذهبت ندى و صاحباتها نحو سيارة ستقلهم الى قرية جلاس على وعد بالتلفونات بينهم و شوق زاد إواره ..
كان حوش حاج عمر قد إمتلأ بالاهل و الجيران عندما وصل موكب العريس فكانت الزغاريد و التهاني بسلامة الوصول تنثر البهجة و الفرح .

* تعال أقعد بهني يا وليدي و الله مشتهياك و ضايقي متين تصل .

* و أنا بالاكتر يمه الحمد لله الشفناكم طيبين .

* البارح أبوك مشي لاهل العروس و قطعو يوم العقد .. بالجمعة بعد باكر .. ربنا يتم لك على خير .. و يديك الفي مرادك يا وليدي . و الله ناسا كيف طيبين .

___
توقف الباص قرب منزل ندى فنزلت و معها صديقاتها الاربعة .. و قد شاهدهن من على البعد بعض شباب القرية و الذين يتسامرون في رمال الخور الذي ينحدر من مرتفعات الصحراء نحو النيل .. كان من بينهم طارق قريب ندي و يلقب بالزعيم وهو دكتور بيطري عاطل ... و صالح الاشتر ... و عباس أب ضراع ... و فيصل ود نعيمي الذي لا تجده في كامل وعيه بعد مغيب الشمس .. فصاح قائلا للجالسين :

* بالله يا جماعة إنتو رجال و نوارة بلدنا يجي يعرسه غريب ؟

[ام زينب]

حمدلله بي سلامة الشوفه وربنا يتم علي خير .

اصلوا كدي النوار بيختفوهوا ناس غرباء :p:p:p:p:d:d:d:d

[الخزين ود نصر]

صدقتي يا أم زينب الشواكيش دي أغلبه سببها الغرباء ...

زي ما قالو زامر الحي لا يطرب :)....

نواصل قريبا .

[حسن العليش]

مشكورة أم فيء على المرور الباهي و التشجيع .

نواصل -

* و الله ماني مصدقي أنا في حلم ول علم .. معقول بتريدني قدر دا آ يوسف .

* منديلي وينو ؟

* لالا الرسول تخليني أمسحن ليك بايدي .. خت راسك بهني شويي .. من زمان أنا بريدك علا كت بخاف منك .. و كت أشوفك زمان شايل عكازك و مبرم شنبك كت بخاف إتكلم معاك .

* ههههههههههه أيي كانت روحي عاجباني شايل عكازي بس دايرلي واحد يغلت علي .. و كيفن تريديني و تخافي مني آ نادية ..

* أيي و الله و كت تجي مندلي بقدام حوشنا كت بعاين لك بشق الباب لامن تصل تحت و التمر يغتيك . و أمي كانت و كت تقول لي أمشي نادي فضل المولى يضبح لنا الكرامة أقول لها لالا أخير أنادي يوسف قريب . أها من تجي تلقاني داخلي و مارقي أحضر لك في الصواني و إنت منشده مع الضبيحي تقولي المفراكة وينه .. أجر أجيبه ..أصلك آ بترفع راسك تعاين لي سمح .. بقلبي أقول هسع أديك ضربه بالمفراكة دي في راسك المدنقر طوالي دا ...

* ما تشوفي العكاز و الشنب داك و الله كت بخاف من الكلام مع البنات .

* كمان في عرس أخوك جلال ما خليت لي مسيح و مكياج ... و كت جيتكم ولقيت لي فرصة إتكلم معاك بلا الضرب و قع مع بطان الجبل .. شاديه قالت لي بركة الماشافك من قريب .. و ضحكت و قالت لي قصة عزيزة أختك مع المكياج ...

إنت نم ؟

* لالا سامعك أها قالت شنو ؟

* قالت لي اليوم داك كان عرس صاحبتنا في البركل مشيت لعزيزة قلت نمشي سوا و شايلي معاي المكياج ... أها هناك إتمسحنا و إتمكيجنا ما خلينا شي .. و كت بقينا مارقات لاقانا يوسف عند الباب ... عاين لنا كدي و قال لعزيزة تعالي هني .. و مشى على الابريق و بقى يكب لها و يقول لها غسلي و شيكي دا يغسل طعمك وهي تشيل و تغسل و خايفي .. بعد الابرق كمل قال لها طيري من قدامي ...

* قت لك كت صعب خلاس .. هسع و الله إشتهينا عزيزة من سافرت أبوظبي 3 سنه ما جات . و الحنيي الشديدي دي جاتني بعد عرستك . عشان طيبتك دي يعلم الله .

-- بعد أن زارت أمونة و حمدت لها السلامة على خلع ضرسها ذهبت فاطني بت علي لزيارة شامة و زوجها المريض حاج طه .

* سلام ناس البيت

* حباب فاطني بت علي .. تعالي لاداخل مافي زولن غريب .

* سلامتك يا حاج طه أريتك طيب . خلك قبلك أخوي لا تقوم .

* نحمد الله .. كيف حالكم سلمي لي على حاج عمر ..

* يسعل منك الخير .. حاج عمر قال بيجيك بعد صلاة المغرب

* تعالي آفاطني أقعدي شويي في التكل النسويلنا شاي .

* بقعد شويي فشان ماشي اعوس كسرت الغدي . كت عند ناس أمونة قلعت ضرسه .

* أيي لاقيته نازلي من الباص .. ساوي كشره متل خشم السعن ... مديت لها راس أصابعي .

* إنتي آ شامة تريدي بتها و تكرهيها كيفنو دا .

* بتها طيبي و حتى راجله الله يرحمه كان طيب أبعرفها الشيطان الرجيم دي جات من وين .

* يبقى جبدته حبوبته أم سروال آشامة .

* صدقتي قالو الشيطان كان يحتار في مصايبه .. طوالي لابسي السروال متل الراجل قالو من شافعي لا لبستلها رحط لا كسرت لها فركي قرقاب ... ودارعي سكينه في ضراعه .. و كانت و كت تشرب تقيف وسط الرجال شايلي عكازه و تحلف بالطلاق . صح أمونة الجن حارسه لا بتشتري لا بتشحده .

* ما سمعتي الغنوة القاطعنها لام سروال وكت شاكلت المفتش التركي السعله من طلب التمر ؟

* إيي سمعتها :

يا الحلبي أمسك لسانك ... قبل أجي أرميك من حصانك .
تاني إن كتر في كلامك ... طلاق تلاتي أقطع لك أضانك .

لكن قالو كانت فالحي التمر الطوال دا كلو قالو زارعه هي .. لكن الخرابه دي لا تحت لا بتهش لا بتنش ..

* أها باكر الله يحيينا من الصباح تجينا آشامة للخبيز .

* سمح ربنا يديم الافراح ياخيتي .


الله يجازي محنك يالخزين ود نصر
غايتو انا ما بصدقك انك ماك من مواليد البلد
لانو حديثك الزول عِلِي يبقى قاعد "رُوس بيت" مع حبوبتو ومو قعاد مكاجرة ولعب قعاد حِن وحُجِي وحِكِر ومليس راس ومسيح واديان تمر وشراب جبنه و اسقيان بهائم بالجوز وهي قاعدي تفك في الملويي وتضرب البتناطح اخواته فوق صفحته وتلحقه بي دعوة الله يقلعك قلاع ان كان عذبتيني الغِنيمايي دي الله يقلع اوتادا ويبعد بلادا وتمشي معاها تجيب القش بالحمارة وترسلك تجيبلها التمباك والزيت والسكر والشاي الحب من الدكان

الشئ التاني انا ما بصدق انك ولدوك في الخرطوم وللا اقول الكلام دا يبقى فتحو خشمك واسقوك ياه وما بقول "حقنوه" عشان انو الحَقِن غصِب والشراب بي خاترك


أيي لاقيته نازلي من الباص .. ساوي كشره متل خشم السعن ... مديت لها راس أصابعي

ياسلام عليك كلام ليه مدلولات ومعاني كلاف لايقف عند قرائتك فحسب بل امتدادات وتشعبات

* صدقتي قالو الشيطان كان يحتار في مصايبه .. طوالي لابسي السروال متل الراجل قالو من شافعي لا لبستلها رحط لا كسرت لها فركي قرقاب ... ودارعي سكينه في ضراعه .. و كانت و كت تشرب تقيف وسط الرجال شايلي عكازه و تحلف بالطلاق . صح أمونة الجن حارسه لا بتشتري لا بتشحده
اهه بالله يالخزين جنس دا حدثوك بيه؟؟ مشهدا انت عايشتو بس ورني صغت المشهد كيف؟؟

* أيي و الله و كت تجي مندلي بقدام حوشنا كت بعاين لك بشق الباب لامن تصل تحت و التمر يغتيك . و أمي كانت و كت تقول لي أمشي نادي فضل المولى يضبح لنا الكرامة أقول لها لالا أخير أنادي يوسف قريب . أها من تجي تلقاني داخلي و مارقي أحضر لك في الصواني و إنت منشده مع الضبيحي تقولي المفراكة وينه .. أجر أجيبه ..أصلك آ بترفع راسك تعاين لي سمح .. بقلبي أقول هسع أديك ضربه بالمفراكة دي في راسك المدنقر طوالي دا

الخزين والله جنس كلامك دا قعد يحتحت فوقنا الظهر ويلبشنا وانا قعد ادخل في حالة علي يرشوني بالريحي ويدوني سيجارة واندشه حِتن ابقى كويس

* قالت لي اليوم داك كان عرس صاحبتنا في البركل مشيت لعزيزة قلت نمشي سوا و شايلي معاي المكياج ... أها هناك إتمسحنا و إتمكيجنا ما خلينا شي .. و كت بقينا مارقات لاقانا يوسف عند الباب ... عاين لنا كدي و قال لعزيزة تعالي هني .. و مشى على الابريق و بقى يكب لها و يقول لها غسلي و شيكي دا يغسل طعمك وهي تشيل و تغسل و خايفي .. بعد الابرق كمل قال لها طيري من قدامي
ودي كمان آبصدقك فيها علي تبقى الكلام دا قايلو انت خصوصا كلمة غسل طعمك
شكرا كتير ياشيخ الخزين والله انت تنثر الدرر على قراء البركل الميامين المحظوظين
فتك بي عافي

[الخزين ود نصر]

و الله الليلي يا حسن العليش ضحكتني لامن دموعي جرن وحات سيدي حمدعثمان الكبير السموني عليهو .
الكلام ده جابتو الريدي الشديدي للايام السمحي القضيته في البلد مع ناس حبوبتي الله يرحمه .... وكت كت شافع قبل المدرسة و كمان وكت نرجع البلد في إجازات المدارس بعد كبرت شويي . و حتى وآلدتي مولوده في الخرتوم ما قضت لها سنه على بعضها في البلد لكن كان قالت لك السلام عليكم أريتك طيب تعرفه شايقية . و جيرانه في الثوره يعرفونا ب بيت الشايقية .
أكان طوالي بلقى متل التشديع دا أماني كت بمرق لي نصايب :d......

تسلم آ حسن أخوي .