بيني وبينك - حميد حسن سالم

[عبد الله إبراهيم الطاهر]

[size=5]بيني وبينك

محمد الحسن حسن سالم (حميد )

[color=#008000]كل ما تباعد بيننا عوارض .. كل ما هواك يا طيبة مكنّي
تلد الغربة القرب الواحد .. وبيكي أسمي الشوق وأكنّي
لما أفوتك من دون خاتر .. أو دون خاتر مني تفوتي
بلقى حبايب في كل حتة .. وكل بيوت الفقرا بيوتي
لا غيرت وراكي الجتة .. ولا بدلت ملامح صوتي
لا غفلني وهادن فني .. غامل المدن الما عرفني
وتبن الصبر الشوقو مصوبر .. في الأرياف الكم وفّني
وبالإحساس الجاك مستعجل .. جيت متأنّي
للأطفال الناشفة ضلوعا ..
ونازفة .. بغني ..
أهدي دموعا .. وأطمّن روعا ..
ببسمة بكرة الماها تمني .. ولا مصنوعة
بتمرق منها .. تدخل مني .. شديرا فروعا .. تميد متّنّي
تكوفت فيها نسيمة حنّي
تلاقي طيورا الما ممنوعة .. تجول وتغنّي
عديل لا راجفة ولا مفزوعة .. خطاها نبياً داخل الجنّي
أغني لشعبي ومين يمنعني ..
أغني لقلبي إذا لوعني
مخير دربي الما رجعني
إذا طلعني نخلة القرب .. واللا الغربة الكدرومية
بتنـزل غنوتي بي قمرية
أو وقعني في بطن الجب .. بطلع يوسف بالأغنية
أغني .. أغني
أغني الناس الما بتسمعني
المني بعيد المبعد عني
الإيدي في إيدا .. وإيدا بتبني
في دنيا جديدة .. اليوم راح تدني
وأريت غنواتي في ناس شغالة
تكون سندالة وعود طورية
ضراع رجالة .. كتاب أطفالا ..
وجملة بالا الما مقرية
سدة مالا وبقة فالا
في ليلة الدخلة على اسمى قضية
حبيبة قلبي يا سودانية
يا أسمى معاني .. في زول بعاني
يا ود ضكران .. يا بت دغرية
وانا إن سامعاني .. فضلت أغاني غبش فقرية
حويتك منك .. يا دافعاني براحة إيديا
كما الأشواق .. ويا جابداني .. برفق عليّ
ما بتحير بين الفوق وبين الناس التحتانية
إلا مغير .. واللا عقوق .. واللا كفيف الإنسانية
ومنك وين يا كاشفة عينيّ
بنور الإلفة .. ضيا الحنية
وحلم العالم ناس تنسالم .. والبني آدم صافي النية
والأطفال الناشفة ضلوعا
إنمرتق روعا .. وجاتنا تغني
غناوي البكرة الكم مسموعة
سماع بلاّل .. في الدنيا الصنّي
حسيس طمبارة مع نقارة
صفقةّ حارة ودارة تهنّي
زفاف اغرودة .. نهار العودة .. أو زغرودة في ليلة الحنّي
فيا حلتنا عليك ترابك
وإنت شبابك زينة الجنّي
أحلى عروس البلد اللتنا .. واللا الغبش الرابة تهنّي
واللا هدير المدن التصحى وتمحى ضلام الحاصل عنّي

[شهرزاد]

بيني وبينك

محمد الحسن حسن سالم (حميد )

[color=#008000]كل ما تباعد بيننا عوارض .. كل ما هواك يا طيبة مكنّي
تلد الغربة القرب الواحد .. وبيكي أسمي الشوق وأكنّي
لما أفوتك من دون خاتر .. أو دون خاتر مني تفوتي
بلقى حبايب في كل حتة .. وكل بيوت الفقرا بيوتي
لا غيرت وراكي الجتة .. ولا بدلت ملامح صوتي
لا غفلني وهادن فني .. غامل المدن الما عرفني
وتبن الصبر الشوقو مصوبر .. في الأرياف الكم وفّني
وبالإحساس الجاك مستعجل .. جيت متأنّي
للأطفال الناشفة ضلوعا ..
ونازفة .. بغني ..
أهدي دموعا .. وأطمّن روعا ..
ببسمة بكرة الماها تمني .. ولا مصنوعة
بتمرق منها .. تدخل مني .. شديرا فروعا .. تميد متّنّي
تكوفت فيها نسيمة حنّي
تلاقي طيورا الما ممنوعة .. تجول وتغنّي
عديل لا راجفة ولا مفزوعة .. خطاها نبياً داخل الجنّي
أغني لشعبي ومين يمنعني ..
أغني لقلبي إذا لوعني
مخير دربي الما رجعني
إذا طلعني نخلة القرب .. واللا الغربة الكدرومية
بتنـزل غنوتي بي قمرية
أو وقعني في بطن الجب .. بطلع يوسف بالأغنية
أغني .. أغني
أغني الناس الما بتسمعني
المني بعيد المبعد عني
الإيدي في إيدا .. وإيدا بتبني
في دنيا جديدة .. اليوم راح تدني
وأريت غنواتي في ناس شغالة
تكون سندالة وعود طورية
ضراع رجالة .. كتاب أطفالا ..
وجملة بالا الما مقرية
سدة مالا وبقة فالا
في ليلة الدخلة على اسمى قضية
حبيبة قلبي يا سودانية
يا أسمى معاني .. في زول بعاني
يا ود ضكران .. يا بت دغرية
وانا إن سامعاني .. فضلت أغاني غبش فقرية
حويتك منك .. يا دافعاني براحة إيديا
كما الأشواق .. ويا جابداني .. برفق عليّ
ما بتحير بين الفوق وبين الناس التحتانية
إلا مغير .. واللا عقوق .. واللا كفيف الإنسانية
ومنك وين يا كاشفة عينيّ
بنور الإلفة .. ضيا الحنية
وحلم العالم ناس تنسالم .. والبني آدم صافي النية
والأطفال الناشفة ضلوعا
إنمرتق روعا .. وجاتنا تغني
غناوي البكرة الكم مسموعة
سماع بلاّل .. في الدنيا الصنّي
حسيس طمبارة مع نقارة
صفقةّ حارة ودارة تهنّي
زفاف اغرودة .. نهار العودة .. أو زغرودة في ليلة الحنّي
فيا حلتنا عليك ترابك
وإنت شبابك زينة الجنّي
أحلى عروس البلد اللتنا .. واللا الغبش الرابة تهنّي
واللا هدير المدن التصحى وتمحى ضلام الحاصل عنّي
[size=4]وايضاً لحميد /
بين الموجة والخزان
سنّى على النضال إيدى
سوّكى بى الهتاف .. فمّى
شوارعك لى .. دويها .. على
إذا ما آخر العلاج الكى ...
مراويدك حُمر يا أمْى
**********
هردت لهاتى بى الغنوات
وقتْ يبرد حشاك .. يا أمّى
من التعب البلا صالح ...
تفيقى .. تروقى .. تنجمّى
تسوّى مكانسك المطرة
تضوى البيت وتنجمّى
تمرقى صبوحة لى الجيران
قدح فوق إيد ... (وفْيد) ألمى
**********
يلاقوك شفّع الكتـّاب
نضاف وظراف بلا النسمى
يغنولك غناوى السـاب
وفى بيوضة مافى سراب
جبال كجمى وفيافى الكاب
تميد بى الخضرة ...منقسمى
فيافى الصّى وبيوضة ..
البراسيم فيها مفروضة
خدارا يرارى شوف عينى
على الأبواب .. طواريها وحواريها
بقت روضة
بقت تشرب من الحامداب ..
تشوفى رهاب ... بُعُد نجمى
.. بشوفو قريب قُرُب نضمى
بشوف العالم التحتانى هيلاهوب وقف ناهض
وهدّ عمايد الفوقانى ..
جوّة الجُب رمى العارض
وفى الساقوا الدمار أفراد
عريق الحب نبض قابض
متل قبض الحروف فى إسمى
وغناوينا القبيل .. رقراق
علينا تصب برد .. قارض
وأجر نمّى ...
أدوبى لهاتى بى الغنوات ..
عُقُب يبرد حشاك .. يا أمّى
....
وطنى ولا ملى بطنى
سكاتى ولا الكلام النّى
بليلتى ولا ضبايح طى
قليلتى ولا كُتُرْ سمّى
سلام يا أمّى
سلام لا هكمى .. لا دكْمى

[شهرزاد]

محمد الحسن حسن سالم حميد
( جواب أول )

باسم الحاضر والمستقبل
ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
ولا خبيراً للمشروع
علماء آثار .. فضلت في آثار
ما خموها الجونا قبلكن .. شن خلولنا بلا حجار
الله يصرف الخواجات
بينات جعفر والمحجوب .. والمحجوب والخواجات
طقت حجي .. العمدة طفاها
باقي الناس الجات للفرجي ..
قنبو قيلو شبعو لحوم .. والخواجة يصور ساكت
ستة خرفن وتيس ما كفن
ستة خرفن في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
ستة خرفن وتيس إنصفن
ستة خرفن في فد يوم
جات من صالح بت كلتوم
تسكت تخبز طول اليوم
لمن حرقت الدولاب
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع
زولك ده يحير
ـــ
يتبع

[شهرزاد]

(الجواب الأول)
عند الجد كان أده ينقنق
عند الفارغة يشيل ويبعزق
إذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار والحاصل البحصل كل صباح
شتلاتك قبضن
الحملان كبرن بلحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين وما ناسين المسئولية
هي يا الزين زغرد
بت ام زين جابت لها بت
ستة أولاد حتان البت
المحجوب ينشد من خبرك
شافعو محسب من يومين
التومات طيبات ونصاح
إلا غباش بلحيل آ الزين
راشد كرر .. شهر اتنين كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
أوعى البشغل والعربات والحيكومة السمها فاير

أم أولادك ست الدار بت أحمد جابر

[شهرزاد]

ست الدار بت أحمد كيفك
جاني جوابك مفتوح شارع
جاني جوابك وانا بتذكر في ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتصور
في المشروع وعمايل جعفر
ولما بكيت .. يا ست الدار
أيوة بكيت .. يا ست الدار
لما قريت علماء آثار
علماء إيه يا بت الناس
سواح إيه .. ما عندك راس
ست الدار تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان أي عوج مبدي ومختوم
صوتنا هناك وهنا مكتوم
ومافي فرق في الوقت الراهن بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
أنا مأزوم .. مأزوم .. مأزوم
يا خرطوم أزمني الصلبك فوق الطلحة الأمريكية
يا خرطوم .. أوه خرطوم .. أوه واشنطوم
طن .. لفتك فجراً يقطع رحطك
ست الدار سامعاني يا اخيتي ومرتي وامي وأم الكل
أنا بندهلك من شارع الله .. فوقي هجير والتحتي بقل
سبي معايا الشردو راجلك .. والحرمونا شوية الضل
سبي الحالة العالة علينا .. حتى احكيلك بالتفصيل
حاصل الحاصل يا بت أحمد
جاني وفد في المصنع زاير .. وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا مئتين عامل
مئتي عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين مافي العارض واللا اترجى
العمال من سمعوا احتجوا ... سيرو موكب صامد وصامت
إتضامنا معاهم سرنا ..
أب عرام دور عربيتو .. العربية الامريكية
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة .. والعمال أصحاب الحق
هي اللي تقرر والتتولى
هي البتحدد سير المصنع
إيد العامل هي العاد تنتج
ما المكنات الأمريكية
زيت العامل ياهو البطلع .. مو المكنات الأمريكية
ودرن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي .. وكل وجوه الراسمالية
وأشرف من ..............
داك الحين المصنع هاج
جات عربات اللات بوليس .. فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتخريب والتحريض والشيوعية
البوليس صاقع شيوعية
وفاكر نفسو بنبذ فينا
هي آ بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقهم أو تحقيق الأمريكان
اسبوعين عشناهم جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالهم شاهد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولهم صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت لمت .. كان ما لمت أنا جاييكم
وما ندمان ...

[شهرزاد]

ست الدار ترد :

أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميز .. وأقدر أفرز .. أرجع أميز
فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
ينتج كيف؟ شغال بي فونيا؟
عامل ينتج عشرين حتة
تلحقو منها قيمة إتنين
ستة بغطوا المنصرفات
سبعة.. تمانية .. تسعة بغطوا
أدها تسعة المنصرفات
كل الفايض .. بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
خفف مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيط؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليه يا الزين بتوصي عليّ
وانا بت احمد ست الدار
ام اولادك وهم صغار .. ام اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
اسبوعين قضيتن جوه
يبقى غصب .. زادنك قوة
ليش يا الزين بتوصي عليا
ليش يا الدخري توصي عليا
وعارف ام راشد والتومات .. مرتاً دغري وغلباوية
آه يا الزين .. لو كنت معاكم .. كنت بقيت النوباوية
ما تهتم يا الزين بالحاصل
واصل سعيك .. واصل واصل
واصل سيرك
كان ما كنت الزين ود حامد كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو .. فرقو غيما الأمريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو راحو الديش
غزّا بكانا اتنين رطانة
صاقع كلو من اسماعين
هو الفسر لهن الشغلانة
ويا اسماعين
ما كان الديش شقّ مسيمعك بالجبخانة
لو المجلس قبل اوراقك .. أو في الثانوي لقيت لك خانة
لكن قدرك يا إنسان .. بلداً هاص هيصة جبانة
طالو الناس التريانين .. ضلو الله الما ضلانا
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك وقال جاييك في أول بص
البرسيم طهرنا البارح
نعجة راشد صبحت والدة
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
الواطة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والأشواق من هنا لا عندك
ست الدار أحمد جابر
تلغرافات :
تلغرفين في وقت واحد :
نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية
الخرطوم .. الخرطوم بحري .. كشك الشعلة .. الزين ود حامد
راشد راقد والواطة جعفر طالق فيها بهايمو
ست الدار بت احمد جابر
نوري السوق المحجوب ود أحمد جابر
كتب الزين .. كل الاوراق .. راشد كيف
النوباوية
الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود حامد

[ياسر جعفر ابوبكر]

لك ولحميد التحية

[شهرزاد]

شوك الشوق

شوك الشوق لى الشوف آ خَىْ
ضارب فِطن النسج الحى
يا منقاش أحزانى إنشرت
وادى الفرح إتمدد صَى
يا راحلين ــ عِـنْ ــ دُغُش الليل
ما لاقيتو جناياً زى ..
تكية نخل الفجُر الجاسِر
فوق فى المتَرَة .. عَرَاجِنْ ضَى
آ رعاوة .. العرب الرُّحّل
ما لاقاكُنْ فى المطرانى ؟
فى كاويقْ الجرف الأمحل
بين أسراب الرهو الراحِل
ساند أكتاف الليل الميّل
عِنْ ساساق الغيمة عليكُن
بين رقراق الخيمة معاكُن
ما أديتوهو شِوَىْ ... بى حرجل؟
آ رطّانة الليلُن ليّل
ما لاقاكُن فى ونساتكُن؟
بين الشادِى وبين كاساتكُن
فى صلواتكن .. عِنْ دعواتكن
أو .. دقساتكُن عِز خلواتكُن
.. زول .. زول الله
إن مِحِن .. آ .. بِسأل
الهبّاد لى غُلبْ أخواتو
الفرّاح عوّان الحلّىِ
الفدّاع لى الليل ظُلماتو
آ نجمات .. شقيش قولن لى
ما لاقاك طالِع .. متدلّى ؟
المطيوب من طيبة أُمّاتو
كالفجّاج .. الندّ نباتو
موج البحر اللّحَمَر هوجتو
وعِرق العِرِق .. اللاّوى ثباتو
جانا الشَدر الأخَدَر منو
ونار الشدر الأخَدَر جاتو
فات شِقيش ...
أب قولاً واحِد ..
وليش ما يرجع من غُرباتو
طوّل طُول .. ما طلّ علينا
وقاطِع مِننا جواباتو
الغابات جات تنشِد منو
والعربان راجين جياتو
أديناهم عرقو .. وعَلَقو
صورتو يقلِّب فى كِتْباتو
ضُل رشاشو .. ركيزة زولو
ساعة سِلمو .. ويوم حوباتو
سِن طوريتو ولون أبرولو
حِس طنبورو البى نغماتو
لهْلَب عِشق الناس الفقرا
وبرّد جوفُن .. بى غنواتو
... ويا غنواتو
الدخلت فينا
تمرق .. جينا على جِلاّتو
وجِيداً جينا .. طلقنا وشينا
وش الدنيا الليلة حلاتو
وش أطفالنا الليلة حلاتو
وغنى معانا غنانا هويتو
غنِّى العالم
غنى حياتو
لا ساومنا عليها قضيتو
ولا فكينا من إيدنا .. وَصَاتُو
ألف شليل يا نورة يفوتو
عشان ما يجيك شليلك زاتو

[شهرزاد]

الأخ عبد الله إبراهيم الطاهر
معليش إستلمت البوست منك ...
عملتو حقي عديييييل ...:D:D
بس قلت نواصل التوثيق للقامة حميد هنا
طالما انت بديت الخطوة الأولي ...
مودتي وإحترامي ,,,

[شهرزاد]

سوقني معاك ياحمام ... ...
سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منام
... ...
سوقني محل ماالمحنة
وأيادي تقطر سلام
سماحة الحياة فوق أهلنا
وبلادي تقرقر وئام
... ...
غلابه وأمان مو الطيابة
ضكارى بصارى وكرام
حبابه الحبان في بابه
وتدخلوا عليّ الحرام
فقارى ولكن غنايا
غنايا بهذا الغمام
بهذا النيل كم تغايا
وتيرابا نرميهو قام
... ...
إرادة القمره البتقدر
براها تضوي الضلام
شعاع شمشاً ياما خدّر
وإذا يبَّس لا يُلام
... ...
فيابا خرابا الحرابة
وخرابة فكر سوسي سام
خرابة الكل نفسو تأبى
عقابه .. تلِم عم سام
... ...
ولِيد مخلوق للقراية
خزين مدخور للجِسام
تتمر نيتو التخاية
إلاما مذهلل إلام
درب من دم ماب يودي
حرِب سُبّه .. حرب حرام
تشيل وتشيل مابِ تدِّي
عُقب آخرتا إنهزام
... ...
بطانة الشيطان قديمِة
وبعد دا منو العرشو دام
إذا الإنسان ما ليهُ قيمِة
علي إيش خلَّفُو سام وحام
... ...
تعالوا الدم ما هو مويةِ
ولا ها ترايي المسام
أخويا وطراوة الخوة إبتسام
... ...
تعالوا نحانن بعضنا
نخل قلبو على التُمام
نبضنا يشهل أرضنا
وأرضنا تجِم العضام
... ...
تعالوا بدل نبني ساتر
نخيب ظن الصدام
نطَّيب للعازه خاطر
نقوم لأطفاله سام
... ...
أخير كرّاكةً بتفتح
حفير وتراقد الركام
أم الدبابة البتكشح
شخير الموت الزؤام
... ...
تعال لي غابتك يا خيرا
تعال لها يا أسده الهمام
بدل دوشكة يغني طيره
محل قنبلة عش نعام
... ...
بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
... ...
بساط أحمدي كم يشيلنا
وتشهِّلنا على الدوام
نَقِل ليلنا تقوِّي حيلنا
ودليلنا تمام التمام
... ...
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام
... ...
ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
... ...
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
... ...
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
... ...
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
... ...
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام
حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
... ...
فلاحة العالم تعمر
محبّة مودة ووئام
تشمِّر ساعد السلام
... ...
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام

[شهرزاد]

زعلان منك
زعلان منك … أي لأنك
ما هببت قوافي الشواق ولا اكرمت رسايلو الجنك
لا عوافي ولا كيفنك
**********
يجري يلاعب في السفّار … العائدين والجايين منك
قبّال ياخد خبر البندر … شوقو يصدو ويصرفو عنك
********
يلقى حنينو أتبدد ساكت … تاري البندر ودّر حنّك
تاريك ناسي في أماسي الغربة .. حال الناس الفوق طارنك
******
طاري عيونك لما تستف … تمسح دمعة التانية تقطّر
بس في وداعك .. لما شعاعك .. ساب الحلي ظلامها معكّر
*****
فد جوابك طمني عليك …. صاير بالي أقول مشغول
أبحث ليك العذر براي … وأبعت ليك الرد على طول
****
فكّر أكنّك .. في الطوّالي بيسأل عنك
حبه رسائل فوقها رسايل .. ياهو الجاهل كل الجنك
لو كان قايل صدرو المايل ،، ما بالساهل يسأل منك
ضايق صدرو .. يطوّل صبرو . ما في حجر من أيدو يفنك
*******
إنت بشر بى كل ظروفك .. حر في جودك .. حر في ظنك
ما بتربع يرجى حروفك … و لا يشابي على غير دنك
ما بتضرع عشان ما يشوفك … عندو كرارة تبدل حنك

[محمد سليمان]

اتمني ان تضم هذه المكتبة اشعار الاستاذ حميد
تحياتي

[محمد سليمان]

قلت أندهك ..
.............

قلت أندهِك ..
خُف من يشِط الريح
نديهتي
على صناقير الشتات .
ويجهجك ..
عن جيهتي أبو التيْ تيْ
سنين تبري السراب
ويدهدهك .
يدخل عليك الليل براك
أب لمبة بينو يتوِّهك ..
أو تشدهك ..
عنِّي المدن ...
فيها السحر والكُضُّبُن
فيها العوارض
تنجهك ..
... ... ...
تنضب موانئ اللقيا ..
تنكبِت البحار
بيناتنا صُن ..
أو تنسهك .
وين ساكنيها
من الدرر
واللولي والمرجان ..
خلاص خلت الديار
من أسمي طائر
ومن غصن ..
الطين مكفَّن بالملح
كمكام من الصدف ..
المحار
ما بين حزن
والتاني ينشكَّن حزن
وأنا يا فنار
أشواقي
تحتي وفوقي نار ..
ما من قطن ..
ما من مواشي ومن صمغ
لامن عمار ...
وتجي السفن ..
سيسيق خطايا على الرصيف
محض إنتظار
رمض إصطبار
وِهْديب سخن ..
ما من إشارة
ومن قطار
وتجي البشارة
أو الخبار
... ... ...
شاخن قرى وباخن مدن
داخ الأديم ..
فتحت جراحو كركِّي
من كُتر النزيف ..
إنقنقتن فوق التراب
كُبّة مواسم من هشيم
نونن ليالي الصيف خراب
أضرب عن المطر
الخريف
حردن سحاباتو الإفق
نفض السحابات من غلب
طينا القديم
هاج غربة في الطين
الشجر ، رفس النسيم
قطع الأتر همس العصافير
الحنون
وبدت تشك
كل الغصون
متعففة ومتأففة
من طيرة خانت جنسها
وباعت معزة نفسها
وبرت الصقور المترفة
شقيش تغور تنضنبه
وشقيش ترك ؟!
ينجيني من
وحل السقوط
عشقاً سمابك
ونزَّهك ؟ ..؟
؟؟؟ ... ؟؟؟ ... ؟؟؟ ...
با بت في أيام تنتهك ..
حلم الغفاري
وتسفهك
شان إنحيازك
للغبش
حبِّك ضراعه
الماب يغش
عشقك شعاعه
الوين يخش
شايل بشارات الدغش
لي أيِّ حتَّة
بتشبهك ..
... ... ...
يا بت دي أيام
من جفا
بردن كواني اللقيا
من بعد الدفا
خنقت مواعيدي الحشك
حلق الوفا
يا أم المساهرين النهار
ميلك علىالتحت
الكتار
فوق خلَّه قِلَّة
بتكرهك .
... ... ...
وبين مخرج الشوق من حشايا
ومدخلك
كوركتلك ..
ما جاني رد
خبِّيت خطايا إستعجلك
قبل الملك
غلمانو
ما تاخدك سبية
وتستبيح لي منزلك
حاطوني دٌقْدُقْ
ملتحين
جاطوني بين ملِّة وصبر
... ... ...
كوركتلك ..
يا أم السمُر
علِّي المتاريس الحُمُر
قبل المطاميس توصلك ؟؟
كوركتلك ..
يا أم الخُدُر
تاني وهِلِك ؟؟
وين بندقيتك وين ؟؟!؟؟
صرخ
هيكل حمامة على سلك ..!
... ... ... ... ...
وإنشرَّ في وادي الزمن
حلفي الحزن ..
شابك ضحك
دعت الصحارى
على جروف فرحي البوار
غربة وغُبُن
صُرمة وحصار
ظلمة ودوار
يا قلبي حار
وأبك .. أبِك
وين بندقيتك وين ؟؟!
نخج هيكل حمامة
على سلك ؟
أخفيكي ..
ولاَّ أوضحك
إنتي الموالفة على الفريق
لا ليل كلابو بتنبحك ..
لا كلمة زي رايش حريق
تغلط عليكي ..
وتجرحك
ياولاَّ
قبل أول شعاع
أطفالو تنسابق سراع
حين تلمحك
تتموَّحِك ..
كفِّيك غصن
تتمرجحك ..
تصعد إليك
من راحة إيديك
المورقة
ولي مسرحك
ويا صارَّة في صدرك
وفا
يا قبلة من ثغرك
كفى
تبراكي أريجات الزهور
نسم الأناشيد
ينفحك
... ... ...
تديكي أصواته الطيور
أسقط دموعي
وأرشِّحك
باسم العرق
قطر الندى
خلْق الصفق
طول المدى
في الهمبريب الجايي حق..
غيمة ودعاشة
أو أرشحك
فوق حيرتي
رأي
ويفرِّحك
يا شارحة صدر
اليشرحك
... ... ...
... ... ...
بالطمي من فيض إشتهاي
أرقوق عناي
ماروق غناي
نبرو رجاي
حاحاي صحاي
أرقد عليَّا قفا
وعليكي
أعبِّي سعن الصبرِ بيكي
أربِّي ليكي
وأجيِّهِك
... ... ...
بالأربل ..
الواسوق .. إيدي
أمشاط رؤايا ..
أسرِّحك
بعرق شقايا
أريِّحِك
فوق إنتي سمحة
أسمِّحِك ..
برهق لقايا .. أريِّحك
تحتار عيون الموية
فيك
يا ,, الله ,,
إلاَّ يشبِّهك
شجر الحقيقة
-الماحصل
من تالا عارض جهجك -
-وإن دهدهك -
على أوجهك !!
طير العشم فيهو إستراح
يخفس
قبُل جية الرياح
مرسالو يجري ينبهك
شتلك عن الشدر الكبار
فيهو الصمغ
لا يشدهك
... ...
أخفيكي ولاَّ
أوضحك ؟
أخفيكي في لغة الوضوح
مابين حبيبين
يوت سوى
بينات مسامات الوله
وإنزيم شعيرات الهوى
في الفيكي
في سر المطر
بين لهفة الطين
والروى
نية الرحيق طلق الشجر
ساعة خلاص
شيلو إستوى
أدهشني فيكي
المحتوى
أجهشني كيف خاويتي
بين برد الصحاري
وبين هجير الإستواء
وكيفن أريجك كالرؤى
فاج ..
يتنقل عكس الهواء؟؟

يا بت عشان ريقة وطن
تنفكَّ
كم باتت قوى
ما ضاعت الآلام سدىً
وآمالنا
ما شاله الهوا
لا بدَّ يجمعنا الزمن ..
ما هو اللي فرَّقنا
وإذن :-
لابدَّ وإن
طال النوى
ترحل صهاديب المحن
ينبض على القلبين
مكن
طيَّب خلانا الإنمكن
تضحك عتاميرو
البكن
يخضر حشاها الإنشوى
... ... ...
ودي للرعية يعشِّبَن
تلد السعية يجي اللبن
لي جملة أطفال الوطن..
صفَّر قمح ,,, دندح دخن
بدَّع صمغ .. فقَّع قطن
ودَّن سفن .. جابن سفن
لا صرمة لا بيتة قوى
ليل التجاريح وإنطوى
حسَّن قرى .. ورقصن مدن
أبنوس ونخلة ..
سوا سوا
لا بندقية تقوم سِوى
تحرِس ضهرنا من الغبن
أنا وإنتي
لا خوف لا حزن
يملانا تاني ولاجوى
تلقيني ولاَّ
ألقاك دوا
.... .... ....
تبتسمي
أفدِّر
دمعتي
قدّام أحدِّر
غنيتي
أطلع نشيد
في رجعتي
أنزل جديد
لي دنيتي
قادِل
مفتِّح صدري
ليك
تندسِّي بين حنيَّتي
إنخبَّى فيكي ..
إنتي اللتي ؟؟!
وأقلد عينيك ..
لآخر نفس
في مروة الريد
الحرس في غربتي
كيفني ليك ..
وإنتي العليك
يوت ركَّتي ..
يا شوق خطايا ..
وسكَّتي
... ... ...
أنده شديد ..
وأوضحك ..
غابة حراز
تحت الرزاز
ضلِّك ملاذ
أهلي العزاز
قابض قّبِض
سابع أرض
عِرْقِك حقيقة
ولا مجاز
... ... ...
مهما المحل
مهما المطر
ظلمَ الرياح
حمِّى الخطر
تنمقَّى فيكي
وتنبحك ..
بتحتحت أغصانك
جراح ..
لكن محال
أن تطرحك ؟؟

[محمد سليمان]

جرح غريب
*** ***

الجرح الشايلو دا مو الليلي
مين بدّل جرحو يا عشَّاق
أنا جرحي بقدرِ مواويلي
خايل في الزمن الفرَّاق
*** ***
أغرق من بحرِ سواد ليلي
وأقدم من صادي الأشواق
أتقل من ريحاً حات شيلي
وقافل واطاتي بأطواق
*** *** ***
أصلاً جيت عابر للدنيا
والجرح الطيِّب صادفني
وزيْ إنِّي بعرفو ومن بدري
وزي الشايفني وعارفني
** ***
طوّالي إتعلق في صبري
صارحني بعمقِ وكاشفني
إتربَّى في صدري مع الغنية
والفتَ عليهو ووالفني
*** *** ***
كان جرحي حبيبي قُدر حالي
وفي مرّة مشينا على لمَّة
عند بابه إنكرم إستنّالي
بس فيكن عاشق يا أمة
لمّاهو عليهو وخلاّلي
جرحاً بس ضمُّة أبى ينضمَّه
*** ***
فرّح شُمَّاتي وعزّالي
أكبر من صبري ومن ثمَّ
لا داير يدخل موَّالي
لا قادر يمرق من نمَّة
*** ***
ما قادر أحلِلُو يحلالي
أنا جرحي قديم ودا بي دمُّو
مين فيكن خلاَّ جرح غالي
وشال جرحي القاشر بي همُّو
*** ***
ما طاقني جرحكن لا إنطاق
ورُّوني متينك تتلمُّوا
ونتريَّح جملة يا عشَّاق
وكل جرحاً يرجع لي أمُّو
كل جرحاً يجمع في أمو

[محمد سليمان]

جواب وصول


النـاس خبـارن طـوَّلـو
وجواب وصول مـا رسّلـوا
إنشاء الله خير يا نسمة بس
قلبـي البراهـن وصّـلـوا
*** *** ***
ما طبَّ جايي مـن الصعيـد
ألفـح حنينـي وأحصِّـلـوا
كم ليل قطر ديل كـم بريـد
والبـي غلبـنـي أمثِّـلـو
*** *** ***
صابري الأنا وراجـاك هنـا
أشـده فـؤادي وأشغـلـو
شيتـاً عنـا ومـرات غنـا
وأصلو الدموع ماب ينزلـو
*** *** ***
مش قلتَّ لي يا ضي عينـي
مافـي القليبـي يحـوِّلـو
مالك يا اخي رهبـن علـي
منـك خـطـاب إتسـولـو
*** *** ***
تلفـون وراء تلفـون وأنـا
أتمنـى مـرَّة أقـول ألــو
لي زول بلا الغيـم إن دنـا
وأبعد من الغيب فـي علـو
*** *** ***
أمسك قلـم وأكتـب بـراي
لي نفسي كم جـواب حلـو
أغري السلام ناسي المعـاي
وكل العليـك عـد يسألـوا
*** *** ***
ما جننونـي أنـا بالنشيـد
عنـك غلبـنـي إتحمـلـو
آخـد عيونـي بعيـد بعيـد
بـي ذوق نشيـدن أحوِّلـو
*** *** ***
يا جوعي من قلبي العليـك
مـن تمـر أبـوي العزَّلـو
أنقل وأجمِّـل طـردي ليـك
باللآبري أقول قـال رسِّلـو
*** *** ***
كُر خايفة من يفلـت كـلام
النـاس خيـالـه يـأوِّلـو
ما عَد تجينـي منـام منـام
بئـراً حبالـه بـلا دلــو
*** *** ***
مع إنو في الخـان التـراب
خان ريحة أهالـي ومنزلـو
وشان سمعة الريد في غياب
صحـوة ضميـرو النذلـو
*** *** ***
الصيبي ماهـا مـن البعيـد
في الفـي الفريـق إتخيلـو
ولا مـدَّ إيـد لا ردَّ عـيـد
وفي الماهو في وفي عيِّلـو
*** *** ***
ماني اليجف تفتـي الشفـق
خوريـن عيونـا يسيِّـلـو
وإن كان بيأخدنـي الشفـق
كلـمـا الليـالـي يليِّـلـو
*** *** ***
لاني البلومك فـي الحصـل
لا الجـدَّ مـنـك أفسِّـلـو
بس ياني ، غبريـن النخـل
بتجـي المطيـرة تغسِّـلـو
*** *** ***
عشماني مـاب أقنـع ولاب
أسمـع كــلام وإتقـولـو
حاراهو زولي ولا إغتـراب
لا مِـن سـراب بيهقِّـلـو
عـن حبنـا ويـا حبـنـا
طــولِّ لبـالـك طـوِّلـو
صابريـن عليـك أصبربنـا
دابـو القبالـك فـي أولـو
*** *** ***
خلاّنـي مـا خلّـى البـلـد
ترا ديـك تمـورو ومنجلـو
وكارديـك متـورو الياولـد
لليلـي شاقّـهـا جـدولـو
*** *** ***
ديـك أمّـو مـا دام العمـر
لابــد يـجـي وتتأمَّـلـو
وزي ماهي صابري مع الكبر
زيـي الصـبـر بتحمـلـو
*** ***
الدنيـا بيتنـا المـن تمـر
مـن دوم نعرشـو ونرملـو
في العاشو فيها بـلا العمـر
والفاتـو قـبـل يكمِّـلـو

[محمد سليمان]

لبن الطيور

** **
يوت قلبي يدّي قبل تدور
طول حبِّي ديمة قَبَل عينيك
فضَّل لي بس لبن الطيور
ما خِبر بكانو أجيبو ليك
*** *** ***
لامن زماني عليّ يجور
أكمد كياني صبر وأجيك
وما ألقى خردلة من شعور
طيِّب تخيِّب ظنِّي فيك
*** *** ***
شقّيش أقبِّل وين أروح
وأنا تاني مجروح من وشيك
يا غربة ياليل يا نزوح
دغش الغبش ما بات وشيك ؟
**** **** ****
يا غلبي كلما الليل دخل
ياني المغنِّي "النجمة ديك“"
ولاَّ القِدر يرجى النخل
لامِن يشيل قادر عليك
**** **** ****
يا ريتني خلّيت الرياح
في الغربة ترميك بالأسى
من قلبي ما دلّيت جناح
يحميكَا في ذاك المسا
كان ما إنجرحت بلا الجراح
الفيِّ قبلك أوعسى
صبراً عليك محقتو راح
يقدر عليها ييبسه
*** **** ***
جيت لي غرد وأنا قلت بلد
لمتنا في المنفى القسى
طول عمري لي عينتك مدد
حين أحسى غيمتك تحبسه
*** *** ***
زول حاضري بالصدفة إستراح
في ضلِّي أول ما رسى
وجكّن جرابو نساني راح
وفضَّل ضليلي المانسى
…. …. ….
ليمونة فوق أزيار سبيل
عابث عياني يقصقصه
لابدّ من صبراً طويل
شان يربى شوكه ويحرسه

[محمد سليمان]

يا متخبية خلف وضوحك
يا متخبية ...
خلف وضوحك
أمرقي داخُل ..
تلقي الغيم الطاش
إتلقط
لمّه وربَّط ..
ربَّط ونقّط
نقّط ورشّى
الغبن إتفشّى
القابض طينك
وطاب في دوحك
... ... ...
يصحى الشجر اليابس
أخضر
يضحى الأخضر
زائد وأنضر
يرجع طيراً
غِصب إتهجر
وشوش ..
عشعش ..
وعمَّر روحك .
... ... ...
يترى الحلم
الفينا إتحجّر
وندرأ نزوحك
تالا المدن ..
المصّت دمِّك
ودسَّت فوحك
قسّت همِّك
وقصَّت موحك ..
... ... ...
يا متخبية ...
وأنا مفضوحك
رنّة فرحك ..
صنّة ترحك ..
وين ما أقبِّل
ياني بروحك
أي مرتكب الصاح
ونصوحك ..
... ... ...
كَجَر الصمتِ
وكت داهمني
كنت متلبِّس ...
بي غنواتاً ليك
إتكرمن
من سر بوحك
للأطفال
بالزمن الجايي
الزمن الطيِّب
زمن الخير
الجالبة فتوحك
يقفل حرباً ..
باحتة جروحك
وطوفان جدباً
محّن نوحك ..
... ... ...
كبّر طفلك
ونشّن حجرو
قام الصمتِ وكجرو ..
إنكجروا ..؟
إنعدِّيتي ..
وشبّت أزمة
... ...
بين فرقات
الضو والعتمة
شقَّ نسيم
لي عِرْق الكتمة
خالَ النخل
العاول طوّل
قال وإستشهد
بي عمَنَوَّل :-
"المنحوس ..
هجّر تربالك
والمجروس ...
يا الردم الجدول
ودكَّ أطفالك
تحت الردمة
... ... ...
وقامت طلقة ..
تجاه النسمة ..
الساكنة النخل
العالي الأسمى ..
حاض الطير الحامل ..
هجمة
طرح الغيم الشايل ..
صدمة
داخ النحل العامل ..
صُرمة
... ... ...
رجمة ورجمة
في حلقَ الليل
إنشرقت نجمة
رقد النيل هبّود
بالوجمة
نفدت شيمة
بقدرة قادر
طارت غيمة
وصارت باكر
باكر رحمة
مدّت
وندّت
وشدّت
خيل الحيل
بالبسمة
نخل الغبش
الدغش إتلمَّا
الأبنوس الجاسر
يمّة ....؟
هبَّ تبلدي
تحدي وهمّة
وبحر المالح
كبّر وسمَّا
"الأديان
في القلب
يا أمّة
والإنسان
في الدربِ
أهمَّ"
... ... ... ...
البلد إتحول
بي مسموحك
ناس بتكاتل
لأجل سفوحك
ما يسقيهن
غير فد جدول
جدول
خيرو الخاوي
نضوحك
لا أشواك
تحميك تتجوّل
لا أسلاك
تنصلبط سوحك
... ... ... ... ...
يا ممتلية
كجوفي فجيعة
وآخرك أوّل
أو معتلية
كطمي الشوق
القلب الماحل
راحل طوّل
زي دعوات
الناس الظُلَّم
لمّا عليها الغول
إنغوّل
... ... ...
حلمي مدردح
دخري فقارى
إرثو ...
ضكارة
جسارة
بصارة
بإيد كرّاسو
وبي إيد فأسو
لو لا إحساسو
بعزّة ناسو
كان تكَى راسو
زمان وإتسوّل
زولاً طبعو
يفجِّر نبعو
بدّع زرعو
وماسك الأول
... ... ...
سوَّى حضارة
وشرَّف لوحك
شرحو ..
شروحك
مسحو ..
مسوحك
يفقد عطفك
ويأبى ينوحك
غامل يوم
راح ترجعي فيهو
ومجد بنيهو يلاقي
صروحك
... ... ...
جهراً ترجعي
ياوضّاحة
يا مرفوع للقوّة
صمودك
صبر الناس
اليوت كدّاحة
لنضرة عودك
... ... ...
المارقين
الذمّة هجائر
الساكتين
فوق رأي
وبصائر
مطر الحق
بالحيل سحّاحة
ناراً بق
لليل صحّاحة
شالت وجع الحال
في أصفاحه
وتنزف شان
ما تبرى جروحك
وتعبك راحة
... ... ...
شدِّي النيل الأبيض
فرسك
وفيض الأزرق
فينا جموحك
مقداف فألك
ومرسى طموحك
الإنسان اليسمع
بالك
يعرف مالك
يفتح خِزَنو
و يستر حالك
يلفح إجنو
ويقلع نالك
يكتل حزنو
ويروي قموحك
رافع رسنو
وراتعة أمبوحك
... ... ...
تنمسيبو
هديراً طيِّب
وتصحي
خرير الفجر
صبوحك
... ... ...
عشتي آواضحة
وراء مخباكي
ويا متخبية
خلف وضوحك
عشتي أصيلة
كأرضك ونيله
ومرتع واحد
لألفِ قبيلة
... ... ...
يا ال لبنايتِك ..
من غنمايتِك
يوم ما إنطفت النار
في لدايتِك
غيَّر زيرك
ولاّ ملوحك
... ... ...
قدمك قاشر
قطع الفاشر
سمسم باكر
باهي مسوحك
... ... ...
سترة بدنك
قطنة وطنك
طينك سكنك
نبضك مكنك
عرفك فطَنك
تبري جروحك
يا الطوفانك
صدراً ماهل
وشرف العزّة
الأحمر
نوحك
من دعتاية الزمن
الكافر
ينصر دينك
وتسلم روحك
... ... ...
تسلمي واضحة
وراء مخباكي
أو متخبية
خلفِ وضوحك

[محمد سليمان]

قـادرة أبـسـم

إنــت لــي بـتـقـول كـــلام
والـقـلـب شــايــف كــــلام
والـحـصـل مــنــك تــمــام
خلّـى مــن ريـدنـا الـسـلام
**** **** ****
شـمـعـة الحـنـيـة راحـــت
روحة في جـوف الضـلام
والطيور على دوحة ناحت
تــانــي هــقِّـــل يـاغــمــام
**** **** ****
ويـنــك آرمـــل الـتـلاقــي
وويـنـي يــا بـــدر الـتـمـام
والفـقـش فــاح بالـسـواقـي
مـالــو بتحـتـحـت تُـمــام ؟
**** **** ****
مانـي مَـن يرمـي الحمـالـة
وفــوق مـقـاديـرو الـمــلام
لا أبـــرئ الـنـفـس مــالــه
ومــال مـشـاويـر الـغــرام
**** **** ****
مــن قـبـل يـبـدا الـخـصـام
كـنـت عـارفـاهـو الـخـتـام
إنــــت داب نـفـســك دوام
وقلبي داب في الهـم وعـام
**** **** ****
نفسـي أبنـي البـرج عـالـي
وإنـــت مـتـواتـي الـحـمـام
سـاعـا لــي شــح اللـيـالـي
مـاهــو لـلـتـرف الـحــرام
**** ***
مـا إصطفيـتـك لــي بـرايـا
لـي ولــي أهـلـي الـقـراب
إشتـهـيـتـك زول ضــرايــا
وشفت فيـك راجـل عقـاب
**** **** ****
قـلـتَّ لــي خـلِّـي القـرايـة
والنـشـوف الـفـي الكـتـاب
بيـكـى أحـقـق تـــام مـنـايـا
وليـكـي أحـــلام الـشـبـاب
**** **** ***
كـيــف تبـعـتـك واعـمـايــا
وكيـف بريتـك يــا ســراب
وليـش حريتـك لـي سمـايـا
وإنـت نافـد يـا سـحـاب ؟!
**** **** ****
خاتـي أنـا الصـدَّق روايــة
مـــن خـيــال الإغــتــراب
يا اللي فاكـر الريـد غوايـة
غاب ضميرك والـلا عـاب
**** **** ****
ألــف ليـلـى ولـيــل بـلايــا
بإنتظـارك فـي ألــف بــاب
وفـي شـرف بالـي البـلايـا
وألـف مرحـب ويـا حبـاب
*** **** *****
قـادرة أبـسـم فــي النهـايـة
صابـرة بتخطـى الصعـاب
عـنـدي مــا فيـهـو الكفـايـة
مــن نَـفَـس تـسّـب تـسـاب
**** **** ****
عيـنـي فــي عيـنـة هـوايــا
حبـي مدفـون فـي التـراب
أروي بـي دمـعـي ودمـايـا
وماب يشيلـو الريـح هبـاب

[محمد سليمان]

بيروتْ رِبَاةْ بارُودْ


حبّت تمُوت
بيروت !
..
تحرَق ..
حراق الصوت !
..
تغرَق ..
غراق الحوت !
..
زي طائر
الفينيق
المامناسبَ الموت !!
على كيفه
حرّة تموت !؟
..
أصلاً رباةْ بارود
من دون
بَرُود
وحَنُوط
زيْ لَمْبَة الحانًوت
مِتْعَوِداهُو ..
الموتْ !!؟
..
شان آخِر العنقود !
والأُولَى
في البنُّوت !
دون المُدُن
بيروت
الموت مَدَلِّعه
مُوت !!
مدِّيلَه سبعة
حيوت !
يوما التموتْ ..
هُو يموت !!
..
يا بِتْ
عليكي سلام
جيّاش وما مشروط
أحلامنا
تبقى أحلام
وبأوهامه
تمشي زلوط !!
..
مافي الوتر
ده كلام
فارغ ..
ملانا سكوت
عبَّ المطر
نسّام
راس الشدر منكوت
..
تلقاني أنا الإنسان
بتشهَّى دايماً
يُوتْ
جيَّة زمن حنّان
وماليْ نفِسْ
في الموتْ !!
..
سارجَ الهواء
المجَّان
على كيفي
وين ما أفوت ؟!
..
بالفيِّي من وجدان
جاسر
على الجبروت
قادر
على الطغيان
والطاغية
والطاغُوت ؟
..
كم مَرَّة
يا لبنان !!
تابوت
وراء تابوت !؟
ومنُّو .. وجديد ..
غليان !!
تنزِل من الملكوت ؟
..
يا أرْضة
نحنا حجار
جرَّبنا كم مارُوت
يلقانا ..
ما يحتار
ذات الغلَب هاروت ؟؟!
...
هدِّمنا ..
يا طيّار
ما تخلِّي فوقنا
بيوت
عَدِِّمنا ..
نفّاخ نار ,,
أطفالنا سُوطُن
سُوطْ
تلقى الدفنتُو
بِِذار
تِحْتَ الدم
المحتُوتْ
..
أوَّل تجي
الأمطار
من حلْمنا
المبعُوت
حالاًّ تضجْ
الدار
والطير يغالِطْ
صوت
أطفالَه
والأزهار
قاشرة
وتلوِّح يُوتْ
..
الإيد دوَم
في الإيد
والاِبتسامة تفُوت
يوماتي
عربون عيد
بالأمنيات مغمُوت !
..
من تاني يا حقَّار
بالله
قَبْلِ تفوت
دفِّق عجاج النار
صُبْ ما تَصُبْ
من موت
وما فيكَا من جبروت
دُوس الحشا
بالبُوت ؟!
..
بسْ كلّو كلُّو
يفوت
ومِنْ معصَمْ البنُّوت
تمرُق
كما الياقوت
منُّو .. وجديد
بيروت !!
..
هادي الفضا
المحروت
بالطائرات
الموت
يمْلِنُّو بالزغروت
برق المطر
هطْ سوط !
..
..
الليلة لِيل
والليل
غير الزمان
وقِبيل .؟!
ديل الأبَتْ
ما تشيل ..
غِيرُن ..
ضهُور الخيل !؟
..
حُرّاس ..
وكيف فرّاس
يتحدُّوا ...
مُرَّ الويل ؟
رأساً ..
مارون الراس
قدماً ...
لِبِنْتِ جبيل ؟!
..
..
*ولدي ..
الدرب دا طويل
دايْرَ النَفَسْ
بالحيل
..
خبِّر جمال الشيل
من خطْوَة ..
يبدَا الميل
..
قصَبَةْ مدالقَ السيل
قطعاً ..
خدارَه تقيل
,,
راس الجبل
مُو نخيل
وين ريحُو مال
هُو يميل
..
فُوت اليجيك
في فتيل
للبين رياضو أصيل
..
فَزَعْ الأخيْ
مُو دخيل
والماطراكَ .. بخيل !!
..
سِحْرَ العيون ..الريل
وين ,,؟
يوم دماها تسيل ..؟
..
دمعاً قبيلة
هميل
ما جففُو المنديل !؟
..
خل الوراكْ
لله
وابْرَى الدرِبْ
دا عديل
يا جِِبْتَ حَدْ
للآه
يا رُحْ فداكَ
كتيل
...
- شكراً ..
يا ابويا جزيل
شكراً ..
لإسرائيل !!
وأمريكا أمَّ الويل ؟!
...
ظنَّت –تعالى-
الله..
سوّاها عزرائيل !!
لابُدْ تشيلْ الآهـ
وما طفَّفت من كيل !
...
شكراً ..
لكلِّ عميل !
مِنَّ الفرات
للنيل ؟؟!
..
ديل علَّمُوني
أشيلْ
حِمْلي المخيف
وتقيل
وحداني
فوق كتفيْ
دامْ كتْفَ أخيِّي
شلِيل !!
..
عُذراً ..
كتير لبنان
صبْراً
على التنكيل
..
فِعْلاً
هي الأحزان
تمِن إنِّك
أبقى جميل !؟
..
سيِّد ديموقراطي
قِدّامي دُغْرِي
عدِيل
حاضِر على الآتي
والماضي أصْلُو أصيلْ
..
يا أروع الأوطان
يا مَن
تكيل العين
بهجة وجمال فتّان
"قانا"
أفْرَعِك من وين ..؟!
ولاَّ أفزعِك
بي مين ؟؟!
"يا صيدا"
والغزلان × فتنتك
× أتنين
..
لبنان ؟
سُمُو الفنّان
عُرْفُو ؟!
وتراثُو .؟. ودين ؟!
أنهار ..!؟
وطير ..؟! وجنان !؟
غلمانَه ؟!!
حُورَه العين !؟
ساحل .. ؟!
سهول .؟. وديان .؟
رملُو ..؟!
وجبالو .؟. وطين ؟
وما فوقو
من إنسان ..!!؟
..
بيساوي = جنديين !
..
أم أنَّ هادي النار
هادي الدمار
الشين ؟؟
هادي الزفار
الحارْ
مِن أجلِ جِنذيين !!
..
يا خُبْثِ ذاك الفأر
جاب التراب
مِنْ وين ؟!
كُل الشَبْ المدرارْ
ما رَوَّقك ...
يا طينْ ؟!
..
لا أشْتُمْ العربان
والواقِفِين
بِينْ ..بِينْ !!؟
..
فليمْدَحه الخُذلانْ
وعار الفِرَج
لا وين !؟
..
عالَم بيتفرّج
على دم يلُكْ العين
وآخر بيتحرّج ..
الله ..
ده عالَم وين ؟؟!
جيش مصْرْ
يحمي مصْرْ !!؟
علَى مصْر لا تثرِيب
بسْ عَن وطن
في الأسْر
يا حُزْني ..
يعني غريب ..؟
أم يعني
مَنْ في القصْرْ
مَا يحمي تلاّبيب ؟!
..
شرفانْ فتَح دكّان
العين على
الفي الجيب ؟!
ما ليهُو بالأوطان
غير كم تُرابَه
يجيب !؟
..
مِنْتلِّحْ الأديانْ
بالعيب
تغطِّي العِيبْ
غطْ عوْرة السلطان
تكْشِفْلُو
ما في الغيب !!؟؟
..
من نار
دخانَه ... لسان
غضَب النبي
الغلِّيب !
..
درب السلامة
قريب !
..
درب السلامة
نسيب
فاضي الكلام
ما يجيب
بهماً
جَرابًو الضِيب
..
ضيباً ..
في واشنطون
وآخر
في تلابيب
تالتْ تِحِت قانون
قانون دمار ..
تخريب
روعة نظام الكون
يرْتَع وسطنا
قريب !؟
..
دايرين حياتنا
تكون
حُرْقة ونواح
ونحيب
..
لكن ..
وربَّ الكون
هادي الضلامة
تخيب
الروح فُراقَه
يهون
شانْ عزّتك يا حبيب
..
يا دُخْري تربَى
بدون
خبزِ الغريب
وحليب
الأرزقي المأفون
بأعشابه
"شَبْعَا" نطيب ,,.؟
..
دا وطن ..
وأنا المفتون
بي أهْلُو ..
سهْلُو ,, خصيب
أمسِك عليكْ
العُون
أنا هُون
طَلعبي ... نصيب ؟
..
بين المعزَّة مصُون
يا بوي
في أحَنَّ قِلِيب
..
من لحْمَنا
المحرُوق
..
من دمَّنا
المدلوق
..
من رِحْمَنا ..
المسروق
..
مِنْ حِلْمَنا ..
المشنوقْ
..
مِنْ قلْبَنا
المطفوق
بي حبّنا
المذنوق
لي شعْبنا
المدقوق
بيناتُو كَمْ خاذوق
..
من جوْفَنا
المشْرُوق

منْ صفَّنا
المشقوق
..
شدَر الوطَنْ ..
مَخَلُوق
دايماً ..
يطُول لا فُوق
..
ويا فُوق ..
رعُود وبروقْ
أنْزِل ..
مطَر ..
ما يرُوق
إلاّ ان يرُوق
الشوق
بأنبَل
وأعزَّ شروق
..
وتطْلَع فجُر
لبنان
مِن عضمك
المسلوق
..
المجْدِ للإنسان
والكون
دا ما مطلوق؟

لبنانْ
يظَل لبنان
رُغْمَ القَهَر ْ
..
يا ..
عِلـــوق ؟؟
...
الدمْ
سُقا الأوطان
وللقادمين مارُوق

[محمد سليمان]

سوقنى معاك يا حمام

سوقنى معاك يا حمام
سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منام
سوقني محل ماالمحنة
وأيادي تقطر سلام
سماحة الحياة فوق أهلنا
وبلادي تقرقر وئام
غلابه وأمان مو الطيابة
ضكارى بصارى وكرام
حبابه الحبان في بابه
وتدخلوا عليّ الحرام
فقارى ولكن غنايا
غنايا بهذا الغمام
بهذا النيل كم تغايا
وتيرابا نرميهو قام
إرادة القمره البتقدر
براها تضوي الضلام
شعاع شمشاً ياما خدّر
وإذا يبَّس لا يُلام
فيابا خرابا الحرابة
وخرابة فكر سوسي سام
خرابة الكل نفسو تأبى
عقابه .. تلِم عم سام
ولِيد مخلوق للقراية
خزين مدخور للجِسام
تتمر نيتو التخاية
إلاما مذهلل إلام
درب من دم ماب يودي
حرِب سُبّه .. حرب حرام
تشيل وتشيل مابِ تدِّي
عُقب آخرتا إنهزام
بطانة الشيطان قديمِة
وبعد دا منو العرشو دام
إذا الإنسان ما ليهُ قيمِة
علي إيش خلَّفُو سام وحام
تعالوا الدم ما هو مويةِ
ولا ها ترايي المسام
خباري بحمر في أخويا
وطراوة الخوة إبتسام
تعالوا نحانن بعضنا
نخل قلبو على التُمام
نبضنا يشهل أرضنا
وأرضنا تجِم العضام
تعالوا بدل نبني ساتر
نخيب ظن الصدام
نطَّيب للعازه خاطر
نقوم لأطفاله سام
أخير كرّاكةً بتفتح
حفير وتراقد الركام
أم الدبابة البتكشح
شخير الموت الزؤام
تعال لي غابتك يا خيرا
تعال لها يا أسده الهمام
بدل دوشكة يغني طيره
محل قنبلة عش نعام
بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
بساط أحمدي كم يشيلنا
وتشهِّلنا على الدوام
نَقِل ليلنا تقوِّي حيلنا
ودليلنا تمام التمام
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام
ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام
حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
فلاحة العالم تعمر
محبّة مودة ووئام
تشمِّر ساعد السلام
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام