حكاية مرضي بالكورة زمان .. الله يشفيكم

[علاء كرار]

و الله يا جماعة انا كنت مرضان بالكورة مرض شديد خلاص و كنت من الناس البيمسكو الراديو و ايدو على مؤشر الموجات عشان يظبط الموجة لانو الارسال ضعيييف جدا ، و كان الفرح بالانتصارات يتملكني لدرجة الجنون و الزار و كانت الهزيمة تصيبني بالمرض فعلا لا مجازا . ثم .... عندما وصلت الكورة السودانية في أواخر الثمانينات و التسعينات الى الحضيض و توالت الهزائم المرة و القاسية على الفرق السودانية و المنتخب من اليسوى و من الما يسوى زهدت في الكورة و اعتزلت مشاهدتها و متابعتها ثم تأصل هذا الشيئ في نفسي و بقيت ما بشوف الكورة نهائيا و حتى في التلفزيون انطها بالريموت ذي الشيئ الكعب و تصدقوا انا بعد كاس العالم بتاع سنة 90 تاني ما تابعت كاس عالم إلا بعض المباريات المنتقاة فعلا.
صقور الجديان و شباب الهلال و المريخ ... فتحوا شهيتنا مجددا للكورة و فن الكورة و المستطيل الاخضر حلقوا بنا لآفاق الانتصارات .. احيوا الفرح الزمان.. زمن النقر و حموري و بشارة ايام الزمن السمح و كل شيئ سمح ..

احيي الكابتن محمد عبد الله مازدا و طاقمه و احيي صقور الجديان و الشعب السوداني كله . و احيي نفسي و نفوسنا التواقة للإنتصارات في زمان الهزائم اليومية في ضروب الحياة الاخرى
و ها قد عاد مشجع معتزل سابق لمساطب المشجعين و شاشات الفضائية السودانية و ART بقووووة ..

انا صقر جديان حتى النخاع
و هلالابي على السكين حتى دمي ازرق عديييل

[أبوزهير]

عيييييييييييييك
انت من زمن النقر وحموري وبشاره

[علاء كرار]

عيييييييييييييك
انت من زمن النقر وحموري وبشاره
وينكم يا ناس جكسا و شواطين

[أبوزهير]

علاء
والله العظيم انا دفعة مازدا. وصديق كمان ايه رايك

[علاء كرار]

علاء
والله العظيم انا دفعة مازدا. وصديق كمان ايه رايك

أيي و الله مصدقك دفعة مازدا يا ابو زهير

بس مازدا اليابانية و دي قالوا قبل الحرب العالمية الاولى

[عوض جلاس]

مبروك عليك العودة الطوعية لمرضى الكورة وإنشاء الله تتواصل الانتصارات حتى لا تصيبك الهزائم بجميع الأمراض المستوطنة وإنشاء الله سيكون النصر حليف الفرق السوداني أينما حلت وارتحلت لأنهم أصبحو لعيبة محترفين وزالت رهبة المباريات من أنفسهم وتعودوا على صيحات الجماهير الهادرة واصبحو متمرسين لمواجهة اي ضغوط سواء من الفريق الخصم أو الجمهور أو الحكم
نتمنى مزيداً من التطور للرياضة السودانية في ظل هذه الصحوة المباركة
وشكراً لك ايها الهلالابي الراقي لأنك ستزيدنا قوة في المنتدى ضد المريخاب

[أبوزهير]

علاء
والله دفعت محمد عبدالله مدرب المريخ والفريق القومي 4 سنوات مع بعض في جامعة الخرطوم بس هو درس لغة فرنسيه وانا درست الفلسفة لكن كنا في كلية واحده.
كبرتونا ساكت لامننا في عبدو جده وجلك البركل دوت كم. اسع عاين لى مازدا المدرب فيه شيب. مو عز الشباب.

[عمر مجذوب خطيب]

علاء الدين انا زيم خليت الكورة والهلال بعد مجزرة الشطب الكبيرة عام 92 - خلينا الهلال بعد خلا اسامة الثغر وعصام بلاتيني وعمر النقي - لكن رجعنا الان لان الوضع اختلف وبتنا نشهد صحوة لكن شئ من القديم يطل احيانا( انظر لاداء الهلال امام الترجي) المهم رجعنا رجوع القمرا لي وطن القماري

[نادر رشاد]

صقر الجديان الهلالي علاء
أنت بالتأكيد لن تعتزل لكنك كنت حردان حرارة قلب ساكت ، وبالفعل نحن كنا في ذلك الزمان الذي تحكي عنه نشجع الكرة بعدم وعي لأننا كنا نشجعها بتهور وفي معيتنا الكثيرين من رباعتنا من أبناء الحي وزملاء الدراسة منهم أخونا عمر مجذوب خطيب، وجاءت الهزائم إلينا بفوائد حيث قللت من سيطرة داء التشجيع المفرط ، وأنا شخصياً لم أحرد مثلك وإستمريت في التشجيع ومشاهدة المباريات متى ما اتحيت لي الفرصة إن كانت على الطبيعة أو عبر الشاشات التلفزيونية أو الإذاعات ...، ولكني في حالة النصر أو الهزيمة اتعشى بمزاج وأنوم نوم قرير العين هانيها .
فحقاً الكرة السودانية تشهد عودة الحيوية والنشاط في الجسد المريض ، وأعتقد أن الرأسمالية لها دور في هذه العافية على المستوى الفني برغم أنها أخذت الكثير من هيبة المستوى الإداري .
مع تمنياتنا للمنتخب بالتوفيق في ما تبقى من مشواره الأممي الأفريقي ، كما نلحق الدعوات كذلك لقمتي الكرة في وطنا الغالي ، لتمتد لحظات الفرح لأهل السودان التي أفقدها لهم السياسيون .

كل الود ،،،

[أبو السيوف]

عزيزي علاء اولاً مشتاقين بالكراتين
ترجع تشجع الكوره ما قلنا حاجه لكن اوع من المرضه بعد الفطام حالته بتكون صعبه ،انا كمان معجب جدا بالإنتصارات الأخيره وحقيقي انا الكوره عندي ميته من زمـــــــــــــــــان لكن على قولك بدأت تصحى بس ما عايز ابقى مرضان كوره

[علاء كرار]

علاء
والله دفعت محمد عبدالله مدرب المريخ والفريق القومي 4 سنوات مع بعض في جامعة الخرطوم بس هو درس لغة فرنسيه وانا درست الفلسفة لكن كنا في كلية واحده.
كبرتونا ساكت لامننا في عبدو جده وجلك البركل دوت كم. اسع عاين لى مازدا المدرب فيه شيب. مو عز الشباب.

الرائع ابو زهير ..
يعلم الله انت قلبك كلوا شباب و دفعة شباب صقور الجديان الحققو هذا النصر المدوي ده.. بس عبدو جدة كلامو المن زمن جدي و حكاويهو ديك تخليهو يتصدر مجلس الجلاكين .. و الله مو كدي ؟؟؟؟؟

[علاء كرار]

علاء الدين انا زيم خليت الكورة والهلال بعد مجزرة الشطب الكبيرة عام 92 - خلينا الهلال بعد خلا اسامة الثغر وعصام بلاتيني وعمر النقي - لكن رجعنا الان لان الوضع اختلف وبتنا نشهد صحوة لكن شئ من القديم يطل احيانا( انظر لاداء الهلال امام الترجي) المهم رجعنا رجوع القمرا لي وطن القماري

يا سلاااااااام يا عمر و انت تشاهد الاولاد يتناقلوا الكورة برشاقة و اناقة و هم يعزفوا سيمفونية رائعة تدغدق القلوب طربا و فرحا ، و تشوف الازرق ده مالي ارض الملعب لامن مدفق في قلوبنا .. انا راجع زي ما انت راجع و الله يدينا القوة على قليبنا الخيف ده في الفرح و الزعل

[علاء كرار]

صقر الجديان الهلالي علاء
أنت بالتأكيد لن تعتزل لكنك كنت حردان حرارة قلب ساكت ، وبالفعل نحن كنا في ذلك الزمان الذي تحكي عنه نشجع الكرة بعدم وعي لأننا كنا نشجعها بتهور وفي معيتنا الكثيرين من رباعتنا من أبناء الحي وزملاء الدراسة منهم أخونا عمر مجذوب خطيب، وجاءت الهزائم إلينا بفوائد حيث قللت من سيطرة داء التشجيع المفرط ، وأنا شخصياً لم أحرد مثلك وإستمريت في التشجيع ومشاهدة المباريات متى ما اتحيت لي الفرصة إن كانت على الطبيعة أو عبر الشاشات التلفزيونية أو الإذاعات ...، ولكني في حالة النصر أو الهزيمة اتعشى بمزاج وأنوم نوم قرير العين هانيها .
فحقاً الكرة السودانية تشهد عودة الحيوية والنشاط في الجسد المريض ، وأعتقد أن الرأسمالية لها دور في هذه العافية على المستوى الفني برغم أنها أخذت الكثير من هيبة المستوى الإداري .
مع تمنياتنا للمنتخب بالتوفيق في ما تبقى من مشواره الأممي الأفريقي ، كما نلحق الدعوات كذلك لقمتي الكرة في وطنا الغالي ، لتمتد لحظات الفرح لأهل السودان التي أفقدها لهم السياسيون .

كل الود ،،،

العزيز نادر ..
و الله صدقت هي كانت حردة لكن ماها حردة نصاح ، كانت متل حردي الجقر . بس طبعا بعد الزمن ده و البطان الجونا الواحد إتروض شوية على ضبط انفعالاته و على قولك الفترة المظلمة ديك في تاريخ الكورة السودانية خلت توقعات الناس النصر و الهزيمة بنسب معقولة و هو ما اكسب الناس شوية مناعة من جنس المرض الكان ماسكني
مودتي يا الغالي

[علاء كرار]

عزيزي علاء اولاً مشتاقين بالكراتين
ترجع تشجع الكوره ما قلنا حاجه لكن اوع من المرضه بعد الفطام حالته بتكون صعبه ،انا كمان معجب جدا بالإنتصارات الأخيره وحقيقي انا الكوره عندي ميته من زمـــــــــــــــــان لكن على قولك بدأت تصحى بس ما عايز ابقى مرضان كوره

وينك يا الغالي ابو السيوف ..

و الله الانتصارات شيئ يفتح النفس و يشرح القلب و الشباب ايغظوا فينا حبا دفين للمجنونة المدورة بس فترة الخمول اللي اصابت مشاعرنا اتجاه الكورة ادتنا مناعة من المرضة و شوية عقلانية .. و الله الكورة متعة ما بعدها لامن تكون كورة صح و بي اصولها ارجع يا ابو السيوف ...
مشكور على اتصالك يا الغالي و اتطلع للقاءك قريبا انشاء الله و رمضان كريم

[عصام سرالختم]

انا صقر جديان حتى النخاع
و هلالابي على السكين حتى دمي ازرق عديييل



الاخ علاء احمد الحسين
وينك يا راجل .... رمضان كريم وكل عام وانتم بخير
ياريت تكون مواصل تشجيعك لصقور الجديان والهلال :confused:
وخليك جاهز لتشاهد مباراة الصقور ضد المنتخب الغانى يوم الاحد القادم 6/9 فى أكرا بغانا
فى التصفيات النهائية المؤهلة لكاس العالم 2010 بجنوب افريقيا
وخايفك تغير رايك وتعتزل تشجيع الكرة مرة اخرى وتطلقها طلاق ابدى بعد امسية الاحد القادم ..
والذى اتوقع ان يكون الاحد الحزين للكرة السودانية ..
وقد يقول قائل .. تفاءلوا الخير تجدوه ...
خلينا متفائلين عسى ولعل

[الارباب]

معقولة
علاء كرار شخصيا
اهلا بابن الهلال البار
ونحن عارفن الهلالاب من طبعهم
وين ناس كرووووووووووم وازهرى
الغريبة امينا العام دا المفروض من طبعوا يكون هلالابى بس ممكن يكون الكلمة الشاذة