بـــــــــــــــــــــلادي أنــــــــــــــــــا ...

[جدو]

بلادي أنا
بلاد ناسا في أول شئ
مواريثهم كتاب الله ،
وخيل مشدود،
وسيف مسنون حداه درع،
وتقاقيبهم تسرج الليل مع الحيران
وشيخا في الخلاوي ورع
وكم نخلات تهبهب فوق جروف الساب
وبقرة حلوبة تتضرع وليها ضرع ،،،
وساقية تصحّي الليل مع الفجراوى..
يبكى الليل ويدلق في جداولو دمع
يخدر في بلادي سلام ..
خدرة شاربي موية النيل ..
تزرد في البوادي زرع
بلادي أنا بتشيل الناس وكل الناس
وساع بخيرها لينا يسع،
وتدفق مياه النيل علي الوديان
بياض الفضة في وهج الهجير بتشع،،،
بلادي سهول ،،بلادي حقول،،
بلادي الجنة للشـافوها ،أو للبرة بيها سمع ،،
بلادي أنا بلاد ناساً تكرم الضيف
وحتى الطير يجيها جيعان
ومن أطراف تقيها شبع ،،
بلادي الصفقة والطنبور ،،
وبنوتاً تحاكي الخيل
،يشابن زيي جدي الريل،
وشبالن مكنن في طريفو ودع ،،
بلادي أمان ،،بلادي حنان،،
وناسها حنان ،يكفكفوا دمعة المفجوع ،
يبدوا الغير علي ذاتهم ،
يقسموا اللقمة بيناتهم ،
ويدوا الزاد ،حتى إن كان مصيرهم جوع ،
يحبوا الدار ،
يموتوا عشان حقوق الجار ،
ويخوضوا النار عشان فد دمعة ،،
وكيف الحال كان شافوها
سايلة دموع ؟؟،،،،
ديل أهلى..
البقيف في الداره 00 وسط الداره00
وأتنبر وأقول للدنيا ديل أهلي
عرب ممزوجة بي دم الزنوج الحارة..
ديل أهلي
ديل قبيلتي00 لما أدور أفصل للبدور فصلي..
أسياد قلبي والإحساس
وسافر في بحار شوقم زمان عقلي
أقول بعضى..
ألاقيهم تسربوا فى مسارب الروح بقو كلي
محل قبلت ألقاهم معايا00 معايا زي ضلى
لو ما جيت من زي ديل..
كان 000أسفاي..
وآمأساتي..
وآذلي..
تصور كيف يكون الحال
لو ما كنت سوداني وأهل الحارة ما أهلي
تصور كيف؟

لمشاهدة أغنية بلادى أنا (http://www.youtube.com/watch?v=hA1S9KHAWNE)

[عيدابي]

جدو هو كده الله يديك العافية
ودايرين نطبق كلام شيخنا اسماعيل حسن ده عملى
وما لها الا رجالها
الى الامام اخى جدو

[جدو]

جدو هو كده الله يديك العافية
ودايرين نطبق كلام شيخنا اسماعيل حسن ده عملى
وما لها الا رجالها
الى الامام اخى جدو

أخى/ عيدابى
لك التحية وشكرا على مرورك
فعلا ستبقى فينا كل مقومات المروءة والشجاعة والكرم والعفو عند المقدره ما دومنا نتمسك بديننا الحنيف وثقافتنا الثره وماضى أجدادنا التليد . و هذا سر تميزنا عن غيرنا.
ودمــــــــــــــــــــــــــتم .

[ضمره بغدادى]

جدو
لك الشكر على هذه الرائعة .وعبركم احيى الشاعر القامة اسماعيل ود حد الزين واترحم عليه اللهم وسع مرقده ونوره .
هذا الذى ننشده نحن اليوم فى البركل ولابد ان يكون واقعا ملموسا .
اكرر لك كل شكرى

[عوض جلاس]

مشكور أخونا جدو على هذه المشاركة الجميلة والحماسية ورحم الله شاعرها إسماعين ود حد الزين رحمة واسعة ونسأل الله أن نتأسى بما كتبه في الفخر والحماسة والبطولة

[جدو]

جدو
لك الشكر على هذه الرائعة .وعبركم احيى الشاعر القامة اسماعيل ود حد الزين واترحم عليه اللهم وسع مرقده ونوره .
هذا الذى ننشده نحن اليوم فى البركل ولابد ان يكون واقعا ملموسا .
اكرر لك كل شكرى

والله ياضمره أخوى ما أظن شاعرنا الفذ اسماعيل حسن تعب فى لملمت هذة المحاسن والصفات بقدر ما هو أبدع وأمتع فى اظهار صورها الجمالية شعرا جميلا.
لاننا بالفعل أصحاب قيم ومثل.

[جدو]

مشكور أخونا جدو على هذه المشاركة الجميلة والحماسية ورحم الله شاعرها إسماعين ود حد الزين رحمة واسعة ونسأل الله أن نتأسى بما كتبه في الفخر والحماسة والبطولة

الأخ / عوض جلاس
مشكور على المرور والهمة العالية فى بركلنا الكبير و ما وجدت مشاركة الا وانت مشارك فيها بالراى السديد والقول الحسن ...شكرا على الاهتمام.
لما اصابنا من احباط جماعى من جراء مافعله ذلك المجرم البائس ببركلنا الكبير رأيت ان يكون ردنا علية بمن نكون نحن ليعرف مقدار من يعادى ووجدت أفضل من يرد علية شاعرنا العملاق اسماعيل حسن عبر بلادى أنا .