بيان العميد عماد الطيب:(مرقنا في السهلة)

[أب شخيت]

الليلة وقَّفنا البرامج...شغَّلنا مارشات عسكرية
قطَّعنا كل الإتصال...كان بالموبايل كان بالثريا
وبرضو حاظرين للتجمهر.. والتجول من عشية
وحتى في القوات تأهب... مستعدين مية مية
ومالين الشوارع جيش..نسير دورية دورية
الآن العميد يصدر.. قرارات نافذة فورية
الآن العميد يصدر.. قرارات نافذة فورية

إيقاف المارشات وظهور الصوت والصورة

بسم الله الرحمن الرحيم
بيان هام من العميد عماد الطيب محمد الطيب

الأخوة الأحباب الأهل والعشيرة
السلام عليكم و رحمة الله
(1) في البدء لابد لي أن أشكر كل الأحباب الذين أوصلوا لي تضامنهم العميق لما رأوه "محنة" تعرضت لها ومعي آخرون في منتدى "عتود دقش"... ولعلي أسميها "منحة" من التواصل الطروب بيننا..!!!.
(2) ما كان يحدث في بوست "عتود دقش" في خلال الفترة الأخيرة بعد ظهور "أب شخيت" المفاجئ والغريب لغالبيتكم ,كان حلقة مستوحاة من برنامج "الكاميرا الخفية" تحت عنوان "كمين للشعراء والمبدعين"...كان لي شرف وضع الخطوط العريضة للخطة و أوكلت للأخ الشقيق و الصديق العزيز جداً "أب شخيت" للقيام بالتنفيذ مع تزويده بكافة الصلاحيات للقيام بكل ما من شأنه إنجاح الحلقة..ونحسب أنه قد أدى دوره المطلوب بفاعلية...فله التقدير..
(3) هذه الفكرة كانت ترمي إلي الدفع بشعرائنا الأفذاذ لنظم جياد القوافي وكرام القصايد بإعطائهم الدافع الشعري الملهم الذي يقدح زناد الشاعرية ...ولعلنا جميعاً إستمتعنا بتلك الغضبات المضرية الشعرية لأولئك العمالقة الشعراء وعلى رأسهم المبدع ود الصيدة والمبدع ود العطاء و المبدعون "أولاد بابكر عمر" وآخرون...فلهم جميعا نحني الهامات إجلالاً وتقديراً واحتراماً...فقد كانوا عند حسن الظن بهم تماماً...
(4) ولابد لي أيضا أن أشكر لفيفاً من الأخوان الذين دفعت ظروف مجريات تنفيذ الخطة على الأرض إلى إشراكهم في "سر الحلقة"...فلم يبخلوا علينا بإسهاماتهم السرية المقدرة "بالتنسيق والإرشاد من وراء خطوط الهاتف" ..وبالمشاركة الفاعلة المعلنة في البوست بما يدفع الخطة بالسير في مراقي النجاح.. وقد ننشر لكم أسماء هؤلاء الأعزاء لاحقاً
(5) أسمحو لي أخيراً أن أسأل أخي رفيق الدرب "الرباطابي" العقيد طبيب الفاضل الفكي عوض الله إختصاصي طب وجراحة العيون بالسلاح الطبي كيف تتخذ لنفسك إسمين غريبين "أب شخيت و أبو أواب" دون أن تخطرني بذلك مسبقاً..!!!......" الله يجازي محنك ومقالبك"..!!.
(6) أكرر شكري وعرفاني و امتناني للجميع و نرجو أن نكون قد وفقنا في البرنامج فكرة وخطة وتنفيذا وتنسيقا وإخراجا ونشرا...و نرجو أن تكونوا قد إستمتعتم بالقصايد الشعرية البديعة التي كانت هي هدفنا المنشود... ونعتذر عن أي ضرر غير مقصود لذاتة قد أصاب بعضاً منا....


العميد/ عماد الطيب محمد الطيب
الخرطوم العاشر من سبتمبر 2007

[أب شخيت]

زيارة مودة للعميد عماد
(مسك الختام)

أخوكم ود رباط...زاير عماد ود عمو شايق
إلاّ عقابو أعوج...مسور يا دوب بتايق
قرّن الحيضان وجاكم... علا التقانت واللبايق
وصى للجنُّون يجوهو...لما يبقى خلاص متايق
ما خلا للأولاد قريشات ...كان هدومن كوم لتايق
ولا حق الدوا للحتالة الديمة تعبان وخلا ضايق
وأم العيال الصابرة ياخوي..توبا الوحيد مشروط فتايق
ما راضي يتلم بالخيوت...لابسه مضمومات رتايق
الشئ المطمنو يا أخوي...غنيمة لبن وحزمات تبايق
يضبحوها إن كانو جاعو...يتمزُّو بالشيات والسلايق
الحياة بتدور البصارة... ترانا نضاير فيها ونضايق
وحالنا مستور يا أخوي...ما اتفرجو فينا الخلايق
ونحنا ما طالبين كتير... ما شهوانين ولا شبايق
حريف الكسرة من صاجنا..نسو فوقو ملاح أم رقايق
والحسد تب مابنعرفوا...متل واحدين قروشن كلايق
زمان كبارنا وصُّونا...وصاتن في الإضنين حلايق
قالولنا أرضوه القليل... ولابد عليهو شكرنا لايق
لكين الفقر قاسي وصعيب... نسايس فيهو و نسايق
كان رضى يوم علينا..يدينا الشلاتيت والدلايق
وكان صبح غضبان في وشينا...يدينا الشلاليت والخزايق
يكسِّر في عضامنا عديل..وفوق روسينا مضروبين فلايق
وبرضو دافرنا الحنين جايين وللحبان شوايق
أصلو القلوب لو كان حُنان و لي عشرة الأخوان عشايق
تلقاها مضمومات شديد ترعى الوداد و حسن العلايق
و مابتقطِّعن الظروف رغم المصاعب والعوايق
@@@@@@@@@@@@@@@@@@@@@@
ديك بنات عمك وخالك... مغبونات حمايق
واقفات بي قُبالك... شوف دمَّاعن خنايق
ما راضيات كتالك... تقوم في الناس حرايق
الساترات لحالك....وللأخوان شقايق
وكت شافوني جيتك...متقاودين رفايق
داخلين جوة بيتك...صرخو مندهشات شهايق
رجعن لي بيوتن...مرتاحات روايق
@@@@@@@@@@@@@@@@@@@@@@
وجونا أخوانا شادَّين..هديك حمّارن هنايق
شن شايلين معاهم...غير ألوان زينة و زوايق
قصايد وا حلاتة..تدِّوب من غلاته..وفيها أبيات رشايق
نرجس وفل وياسمين...زهور فواحة وحدايق
نطرب بي لقاهم...نكون خلان صدايق
ضامِّين لي صفوفنا...متعاصرين لصايق
باذلين من كفوفنا...متحانّين شفايق
متواضعين حالنا ديمة...ما نخرات شنايق
@@@@@@@@@@@@@@@@@@@@@@
العمدة ماهيلكم براكم...مقسّم وما هو حايق
وكان قلتولي أهلو... خلَّونا منضافين لحايق
نحنا أخوانو وصحابو ...معاو في اللَّقا في المضايق
تقول تيمان قادر الله...مقسومين فشايق
سنينا الفاتو عدَّو.... معاو مرن زي دقايق
ود ناسا كرام...نضافاً ما خرايق
شايلين للسيوف...ما متضارين بالدرايق
يكون لعداهو حنضل...والوجع الزرايق
عداك يا زول هديلك...مجدوعين فهايق
حب أخوانو شيمة...أنواع شتى وطرايق
والأرواح في حبو...مكتولات زهايق
ما زول "عوقة درويش" بشوفو رزين ورايق
إيدو الماطرة كابة بي رعدا وبرايق
الضامِّي اليتامى...وساس لي بيوتن مرايق
الكافل الفقير...ويبزم للناس رزايق
الدوا للسقيم...ولجروحن لزايق
نفرح بيهو ونقول...غنا وطمبارة ومزايق
(عمدة معاهو طينو ...والجزر البسايق)
(وكان قلنا العميد....قدرو وضمة خايق)
(زارع لينا صيفو...كمان للشتوي سايق)
(والعجوات نقّط عسيلة...حليوات وما حوايق)
@@@@@@@@@@@@@@@@@@@@@@
والبدرو الفتنة ياخوي...ناس عُوَرا وفطايق
ديل فارغين كعابة...والهمّز أمو فايق
ديل ماكرين تعابة...ديل سفهه وصفايق
ماحقين ليهو حقك...ولي شكرك محايق
ناكرين للجميل...كمان همباته وسرايق
@@@@@@@@@@@@@@@@@@@@@@
ما بنسى اولاد "دقشنا"..الماهلين ماضوايق
هم ساسنا وعرشنا...بقول فوقن حقايق
نفوس طاهرة وشريفة...ما للشر طوايق
تابعين لي نبيهم...وخيراتن دفايق
عافين لي دقونن...وللشنبات حلايق
للتقى والصلاح...كم للناس سوايق
كلام واضح عديل..لا لغاويس لا لوايق
القول بالدليل...غير التوحيد ما فوايق
دي السنة السبيل ...دا كلام الحق ما لفايق
بسأل الله الجليل...العالم أسرار الخلايق
أنا وأخواني وإنتو....نكون في الجنات رفايق

[على محجوب جعفر مصطفى]

سلام اخونا الرائع ابشخيت ونحن عرفناك ابشخيت وسوف تظل فى اذهاننا ابشخيت
ومادام طلعت د عيون عجايز المنتدى كتار وكلهم دايرين نضارات الا ضمرة
ونتمنى رؤياك دائما ومشاركاتك

[على محجوب جعفر مصطفى]

سلام اخونا الرائع ابشخيت ونحن عرفناك ابشخيت وسوف تظل فى اذهاننا ابشخيت
ومادام طلعت د عيون عجايز المنتدى كتار وكلهم دايرين نضارات الا ضمرة
ونتمنى رؤياك دائما ومشاركاتك

[أب شخيت]

سلام اخونا الرائع ابشخيت ونحن عرفناك ابشخيت وسوف تظل فى اذهاننا ابشخيت
ومادام طلعت د عيون عجايز المنتدى كتار وكلهم دايرين نضارات الا ضمرة
ونتمنى رؤياك دائما ومشاركاتك

أخوي علي

لك التحية ولكل الحبان...ونعتذر لرداءة شبكة سوداني حرمتنا من الإطلالة الراتبة عليكم..لكين بيني بينك أخوي ضمرة محتاج لباروكة مش نضارات...النضارات مع الصلعة بتودي الزول طوالي للقبر ما خلاص بيكون إنتهي...عشات كدة ضمرة ما عاوز ينوم بعد جاهو أبو الشهيق بتاع النكتة ديك البتعرفه ...

[ام عسجد]

يا جماعة انا زعلانة لانو فاتتني متابعة ماستجد في عتود دقش لكن حسي فتحت البوست وقريتو . عماد يا ود عمي يعني تخلينا نزعل جنس الزعل دا من اب شخيت وانت من خطط ونفذ الله يجازي محنك حبكتها علي حتي بالتلفون ومثلت دور الضحية طيييييب.
وزي ماقلت لاب شخيت في الاول واصل عشان نستمتع بروائع الشعراء فقد استمتعنا غاية الاستمتاع بالقصائد القمة من شعرانا الكبار ود العطا ود الصيدة واولاد بابكر عمر الله يديهم العافية ومازلنا في انتظار قصيدة ام مصعب . دقش يا اخوي عتودك والله عتود ما عادي خبره مرق لي اوربا وامريكا .اب شخيت رغم اننا لم نعرف هويتك حتي الان لكنك كنت كبش الفداء وكل ابداع لازم يكون ليه ضحايا ولا شنو.
طارق علي صالح حبابك الف ومن زمان راجنك نظهر وبارك الله في ناس اب شخيت الخلوك طليت علينا مليون حباب

[عادل حمد]

كل التحايا العطره لعميدنا الغالى العمده عماد والاخ ابوشخيت
و بالفعل كانت حبكه ظريفه جدا جدا وانا اعتقد فى بعض الناس
فهمت المقصود ومن ضمنهم الاخت ام عسجد وخالص التحايا لكل
الاخوة الشعراء المتداخلين فى البوست

[أب شخيت]

يا جماعة انا زعلانة لانو فاتتني متابعة ماستجد في عتود دقش لكن حسي فتحت البوست وقريتو . عماد يا ود عمي يعني تخلينا نزعل جنس الزعل دا من اب شخيت وانت من خطط ونفذ الله يجازي محنك حبكتها علي حتي بالتلفون ومثلت دور الضحية طيييييب.
وزي ماقلت لاب شخيت في الاول واصل عشان نستمتع بروائع الشعراء فقد استمتعنا غاية الاستمتاع بالقصائد القمة من شعرانا الكبار ود العطا ود الصيدة واولاد بابكر عمر الله يديهم العافية ومازلنا في انتظار قصيدة ام مصعب . دقش يا اخوي عتودك والله عتود ما عادي خبره مرق لي اوربا وامريكا .اب شخيت رغم اننا لم نعرف هويتك حتي الان لكنك كنت كبش الفداء وكل ابداع لازم يكون ليه ضحايا ولا شنو.
طارق علي صالح حبابك الف ومن زمان راجنك نظهر وبارك الله في ناس اب شخيت الخلوك طليت علينا مليون حباب


الأخت العزيز أم عسجد
بركة الجيتينا بالسلامة...
وحقو ما تلومي عماد براهو الداسي الموضوع وبيمثل عليكم...كديه أخديلك متاوقة على الأسماء الفي الكشف دا :-
(أ‌) الأخ العزيز علي بابكر إبراهيم بابكر..
(ب‌) الأخ العزيز زكريا بابكر عمر..
(ت‌) الأخ العزيز محمد الطيب محمد الطيب..
(ث‌) الأخ العزيز حسان سر الختم..
(ج‌) الأخ العزيز علي محجوب جعفر..
(ح‌) الأخ العزيز ضمرة بغدادي

شايفة ديل كلهم كانو من الطابور الخامس ...عارفين الموضوع وبيسووا في المديدة حرقتني والمشاورات معاهم ما إنقطعت...كمان أخوك عصام جرا ورا القطر ونط لحق عربية الكمساري في آخر لحظة..!!!.
الحكاية با أختي ملعوب كبير ...وتمثيل في تمثيل...
أنا طبعا الفقرة (5) من بيان ود عمك "مرقتني في السهلة" ...ونبشرك بأن عتود دقش سيتواصل بصورة جديدة بعد تغيير خارطة التحالفات..!!!.غايتو أنا مع ود عمي ود العطا عاملين حلف جديد و دايرين ود الصيدة ذات نفسو في القيادة.!!!. أنا بجيب ليهم الحجار عشان يفلقوكم كلكم والدور إتقلب عليكم تاكلو نيمكم براكم....!!!!!.

[أب شخيت]

كل التحايا العطره لعميدنا الغالى العمده عماد والاخ ابوشخيت
و بالفعل كانت حبكه ظريفه جدا جدا وانا اعتقد فى بعض الناس
فهمت المقصود ومن ضمنهم الاخت ام عسجد وخالص التحايا لكل
الاخوة الشعراء المتداخلين فى البوست


أخوي عدولي

ليك تحية وتقدير ...الله يرفع من روحك المعنوية زي ما رفعت معنويات أخوكم أب شخيت الحلبي بتاع كافور الإخشيدي في الرواية الأخري...نحن كان قصدنا فعلا الحبكة تكون بس ظريفة مش ظريفة جدا جداً زي ما تفضلت..أهو الفليق الفوق راسنا ما طلع سمبلا ساكت جاب حق المريسة..!!

[حسان سرالختم]

ظهر المستخبى وبان المستور
ابشخيت اخوى وصلنا معاك وقمنا بهمتنا
على اكمل وجه ولكن شكلك كدى غيرت
طريقه لعبك وداير تفكنا عكس الهواء !!!

[الهادي قنديل]

طابور صفا0000انتباه
فالنقف كلنا تحيه واجلالا لسعادة العقيد ابشخيت
وصراحه وجودك في البركل اضافه حقيقيه وانت تنثر الدرر في كل الارجاء لك مني التحيه والتقدير واصل سعيك واصل واصل
والتحيه عبرك للعميد عماد الطيب

[رقيتون]

سلام اخونا الرائع ابشخيت ونحن عرفناك ابشخيت وسوف تظل فى اذهاننا ابشخيت
ومادام طلعت د عيون عجايز المنتدى كتار وكلهم دايرين نضارات الا ضمرة
ونتمنى رؤياك دائما ومشاركاتك

يام عسجد انا زيك ماشفت البوست دة باقى الهكر كان ضارب عيونى لكن شفتى العميد كاتل حيلوا ويطلع منو كل دة زمنننننننننننن ياعمدتنا
وليدنا ابشخيت لقد سررنا بالروائع وكنت اضافة حقيقية بكل ما قدمت اهلا بك فى دارك
لكن ماتنسى كلام على ودمحجوب نحن عجايز متصابية تحب الحياة نرجو منك ان تطبق كل النظريات فى عيوناتنا ديل بس يافتحن ياغمضن مرة واحدى

[طيبان]

احمد الله اعاين للبوست من بعيد بعيد...
وشايف الجماعة عاصرين عليك..قلنا نشوفك بتسوي شنو
تراكا راقد لك فوق راي
انت وصاحبك
الله لايحرمنا منكم
(طبعا دا كسير تلج دي باكر تجوا تقفلوا الإندايي وتقطعوا راسنا):d:d

[عوض جلاس]

تحياتي المعطرة للعميد عماد والاخ العزيز أب شخيت وأنتم تمتعون أبصارنا بكل هذا الإبداع
وحقيقة كانت مفاجأة من العيار الثقيل أن تكون كل هذه الدراما الجميلة كاميرا خفية دقست كل الأعضاء ولم يفطنوا لها ولو استمرت لكانت أيضاً ستكون مقلب نشرب منه كل يوم ولكن الحمد لله كانت كاميرا خفية ممتعة بكل شي الشعر الجميل والحماس المنقطع النظير بين المشاركين والمناكفات البريئة والتشجيع من جانبنا بكل حماس
نشكركم ولكن في النفس حسرة من أن يتوقف هذا العرض الرائع بعدد أن تكشفت الحقيقة وربما يخفت بريق العتود .

[أب شخيت]

ظهر المستخبى وبان المستور
ابشخيت اخوى وصلنا معاك وقمنا بهمتنا
على اكمل وجه ولكن شكلك كدى غيرت
طريقه لعبك وداير تفكنا عكس الهواء !!!


أخوي حسان

الظهر دا يا خوي لا مستخبي عليك ولا حاجة..إنت كنت مشارك في الملعوب شايل صحن المديدة حرقتني وقمت بالعليك وأكتر...الليلة لمان قلت أريحك وأشيل منك الصحن بقى فك عكس الهوا...!!!.
حسع أنا زاتو لمان شفت ناس الطريف مولعين من غير مديدة...ختيت صحن المديدة بتاعك و بقيت أكورك (يا ناس أرضا مديدة..يا ناس أرضاً مديدة)حتي كمان بقيت واسطة أكتب عن (الطريف الجريح)...
طبعا المكوة لمان تسخن شديد مابيطفوها لكين ببردوها بالموية...حسع أنا لمام المكوة تكون جاهزة تاني بشيل صحن المديدة...

[أب شخيت]

طابور صفا0000انتباه
فالنقف كلنا تحيه واجلالا لسعادة العقيد ابشخيت
وصراحه وجودك في البركل اضافه حقيقيه وانت تنثر الدرر في كل الارجاء لك مني التحيه والتقدير واصل سعيك واصل واصل
والتحيه عبرك للعميد عماد الطيب

أخوي الهادي

اللهم صلى علي الهادي قنديل الهدى والرحمة..
لك التهاني بهذا الشهر المبارك...
كلماتك الطيبات قلادة شرف نعتز بها..لك تقديري..

[عمر مجذوب خطيب]

اب شخيت تتجازى انت المسؤول لانك كنت في وجه المدفع وقائد الكتيبة وبالله زكريا بعد حرتو دي واستعانتو بالماشي والرايح كان عارف اللعبة من الاول - وامبارح علي ود الصيدة جاب سيرة سعادتو الدكتور وانا فهمت لكن ما للدرجة دي -
تمام سعادة العقيد

[أب شخيت]

يام عسجد انا زيك ماشفت البوست دة باقى الهكر كان ضارب عيونى لكن شفتى العميد كاتل حيلوا ويطلع منو كل دة زمنننننننننننن ياعمدتنا
وليدنا ابشخيت لقد سررنا بالروائع وكنت اضافة حقيقية بكل ما قدمت اهلا بك فى دارك
لكن ماتنسى كلام على ودمحجوب نحن عجايز متصابية تحب الحياة نرجو منك ان تطبق كل النظريات فى عيوناتنا ديل بس يافتحن ياغمضن مرة واحدى

العزيزة رقيتون

رمضان كريم تصومو وتفطروعلى خير...
العميد كاتل حيلو عشان الناس تصدق"و يكتلو حيلي" بالفليق...وتراني في الآخر طلعت كسبان عزوة واهل "وكبارات"...علي ود محجوب مابنسي كلامو...ولو لقيت لي طريقة عاوز إستورد عيون شبابية اسبيرات بدل النظارات...نصيبك محفوظ..

[أب شخيت]

احمد الله اعاين للبوست من بعيد بعيد...
وشايف الجماعة عاصرين عليك..قلنا نشوفك بتسوي شنو
تراكا راقد لك فوق راي
انت وصاحبك
الله لايحرمنا منكم
(طبعا دا كسير تلج دي باكر تجوا تقفلوا الإندايي وتقطعوا راسنا):d:d

العزيز دوما طيبان

رمضان كريم...
أنا عارف ياخوي رمضان بيجي و "المحل" يتقفل ... أهو كلامي طلع صاح وانت طلعت "صاحي"..والحمد لله الفكانا من جرجيركم للبيت بالجرورة الهالكة...تقول لي "لابد" ليك ومابتديني "المسحة"...!!!.
حسع عليك الله راسك بقي مقطوع وله بقي يادوب مستعدل؟؟!!!..
أسأل الله أن "يمسح" ذنبي و ذنبك
و أن يعظم أجري و" أجرك" بدون تشديد الراء..

[أب شخيت]

اب شخيت تتجازى انت المسؤول لانك كنت في وجه المدفع وقائد الكتيبة وبالله زكريا بعد حرتو دي واستعانتو بالماشي والرايح كان عارف اللعبة من الاول - وامبارح علي ود الصيدة جاب سيرة سعادتو الدكتور وانا فهمت لكن ما للدرجة دي -
تمام سعادة العقيد

الاخ عمر مجذوب
رمضان كريم..
أخوك زكريا في الاول شرب المقلب شديد لامن "شرق"وانصرف زعلان...لحقناهو بأندروس قام إتفشي...لكين إتفشي فينا وحرر لينا المكوة أكتر من اللازم...أهو مكوتو دي نحن بنحاول نخفف حراقا علي ناس الطريف...
أخوي ود الصيدة شرب المقلب حد الثمالة "والزعل الشديد"..و انا رسلت ليهو وصية بعد نهاية الكعة بخصوص حادثة الموبايل ...انا خايف الموبايل يطلع في محل العتود

[أب شخيت]

اب شخيت تتجازى انت المسؤول لانك كنت في وجه المدفع وقائد الكتيبة وبالله زكريا بعد حرتو دي واستعانتو بالماشي والرايح كان عارف اللعبة من الاول - وامبارح علي ود الصيدة جاب سيرة سعادتو الدكتور وانا فهمت لكن ما للدرجة دي -
تمام سعادة العقيد

الاخ عمر مجذوب
رمضان كريم..
أخوك زكريا في الاول شرب المقلب شديد لامن "شرق"وانصرف زعلان...لحقناهو بأندروس قام إتفشي...لكين إتفشي فينا وحرر لينا المكوة أكتر من اللازم...أهو مكوتو دي نحن بنحاول نخفف حراقا علي ناس الطريف...
أخوي ود الصيدة شرب المقلب حد الثمالة "والزعل الشديد"..و انا رسلت ليهو وصية بعد نهاية الكعة بخصوص حادثة الموبايل ...انا خايف الموبايل يطلع في محل العتود

[ابوسمر]

سلام الله عليك يا عمده رمضان كريم عليك والاسره انشاء الله تصوموا وتفطروا علي خير واسجى التحايا علي هذا الابداع الذي اتمنى ان يتواصل وليس اجمل مما كان - مع تحياتي خالد حسن