ذكريات من مهد الطفولة [الأرشيف]

مشاهدة النسخة كاملة : ذكريات من مهد الطفولة

أب شخيت

07-21-2010, 02:24 PM

ذكريات من مهد الطفولة
http://www.wahatalrobatab.com/vb/uploaded/47_01277043504.jpg (http://www.wahatalrobatab.com/vb)
ماله الغربة طالت بي دهورا
قبيل مجبور عليها ومابدورا
بحار الغربة قاسي عليْ عبورا
و أنا الغرقان و ضايع في بحورا
جابتني الظروف ياها الضرورة

طريت أمي البتمرق من سحورا
و تنزل للزريبة معاها كَورة
داقرون السجم غارزات شطورا
عالي إنتاجه في "الميع" و البعورة
تسيبه و تحلب النعجة العَبورة
و يا داك اللبن تديهو فورة
و في باقي الجمر تطلق بخورا
تكف العين و نأمن من شرورا
كبابي الشوب تدوِّر دورة دورة
و نلحس حتربه الكان في قعورا
وكت تشرق تكون عاست فطورا
طريت حبوبتي بي هكشا و كرورا
طريت مرقونة ساكناهو الجقورة
طريت شاييها بنجقلي و chـرورة
تكب لك منو مابتديكا شورة

شتيلاتنا التحت فدعت شطورا
يا دوب جاهلة ما تمت شهورا
و مالت بالسبيط أصناف تمورا
نشرِّك للدباسة قبل ظهورا
تكون شركتنا بين دومتين و صورة
ندودر فيها جاي بي جاي مرورا
حلاته بلدنا في قبّيض طيورا
جبابيدنا المشرَّكة بي دقورة
"غنم تمساحنا" تمشي تجي و تزورا
ونتباشر وكت نلقى "القبورة"
و نخاف تطرانا "أب سبلة" الحقورة
تزيدو قناطنا فوق حالنا الفقورة

(جزائر الحاج) متمسحه بي وِرورة
فروخ وِزِّينا تقدل فوق مِقورا
والشلال يخوخو من صخورا
سرنكال فيهو للكرعين خطورة
ونتشارط منو البقدر يزورا
و نقلع نتحدر بي فوق طرورة
و نقطع موية البحر العكورة
ناس للموت تكوس تحفر قِبورا
و تهابش للدبايب في جحورا
وتخوض النار وكت تلهب جمورا

بنات أهلي....طريت في الجنة حورا
سماحة ذوق و أخلاق و أبهى صورة
يحاكن ظبية الوادي النفورة
وكت تمرق تتاوق من خدورا
وكان شافت غريب تدخل ضفورا
حياء بالطبعة من أعماق شعورا
المال و الجمال مابزيد غرورا
محشمة كاسية ما كشفت نحورا
رزينة و راسية في الأزمات صبورة
ترضابو القليل حامدة و شكورة
قديرة وعارفة كيف تمسك أمورا

أفراح البلد يعجب حضورا
أكان عرساً مجرتَق كان طهورة
ناس بالبهجة منشرحات صدورا
تشيل جيزانه تغرف دورة دورة
وواحدين بالحطب تورم ضهورا
رتاين من مغارب قاجِّي نورا
و حفلات مابتقيف وإن تم دورا

طريت البوغة حيضانه و مسورا
هداك بطيخنا راكّة عليهو بُورة
دقيلاتو العليها حلاه و حِمورة
تبرِّد جوفنا في ساعةَ الحرورة
طريت لمّتنا في نِقّيح بذورا
ونحش العفنة نقلعا من جذورا
و يكون موعدنا في العصرية كورة

طريت خلواتنا في العيدين نزورا
نبارك لي ولاد شيخنا و سَرورا
ونطلع فوق جبل عاشة الوقورة
وننزل في البَنِـــيّة نشيل نذورا
ونترحَّم على الرقدت قبورا

كتابات القدر جفّتْ سطورا
هَدِي الأرزاق مقسمة في قدورا
وكان أرزاقنا في الغربة و أجورا
بيوت الطين أخير لي من قصورا
و تغور الغربة ستين ألف غورة

الخرطوم- الأحد 20/6/2010

عصام سرالختم

07-21-2010, 03:22 PM

ذكريات من مهد الطفولةوكان أرزاقنا في الغربة و أجورا
بيوت الطين أخير لي من قصورا
و تغور الغربة ستين ألف غورة

الخرطوم- الأحد 20/6/2010

اخى ابشخيت
عدت وعاد الشعر الجميل ........
"جزائر الحاج " اجتاحتها رياح العولمة
و"جبل عاشة " دفنه الزحف الصحراوى
فاصبحنا غرباء حتى فى مسقط رأسنا ومهد طفولتنا ...

بابكر علي بابكر

07-21-2010, 06:07 PM

ابومهاب

07-21-2010, 08:41 PM

[font="comic sans ms"][size="7"]
[color="darkgreen"]ذكريات من مهد الطفولة
http://www.wahatalrobatab.com/vb/uploaded/47_01277043504.jpg (http://www.wahatalrobatab.com/vb)
ماله الغربة طالت بي دهورا
قبيل مجبور عليها ومابدورا
بحار الغربة قاسي عليْ عبورا
و أنا الغرقان مكسّر في بحورا
جابتني الظروف ياها الضرورة

ياسلام دائما رائع . شعرا ونثرا . قرأتها وتمعنت فيها , فهى قصيدة عصماء . والشىء الذى اعجبنى واطربنى وابكى دواخلى هو اختيارك اللهجه التى كتبت بها والمضامين التى زانتها واختيارك المفردات والتى اكسبتها الحنين الدافق . من منا لايكره الغربه ويملها ؟ فهى ثالثة المراتب التى تستوقف قارئها وتشده .( الوطن .. الأم .. ألغربه ) وهذا ما احتوته . ومن جانب الملاحطه ( وانا الغرقان مكسر فى بحورا ) > ( وانا الغرقان وضايع فى بحورها ) فهنئا لك ياآخى بهذه الدرر من كتاباتك , وهنيئا لنا بقرآتها وتتبع مضامينها ....

أب شخيت

07-23-2010, 04:53 AM

اخى ابشخيت
عدت وعاد الشعر الجميل ........
"جزائر الحاج " اجتاحتها رياح العولمة
و"جبل عاشة " دفنه الزحف الصحراوى
فاصبحنا غرباء حتى فى مسقط رأسنا ومهد طفولتنا ...

أشكرك على حسن الظن بما نخربش...
و الله العولمة إجتاحتنا عشرة صفر...
وجبل عاشة الصالحة في ندي بقى مابيتمشي من كترة قيزان الرمال الزاحفة....
زرت البلد بعد غيبة طويلة نهاية الاسبوع الماضي و بداية الاسبوع دا و حقيقة إتصدمت من التغيرات الحصلت...
حقيقة شعرت بنفسي غريب و البلد ماها الزمان الأنا كانت في بالي...
ويمكن كلامي البلدي الفي القصيدة دي كتيرين من الشباب ما يفهموهو...

أب شخيت

07-23-2010, 04:54 AM

أخى الدكتور الفاضل (أب شخيت)
لقد نكأت جـــُرحاً حاولنا إسكاته بمسكنات لا تغنى ولا تسمن ...
كل إخوانك فى الشتات لسان حالهم كما ورد فى مشاركتك
أدعو معى أن يرد الله غربتنا وتعود كل الطيور المهاجرة إلى أوكارها
يديك العافية ... لك وحشة وشوق

بابكر يا زعيم...
رد الله غربتكم و غربة كل حبيب...

أب شخيت

07-23-2010, 05:22 AM

ياسلام دائما رائع . شعرا ونثرا . قرأتها وتمعنت فيها , فهى قصيدة عصماء . والشىء الذى اعجبنى واطربنى وابكى دواخلى هو اختيارك اللهجه التى كتبت بها والمضامين التى زانتها واختيارك المفردات والتى اكسبتها الحنين الدافق . من منا لايكره الغربه ويملها ؟ فهى ثالثة المراتب التى تستوقف قارئها وتشده .( الوطن .. الأم .. ألغربه ) وهذا ما احتوته . ومن جانب الملاحطه ( وانا الغرقان مكسر فى بحورا ) > ( وانا الغرقان وضايع فى بحورها ) فهنئا لك ياآخى بهذه الدرر من كتاباتك , وهنيئا لنا بقرآتها وتتبع مضامينها ....

أستاذنا في الشعر و الأدب أخوي ود أبنعوف...
شكر ليك كلماتك الطيبات في شأن القصيدة..
وهي شهادة إجازة للنص الشعري أباهي بها بين العالمين...
و أي شهادة وهي تصدر من ود أبنعوف شخصياً....
الغريبة كنت خايف كلامي الدارجي دا ما يتفهم...مش هني و بس إنما حتى بين أجيال الرباطاب الناشئة لأن هذه العامية عاميتهم القديمة...
وكنت عاوز أعمل الكلمة ومعناها و بعض الشروحات المتعلقة بالخلفية الثقافية لمعاني الأبيات لتعم الفايدة...
ولكن تراكم فهمتوها و يبدو ان تشابه عامية الشايقية والرباطاب هي السبب...
لكين باقيلك الوليدات الصغار بي يفهموها؟..
بالنسبة للتعديل و تبديل مفردة (مكسّر) ب (وضايع) أسمح لي أقول كلام بسيط لتعم الفايدة:
الكلمتان متساويتان من حيث ميزان العروض (خماسي متحرك الأحرف و أوسطه ساكن) ولذلك فلن يتعرض الوزن الشعري بهذا الإستبدال لأي إختلال...
طبعاً الوزنة الشعرية بتجي بالسليقة والإحساس الداخلي و لكن من المهم الإلمام العام بقضية العروض و بحور الخليل و أنتم أدرى بذلك مني لأني جربندي ساي...
ثانياً أنا كان يسيطر على إحساسي ساعة كتابة النص معنى الزول المجدوع في نص بحر الغربة وهو مكسرات إيديو و كرعينو لا يقدر يعوم بالأيدي و لا يقدر يطفح بالأرجل ولذلك إستعملت مفردة (مكسّر) في البيت المعني...
مقترحك بالإستبدال لفت إنتباهي للمعنى الأخر لمفردة (مكسّر) وهو يعني التوله و الشغف الشديد مما يعرِّض كل المعنى الأنا قاصدو لنقيضه تماماً ويفتكروني "انا واقع لي شوشتي في الغربة دي".:)...
ولذلك تجدني أتفق معك في ضرورة الإستبدال المقترح منكم دا و المال تلتو ولا كتلتو.:)..
و سأجري اللازم من التغيير بالنص الأصلي..
مثل هذه الملاحظات الدقيقة من شأنها أن تجوّد النصوص و تدفع للأمام بالنشاط الإبداعي...
يا ليتك بما تملك من خبرات متراكمة و موهبة لا تجارى ترعي لينا جوانب الملاحظات الزي دي في الشعر المنشور بهذا الموقع...
نحن مابنقدر نفتح خشمنا مع زول في مسائل زي دي بنخاف نتهم في نوايانا و نحن ناس عودنا طري في الشعر ممكن يتعتبر كلامنا تطاول على الفطاحلة....
و إنت على العكس منا تماماً عندك الرصيد و الموهبة والخبرة الممكن تخليك في موضع الموجه المقوِّم لأي رأس شعري مهما ظن أن أقدامه تطأ الثريا...
أشكرك يا زعيم الشعر و الأدب..

محمد الامين

07-23-2010, 03:04 PM

أب شخيت

08-01-2010, 08:32 AM

أنا غايتو حاسب نفسى مع الوليدات الصُغار عشان كده عايز أطمنك وأقول ليك قرينا النص وإستمتعنا بما جاء فيه من صُور ومضامين ....

التشابه كبير جدا بين مفردات النص والمفردات التى يستخدمها شعراء الشايقيه وهــــو أمر لا غرابة فيه إذ كلنا نعلم أنه لا يوجد فرق بين بيئة الشايقيه وبيئة الرباطاب ولعل ذلك يشمل أيضاً المناصير والبديريه الدهمشيه .. فلو تأملنا هذه الصوره - طريت أمى البتمرق من سحورا وتنزل للزريبى معاها كوره - أرجو أن يعزرنى أب شخيت على التصرف فى كلمة – زريبى - .... سنجد أن هذه الصوره موجوده فى بيئة كل القبائل التى أشرت اليها وجميعهم مشتركون فى نفس الشئ – وهو منظر الوالده وهى شايله كورتها وماشى لى حليب البهائم – ... وقد أعجبت جدا باستخدام الشاعر لكلمة – سحورا – التى تشير الى وقت الحليب بتحديد – يُحسد عليه اب شخيت – إذ دائماً ما يكون الحليب قبيل طلوع الفجـــر وهــو ما يعرف بوقت السَحَـــر وإستخدام الشاعر لهذه المفرده الجميله يدل على شاعريه لــن يختلف حولها إثنان ...

من الأشياء التى لفتت إنتباهى فى النص – جبل عاشه – وأرجو أن يحدثنا عنه اب شخيت إذ يوجد لدينا فى منطقة الأراك – حجار بت عاشه – ومثل هذه المعالم تستحق أن نتحدث عنها ونوثق لها ...

أشكرك أخي مجمد الأمين على التعليق و الإفادة...
طمّنتني على فهم أجيالكم الصاعدة للهجتنا الغارقة في الدارجية...
و مع ذلك سأهديك مقطعاً للشرح بعد هذه المشاركة تكفيراً عن تأخر الرد و أرجو ألا تكون طماعاً تطلب المزيد..
أكر إعتذار تأخري ف "الزمن ماهو بي عدلي"...
جبل عاشة الصالحة يقع في أطراف حلة الخلوات بقرية ندي و أسفله مقابر الموتى و ساحة مصلّى العيدين...
تعودنا صعوده في العيدين و النزول "دردقة" عبر منحدره الرملي...
و أيضاً نغشى البنية "ضريح دون جثمان" لنتبرك و ربما بدل أن ندفع النذور فإنا نفعل شيئاً أخر..قرقرقرقرقرقر...
سَرور" بفتح السين" المذكور في القصيدة رجل كادح و مسكين و غالباً ما نجده يعمل أجيراً لدى مشايخنا في الخلوات "جمع خلوة لوجود العديد من خلاوي تحفيظ القرآن الكريم"...
أكرر تقديري و إنتظر وعدي...

أب شخيت

08-01-2010, 09:28 AM

كدي هاكم المقطع دا الحا نعمل منو مثال للشرح البسيط الدارج:

جبابيدنا المشرَّكة بي دقورة
"غنم تمساحنا" تمشي تجي و تزورا
ونتباشر وكت نلقى "القبورة"
و نخاف تطرانا "أب سبلة" الحقورة
تزيدو قناطنا فوق حالنا الفقورة

يا جماعة الشرح دا ماهو للحواتة صيادين الحوت "أي السمك"...
ناس الحوت عارفين النضم دا...
النضم دا للحناكيش أولاد البنادر...
_____
الدقورة والدقور والدقيرات هي جمع لكلمة دقر و دقير...
كلمة الدقر المفردة تعني الثعبان...
ولكن الدقورة والدقيرات تعنى الصارقيل...
وهو دودة بنية اللون تقتات على الطين وخاصة طين الطمي الخالص...
أييييي..... بتاكل الكركجية اللينة زي ما النسوان بياكلن الكركجية الجافة...
ما كلهن دقور في دقور.:)..الدقر دا علا يلدغ؟!!...
ما تراهو الصارقيل ما قاعد يلدغ..:)..
و طيّب...
أها...
الصارقيل دا أكتر أكلة مفضلة للسمك...
و إنت لو داير السمكة تنبسط منك أديها صارقيلاية....
الصارقيل بالنسبة للحوت متل الدهب بالنسبة للنسوان..:)..
عشان كدة لو جبادتك مشرّكة بي صارقيل حا تلقى السمك حواليك ملموم...
حسع لو واحد خزنتو مليانة دهب باقيلكم مابيقبضلو واحدات من محبات الكركجية اليابسة؟.:)
بالمناسبة يا أهل البادر... الكركجية بتختلف عن الكرجية....
الكركجية هي طرقة الطمي العايسا البحر...والكرجية هي أكتر طيرة ورجاغة في الدنيا دي...

غنم التمساح هي خنافس البحر..:)..
شكلهن زي الخنبسانة - أي الخنفسانة- و قاعدات يعومن في شكل مجموعات جنب حجرة البحر....
و الغريبة عندهن غرام بالعوم عكس التيار...يكاد يستحيل تلقى ليك غنماية تمساح عايمة مع العرق...
و يستحيل تلقى ليك غنماية تمساح حايمة في موية راكدة بدون تيار...
أنا غايتو ما عارف علاقتن بالتمساح شنو؟.... أما علاقتن بالغنم علا يكون التمساح قاعد يحلبن..:)..

القبورة نوع من أنواع الجراد...
جسمها مفلطح وشكلها كدي يشبه فروة الصلاة...
وقاعدين يسموها "جرادة النبي"...
و الناس عندهم فيها إعتقاد إنها مبروكة و قاعدة تجيب البركة...
الناس قاعدة تتفاءل بيها...
عشان كدي لما نلقاها كنا قاعدين نسلم عليها بالتقبيل و ما قاعدين نكتلا...
معقول نكتل جرادة النبي..:)..

العكس منها تماماً هي حشرة "أب سبلة"...
أب سبلة دا من فصيلة الزنابير و تشبة أم سليمان...
تعالو كمان قولو لي ما بتعرفو أم سليمان..؟!!..:)..
غايتو أخونا عمر دهب عندو أب سبلة قاعدة تطير قدام بيتو في حي البراحة بتاع شمبات ولكنو للأسف ما عرفا لي و إحتمال يكون متغابي العرفة...قرقرقرقر
أها...
أب سبلة دا رمز للقناطة...
وكان أب سبلة ركّت ليك في غمّاز جبادتك ياكا المرقت ملوص...
والأقنط هو عكس الملغوم...
الأفنط هو المابيقبض أي حاجة ولو كان مطعم بي دقيرات....
والملغوم هو البيقبض طوالي و لو كان مطعّم بي دفيق...
الغماز نطيت شرحو مخصوص...عشان أنا لا أجيد الغمز.:)..
أب سبلة دا حقار حقرة ما عادية...
من ما يلقاك مطعّم طعم تمام و غمازك مرفوع في السماء تلقاهو طوالي جاك...
يقيف لك بي كرعينو القدام فوق الغماز و يرفع مؤخرته الطويلة في الهواء عالياً عالياً فارداً بعض أجنحته للريح...:)..
ديني أنا وكت الزول يلقى عدلو في اللغة الفصحي بين كلمات الدارج..eeer..

و بس كفاك يا محمد الأمين...نضّمتني و حسع ألقى نفسي متورط في هرجيبة.:)..

أبو أيمن

08-02-2010, 04:03 PM

ود حمزه

08-06-2010, 01:18 PM

أشكرك أخي مجمد الأمين على التعليق و الإفادة...
طمّنتني على فهم أجيالكم الصاعدة للهجتنا الغارقة في الدارجية...
و مع ذلك سأهديك مقطعاً للشرح بعد هذه المشاركة تكفيراً عن تأخر الرد و أرجو ألا تكون طماعاً تطلب المزيد..
أكر إعتذار تأخري ف "الزمن ماهو بي عدلي"...
جبل عاشة الصالحة يقع في أطراف حلة الخلوات بقرية ندي و أسفله مقابر الموتى و ساحة مصلّى العيدين...
تعودنا صعوده في العيدين و النزول "دردقة" عبر منحدره الرملي...
و أيضاً نغشى البنية "ضريح دون جثمان" لنتبرك و ربما بدل أن ندفع النذور فإنا نفعل شيئاً أخر..قرقرقرقرقرقر...
سَرور" بفتح السين" المذكور في القصيدة رجل كادح و مسكين و غالباً ما نجده يعمل أجيراً لدى مشايخنا في الخلوات "جمع خلوة لوجود العديد من خلاوي تحفيظ القرآن الكريم"...
أكرر تقديري و إنتظر وعدي...

الزول الرايع - الفاضل دكتور الفاضل-
ودي طلعت زي - حساس محمد حساس -
يا ربي داير ابقي شاعر ولا شنو؟؟
لك الشكر علي هذا الالق المافي مثيله
يا خي والله في الاول بعد ما قريت القصيده الحلوه دي
داخلني الشك وقلت ابشخيت سرق القصيده دي
من واحد من ناس الاراك ولا شنو ؟؟.(.حاشاهو الاصيل)
وزيما قال ليك ولدنا محمد الامين عندنا حجار بت عاشه
وبعد صلاة العيد بنمشي نزور ناس شيخنا سبحان الله نفس
الملامح والشبه عشان كدي عايزين نعمل توأمه بين الاراك
وندّويه أقصد ندي الرباطاب ما ندي القلعه ..
نبارك لي ولاد شيخنا و سَرورا
وكذلك سرورا دي من البدو المستوطنين بالقرب من
ناس شيخنا ..وهي أخلها امرأه صالحه رحمها الله .
كذلك وقفت كثيرا لروعة هاتين البيتين
عالي إنتاجه في "الميع" و البعورة
تسيبه و تحلب النعجة العَبورة
Much cry little wool
بعر كتير much ba'ar
النعجه العبور هي النعجه الصبيّه
الصارقيله طبعا زي قطعة السُجُك علّي
محشيي طين كركتّي ما دام البشر بتحب السُجُك
ما بنستنكر علي السمك حب الصارقيل
لك التحايا والود ..واصل الابداع ..

خالد البدوي بابكر

08-06-2010, 03:22 PM

دكتورنا الفاضل أب شخيت..
كم أنت جميل لمّا تسخى وتجود شعرا أو نثرا..
دي معلّقة عديل يا أخي.. تصوير رائع. وسهل ممتنع..

أب شخيت

08-06-2010, 05:59 PM

أخي أب شخيت ...ليك وحشة...
رغم إنك عفرتا الأشجان وهيجت الحنين ...برضو ليك وحشة....
قدر ماتعفرتنا وتهيج شجوننا ...مافي فايدة..الجلد خِدر من طعن شوك الكَتر...
لك التحايا والأشواق بحور وبحور يادكتور الفاضل....

أخونا العزيز أبو أيمن
لا أوحشك الله و أعادك لأهلك موفور الصحة و العافية و المغنم...
صدقني الغربة الجغرافية بدأت تتآكل بحكم تقارب المسافات و توفر وسائل التواصل الحديثة...
قل لي بالله كم مر عليك من زمن لم تكتب فيه رسالة بريدية عادية رغم غربتك الطويلة.؟..
أكاد أجزم أن سنوات طويلة مرت عليك و لم تفعل ذلك...ببساطة شديدة لأنك لا تحتاج لهكذا وسيلة بطيئة و متخلفة...
أخبار البلد تصلكم أول بأول و ربما تصلكم قبل الجيران...
المشكلة الآن في الغربة الوجدانية الداخلية و تباعد الماضي عنا بأحداثه قروناً كل يوم...
التغيير الحداثي الحاصل يجعل من ذكرياتنا العزيزة كذكريات أهل الكهف....
فكل يوم يمر علينا يبدو كأن قروناً تفصلنا عن الماضي..!!..
تغيرت أشياء كثيرة...في النفوس و الأرض و الزرع و النيل والمباني و الشوارع وكل شي...
صدقني ذهبت للبلد بعد إنقطاع سنوات...
أشجار النخيل القديمة قد ماتت و حلت محلها أشجار جديدة...
و على مباعد ممتدة تجد إحدى الأشجار القديمة و قد شاخت و أكل الدهر عليها و شرب...
صدقني كنت أمر على مثل هذه الأشجار القديمة وأتحسس جزعها كأني أتحسس شعر قطتنا الأليفة في طفولتنا..*
و أشعر كأنها تعرفني من دون الناس و تستأنس بلمساتي الحنونة...بل و أتخيلها تحادث من حولها من النخلات الجديدة في زهو و إفتخار:
(هذا إبني قد عاد و لم ينسني..أنا في ذاكرته باقية و لمساته تذكرني بأيام شبابي النضير و طفولته الغرة)....
بإمكانك أخي أبو أيمن أن تعود لموطنك اليوم قبل الغد...
ولكن من يعيد لي ذكريات الطفولة...
من؟..*

أب شخيت

08-06-2010, 06:10 PM

الزول الرايع - الفاضل دكتور الفاضل-
ودي طلعت زي - حساس محمد حساس -
يا ربي داير ابقي شاعر ولا شنو؟؟
لك الشكر علي هذا الالق المافي مثيله
يا خي والله في الاول بعد ما قريت القصيده الحلوه دي
داخلني الشك وقلت ابشخيت سرق القصيده دي
من واحد من ناس الاراك ولا شنو ؟؟.(.حاشاهو الاصيل)
وزيما قال ليك ولدنا محمد الامين عندنا حجار بت عاشه
وبعد صلاة العيد بنمشي نزور ناس شيخنا سبحان الله نفس
الملامح والشبه عشان كدي عايزين نعمل توأمه بين الاراك
وندّويه أقصد ندي الرباطاب ما ندي القلعه ..
نبارك لي ولاد شيخنا و سَرورا
وكذلك سرورا دي من البدو المستوطنين بالقرب من
ناس شيخنا ..وهي أخلها امرأه صالحه رحمها الله .
كذلك وقفت كثيرا لروعة هاتين البيتين
عالي إنتاجه في "الميع" و البعورة
تسيبه و تحلب النعجة العَبورة
much cry little wool
بعر كتير much ba'ar
النعجه العبور هي النعجه الصبيّه
الصارقيله طبعا زي قطعة السُجُك علّي
محشيي طين كركتّي ما دام البشر بتحب السُجُك
ما بنستنكر علي السمك حب الصارقيل
لك التحايا والود ..واصل الابداع ..

أخونا ود حمزة..
قرقرقرقرقر...
مشاركة مفيدة و طريفة...
الإندهاش من تماثل بيئة الرباطاب ببيئة الشايقية قد فارقني منذ بدايات مشاركتي بهذا المنتدى...
فقد إكتشفت أن كثيراً من تعابيركم و مفرداتكم الدارجية التي تظنونها ملكاً خاصاً بكم هي ذات التعابير و الألفاظ المستخدمة في منطقة الرباطاب...
بل و حتى مسميات بعض مناطقكم هي ذاتها نفس المسميات عندنا و ليس عاشة الصالحة وحدها... إليك أسماء هذه القرى عندنا:
الكرو
الجريف
الزومة
الأراك
..إلخ...
و الله أنا خايف ألقى عندنا كريمة مرت أبو حمد...قرقرقرقرقر...
شكراً ليك يا أصيل...

أب شخيت

08-06-2010, 06:14 PM

دكتورنا الفاضل أب شخيت..
كم أنت جميل لمّا تسخى وتجود شعرا أو نثرا..
دي معلّقة عديل يا أخي.. تصوير رائع. وسهل ممتنع..

شيخنا ود البدوي طيب الله دنياه و آخراه
شيمتك التذوق العرفاني..
عرفاني لتذوقك...
ممنووووووووون...

ود حمزه

08-06-2010, 08:16 PM

أخونا ود حمزة..
قرقرقرقرقر...
مشاركة مفيدة و طريفة...
الإندهاش من تماثل بيئة الرباطاب ببيئة الشايقية قد فارقني منذ بدايات مشاركتي بهذا المنتدى...
فقد إكتشفت أن كثيراً من تعابيركم و مفرداتكم الدارجية التي تظنونها ملكاً خاصاً بكم هي ذات التعابير و الألفاظ المستخدمة في منطقة الرباطاب...
بل و حتى مسميات بعض مناطقكم هي ذاتها نفس المسميات عندنا و ليس عاشة الصالحة وحدها... إليك أسماء هذه القرى عندنا:
الكرو
الجريف
الزومة
الأراك
..إلخ...
و الله أنا خايف ألقى عندنا كريمة مرت أبو حمد...قرقرقرقرقر...
شكراً ليك يا أصيل...

قال له كمان اب حمد دي شنو؟؟
علي كده تبقي ندي أمها كريمه وابوها ابو حمد
ولما الاراك يجي يخطب ندي يكون خطب بت خالته الشايقيه(كريمه) ..قر قر قرقر..

أبو أيمن

08-09-2010, 02:41 PM

أخونا العزيز أبو أيمن
لا أوحشك الله و أعادك لأهلك موفور الصحة و العافية و المغنم...
صدقني الغربة الجغرافية بدأت تتآكل بحكم تقارب المسافات و توفر وسائل التواصل الحديثة...
قل لي بالله كم مر عليك من زمن لم تكتب فيه رسالة بريدية عادية رغم غربتك الطويلة.؟..
أكاد أجزم أن سنوات طويلة مرت عليك و لم تفعل ذلك...ببساطة شديدة لأنك لا تحتاج لهكذا وسيلة بطيئة و متخلفة...
أخبار البلد تصلكم أول بأول و ربما تصلكم قبل الجيران...
المشكلة الآن في الغربة الوجدانية الداخلية و تباعد الماضي عنا بأحداثه قروناً كل يوم...
التغيير الحداثي الحاصل يجعل من ذكرياتنا العزيزة كذكريات أهل الكهف....
فكل يوم يمر علينا يبدو كأن قروناً تفصلنا عن الماضي..!!..
تغيرت أشياء كثيرة...في النفوس و الأرض و الزرع و النيل والمباني و الشوارع وكل شي...
صدقني ذهبت للبلد بعد إنقطاع سنوات...
أشجار النخيل القديمة قد ماتت و حلت محلها أشجار جديدة...
و على مباعد ممتدة تجد إحدى الأشجار القديمة و قد شاخت و أكل الدهر عليها و شرب...
صدقني كنت أمر على مثل هذه الأشجار القديمة وأتحسس جزعها كأني أتحسس شعر قطتنا الأليفة في طفولتنا..*
و أشعر كأنها تعرفني من دون الناس و تستأنس بلمساتي الحنونة...بل و أتخيلها تحادث من حولها من النخلات الجديدة في زهو و إفتخار:
(هذا إبني قد عاد و لم ينسني..أنا في ذاكرته باقية و لمساته تذكرني بأيام شبابي النضير و طفولته الغرة)....
بإمكانك أخي أبو أيمن أن تعود لموطنك اليوم قبل الغد...
ولكن من يعيد لي ذكريات الطفولة...
من؟..*

صدقت ياعزيزي في كل ماقلت...
ووضعت أصبعك على الجرح ولمست هذا الوجدان الخاوي...
فنحن في ديار الغربة كعجول السّامري...
كشخة ونضافة وسيارة جديدة ووجدان خاوية وخوار يأتي به الريح...
يبدو لي أن تلك النخلة قد ناجتك كما ناجيتك أنا وهي تقول لك (أين أنت يابنيّ ليك وحشة )..تحياتي .

أزهري سيف الدين

08-10-2010, 12:01 PM

ذكريات من مهد الطفولة
http://www.wahatalrobatab.com/vb/uploaded/47_01277043504.jpg (http://www.wahatalrobatab.com/vb)

الشاعر الرائع أب شخيت....

القصيدة أكثر من رائعة.... من أجمل ما قرأت في الفترة الأخيرة....

لفتت انتباهي الوزنة الشعرية ... بالرغم من طول القصيدة مافي أي بيت وزنتو (مشنفرة).... مرّت من الأضان بدون ما تلخبت العجين .... أسلس من أكل حلاوة قطن ... يدّيك العافية.....قصيدة جميلة جدا...

كدي هاكم المقطع دا الحا نعمل منو مثال للشرح البسيط الدارج:

جبابيدنا المشرَّكة بي دقورة
"غنم تمساحنا" تمشي تجي و تزورا
ونتباشر وكت نلقى "القبورة"
و نخاف تطرانا "أب سبلة" الحقورة
تزيدو قناطنا فوق حالنا الفقورة

صراحة معظم الكلمات الوضّحتها كانت غايبة عنّي ...
نوّرتنا ...الله ينوّر عليك...

_____________________

خارج مجري البوست:
عندي سؤال محيّرني ..
الاسم (أب شخيت)... و شايف الناس بقولوا يا (دكتور) ...
الدكتور دي فيها نوعين (أب شخيت) و (أب نقطة) ...

أب شخيت (شختة بعد حرف الدال) = د/ فلان ( طبيب)
أب نقطة (نقطة بعد حرف الدال) = د. فلان (حاصل علي درجة الدكتوراه)

أها هسي انت يا دكتور ياتو دكتور فيهم ؟ أب شخيت والا أب نقطة ؟:d