المساعد الشخصي الرقمي

مشاهدة النسخة كاملة : صور من البلد في أشعار ودبادي


عكود
11-20-2006, 05:23 AM
إمتازت أشعار ود بادي بالوصف الدقيق الذي يشابه الرسم بالكلمات، لم يترك شاردة أو واردة من التراث إلا وقد صاغها شعراً جعلنا نشم من خلاله ريحة التراب، نرى بين أبياته ما سكن في الوجدان من تراث.
في البال إنزال بعض من أشعاره هنا، فضّلت أن أبدأ بـ "هوي يا وليد" لتنعش الذاكرة بما فيها من لوحات تراثية تحكي مناظر من الأصالة التي افتقدناها طويلاً.
هـــوى يـا وليـــد

هوى يا وليد يا دلوعة يا مرنوعة
أعدل إيدك المفدوعة
واتلحلح واقيف دغرى وواس صدرك
مع صدرى واتشدّع


ليك الحق
شان ولدوك فوق اسفنج
وحتى أول جديد سوهو ليك بالبنج
وهسع هوايتك إنك تلعب البنق بونق
وليك الحق عشان فطموك بعد مازدتا فوق سنتين
وفى سن عشرة نومك كان على الليدين
غطاك بالشاش وفرشك بحرير الصين
والبتدورو كلو بتلقى غاب قوسين
ابوك مليان وجيبو سمين وقلبو سمين
وفاتحلك حساب فى البنك والتأمين

وليك الحق
عشان ما خضتا فى وحل المطر والطين
ومن الترعة ما سويت شراب الهين
وما قيلتا فى ضل دومة بى فرعين
وما شاققتا عرق النيل مع الوزين
وليك الحق
عشان ادمنتا عيشة اللين
مشي الاسفلت ما جربتو بالكرعين
ركوب اللورى فى شمساً تصر العين
وما عانيت وقوف الصف وراء التموين
عشان يا انتى ما بتدرى سجل ابواتك البدرى
دحين اسمع .. أقيف واسمع
سماك الباكى مجدو الزال
يا ما كانوا تحتوا رجال
ابوخنجر وابوشوتال
والصقر البجيك خوجال
صوتن كان يمين جلجال
ومكسيين كمال وجلال
لكن الزمن اسرع
سيفن بلحس الفقره
وما كان برضو بالحقرة
وكانوا بضبحوا الشقره
وكانوا بضوقو العادوه نوم الكوع
وكانوا بموتوا فى شان حرمة المفزوع

الجعلى اب شرابا حار وقالوا بعدى يومو خنق
والشايقى البياكل النار وفوقو نحاسو متخنق
ودرفون البجا الصقار وحاقب سيفوا ياكل الشق
والغرباوى عينو شرار وكضب القالوا عندو عرق
والنيلى البعرفوا كتار على كتل الأسود جرّق
والبطحانى والشكرى وغيرهم من أهل فخرى
ومنهم أصلى لا بشبع ولا بقنع

هوى يا وليد
حصل جربتا كب السارية
فى القلعة وخلا العتمور
وشفتا بروقه تترقص وتتحرقص
تقول مطويه فى قرقور
وعاوى الزيفة ينفخ فى جبال النقعة زى الصور
والحصحاص يجرفوا السيل
يكنسوا على مهاوى الخور
وقلب الصاقعة يتطرقش
يكب النار دمار وشرور
وشفتا الحال عرق مقلوع
جبل متروم فرع مكسور
جمال غرقانة بى حالا وحد المويه فى الغرغور
ود ابن ادم المسكين نجاتو تحت قرون التور
والعوتيب يجيك يجرى يشيلك وانتى ما بتدرى
وما بيرفع

هوى يا وليد ...
حصل سادرتا بالديداب
وقدامك مراحك وراكب الخباب
ودربك طولوا يملا العين
سحاب وغبار ومويتو سراب
وهوى كرباجك البكاى
يبكى على ضهور الضمر الانجاب
وتسرى الليل وما تضوق هجدة
لو كان النجم ما غاب
وبعد أيام تجيك لفته
ويلوحلك فى البوادى سحاب
وتكرف من دعاش العينة تملا رئاك
عطر وأطياب
تلقى الوادى خضر زى تقول
ماكان خراب ويباب
وبت ام ساق تقييل من ضحاها
على المعالى ونسمة الهباب
وتفرش ليك حزمة نال تحت
سيالة تريانة فروعها قراب
وتنفخ كل آهاتك مع المزمار
تصوغ الحان ملانة شباب
وتنسي الدنيا كل الدنيا
ماعندك معاها حساب
خلاف برقا يشيل حرقاص
أو رعدا تقول رصاص وكت فركع

هوى يا وليد ...
حصل صحاك عز الهجعة
صوت شتماً بعيد مخنوق
وجاتك شخرة الطنبارى مشتاقاً يسوى القوق
ونومك طار واتقسم والرشرش صبح مفروق
واتلفحت نص من توبك الجرجار
على الدلوكة سايق سوق
وتلقى هناك بنات بلدك ولاد بلدك
يعلو الصفقة تقدح فى القلوب الشوق
ونغم الفال ابشرن يا بنات بالخير
والجنيات تطير لا فوق
وكم زغرودة تتفجر تفور بالناس بعد ما تروق
يعوم الوز صدورو تشابى للمجهول وما بتضوق
تميل زينوبة زى البان يمين وشمال تودى الطوق
واخوان ام شلخ ينكبو جوه الداره
زى صقرا نزل من فوق
ضرب الصوت والركزة بيفرق الناس
عشان زينوبة ما بتحوق
وعاد تتحزم الجنيات وتتنظم تقيف في روق
وكل واحد يهز ضرعاتو والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق
ويتقدم عريس السمحة رافع صوتو
كان بسوقوا بيهو النوق
والعنجاوى ينزل فوق ضهورن
بس تقول منشحطة فيهو بروق
يبدا مجرو بالترقوة ويتحدر
مع الضلع القصار ملصوق
واحمر عين يشم الدم بعد ما يرش بنات
عمو ويزيدن شوق
وثابت حيطة لا بتهز ولا بتلز
وصارى جبينو كلو عروق
وقال بعد العقد طلقانة ما يحجزوهو
إلا يخلو ضهروا شقوق
هناك الحال مغير جد وهيجة الناس تفوت الحد
وكان حجازو مد الليد بتسمع كع

هوى يا وليد ...
حصل شارفت دغشا بدرى
فوق حجرة مخانق النيل
فى سنة تساب والشرقي
حزم القيف وطفح الكيل
وشوفتا الهيبة فوق اسيادا
والشخرى البكتل الحيل
وشفتا الجارى يحفر فى جروف كوكبنا
بس داير يشقو عديل
يجيك بي صدرو متحزم ومتلقف صفوف فى صفوف
يحاكى الخيل
ومويتو الهايجة تبلع جب
وتجقم فى مدالق السيل
وفوق الرملة مشرور العشارى طويل
معشعش بين نوايبو الطير
حليلو جزايرو جاها النيل
وحالف ما يخلى شبير
حزم اطرافا يكسر فيها
بالهدام وينحر فيها بالقرقير
وبكرة يموصها يشرب طينها
يزرع فيها شلالات هدير وهدير
وتكسح مركب النواتة عايمى
على قرون الموج جناحها كسير
رواسيها مالى اصابعوا فى المجداف
يقوم لافوق ويجى من تانى فوق الدفة
رافع ايدو ينده فى جملة الصلاح واهل الخير
هناك الموت يمين شافوهو شوف العين
ومافى شفيع ومافى مجير
تقول الزول يعرف اجلو
ومكان موتو لولا إنو ما كشفو الإله لى غير
عاد ما دام رقاب الموج تمد لسناتا
فوق للحيف تكب الصير
وشن فضل بلا الغرق البدور ناعى
وفعلا كانوا يا هو مصير
ومشيت المركب الغرقاني بين موجتين
طفروا منها النواتا بطن اللجّة قالوا اخير
تماسيحاً يقالدوا الموج يصارعوا
عتاوة العرق الكتالو مرير
ساعة يعومو بالضرعات وساعة فج
صدورن ضمة مااتبلت ولو قطير
ديل يا وليد ولاد النيل
رضو الهيجة من صدروا
ومن الطيبة رضعوا كتير
الواحد فعايلو كتر ونضمو دقاق
نهرتوا يمين تسوى الفاق
ومراً أصلاً لا ضاقوه لا بنضاق
كفاك يا وليد بلاش فاقة
خلاص أنا تهتا فى الاشواق وما برجع
وهسع ضمة لا شايفك ولا بسمع .

عكود
11-20-2006, 05:30 AM
http://sudaniyat.net/upload/uploading/Du1.JPG

ود با دي وخالد الحاج - العين ديسمبر 2005

أبو الحسين
11-20-2006, 05:34 AM
الجعلى اب شرابا حار وقالوا بعدى يومو خنق
والشايقى البياكل النار وفوقو نحاسو متخنق
ودرفون البجا الصقار وحاقب سيفوا ياكل الشق
والغرباوى عينو شرار وكضب القالوا عندو عرق
والنيلى البعرفوا كتار على كتل الأسود جرّق
والبطحانى والشكرى وغيرهم من أهل فخرى
ومنهم أصلى لا بشبع ولا بقنع


هيعععععععع

حميد
11-20-2006, 10:09 AM
عكود..
كنت اعرف انه وعندما تدور ساقية التوثيق
للقديم ستكون على ضهر الخباب..
جميل ان تتحفنا برائعة ود بادي..وعبرك
ليهو الف سلام..
وياريت توصل ليهو السؤال..
اين الجديد؟؟
آملين ان لايكون الزمن قد جعل منك
(هشا طريا نديا)؟:D

وياعكود باقليك ( ناس ) قرض اجتازو الامتحان ده
وللا خشو بي وااااسطة؟:D وليك الحق
عشان ما خضتا فى وحل المطر والطين
ومن الترعة ما سويت شراب الهين
وما قيلتا فى ضل دومة بى فرعين
وما شاققتا عرق النيل مع الوزين
وليك الحق

احمد حسن جدعه
11-20-2006, 11:04 AM
رايعه يا عكود
وياريت تحكي لينا
قصة القصيده دي;)

عبد العظيم الطاهر
11-20-2006, 01:44 PM
يا سلام ............... على النضم البتور النفس دا

يديك العافية يا عكود .... واضم صوتي مع صوت حميد .. في انك تسعلو لينا من الجديد ...

محمد ابراهيم قرض
11-20-2006, 03:20 PM
رائعة و طاعمة يا عكود ...

حميد
11-21-2006, 11:43 AM
شقف للمزيد..
اين انت يالعكود ؟
هل اصابك مرض عدم الكتابة؟:D
لاتتمورض تمرض..


حميد..

أبو الحسين
11-21-2006, 03:35 PM
شقف للمزيد..
اين انت يالعكود ؟
هل اصابك مرض عدم الكتابة؟:D
لاتتمورض تمرض..


حميد..

شوف عيني دي قاااااااعِد متحكِّر لكن مالو ماهو داير يتِبْ علينا دا المحيِّرْني؟؟؟:eek: :rolleyes: ;) :p

عكود
11-21-2006, 05:16 PM
شوف عيني دي قاااااااعِد متحكِّر لكن مالو ماهو داير يتِبْ علينا دا المحيِّرْني؟؟؟:eek: :rolleyes: ;) :p
حميد
جدعة
عبدالعظيم
قرض
أبو الحسين
آسف لتأخير الرد على مداخلاتكم ..
من باكر دغش برجع لكم واحد .. واحد
وأواصل درر ود بادي

عكود
11-22-2006, 07:37 AM
هيعععععععع


واحمر عين يشم الدم بعد ما يرش بنات
عمو ويزيدن شوق
وثابت حيطة لا بتهز ولا بتلز
وصارى جبينو كلو عروق
وقال بعد العقد طلقانة ما يحجزوهو
إلا يخلو ضهروا شقوق وتاني هييييييييييييع يا ابو الحسين

عكود
11-22-2006, 07:54 AM
عكود..
كنت اعرف انه وعندما تدور ساقية التوثيق
للقديم ستكون على ضهر الخباب..
جميل ان تتحفنا برائعة ود بادي..وعبرك
ليهو الف سلام..
وياريت توصل ليهو السؤال..
اين الجديد؟؟
آملين ان لايكون الزمن قد جعل منك
(هشا طريا نديا)؟:D

وياعكود باقليك ( ناس ) قرض اجتازو الامتحان ده
وللا خشو بي وااااسطة؟:D في النيّة يا حمّيد إنزال ما عندي من أشعار ود بادي ..
كنت قد جمّعتها من هنا وهناك (أغلبها من مداخلات أخونا ديّامي - ليته يشترك هنا)، كانت هناك كثير من الأخطاء فيها (إملائية وتبديل بعض الكلمات)، قمت بالتعديل حسب الذاكرة (فقد كنت أحفظ كل القصائد عن ظهر قلب)، عموماً لو رأيت خطأ ما أرجو تنبيهي.
ود با دي عنده الجديد ولكنه، بطبعه، زاهد عن النشر، هل تصدّق حتى الآن شعره غير مجموع؟
أوصلت له تساؤلك وتساؤل الكثيرين عن جديده، فوعد أن يرسل لي مجموعة قصائد لإنزالها هنا.
أما عن الهشاشة والطراوة والنداوة، فقد زالت عنه الغبَشة دون هشاشة .. وترسّخت الأصالة والحنين، كما لم تفارقه الدروشة وبعض طمسة.

عكود
11-22-2006, 08:01 AM
رايعه يا عكود
وياريت تحكي لينا
قصة القصيده دي;)
أحمد جدعة ..
نهارك سعيد،

قصة القصيدة ذكرها ود با دي في التسجيل المرفق مع القصيدة ..
أتمنى تكون سمعتها
لو ما اشتغلت معاك قول عوك، عشان أقوم بإنزالها مرة تانية.

عكود
11-22-2006, 08:08 AM
يا سلام ............... على النضم البتور النفس دا

يديك العافية يا عكود .... واضم صوتي مع صوت حميد .. في انك تسعلو لينا من الجديد ...
بدون تعليق منّي يا عبد العظيم، أورد ليك ما كتبه أخونا أبو جهينة عند سماعه لقصيدة هوي يا وليد في بوست في سودانيات (لود الشيخ)، وتعليقي عليه:لا حول و لا قوة إلا بالله العلي العظيم ..

أولا ود الشيخ ود عمي .. سلام كبير و تحية ماكنة و شوق عارم و كل سنة و إنت طيب

العكودابي عكود : مالك علينا يا عكود ؟ أنا قلت كفاى أقرا بس ..
ما طالبني حليفة .. سمعت النص كاملاً و إنتابتني نوبة من الهستيريا ( أخوك تربية جعليين و إنقرياب ) و ضايق السوط كان مرة كان مرتين .. لكن تبت لله و الرسول .. كلما أسمع لى حاجة زى دي ولا دلوكة أزوغ و كأني ما سامع ..

بعد إنتهيت من الإستماع الذي بنجني تماما .. إنطبقت علي جملة العكودابي الأخيرة ( لا شايفك لا بسمع ) .. و بللني العرق و الله ..
لو في إنصاف .. حقو القصيدة دي يقولوها في طابور الصباح في المدارس لمرحلة الأساس .. لأنها تربية وطنية في المقام الأول .. و بتزرع الشموخ في النفوس .. و تخلي الواحد مكنكش في تراب السودان الأغبش دة .. و مكلب على الجروف .. و شاقي النيل بي سدرو عز الدميرة ..
أحبك يا عكودابي و أحب أي عكودابي .. الأحياء منهم و الأموات ..

دمتم
تعليقي:
يا سلاااام يا أبو جهينة..
تعرف...نوبة الهيستيريا دي ياها البتجيب ضواقة السوط وإستحمالو،
أذكر ونحن ما زلنا في الثانوي العام، زميلنا عبد الواحد كان من أمهر الناس في عزف الطنبور ورغم صغر سنه نسبياً، كان من الأساسيين في دارة اللعوب "حفلات العرس" كما كان يجغم العرقي ، وطبعاً في ذلك الزمان يكون العازفين في نص الدارة وكل واحد حاقب طنبورو ويعزف للراقصات داخل الدارة و "ما دام طار جنى الوزّين يا دوووب قلّ نوم العين".
في واحدة من اللعوب وأثناء عزف عبد الواحد، دخل العريس الدارة شايل سوطو ويعرض على إيقاع النقّارة..عبد الواحد، حسب الطرب والهاشمية، وبعض تأثير من بِكْري "مهولة"، قابل العريس وابتدا العرضة وبكل مهارة، والطنبور في إيدو اليمين.
أذكر جيّداً، بعد أن سخّنت النقّارة والدارة خَلَت إلا من صاحبنا والعريس، نسبة لجمال العرض المقدّم، وتصاعدت أصوات الزغاريد مع ذرّات العجاج المتصاعدة مع نور الرتاين، تسارعت عرضة عبد الواحد حتى صارت وكأنّه يعرض بصورة آلية (مِتل المالينّو بزنبرك)، وعندما وصل مرحلة أن عرضتو صارت أسرع من دقّات النقّارة، قلع الجلاّبية بحركة سريعة جدّاً، وركز للسوط..
طبعاً نسبة لصغر سنّه، حلف عليهو العريس وما بَطَنو...عبد الواحد من شدّة الهيستيريا، إلاّ شالوه عووووود ناشف من الدارة وزبدو يرغي ويعضّي في لسانو..

وبعد ده تقول لي يا أبو جهينة، تلاميذ مدرسة الأساس يقروا القصيدة كل صباح؟
والله إلاّ كل مدرسة تكون معاها عيادة بمخزون وافر من القطن والشاش والمطهّرات،
رابط البوست:
http://sudaniyat.net/vb/showthread.php?t=472

عكود
11-22-2006, 08:12 AM
رائعة و طاعمة يا عكود ...
لسّع جاييك بالمزيد، من النوع البيحبو قلبك يا قرض ..
خليك قريب،

عكود
11-22-2006, 08:16 AM
حميد وأبو الحسين ..
جاييكم بالمزيد .. بس أنا قلت لغاية كل قصيدة تاخد حظها من القراءة والتعليقات، بعدين أنزّل البعدها،
لا تسوّوا الصفقة دنقير .. شي :D

عكود
11-22-2006, 08:18 AM
يا ريت الخال :p يحفظ ما يرد من أشعار ودبادي هنا تحت إسمه في "شعراء من المنطقة"، لزوم التوثيق.

عكود
11-22-2006, 08:32 AM
أعتقد من المناسب أن يتم تغيير اسم البوست إلى "صور من البلد في أشعار ودبادي"

رضعتك في لبي الامات
وشلتك زفة في البيشان
وفي اللمات نميتك غني وأنات
هسع وفي صباي الفات
وهزيتك نصايص الليل بوارق والذكر تهليل
وشلتك فوق عواسي الخيل
مجرتق والرقاب شارفات
واريدك ياعزيز الشأن واناديبك
ونادهك في البلاد سودان اهاتيبك
وكاتمك في الفؤاد اشجان الاهيبك
وشايلك في الكتف نيشان اباهيبك
واناديبك واهاتيبك واباهيبك والاهيبك
مولقدة في لهاليبك
وشلتك لوح ادون في نورات الفجر
اتهجأ في الاخلاص
وارتل لوح ونسماتا دغيش بتفوح
تتاوق في رواكيب الفريق
تنكب تدلق في النفوس الروح
ومجروح السواقي تنوح
مدد مدد ياشيخ
ياود التويم انا مجروح انا مجروح
وكان الشيخ ينزل في الورد
ياسبوح وياقدوس
وبالاشواق مشيتك في مشاوير
العشق ساساق
وكانت ألفة ما بين الضراع
اخضر والشتل مشتاق
وعتلة الجزيرة ام خير وقناديل المقد
تحمي رقابا وكان زرع العيوش افراق
ويافرح الحصاد
والحبة تمرق من سراديب الشتاء
والجرف المخنوق
يفارق قيدو والخناق
وانحنا نكيل قمحا بلا دهب الخليج
ساعة الوزن دافقنوا في الاطباق
كم عرق الترابلا الندا علا في الهامات
وصبا علي الارض نقناق
ومن شمسا بتقلي الحبة تمرق وتبرد في المقيل رقراق
من الفجراوي والعشاوي
من دمع السواقي السال
غزيز دفاق بيمرق في الحصاد خيرا
ينسّي الفات
ويابخت المشيل زملو
فاق وارتاح من الساساق
وباكر من غزيز الدمعة نوقد في المواسم شمعة
ويابهجة ليالي الصيف
هما راق و دما فاح
يفوح الصندل المعقوف
يسقي الوادي عطرا يشرق العشاق
ويصحي الليل يلمع فوق عرسنا هلال
يشلع قرمصيص الفـأل
حرير في ليل الزفاف براق

خالد الحاج
11-22-2006, 09:44 AM
سلام عكــــود
تم تنفيذ الطلب الأول (تغيير العنوان) .
الطلب التاني (اليتيم ما بيوصوه علي البكا):D
إنت أسكت نزل الكلام السمح وخلي الباقي علي خالك

أبو الحسين
11-22-2006, 09:54 AM
حميد وأبو الحسين ..
جاييكم بالمزيد .. بس أنا قلت لغاية كل قصيدة تاخد حظها من القراءة والتعليقات، بعدين أنزّل البعدها،
لا تسوّوا الصفقة دنقير .. شي :D

الشئ شفَقَة وعِشِق ومحبة سااااااااكت يا عكود يا اخوي:D :o :rolleyes:

عكود
11-22-2006, 09:55 AM
جضما معود علي الكفيتتوقيعك يغرينا بالنقّة وتكتير الطلبات في اليسوى والما يسوى
وصراحة، حقو يكون "جضماً يستاهل السلّيم"، رغم الكضوم:D

تسلم يا خال الكل

حميد
11-22-2006, 10:37 AM
توقيعك يغرينا بالنقّة وتكتير الطلبات في اليسوى والما يسوى
وصراحة، حقو يكون "جضماً يستاهل السلّيم"، رغم الكضوم:D

تسلم يا خال الكل

:D :D :D
وفي مقولة اخرى ( جضما يستاهل الجضيم ) محبة طبعا

حميد..

حميد
11-22-2006, 10:46 AM
رضعتك في لبي الامات

شوف بالله ياعكود بلاغة الكلام دا..
اذا كان الراضع لبن امو لايستهان به
فمابالم بالراضع لبي امو..


حميد..

عكود
11-22-2006, 11:08 AM
شوف بالله ياعكود بلاغة الكلام دا..
اذا كان الراضع لبن امو لايستهان به
فمابالم بالراضع لبي امو..
حميد..
كلام بليغ يا حميد ..
ود بادي معطون ومشرّب بالتراث الأصلي
يعني ما ممكن القول أن أشعاره إكتسبت صبغة المحلية والتراث
لا .. أشعاره نبعت من المحلية والتراث الساكن جوّاهو
زائداً المقدرة الفذّة في تطويع الكلمات الصعبة وتركيبها بكل براعة مما يعطي موسيقى داخلية في كل بيت.
تأمّل هنا:واريدك ياعزيز الشأن واناديبك
ونادهك في البلاد سودان اهاتيبك
وكاتمك في الفؤاد اشجان الاهيبك
وشايلك في الكتف نيشان اباهيبك
واناديبك واهاتيبك واباهيبك والاهيبك
مولقدة في لهاليبك
سودان - أهاتيبك، أشجان - ألاهيبك، نيشان - أباهيبك

أو في قصيدة سعيد ود بادي (دي جايينها براها) ساعة يقول:
الصهالة والوقالة والرقالة وام غره هو ركابن
الجهنية والقطنية والمحوية وام درة الباريها حلابن
العشاية والشاشاية والسباية وام ضرة لى ضيفانو بسخابن
المزروعة والمقروعة والمفدوعة لا برة متمسح ديمة قيسابن
المفزوعة والمقلوعة والممنوعة بالمرة كان من مافى جيابنأم غره - ركابن، أم دره - حلابن، أم ضره - بسخابن، لا بره - قيسابن، بالمره - جيّابن
زائداً الموسيقى الداخلية في كل بيت:
الصهالة والوقالة والرقالة
الجهنية والقطنية والمحوية
العشاية والشاشاية والسباية
المزروعة والمقروعة والمفدوعة
المفزوعة والمقلوعة والممنوعة

عبد العظيم الطاهر
11-22-2006, 12:24 PM
بدون تعليق منّي يا عبد العظيم، أورد ليك ما كتبه أخونا أبو جهينة عند سماعه لقصيدة هوي يا وليد في بوست في سودانيات (لود الشيخ)، وتعليقي عليه:
تعليقي:

رابط البوست:
http://sudaniyat.net/vb/showthread.php?t=472


أيي والله يا عكود ... من الهستيريا الواحد يبقى بتل الكديسي الخايفي من الكلب .... شعرة جلدو تقوم ....:D قطع شك القصيدة البتل دي تستحوذ على الزول تماماً ... تشد إضنيك إن بقيت ... تسمع ... وتجر عينيك إن بقيت تقرأ
لكن الشي البيزيدها إمتاع .. أنا عندي تعليق المتداخلين ... وبمنتهى الصدق .. تعليقك انت وابو جهينة .. بقى لها زيادة بهارات وأداها نكهة على نكهتها ....
تشكر يا عكود
يلا راجين الباقات ....

عكود
11-23-2006, 04:49 AM
من الهستيريا الواحد يبقى بتل الكديسي الخايفي من الكلب .... شعرة جلدو تقوم :D :D أظنو، يا عبد العظيم، ده الصاب أخونا أبو جهينة .. الزول قال لامن عِرِق وطشّش :D .
جاييك بالباقي،
خليك متابع وما تحرمنا من تعليقاتك.

عكود
11-23-2006, 05:10 AM
جدي سعيد ولد بادي العكودابي

بعد عشرين حسبتها يابا يوم فوق يوم وعام فوق عام
حنينكم طش فى طشيش
ويا مالقيت تملى الحنين جمام
اتلفحت شال الشوق احادى الراحلة لا قدام
كسحت شمال وحس طنبوركم الولوال نحاس ابواتكم الرزام
صليلن يصحى فى الشوق اذا ما نسم النسام
نزلت قرير اهالى الشان يعشو الضيف بخيلن فنجرى وعزام
كرفت الطينة ارث الفات
وما كفانى الا بركت فوق الدار واتنسمت من السام
شرفت على رمال القوز
واترحمت على حرزا هناك مركوز
على راسم سريع النهمة كان ودتوم وكان فى الماضى مو نوام
ردفت الصيحة فوق الصيحة واتحزمت ابكى رجال
بكيتَ سيوفن المدروعة فى الحيطان
وزى ما هم رقادن طال رقادن طال
بكيت فرواتن المفروشه للجهال
ويا ما قال ويا ما قال ويا ما عرض الصهال
نشدت الفى الضريح راقدين عليكم الله يا خالدين
عليكم عزتن كانت زمن زينكم
ودنياكم لبن معسول وتشربوا فيها بى هينكم
جدى سعيد ولد بادى العكودابى دحين يا ابواتى كان بينكم؟
قالوا اتربى فوق خيلكم ويوم الحارة شايل شيلتو من شيلكم
وقالوا الهيلو، كانت في العرف، هيلكم
يخالطكم قداحة الخير ويتحزم وكت شينكم
قالوا أماتو مو دابن
عقاب التيه ما بهابن
حناضل المره شرّابن
وشكاراتو سمعن قولى قالن سى بدن شكرو
وقالن لى يمين ما قلت فى جدك كلام قدرو
وكل القلتو فيه قليل وما قارب عشر عشرو
الصهالة والوقالة والرقالة وام غره هو ركابن
الجهنية والقطنية والمحوية وام درة الباريها حلابن
العشاية والشاشاية والسباية وام ضرة لى ضيفانو بسخابن
المزروعة والمقروعة والمفدوعة لا برة متمسح ديمة قيسابن
المفزوعة والمقلوعة والممنوعة بالمرة كان من مافى جيابن
راكب الفصلوا انسابن ودايما قدمو فى ركابن
اسود الغابة غلابن وبعرف يكسر انيابن
حلفوا الشافوا قدحو الحار وشافو كتار وماهو كضب
قالوا وساعو مركب زان يشيل اطنان وخرسو هلب
جفير سكينو دمو ينز وداك برادو واسكت كب
اهل السايحة والمتراوحة خاتمة وعاقبة بى قدامو سوا درب
ده ماهو كتير على ولدا مربى على ضفاف النيل
ويوم ولدوه دفنو ابواتو صرتو فوف مراقد الخيل
عكود الكان بعبر الكيل
جاتو الدنيا هينة ولينة بالخيرات مشيلة شيل
سواقى تسوق تلوت الليل
ونخلوا متنى شايل العجوة والقنديل
عيوشو مصوبرات كيمان
وعيش الريف ولد تيمان وخاتى البودة والعسيل
ده شيتا كم دقون شافنو
بين شفقة وحرص عبدنو
والعقال لعابن يسيل
الا سعيد الطلق الزايلة وخطب بى مالو دارا خالدة كان عزام وباعو طويل
بساطو الاحمدى المحضور
غدا وعشيات ملاقية فطور
وديمة ضيوفو ديل فوق ديل
يختف من مطايب الدكة لى ضيفانو مو ضباح حميل وسخيل
طحاناتو ما نامن
جبال اللقمة كم عامن
فوق سمنا مصفى تقيل
ويومو الودع الحبان
ونورو الضاو تحت التراب ما بان
كان الفقد فيهو كبير
وكان اليوم ده ما خاتنو فى الحسبان
وكان ميراثو كل ميراثو
قدحا ناز وسيف فولاذ وفروة ناس اصال وعزاز
وسبحة ملانة يا حنان ويا منان
قبل العم وقبل الخال بكوا العدام ..
بكوا الايتام
بكى الكرم الصبح
مشلول وكل ابواتو راحو وغابو فى الرهبان
ونحن عشنا لا زمناً
قبل ما يبنوا فيه البيت يكوسو الطبلة والجنزيز مع البيبان
زمان الصالة والصالون
زمان الرغوة والبالون
حليل الكان
حليل الدانقة والديوان
حليل النافق اموالو وتدى يمينو وما تعرف حسابو شمال
خليك من يعرفوا فلان
ده كلو فضيلة فى الاجداد ابت ما تبقى فى الاحفاد
ومسكت فى النعوش الطاهرة واندفنت مع الجثمان
وكل مكارم العابرين معاهم راقدة فى شبرين
وبقت امجادنا كانوا زمان وكانوا زمان

أبو الحسين
11-23-2006, 06:22 AM
وكان ميراثو كل ميراثو
قدحا ناز وسيف فولاذ وفروة ناس اصال وعزاز
وسبحة ملانة يا حنان ويا منان


نعمة الإرث...

ونعمة المُوَرِّث...

ونعمة الوُرَّاث...

الرحمة والمغفرة للعكودابي الكبير... وحفظكم الله آل عكود مننننننن القرير ليييييي العين وأبو ظبي...

كميات مودتي...

أبو الحســـــــــــــين...

حميد
11-23-2006, 09:18 AM
حفيد العكودابي..
اعجبني وصف ود بادي لكرم العكودابي (عليه رحمه الله)..
في زمنا كان اغلي ما يملكون هو الارض والسعية وهاهو يجود
باعز ما يملك..العشاية والشاشاية والسباية وام ضرة لى ضيفانو بسخابن
المزروعة والمقروعة والمفدوعة لا برة متمسح ديمة قيسابن

وقالوا الهيلو، كانت في العرف، هيلكم

وشوف بالله كلمة العرف..اقوى من الاوراق والمستندات
في الزمن السمح..

وشوف الجاي كمان..حلفوا الشافوا قدحو الحار وشافو كتار وماهو كضب
قالوا وساعو مركب زان يشيل اطنان وخرسو هلب
جفير سكينو دمو ينز وداك برادو واسكت كب
اهل السايحة والمتراوحة خاتمة وعاقبة بى قدامو سوا درب
بساطو الاحمدى المحضور
غدا وعشيات ملاقية فطور
وديمة ضيوفو ديل فوق ديل
يختف من مطايب الدكة لى ضيفانو مو ضباح حميل وسخيل
طحاناتو ما نامن
جبال اللقمة كم عامن
فوق سمنا مصفى تقيل
اما القدح الناز ففيه الوصف الكامل للكرم..

وكان ميراثو كل ميراثو
قدحا ناز وسيف فولاذ وفروة ناس اصال وعزاز


بكى الكرم الصبح
مشلول وكل ابواتو راحو وغابو فى الرهبان

وشوف كمان حال الكرم الصبح ميتّم ومشلول

حاولت جاهدا ان ان اقتبس بعض
ما وصف به ودبادي كرم ود عكود
وفي وصفه للشجاعة جواد آخر

راجنّك تاني..وياريت تشكّل وتنّون
لي طير الصعيد..:D


حميد..

عكود
11-23-2006, 10:02 AM
أبو الحسين وحميّد،
أسمحوا لي أجملكم في رد واحد.

ود بادي قال القصيدة دي لمّن نزل القرير وهو طالب في الجامعة . . بعد كتبها، قراها (طبعاً بطريقة إلقاءه المميّز داك) للعمّات والخالات ومن كانن يعملن في حوش جده سعيد ود بادي، طبعاً فاض بيهن الحنين وعجبتن القصيدة والشكرة، لكن برضو قالن لو، حديسك ده كلو قاصر في حق جدّك، فأضاف:وشكاراتو سمعن قولى قالن سى بدن شكرو
وقالن لى يمين ما قلت فى جدك كلام قدرو
وكل القلتو فيه قليل وما قارب عشر عشرو
.
.
.
إلخ المقطع
سعيد ود بادي كان كذلك وأكثر، لم نحضر زمنه ولكن ما يُحكى عن فرسنته وكرمه، شي يفوق الخيال. وكان أشبه الأحفاد بجدّه الفارس عكود.
عن نفسي شفت قدح سعيد ود بادي، له تلاتة أخراس (مقابض في طرف القدح يُحمل بها)، وحسب ما يروى كان لا يستطيع حمله، في حالة ملئه، إلا 3 رجال.
أمّا عن الشجاعة، فقد خبِرت شجاعة أبناءه وأحفاده، خاصة إبنه سلفاب، رحمه الله، فقد كان قليل الكلام نحيف الجسم. إلا أنّه كان أسداً هصوراً في الملمّات وله مواقف مشهورة في ذلك.

تلك الصفات توارثها كل أبناءه وكل أحفاده بما فيهم ود بادي نفسه.

أبو الحسين
11-25-2006, 03:42 PM
أبو الحسين وحميّد،
أسمحوا لي أجملكم في رد واحد.

.

نحن راضيييييييييييين ما ترد علينا ضُمة ضُمة:rolleyes: بس واصل الله يديك العافي في عضيماتك...

وألف رحمة تنزل علي ود بادي الكبير... والصحة والعافية علي ود بادي الصغير...

وكميات مودتي لك أخي عكود...


أبو الحســـــــــين...

عكود
11-26-2006, 07:17 AM
تسلم أبو الحسين على الحرص والمتابعة . .
إليك عودة الدراويش بكل ما فيها من رمزية ونبوءة ووعود:

عـودة الـدراويـش

حال هذا البلد بكانى ما سكتنى
ريدتن فيهو كيف مالكانى كيف ملكتنى
نارن فيهو كيف ماكلانى كيف لهبتنى
الاّ ترانى فى العرضة انحسب برانى
والناس البتعرض جوه مما سمعتنى
الاّ ترانى انبح زيي زى إخوانى
والخيل بى عجاجة عمتنى
توبى قصير وما غطانى
والزيف ام برد شقتنى
قلت اباصر امرق بره من احزانى
وين قبلتا سفكت دمى وإتعدتنى
ولا زينوبة آخرت إيدى فى الدنيا أم بناين هش
من شافتنى جفلت منى خنست فى نوايا القش
مرادى سلاما يغسل حزنى
الاّ سلاما زاد احزانى زادنى عطش
لحقتها فى الفريق اتناسا وانشد حالا
طلبتها شاى وقست مداسا
قصرت عينى فوق خلخالا
لفحت توبا لحقت ناسا
وقفت غادى عدلت حالا
غزت كوعه هزت راسا
لفت جيدا قالت لا لا
قالت لى شن معناك وشن كسب الرجاك ورجاك
وشنو الراجنو من تالاك
زمنك كلو تاكل باردة ماضق شر
زمنك كلو نحن نعوم وانت تغنى ماسك البر
وزمنك كلو فوق الفارغة فوق ريح المدن منجر
الخير إن مرق من دارنا لا انحسيت ولا نحاس القبيلة نقر
ولينا سنين خلانا سموم وما شربت حفايرو مطر
منيحه الشافع الاماتو راحن فى شموس الحر
صقور الباشا نهشن من ضروعا وفوقنا طارن فر
كلاب الباشا فطرن فيها وما لقن البيقول لها جر
والباشا الغشيم فى ذاتو قعقع ومن كبادا فطر
لا ولدن يقولو انتر ولا مهيرتن تقولو فشر
ويا الباشا الغشيم قول لى جدادك كر

بعد حكت العليها اتوهدت برزن بروق عينيها
كست خلاصى بين إيديها ما لقيت البلفقوا ليها
وقعت دمعة من ود عينى قلت اخفيها
وقعت عينى ذاتها عليها
حسبت المسافة البينا قلت امشيها
كفتنى الصقور بي جيها والبلد اترمت بي جيها
حكموا كتافى عقدوا لسانى ضاروا وشيها
غنوا اتهنوا تربوا وشربوا من بكريها
مصرو ثديها شربوا سلاف معتق من لذيذ شفتيها
عينى تشوف لسانا وصرختا وثكليها
عبلة تنادى فى الولد البشق التيه
عبلة تنادى فى الولد البعرف الجيها
عبلة تنادى فى الولد البعدلو وشيها
عبلة تنادى واقفة قصادى مصروا ثديها
عينى تشوف لسانا وصرختها وثكليها

هيا ريح الصلاح هبى
وامرقى من متاريسك
من طرف البلد شدى
وسوى البرجى داك ميسك
بارده علينا تنكبى
ودمنا زيت فوانيسك
هو لا شرقى ولا غربى
بينزف من دراويشك

والليلة يا ريح الصلاح الهابا فيك راحه وجع
والليلة الشجر الكبار وحشاه ناقرو السوس بقع
والليلة حق الناس ببين والليلة بنشوف البدع
والليلة وين البرقى من تالاك يبين
والبرق من تالاك سنين
يبرق كذا سيوف الصحابه الساجدين
والعاديات المؤريات خرشه جنات فى الارض جات
والخلوق الضايقة لا قوها اجمعين
عرب البوادى المن شرق والامه دى المصلوبه
فوق حبل الصبر لما اتمدت والكادحين
والصالحين والساجدين والعابدين والزاهدين
ونفضنا من زمن الجدود صقر السنين
وسرجنا خيل مسروجة من زمن الحسين
وعرضنا زين
وجمعنا غطا المشرقين والمغربين
واميرنا صاح الرايه وين
والجمع صاح الرايه وين
ومشينا بالتاريخ ركبنا على البساط الأحمدى
كايسين محل وقعت سوارى الرايه
وانقطعت تواريخ النعوش
ولقينا باقى الرايه فوق قبر الخليفة الراشدى
مليانه دماً كيف ندى
وساريها فوق الفتنة دايخ ومنتكى
وغسلنا بى دمع الندم قميص عثمان من الدم الزكى
وعقدنا حبل الدين على طرف القميص المكملى
والراية زادت من الملى ورفرف قماشا المخملى
وحرسوها زى سبعين ولى
ما جلهم حراس الهنا ما جل حراس الأمانة وديدنا
يات من حوار ختم الكتاب ختم السند والعنعنا
يات من ولى ودرويش غرق فى الهمهمات والدندنا
آن الاوان والخير دنا
اتحزموا السبح الطوال واللوح برق
ارجونا فوق طرف الجبل مشهادنا نفزع مجدنا
ايد فى لجام الخيل تقل والتانية فى لجام النفوس
المادحه فى درك الزمن
يا امه كسلى ونائمة فى تياب الكسل
وهواها ماشى مع الأضل
الخيل مصوبر فى محل والخيل تجقلب فى محل
بعد العدل والريح صلاح والظلم راح والصاح قدل
بعد الشروق يا امة وسطا بتشهد فى الخلوق
بعد الشروق نجمك أفل نعشك غشانا على عجل
يا امة وافاها الاجل وماتت على سوء الختام
واخر الكلام فى لسانا كان هبلاً .. هبل
هبلاً .. هبل
وسقط هبل .

أبو الحسين
11-26-2006, 09:39 AM
هيا ريح الصلاح هبى
وامرقى من متاريسك
من طرف البلد شدى
وسوى البرجى داك ميسك
بارده علينا تنكبى
ودمنا زيت فوانيسك
هو لا شرقى ولا غربى
بينزف من دراويشك


هُنا الإبداع...

والإستمتاع...

والقُُرُرَان بالإجماع...

كميات مودتي...


أبو الحســــــــــــين...

حميد
11-26-2006, 01:33 PM
تسلم ياعكود علي هذه التحف الجميلة..

طبعا حاولت الرد باقتباس لبعض الروائع
وفشلت وانت عارف السبب..
كلو من ابو الحسين دا..:D

عكود
11-27-2006, 06:26 AM
الخليفة أبو الحسين،
فعلاً إبداع ومعاني عميقة وذات دلالات.
فيها إستنهاض للهمم وإستنباط للعبر ممن سبقونا.

شوف هني، وكيف تُحرس الرايات.
أولياء، حراس، حيران، دراويش، حفظة، سِبح، ليحان وخيل . .
القصيدة فيها الكثير بين الحروف . .
وفيها رؤية خلاص.
والراية زادت من الملى ورفرف قماشا المخملى
وحرسوها زى سبعين ولى
ما جلهم حراس الهنا ما جل حراس الأمانة وديدنا
يات من حوار ختم الكتاب ختم السند والعنعنا
يات من ولى ودرويش غرق فى الهمهمات والدندنا
آن الاوان والخير دنا
اتحزموا السبح الطوال واللوح برق
ارجونا فوق طرف الجبل مشهادنا نفزع مجدنا
ايد فى لجام الخيل تقل والتانية فى لجام النفوس

عكود
11-27-2006, 06:30 AM
تسلم ياعكود علي هذه التحف الجميلة..

طبعا حاولت الرد باقتباس لبعض الروائع
وفشلت وانت عارف السبب..
كلو من ابو الحسين دا..:D حميد . .
الإقتباس من قصائد ود بادي صعب ..
لأنها تشكّل مجموعة لوحات، حذق صانعها مهنته،
يمكنك أن تقتبس من طرف . .
ولكن لا يمكنك أن تقول أن ما اقتبسته هو الأجمل.
فكل لوحة قائمة بذاتها، لها جمالياتها وخطوط فرشاتها المميّزة.

تسلم وخليك متابع.

عكود
11-27-2006, 06:36 AM
حـــواء
كابى المقنع الجرجار على موية الوجه يا حوا كابيه
وزازى الدمعة منك بى طريف التوب
احزمى حشاك واكربيه
خيراًً ولى مو مدخور ،
رزق الليلة داب الليلة
والباكر تشابى وما بتجيبيه
ويا حوا الوكت مرواح وزمنك راح
امسكى ضرع شويهاتك احلبيه
ليش ماك حامدة ليشن جاحدة
والرزق العليك هطال شربتى التانى فوق بكريه
محمود الغنى ومشكور
غيارك فردة من نسج الكمالى
والتانى توب جاراته بنغالى
ومحمود الغنى ومشكور
وعاجك فضة من دق وتبيد الغالى
ومحمود الغنى ومشكور
نارك موقدة ما عونك ملان مو خالى
ومحمود الغنى ومشكور
وابوزينوبة ناهض فيها ماهو الخملة عنقالى
ومحمود الغنى ومشكور
وأحمد قلتى نور عينيك مختَر
فوق بطان الحلة خوجالى
عصاية الصبينة المكسية بى جلد
الندف والخامة سرهيته
وسرج المرقة سنارى ومسمَر
فوق سراة البانى سنكيتا
وجزلانا مجنزر وطية رزماً
من بطون الطينة مبحوته
ولازم الفنجرة اتبشقت سبع خمسات تصل
حاكت حجول المارقة من بيتا
ومتلفح كساوى الساكوبيس
صوبان وظهرة تقيلة تبرق سنو سوميته
جيداً جيت وجيدلك
حوا بى جنس الجنا القارى
وجيدلك حوا بالولد البعوم الشبكة سدارى
متلك حقو لا تنضامى لا تنلامى لا تتضارى
وانت ولدت للبلد البجيب راس العشارى
عدلك هادو فى كُم الرجال أحمد يمين مقنع ولايا
وفى دارة البنات زينوبة فرقت
منهن فرقة كتيفها من الفداية
عصارى الوردة فوق المشرع
اب مسكا دفق روسن وقايا
وسون قدلة الوز الرطن
صباحى شاقات اب شراية
تبين زينوبة حين تتوقى شعراً كاب
بعد ما انساب على الخد المرايا
عصارى الفزعة والفازعات يجن بكراً تنايا
ويات من تبقى حازمة
التوب على النص القناية
تبين زينوبة حين تتحزم الخصل الشرابهن
صندل الناس الغنايا

شن معنى الكسوف يا حوا
والحزن البجيب ليك الشماتة
وكنزك فى الكنوز زينوبة وأحمد
كل يوم زايدين قيراطين فوق تلاتة
نجوم السعد فوق حجرك تباسم
وانت شارفة ترمى فى ودع البخاته
شتول الفرحة تتفتح قبال
تتمد ليك الليد ومالاقية التفاتة
اقطعى الزند البقودك
من فلاة الخير على بلد الدراهم
واقلبى الطوف إن كسح بك
من جروف الخير على جزر المراهم

يا ديار حوا المراقدك فى رويس عبدلّه وينك
يا المشاوير المشيتك يا المشارع السالكة وينك
بالى فيكى إلا درب العيشة باعد بينى بينك
يا لبينة المغربية النازلة من أطراف سعينك
يا السرابة الحبلى كل الناس تعاين لى جنينك
يا السبايك الساوى شيلك
ولا طويرة الجنة تسكر من مدينك
يا السواقى النايحة زيك
زى حنان اماتنا فى حرقة حنينك
يا بنية طرية طامرة كنوزا بى طرف الطريحة
يا نسيمة رشة باردة تجينى
ساعة اشيّلك موية الصفيحة
يا مليحة
. يا العقيد النام موسد راسه حبات السبيحه
يا صباح الرحمة يا الروح
البتلفى حوارها تمرق من ضريحها
يا حزيمات القمح منشرة فى زمن الحصاد
يا رياح الشتوى هابة على مساجين
المشال بالفرحة والفرج القريب
يا نزيل قمر التمام الحشو
فى شيلتو السناجك والارابيب

يا ولد نقرات تقيك الفى الحصاد
عاقباها بعد المسرة نقرات الدليب .

حميد
11-27-2006, 02:48 PM
وفى دارة البنات زينوبة فرقت
منهن فرقة كتيفها من الفداية

لا اله الا الله محمد رسول الله..
ياربي دي كيفنها ياعكود وفي الزمن
العلينا دا في منها شئ؟..
مدّنا يا عكود فقد صدقت حين قلت
يصعب الاقتباس..

عكود
11-27-2006, 03:19 PM
دي يا حميد يبقى لي ود بادي هني ساعة قالها
كان في بالو الوصف العربي البليغ
(بعيدة مهوى القرط)
لكنه هنا أنا أعتقد قد زاد وأجاد
لأنه ضرب أكثر من معنى في بيت واحد
الأول، طول الجيد
التاني، الفرق بينها وبين رفيقاتها يحسب لصالحها
التالت، رفيقاتها غير بعيدات عنها (في مقياس الجمال)

وللا رايك شنو؟

حميد
11-27-2006, 04:30 PM
دي يا حميد يبقى لي ود بادي هني ساعة قالها
كان في بالو الوصف العربي البليغ
(بعيدة مهوى القرط)
لكنه هنا أنا أعتقد قد زاد وأجاد
لأنه ضرب أكثر من معنى في بيت واحد
الأول، طول الجيد
التاني، الفرق بينها وبين رفيقاتها يحسب لصالحها
التالت، رفيقاتها غير بعيدات عنها (في مقياس الجمال)

وللا رايك شنو؟

فات علي ياعكود والله البعد التالت في هذا البيت
وزعلت جنس زعل من رقبتي..لكن نعمل شنو اذا كان ود بادي
بليغ الكلام والدرر والتي اخفاها من العيون المارة مرور الكرام

تسلم علي هذه الجرعات الثلاثة
تاني قريتا من الاول وفي كل مرة
اندهاش اكثر..

اذن بالاحتفاظ..

عكود
11-27-2006, 04:35 PM
ما قلت لك يا حميد، الإقتباس صعب؟
ده حالتو بيت واحد أثار النقاش ده
طيب رايك شنو هني، خاصة ما تحته خط:تبين زينوبة حين تتوقى شعراً كاب
بعد ما انساب على الخد المرايا
عصارى الفزعة والفازعات يجن بكراً تنايا
ويات من تبقى حازمة
التوب على النص القناية
تبين زينوبة حين تتحزم الخصل الشرابهن
صندل الناس الغنايا

إذنك معاك يا حميد ..
بل أنصحك بحفظ كل القصائد،

حميد
11-27-2006, 05:58 PM
ما قلت لك يا حميد، الإقتباس صعب؟
ده حالتو بيت واحد أثار النقاش ده
طيب رايك شنو هني، خاصة ما تحته خط:

إذنك معاك يا حميد ..
بل أنصحك بحفظ كل القصائد،


بجيك يالعكود..
يبدو ان شعر زينوبة ترتعنا ورمانا اتلفّ في كرعينا..
لي عودة

نورا
11-27-2006, 06:02 PM
سلا يا عكود والجميع هنا،
كل ما القي لي وقت بجي اقرأ واشوف اشعاروصور ود بادي ... لكن في كل مرة ما بلقى كلمات مناسبة للتعليق.

شكراً لي ود بادي وشكراً يا عكود

مودتي للجميع

عكود
11-28-2006, 05:55 AM
بجيك يالعكود..
يبدو ان شعر زينوبة ترتعنا ورمانا اتلفّ في كرعينا..
لي عودةوأنا في إنتظارك يا حميد . .
فعلاً الحديث عن زينوبة وحواء يطول،
سأؤجّل إنزال القصيدة التالية حتى عودتك وتداخل الأحباب.

عكود
11-28-2006, 06:04 AM
سلا يا عكود والجميع هنا،
كل ما القي لي وقت بجي اقرأ واشوف اشعاروصور ود بادي ... لكن في كل مرة ما بلقى كلمات مناسبة للتعليق.
شكراً لي ود بادي وشكراً يا عكود
مودتي للجميع
نورا،
سلام يا بت القبايل . .
مرورك يسعدنا، والكلمات إن بقيتي فتشتيها . . بتلقيها،
دحين كتّري من طلاّتك، و ودبادي لسّع ميسو بعيد . .
فما زال هناك الكثير من أشعاره.

لك المودّة الخالصة.

عبد العظيم الطاهر
11-28-2006, 08:29 AM
واصل يا عكود ... متابعين .. هذا الفارس الجحجاح ... هذا الذي ملك ناصية مفردات قلما يأتي بها شاعر معاصر .. يمسك نخلة الشعر ويهزها بكلتا يديه لتساقط علينا هذا الشهد ..

إنه لصيق بارواحنا .... تربع في دواخلنا ........


واصل ... يديك العافية

عكود
11-28-2006, 08:41 AM
هذا الذي ملك ناصية مفردات قلما يأتي بها شاعر معاصر .. يمسك نخلة الشعر ويهزها بكلتا يديه لتساقط علينا هذا الشهد .. وليته يا عبد العظيم يثمّن قيمة ما يكتب مثلما تفعل أنت . . أنا وغيرنا الكثير.
ود بادي لا يهتم كثيراً بتوثيق / تجميع ما يكتب،
يملص القصيدة متل قميص الدابي
ويبعد منّها
ثم،
يسهر الخلق جرّاها ويختصمُ

سأواصل إن شاء الله
بس راجي حميد في المحطة دي
قال عندو فيها غرد
ماني دار أفوتو شي

حميد
11-28-2006, 09:32 AM
تبين زينوبة حين تتوقى شعراً كاب
بعد ما انساب على الخد المرايا
عصارى الفزعة والفازعات يجن بكراً تنايا
ويات من تبقى حازمة
التوب على النص القناية
تبين زينوبة حين تتحزم الخصل الشرابهن
صندل الناس الغنايا
جيتك يالحبيب

ما لفت نظري يا عكود موش تتوقى شعرا كاب وانما
بعد ما انساب علي الخد المرايا
نخلي الخد بعيد ونرجع تاني للشعر الكاب
يعني الشعر الكاب دا كلو فضلة من بعد الانسياب
هذا تساب لعمري وليس شعر..سواد ليل تهدّل
اما القناية فهو وصف الجمال للحسان..
وهي زينوبة الوقت كلو ما كانت باينة ؟
ديل خصل شرباني من موية الجمال..

سؤال ياعكود ياريت لو تجيب لينا اجابتة
العلاقة بين زينوبة حواء وزينوبة المابتحوق؟

اتمنى اكون قريت صاح يالعكود..

عكود
11-28-2006, 10:35 AM
قرايتك صاح يا حميد . .
أصلو شِعراً متل ده ما فيهو قراية صاح وقراية غلط
محل تقبّل تلقى نفسك فيهو
تبين زينوبة حين تتوقى شعراً كاب هنا أنا شايف إنو ممكن يكون المقصود شعر زينوبة شدّة ماهو طويل ما بتحتاج تسوّي طرف التوب وقاية فوق راسها عشان تشيل فوقو صفيحة الموية . .
خاصة وكانن بيردِن في المويةويات من تبقى حازمة
التوب على النص القناية
تبين زينوبة حين تتحزم الخصل الشرابهن
صندل الناس الغنايا أما هني، فعادة بعد ما يقسموا من التوب (من طرفو) يسووا منو الوقاية، البنات بيتحزّمن بجزء من التوب علي نصّهن (من طرف التوب التاني).
لأنو إيد بتكون ماسكي الصفيحة الفوق الراس والإيد التاني للـ "تلّة" وفشان التوب ما ينزل من نصّهن وما يلقن طريقة يعدلنّو (لاحظ الإيدين مشغولات) بيتحزمنبو.
أما زينوبة، ما بتحتاج لي ده كلّو، بتربط توبها مع نصّها (المتل القنايا) بي خُصلاً معطّرات بالصندل (الشعر ماهو الطويل الغزير).

عكود
11-29-2006, 04:59 AM
الرســـــــــــــالة

بت الخير يجيك الخير
وصل جوايك الكاتباهو للولد الحتالي
وكان الظن ترسلي ليه هين هينين من البركاوي
داك الطعمو حالي
ولو بالقل شخاليب دوم
وهنا والله ني ومسيخ وغالي
سؤالك يمة عن احوالي
كان شفتيها تغنيك عن سؤالي
انا اتوكرت في قلب البنادر
زي غريب شرقان مدلدل في الدوالي
جات شايلاني حرّة جوف
انا اتحديت مجالا مومجالي
مصايب الجامعة اكبر من جميع الشفتو
ولا سمعتو في ايام الخوالي
قعاد الكرسي كان شفتيهو
ورم ساقي زي سيد الزلالي
اقلب في الدفاتر من صباحا بدري
لامن تمسي ما بنسي انشغالي
اسوق الليل تحت ضوء الكهارب
وديمة هارب من فراشي
وهادو حالي
ده كلو عشان اجيب نمرا
انافس بيها واستر بيها حالي
والله عاد حالة ما بتسر البال
ومن يوم ما هديت ما انسر بالي
سلاطين العلم يايمة
ينسوا العشرة في فد يوم
يدفروك بره زي دفر الطبالي
وخايف من اجيك مرفود
وهادي الفكرة من ما جيت
معشعشه في خيالي
واخير افتح اضانك
قبل ما تلقي فوق اضني
ملويات حبالي
وكان حصل القدر يايمة لا تلوموني
لومي علي البنادر نورا اقوي من احتمالي
بناتا فيها رويانات جسومن بالدهون
تلصف بلا جلود السحالي
سبيبن ديمة بالحزم الكبار مبهول مردم
فوق قفاهن..وا حلالي
صدورن طامحة زي موية الدميري
الهايجي تكشح في العوالي
عيونن واسعة تبلع مية
زي ولدك تشرك للموحد والضلالي
وحاتك ضُمّه ما بقدر عليهن
ساعة اقيف قدامن
انكس راسي بي قدري وجلالي
مشيهن سوا زي سرب الغزال
لكن نفورن مو غزالي
عدادن مابخبرو
الا وين ما امشي الاقاهن قبالي
وقصاصن ينقّر بي عصاتو
ومايفرّق دربهن
من بين دريبات القماري
بخورن في سماء البندر
يدوخ متل مسك العشاري
رقيصن ينهزنو بلا الفلو
الّلماتو غابن منو في ضل الضهاري
يجمّع في قفاهو وينطرح
يتمطّى تتحتحت مفاصلو
وده ياهو الفاك جباري
دلالكين تجيب الضلّ
علي متاهات الضهاري
غناين اصلو ما سمعنابو
كنت بقول ليكي الا هسع ما ني طاري
وطنبورن مبرقع وحسو فاقع
لا في كنتر لا ودع فوقو بيراري
عشوقن في الرقيص
يتلوي متل سيد المغص
يوم يبقي في حالة طوارئ
والمداين ديمة فايري
زي وحوشا في البراري
والمـآسي كتيرة حاصلة
والمكضب يلاقي بوليس السواري
عاد دي حالتا بقدر اتستر معاها
خلاف احاكي الناس واجاري؟
وانتو راجيني يوم اجيكم بشهادتي
وينبسط ضهري وكباري
وبرضو خايفين من اجيكم بي غربية
وفي خجل قايد صغاري
والقدر بي غادي كاتب ليه شيتا
لاني حاري ولا ني طاري

حاجة واحدة تكون في علمك
اني جايي وتاني راجع لي دياري
وياني حمّيد القديم
الا بس فاقد حجابي وراح سواري
يمة كتري من رضاكي
وسلميلي علي المعاكي
وقولي لي حبوبة زيك
نحن شبنا وماك براكي
سلميلي علي جروفنا وحتى وزينا البكاكي
سلميلي علي بناتنا
وقولي ليهن ماني ناسي
طاري شلاخا مواسي
زي شقوق بيتاً سداسي
طاري نقشا فوق خدودن
بين ضفايرو وشوفو قاسي
جسمي في البندر ممدد الا بينكم بي حواسي
سلميلي علي البكادن والبشتت في التقاوي
في الكرد محراتو قالع
وصوتو فوق تيرانو عاوي
ماحزم بقجة ثيابو وقام فجر لاحق اللواري
اخيرو يحفر في جروفو
مالو مال حفر المجاري
سلميلي علي الضرايح
والفضل من الخلاوي
والفقير الفوق حصبرو
يكتب البخرة ويداوي
مع السلامة ودعتك الله
ولي وصيتك ماني ناسي
لي شفقتك مافي داعي
وابقي عشرة الراعي واعي
في بحور اهل البنادر من زمن طالق شراعي
كان نحجت بجيك غانم
وكان فشلت بجيك ضراعي

رهف
11-29-2006, 05:17 AM
عكود..

تحيااااات..

كيفك?


و الله العظيم..كل يوم بعاين للبوست دا ليل و صباح..و قدرما فتشت لى

قدة أدخل بيها..ما لقيت..

كلامو صعب .. و غلبنى ضمة ضمة..


كدى شوف لى حل..و قبال الحل أشرح لى معنى الكلام دا بالعربى..ما الشايقى


و تسلم..




أشعاره نبعت من المحلية والتراث الساكن جوّاهو
زائداً المقدرة الفذّة في تطويع الكلمات الصعبة وتركيبها بكل براعة مما يعطي موسيقى داخلية في كل بيت.
تأمّل هنا:


أو في قصيدة سعيد ود بادي (دي جايينها براها) ساعة يقول:
أم غره - ركابن، أم دره - حلابن، أم ضره - بسخابن، لا بره - قيسابن، بالمره - جيّابن
زائداً الموسيقى الداخلية في كل بيت:
الصهالة والوقالة والرقالة
الجهنية والقطنية والمحوية
العشاية والشاشاية والسباية
المزروعة والمقروعة والمفدوعة
المفزوعة والمقلوعة والممنوعة

الصهالة والوقالة والرقالة وام غره هو ركابن
الجهنية والقطنية والمحوية وام درة الباريها حلابن
العشاية والشاشاية والسباية وام ضرة لى ضيفانو بسخابن
المزروعة والمقروعة والمفدوعة لا برة متمسح ديمة قيسابن
المفزوعة والمقلوعة والممنوعة بالمرة كان من مافى جيابن

أبو الحسين
11-29-2006, 06:38 AM
و قدرما فتشت لى

قدة أدخل بيها..ما لقيت..

كلامو صعب .. و غلبنى ضمة ضمة..

..

المبدع ود بادي سرو هني يا بتنا رهف... عندو لونية خااااااااصة... ربنا يديهو وإياك الصحة والعافية...

قالت ضُمة ضُمة قالت!!!:D :D

عكود
11-29-2006, 08:55 AM
عكود..
تحيااااات..
كيفك?
و الله العظيم..كل يوم بعاين للبوست دا ليل و صباح..و قدرما فتشت لى
قدة أدخل بيها..ما لقيت..
كلامو صعب .. و غلبنى ضمة ضمة..
كدى شوف لى حل..و قبال الحل أشرح لى معنى الكلام دا بالعربى..ما الشايقى
و تسلم..
لا حولااا يا رهف . .
إنتي صابرة بي ده كلّو من القصيدة القبل القبل الفاتت؟
نحن مش قلنا البركل للتوثيق وإبراز تراثنا؟
أسئلتك المتل دي ياها البنفتّش عليها، عشان الصورة تكون واضحة ومفهومة ليك وللآخرين/ات من شبابنا/تنا.
أرجوك تداخلي وأسألي فالفائدة ستشمل كل من يمر على البوست.

نعم، ودبادي يستخدم مفردات موغلة في المحلية، وتلك هي اللهجة التي نشأ عليها، خاصة في جزيرة عِبدلّه، حيث نشأ . . هناك، رغم أنهم جغرافيّاً يقطنون ديار الجعليين، إلا أنّ تمسّكهم باللهجة الشايقية القديمة أكبر من تمسّكنا بها نحن من نشأنا في ديار الشايقية.

نجي لمحاولة الإجابة عن السؤال، أتمنى من الأخوان تصويبي في حالة لهم رأي آخر:الصهالة والوقالة والرقالة وام غره هو ركابنهنا يقصد الخيل (الصهّالة، أم غرّة) والإبل (الوقّالة، الرقّالة)
الجهنية والقطنية والمحوية وام درة الباريها حلابنهنا يقصد سعيّة اللبن(من ضأن أو ماعز)، وهي أسماء مختلفة للسعية متعارف عليها، قد يكون سبب التسمية اللون أو السلالة أو البيئة التي تعيش فيها.
العشاية والشاشاية والسباية وام ضرة لى ضيفانو بسخابنهنا يقصد الشياه، أي يرمي إلا أنه لا يتردّد في إكرام ضيفه بذبح أعز ما يملك من شياه، حتى ولو كانت العشّاية (ما يعتمد على حليبها في عشاء أهل البيت).المزروعة والمقروعة والمفدوعة لا برة متمسح ديمة قيسابنهنا يقصد النخيل وكيف أنّ محصوله دائماً ما هو وفيراً وعند حصاده يكون مردوم (متمسح) بالكوم الكبير (قيسابن).المفزوعة والمقلوعة والممنوعة بالمرة كان من مافى جيابن هنا يقصد أن سعيد ود بادي كان فارساً، يهب لنجدة من إلتجأ إليه لأرجاع سعيّته المسروقة وينجح في إرجاعها(المفزوعة)، أو المنهوبة (المقلوعة)، أو حتى ما منعها أصحابها عنه (الممنوعة بالمرّه)، ودي همبتة منّو ساكت.

هذا عن المعنى العام لكل بيت . .
أما عن المفردات مثل الصهالة، الوقالة . .
فكما ذكرت هي تسميات تطلق على السعيّة من ضان، ماعز، إبل، خيل غالباً بسبب اللون أو السلالة أو وصف الشكل.

و تابعي معانا ..

لك الود قواسيباً متمسحة.

عكود
11-29-2006, 10:06 AM
المبدع ود بادي سرو هني يا بتنا رهف... عندو لونية خااااااااصة... ربنا يديهو وإياك الصحة والعافية...
قالت ضُمة ضُمة قالت!!!:D :D أبو الحسين 26:rolleyes: ،
تُشكر على المرور . .
وفعلاً إستخدام ود بادي لمفرداته المحلية، تبدو تلقائية جدّاً وليست مُقحمة، وده بيدّي جمال آسر على شعره. نفس الشي عند حمّيد (محمد الحسن سالم، ماهو المعانا ده، المعانا نجيض في القصّة المحليّة، ما بيتصاقع فيها).
بس ياخوي، كمان ناقش معانا القصايد نفسها،
قولة عوافي وإنت راكب فوق حمارتك وتلُكْ فيها . .
ما بينفع معانا شي،
ولو كانت حمارةً فاردي.

حميد
11-29-2006, 11:28 AM
بس ياخوي، كمان ناقش معانا القصايد نفسها،
قولة عوافي وإنت راكب فوق حمارتك وتلُكْ فيها . .
ما بينفع معانا شي،
ولو كانت حمارةً فاردي.
اسمع الكلام يالحسين وانزل
وتشكر يا عكود علي الكلام السمح

أبو الحسين
11-29-2006, 12:50 PM
لا حولااا يا رهف . .
إنتي صابرة بي ده كلّو من القصيدة القبل القبل الفاتت؟
نحن مش قلنا البركل للتوثيق وإبراز تراثنا؟
أسئلتك المتل دي ياها البنفتّش عليها، عشان الصورة تكون واضحة ومفهومة ليك وللآخرين/ات من شبابنا/تنا.
أرجوك تداخلي وأسألي فالفائدة ستشمل كل من يمر على البوست.

نعم، ودبادي يستخدم مفردات موغلة في المحلية، وتلك هي اللهجة التي نشأ عليها، خاصة في جزيرة عِبدلّه، حيث نشأ . . هناك، رغم أنهم جغرافيّاً يقطنون ديار الجعليين، إلا أنّ تمسّكهم باللهجة الشايقية القديمة أكبر من تمسّكنا بها نحن من نشأنا في ديار الشايقية.

نجي لمحاولة الإجابة عن السؤال، أتمنى من الأخوان تصويبي في حالة لهم رأي آخر:هنا يقصد الخيل (الصهّالة، أم غرّة) والإبل (الوقّالة، الرقّالة)
هنا يقصد سعيّة اللبن(من ضأن أو ماعز)، وهي أسماء مختلفة للسعية متعارف عليها، قد يكون سبب التسمية اللون أو السلالة أو البيئة التي تعيش فيها.
هنا يقصد الشياه، أي يرمي إلا أنه لا يتردّد في إكرام ضيفه بذبح أعز ما يملك من شياه، حتى ولو كانت العشّاية (ما يعتمد على حليبها في عشاء أهل البيت).هنا يقصد النخيل وكيف أنّ محصوله دائماً ما هو وفيراً وعند حصاده يكون مردوم (متمسح) بالكوم الكبير (قيسابن).هنا يقصد أن سعيد ود بادي كان فارساً، يهب لنجدة من إلتجأ إليه لأرجاع سعيّته المسروقة وينجح في إرجاعها(المفزوعة)، أو المنهوبة (المقلوعة)، أو حتى ما منعها أصحابها عنه (الممنوعة بالمرّه)، ودي همبتة منّو ساكت.

هذا عن المعنى العام لكل بيت . .
أما عن المفردات مثل الصهالة، الوقالة . .
فكما ذكرت هي تسميات تطلق على السعيّة من ضان، ماعز، إبل، خيل غالباً بسبب اللون أو السلالة أو وصف الشكل.

و تابعي معانا ..

لك الود قواسيباً متمسحة.

تراك ما قصرت مع بتنا رهف يا العمدة... الله يديك العافي...

ونحن قاعدين نرجع لك لمن تِحَبِك علينا...

بجيك راجع معاي قصيدة قصرت؟؟؟

كميات مودتي...


أبو الحســـــــــــين...

حميد
11-29-2006, 09:26 PM
الرســـــــــــــالة

بت الخير يجيك الخير
وصل جوايك الكاتباهو للولد الحتالي
وكان الظن ترسلي ليه هين هينين من البركاوي
داك الطعمو حالي
ولو بالقل شخاليب دوم
وهنا والله ني ومسيخ وغالي
سؤالك يمة عن احوالي
كان شفتيها تغنيك عن سؤالي
انا اتوكرت في قلب البنادر
زي غريب شرقان مدلدل في الدوالي
جات شايلاني حرّة جوف
انا اتحديت مجالا مومجالي
مصايب الجامعة اكبر من جميع الشفتو
ولا سمعتو في ايام الخوالي
قعاد الكرسي كان شفتيهو
ورم ساقي زي سيد الزلالي
اقلب في الدفاتر من صباحا بدري
لامن تمسي ما بنسي انشغالي
اسوق الليل تحت ضوء الكهارب
وديمة هارب من فراشي
وهادو حالي
ده كلو عشان اجيب نمرا
انافس بيها واستر بيها حالي
والله عاد حالة ما بتسر البال
ومن يوم ما هديت ما انسر بالي
سلاطين العلم يايمة
ينسوا العشرة في فد يوم
يدفروك بره زي دفر الطبالي
وخايف من اجيك مرفود
وهادي الفكرة من ما جيت
معشعشه في خيالي
واخير افتح اضانك
قبل ما تلقي فوق اضني
ملويات حبالي
وكان حصل القدر يايمة لا تلوموني
لومي علي البنادر نورا اقوي من احتمالي
بناتا فيها رويانات جسومن بالدهون
تلصف بلا جلود السحالي
سبيبن ديمة بالحزم الكبار مبهول مردم
فوق قفاهن..وا حلالي
صدورن طامحة زي موية الدميري
الهايجي تكشح في العوالي
عيونن واسعة تبلع مية
زي ولدك تشرك للموحد والضلالي
وحاتك ضُمّه ما بقدر عليهن
ساعة اقيف قدامن
انكس راسي بي قدري وجلالي
مشيهن سوا زي سرب الغزال
لكن نفورن مو غزالي
عدادن مابخبرو
الا وين ما امشي الاقاهن قبالي
وقصاصن مايفرق دربهن
من بين دريبات القماري
بخورن في سماء البندر
يدوخ متل مسك العشاري
رقيصن ينهزنو بلا الفلو
الّلماتو غابن منو في ضل الضهاري
يجمّع في قفاهو وينطرح
يتمطّى تتحتحت مفاصلو
وده ياهو الفاك جباري
دلالكين تجيب الضلّ
علي متاهات الضهاري
غناين اصلو ما سمعنابو
كنت بقول ليكي الا هسع ما ني طاري
وطنبورن مبرقع وحسو فاقع
لا في كنتر لا ودع فوقو بيراري
عشوقن في الرقيص
يتلوي متل سيد المغص
يوم يبقي في حالة طوارئ
والمداين ديمة فايري
زي وحوشا في البراري
والمـآسي كتيرة حاصلة
والمكضب يلاقي بوليس السواري
عاد دي حالتا بقدر اتستر معاها
خلاف احاكي الناس واجاري؟
وانتو راجيني يوم اجيكم بشهادتي
وينبسط ضهري وكباري
وبرضو خايفين من اجيكم بي غربية
وفي خجل قايد صغاري
والقدر بي غادي كاتب ليه شيتا
لاني حاري ولا ني طاري

حاجة واحدة تكون في علمك
اني جايي وتاني راجع لي دياري
وياني حمّيد القديم
الا بس فاقد حجابي وراح سواري
يمة كتري من رضاكي
وسلميلي علي المعاكي
وقولي لي حبوبة زيك
نحن شبنا وماك براكي
سلميلي علي جروفنا وحتى وزينا البكاكي
سلميلي علي بناتنا
وقولي ليهن ماني ناسي
طاري شلاخا مواسي
زي شقوق بيتاً سداسي
طاري نقشا فوق خدودن
بين ضفايرو وشوفو قاسي
جسمي في البندر ممدد الا بينكم بي حواسي
سلميلي علي البكادن والبشتت في التقاوي
في الكرد محراتو قالع
وصوتو فوق تيرانو عاوي
ماحزم بقجة ثيابو وقام فجر لاحق اللواري
اخيرو يحفر في جروفو
مالو مال حفر المجاري
سلميلي علي الضرايح
والفضل من الخلاوي
والفقير الفوق حصبرو
يكتب البخرة ويداوي
مع السلامة ودعتك الله
ولي وصيتك ماني ناسي
لي شفقتك مافي داعي
وابقي عشرة الراعي واعي
في بحور اهل البنادر من زمن طالق شراعي
كان نحجت بجيك غانم
وكان فشلت بجيك ضراعي

يا ربي دا من شنو؟
القصيدة دي كلها فاتتني وانا ما جايب خبر
ومشيت يا عكود طبعا افتش في الصفحات الاخيرة
ما لقيت فيها شئ غير خباتنا انا وابو الحسين
وقلت ياربي عكود دا يكون ما ضغط علي ارسال
الرد وللا شنو؟:D
عليكن الله تاني ادوني جرس لمن تنزل حاجة وما نجيب
ليها خبر..
اوعكن واحد يجي يقول الكبر حصل..
بجيكم عارفنّي

رهف
11-30-2006, 05:17 AM
لا حولااا يا رهف . .
إنتي صابرة بي ده كلّو من القصيدة القبل القبل الفاتت؟
نحن مش قلنا البركل للتوثيق وإبراز تراثنا؟
أسئلتك المتل دي ياها البنفتّش عليها، عشان الصورة تكون واضحة ومفهومة ليك وللآخرين/ات من شبابنا/تنا.
أرجوك تداخلي وأسألي فالفائدة ستشمل كل من يمر على البوست.



و تابعي معانا ..

لك الود قواسيباً متمسحة.


يا عكود..


سلااااامى و احترامى..



و اسوى شنو!!

ما الصبر جميل..


لكن باقى القصائد مفهوم حتى كان صعب..بس مرة مرة تلاقيك مفردات شوية

صعبة..تخلى حبل المذاج و الاندماج مع النص يختل و يبقى ما موزون..وكدا

فى الشعر ما بنفع..يعنى لازم كلمة كلمة و حرف حرف..ولا الواحد يبقى ذيو

و ذى اى زول بيقرأ الشعر بدون احساس او خيال..

و مشكووووور قواسيب متمسحة..على الشرح السلس..و اكيد..الفائدة

حاصلة و وااااصلة..


ود بادى..كان مدخلى لعالمه هو مرثية اسماعيل حسن..و حقيقة ما لقيت

ليهو (لا هو و لا حميد..و لااااا حاجة مكتوبة) الا فى البوست دا..


و عشان نلم المشتت..خلاااااص أنا بجيب مرثية اسماعيل حسن عندك هنا..

و يبقى بوست واحد بدل اتنين و تبقى المتابعة اسهل..دا طبعا بعد إذنك..



و متابعين..أكيد..

و دمت

رهف
11-30-2006, 05:40 AM
المبدع ود بادي سرو هني يا بتنا رهف... عندو لونية خااااااااصة... ربنا يديهو وإياك الصحة والعافية...

قالت ضُمة ضُمة قالت!!!:D :D


ابو الحسين!!!!


تحياااااات..


أبو الحسين 26:rolleyes: ،
بس ياخوي، كمان ناقش معانا القصايد نفسها،
قولة عوافي وإنت راكب فوق حمارتك وتلُكْ فيها . .
ما بينفع معانا شي،
ولو كانت حمارةً فاردي.


شفت الكلام دا كيف!!

خلاااااص.. بطل ضحك على ضمة ضمة..

و جيب لينا القصائد قواسيب قواسيب..


و تسلم..يا ود العمة..

عكود
11-30-2006, 08:16 AM
حميد ..
أبو الحسين،

الرسالة في إنتظاركم . .
شوفوا متل الكلام ده:وقصّاصن ينقّر بي عصاتو
ومايفرّق دربهن
من بين دريبات القماري

عكود
11-30-2006, 08:25 AM
رهـــف،
كيف حالك وأريتك زينة.
بس مرة مرة تلاقيك مفردات شوية
صعبة..تخلى حبل المذاج و الاندماج مع النص يختل و يبقى ما موزون..وكدا
فى الشعر ما بنفع..يعنى لازم كلمة كلمة و حرف حرف..ولا الواحد يبقى ذيو
و ذى اى زول بيقرأ الشعر بدون احساس او خيال.. ده كلام صحيح 100%
وابقي شايتة الكليمات الغميسة.و عشان نلم المشتت..خلاااااص أنا بجيب مرثية اسماعيل حسن عندك هنا.. و يبقى بوست واحد بدل اتنين و تبقى المتابعة اسهل..دا طبعا بعد إذنك..المرثية تستحق إفراد بوست لوحدها . . وسوّيتي خير إنّك نزّلتيها هناك بطريقة ري التنقيط (مقطع .. مقطع). سأنزلها مرّة أخرى هنا وأختم بها البوست، فقط لزوم التوثيق والقيساب الواحد، فإنتي ما قصّرتي هناك، أدّيتيها حقّها تماماً من التعليق والمداخلات.
و متابعين..أكيد..خليك قريبة . .
ما زال في الجراب بعض قصائد.

تسلمي.

حميد
11-30-2006, 08:19 PM
حميد ..
أبو الحسين،

الرسالة في إنتظاركم . .
شوفوا متل الكلام ده:

طبعا يا عكود مباري ليك القصيدة من فوق تاني وشايل
الماوس لي الكوبي لقيت نفسي كل ما اعمل كوبي تجي الابيات التحت وجمالها وشوف زي دا..

شوف العينن قويي..
مشيهن سوا زي سرب الغزال
لكن نفورن مو غزالي

يسقطن المابيسقط..
صدورن طامحة زي موية الدميري
الهايجي تكشح في العوالي


اما هنا حتي نقش الخدود مدسوس بالضفاير ( شعر زينوبة )

طاري نقشا فوق خدودن
بين ضفايرو وشوفو قاسي

التحية ليك يا ود بادي وانت ترسم لنا هذه الحنية
الزمان في هذه القصيدة..

رهف
12-01-2006, 12:36 AM
وأختم بها البوست، فقط لزوم التوثيق والقيساب الواحد

.

عكود..

تحيااااات..


تختتم شنو!!

هو نحنا متين بدينا!!

ما تنهى البوست دا اصلو..و كل مرة يجى جديد..او قديم كان مدسوس..

و لو فكرة المنتدى هى نشر ثقافة و توثيق..يبقى البوست دا و كل البوستات

اللى بتشبهه مفروض تكون من ثوابت الصفحات الاولى..

لانه حمل ما حمل..من مفردات و اوصاف تمثل التراث و اللغة الشايقية..


كدى اتمهل..

و واصل....

عكود
12-03-2006, 04:51 PM
طبعا يا عكود مباري ليك القصيدة من فوق تاني وشايل
الماوس لي الكوبي لقيت نفسي كل ما اعمل كوبي تجي الابيات التحت وجمالها وشوف زي دا..
شوف العينن قويي..
يسقطن المابيسقط..
اما هنا حتي نقش الخدود مدسوس بالضفاير ( شعر زينوبة )
التحية ليك يا ود بادي وانت ترسم لنا هذه الحنية
الزمان في هذه القصيدة..
حميد . .
صدقت والله،
كتير المحتاج إقتباس،

تأمّل معاي إقتباسي السابق:
"و قصّاصن ينقّر بي عصاتو
وما بيفرّق دربهن من بين دريبات القماري"
وزي ما قالت رهف في واحدة من تعليقاتها . .
ود بادي غالباً ما يعمد إلى الوصف الغير مباشر.
يعني بدل ما يقول لنا قديماتن صغار
شبّهن بقديمات القمري
حتى أنّ قصّاص الأتر يشتبه عليه الأمر ولا يستطيع التفريق،
رغم حرصه ومباراة الأتر بعصاته.

عكود
12-03-2006, 05:00 PM
عكود..
تحيااااات..
تختتم شنو!!
هو نحنا متين بدينا!!
ما تنهى البوست دا اصلو..و كل مرة يجى جديد..او قديم كان مدسوس..
و لو فكرة المنتدى هى نشر ثقافة و توثيق..يبقى البوست دا و كل البوستات
اللى بتشبهه مفروض تكون من ثوابت الصفحات الاولى..
لانه حمل ما حمل..من مفردات و اوصاف تمثل التراث و اللغة الشايقية..
كدى اتمهل..
و واصل....رهـــف يا أصيلة،
لو بي مرادي أواصل وما أقيف . .
سأواصل إن شاء الله بالموجود عندي من قصائد.
أعلم أن ود بادي له قصائد أخرى (ليست بحوزتي) لم تجد طريقها للنشر المُستحق، سأسعى جادّاً للحصول عليها منه، رغم صعوبة المهمة . . فهو علاوةً على أنه مشغول، لا ينشط كثيراً في النشر.

سأواصل ..
وأحاول،

بس قولي يا لطيف.

رهف
12-05-2006, 05:56 AM
رهـــف يا أصيلة،
لو بي مرادي أواصل وما أقيف . .
سأواصل إن شاء الله بالموجود عندي من قصائد.
أعلم أن ود بادي له قصائد أخرى (ليست بحوزتي) لم تجد طريقها للنشر المُستحق، سأسعى جادّاً للحصول عليها منه، رغم صعوبة المهمة . . فهو علاوةً على أنه مشغول، لا ينشط كثيراً في النشر.

سأواصل ..
وأحاول،

بس قولي يا لطيف.

عكود..


مشكور على المجهود..و المحاولات..

و الشعر بيستاهل التعب..هسة لو ما كدا نفرتق فى الحروف دى حرف

حرف و نقطة نقطة كدا..

و لا كنا نحفظ غنا قدر دا..كمان بمزيكتو..


و يا زول واصل..

و يا لطيـــــــف..ألف ..

قول و كتااااابة.

عمر عثمان
12-05-2006, 06:13 PM
الآستاذ الرائع .. عكود
تحياتي واحترامي

يمكن قاعدلي ساعة تامي ,, لامن قريت الصفحات السبعة من شعر ومداخلات .. لكن اقولك شنو .. بس ربنا يديك العافي .. وانت توثق لهذا الشاعر المتفرد الماب يشبه شعرو شعر الناس فهو شاعر بالسليقة غير متكلف ولا صانع فالشعر عنده مثل كلامه العادي وقد جمعتني به الظروف يوما على مسارح الجامعات المختلفة فكان نعم الصديق والخل الوفي .. ومنذ ان اغترب لم نسمع عنه شيء ولا عن جديده .. وها انت اليوم تربطني به من جديد في هذا البوست الرائع المميز .. وان شاء الله لاقدام دايرين نعرف محلو وين وطريقة الاتصال بيهو ودي فرصة ولن اضيعها .. اما انت فجزاك علي الله وارجوك ان تواصل وتبحت وتجيب فالكلام سمح بلحيل ويستاهل التوثيق والمتابعة ,,

تحياتي يا عكود وربنا يخدر ضراعك

حميد
12-06-2006, 10:34 AM
تجينا طيب..
اشتهينا شخاليب ود بادي المبقّعي..

عكود
12-07-2006, 05:36 PM
و الشعر بيستاهل التعب..هسة لو ما كدا نفرتق فى الحروف دى حرف حرف و نقطة نقطة كدا..شِعراً متل ده يستاهل التعب فعلاً يا رهف . .
تشكري على التشجيع
سأواصل إن شاء الله
بس من يوم الأحد وغادي

سِلِمتي من كل بلاء

عكود
12-07-2006, 05:42 PM
الآستاذ الرائع .. عكود
تحياتي واحترامي
يمكن قاعدلي ساعة تامي ,, لامن قريت الصفحات السبعة من شعر ومداخلات .. لكن اقولك شنو .. بس ربنا يديك العافي .. وانت توثق لهذا الشاعر المتفرد الماب يشبه شعرو شعر الناس فهو شاعر بالسليقة غير متكلف ولا صانع فالشعر عنده مثل كلامه العادي وقد جمعتني به الظروف يوما على مسارح الجامعات المختلفة فكان نعم الصديق والخل الوفي .. ومنذ ان اغترب لم نسمع عنه شيء ولا عن جديده .. وها انت اليوم تربطني به من جديد في هذا البوست الرائع المميز .. وان شاء الله لاقدام دايرين نعرف محلو وين وطريقة الاتصال بيهو ودي فرصة ولن اضيعها .. اما انت فجزاك علي الله وارجوك ان تواصل وتبحت وتجيب فالكلام سمح بلحيل ويستاهل التوثيق والمتابعة ,,
تحياتي يا عكود وربنا يخدر ضراعكالعزيز عمر عثمان
ألف مرحب بيك في منتدى الأدب والتأدّب
الأصالة والإنتماء
الشعر والشعراء
ومن تبعهم (متل حالالتي)

قلت في ود بادي فأنصفت الرجل
أفرحني جدّاً أن صادف البوست هواك
خليك قريب، فما زال هناك ما نود قوله

ود بادي الآن يعمل بمستشفى توام في مدينة العين
سأوصل له سلامك وسؤالك عنه

كل المودّة والتقدير.

عكود
12-07-2006, 05:43 PM
تجينا طيب..
اشتهينا شخاليب ود بادي المبقّعي..جاييك يا حميد بي سبايطاً غلااااد
لا تماثلها إلاّ سبيطة قفّاز

شيل الصبر لي يوم الأحد

حميد
12-07-2006, 06:07 PM
جاييك يا حميد بي سبايطاً غلااااد
لا تماثلها إلاّ سبيطة قفّاز

شيل الصبر لي يوم الأحد


لاااااااااااااااااااااااااااااا يوم اللحد؟
اصلك كت غايب قدر شنو؟كلو اسيبيع واحد
عندك خميس الليلي ونهار بكرة وليلو.. كفاك
:D :D :D

عكود
12-08-2006, 08:14 AM
حميد . .
لا تقول لي كفاك تبل الشوق . .
هو شوق الجن ده بتبلّى؟

البركلاوي
12-08-2006, 02:02 PM
تسلم أخونا عكود ... لكن تمام غرفت لينا من حلة الضيوف
كتر خيرك
بالله أكتب لينا ما تستطيع من كلام ود بادي الكبار وسمح شديد زي ده
ونحن في الرصيف قاعدين .....

عكود
12-08-2006, 04:28 PM
لكن تمام غرفت لينا من حلة الضيوف حباااب البركلاوي . .
حلّة الضيوف إن ما غرفناها ليكم إنتو . . نغرفها لي منو؟
ياكُن شبها . .
وياها شبهكم،
بس الرصيف ماهو محلّكم . .
تفرش لكم الوسائد في صدر المجلس . .
ونقف في خدمتكم حافي الأقدام.

عكود
12-10-2006, 05:20 AM
جزيرة عِــبد إلّه
يعتبرها البعض من أجمل ما كتب ود بادي (لي رأي آخر، فعنده ما هو أجمل)
قال أحدهم معلّقاً "ساعة أسمع القصيدة دي بشم ريحة القُـنّــانة".
سأنزلها على مقاطع لتأخذ حقّها من التأمّل:

أنا أخو البت اللكعت قرن الخمرة النازة
على وردان الصبوة الراكزة
الجنيات الهازة ..
صدورن لازة
ورقّ النص زي خيت الشلة
بالحيل آ جني إيه والله

الجنيات الحزمو الجبة
وعرق الشتوي عليهم نايا و صب
قول ما دلّه .. رجالا حصدوا الحبة
عيشهن هادو انكال واتعبّ
ومنو كتير في الواطا انكبّ
وباقيه مصوبر واقف قبة
الحمد آلاف .. الشكر آلاف
الحمد آلاف الشكر آلاف
العيش الرقد أصناف أصناف
الولد الكال.. عزام .. حلاف...ضياف
الرزق الجانا مدلة..
الحلق الجاف اتبلة
بالحيل آ جني إيه والله

الوادي الجانا مترقن
مدّ جنحاتو الطايل شرقا وغرباً
القبلي بروقو على القلعات يضّربن
الدُّكَن البعدن قربن
فوق صنقور المحلة الطالت كبن
قول للمحلة بيوتك خربن
قول ما دله.. الحلق الجاف اتبلّ
بالحيل آ جني إيه والله

مرحاتنا شرابهن يوت ماغبن
شبعانات .. في الشقل أب شوك ما شبن
الحُمّل ولدن وربّن
حلماتن تقلن.. جرّن.. فوق سيقانن كبّن
اللبن العايم في ضرعاتن جبّن
المغصة إن كان ضرعاتن خربن
القرعة آ وليد .. السعن آ بنية
القربة كمان... كبوها المية
المغصة إن كان ضرعاتن خربن
شوفو النعمة السالت فوق قيزان الرملة
ناس البندر لبن الشاي بالعملة

سمح الخمج الفوق أسيادو
سمح العز المن أجدادو
الجنيات المشو ما عادو
كان بالردة أكان اتنادو

عكود
12-10-2006, 07:37 AM
سأقوم بإنزال القصيدة كاملة بعد إستكمال المقاطع
والمداخلات

مع تحياتي

أبو الحسين
12-10-2006, 08:38 AM
جزيرة عِــبد إلّه[align=right]
سمح الخمج الفوق أسيادو
سمح العز المن أجدادو





صورة بليغة والله...

الخمج الفوق العِز سمح بالحييييييل!!!

والكلام دا يأكد... صحيح مستجد النعمة دايماً تلقى لخبات!!!:D :D :D :D

حميد
12-10-2006, 08:41 AM
عكود صباحك خير..
ان وعدت لم تخلف..برغم وصاينا بعدم التكتير..
وكنت أظن ان بئرك قد قطّت فاذا بها تجمّ وتملأ
الدلو بهذا الخير الوافر..
مرحاتنا شرابهن يوت ماغبن
شبعانات .. في الشقل أب شوك ما شبن
الحُمّل ولدن وربّن
حلماتن تقلن.. جرّن.. فوق سيقانن كبّن
اللبن العايم في ضرعاتن جبّن
المغصة إن كان ضرعاتن خربن
القرعة آ وليد .. السعن آ بنية
القربة كمان... كبوها المية
المغصة إن كان ضرعاتن خربن
شوفو النعمة السالت فوق قيزان الرملة
ناس البندر لبن الشاي بالعملة
بالله شوف النعيم الكان فيهو الناس زمان..
تغيّر الزمن وكاد ان يصير حالنا كحال هؤلاء

ناس البندر لبن الشاي بالعملة

وحليل زمن السعن المخنوق..

درر..

عكود
12-10-2006, 09:06 AM
أبو الحسين،
ملاحظة ذكيّة وفاتت علي والله . .
ربطك، أو ربط ود بادي، للخمج والعز . .
خمجاً مجيّه وراكز على قواعد صلبة من العز،
فهو والله خمجاً خايل.

تشكر على المرور
وبرضك بحِّت.

عكود
12-10-2006, 09:17 AM
حمّيد . .

كدي النتأمل سوا إقتباسك الأولاني:
مرحاتنا شرابهن يوت ماغبن
شبعانات .. في الشقل أب شوك ما شبنلاحظ معاي تكرار حرف الشين . .
صاحباً لينا قال تكرار حرف الشين يدّيك موسيقى خروج شُخب اللبن من الضرع وصوت نزوله في القرعة "حلب اللبن" ولم يكن مصادفة هنا، فقد هيّأ ود بادي حواسنا (بما فيها السمعية) لما يأتي بعد هذا المقطع من وصفه لوفرة اللبن درجة ريّه لقيزان الرملة حتى سال. أقول ري لأن الرمل لو لم يرتوي لما سال سائل فوقه:حلماتن تقلن.. جرّن.. فوق سيقانن كبّن
اللبن العايم في ضرعاتن جبّن
المغصة إن كان ضرعاتن خربن
القرعة آ وليد .. السعن آ بنية
القربة كمان... كبوها المية
المغصة إن كان ضرعاتن خربن
شوفو النعمة السالت فوق قيزان الرملة

حميد
12-10-2006, 09:44 AM
حمّيد . .

كدي النتأمل سوا إقتباسك الأولاني:
لاحظ معاي تكرار حرف الشين . .
صاحباً لينا قال تكرار حرف الشين يدّيك موسيقى خروج شُخب اللبن من الضرع وصوت نزوله في القرعة "حلب اللبن" ولم يكن مصادفة هنا، فقد هيّأ ود بادي حواسنا (بما فيها السمعية) لما يأتي بعد هذا المقطع من وصفه لوفرة اللبن درجة ريّه لقيزان الرملة حتى سال. أقول ري لأن الرمل لو لم يرتوي لما سال سائل فوقه:

والله يا عكود استوقفني حرف الشين المتكرر
لذلك اقتبست البيت لوحده وسمعت الصوت الموسيقي
الاتي منه ولكن لم اذهب به الي الشخب..ووقفت عندو
( زي الرايح مني شئ )..ولم يفت علي الربط بين( شربانات+
شبعانات ) و في الشقل اب شوك ماشبن..
تعليق..
طبعا الغنم اذا كان جيعانات او عطشانات يفضحنّك فضيحي..:D

اما الخير الكتير السد عطش الرمل اترى ثم سال..فهو
بلاشك ( كتيرا يقسمو منو
القرعة آ وليد .. السعن آ بنية
القربة كمان... كبوها المية

عكود
12-10-2006, 09:55 AM
طبعا الغنم اذا كان جيعانات او عطشانات يفضحنّك فضيحي:D :D :D
هي داب فضيحي آ حميد . .
إن سألوك . . تقدر تقول سقيتِن إن بقيت ما سقيتِن؟

لاحظت إقتباسك للأبيات الشينية الرويانة، وده دليل إنّو الموسيقى الفيها هيّأتك وخلّتك مشرّف إضنيك لما يأتي بعدها . .
وهذا يؤكّد نظريّة صاحبنا.

وزي ما قلت الخير يقسموا منّو،
شوف التدرّج المتلاحق في إنتقاء الماعون المناسب للخير المنهمر(القرعة، السِعِن ثمّ القِربة)القرعة آ وليد .. السعن آ بنية
القربة كمان... كبوها المية

ابن الجبل
12-10-2006, 10:44 AM
غايتو لما سألناك تنقد ديوانا
عملت كشاشة

لقيناك خلوة علم بخلانة ..

عكود
12-10-2006, 10:54 AM
غايتو لما سألناك تنقد ديوانا
عملت كشاشة

لقيناك خلوة علم بخلانة ..ما عملت كشاشة . .
كنت أعرف قدر نفسي حين تصدّى الفطاحلة من أمثال عالم عباس وإشراق ضرار . .
أمّا هنا فتناولت "صور من البلد" في أشعار ود بادي، وما أنا بناقد.

وين نسختنا؟

عكود
12-10-2006, 10:56 AM
ما عملت كشاشة . .
كنت أعرف قدر نفسي حين تصدّى الفطاحلة من أمثال عالم عباس وإشراق ضرار . .
أمّا هنا فتناولت "صور من البلد" في أشعار ود بادي، وما أنا بناقد.

وين نسختنا؟

و . .
وين مداخلتك هنا؟

رهف
12-10-2006, 09:23 PM
عكود..

تحيااااات..

كيفك?


و برغم جهلى ببعض المفردات..مثل:

اللكعت, ورقّ النص زي خيت الشلة, مترقن , الدُّكَن , صنقور


الا انه لم يفتنى المعنى العام للقصيدة المندرجة تحت باب الفخر..

و لم اجهل تفصيلات جميلة تضمنتها بعض الابيات مثل:

ومنو كتير في الواطا انكبّ

في الشقل أب شوك ما شبن

النعمة السالت فوق قيزان الرملة

كان بالردة أكان اتنادو


و هى تمثل صورة للخير الفائض..حتى ان ما ذاد انكب فى الارض او سال

فى الرمل..دون اسف علية..و البهائم التى ياتيها غذاؤها دون ان تتعب

فى البحث عنه..


الا ان البيت الذى استوقفنى لحلو التعبير و مجمل الفخر:

العيش الرقد أصناف أصناف

الولد الكال.. عزام .. حلاف...ضياف



و يا سلام..

حسب فهمى ان المكيال شاع استخدامه فى البيع..

و هنا صور البائع بانه عزام حلاااااف..

و ذلك من ابلغ صفات الترف فى رأيى..



عكود....


ترجم الكلمات الصعبة الفوق دى..

و واصل مقطع مقطع..و متابعين..

و لا تنزلها حتة وحدة..يبقى يكتر علينا الصعب..

و تغلبنا..

عكود
12-13-2006, 09:25 AM
رهف يا عزيزة،

آسف على تأخير الرد على مداخلتك التريانة كعهدها دائماً.

نبدأ بالترجمة:
لكعت، هبشت أو ربتت
رقّ النص زي خيت الشلة، أي برغم صدورهم العريضة فإن أوساطهم رقيقة مثلها مثل خيط الشلّة (كرة من خيوط الغزل) حيث كانت الخيوط تغزل من القطن بطريقة يدوية وتسمى الكرة من الخيوط المغزولة بـ الشلّة او (الكروريّي)
الدكّن، المقصود الداكن من السُحُب الواعدة بالأمطار وبالخير الوفير
صنقور، أم الرأس متل أن تقولي أديهو فوق صنقورو.
الا ان البيت الذى استوقفنى لحلو التعبير و مجمل الفخر:
العيش الرقد أصناف أصناف
الولد الكال.. عزام .. حلاف...ضياف
و يا سلام..
حسب فهمى ان المكيال شاع استخدامه فى البيع..
و هنا صور البائع بانه عزام حلاااااف..
و ذلك من ابلغ صفات الترف فى رأيى..
البيت فعلاً يصف كم كان (الولد الكال) كريماً وليس بالضرورة أن يكون الولد بائعاً، فعادة ما يكيل المحصول الشباب من أبناء / أقرباء صاحب الحق.
لا بيع هنا، فإنّه يكيل ويقسّم فنجرة ساااااكت، وعادة ما تقاس المحاصيل بالمكاييل (كيلة، قيراط، ملوة . . إلخ).

تشكري على المداخلة وتابعي معانا.

عكود
12-13-2006, 09:28 AM
سمح الخمج الفوق أسيادو
سمح العز المن أجدادو
الجنيات المشو ما عادو
كان بالردة أكان اتنادو

غرّب حامد وشرّق بلة
كانوا بحلبو الضرع الدلة
كانوا بحضرو الخير القدحو معلا
الجنيات ما كفرت بنعمة الله
بالحيل آ جني إيه والله

ذات في يوم والغيمة تهتّف مطرا نقّع
فوق نوار الطلح الفقع
ريحة البرد إن جاتك عطرا فايت خمر الفوق أردافا مجضع
شفنا الوادي يقشقش في دمعات الليل
والتعل الشايل بدا يتفقع

تلب حامد فوق مخلوفة أب زور واتربع
طلق الرسن أب زمة وسوّا خبيبا بدّع
هوّد في رقّاب الصي
لا قوه ثلاثة زبيدية
خالفين سيقانن فوق السنكيت ورقاب ألبل بيناتن مرخية
محجوبات بالخرز الفصلو السوميت
كل واحد درقة وسيف وطبنجية
وباقي جرابن مليان دلميت
الجنيات اتقبلو وضاقو الحارة وضاقو المرة
وكان حجازن صقر الجو
حامد كان عارفين .. ضاقوه رجال قبالكن
شوفو أرزاقكم أخير من ضو
حامد عوج الطندب آ وليدات
عوج الطندب نار القصب الهبلت ما بتعدلو
شوفو شلوخو تلاتة مطارق رقدن
وكل تلاتة يمين سياف اتقبلو
حبوب القارح ... ما دلة
ولدا ما ختالن زلة
شن قولك فيهو عليك الله
بالحيل آ جني إيه والله

أبو الحسين
12-13-2006, 09:41 AM
خالفين سيقانن فوق السنكيت ورقاب ألبل بيناتن مرخية


هييععع...

مَرقِّلين يعني...;)

إنت عارف الصورة دي هسع قدام عيوني... باقي نحن ناس أبوي جَمَّالة برضو... والله ساعة يكونوا جايين من كدي علي الأراك... ياها نفس الصورة الجمال مرقِّلي وراخي رويسها... ودي يحكي عن أصالتها...

الله يديك العافي يا عمدتنا وود بادي كمان...

واصل إبداع الله يخضِّر ضراعك...


أبو الحســــــــــــين...

حميد
12-13-2006, 10:43 AM
ذات في يوم والغيمة تهتّف مطرا نقّع
فوق نوار الطلح الفقع

يا الله ياعكود..
عليك الله ليك كم زمن ماشفت حاجة زي دي؟
موسم تساقط البرم كموسم تساقط اوراق الربيع..

حليلنا يا عكود..
وبجيك راجع..

عكود
12-13-2006, 05:20 PM
هييععع...مَرقِّلين يعني...;)
إنت عارف الصورة دي هسع قدام عيوني... باقي نحن ناس أبوي جَمَّالة برضو... والله ساعة يكونوا جايين من كدي علي الأراك... ياها نفس الصورة الجمال مرقِّلي وراخي رويسها... ودي يحكي عن أصالتها...
الله يديك العافي يا عمدتنا وود بادي كمان...
واصل إبداع الله يخضِّر ضراعك...
أبو الحســــــــــــين...
أبو الحسين
لو ملاحظ القصيدة دي تصف حياة الرعاة والبادية
وهي متداخلة مع حياة المزارعين نسبة للتداخل بسبب نزوح أحد الطرفين
ود بادي هنا، وبسبب نشأته، في سَلَوه تشرّب تلك البيئة أكثر منّا نحن من نشأ في منطقتنا.

الوصف دقيق جدّاً
وعميق جدّاً
وسلس جدّاً.

تسلم وخليك قريب.

عكود
12-13-2006, 05:48 PM
يا الله ياعكود..
عليك الله ليك كم زمن ماشفت حاجة زي دي؟
موسم تساقط البرم كموسم تساقط اوراق الربيع..
حليلنا يا عكود..
وبجيك راجع..سلام يا حميد . .
حليلنا منها والله . .
كل ما أسمع / أقرا (البَرَمْ)
طوّالي يمر بي شريط ذكريات مدرسة دكّام الإبتدائية
ونحن راجعين من المدرسة في نهاراً يقلي الحبّة
كان في شدرة كبيرة في دربنا
نمشي نتكل فيها شوية
وكان دايماً البرم مالي الواطة تحتها
التكلة مرّات بتجر ونحن نلعب في ضل الشدرة
وما همّانا كان طعنتك شوكة وللا شدّتك إتقطعت
آخرتا بنلم كراساتنا الإتبشتنن ندخّلن في خرتاية الدمورية
ونواصل في إتجاه البيوت.

وبرضك شم الريحة دي وإتكرّف الماضي:ريحة البرد إن جاتك عطرا فايت خمر الفوق أردافا مجضع

أبو الحسين
12-14-2006, 06:19 AM
ريحة البرد إن جاتك عطرا فايت خمر الفوق أردافا مجضع

زي دا نحن برررررررررررررة منو!!!:D :D :D

عكود
12-14-2006, 08:27 AM
زي دا نحن برررررررررررررة منو!!!:D :D :D
بره من ياتو . .
المشبّه وللا المشبّه به؟:rolleyes:

حميد
12-14-2006, 09:56 AM
زي دا نحن برررررررررررررة منو!!!:D :D :D

:D :D :D
كمان الشمومة دايرالابرة وجوة..يا ابو الحسين
اسكت شم وعوّد نخرتك لامن تبقى عليهو..
وانت يا عكود لاتحرج الزول بالاسئلة دي..:D
اسي زي سؤالك دا ان رد كدا وللا كدا اوووب عليهو..:D

العوض
12-14-2006, 03:35 PM
ابا ذر
كَدى اتخيل لك زول كان نايم
وجاتو حَسة في نصوص الليل
حِسْ اللعبة في السَمّي
وحِس الدلوكة في السَمي
زولك اِتَبلّم
ومن النوم على الداره
لقالك الناس مِنطربين ومتماسكين بالكتوف
ويطيروا كلهم لا فوق .. وينْدقّوا
والوزين يعوم في الداره
والعريس يبشّر بي سوط العنج
مجَرتق ...وحريرتو مربوطة
اها ..
زي زولك المبلم الدابو جايي ده
دايرلو قَدُر شنو لامن يطير ويندق معاهم
...........
أو
الله يكرم السامعين
حماراً جابوه دوغري من المُراح
على النوريق
ويلقالك الحمير لافي في لفة النوريق العجيبي .. الرتيبي ... ديك
أها ده بيقدر يدخل في ال Rhythm ده بأخوي وأخوك ؟؟
ياها ..
عملات بوستك
اجي داخل وأقعد اتابع ..اتابع في النضمي السمح
وماني لاقي لي فرقة أدخل بها ..
واشيل نعلاتي ..
وأمرق..
لاكن ..وحتماً
المرة الجايي ... على الدارة طوالي
للوقت داك
فوق...

عكود
12-14-2006, 05:54 PM
كَدى اتخيل لك زول كان نايم
وجاتو حَسة في نصوص الليل
حِسْ اللعبة في السَمّي
وحِس الدلوكة في السَمي
زولك اِتَبلّم
ومن النوم على الداره
لقالك الناس مِنطربين ومتماسكين بالكتوف
ويطيروا كلهم لا فوق .. وينْدقّوا
والوزين يعوم في الداره
والعريس يبشّر بي سوط العنج
مجَرتق ...وحريرتو مربوطة
العوض . .
راجينّك من زمااااان
ومتل وصفك الفنّان ده، ياهو الدايرنّو
مِتِل ما نظمو ود بادي هني:
هوى يا وليد ...
حصل صحاك عز الهجعة
صوت شتماً بعيد مخنوق
وجاتك شخرة الطنبارى مشتاقاً يسوى القوق
ونومك طار واتقسم والرشرش صبح مفروق
واتلفحت نص من توبك الجرجار
على الدلوكة سايق سوق
وتلقى هناك بنات بلدك ولاد بلدك
يعلو الصفقة تقدح فى القلوب الشوق
ونغم الفال ابشرن يا بنات بالخير
والجنيات تطير لا فوق
وكم زغرودة تتفجر تفور بالناس بعد ما تروق
يعوم الوز صدورو تشابى للمجهول وما بتضوق
تميل زينوبة زى البان يمين وشمال تودى الطوق
واخوان ام شلخ ينكبو جوه الداره
زى صقرا نزل من فوق
ضرب الصوت والركزة بيفرق الناس
عشان زينوبة ما بتحوق
وعاد تتحزم الجنيات وتتنظم تقيف في روق
وكل واحد يهز ضرعاتو والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق
ويتقدم عريس السمحة رافع صوتو
كان بسوقوا بيهو النوق
والعنجاوى ينزل فوق ضهورن
بس تقول منشحطة فيهو بروق
يبدا مجرو بالترقوة ويتحدر
مع الضلع القصار ملصوق
واحمر عين يشم الدم بعد ما يرش بنات
عمو ويزيدن شوق
وثابت حيطة لا بتهز ولا بتلز
وصارى جبينو كلو عروق
وقال بعد العقد طلقانة ما يحجزوهو
إلا يخلو ضهروا شقوق
هناك الحال مغير جد وهيجة الناس تفوت الحد
وكان حجازو مد الليد بتسمع كع

أمّا حمارة النوريق الجوّانيي
مصيرا تنشط وتسوّيلا همّة
وتظبط الرذملاكن ..وحتماً
المرة الجايي ... على الدارة طوالي
راجنّك عاد . .
الدارة مولقدي نار
والبرازي مدكّكة
دحين أعزل
واقدل

دخلتك هني تفرّح والله
ياهو محلّك ومشهادك

عكود
12-14-2006, 06:10 PM
كمان الشمومة دايرالابرة وجوة..يا ابو الحسين
اسكت شم وعوّد نخرتك لامن تبقى عليهو..حميد . .
أبو الحسين أخير لا يشم . .
أسمع حديسي الله يرضى عليك.

حميد
12-15-2006, 07:02 PM
حبوب القارح ... ما دلة
ولدا ما ختالن زلة
شن قولك فيهو عليك الله
بالحيل آ جني إيه والله

إيه والله شن يقدر يقول في خاتي القول ؟..

عكود..
في انتظار هطول مزنك يا جميل..

عكود
12-17-2006, 06:24 AM
حميد . .
مداخلاتكم تشجّع على الإسترسال
وهاك الجزء الأخير من جزيرة عِبداله

وينا مراتع الدرت الباسط دايما ببكي عليهن
وين بنوت الحلة البكّر عصرا بدري يسون في شاهيهن
بعد الليل ما يهّود ونحن نهّود..
عاد أماتن ينادن ليهن
نمشي على القيزان نتقادم
أقيس الخطوة مع التاتاي ومشيهن
والله البعد الحاصل ما نساني
وحاتكن في قمراتنا بشوفو وشيهن
الا النضم أب غنة اللهج السكر وين بلقاهو
بنات الريل الدوب ليهن
الخوف يا ناس كان يبقى الشوق الحاصل بينا معشعش فيهن
مقنع سابل وين بلقاهو
طرفا ذابل وين بلقاهو
وعين بتدنقر من واليهن

الوجنات الشعّن بقّن
ود العين النايم زرقن
مو زايغ رسيان وميقّن
زولن كان خدران ومحقّن
من الشوفة عروقو يطقّن
كان الدنيا بصح تتخلا
كنا بركنا معاهن فوق رملاة الحلة
الا كمان بنشوفا مذلة

الجنيات الغابت جابت
إنت الجيب بس قايلو قميص افرنجي وكرتونات كرملّة
لا لا وحاتك حاشا وكلا
ديل يوم عادوا اتلافو الجاهل بحقوق الله
ديل كم لحقو البشهق ضايق وداووا العلة
الولد الجايب حقايب سفرو تقال..
تقال من جنس كتاب ومجلة
الحكمة النضم إياهو الكان..
الحكمة الولد اتوضى وصلّى
عادة البلد الدخلت فيهم سكنت ..
سكنت ماب تتخلا
نحن كما طارين الحلة ودرنا الطلة
نشيلا معاهم فرح وميتة
حلاة الموت كان في عِبدلّه
حلاة الموت كان في عِبدلّه

أبو الحسين
12-17-2006, 06:33 AM
ود العين النايم زرقن
مو زايغ رسيان وميقّن
زولن كان خدران ومحقّن
من الشوفة عروقو يطقّن


دا يي شنو دا؟؟؟!!!:D :D :D

وروني يا العمدة المدخل من وين؟؟؟!!!:cool:

عكود
12-17-2006, 06:59 AM
دا يي شنو دا؟؟؟!!!:D :D :D

وروني يا العمدة المدخل من وين؟؟؟!!!:cool:
هيْ والله بتسأل من جنس ده يا ود أبريدة . .
بس حالتك، إنت بالذات، بشوفا هني:كان الدنيا بصح تتخلا
كنا بركنا معاهن فوق رملاة الحلة
الا كمان بنشوفا مذلة

ديامي
12-17-2006, 11:15 AM
http://www.indymedia.no/usermedia/audio/9/badisukanalgassr.wav


وبجيكم صاد

حميد
12-17-2006, 01:04 PM
دا يي شنو دا؟؟؟!!!:D :D :D

وروني يا العمدة المدخل من وين؟؟؟!!!:cool:

دا..يا ابو الحسين
زولن كان خدران ومحقّن
من الشوفة عروقو يطقّن

سببو دا..
الوجنات الشعّن بقّن
وعلاجو دا..زي ماقال عكود..
كان الدنيا بصح تتخلا
كنا بركنا معاهن فوق رملاة الحلة
او..
العرس يا ابو الحسين..:D

عكود..
خريفك بدّر هذا الاسبوع فالاحد لم يات بعد..
فرحة ارض بور بماء جدول منبعج:D ..
فاكسر ابقتك في هذا البوست واقلبها..

عكود
12-17-2006, 02:56 PM
فالاحد لم يات بعد..:eek: :eek: :eek:
ربّي تجيبو طيّب
:D

عكود
12-17-2006, 03:08 PM
وبجيكم صادديّامي الموسوعة . .
طلّتك هني راجيها من بدري . .
يا ريت لو عندك القصيدة دي مكتوبة . .
لأنّها ماها عندي،
والتسجيل ماهو واضح.

ملحوظة: أغلب القصائد النزلت هنا كانت فضلت خيرك . .
كنت أنزلتها أنت في بوست مشابه سابق،
فقط عملت عليها مراجعة وبعض التعديلات،
أنصحك بحفظها من هذا البوست لأنها أدق.
تسلم وفي رِجاك.

عكود
12-19-2006, 10:40 AM
وفي الرثاء أيضاً يقول ود بادي:

خلاص يا المفازي اترجل
سجل الخالدين اسمك عليهو مسجل
يناديك صوت مهيرة على الاغر ومحجل
تجلس فوق مقام عالي ورفيع ومبجل

جبل ابنعوف قلبو الأصم ليك واقف
والبركل وحيحاً فوق وحيح مترادف
شامخ كالجبال ما كا الجنا المتراجف
سيد الدين وصل.. وانت بتسدد واقف

يا عبود ويا ود توم كيف امسيتو
وحدي بقاسي وانتو من العلي قاسيتو

الى أن يصل ويقول:

مشينابك خفاف ووصلنا دار الحي
كيف بنصد خلا ونرجع بلاك يا أخي
ياكا بهجة عمرنا وياكا زلال الري
نحنا صبرنا الا نفوسنا فيهن شي
قمريةً تنوح وتسوي ووب وأحي
فقدك والله حار جربتو في والدي
يا بت الرجال الموت مصير كل حي
أصبِرْ فيك عاد وأنا في الصبُر شن لي

خالد الحاج
12-19-2006, 05:05 PM
سلام عكود
يا أخي شغال في صفحة ود بادي واجهتني مشكلة والحل عندك
أكتب لي أسماء القصائد يا أخي..
مؤقتا بقطع ليها أسامي من راسي
لامن تلحقني يا سيدي علي:D

عكود
12-19-2006, 05:20 PM
أبو جعفر،

القصائد حسب الترتيب:

هوي يا وليد
السودان (ماني متأكد)
جدي سعيد ولد بادي
عودة الدراويش
حواء
الرسالة
جزيرة عبد إلّه (منزّلها على 3 أجزاء، لملِمِن إنت)
مرثية

مجهودك مقدّر
الله يخدّر ضراعك (ديل ما إسم قصائد:D )

خالد الحاج
12-19-2006, 06:05 PM
أها يا عكود كده أنا واقف معاك في فرد طوبة
كمل لي الباقي

http://albrkal.com/gasayed/m.baday.htm

http://albrkal.com/gasayed/m.baday.htm

عكود
12-19-2006, 06:17 PM
شغل نضيف
قرّبت اقوم أبشّر يشهد الله

سأواصل معاك إن شاء الله
وحأكلّم ود بادي عشان يتشجّع ويمرق لنا المتكّن

حميد
12-19-2006, 06:34 PM
يا سلام علي الشغل المنظّم يا خال..
كدا ممكن نقول الساس اتحفر واترمى..

متابعين يا عكود
وشايف ما فوتّلي الاحد الحاسبو غلط..
الله مرقني من ناس ديلك..
:D

بجيك صاد اللفة طويلي قدامي..

عكود
12-20-2006, 05:09 AM
بجيك صاد اللفة طويلي قدامي..حميد . .
حمد الله سلامي

حديسك ده ذكّرني الواحد يكون طوّل من البلد ومارّي يسلم علي الأهل في أول يوم وصولو.

لف وتعال.

عكود
12-20-2006, 11:00 AM
ودالشايقى وزوجاته

يمر الحول وحول بى زول
والزول غول
ونحن ضهابة نحن تعابة
لا نقدا ولا محصول
يا قشارة ما معقول
يا فقاسة ما معقول
أمسكي عليك عرانك المبهول
أضربى الجملة بالميت قداحة فول
وعيشة ضنيب ام سيسى عرض وطول
وجاز اللمبة فى غلبا وحق الفطرة للطلبة
ولو الروح بقت سلبه نمص الصلصه من علبا
وكانت جاتنا فى الرقبة

دا كلو كوم والوليه ام العيلة كوم
الوليه الفنجريه حلاوة نبق
الوليه الغجرية ودايره دق
البطن ديمه منفوخة طبق طبق
ومره تديها الهواده
وترمى زى زولين زياده
الله اريتو الزول يزاول
يا حكم صفر ده فاول
البطن بت اللذينة عايزة تعمير القبائل
واب شنب تعبان وعرقه يسيل جداول
يلحس الكوع رغم انفه وكان مزاول
وديمه يشبع فى البشاتن وديمه يشبع فى البهادل

شايله فوق الصفحه سوسو واحد الله
باليمين مقيوده سيسى مالو تانى
اب شنب شايل أمانى تلاتة بركه
وكل حركة معاها بركة
فى البطن بنجوسها فرفر
والقطر بوراها صفر
والله يستر

عينى باردة ومانى حاسد
وربنا يتم المقاصد
والله ما شقالو حنكا ضيعو
والله ما سوالو طفلاً ماسقاهو ورضعو
الا الرباية خشم بيوت
والمعايش ماها توت
والمعذب اخير يموت

الوليد اكان مبرجل شن بسوى
زى كليب جربان يعوى
يصبح والمصران مهوى
ويمسى والمصران مهوى
لا يبهرج لا يضوى
الوليد كان يربى قوى
عمله استرلينى سايره
يبقى صاروخ ارضى جوى

النجاح مو مهم كتير
والبيطير من ارض جاعت كان اخير
والليلة جيتكم بى بشارة وقولوا خير
ربنا يخلى الخواجة عشان ما تقيف قدامو حاجة
يا خلق يا عقل صبه
تشربو الويسكى المعبا
وتلحسو الرز بالمربى
تبلعو عروق المحبة
وتدو كضبه وراها كضبه
عشان تقيف ماتدى حبه
حبه في بطن الولية
والمطايب هىّ هىّ ...
لا بطوناً كالخيام ولا سمايه ولا كرامه
قد تقولون حراما ..
لستُ مفتى ...
ولماذا لستُ أفتى ؟!
لست أفتي

شيخنا ود الشايقي خريج الخلاوى
يكتب البخرة ويداوى
يعشق الماحى وطارته وأبوكساوى
قافل اضانو من البلاوى
ما بيفهم إلا فى عرس وطلق
قد يجيب بعض الفتاوى ...
حالته ساتره ونص ُكم
بيعه فى سوق السماسره
بيعه رابحه وبيعه خاسره
وهو حامد متشكر
ليس ملحد ليس منكر
يمشى ما بين السرارى ونساوينه الحوارى
لا تغيب عن قلبو ابداً
حاجة سعدة لجنة خردة
وهى حاربت فى المهدية
ثم آلت لجلابط وكراضم
عن قريب ستزور الأبدية
ثم تأتى سعدية وهى رهن الخدمات
ومفاخر ومباخر وعيون فاهمات
تعرف الوقت المناسب لتحاسب ..
ليس فى الدين حرج
آخر العنقود ليلى اصغر الزوجات ليلى
شيخنا ودالشايقى افلح
اشترى ليلى مكعكع فتصلح
وتصبين وتنحنح
وهو شيخ فى هجيع الليل يمدح
يا ليلى ليلك جنى معشوقك أوّه وانّى
وتجيب المدح ليلى وتغرود غير هدنه
وتزيد الشيخ قرباً قاب قوسين أو أدنى
أنها دنيا المطالب
بأسم ليلى من يطالب

فى مره والممرات كثيره
صلى شيخنا الصبح ونافلة بآيات قصيره
وتعوذ ودعا الله بأن لايتجوز
وتشهق وتمنطق وبراس السبحه طق طق
ومضى يتلو الكتاب ...
مر بالمال والبنون فتبسم وترنم
وبآيات الطلاق فتجشم وتكشم
وإذا مالاقى مثنى وثلاث ورباع
وقف الشيخ طويلا مثل فحل الضباع
وبكى وهو يرخى من حبال وتريه
وجرى دمع الزراعة المطرية
وقال اين منى زوجة بكرا طرية
وقال اين منى المحلبيه ؟ اين منى السرتيه ؟
فى نقاء كبحيرة طبرية
ودعا الله عروسا

وخرج يحشش بعبايه وزناد وكدوسه
خطفها خطفها جاب ضحية هايله ومذهله
جزار وفالح فى تجارة القرصنة
خلف الكراع فوق الكراع وكدوسه زى المدخنه
بالكفتين زى الخشب حرق شباب السوسنا
وتفوت سنه وتمر سنه
بقى فى الحرد والطنطنه
وهو ذاتو عجز وانتى
شيخنا يا شيخ السجم خلف زرازير البجم
واحدين اساميهم عرب واحدين اساميهم عجم
بدأ صلىالله عليه وسلم ثم زوجات الرسول العشرة
وكل الذين تجمهروا فى البيعة تحت الشجرة
طلحه الخير والزبير ثم سعد وسعيد
ثم ستة مبايعين ثم عدد مايشاء من البنين
عبدالرحيم عبدالمعين ثم سمى فى الختام
عبد مالك الملك ذوالجلال والإكرام
وتنوع فى القوافى وفى تراكيب المضاف
شمس الدين قوس الدين
ولهب الدين وقمر صناعى الدين

أخر الدور تقول مسحور
وما بخليلو مرةً بور
وزرعته ما بتقع واطه
بقت الطلبات بالدست
حتو درج الخزنة حت
الوليه تنبح كان أصبحت
وان كان مست
خرائط ولفايف ومحزق ومنمق
أنها نكبة روما والمتمه
إن طعم العرس حلو ولذيذ
وهو كاسات افراح ونبيذ
ثم تأتى انتفاخات القرنتى
وباعوض كالنمتى
لا يقاوم بالدي أن تي
حنى حنى ... وتتى تتى ...
ولا عليا .

حميد
12-24-2006, 12:17 PM
الحبيب عكود..
بنكت في البوست علي اساس انو الليلة
الاحد يوم النقة:D فاذا بي افاجأ بود الشايقي
غيابي اليومين الفاتو ودرني تب..

إن طعم العرس حلو ولذيذ
وهو كاسات افراح ونبيذ
ثم تأتى انتفاخات القرنتى
وباعوض كالنمتى
لا يقاوم بالدي أن تي
حنى حنى ... وتتى تتى ...
ولا عليا .
اسي زي دا تشجيع وللا ترهيب
للشباب ناس فلان..:D
القصيدة جميلة والله وفيها تصاوير
مجملها بليغة..وها انا قد باصرت كما باصرتم لاخرج
باقل الخسائر..:D
فان عدتم عدنا..

عكود
12-24-2006, 06:20 PM
اسي زي دا تشجيع وللا ترهيب
للشباب ناس فلان.. حميد . .
سلامات

ده أظنّو ترهيب
بس ماهو لي ناس فلان والشباب (فلان داك حذّرو إنت دا :D )
الشي ده خاصّنا نحن ديل
ماك شايفو يخوّف فينا من:
الطبقة (الله يقدّرنا علي الواحدي:mad: )
كترة الشفّع (ديل الله يحفظهم، هو في زمن؟:rolleyes: )
الإكتفاء بالولدة الناجحة مع التقليل ما أمكن (مجبورين;) )
النصح بإستخدام أحدث الأساليب لتنظيم النسل (البركة في الخواجة و . . الرطوبة:D )
عدم إستغلال الدين لترديد فتاوي المثنى والثلاث والرباع (الزمن ده الناس كايسين فتاوي للمشاركة:cool: )

وها قد عدنا
كدي باصر تاني
بتلقى لك طرفاً ترضعو

أبو الحسين
12-25-2006, 12:52 PM
ودالشايقى وزوجاته

أمااااااااني يا العمدة القصيدة دي عندها سماحة مُقدمة سمعتها أمس القرييييييب دا عندي في شريط مسجل في قعدة في مدينة العين وقام قال المقدمة وسبب القصيدة دي اللي هو بيعتبرها من الشعر الفكاهي مقدمة جميلة وحلوة خالص... يا ريت تقولها لينا... وإحتمال كبييييير إنت في القعدة دي موجود كُت متحكِّر مع الناس البي يصفقوا ومرة يقرقِروا ديلك!!:D ..

لامن أجيك صاد للتحليل اللا جُوة!!:cool:

حميد
12-25-2006, 01:10 PM
وها قد عدنا
كدي باصر تاني
بتلقى لك طرفاً ترضعو
:D :D
بلقى يا عكود لانو..
الله ماشقالو حنكا ما سقاهو ورضّعو..

يا خلق يا عقل صبه
تشربو الويسكى المعبا
وتلحسو الرز بالمربى
تبلعو عروق المحبة
وتدو كضبه وراها كضبه
عشان تقيف ماتدى حبه
حبه في بطن الولية
حبة واحدي مع العشية
والمطايب هىّ هىّ ...
:D :D
ونهرب هروب ابو الحسين..
لامن أجيك صاد للتحليل اللا جُوة!!

عكود
12-26-2006, 04:34 AM
أمااااااااني يا العمدة القصيدة دي عندها سماحة مُقدمة سمعتها أمس القرييييييب دا عندي في شريط مسجل في قعدة في مدينة العين وقام قال المقدمة وسبب القصيدة دي اللي هو بيعتبرها من الشعر الفكاهي مقدمة جميلة وحلوة خالص... يا ريت تقولها لينا... وإحتمال كبييييير إنت في القعدة دي موجود كُت متحكِّر مع الناس البي يصفقوا ومرة يقرقِروا ديلك!!:D ..

لامن أجيك صاد للتحليل اللا جُوة!!:cool: أبو الحسين،
صبّحك الله بالخير والسرور . .
القعدة أنا ما كتّ فيها،
ويا ريت تكتب لنا المقدّمة بتاعة القصيدة، فمقدّمات ود بادي لا تقل روعة عن قصائده.

وبرضو راجيك في الغريق!

عكود
12-26-2006, 04:37 AM
:D :D
بلقى يا عكود لانو..
الله ماشقالو حنكا ما سقاهو ورضّعو..


:D :D
ونهرب هروب ابو الحسين..
حمّيد . .
تهرب وين بعد ما فتّ الخط الأحمر . .
ولوّنت بالأحمر؟

دحين الحديس خفّسو والمطايب هيّ .. هيّ.

عكود
12-26-2006, 04:43 AM
أستميح أختنا رهف في إنزال مرثية إسماعيل حسن، كاملة هنا،
لزوم التوثيق.

بوابة ماوراء الاجيال \ شجرة الخلد
في رثاء شاعرنا\اسماعيل حسن


ارمي الدمعة فوق الدمعتين ياعين
بعد الليلة حابسها الدموع لي مين
نزيف الدنيا من حد البلد غربي
ونزيف الدنيا لاحد البلد شرقي
وجوم عامة الليالي العامره
كل الدنيا خاتة الخمسة فوق اتنين
رحيلك وجعة يا سماعين
رحيلك نجعة من دار الفرح والزين
رحيلك طعنة في لهات الحبى دريفين
رحيلك وقفة فوق درب العليك باكين
فيها نهاية المشوار وحد الفرحة والامال
وحد الفال وحد الزين

ارمي الدمعة فوق الدمعتين ياعين
ويعد الليلة حابسها الدموع لمين
بعد نزلت سكاكين القدر
مسنونة ديل فوق ديل
وشربت من بكرينا المعتق
حالتو ياالداسنو من السيل
وياالمحزون وحرابنا متكلات قدامو
فوق مشنكسات الخيل
وياالداخرنو من زمن الحساب
شفعنا رابطين الحجر بالتيل
وفجاءة يجينا من طرف السماء مريسيل
ينعب فوق كلنكاكول غراب هابيل
ويبقي رحيل
رحيل كل الغيوم الهامعة متواسرات
رحيل كل الشهور العامرة بالخيرات
رحيل الطينة من طرف الجزر يومات
رحيل الخضرة قدام منجل الهدام جفاف وممات
رحيل البادية فوق برقا وراء نجيمات
رحيلك مو رحيل أفراد
رحيل اجيال
رحيل بلدا تمام وكمال
يا العرشت فوق نخل السواقي الشال
واتمددت فوق النيل من الشلال وللشلال
وياالهاجرت فوق ريش الرهو رحال
تظل مرسوم علي باب الليالي سؤال
بعد عشعشت في خاطر الغبش موال
واتبللت من الموية بين السعفة والبلال
بعد عرقك برق في ترابنا حد ما شال
واتمددت غادي وجاي يمين وشمال
بعد الحال
منو البقدر يجيب غربال يغربل روحك المدسوسة في الاجيال
وفي نفس الدغش مبثوثة في الشتلة ونداها السال
بعد الحال
منو البقدر يطاول حرفك المعقود
علي برقا حرير وهلال
مسطر فوق رقاب البرد
فوق الصخرة والتمثال
بعد الحال
رحيلك ياالمشرشر في مداخل الدنيا كالاوصال
رحيلك هزه في العقدة
ومجامع الروح كما الزلزال

ارمي الدمعة فوق الدمعتين ياعين
بعد اليلة حابساها الدموع لمين
كتير من شاف ديارو العامرة
هاجت فوق درب وداي
كتير من عدا فوق درباً
بلا يوادع بلا يناشد كبار القوم وياخد راي
كتير ياعين
كتير الغابوا ماحضروا
وكتير الراحوا ما عادوا
وكتير البمشوا منو جاي
الا الناعي
عمرو الناعي ما طاف البلاد من جم
وتبكي طويرة الاحزان سنين وسنين
مصيرة تساسق المسكينة بين الباسا والباساي
ترفرف من سخاي لسخاي
وتسال عن صدور مغسولة بالدوباي
و تنزل فوق حلقات مجالس الشاي
تقول الشيخ وفي الشاشاي
تبل الريق من الدمع البيوشل من ارامل الحي
وتشرق بالرحيح في الردحه و الووب احي
وتمرق من محاري الناس تولول فيها جرس الصي
وتصرخ فايقة ياجلابة اقيفوا لي
وتسعل ضايقة ما شفتوه زولا لي
تضيع فرخاتا في المجهول
ويرحل من دريبا الضي
آه آه ياطويرة الاحزان
آه لو كان تعرفي البي
جرحك انتي صاب الريش
وجرحا لي مسافر في النسيج الحي
دريبي بعيد وحزني فريد
ومما رحل البلبل الغريد
بسرح في عيون الناس
بسـأل ولوسؤالي يفيد
كيف الدنيا تصبح دنيا
والصيد يبقي ياهوالصيد؟
مين يقدر ينضم عقود منقوشة
ترقد في حزوز الجيد
ومين يضفر كلام الريد
كلو جميل مصيرو يجي ومصيرو يفوت بلاتخليد
كتاب الكون يظل مقفول
بلا خاتمة بلا تمهيد
وحتي النيل مصيرو يكون مجرد موية شاقة البيد
منو البيقدر يجيب ليكم خباراتو
رقصة موجو في الشاطئ
رواويسو , حكاياتو
رقاد القمرة جنب النجمة فوق رملا مراياتو
ولما تغيب ينوم النيل موشح بعباياتو
وزي ما النيل يضيع في الدلتا يتلاشي ويموت مشلول
انحنا كمان تفيض امالنا
تضيع تنشره في ساحل المجهول
وا اسفاي
وا اســــــــــفاي
وا اسفاي علي حرفاً شمخ في الطول
وكيف الليلة في بطن التراب مسبول
حرام تبلينا يا ايام
حرام تملينا شوق وهيام
اتارينا بنشيل من حرفك الجواني يا سماعين
ونقعد في حواشي الحضرة وانت تكب علينا غمام
وماعارفين حروفك نازفة من شريان
من دم القليب الاصلو مابريان
لما شربنا لما طربنا واتلفتنا ما لقيناك يا انسان
وشفنا روحيتك الشفافة ركبت هودج الاحزان
محمل فوق جناج ملكين
ودربو علي مشارف الواحد الديان
قوايمو شقايق النخل الوقع حزنان
مضفور بي سعف يابس
مفرش بي كباد اماتنا والحبان
مزمل بي حبال صبرا فقدناهو زمان
مضلل بالدموع شرقان ........
عجيب ياهودج الاحزان
مواسم الهجرة ما حانت ولا زمن الرحيل قد حان
نسافر ليك وزادنا الشربه من بحر الحزن والاهه والحرمان
وداك اليوم كان وداع الهودج المتهادي
كان جامع رجلات الحضر والريف
طيور السافل المحزونة جات بي ليله
تاركةجناها للريج والمطر والزيف
وروح ترهاقه والعباسي وروح أبواتنا
وريحة الماضي كلها جات
ملوك شايق .. وقف شاويش
منكس بي حرابو واقف بي قفاهو تابعو شايل سيف
وبعد الليلة كل بنية تلبس فوق صديره اكليل
يكون مزروع فيهو قلب الشهيد
وانت شهيدنا يا سماعين
يا الله .. يا الله .. يا الله
بعد ما شلت اسماعين
وفات
معاهو باقي كلام وباقي حنين
يالله بعد الفجعة نظل شاكرين
نظل واقفين علي بابك معاي طلبين
يكون عبود مع ود توم كذا شاهدين
قدام قبر الولي سماعين
نظل واقفين
يوم الليلة والباكر
الي ماشئت يالله
الي يوم الفصل والدين
وداك اليوم يكون يومنا
ونقالد شيخنا سماعين

وداك اليوم يكون يومنا
ونقالد شيخنا إسماعين

وداك اليوم يكون يومنا
ونقالد شيخنا إسماعين]

أبو الحسين
12-27-2006, 06:07 AM
:D :D

:D :D
ونهرب هروب ابو الحسين..


:D :D :D :D :D :D :D :D :D :D :D :D :D :D :D
أنا أبوك يا الحســــين... أنا من دانقة العمدة دي عااااااارفني ماب أهرب... هروبي إنت عااااااااارفو ساعَت يتحاوشوني كِلاَب لهَب قاعد أقوم صوف!!!:D :rolleyes: :D :eek: :cool:

نورا
12-27-2006, 09:02 PM
الوجنات الشعّن بقّن
ود العين النايم زرقن
مو زايغ رسيان وميقّن
زولن كان خدران ومحقّن
من الشوفة عروقو يطقّن
كان الدنيا بصح تتخلا
كنا بركنا معاهن فوق رملاة الحلة
الا كمان بنشوفا مذلة



سلام يا جماعة وكل سنة وانتو طيبين
لقيتكم مشيتو بعيد في قصايد ود بادي،
جابني الكلام الفوق ده وتعليق ابو الحسين قال ما وقع ليهو :D اظن ود بادي يقصد عيونن نعسانات متل الزول الخدران ... وكان ليهو يخلي الدنيا وما فيها ويقعد قصادن:D

والله اعلم!

بس يا عكود القصيدة الاخيرة النزلتها دي "ود الشايقي وزوجاته" ما وقعت لي! بحاول اقراها تاني وبعدين اطلب المساعدة:cool:
مودتي للجميع

عكود
12-28-2006, 10:26 AM
نورا حلاّبة اللبيني،

سلامات وبركة بالطلّة.
القصيدة نوقّعا ليكي . .
بس قولي عوك ونحن جاهزين.

وكان ليهو يخلي الدنيا وما فيها ويقعد قصادن :D :D
شفتي جنس الحالة دي؟
بكا الفصيل الفارق أمّو.

أخير أبو الحسين :D :D

خالد الحاج
12-28-2006, 01:35 PM
طبعا يا عكـــود أخوك مستمتع بالحوار ورغم أني وده شي طبيعي ماعندي الكتير أضيفو "كوني من شايقية كوبانهيقن وكده" مع الإعتذار لأخينا ود عطا المنان :D لكن للحوار متعته اللامتناهية وفائدته مع "قصر اللسان" .
قمت بإضافة القصيدة المرثية لصفحة شاعرنا ود بادي

تسلموا يا عالم يا جميلة

عكود
12-28-2006, 02:58 PM
للحوار متعته اللامتناهية وفائدته مع "قصر اللسان" .:D :D
خالد،
خليك قريب وجادعنا بي تحليل تحليلين،
إن شاء الله تشرح لينا المقطع البيقول:أخر الدور تقول مسحور
وما بخليلو مرةً بور
وزرعته ما بتقع واطه

خالد الحاج
12-28-2006, 03:03 PM
:D :D
خالد،
خليك قريب وجادعنا بي تحليل تحليلين،
إن شاء الله تشرح لينا المقطع البيقول:
أخر الدور تقول مسحور
وما بخليلو مرةً بور
وزرعته ما بتقع واطه

الكلام دي بتاباه:mad:
وكان للزراعتو ما بتقع واطا ده أظنو قاصدني :D :D

عكود
12-28-2006, 03:14 PM
الكلام دي بتاباه:mad:
وكان للزراعتو ما بتقع واطا ده أظنو قاصدني :D :D :D :D :D
تعرف يا خال،
السنة الفاتت متل الأيّام دي إنت كنت معانا . .
وفيها كان لقاءك بود بادي،

أيّام :(
ليتها تعود!

عكود
01-15-2007, 10:57 AM
وحتي النيل مصيرو يكون مجرد موية شاقة البيد
منو البيقدر يجيب ليكم خباراتو
رقصة موجو في الشاطئ
رواويسو , حكاياتو علّق الطيّب بشير بقلمه اللمّاح عن المقطع وقال ما معناهو:
أوّل مرّة يشوف شاعر يسخر من النيل ويصفه. .
"مجرّد موية شاقّة البيد . .
مجرّد موية شاقّة البيد"

وقد صدق!

أبو الحسين
01-16-2007, 07:22 AM
تظل مرسوم علي باب الليالي سؤال
بعد عشعشت في خاطر الغبش موال
واتبللت من الموية بين السعفة والبلالبعد عرقك برق في ترابنا حد ما شال
واتمددت غادي وجاي يمين وشمال


عليك الله يا عكود يا اخوي في غرِزْ وحَشِر وتِكِّين أكتر من دا؟؟؟!!!

حفظك الله يا العكودابي ود بادي... ورحمك الله يا اسماعين حسن وأسكنك الجنة مع عبد الله بن رواحة وحسان بن ثابت ياااااااااااارب...

كميات مودتي...

واصل إبداع عكود أخوي... قمة الإستمتاع...


أبو الحســــــــين...

عكود
01-18-2007, 10:27 AM
دي هدية ليك يا أبو الحسين. .

الطنبـــــور

الطنبور اذا ما ناح مع الغناي
عكس الريح بيجينا
والشلكلاوي ترح بالنفوس الهايمة
عاد تخرب علينا
قلوبنا الهايمة تتفقش مع الوتر الملان
ترقد عجينة
ونسري معاهو نسوقوا مع محبينا
البحازوا علي المدينة
اوتارك تنوح
الزول يقول مقطوعة من ريشات حسونة
وجوفك ياهو جوف مخزونه
حرقوا حشاها في نور المدينة
نسمع فيك مما قمنا
لا شبعنا ولا روينا
تصحي الماضي زي ما كان
ونار الشوق تجيده مقاطع النغمة الحنينة
والطنبور نغيمتو مع نسايم الليل
بلا خاطرنا ترحل تسري فينا
تهود بينا فوق وادي الشمال
والروح تروح مابين بشائر بكرة
والذكري الدفينة

حميد
01-18-2007, 10:36 AM
الطنبور اذا ما ناح مع الغناي
عكس الريح بيجينا
انغام تعوم عكس التيار..


يا الله عليك..

عكود
01-18-2007, 10:46 AM
هو داب عوم عكس التيار يا حميّد
كدي شوف دي:
والطنبور نغيمتو مع نسايم الليل
بلا خاطرنا ترحل تسري فينا
والجملة الإعتراضية "بلا خاطرنا" محكّرة كيف؟
وقدر شنو أضافت للمعنى.

محمد عثمان ود نصر
04-16-2007, 05:24 AM
أخوى عكود / ودى وسلامى

و الله آ عكود الليلى دخلت هنى إتوكرت وكيره عندى بحث مفروض أسلمه بكره أريته طاير ما مشكله خلو اليقعد إن شاء الله للسنه الجاى أصلو ود بادى مسخ على الكتب المردمه دى ..

بالنسبه ليك يا عكود وبفهمك العميق ده للقصائد الفريده دى و الله عباره عن رسالة بحث دكتوراه جاهز ..

ود نصر

عكود
04-16-2007, 11:54 AM
و الله آ عكود الليلى دخلت هنى إتوكرت وكيره عندى بحث مفروض أسلمه بكره أريته طاير ما مشكله خلو اليقعد إن شاء الله للسنه الجاى أصلو ود بادى مسخ على الكتب المردمه دى .. :D :D :D
سلامات يا ود نصر . .
شِعر ود بادي ملحوق والبوست ماهو طاير . .
دحين يا خوي بندورك تكمّل بحثك وتجينا صاد بي مهلة ومزاج،
وربّنا يوفّقك وينجّحك.
بالنسبه ليك يا عكود وبفهمك العميق ده للقصائد الفريده دى و الله عباره عن رسالة بحث دكتوراه جاهز .. البحث في قصائد مِتِل دي دايرالا زولاً مليان بالتراث لا سبيب شعرو . .
وأنا ماني الزول البيقدر يدّيهو حقّو الكامل،
وما تفاعلي مع نصوص ود بادي إلا نتيجة محبّة في ودبادي ذات نفسو . .
وفي حروفو.

تسلم يا أصيل.

عصام سرالختم
07-12-2007, 06:05 PM
فوق ...

adilassoom
07-20-2007, 12:53 AM
هـــوى يـا وليـــد
هوى يا وليد ...
حصل شارفت دغشا بدرى
فوق حجرة مخانق النيل
فى سنة تساب والشرقي
حزم القيف وطفح الكيل
وشوفتا الهيبة فوق اسيادا
والشخرى البكتل الحيل
وشفتا الجارى يحفر فى جروف كوكبنا
بس داير يشقو عديل
يجيك بي صدرو متحزم ومتلقف صفوف فى صفوف
يحاكى الخيل
ومويتو الهايجة تبلع جب
وتجقم فى مدالق السيل
وفوق الرملة مشرور العشارى طويل
معشعش بين نوايبو الطير
حليلو جزايرو جاها النيل
وحالف ما يخلى شبير
حزم اطرافا يكسر فيها
بالهدام وينحر فيها بالقرقير
وبكرة يموصها يشرب طينها
يزرع فيها شلالات هدير وهدير
وتكسح مركب النواتة عايمى
على قرون الموج جناحها كسير
رواسيها مالى اصابعوا فى المجداف
يقوم لافوق ويجى من تانى فوق الدفة
رافع ايدو ينده فى جملة الصلاح واهل الخير
هناك الموت يمين شافوهو شوف العين
ومافى شفيع ومافى مجير
تقول الزول يعرف اجلو
ومكان موتو لولا إنو ما كشفو الإله لى غير
عاد ما دام رقاب الموج تمد لسناتا
فوق للحيف تكب الصير
وشن فضل بلا الغرق البدور ناعى
وفعلا كانوا يا هو مصير
ومشيت المركب الغرقاني بين موجتين
طفروا منها النواتا بطن اللجّة قالوا اخير
تماسيحاً يقالدوا الموج يصارعوا
عتاوة العرق الكتالو مرير
ساعة يعومو بالضرعات وساعة فج
صدورن ضمة مااتبلت ولو قطيرديل يا وليد ولاد النيل
رضو الهيجة من صدروا
ومن الطيبة رضعوا كتير
الواحد فعايلو كتر ونضمو دقاق
نهرتوا يمين تسوى الفاق
ومراً أصلاً لا ضاقوه لا بنضاق
كفاك يا وليد بلاش فاقة
خلاص أنا تهتا فى الاشواق وما برجع
وهسع ضمة لا شايفك ولا بسمع .
الغالي عكود بصدق هذه أول مرة أدخل فيها ألى هذا البوست...برغم أني من أشد المعجبين بأشعار ودبادي ...وقد تعرفت عليه في بيت مولانا عبد الحكم ولد شيخ أحمد ودالفكي أبراهيم (الأراك) وهو مقيم منذ عشرات السنوات بدولة الأمارات...
أما هذا (الطوف) من (سفينة) هوي ياوليد ...فقد وصل حد الأبداع فيه ألى الذروة...وصفا وتقمصا ...أنظر لوصف مركب النواتة وهم يصارعون الموت.....هذه الصورة لايعيشها الّا الذي عاصر الفيضان وركب لجة النيل وعبابه في خضمّه....يعلم الله أنه لأبداع لايدانيه أبداع
لك وله الود